1, 2. Teʼ Kiliʼich Tsʼíiboʼob ich Hebreooʼ, ¿baʼax u kʼáat u yaʼal le tʼaanoʼob «u kúuchil u jetsʼtal in wook[oʼ]»?

JÉEOBAEʼ tu yaʼalaj: ‹Le kaʼanoʼ in jalaʼach kʼáancheʼ [wa trono], luʼumeʼ u kúuchil u jetsʼtal in wook› (Isa. 66:1). Tsʼoʼoleʼ ka tʼaanaj tu kaʼatéen tiʼ ‹u kúuchil u jetsʼik u yookeʼ›, tu yaʼaleʼ yaan u «nojbeʼenkúuntik» (Isa. 60:13, TNM). ¿Bix u nojbeʼenkúuntik wa u jatsʼutskíintik Jéeoba le Luʼum tuʼux ku jetsʼkúuntik u yookoʼ? ¿Baʼax yaan u yil t-éetel?

² Teʼ Kiliʼich Tsʼíiboʼob ich Hebreooʼ le tʼaanoʼob «u kúuchil u jetsʼtal in wook[oʼ]» ku meyaj utiaʼal u yúuchul tʼaan tiʼ u úuchben temploil Israel (1 Cró. 28:2; Sal. 132:7). Le templooʼ jach jatsʼuts tu táan Jéeoba tumen le ku meyaj kaʼach utiaʼal u adorartaʼal way Luʼumeʼ.

3. 1) ¿Baʼax ku meyaj utiaʼal u adorartaʼal Jéeoba bejlaʼeʼ? 2) ¿Baʼax kʼiin ka káaj u meyaj le templo espiritualoʼ?

³ ¿Baʼax ku meyaj bejlaʼa utiaʼal u adorartaʼal Jéeobaeʼ? Bejlaʼeʼ maʼatech u meyaj junpʼéel templo jeʼex le meyajnaj tu kʼiinil le israelitaʼoboʼ. Baʼaxeʼ ku meyaj junpʼéel templo espiritual, lelaʼ maas ku tsʼáaik nojbeʼenil wa ku beetik u alabartaʼal Jéeoba. ¿Baʼax le templo espiritualoʼ? Letiʼe baʼaxoʼob u tsʼaamaj Dios utiaʼal ka páajchajak k-adorartik yéetel k-bisikba tu  yéeteloʼ, lelaʼ chéen ku béeytal yoʼolal u kuxtal Jesús tu kʼubaj t-oʼolaloʼ. ¿Baʼax kʼiin ka káaj u meyaj le temploaʼ? Káaj u meyaj tu añoil 29 le ka tsʼoʼok u yokjaʼ Jesús yéetel le ka yéeyaʼab tumen Jéeoba utiaʼal ka u beet u maas Nojoch Sacerdoteil teʼ temploaʼ (Heb. 9:11, 12).

4, 5. 1) Jeʼex u yaʼalik Salmo 99, ¿baʼax taak u beetik le máaxoʼob meyajtik Jéeobaoʼ? 2) ¿Baʼax unaj u tukultik cada juntúul tiʼ toʼon?

⁴ Toʼoneʼ jach k-tsʼáaik u graciasil tiʼ Dios yoʼolal le baʼaxoʼob u tsʼaamaj utiaʼal u páajtal k-adorartikoʼ. Ken k-tsikbalt tiʼ uláakʼ máakoʼob yoʼolal u kʼaabaʼ Jéeoba bey xan yoʼolal u Paal tu tsʼáaj t-oʼolaloʼ, k-eʼesik k-tsʼáaik gracias tiʼ. Jach kiʼimak k-óol tumen teʼ kʼiinoʼobaʼ yaan maas tiʼ ocho millones máakoʼob adorartik Jéeoba sáamsamal. Teʼ kʼiinoʼobaʼ le máakoʼoboʼ ku creertikoʼobeʼ ken kíimkoʼobeʼ yaan u binoʼob kaʼan utiaʼal u adorartikoʼob Dios, chéen baʼaleʼ le máaxoʼob meyajtik Jéeobaoʼ u yojloʼob desde bejlaʼa kʼaʼabéet u adorartikoʼob way Luʼumeʼ.

