1, 2. M’Malemba ga Cihebeli, ana maloŵe gakuti “cakuliŵatapo sajo” gakusagopolela cici?

YEHOFA MLUNGU ŵatite: “Kwinani kuli citengu cangu caucimwene, soni cilambo capasi cili cakuliŵatapo sajo cangu.” (Yes. 66:1) Pakwamba ya “cakuliŵatapo sajo” cakwe, jwalakwe ŵaŵecetesoni kuti: “Cinjicimbicisya malo gakuŵikapo sajo syangu.” (Yes. 60:13) Ana jwalakwe akusatenda yeleyi catuli? Soni pakuŵa tukusatama pa “cakuliŵatapo sajo” ca Mlungu, ana yeleyi yikutukwaya catuli?

² Maloŵe gakuti “cakuliŵatapo sajo” gangagopolelape cilambo capasi. M’Malemba ga Cihebeli ŵakamulicisye masengo maloŵega pagopolela nyumba jakulambilila jaŵajikamulicisyaga masengo Ayisalayeli. (1 Mbiri 28:2; Sal. 132:7) Nyumba jakulambililaji jaliji likulungwa lya kulambila kusyesyene pacilambo capasi. Paligongo lyeleli, jaliji jakusalala mnope m’meso mwa Yehofa. Kusimanikwa kwa nyumba jeleji kwacimbicisyaga malo gakuŵikapo sajo sya Yehofa.

3. Ana nyumba jakulambilila jausimu jikwimila cici, soni jawonecele cakaci?

³ Moŵa agano, pangali nyumba jakulambilila pacilambo capasi jajili likulungwa lya kulambila kusyesyene. Nambo pana  nyumba jakulambilila jajikusapeleka ucimbicimbi kwa Yehofa kupunda nyumba jilijose. Nyumbaji jikwimila yalinganyisye Mlungu kuti tukombolece kwilana ni jwalakwe kupitila mu mbopesi ja Yesu Klistu. Nyumbaji jawonecele mu 29 C.E. pandaŵi jele Yesu ŵabatiswe ni kusagulwa kuŵa Jwambopesi Jwamkulungwa jwa m’nyumba jakulambilila jausimu.—Ahe. 9: 11, 12.

4, 5. (a) Ana lilemba lya Salimo 99 likusasala kuti ŵakulambila ŵa Yehofa ŵasyesyene akusasacilila kutenda cici? (b) Ana jwalijose akusosekwa kuliwusya ciwusyo capi?

⁴ Pakulosya kuyamicila nyumba jakulambilila jausimuji, tukusamlumba Yehofa mwakumanyikasya lina lyakwe soni tukusamcimbicisya ligongo lya ciwombolo caŵatupele. Yili yakusangalasya kumanyilila kuti Aklistu ŵasyesyene ŵakupunda 8,000,000 akumcimbicisya Yehofa. Mwakulekangana ni ŵandu ŵadini sine ŵakusalilambusya kuti cacimlumbaga Mlungu pacaciwa ni kwawula kwinani, ŵa Mboni sya Yehofa wosope akusamanyilila kuti akusosekwa kumlumba Mlungu pacilambo capasi panopano soni ndaŵi jinojino.

⁵ Tukusakuya cisyasyo ca ŵakutumicila ŵa Yehofa ŵakulupicika ŵaŵakolasile pa Salimo 99:1-3, 5. (Aŵalanje.) Lilembali likusalosya kuti, Mose, Aloni, soni Samuyele ŵakamucisye mnope pa kulambila kusyesyene m’ndaŵi jawo. (Sal. 99:6, 7) Moŵa agano, Aklistu ŵasagulwe ŵasigalile pacilambo capasi akusatumicila kaje mu mkuli wapacilambo capasi wa nyumba jakulambilila jausimu mkanajawule kwinani kukuŵa ŵambopesi pampepe ni Yesu. ‘Ŵangondolo sine’ ŵajinji akusiŵakamucisya jemanjaji mwakulupicika. (Yoh. 10:16) Atamose kuti makuga gaŵiliga gakwete cembeceyo cakulekangana, wosope akusamlumba Yehofa ali pa cakuliŵatapo sajo ca Mlungu. M’yoyo jwalijose akusosekwa kuliwusya kuti, ‘Ana ngutenda mwakwanila yindu yakamucisya pa kulambila kusyesyene?’

6, 7. Ana m’ndaŵi ja Aklistu ŵandanda paliji cakusawusya catuli, soni cici cacatendekwe panyuma pa yaka yejinji?

⁶ Mkaniyimale yaka 100 citamilikacisye mpingo wa Ciklistu, yajasasile Baibulo pakwamba ya kusapuka kwa ŵandu yatandite kwanilicikwa. (Mase. 20:28-30; 2 Ates. 2:3, 4) Mkupita kwa ndaŵi yaŵele yakusawusya kwamanyilila ŵandu ŵasyesyene ŵaŵatumicilaga pa nyumba jakulambilila jausimu. Panyuma pa yaka yejinji, jayice ndaŵi jakuti Yehofa alondesye yindu kupitila mwa Mwenye, Yesu Klistu.

