Kotou Gaue Ke Tuputupu Ia Te Palatiso Fakalaumalie
“E au fakakololiai anai te kogamea ae e malolo ai oku vae.”
KATIKO: 102, 75
1, 2. Kotea ʼae neʼe fakaʼuhiga ki ai te kupu “hiliaga vae” ʼi te ’u Koga Tohi-Tapu Fakahepeleo?
NEʼE ui fenei e Sehova ʼAtua: “Ko te lagi ko toku hekaaga fakahau, pea ko te kele ko toku hiliaga vae.” (Esaia 66:1) Neʼe toe palalau ia te ʼAtua ki tona “hiliaga vae” ʼi tana ui fenei: “E au fakakololiai anai te kogamea ae e malolo ai oku vae.” (Esaia 60:13) ʼE ina lava fakakololiaʼi peʼe fakamataleleiʼi feafeaʼi tona hiliʼaga vaʼe? Pea kotea ia tona fakaʼuhiga kia natou ʼae ʼe maʼuʼuli ʼi tona hiliʼaga vaʼe, ia te kele?
2 ʼI te ’u Koga Tohi-Tapu Fakahepeleo, neʼe toe fakaʼaogaʼi ia te kupu “hiliaga vae” moʼo fakaha ia te fale lotu ʼafeā ʼo Iselaele. (1 Koloniko 28:2; Pesalemo 132:7) Neʼe matalelei ia te fale lotu kia Sehova koteʼuhi neʼe ko te koga meʼa ʼae neʼe fai ai te tauhi moʼoni. Pea neʼe fakaʼaogaʼi ke fakakololiaʼi ai ia Sehova ʼi te kele.
3. Kotea ia te fale lotu ʼae ʼe fai ai te tauhi moʼoni ia ʼaho nei, pea neʼe kamata fakatuʼutuʼu ʼi te temi fea?
3 ʼE tuʼu ʼifea ia te koga meʼa ʼae ʼe fai ai te tauhi moʼoni, ia ʼaho Hepeleo 9:11, 12.
nei? ʼE mole ko he fale ohage ko te fale lotu. ʼE ko he fale lotu fakalaumalie, ʼe ina fakakololiaʼi ia Sehova ʼo lahi age. Kotea ia te fale lotu fakalaumalie ʼaia? ʼE ko te ʼu fakatuʼutuʼu ʼe fai e te ʼAtua ke feala ki te tagata hana liliu ko hona kaumeʼa pea ke atolasio kia te ia. ʼE feala ke hoko ia te fakatuʼutuʼu ʼaia ʼaki pe te sakilifisio faitotogi ʼa Sesu. Neʼe kamata ia te fakatuʼutuʼu ʼaia ʼi te taʼu 29, ʼi te temi ʼae neʼe papitema ai Sesu pea mo fakanofo ʼi tona ʼuhiga Pelepitelo Lahi ʼo te fale lotu fakalaumalie ʼo Sehova.—ʼE tonu ki te hahaʼi ʼa Sehova ke natou fakavikiviki kia te ia ʼi te kele pea ʼi te temi nei
4, 5. (1) ʼO mulimuli ki te Pesalemo 99, kotea ʼae ʼe fia fai e te kau Kilisitiano moʼoni ʼa Sehova? (2) Kotea ia te fehuʼi ʼae ʼe tonu ke tou fai kia tatou takitokotahi?
4 ʼE tou lotofakafetaʼi lahi ki te ʼu fakatuʼutuʼu ʼa te ʼAtua ʼo ʼuhiga mo te tauhi moʼoni. ʼE tou fakaha tatatou lotofakafetaʼi ʼaki tatatou fakaha ki ʼihi ia te huafa ʼo Sehova pea mo tona meʼa ʼofa ʼae ko te totogi. ʼE tou fiafia koteʼuhi ʼe ʼi ai te toko valu miliona tupu kau Kilisitiano moʼoni, ʼe natou fakavikiviki kia Sehova ʼi te ʼaho fuli. Tokolahi ʼe natou manatu ʼe tonu anai ke natou fakavikiviki ki te ʼAtua ʼi te lagi hili tanatou mamate. Kaʼe, ʼe iloʼi e te hahaʼi ʼa Sehova ia te maʼuhiga ʼae ke fakavikiviki kia te ia ʼi te kele pea ʼi te temi nei.
