Mu Ayuweg fare Paradis ni Be Yip’ Fan Ban’en ni Nge Yan i Par ni Kari Gamog u P’eowchen Got

“Gu ra tolangnag e gin ni gu ma gifeg e rifrif u eg ngay.”​—ISA. 60:13, NW.

TANG: 28, 48

RAYOG NI NGAM WELIY?

Mang e baadag e tin riyul’ e tapigpig rok Jehovah ni ngar rin’ed?

Mang fare “paradis” ni guy apostal Paul u nap’an nni pilyeg e changar rok?

Uw rogon ni ngad ayuweged fare paradis ni be yip’ fan ban’en ni nge yan i par ni kari gamog u p’eowchen Got?

1, 2. Mang fan fare thin ni ‘gin ni yima gifeg e rifrif u ey ngay’ nrogon ni kan weliy ko Pi Babyor ko Bible nni Yoloy Nsom’on ni Thin ni Hebrew?

 KE YOG Jehovah Got ni gaar: “Tharmiy e tagil’ig, ma fayleng e gu ma gifeg e rifrif u eg ngay.” (Isa. 66:1) Ki weliy murung’agen e gin ni ‘ma gifeg e rifrif u ay ngay’ ni gaar: “Gu ra tolangnag e gin ni gu ma gifeg e rifrif u eg ngay.” (Isa. 60:13, NW) Uw rogon ni ma rin’ e re n’ey? Ma faanra gad be par ko gin ni ma ‘gifeg Got e rifrif u ay ngay,’ me ere mang rogon e pi thin ney ngodad?

² U lan e Pi Babyor ko Bible nni Yoloy Nsom’on ni Thin ni Hebrew e gathi kemus ni yima fanay fare thin ni ‘gin ni yima gifeg e rifrif u ey ngay’ ni nge yip’ fan e fayleng, ya ku yima fanay u nap’an ni yibe weliy murung’agen fare tempel ni i liyor piyu Israel riy kakrom. (1 Kron. 28:2; Ps. 132:7) Re tempel nem e immoy u roy u fayleng, ma aram tagil’ e bin riyul’ e liyor. Aram fan nrib gamog e re tempel nem u p’eowchen Jehovah. Maku be tolangnag e gin ni ma gifeg Jehovah e rifrif u ay ngay.

3. Mang fare tempel rok Got nib fanathin? Wuin e ni sunmiy e re yaram ney?

³ Machane, ngiyal’ ney e dakurud liyorgad ngak Got u tempel ni bod ni un rin’ kakrom. Fare tempel ni gad ma liyor riy ngak Jehovah e gathi  ba naun. Re tempel nem e ba fanathin ma ma n’uf Jehovah u boch e kanawo’ nib thil nga rogon ni un rin’ kakrom. Re n’em ni kan fanathinnag nga ba tempel e aram e yaram rok Got ni ke fal’eg rogon ke tay nrayog ni nge bing e kanawo’ ko girdi’ ni nge fel’ e tha’ u thilrad Got mar pigpiggad ngak u daken fare biyul ni pi’ Jesus Kristus. I sum e re yaram ney u nap’an e duw ni 29 C.E. u nap’an nni taufenag Jesus, ma aram min dugliy ni nge mang fare Prist Nth’abi Tolang ko fare tempel rok Jehovah nib fanathin.​—Heb. 9:11, 12.

4, 5. (a) Mang e baadag e tin riyul’ e tapigpig rok Jehovah ni ngar rin’ed nrogon nib puluw ko Psalm 99? (b) Mang deer e susun ni nge bagadad me fith ir riy?