⁵ Ken k-adorart Jéeobaeʼ táan k-seguertik u ejemplo le máaxoʼob meyajt Dios úuchjeakil ku chʼaʼchiʼitaʼal teʼ Salmo 99:1 tak 3 yéetel 5 (xoke). Le máaxoʼob chúukpaj u yóoloʼob jeʼex Moisés, Aarón yéetel Samueloʼ tu adorartoʼob Jéeoba jach jeʼex úuchik u yaʼalikoʼ (Sal. 99:6, 7). Teʼ kʼiinoʼobaʼ le máaxoʼob yéeyaʼanoʼoboʼ táan u meyajtikoʼob Jéeoba tu táankabil le templo espiritualoʼ, letiʼobeʼ yéetel chúukaʼan óolal táan u meyajtikoʼob Jéeoba desde antes tiʼ u binoʼob teʼ kaʼan utiaʼal u beet u sacerdoteiloʼob yéetel Jesusoʼ. Letiʼobeʼ táan xan u yáantaʼaloʼob tumen u millonesil «uláakʼ tamanoʼob» (Juan 10:16). Jeʼex k-ilkoʼ junmúuchʼ u adorartikoʼob Jéeoba. Chéen baʼaleʼ cada juntúul tiʼ toʼoneʼ unaj u tuukul tiʼ lelaʼ: «¿Táan wa in apoyartik le templo espiritual wa le baʼaxoʼob u tsʼaamaj Dios utiaʼal ka páajchajak u adorartaʼaloʼ?».

6, 7. ¿Baʼax káaj u yantal ichil le múuchʼuliloʼ, yéetel baʼax úuch desde tu añoil 1919?

⁶ Mix cien años káajak le múuchʼuliloʼob ka káaj u yantal le apostasía jeʼex aʼalaʼaniloʼ (Bax. 20:28-30; 2 Tes. 2:3, 4). Ka tsʼoʼok lelaʼ maas talamchaj u yilaʼal máax jach tu jaajil adorartik Jéeoba. Máan yaʼab tiempo tak ka túuxtaʼab Jesús tumen Jéeoba utiaʼal ka u yeʼes máaxoʼob jach tu jaajil meyajtik Dios ichil u templo espiritual.

⁷ Desde 1919, káaj u yilaʼal máaxoʼob kʼamaʼanoʼob tumen Dios yéetel ku meyajoʼob teʼ templo espiritualoʼ. Letiʼobeʼ anchaj u kʼexkoʼob jujunpʼéel baʼaloʼob utiaʼal u meyajtikoʼob Jéeoba jeʼex uts tu tʼaanoʼ (Isa. 4:2, 3; Mal. 3:1-4). Le baʼaxoʼob káaj u yúuchlaʼ úuchiliʼ u yil le apóstol Pablo ichil junpʼéel náayoʼ.

8, 9. ¿Baʼax le «paraíso» tu yilaj Pablooʼ?

⁸ Le baʼax tu yilaj Pablo ichil junpʼéel náayoʼ ku chíikpajal tiʼ Kaʼapʼéel tiʼ Corintoiloʼob 12:1 tak 4 (xoke). Teʼ náayoʼ Jéeobaeʼ tu yeʼesaj tiʼ Pablo junpʼéel baʼax kun úuchul teʼ kʼiinoʼob ku taaloʼ. ¿Baʼax le «paraíso» tu yilaj Pablooʼ? Yáaxeʼ maʼ xaaneʼ táan u tʼaan tiʼ le Paraíso kun antal way Luʼum maʼ kun xáantaloʼ (Luc. 23:43). U kaʼapʼéeleʼ maʼ xaaneʼ táan u tʼaan tiʼ le paraíso espiritual kun antal teʼ túumben luʼumoʼ. U yóoxpʼéeleʼ maʼ xaaneʼ táan u tʼaan tiʼ u «paraíso Dios» wa le bix jatsʼutsil le kuxtal yaan teʼ kaʼanoʼ (Apo. 2:7).

