1, 2. Ha Hebreo nga Kasuratan, ha ano mahimo magtudlok an pulong nga “turumbanan”?

ANGAYAN gud an ginsiring ni Jehova: “An langit amo an akon trono, ngan an tuna amo an akon turumbanan.” (Isa. 66:1) May kalabotan han iya “turumbanan,” hiya liwat nagsiring: “Akon hihimoon an lugar han akon mga tiil nga mahimayaon.” (Isa. 60:13) Paonan-o niya ito ginbubuhat? Ngan ano an kahulogan hito para ha aton nga nagkikinabuhi ha iya turumbanan, an tuna?

² Ha Hebreo nga Kasuratan, an pulong nga “turumbanan” diri la nagtutudlok ha tuna, ginagamit liwat ito ha paghulagway ha kadaan nga templo ha Israel. (1 Kron. 28:2; Sal. 132:7) An templo makaruruyag gud para kan Jehova tungod kay ito an sentro han tinuod nga pagsingba ngan gin-gamit ito ha paghimaya ha iya dinhi ha tuna.

3. Ano an daku nga espirituwal nga templo han Dios, ngan kakan-o ito nagtikang?

³ Yana, an sentro han tinuod nga pagsingba diri na literal nga templo ha tuna. Kondi, may-ada usa nga espirituwal nga templo, nga naghihimaya kan Jehova labaw han himaya nga maihahatag han bisan ano nga istraktura. Usa ito nga kahikayan han Dios nga  nagpapahinabo nga maipahiuli ha iya an mga tawo pinaagi han pagkasaserdote ngan halad-lukat ni Jesu-Kristo. Nagtikang ito nga kahikayan han 29 C.E. han nabawtismohan ngan gindihogan hi Jesus sugad nga Hitaas nga Saserdote ha daku nga espirituwal nga templo ni Jehova.—Heb. 9:11, 12.

4, 5. (a) Sumala ha Salmo 99, ano an karuyag gud buhaton han tinuod nga mga magsiringba ni Jehova? (b) Ano an sadang naton ipakiana ha aton kalugaringon?

⁴ Tungod han aton apresasyon ha kahikayan may kalabotan han espirituwal nga templo, gindadayaw naton hi Jehova pinaagi ha pagpasamwak han iya ngaran ngan han iya maloloy-on nga tagana nga lukat. Makalilipay gud nga sobra walo ka milyon nga tinuod nga Kristiano yana an madasigon nga naghihimaya ha iya! Diri pariho ha iba nga relihiyoso nga mga tawo nga sayop nga naghuhunahuna nga dadayawon nira an Dios kon aadto na hira ha langit, maaram an mga Saksi ni Jehova nga kinahanglan nira dayawon an Dios yana ngan dinhi ha tuna.

⁵ Hito nga paagi, ginsusubad naton an matinumanon nga mga surugoon ni Jehova nga ginhulagway ha Salmo 99:1-3, 5. (Basaha.) Sugad han iginpapakita han teksto, hira Moises, Aaron, ngan Samuel bug-os nga sinuporta ha kahikayan para ha tinuod nga pagsingba ha ira panahon. (Sal. 99:6, 7) Yana, antes mag-alagad sugad nga mga saserdote kaupod ni Jesus ha langit, an nabibilin nga mga dinihogan matinumanon nga nag-aalagad ha tunan-on nga bungsaran han espirituwal nga templo. Minilyon nga “iba nga mga karnero” an maunungon nga nasuporta ha ira. (Juan 10:16) Bisan kon magkaiba an ira paglaom, urosa hira nga nagsisingba kan Jehova dinhi ha iya turumbanan. Pero sadang pakianhan han tagsa ha aton an aton kalugaringon, ‘Bug-os ko ba nga ginsusuportaran an kahikayan ni Jehova para ha tinuod nga pagsingba?’

6, 7. Ano nga problema an naeksperyensyahan han siyahan-siglo nga mga Kristiano, ngan ano an kinahanglan mahitabo paglabay hin mga siglo?

⁶ Waray mag-usa ka siglo katapos maestablisar an Kristiano nga kongregasyon, nagtikang an apostasya sugad han igintagna. (Buh. 20:28-30; 2 Tes. 2:3, 4) Tikang hito nga panahon, nagin makuri gud an pagkilala kon hin-o an tinuod nga nag-aalagad ha Dios ha iya espirituwal nga templo. Pero paglabay hin mga siglo, gin-gamit ni Jehova hi Jesus basi makilala kon hin-o an tinuod nga nag-aalagad ha Dios ha Iya espirituwal nga templo.

⁷ Han 1919, matin-aw nga nakilala adton gin-uuyonan ni Jehova ngan nag-aalagad ha iya espirituwal nga templo. Ginlimpyohan hira ha espirituwal basi magin mas makalilipay ha Dios an ira pag-alagad. (Isa. 4:2, 3; Mal. 3:1-4) Salit an bisyon nga nakita ni apostol Pablo ginatos ka tuig na an naglabay nagtikang matuman.