⁴ Bochan nrib ga’ fan e re yaram ney u wan’dad, ma aram fan ni gad ma pining e sorok riy ngak Jehovah ni aram e gad ma weliy murung’agen fithingan ni ngan nang, maku gad ma pining e magar ngak ko fare biyul ni ke pi’ ni fan ngodad. Ri gad ba felfelan’ ni bochan e ke pag meruk milyon e tin riyul’ e Kristiano ni yad be pining e sorok ngak Jehovah e ngiyal’ ney! Bay boch e girdi’ ko pi yurba’ i teliw ni yad ma lemnag nnap’an ni yad ra yan nga tharmiy ma aram e ngiyal’ ni yad ra pining e sorok ngak Got. Machane, Pi Mich Rok Jehovah e yad manang nib t’uf ni ngar pininged e sorok ngak Got u roy u fayleng e chiney.

⁵ Gad ra rin’ e re n’ey, ma aram e gad be folwok ko pi tapigpig rok Jehovah ni yad ba yul’yul’ ni kan weliy murung’agrad ko Psalm 99:1-3, 5. (Mu beeg.) Be tamilangnag e re tang ney ni i fol Moses, nge Aron, nge Samuel ko re yaram nem ni ke ngongliy Got ni fan ko bin riyul’ e liyor ni yima tay ngak. (Ps. 99:6, 7) Chiney e, u m’on ni nge un e tin ni ka bay i girdien fachi ulung ngak Jesus ko gagiyeg u tharmiy ni yad boch e prist, ma yad ma pigpig ngak Jehovah u fayleng u lan e yoror ko fare tempel nib fanathin. Maku bokum milyon “yugu boch e saf” ni yad be ayuweg e re ulung ney. (John 10:16) Yugu aram rogon nib thil e athap ko gal ulung ney, machane yad be pigpig ngak Jehovah u roy u fayleng ko gin ni ma gifeg e rifrif u ay ngay nib taareban’rad. Machane, ba fel’ ni nge bagadad me fith ir ni nge gaar, ‘Gu be fol u rogon ni ke yarmiy Jehovah e bin riyul’ e liyor ni ngaun tay ngak, fa?

PIIN NI YAD BE PIGPIG KO FARE TEMPEL ROK GOT NIB FANATHIN

6, 7. Mang magawon e sum u lan e ulung ko tin som’on e Kristiano? Mang e ni rin’ boch e chibog nga tomuren?

⁶ Ba lich ko raay e duw u tomuren ni ke sum e ulung ni Kristiano, ma aram me digey boch e girdi’ e bin riyul’ e liyor mi yad chel ngar togopuluwgad ngay ni bod rogon ni kan yiiynag u m’on riy. (Acts 20:28-30; 2 Thess. 2:3, 4) Tomuren e re n’ey, ma aram me mo’maw’ ni ngan nang ko mini’ e piin nriyul’ ni yad be pigpig ngak Got ko fare tempel rok nib fanathin. Boch e chibog nga tomuren mfin aram e ngiyal’ ni tamilangnag Jehovah boch ban’en u daken Jesus Kristus ni ke mang Pilung.

⁷ Nap’an e duw ni 1919, ma aram me gagiyel ko mini’ e piin nib m’agan’ Jehovah ko liyor ni yad be tay ngak ma yad be pigpig ko fare tempel rok nib fanathin. Aram e ngiyal’ nni beechnag e liyor ni yad be tay ya nge yag ni m’agan’ Got ngay. (Isa. 4:2, 3; Mal. 3:1-4) Ku aram e ngiyal’ ni tabab ni nge lebug e n’en nni pilyeg e changar rok apostal Paul nge guy boch e chibog u m’on riy.

8, 9. Mang fare “paradis” ni guy Paul u nap’an nni pilyeg e changar rok?

⁸ Re n’em nni pilyeg e changar rok Paul nge guy e bay murung’agen ko 2 Korinth 12:1-4. (Mu beeg.) Re n’em ni guy Paul e be dag yaan ban’en nra buch nga m’on, gathi ban’en ni buch ko ngiyal’ ni immoy riy. Ere, nap’an nni fek Paul “ko thal nth’abi tolang e tharmiy,” ma kun “paradis” e guy? Fare paradis ni weliy Paul murung’agen e rayog ni nge yip’ fan e paradis ni gad be sonnag. (Luke 23:43) Ku rayog ni nge yip’ fan ba paradis nib fanathin ara gapas nge taareban’ nra moy u thilin Got nge girdi’ u lan e bin nib beech e fayleng. Maku rayog ni nge yip’ fan e gapas ni bay u tharmiy ko fare “Milay’ [“paradis,” NW] rok Got!” ​—Rev. 2:7.