⁹ ¿Baʼaxten tu yaʼalaj Pablo «tu yuʼubaj tʼaanoʼob maʼ tu páajtal u yaʼalaʼaloʼob  yéetel maʼ uts u yaʼalaʼal tumen wíinikiʼ»? Tumen maʼ u yorail u tsolik tuláakal le baʼaxoʼob tu náaytoʼ. Pero bejlaʼeʼ Jéeobaeʼ tsʼoʼok u yaʼaliktoʼon ka k-tsikbalt tiʼ uláakʼ máakoʼob le jatsʼuts baʼaloʼob yaantoʼon ichil u kaajaloʼ.

10. Le paraíso espiritualoʼ, ¿láayliʼ wa letiʼe templo espiritualoʼ?

¹⁰ Tiʼ toʼoneʼ suuk u meyaj le tʼaan paraíso espiritualoʼ. Chéen baʼaleʼ, ¿baʼax u kʼáat u yaʼale? Letiʼe jeetsʼelil yéetel kiʼimak óolal ku tsʼáaik Dios tiʼ u kaajaloʼ. Le paraíso espiritualoʼ, ¿láayliʼ wa letiʼe templo espiritualoʼ? Maʼatech, tumen le templo espiritualoʼ letiʼe baʼaxoʼob u tsʼaamaj Dios utiaʼal u páajtal k-adorartikoʼ. Le paraíso espiritualoʼ ku yeʼesik máaxoʼob kʼamaʼanoʼob tumen Dios yéetel máaxoʼob adorartik ichil le templo espiritualoʼ (Mal. 3:18).

11. ¿Baʼax jatsʼuts meyajil u tsʼaamajtoʼon Jéeoba?

¹¹ Jach ku kiʼimaktal k-óol k-ojéeltikeʼ desde 1919, Jéeobaeʼ tu tsʼáajtoʼon u páajtalil k-nojochkíintik yéetel k-jatsʼutskíintik le paraíso espiritual kex j-kʼeban máakoʼonoʼ. ¿Táan wa a wáantaj utiaʼal u beetaʼal le jatsʼuts meyajaʼ? ¿Ka wilik wa bey junpʼéel nojoch privilegio a wáantaj utiaʼal ka adorartaʼak Jéeoba tiʼ tuláakal yóokʼol kaab?

12. ¿Baʼaxten k-aʼalik tsʼoʼok u béeytal le baʼax ku yaʼalik Isaías 60:17? (Ilawil le foto yaan tu káajbal le xookaʼ.)

¹² Le profeta Isaíasoʼ tu yaʼaleʼ yaʼab jatsʼuts baʼaloʼob kun úuchul ichil u jaats u kaajal Dios yaan way Luʼumaʼ (xok Isaías 60:17). Le táankelmoʼob yéetel le máaxoʼob maʼ úuch ookkoʼob ichil u kaajal Jéeobaoʼ maʼ xaaneʼ chéen u xokmoʼob wa u yuʼubmoʼob le jatsʼuts baʼaloʼob tsʼoʼok u yúuchloʼ. Chéen baʼaleʼ yaʼab sukuʼunoʼob yéetel kiikoʼobeʼ tsʼoʼok u yilkoʼob le jatsʼuts baʼaloʼob tsʼoʼok u kʼexpajal ichil u kaajal Jéeobaoʼ. Le sukuʼunoʼobaʼ jach ku creerkoʼob de ke Dioseʼ táan u nuʼuktik u kaajal yéetel u yáantaj Jesús. Ken k-uʼuy u tsikbaltik le sukuʼunoʼob le jatsʼuts baʼaloʼob tsʼoʼok u yilkoʼoboʼ, ku maas nojochtal k-fe yéetel k-maas confiar tiʼ Jéeoba.

13. ¿Baʼax ku yaʼalik le Salmo 48:12 tak 14 unaj k-beetkoʼ?