5 Moka tou fakavikiviki kia Sehova, ʼe tou faʼifaʼitakiʼi ai ia te ʼu kaugana agatonu ʼa te ʼAtua ohage ko tona tuʼu ia Pesalemo 99:1-3, 5. (Lau.) ʼI te temi muʼa, neʼe lagolago katoa ia te ʼu tagata agatonu ko Moisese, mo Alone pea mo Samuele ki te ʼu fakatuʼutuʼu ʼa te ʼAtua ʼo ʼuhiga mo te tauhi moʼoni. (Pesalemo 99:6, 7) Ia ʼaho nei, ʼi muʼa ʼo te kamata fakahoko e te kau fakanofo he ʼu gaue ʼi tonatou ʼuhiga pelepitelo mo Sesu ʼi te lagi, ʼe natou tauhi agatonu kia Sehova ʼi te koga ʼo te fale lotu fakalaumalie ʼae ʼi te kele. Pea ʼe lagolago agatonu kia natou ia te toko lauʼi miliona tahi ʼu “ovi.” (Soane 10:16) ʼE tauhi fakatahi ia te ʼu kutuga ʼaia ʼe lua kia Sehova. Kaʼe, ʼe tonu ke tou fai kia tatou takitokotahi ia te fehuʼi ʼaeni: ‘ ʼE au lagolago katoa koa ki te ʼu fakatuʼutuʼu ʼa Sehova ʼo ʼuhiga mo te tauhi moʼoni?’
KE KOTOU ILOʼI IA NATOU ʼAE ʼE TAUHI ʼI TE FALE LOTU FAKALAUMALIE ʼO TE ʼATUA
6, 7. Kotea ia te fihifihia ʼae neʼe hoko ʼi te temi ʼo te kau apositolo? Pea kotea ʼae neʼe hoko ʼi te taʼu 1919?
6 Heʼeki ʼosi ki ai taʼu ʼe 100 ki te fakatuʼu ʼo te kokelekasio Fakakilisitiano, neʼe mafola ia te aposetasia ohage pe ko tona fakakikite. (Gaue 20:28-30; 2 Tesalonika 2:3, 4) Hili te temi ʼaia, neʼe kua ʼasili faigataʼa ia te iloʼi ʼo te kau atolasio moʼoni ʼa te ʼAtua. ʼOsi ki ai taʼu ʼe lauʼi teau, neʼe fakaʼaogaʼi e Sehova ia Sesu ke iloʼi ai ia natou ʼae tauhi moʼoni ki te ʼAtua ʼi Tona fale lotu fakalaumalie.
7 ʼI te taʼu 1919, neʼe iloʼi lelei ia natou ʼae neʼe tali e te ʼAtua pea mo tauhi ʼi tona fale lotu fakalaumalie. Neʼe natou fai ia he ʼu fetogi ʼi tanatou tauhi ke feala ai ke tali natou e Sehova. (Esaia 4:2, 3; Malakia 3:1-4) Koia, neʼe kamata fakahoko ia te ʼu meʼa ʼae neʼe ha ki te apositolo ko Paulo ʼi he ʼu taʼu ʼe lauʼi teau ki muʼa atu.
8, 9. Kotea ia te “palatiso” ʼae neʼe sio ki ai Paulo ʼi te ʼu meʼa ʼae neʼe ha kia ia?
8 ʼE fakamatala ia te ʼu meʼa ʼae neʼe ha kia Paulo ia 2 Kolinito 12:1-4. (Lau.) ʼI te ʼu meʼa ʼae neʼe ha ki ai, neʼe fakaha ai e Sehova kia Paulo ia te aluʼaga ʼae ka hoko anai ʼi te ka haʼu. Kotea ia te “palatiso” ʼae neʼe sio ki ai Paulo ʼi te ʼu meʼa ʼae neʼe ha kia ia? ʼUluaki, ʼe lagi ko te Palatiso ʼae kua vave fakatuʼu ʼi te kele. (Luka 23:43) Lua, ʼe lagi ko te palatiso fakalaumalie haohaoa ʼae ka tuʼu anai ʼi te malama foʼou. Pea tolu leva, ʼe lagi ko te ʼu aluʼaga fakaofoofo ʼae ʼi te lagi, “te palatiso o te Atua.”—Apokalipisi 2:7.