 ⁹ Ere, mang fan ni yog Paul ni ke “rung’ag bogi ban’en riy ndabiyog ni ngan pilyeg ko thin, ni bogi n’en ndab ni pag nge weliy dap’i l’ugun e girdi’”? I yog e re n’ey ni bochan e dawori taw nga nap’an ni nge weliy fan e pi n’em ni kan pilyeg e changar rok ke guy. Machane, chiney e ke taw nga nap’an ni ngad weliyed murung’agen e gapas nge taareban’ ni bay u thilin e pi tapigpig rok Got e ngiyal’ ney!

10. Mang fan nib thil fan fare “paradis ni be yip’ fan ban’en” nge fare “tempel nib fanathin”?

¹⁰ Ngiyal’ ney e ba ga’ ni gad ma weliy murung’agen fare “paradis ni be yip’ fan ban’en”? Ere, mang e be yip’ fan e re n’ey? Re n’ey e be yip’ fan e gapas ni bay u thildad Got nge pi walagdad. Machane, dab da lemnaged ni taareb rogon fan fare “paradis ni be yip’ fan ban’en” nge fare “tempel nib fanathin.” Ya fare tempel nib fanathin e be yip’ fan e yaram rok Got ni fan ko bin riyul’ e liyor. Ma fare paradis ni be yip’ fan ban’en e be dag rarogon e liyor ni be tay e piin ni yad ba fel’ u wan’ Got ma yad be pigpig ngak e ngiyal’ ney ko fare tempel nib fanathin.​—Mal. 3:18.

11. Mang reb e tow’ath ni bay rodad e ngiyal’ ney?

¹¹ Ri gad ba felfelan’ ni bochan e ka nap’an e duw ni 1919, ma ke pag Jehovah boch e girdi’ ndawor ra flontgad ni ngar uned ngak i ngongliy rogon, ma yad be mon’ognag, ma yad be ga’nag e re paradis ney u fayleng ni be yip’ fan ban’en! Ga be un i rin’ e re maruwel ney, fa? Ga baadag ni ngam maruwelgow Jehovah u taabang ya nge yag nim un i tolangnag e ‘gin ni ma gifeg e rifrif u ay ngay,’ fa?

BE MON’OG E ULUNG ROK JEHOVAH I YAN YA NGE YAG NI PAR NIB GAMOG U P’EOWCHEN

12. Uw rogon ni kad nanged ni ke lebug fare thin ni bay ko Isaiah 60:17? (Mu guy e sasing ni bay u tabolngin e re article ney.)

¹² Kan yiiynag ko Isaiah 60:17 murung’agen boch ban’en ni yira thilyeg ko ulung rok Jehovah u fayleng. (Mu beeg.) Piin ni ka fin ra bad ko tin riyul’ e dabisiy ni kar beeged murung’agen e pi n’ey ara kar rung’aged murung’agen ni ke weliy boch e girdi’. Machane, rib tow’ath e pi walag ni kar guyed rogon ni ke thil e pi n’ey! Aram fan nrib mich u wan’rad ni be pow’iy Jehovah e ulung Rok u daken e Pilung rodad ni aram Jesus! Ba mudugil e n’en ni ke pagan’rad ngay, maku arrogodad. Ere, nap’an ni yad ra weliy murung’agen boch ban’en ni kar guyed ara ke buch rorad u nap’an ni yad be pigpig ngak Jehovah, ma ri ma gelnag e michan’ nge pagan’ rodad ngak Jehovah.

