1, 2. Se a te mea ne fakasino ki ei a te “koga e tuku ei a vae” i Tusitusiga faka-Epelu?

NE FOLAFOLA faka‵lei mai ne Ieova te Atua penei: “A te lagi ko toku nofogaaliki, ka ko te lalolagi ko te koga e tuku ei oku vae.” (Isa. 66:1) E uiga ki te “koga e tuku ei ana vae” ne fai mai a ia: “Ka faka‵malu ne au te koga e tuku ei oku vae.” (Isa. 60:13, NW) E fai pefea ne ia te mea tenā? Kae se a te uiga o te mea tenā ki a tatou, ona la ko tatou e ‵nofo i te “koga e tuku ei ana vae”?

² I tafa o te fakasino atu ki te lalolagi, a te “koga e tuku ei ana vae” ne fakaaoga foki i se auala fakatusa i Tusitusiga faka-Epelu ke fakamatala i ei te faletapu mua telā ne fakaaoga ne tino Isalaelu. (1 Nofo. 28:2; Sala. 132:7) Ne tu te faletapu tenā i te lalolagi nei, kae ne fai pelā me ko te fakavae o te tapuakiga tonu. Tenā te pogai ne fai ei me gali te faletapu i te kilokiloga a Ieova, kae e faka‵malu foki ei a ia i te koga e tuku ei ana vae.

3. Se a te faletapu sili faka-te-agaga o te Atua, kae ne kamata anafea?

³ I aso nei, a te fakavae o te tapuakiga tonu ko sē fakasino atu ki se faletapu tonu. Kae se faletapu faka-te-agaga telā e sili atu i so se fale, kae e faka‵malu ei a Ieova. Te mea tenei se fakatokaga ne fai ke mafai o faka‵lei ‵tou vā mo te Atua e auala i te ‵tofi faitaulaga mo te taulaga a Iesu Keliso. Ne kamata te fakatokaga tenei i te papatisoga a Iesu i te 29 T.A. i te taimi ne fakaeke ei a  Iesu e pelā me se Faitaulaga Sili i te faletapu sili faka-te-agaga o Ieova.—Epe. 9:11, 12.

4, 5. (a) Ne fakamatala mai pefea ne te Salamo e 99 a te lasi o te loto finafinau o tino tapuaki ‵tonu o Ieova? (e) Se a te fesili e ‵tau o ‵sili ifo ne tatou ki a tatou eiloa?

⁴ A te fakaasi atu o te loto fakafetai ki te fakatokaga o te faletapu faka-te-agaga, e tavae ei a Ieova mai i te fakailoa atu o tena igoa kae fakamaluga aka a ia ona ko tena fakatokaga alofa e auala i te togiola. Ko oko loa i te fakafiafia ke iloa atu me ko silia nei mo te valu miliona o Kelisiano ‵tonu i aso nei e ga‵lue malosi o faka‵malu ne latou a Ieova! E ‵kese mai nisi tino lotu kolā e faka‵se ne te manatu me ka tavae ne latou a te Atua māfai ko tiaki ne latou te lalolagi nei kae olo atu ki te lagi, a Molimau a Ieova katoa e iloa ne latou a te manakoga ke tavae atu ki a ia i konei i te lalolagi nei kae i te taimi foki loa nei.

⁵ E tau‵tali atu eiloa tatou i te fakaakoakoga a tavini fakamaoni a Ieova telā e fakamatala mai i te Salamo 99:1-3, 5. (Faitau.) E pelā mo te fakaasiga i te salamo, a Mose, Alona, mo Samuelu ne ‵lago katoatoa atu ki te fakatokaga o te tapuakiga tonu i olotou aso. (Sala. 99:6, 7) I aso nei, koi tuai o olo atu o tavini e pelā me ne faitaulaga fakatasi mo Iesu i te lagi, a te ‵toega o ana taina fakaekegina e tavini atu mo te fakamaoni i tena faletapu faka-te-agaga i te lalolagi nei. Kae e lau i miliona o “nisi mamoe” e ‵lago atu mo te fakamaoni ki a latou. (Ioa. 10:16) E ui eiloa e kese‵kese olotou fakamoemoega, e ‵galue fakatasi a potukau katoa ke tapuaki atu ki a Ieova i konei i te koga e tuku ei a vae o te Atua. Tela la, e ‵tau o fesili ifo ki a tatou taki tokotasi eiloa, ‘e mata e ‵lago katoatoa atu au ki te fakatokaga a Ieova e uiga ki te tapuakiga ‵ma?’