9 Kaʼe, he koʼe neʼe ui e Paulo “nee logo leva ia ki ni palalau logolelei osi ae e mole gafua ki he tagata ke ina fakaha”? Koteʼuhi neʼe mole ko te temi ʼaia ke ina fakamahino fakalelei ai ia te ʼu meʼa fakaofoofo ʼae neʼe ha kia ia. Kaʼe ʼi te temi nei, ʼe fakagafua mai e Sehova ke tou fakaha ki ʼihi ia te ʼu tapuakina ʼe maʼu e tana hahaʼi ia ʼaho nei.
10. He koʼe ʼe kehekehe te palatiso fakalaumalie pea mo te fale lotu fakalaumalie?
10 ʼE tou tau palalau ki te palatiso fakalaumalie, kaʼe kotea ia tona fakaʼuhiga? ʼE ko he aluʼaga makehe ʼe foaki ai e te ʼAtua ia te tokalelei ki tana hahaʼi. Koia, ʼe kehekehe ia te palatiso fakalaumalie pea mo te fale lotu fakalaumalie. Ko te fale lotu fakalaumalie ʼe ko te ʼu fakatuʼutuʼu ʼa te ʼAtua ki te tauhi moʼoni. Pea ko te palatiso fakalaumalie, ʼe feala ke tou iloʼi lelei ai ia natou ʼae neʼe tali e te ʼAtua pea mo natou ʼae ʼe tauhi kia te ia ʼi tona fale lotu fakalaumalie.—Malakia 3:18.
11. Kotea ia te pilivilesio ʼe tou maʼu ia ʼaho nei?
11 ʼE ko he aluʼaga fakalotomalohi tatatou iloʼi, talu mai te taʼu 1919 neʼe fakafealagia e Sehova ki te tagata agahala ke gaue, mo fakamalohi pea mo fakatuputupu ia te palatiso fakalaumalie. ʼE kotou tokoni koa ki te fakahoko ʼo te gaue fakaofoofo ʼaia? ʼE kotou leleiʼia koa ia te pilivilesio ʼae ke kotou kaugā gaue fakatahi mo Sehova moʼo fakakololiaʼi ia ia ʼi te kele?
ʼE FAKALILIU E SEHOVA IA TANA KAUTAHI KE LAHI AGE TONA TAULEKALEKA
12. ʼE tou iloʼi feafeaʼi neʼe hoko moʼoni ia te ʼu palalau ʼae ʼe tuʼu ia Esaia 60:17? (Vakaʼi te ʼuluaki pāki.)
12 Neʼe fakakikite e te polofeta ko Esaia ʼe lahi anai te ʼu fetogi fakaofoofo ka hoko anai ʼi te koga ʼo te kautahi ʼa te ʼAtua ʼi te kele. (Lau ia Esaia 60:17.) Neʼe lau peʼe neʼe logo pe ia te kau tupulaga peʼe ko te kau Kilisitiano ʼae ʼe kei foʼofoʼou ki te ʼu fetogi ʼaia. Kaʼe tokolahi te ʼu tehina mo tuagaʼane neʼe natou maʼu ia te pilivilesio ʼae ke natou sisio ki te ʼu fetogi fakaofoofo ʼaia. Neʼe tui papau ia te ʼu kaugana agatonu ʼaia ʼe fakaʼaogaʼi e te ʼAtua ia totatou Hau ko Sesu, moʼo takitaki ia Tana kautahi. Moka tou tokagaʼi ia te ʼu aluʼaga neʼe hoko ki te kau Kilisitiano ʼaia, ʼe malohi anai tatatou tui pea mo tatatou falala ʼae kia Sehova.
Ko te “Palatiso fakalaumalie” ʼe ko he aluʼaga makehe ʼe maʼu ai e te kau Kilisitiano moʼoni ia te tokalelei ia ʼaho nei
13. ʼO mulimuli kia Pesalemo 48:13-15, kotea ʼae ʼe tonu ke tou fai?