⁷ Pacayikaga caka ca 1919, ŵandu ŵaŵajiticisye Yehofa kuti atumicileje pa nyumba jakwe jausimu ŵamanyice cenene. Msimu wa Mlungu waswejesye jemanjaji kuti Yehofa ajiticisyeje undumetume wawo. (Yes. 4:2, 3; Mal. 3:1-4) Yaŵayiweni ndumetume Paulo m’mesomkulola yaka yejinji munyumamo, yatandite kwanilicikwa panandipanandi.

8, 9. Alondesye mbali sitatu sya paladaiso juŵam’weni Paulo m’mesomkulola.

⁸ Yaŵayiweni Paulo m’mesomkulola yikusasimanikwa pa lilemba lya 2 Akolinto 12:1-4. (Aŵalanje.) Kupitila m’mesomkulola, Yehofa ŵamlosisye Paulo yindu yayicitendekwa msogolo. Ana Paulo ŵam’weni “paladaiso” jwatuli ‘paŵamjigalile kwinani kwatatu’? Jwalakwe ŵam’weni Paladaiso jwa mbali sitatu. Mbali jandanda jili paladaiso jucaciyika pacilambo capasi. (Luka 23:43) Mbali jaŵili  jili paladaiso jwausimu jwajucitukamucisya m’cilambo casambano. Soni mbali jatatu jikwimila mwayiŵelele yindu kwinani “m’paladaiso jwa Mlungu.”—Ciu. 2:7.

⁹ Ligongo cici Paulo ŵasasile kuti “ŵapikene maloŵe gele mundu ngaŵa mkugaŵeceta soni gali gangaŵajilwa kuti mundu agasale”? Ndaŵi jakuti asale yindu yakusimonjesya yaŵayiweni m’mesomkulola jaliji mkanijikwane. Nambo moŵa agano kuli kwakuŵajilwa kusala yindu yambone yayipali pasikati pa ŵandu ŵa Mlungu.

10. Ana “paladaiso jwausimu” ni “nyumba jakulambilila jausimu” yikusalekangana wuli?

¹⁰ Maloŵe gakuti “paladaiso jausimu” tukusagakamulicisya masengo mnope m’likuga lya Yehofa. Maloŵega gakusalosya mwayiŵelele yindu m’likuga lyetu, yayikusatukamucisya kuti tusangalaleje soni tuŵeje pamtendele ni Mlungu soni Aklistu acimjetu. Nambo tukusosekwa kumanyilila kuti “paladaiso jwausimu” soni “nyumba jakulambila jausimu” yili yindu yakulekangana. Nyumba jakulambilila jausimu jili yaŵalinganyisye Mlungu pa kulambila kusyesyene. Paladaiso jausimu jukusatumanyisya ya ŵandu ŵaŵajiticisye Mlungu soni ŵakutumicila pa nyumba jakwe jausimu moŵa agano.—Malaki 3:18.

11. Ana moŵa agano tukwete upile watuli mu paladaiso jwausimu?

¹¹ Yili yakusangalasya kumanyilila kuti kutandila mu 1919, Yehofa ŵakundile ŵandu ŵangali umlama kuti akamuleje najo masengo gakulima paladaiso jwausimu jwa pacilambo capasi, soni kumlimbisya ni kumkusya. Ana akusakamula nawo masengo gakusosekwaga? Ana ali ŵakusacilila kwendelecela kamula masengo ni Yehofa gakucimbicisya ‘malo gakuŵikapo sajo syakwe’?

12. Ana tukusakulupilila yatuli pakwamba ya kwanilicikwa kwa Yesaya 60:17? (Alole ciwulili cacili kundanda kwa nganiji.)

¹² Masengo gakucenga yindu mu likuga lya Yehofa lya pacilambo capasi ŵagasasile mkanipaŵe pa Yesaya 60:17. (Aŵalanje.) Aklistu ŵacinandipile soni ŵane ŵacasambano aŵalasile kapena kupikana ya yindu yejinji yayicenjile m’likuga lya Yehofali. Nambo abale ni alongo ŵaŵapali yindu payacengaga akwete upile wekulungwa mnope. Mwangakayicila jemanjaji akukulupilila mnope kuti Yehofa akulolela soni kulongolela likuga lyakwe kupitila mwa Mwenye jwam’ŵisile. Kupikana yindu yasimene nayo jemanjaji mpaka kulimbisye cikulupi cetu mwa Yehofa.

13. Ana lilemba lya Salimo 48:12-14 likutupa ukumu watuli?

¹³ Cinga tuŵele tuli mu usyesyene kwa ndaŵi jelewu catuli, tukusosekwa kwasalila ŵane yakwamba likuga lya Yehofa. Atamose tukutama m’cilambo cakusakala, soni canganonyelana, nambo Aklistuwe tukusangalala ni paladaiso jwausimu jwatukwete. Tucisangalala kwasalila “ŵanace ŵacacipagwa msogolo” yindu yakusangalasya yakwamba likuga lya Yehofa soni paladaiso jausimu.—Aŵalanje Salimo 48:12-14.