6, 7. Se a te fakalavelave ne tupu ki Kelisiano i aso mua, kae se a te mea ne iloa aka i senitenali fakamuli ifo?

⁶ E seki kātoa te senitenali mai tua o te fakatuga o te fakapototoga Kelisiano, kae ne kamata o sae aka a te aposetasi telā ne ‵valo mai. (Galu. 20:28-30; 2 Tesa. 2:3, 4) Fakamuli ifo, ne gasolo eiloa o faiga‵ta ke fakamautinoa aka a latou kolā e tavini ‵tonu atu i te faletapu faka-te-agaga o te Atua. I senitenali fakamuli ifo ne oko mai te taimi ke fakamautinoa faka‵lei aka ne Ieova a mea e auala i tena Tupu fou telā ne fakasopo, ko Iesu Keliso.

⁷ I te 1919, ne fakamautinoa faka‵lei atu ei a latou kolā ne talia ne Ieova kae tavini atu i tena faletapu faka-te-agaga. Ne faka‵ma latou i te feitu faka-te-agaga ko te mea ke mafai o talia te olotou taviniga ki te Atua. (Isa. 4:2, 3; Mala. 3:1-4) A te fakaasiga telā ne lavea ne te apositolo ko Paulo i se fia senitenali mai mua ne kamata o fakataunu i se auala foliki.

8, 9. Fakamatala mai a vaega e tolu o te “palataiso” kolā ne lavea ne Paulo i se fakaasiga.

⁸ Ne fakamatala mai a te fakaasiga ki a Paulo i te 2 Kolinito 12:1-4. (Faitau.) A te mea telā ne lavea ne Paulo i se fakaasiga fakaofoofogia ne fai pelā me se fakaasiga. Ne aofia ei se mea telā ka tupu i aso mai mua, kae sē se mea telā ne tupu i ana aso. Se a te “palataiso” telā ne lavea ne Paulo i te taimi “ne avaka ki luga i te lagi tuatolu?” A te palataiso telā ne faipati ki ei a Paulo ne isi sena fakataunuga faka-te-foitino, faka-te-agaga penā foki loa i luga i te lagi, kae ne mea katoa kolā ka ‵tupu i aso mai mua. E mafai o fakasino atu ki te Palataiso faka-te-foitino, i te lalolagi nei telā ka oko mai. (Luka 23:43) E fakasino foki ki te  palataiso faka-te-agaga telā ka iloa faka‵lei ne tatou i te lalolagi fou. E se gata i ei, e mafai foki o fakasino atu ki fakamanuiaga i te “palataiso o te Atua” i luga i te lagi.—Faka. 2:7.

⁹ Kaia ne fai mai ei a Paulo me ko oti “ne lagona ne ia a pati kolā e se mafai o faipatigina, kae e se ‵tau foki o faipati ki ei se tino”? E seki oko ki te taimi ke fakamatala likiliki ne ia a mea fakaofoofogia kolā ne lavea ne ia i te fakaasiga tenā. Kae nei la, ko talia ke fai‵pati tatou ki fakamanuiaga kolā ko maua nei ne tino o te Atua!

10. Kaia e ‵kese ei te uiga o te “palataiso faka-te-agaga” mo te “faletapu faka-te-agaga”?

¹⁰ A te fakamunaga te “palataiso faka-te-agaga” ko fai pelā me se pati masani i fakasologa o ‵tou pati faka-te-agaga. E fakamatala mai ei te tu ‵kese o te tulaga faka-te-agaga telā e fai ei ke maua ne tatou te filemu fakatasi mo te Atua penā foki loa mo te kautaina. Tela la, e se ‵tau o fakaiku aka ne tatou me e ‵pau a pati konei te “palataiso faka-te-agaga” mo te “faletapu faka-te-agaga.” A te faletapu faka-te-agaga ko te fakatokaga a te Atua mō te tapuakiga tonu. Te palataiso faka-te-agaga e fakamautinoa faka‵lei mai ne ia a tino kolā ko oti ne maua ne latou te taliaga a te Atua kae ko tapuaki atu nei latou i tena faletapu faka-te-agaga.—Mala. 3:18.