13. Mang e ba milfan ngodad ni ngad rin’ed nrogon ni be yog e Psalm 48:12-14?

¹³ Demtrug ko ke n’uw nap’an ni kad bad ko tin riyul’ fa ka gad ba beech, ma thingar da weliyed ko girdi’ murung’agen e ulung rok Jehovah. Gapas nge taareban’ ni bay u thilin e pi tapigpig rok Got e ngiyal’ ney ni yad be par u lan e re fayleng rok Satan ney ni kari gel e kireb riy, e rriyul’ nrib maang’ang! Thingar da felfelan’gad ngay ni ngad weliyed ngak e tin ka bay fini yib e “mfen” e tin ni kad nanged u murung’agen yu “Zion” ara ulung rok Jehovah, nge fare paradis ni be yip’ fan ban’en.​—Mu beeg e Psalm 48:12-14, BT.

14, 15. Mang boch ban’en ni kan thilyeg ko ulung rok Got u tomuren e duw ni 1970? Uw rogon ni ke yib angin e pi n’ey ko ulung rok Got?

¹⁴ Boor e piin ni ke n’uw nap’rad u lan e ulung rodad ni kar guyed rogon ni kan thilyeg boch ban’en ko ulung rok Jehovah u fayleng ya nge yag ni nge gamog u p’eowchen. Ur moyed ko ngiyal’ ni baaram nra reb e ulung ma bay be’ riy ni ka nog e congregation servant ngak, ma dariy e piin piilal, ma pi branch ofis e bay be’ riy ni ka nog e branch servant ngak, ma dariy e Branch Committee, ma tochuch rodad e immoy e president riy ara en ni yima yog e president ko Watch Tower Society ngak ni ir e ma yog e thin, ma dawori sum fare Ulung ni Ma Pow’iyey ko Pi Mich Rok Jehovah. Yugu aram rogon ni immoy boch e walag ni ur ayuweged e pi walag nem, machane ngiyal’ nem e kemus ni taabe’ e ir e ma yog e thin u lan e ulung, nge pi branch ofis, nge tochuch rodad. Tomuren e duw ni 1970, ma aram min yarmiy ni nge yan i par ni gathi kemus ni taabe’ e ir e nga i dugliy  e n’en ni ngan rin’, ya nge yan i par nib ulung i walag ni pumoon ni yad boch e piilal u lan e ulung.

¹⁵ Ere gur, ke yib angin ngodad e pi n’ey ni kan thilyeg? Arrogon. Ni mang fan? Ya bochan ni pi n’ey ni kan thilyeg e ba puluw nga rogon ni be tamilang boch e thin nu Bible u wan’uy. Chiney e gathi yigoo taabe’ e ir e ma dugliy e n’en ni ngan rin’, ya bay e piin piilal ara pi pumoon ni ‘tow’ath’ ni ke pi’rad Jehovah ni yad ma ayuweg e ulung, ma gubin e girdi’ ni ma yib angin e ayuw ni yad ma pi’ ngorad.​—Efe. 4:8, 11; Prov. 24:6.

16, 17. Mang boch ban’en ni kan thilyeg u lan e ulung rok Jehovah nri ga baadag, ma mang fan?

¹⁶ A kum lemnag boch ban’en ni kan thilyeg u rogon yaan e pi babyor rodad ni yibe ngongliy, nge pi n’en ni bay riy, nge rogon ni yibe wereg ko girdi’. Ri gad ba felfelan’ ngay ni gad ma wereg e pi babyor ney u nap’an e machib nib puluw e thin riy nga rarogon e par ko girdi’, maku yira adag ni ngan beeg. A kum lemnag rogon ni gad be fanay e computer nge Internet ni ngad wereged fare thin nib fel’ riy ko girdi’. Bod ni fare website rodad ni ka nog e jw.org ngay e be yag ni nge ayuweg boor e girdi’. Ere, pi n’ey ni kan thilyeg u lan e ulung rodad e be dag nriyul’ nib t’uf e girdi’ rok Jehovah ma ri ma lemnagrad.