14, 15. Ana m’yaka ya m’ma 1970 yindu yacenjile catuli m’likugali, soni ana yeleyi yiŵele yakamucisya mwatuli?

¹⁴ Kwa yaka yejinji, Aklistu ŵacikulile akuweni kucenga kwakulekanganalekangana kwakutendekwe m’likugali. Kucenga kweleku kutendekasisye kuti likuga lya Yehofa lya pacilambo capasi lisalale mnope. Jemanjaji akusakumbucila ndaŵi jele mumpingo mwaŵaga jwakutumicila mpingo ngaŵaga likuga lya  acakulungwa, ndaŵi jele cilambo cakolaga jwakutumicila jwa nyambi ngaŵaga Komiti ja Nyambi, soni ndaŵi jele pulesidenti jwa Watch Tower Society ni juŵalongolelaga likugali ngaŵaga Likuga Lyakulongolela lya Mboni sya Yehofa. Atamose kuti papali ŵandu ŵane ŵaŵakamucisyaga abaleŵa, nambope mundu jumo ni juŵakwete ukumu wakusagula yakutenda mumpingo, pa ofesi ja nyambi, soni ku likulungwa. M’yaka ya m’ma 1970, yindu yacenjile. Likuga lya acakulungwa ni lyalyakwete ukumu wakulolela ngaŵaga mundu jumo.

¹⁵ Ligongo cici kucenga kweleku kuŵele kwakamucisya? Ligongo lyakuti kucengaku kwatendekwe panyuma pakupikanicisya cenene Malemba. M’malo mwakuti mundu jumo asaguleje yindu, likugali likusajenda cenene ligongo lya ndamo syambone sya “mituka ja acalume” josope jaŵatupele Yehofa.—Aef. 4:8; Miy. 24:6.

16, 17. Ana kucenga kwapi kwakutendekwe pacangakaŵapa kwakukwasangalasya mnope, soni ligongo cici?

¹⁶ Aganicisyesoni ya kucenga kwa mabuku getu kwakutendekwe pacangakaŵapa. Tukusasangalala mnope kugaŵila mabuku gakamucisya soni gakusalala mu undumetume wa mumgunda. Kamulicisya masengo matala gasambano gakuwandicisya usyesyene mpela Webusayiti ja jw.org, kukusalosya kuti Yehofa ali jwakusacilila kwapa ŵandu wosope cikamucisyo cakusosecela.

¹⁷ Tukusasangalalasoni mnope ligongo lya kucenga kwa misongano jetu kuti tukoleje ndaŵi jakutenda kulambila kwa peŵasa kapena lijiganyo lyapajika. Kucenga kwakutendekwe pakwamba ya misongano jetu jekulungwakulungwa kuli kwakusangalasyasoni. Caka cilicose misonganoji jikusajonjecekwa kusangalasya kwakwe. Tukusasangalalasoni ni majiganyo gapenani  ga m’likuga lya Yehofa. Kucenga kosopeku kukulosya kuti Yehofa akulongolela likuga lyakweli soni kuti akwendelecela kusalalisya paladaiso jwausimu jwatukusangalala najo apanopano.

18, 19. Ana mpaka tutendeje yatuli kuti tusalalisyeje nawo paladaiso jwausimu?

¹⁸ Yehofa atupele upile wekulungwa wakusalalisya nawo paladaiso jwausimu. Tukusasalalisya nawo paladaisoju mwakulalicila mwamtawu ngani syambone syakwamba ya Ucimwene soni kupanganya ŵakulijiganya ŵajinji. Patumkamucisye mundu mpaka kwika pakulipeleka kwa Mlungu, tukusaŵa kuti tukusisye paladaiso jwausimu.— Yes. 26:15; 54:2.

¹⁹ Mpaka tusalalisyesoni paladaiso jwausimu mwakulingalinga kongolela ndamo syetu sya Ciklistu. Patukutenda yeleyi ŵandu akusakola lung’wanu mnope ni paladaiso jwetu jwausimu. Ndaŵi syejinji ŵandu akusajinjila m’likugali soni kuŵa paunasi ni Yehofa ni Yesu ligongo lya casa cetu soni ndamo syetu syambone ngaŵagape ligongo lya yatukusamanyilila pakwamba ya m’Baibulo.

20. Mwakamulana ni lilemba lya Miyambo 14:35, ana wosope tusacilileje kutenda cici?

²⁰ Yehofa ni Yesu akusasangalala mnope pakulola kusalala kwa paladaiso jwetu jwausimu. Mwatukusasangalalila moŵa agano patukusalalisya paladaiso jwausimuju, yikwamba kulosya panandipe mwatucisangalalila patucikamulaga masengo gakusalalisya cilambo cosope kuti ciŵe paladaiso. Ndaŵi syosope tukumbucileje maloŵe ga pa Miyambo 14:35, gagakusati: “Mwenye akusasangalala ni jwakutumicila jwakusatenda yindu mwalunda.” Kwende wosope tutendeje yindu mwalunda patukukamula masengo gakusalalisya paladaiso jwausimu.