¹³ Tuláakloʼon unaj k-tsikbaltik tiʼ u maasil bix u kaajal Jéeoba. Kex kuxaʼanoʼon tu yóokʼol kaab Satanaseʼ ichil u kaajal Jéeobaeʼ yaan kiʼimak óolal yéetel yaabilajiʼ. Bejlaʼa bey xan teʼ kʼiinoʼob ku taaloʼ jach yéetel kiʼimak óol ken k-tsikbalt tiʼ le táankelem paalaloʼob yéetel tiʼ le máaxoʼob ku yokol ichil u kaajal Jéeoba le baʼaxoʼob ken u beet u Reinooʼ yéetel bix le paraíso espiritualoʼ (xok Salmo 48:12-14).

14, 15. ¿Baʼax kʼeexil anchaj 1970, yéetel baʼaxten yaʼab utsiloʼob tu taasaj?

¹⁴ Yaʼab sukuʼunoʼob tsʼoʼok u yantal u edaboʼobeʼ tsʼoʼok u yilkoʼob bix u kʼexpajal yaʼab baʼaloʼob ichil u kaajal Jéeoba utiaʼal ka maas jatsʼutschajak. Yaan tiʼ le sukuʼunoʼobaʼ ku kʼaʼajskoʼobeʼ kaʼacheʼ yaan juntúul siervo tiʼ múuchʼulil tu lugar le múuchʼ ancianoʼoboʼ. Kaʼach xaneʼ tiʼ cada junpʼéel najil Beteleʼ yaan kaʼach juntúul siervo tiʼ sucursal tu lugar junpʼéel Comité tiʼ Sucursal. Tsʼoʼoleʼ kaʼacheʼ chéen juntúul u presidenteil le Sociedad Watch Tower yanoʼ, pero bejlaʼeʼ ku nuʼuktaʼal tumen junmúuchʼ sukuʼunoʼob kʼaj óolaʼanoʼob bey Cuerpo Gobernanteeʼ. Kex yaan máax kaʼach áantik le sukuʼunoʼobaʼ chéen juntúul máax decidirtik baʼax kun beetbil teʼ múuchʼuliloʼoboʼ, teʼ sucursaloʼob bey xan teʼ tuʼux ku  nuʼuktaʼal u meyaj le j-Jaajkunajoʼoboʼ. Chéen baʼaleʼ desde 1970, junmúuchʼ ancianoʼob káaj u chʼaʼtuklikoʼob baʼax kun beetbil, maʼ chéen juntúuliʼ.

¹⁵ ¿Baʼaxten yaʼab utsil tu taasaj ichil u kaajal Jéeoba le baʼaxoʼob kʼexpajaʼ? Tumen le baʼax beetaʼabaʼ chʼaʼtuklaʼab yéetel u yáantaj baʼax ku yaʼalik le Bibliaoʼ. Bejlaʼeʼ tu lugar u chʼaʼtuklaʼal tumen juntúul máak baʼax kun beetbileʼ, junmúuchʼ ancianoʼob chʼaʼtuklik. Le oʼolal yaʼab utsil k-jóoʼsik tiʼ le sukuʼunoʼob tsʼaʼanoʼob tumen Jéeobaaʼ (Efe. 4:8; Pro. 24:6).

16, 17. Tiʼ le baʼaxoʼob tsʼoʼok u kʼexpajal ichil u kaajal Jéeobaoʼ, ¿máakalmáak maas uts ta wichiʼ, yéetel baʼaxten?

¹⁶ Tuukulnakoʼon xan tiʼ bix tsʼoʼok u kʼexpajal le publicacionoʼoboʼ. Toʼoneʼ kiʼimak k-óol k-áantik yéetel k-tsʼáaik tiʼ uláakʼ máakoʼob publicacionoʼob ken jóokʼkoʼon kʼaʼaytaj. Bejlaʼa xaneʼ jach ku meyaj le tecnología utiaʼal k-kʼaʼaytajoʼ. Por ejemploeʼ bejlaʼeʼ yaʼab máakoʼob ku páajtal u yokloʼob teʼ jw.org, teʼ sitioaʼ yaʼab información yaan jach jeʼel u yáantik le máakoʼoboʼ. Tuláakal le baʼaloʼob tsʼoʼok u kʼexpajlaʼ ku yeʼesik le nojoch yaabilaj ku yuʼubik Jéeoba tu yoʼolal le máakoʼoboʼ.