8, 9. Ano nga “paraiso” an nakita ni Pablo ha bisyon?

⁸ An bisyon ni Pablo iginhuhulagway ha 2 Corinto 12:1-4. (Basaha.) Hito nga bisyon, may iginpakita hi Jehova kan Pablo nga mahitatabo ha tidaraon. Han “gindara [hi Pablo] ha ikatulo nga langit,” ano nga “paraiso” an iya nakita? An paraiso nga iya nakita may-ada pisikal, espirituwal, ngan langitnon nga katumanan; ito ngatanan maeksister ha tidaraon. Mahimo ito magtudlok ha tiarabot nga pisikal nga Paraiso dinhi ha tuna. (Luc. 23:43) Mahimo liwat ito magtudlok ha espirituwal nga paraiso nga bug-os nga maieksperyensyahan ha bag-o nga kalibotan. Dugang pa, mahimo liwat ito magtudlok ha maopay gud nga kahimtang ha langit ha “paraiso han Dios.”—Pah. 2:7.

⁹ Kondi kay ano nga nagsiring hi Pablo nga hiya “nakabati han mga pulong nga diri mahimo yaknon ngan diri uyon ha balaud nga yaknon han tawo”? Tungod kay diri ito an panahon nga  detalyado nga isaysay niya an urusahon nga mga butang nga iya nakita ha bisyon. Pero yana, gintutugotan kita ni Jehova nga isumat ha iba an mahitungod han mga bendisyon nga napapahimulsan han iya katawohan yana!

10. Kay ano nga magkaiba an “espirituwal nga paraiso” ngan an “espirituwal nga templo”?

¹⁰ Agsob naton gamiton an mga pulong nga “espirituwal nga paraiso,” kondi ano an iginpapasabot hito? Naghuhulagway ito han aton espesyal ngan hura ha espirituwal nga kahimtang, diin nagkakaada kita mamurayawon nga relasyon ha Dios ngan ha aton kabugtoan. Salit magkaiba an “espirituwal nga paraiso” ngan an “espirituwal nga templo.” An espirituwal nga templo amo an kahikayan han Dios para ha tinuod nga pagsingba. An espirituwal nga paraiso matin-aw nga nagpapakita kon hin-o an mga gin-uuyonan han Dios ngan nag-aalagad ha iya ha iya espirituwal nga templo.—Mal. 3:18.

11. May kalabotan ha espirituwal nga paraiso, ano nga pribilehiyo an may-ada kita yana?

¹¹ Makalilipay gud hibaroan nga tikang han 1919, gintutugotan ni Jehova an diri hingpit nga mga tawo ha pagkultibar, pagparig-on, ngan pagpauswag han espirituwal nga paraiso ha tuna! Nakikigbahin ka ba hinin makalilipay nga buruhaton? Naaaghat ka ba nga padayon nga magbuhat kaupod ni Jehova ha pagpasidungog han ‘lugar han iya mga tiil’?

12. Kay ano nga kombinsido kita nga natutuman gud an Isaias 60:17? (Kitaa an retrato ha tinikangan hini nga artikulo.)

¹² Hi propeta Isaias nagtagna nga damu nga pagbag-o ngan pag-uswag an mahitatabo ha tunan-on nga bahin han organisasyon han Dios. (Basaha an Isaias 60:17.) Nabasa la o nabatian han mga batan-on ngan mga bag-ohan ha kamatuoran an mahitungod hini nga mga pagbag-o ngan pag-uswag. Pero daku gud an pribilehiyo han kabugtoan nga nakaeksperyensya mismo hito! Diri urusahon nga kombinsido hira nga gin-gigiyahan ni Jehova an iya organisasyon pinaagi han iya pinili nga Hadi, hi Jesus! Maaram hira nga marig-on an basihan han ira pagsarig, ngan sugad liwat hito an aton inaabat. An pagpamati ha ira mga eksperyensya magpaparig-on han aton pagtoo ngan pagsarig kan Jehova.

13. Sumala ha Salmo 48:12-14, ano an kinahanglan naton buhaton?

¹³ Bag-ohan man kita o maiha na ha kamatuoran, kinahanglan sumatan naton an iba mahitungod han organisasyon ni Jehova. Usa gud nga milagro an pagkaada hin espirituwal nga paraiso dinhi hinin maraot nga kalibotan ni Satanas! An urusahon nga mga butang mahitungod han organisasyon ni Jehova, o “Sion,” ngan an kamatuoran mahitungod han espirituwal nga paraiso kinahanglan malipayon nga isumat naton ha “mga katulinan nga masunod.”—Basaha an Salmo 48:12-14.

14, 15. Han dekada han 1970, ano nga mga pagbag-o an ginhimo, ngan paonan-o nagpahimulos hito an organisasyon?