¹⁷ Ku gad ba felfelan’ ko n’en ni kan thilyeg u rogon e ngiyal’ ni gad ma tay e pi muulung rodad ni bochan e nge yib e tayim ni ngaud ted e Fol Bible ni Tabinaw ara fol Bible ni goo gadad. Ku gad ba felfelan’ nga boch ban’en ni kan thilyeg u rogon ni yima tay e pi assembly nge convention rodad. Ba da ke gubin e duw ni be mon’og e pi n’ey i yan! Maku gad ba felfelan’ nga rogon ni ku yibe mon’ognag rogon e skul ni yibe tay ngodad u daken boch e skul ni ke ngongliy e ulung rok Got ni gad ma un ngay. Gubin e pi n’ey ni be m’ug riy ni Jehovah e ir e be pow’iy e ulung rok ma ka be ulul i mon’ognag e re paradis ney ni be yip’ fan ban’en ya nge yag ni nge yan i par ni kari gamog u p’eowchen!

 ROGON NRAYOG NI NGAM UN I FAL’EG E RE PARADIS NEY NI BE YIP’ FAN BAN’EN NGE YAN I PAR NI KARI MANIGIL

18, 19. Uw rogon nrayog ni ngad ayuweged fare paradis ni be yip’ fan ban’en ni nge yan i par ni kari gamog u p’eowchen Got nge girdi’?

¹⁸ Ri gad ba tow’ath ni be fanaydad Jehovah ni ngad uned i ngongliy fare paradis ni be yip’ fan ban’en ni nge yan i par ni kari gamog u p’eowchen. Gad ma rin’ e re n’ey u daken fare maruwel ni machib ni gad ma un ngay nge rogon ni gad ma ayuweg boch e girdi’ ni ngar manged boch i gachalpen Jesus. Urngin yay ni gad ra ayuweg be’ ni nge ognag e yafas rok ngak Got ni nge pigpig ngak, ma aram e gowa gad be ga’nag e re paradis ney i yan.​—Isa. 26:15; 54:2.

¹⁹ Ku rayog ni ngad ayuweged e re paradis ney ni be yip’ fan ban’en ni nge yan i par ni kari gamog u p’eowchen Got ni aram e ngad athamgilgad ni ngaud daged e ngongol nib fel’. Ya re n’ey e ku ra ayuweg e re paradis ney ni ngki par nib gamog u p’eowchen e girdi’. Ba ga’ ni ngongol nib fel’ ni gad ma dag nge gapas ni bay u thildad e aram e n’en ni ma k’aring e girdi’ ni ngar adaged ni ngar bad ko ulung rodad mar filed murung’agen Jehovah nge Jesus, gathi urngin ban’en ni gad manang u Bible.

20. Mang e susun ni ngad adaged ni ngad rin’ed nrogon ni be yog e Proverbs 14:35?

²⁰ Dariy e maruwar riy nrib gel e felfelan’ ni ma tay Jehovah nge Jesus u nap’an ni yow ra guy feni manigil e re paradis ney ni be yip’ fan ban’en! Felfelan’ ni gad ma tay e ngiyal’ ney u nap’an ni gad be guy rogon ni be mon’og e re paradis ney e dabi chugur ni nge taareb rogon nga gelngin e felfelan’ ni gad ra tay u nap’an ni yira fal’eg e re fayleng ney nge mang paradis boch nga m’on. Dab da paged talin fare thin ni bay ko Proverbs 14:35 (BT) ni faan be gaar: “Pi pilung e ma felfelan’ ko tapigpig rok nib salap.” Ere, ngad athamgilgad ngaud ngongolgad u fithik’ e gonop u nap’an ni gad be fal’eg fare paradis ni be yip’ fan ban’en ni nge yan i par ni kari gamog u p’eowchen Got!

[Deer ni ngan pi’ e fulweg riy]