11. Se a te tauliaga e maua ne tatou i aso nei telā e isi sena sokoga ki te palataiso faka-te-agaga?

¹¹ Ko oko loa i te fakafiafia ke iloa atu me talu mai i te 1919, ko oti ne talia ne Ieova a tino sē ‵lei kataoatoa ke ga‵lue fakatasi mo ia i te fakagaluegaga, fakamalosi, kae fakalauefa atu te palataiso faka-te-agaga i te lalolagi nei! E mata, e aofia koe i te galuega fakaofoofogia tenei? E mata, e fakamalosi aka koe ke fakatumau te ga‵lue fakatasi mo Ieova ke faka‵malu te ‘koga e tuku ei ana vae’?

12. Se a te loto talitonu telā e maua ne tatou katoa mai i te fakataunuga o te Isaia 60:17? (Ke onoono ki te ata i te kamataga.)

¹² A te galuega fakaofoofogia ki te ‵fuliga telā ka fai ki te vaega o te fakapotopotoga a Ieova i te lalolagi nei, ne ‵valo mai i te Isaia 60:17. (Faitau.) Ko oti ne faitau io me ne lagona ne latou kolā koi ‵fou ki te munatonu a galuega ‵gali mo ‵fuliga konei mai i nisi tino. Kae se tauliaga gali ‵ki mō taina mo tuagane kolā ne oko tonu loa ki a latou te mea tenā! Setioa eiloa o tali‵tonu latou me e auala i te Tupu telā ne fakasopo, ka takitaki kae fakatonutonu ne Ieova a Tena fakapotopotoga! E iloa ne latou me ne fakavae faka‵lei te loto tali‵tonu o latou, ko te loto talitonu telā e maua fakatasi ne tatou. A te fakalogo ki olotou tala fakaotia loto ka fakamalosi aka ei tou fakatuanaki mo tou loto talitonu ki a Ieova.

13. Se a te tiute e tuku mai ki a tatou i te Salamo 48:12-14?

¹³ Faitalia te leva o tatou i te munatonu, e ‵tau eiloa o fakailoa atu ne tatou ki nisi tino a mea e uiga ki te fakapotopotoga a Ieova. A te mauaga o se palataiso faka-te-agaga i loto i se lalolagi masei, fai mea sē tonu kae seai se alofa, e fai pelā me se vavega i aso nei! A mea ‵gali e uiga ki te fakapotopotoga a Ieova io me ko “Siona,” mo te munatonu e uiga ki te palataiso faka-te-agaga e ‵tau o fakaasi atu mo te loto fiafia ki te “suā kautupu.”—Faitau te Salamo 48:12-14.

14, 15. Ne a ‵fuliga a te fakapotopotoga ne fai talu mai i te 1970, kae ne aoga pefea a ‵fuliga konā?

¹⁴ I tausaga ko ‵teka atu nei, a tino ma‵tua konei e ‵nofo mo tatou ne iloa ne latou a ‵fuliga ne fai i te fakapotopotoga kolā ne fakaopoopo atu ki te gali o te fakapotopotoga a Ieova i te lalolagi nei. E masaua ne latou a taimi ne takitaki ei a te fakapotopotoga ne se tavini tokotasi i lō te kau toeaina, te taimi foki ne takitaki ei te ofisa lagolago ne se tavini o te ofisa lagolago kae sē ko te Komiti o te Ofisa  Lagolago, mo te taimi foki ne aumai sale a fakatakitakiga mai i te pelesitene o te Watch Tower Society kae sē mai i te Potukau Pule o Molimau a Ieova. E tiga eiloa e isi ne tino fesoasoani ki taina ‵galue fakamaoni konei, kae tokotasi loa te tino e fai ne ia a ikuga ki te fakapotopotoga, ofisa lagolago, pena foki loa mo te laumua o Molimau a Ieova i te lalolagi kātoa. I tausaga talu mai i i te 1970, ne fai a ‵fuliga ke tuku atu te tiute ki te tausiga, ki potukau o toeaina kae sē ki se tino fua tokotasi.