¹⁴ Damu nga edaran ha aton mga kongregasyon an nakaeksperyensya han pipira nga mga pagbag-o nga mas nagpaopay han tunan-on nga bahin han organisasyon ni Jehova. Nahinunumdoman pa nira han an mga kongregasyon may congregation servant imbes nga lawas han mga tigurang, han an mga nasud may branch servant imbes nga Komite han Sanga, ngan han nagtitikang pa ha presidente han Watch Tower Society an mga instruksyon imbes ha Nagmamando nga Lawas han mga Saksi ni Jehova. Bisan kon ini nga kabugtoan nga kalalakin-an may matinumanon nga mga asistant, usa la nga indibiduwal an responsable ha paghimo hin mga desisyon ha kongregasyon, ha sanga nga opisina, ngan ha headquarters. Han dekada han  1970, nagkaada hin mga pagbag-o diin an grupo hin mga tigurang na an may responsabilidad ha paghimo hin mga desisyon imbes nga usa la nga indibiduwal.

¹⁵ Mapulsanon ba ito nga mga pagbag-o? Oo. Kay ano? Tungod kay basado ito ha mas matin-aw nga pagsabot ha Kasuratan. Imbes nga usa la an naghihimo han mga desisyon, an organisasyon nagpapahimulos tikang ha mag-opay nga kalidad han ngatanan nga “regalo nga kalalakin-an” nga igintatagana ni Jehova.—Efe. 4:8; Prob. 24:6.

16, 17. Ano nga mga pagbag-o an gin-aapresyar mo gud, ngan kay ano?

¹⁶ Hunahunaa liwat an diri pa la maiha nga mga pagbag-o nga ginhimo, sugad han pagbag-o ha hitsura, sulod, ngan pamaagi ha pagpanaltag han aton mga publikasyon. Nalilipay gud kita ha pagtanyag ha ministeryo hin mga literatura nga praktikal, makapainteres, ngan makaruruyag! Ngan kon ginagamit naton an pinakabag-o nga teknolohiya ha pagpasarang han kamatuoran, pananglitan pinaagi han jw.org nga website, iginpapakita naton nga karuyag gud ni Jehova nga itagana an giya nga ginkikinahanglan gud han ngatanan nga tawo.

¹⁷ Gin-aapresyar liwat naton an pagbag-o nga ginhimo ha aton mga katirok basi magkaada kita panahon para ha pagsingba han pamilya o ha personal nga pag-aram. Nagpapasalamat liwat kita ha mga pagbag-o nga ginhimo ha mga programa ha asembleya ngan kombensyon. Nagtitikaopay gud ito kada tuig! Ngan sigurado nga nalilipay kita ha dugang nga pagbansay nga aton nakakarawat pinaagi han aton damu nga teokratiko nga eskwelahan. Iginpapakita hini nga mga pagbag-o nga gin-gigiyahan gud ni Jehova an iya organisasyon ngan padayon nga ginpapaopay niya an espirituwal nga paraiso nga aton napapahimulsan yana!

18, 19. Paonan-o kita makakabulig ha pagpaopay han espirituwal nga paraiso?

¹⁸ Gintagan kita ni Jehova hin pribilehiyo nga makabulig ha pagpaopay han aton espirituwal nga paraiso. Paonan-o naton ito ginbubuhat? Pinaagi ha pagin madasigon ha pagsangyaw han maopay nga sumat mahitungod han Ginhadian ngan paghimo hin mga disipulo. Kon nabubuligan naton an usa nga indibiduwal nga magdedikar kan Jehova, nakakabulig kita ha pagpahaluag han espirituwal nga paraiso.—Isa. 26:15; 54:2.

¹⁹ Makakabulig liwat kita ha pagpaopay han aton espirituwal nga paraiso kon padayon naton nga ginpapauswag an aton Kristiano nga personalidad. Hito nga paagi, nagigin mas makaruruyag para ha iba an espirituwal nga paraiso. Kasagaran nga diri an aton kahibaro ha Biblia kondi an aton maopay nga panggawi ngan pagin mamurayawon an nakakadani ha mga tawo ha organisasyon ngan ha urhi, kan Jehova ngan kan Jesus.

20. Sumala ha Proberbios 14:35, ano an sadang naton magin hingyap?

²⁰ Sigurado nga nalilipay hi Jehova ngan hi Jesus kon nakikita nira an aton makaruruyag nga espirituwal nga paraiso yana! An kalipay nga aton naieksperyensyahan yana ha pagpaopay hito sampol la han kalipay nga aton aabaton ha tidaraon kon bumulig na kita ha paghimo han tuna nga literal nga Paraiso. Sadang naton hinumdoman pirme an ginsisiring han Proberbios 14:35: “An kanan hadi pagpaid nahingangadto ha surugoon nga nanunulos [o nagios] ha makinaadmanon.” Hinaot pirme kita gumios nga maaramon samtang nangangalimbasog kita ha pagpaopay han aton espirituwal nga paraiso!