¹⁷ Toʼoneʼ kiʼimak k-óol xan úuchik u kʼexpajal bix u beetaʼal le muchʼtáambaloʼoboʼ tumen bejlaʼeʼ yaantoʼon tiempo utiaʼal u yantaltoʼon le Adoración ich Familiaoʼ wa utiaʼal k-xook t-juunal. Tsʼoʼoleʼ kiʼimak k-óol xan yoʼolal bix tsʼoʼok u kʼexpajal u beetaʼal le asambleaʼoboʼ. Lelaʼ cada año táan u bin u maas jatsʼutstal. Toʼoneʼ k-tsʼáaik u diosboʼotikil xan tumen táan k-kaʼansaʼal tiʼ jejeláas escuelaʼob ichil u kaajal Jéeoba. Tuláakal le baʼaxoʼob tsʼoʼok k-aʼalikaʼ ku yeʼesikeʼ  Jéeobaeʼ táan u nuʼuktik u kaajal yéetel táan u yilik u maas jatsʼutskíintik le paraíso espiritualoʼ.

18, 19. ¿Bix jeʼel k-áantaj utiaʼal ka maas jatsʼutschajak le paraíso espiritualoʼ?

¹⁸ Jéeobaeʼ u tsʼaamajtoʼon u jatsʼuts privilegioil k-áantaj utiaʼal k-maas jatsʼutskíintik le paraíso espiritualoʼ. Pero ¿bix jeʼel k-beetkeʼ? Letiʼe ken k-tsʼáa k-óol k-kʼaʼayt u maʼalob péektsilil le Reinooʼ yéetel ken k-beet disipuloʼob. Cada ken k-áant wa máax u meyajt Dioseʼ, táan k-áantaj utiaʼal ka maas nojochchajak le paraíso espiritualoʼ (Isa. 26:15; 54:2).

¹⁹ Uláakʼ bix jeʼel k-áantaj utiaʼal ka maas jatsʼutschajkeʼ letiʼe ken k-tsʼáa k-óol utiaʼal k-eʼesik jatsʼuts modosoʼ. Ken k-beet beyaʼ yaʼab máakoʼob ku taaktal u yookloʼob ichil u kaajal Jéeoba. Yaan horaeʼ le máakoʼoboʼ ku náatsʼloʼob tiʼ Jéeoba yéetel tiʼ Jesús yoʼolal le jatsʼuts modos k-eʼesikoʼ, maʼ chéen tumen yaʼab baʼaloʼob k-ojel tiʼ le Bibliaoʼ.

20. ¿Baʼax ku yaʼalik le Biblia unaj k-beetkoʼ?

²⁰ Jéeoba yéetel Jesuseʼ jach ku kiʼimaktal u yóoloʼob ken u yiloʼob bix jatsʼutsil le paraíso espiritual yaantoʼon bejlaʼoʼ. Le kiʼimak óolal k-uʼuyik bejlaʼa ikil k-táakpajal utiaʼal u maas jatsʼutstal le paraíso espiritualoʼ ku yeʼesik le kiʼimak óolal kun antaltoʼon ken áantajnakoʼon utiaʼal u suʼutul paraísoil tuláakal le Luʼumaʼ. Toʼoneʼ unaj k-kʼaʼajsikeʼ le Bibliaoʼ ku yaʼalikeʼ «le palitsil yaan u naʼatoʼ ku lúubul utsil tiʼ le reyoʼ» (Pro. 14:35, TNM). Le beetkeʼ unaj k-eʼesik naʼat yéetel k-tsʼáaik k-óol meyaj utiaʼal k-maas jatsʼutskíintik le paraíso espiritualoʼ.