13 ʼE tonu ki te kau Kilisitiano moʼoni fuli ke natou fakaha ki ʼihi ia te kautahi ʼa Sehova. ʼE ko he aluʼaga fakaofoofo tatatou maʼu he famili ʼe maʼu ai te tokalelei pea mo te logotahi, tatau aipe pe ʼe tou maʼuʼuli ʼi te malama agakovi ʼa Satana. Pea ʼe tonu ke tou fakaha fakafiafia ki “te taitupu ki amuli” ʼo ʼuhiga mo te kautahi ʼa Sehova pea mo te palatiso fakalaumalie.—Lau ia Pesalemo 48:13-15.
14, 15. Kotea te ʼu fetogi neʼe fai hili te taʼu 1970, pea neʼe fua lelei feafeaʼi ki te kautahi?
14 Tokolahi te hahaʼi matutuʼa ʼi ʼotatou kokelekasio neʼe natou iloʼi te ʼu fetogi ʼae neʼe feala ai ke lahi age te taulekaleka ʼo te koga ʼa te kautahi ʼa Sehova ʼi te kele. Neʼe natou manatuʼi te temi ʼae neʼe maʼu ai ʼi te ʼu kokelekasio ia te taupau ʼo te kokelekasio kaʼe mole ko te kolesi ʼo te kau tagata ʼafeā. Peʼe ko te temi ʼae neʼe ʼi ai he taupau ʼo te filiale ʼi te ʼu fenua kaʼe mole ko te Komite ʼo Te Filiale. Peʼe ko te temi ʼae neʼe ʼi ai he pelesita ʼo te Watch Tower Society moʼo takitaki te kautahi kaʼe mole ko te Kolesi Pule ʼa te kau Fakamoʼoni ʼa Sehova. Logo la ko te ʼu tehina fuli ʼaia neʼe ko he ʼu kaugana agatonu, kaʼe neʼe ko te tokotahi pe ʼae neʼe tokaga ki te toʼo ʼo te ʼu tonu ʼae ʼi te ʼu kokelekasio, mo te ʼu filiale pea mo te ʼu pilo lalahi ʼa te kau Fakamoʼoni ʼa Sehova. Hili te taʼu 1970, neʼe fai te ʼu fetogi ʼae ke ʼi ai he ʼu kutuga ʼo he ʼu hahaʼi kua fotufotuʼa ʼi te faʼahi fakalaumalie ke
natou tokakaga ki te toʼo ʼo te ʼu tonu kaʼe mole ko he tokotahi pe.15 He koʼe neʼe fua lelei ia te ʼu fetogi ʼaia ki te kautahi? Koteʼuhi neʼe fakatafito ia te ʼu fakamahino lelei ʼaia ki te Tohi-Tapu. Pea neʼe mole ko he tokotahi pe ʼae neʼe ina toʼo te ʼu tonu fuli, kaʼe ʼe maʼu e te kautahi ia te tokoni mai te kau tagata ʼafeā fuli, peʼe ko “te ʼu meʼa ʼofa ko he ʼu tagata” neʼe foaki mai e Sehova.—Efeso 4:8, MN; Taaga Lea 24:6.
ʼE foaki e Sehova ki tana hahaʼi fuli ʼi te kele katoa ia te takitaki ʼae ʼe ʼaoga ki tonatou maʼuli (Vakaʼi te palakalafe 16, 17)
16, 17. Kotea ia te ʼu fetogi fakamuli ʼae neʼe malave kia koutou, pea kotea tona tupuʼaga?
16 Kotou metitasio ki te ʼu fetogi fakamuli ʼae ʼi ʼatatou tohi. ʼE tou fiafia anai ʼi te tufa ʼo te ʼu tohi ʼae ʼe tokoni kia natou ʼi tatatou minisitelio. Kotou toe metitasio ki tatatou faʼahiga fakaʼaogaʼi ia te ʼu meʼa gaue foʼou moʼo fakamafola ia te logo lelei. Ohage la, ʼe malave ki te tokolahi ia tatatou tuʼasila ʼi te Neti jw.org pea ʼe feala ai hanatou maʼu te tokoni ʼae ʼe ʼaoga moʼoni kia natou. ʼI te ʼu fetogi fuli ʼaia, ʼe tou sisio ai ki te tokaga moʼoni ʼae ʼa Sehova ki te hahaʼi pea mo tona ʼofa ʼae kia natou.