¹⁵ E mata, ne aoga a ‵fuliga konei? Ao, ne aoga eiloa. Kaia? Me ne fakavae loa a ‵fuliga konei ki te fanakaaga o te iloaga ki fakaakoakoga e tuku mai i te Tusi Tapu. I lō te maua o manatu mai i se pule a te tino tokotasi, a mea ‵lei katoa kolā e maua mai i “tagata e pelā me ne meaalofa” kolā ne tuku mai ne Ieova ne aoga tonu loa ki te fakapotopotoga.—Efe. 4:8; Faata. 24:6.

16, 17. Ne a ‵fuliga fakamuli nei kolā ne ‵gali ki a koe, kae kaia?

¹⁶ Ke mafaufau foki ki ‵fuliga ne fai fakamuli nei, e pelā mo ‵fuliga ki foliga, mea i loto, mo te auala e tufa atu ei ‵tou tusi. Se mea fakafiafia ke ofo atu ne tatou a tusi i se auala aoga kae gali i te galuega talai! Kae kafai ko fakaaoga ne tatou a poto ‵fou ke fakasalalau atu te munatonu e auala i te fakatuatusi i te itaneti ko te jw.org, e fakaasi atu loa ne tatou te fiafia o Ieova ke tuku atu a te takitakiga telā e ma‵nako malosi ki ei a tino kae e se maua ne latou.

¹⁷ A te suā ‵fuliga foki e se ‵tau o manatu māmā ki ei, ko te atamai ke mafai o fai a Tapuakiga a Kāiga kae ke uke foki a taimi mō sukesukega totino. E loto fakafetai foki tatou ki ‵fuliga kolā ne fai ki polokalame i fono o fenua mo fono o atufenua. E fai atu faeloa tatou me momea aka loa te ‵lei i tausaga katoa! Kae e mautinoa foki loa me fia‵fia tatou ki te uke o akoakoga kolā e tuku mai i akoga faka-te-agaga  a tatou. E lavea faka‵lei ne tatou te takitakiga a Ieova mai i fakama‵fuliga katoa konei ne fai. E tumau eiloa a ia i te fakagaligali o tena fakapotopotoga penā foki loa mo te palataiso faka-te-agaga telā ko fia‵fia nei tatou i ei.

18, 19. E mafai pefea ne tatou o fesoasoani atu ki te fakagaligaliga o te palataiso faka-te-agaga?

¹⁸ Se tauliaga lasi ‵ki ke talia ne Ieova ke fai tusaga ki te fakagaligaliga o te ‵tou palataiso faka-te-agaga. E fai ne tatou penā mai i te talaiatuga mo te loto finafinau a te tala ‵lei o te Malo kae fakatokouke a soko. I so se taimi e fesoasoani atu tatou ki te gasolo ki mua o se tino e pelā me se Kelisiano tukugina atu, e fakaasi atu i ei me ne ga‵lue tatou ki te fakalasiga o tuakoi o te palataiso faka-te-agaga.—Isa. 26:15; 54:2.

¹⁹ E mafai foki o fakagaligali aka ne tatou a te ‵tou palataiso faka-te-agaga, mai i te tumau i te faiga ke ‵lei a ‵tou uiga faka-Kelisiano. I te auala tenā, ka fai ne tatou te palataiso tenei ke gali malosi atu ki tino kolā e ‵kilo mai ki a tatou. Kae e sili atu i ‵tou iloaga i te Tusi Tapu, ko ‵tou amioga ‵ma mo ‵tou faifaiga filemu kolā e fai ei ke tosina mai a tino ki te fakapotopotoga penā foki mo te Atua mo Keliso.

20. E tusa mo pati i te Faataoto 14:35, se a te manakoga e ‵tau o maua ne tatou?

²⁰ E mautinoa eiloa me ka fia‵fia a Ieova mo Iesu māfai e ‵kilo mai ki te gali o te ‵tou palataiso faka-te-agaga i aso nei! A te fiafia telā e maua nei ne tatou i te faiga ke gali te ‵tou palataiso faka-te-agaga se ata foliki fua o te fiafia telā ka maua fakamuli ne tatou i te faiga o te lalolagi e pelā me se palataiso tonu. Ke tuku faeloa i ‵tou mafaufau a te Faataoto 14:35, telā e fai mai me i te tupu e fiafia faeloa ki te tavini telā e galue mo te “atamai.” Tela la, ke ga‵lue malosi faeloa tatou mo te atamai i te taimi e fai ei ‵tou tusaga ke fakagaligali a te palataiso faka-te-agaga!