Tou lotofakafetaʼi ki te ako ʼe tou maʼu mai te ʼu ako Fakatohi-tapu ʼa te kautahi
17 ʼE tou toe leleiʼia te ʼu fetogi ʼae neʼe fai ʼo ʼuhiga mo ʼatatou fono ke feala ai hatatou maʼu he temi ki te ako fakafamili peʼe ko te ako takitokotahi. Pea ʼe tou leleiʼia te ʼu fetogi ʼae neʼe fai ki ʼatatou polokalama ki te ʼu fakatahi fakasiliko pea mo fakafenua. Pea ʼe toe lelei age anai ʼi te taʼu fuli. ʼE tou toe lotofakafetaʼi ki te ako ʼe tou maʼu mai te ʼu ako Fakatohi-tapu ʼa te kautahi. ʼI te ʼu fetogi ʼaia, ʼe tou tokagaʼi ai ko Sehova ʼae ʼe ina takitaki ia tana
kautahi pea ʼe ina haga ʼo fakaliliu ke lahi age te taulekaleka ʼo te palatiso fakalaumalie.KOTEA ʼAE ʼE TOU LAVA FAI KE LAHI AGE TE TAULEKALEKA ʼO TE PALATISO FAKALAUMALIE?
18, 19. ʼE tou lava fakaliliu feafeaʼi te palatiso fakalaumalie ke lahi age tona taulekaleka?
18 Neʼe foaki mai e Sehova ia te pilivilesio ʼae ke tou fakaliliu totatou palatiso fakalaumalie ke lahi age tona taulekaleka. Kaʼe ʼe tou fakahoko feafeaʼi ia te faʼahi ʼaia? Tou fakamafola ʼaki he faʼafai ia te logo lelei ʼo te Puleʼaga pea mo fai he ʼu tisipulo. ʼI te temi fuli pe ʼae ʼe tou tokoni ai ki he tahi ke liliu ko he kaugana ʼa te ʼAtua, ʼe tou tokoni ai ki te fakatuputupu ʼo te palatiso fakalaumalie.—Esaia 26:15; 54:2.
19 ʼE tou toe tokoni ki te taulekaleka ʼo te palatiso fakalaumalie mo kapau ʼe tou gaue kinakina ki te hikihiki ʼo totatou ʼuhiga Kilisitiano. ʼE tou fai te faʼahi ʼaia ke leleiʼia ai e ʼihi ia te palatiso fakalaumalie. ʼI te agamahani, ʼe mole ko te ʼatamai malama pe ʼae ʼe tou maʼu ʼo ʼuhiga mo te Tohi-Tapu ʼae ʼe ʼuluaki tokagaʼi e te hahaʼi. Kaʼe ko tatatou aga ʼae ʼe maʼa pea mo agalelei ʼae ʼe ina taki natou ki te kautahi ʼa Sehova pea mo Sesu.
ʼE feala ke tou tokoni ki te fakatuputupu ʼo te palatiso fakalaumalie (Vakaʼi te palakalafe 18, 19)
20. ʼO mulimuli kia Taaga Lea 14:35, kotea ʼae ʼe tou fakaʼamu ke tou fai?
20 ʼE fiafia ia Sehova pea mo Sesu ʼi tanā sisio ki te taulekaleka ʼo te palatiso fakalaumalie ia ʼaho nei. ʼE tou logoʼi te fiafia mo kapau ʼe tou faiga ke lahi age tona taulekaleka ia ʼaho nei. Kaʼe ʼe lahi age te fiafia ʼae ka tou logoʼi anai moka tou fakaliliu ia te kele ko he palatiso moʼoni. ʼE tonu ke tou manatuʼi tuʼumaʼu ia te ʼu palalau ʼaeni ia Taaga Lea 14:35: “E fiafia te hau i te tagata faifekau poto.” Tou aga fakapotopoto moka tou gaue kinakina ki te fakamataleleiʼi ʼo te palatiso fakalaumalie.