“GINAPABUDLAYAN pa gid ako sang akon mga balatian,” panghayhay ni Ernst, nga setentahon na. * Pamilyar bala ini sa imo? Kon nagatigulang ka na kag nagaluya, mahimo nahangpan mo ang paglaragway sang Manugwali kapitulo 12. Sa bersikulo 1, ang mga adlaw sang pagtigulang gintawag nga “makapasubo nga mga adlaw,” ukon “mga adlaw sang kalamidad,” sa footnote. Pero indi buot silingon nga puro ka na lang problema. Mangin makaalayaw pa gihapon ang imo kabuhi kag makaalagad ka kay Jehova sing malipayon.

Mga pinalangga nga tigulang nga kauturan, indi lang kamo ang nagaatubang sang mga pagtilaw. Ang tigulang nga mga alagad ni Jehova sang tion sang Biblia nakaatubang man sini nga mga kabudlayan. Halimbawa, nadula ang panan-aw nanday Isaac, Jacob, kag Ahias. (Gen. 27:1; 48:10; 1 Hari 14:4) Nagbatyag si Sara nga “tigulang na” sia. (Gen. 18:11,12) Si Hari David pirme “ginatugnawan.” (1 Hari 1:1) Ang manggaranon nga si Barzilai indi na makapanabor ukon makabati sang musika. (2 Sam. 19:32-35) Sanday Abraham kag Noemi nag-atubang sang kasubo sang napatay ang ila tiayon.—Gen. 23:1, 2; Rut 1:3, 12.

Ano ang nakabulig sa ila nga magpabilin nga matutom kay Jehova kag malipayon? Sa pagtigulang ni Abraham, “nangin mabakod sia bangod sang iya pagtuo” sa ginsaad sang Dios. (Roma 4:19, 20) Kinahanglan man naton ang mabakod nga pagtuo. Wala ini nagadepende sa aton edad, ikasarang, ukon mga sirkunstansia. Halimbawa, bisan maluya na, bulag, kag nagahigda na lang ang patriarka nga si Jacob, nagpakita sia sang mabakod nga pagtuo sa mga saad sang Dios. (Gen. 48:1-4, 10; Heb. 11:21) Subong, ang 93 anyos nga si Ines nagaluya na, pero nagsiling gihapon sia: “Kada adlaw nagabatyag ako nga ginapakamaayo gid ako ni Jehova. Ginahunahuna ko kada adlaw ang Paraiso. Nagahatag ini sa akon sing paglaum.” Maayo gid kag positibo nga panimuot!

Ginapabakod naton ang aton pagtuo paagi sa pagpangamuyo, pagtuon sang Pulong sang Dios, kag pagtambong sa Cristianong mga miting. Ang tigulang na nga si manalagna Daniel regular nga nagpangamuyo sing tatlo ka beses kada adlaw kag padayon nga nagtuon sang Pulong sang Dios. (Dan. 6:10; 9:2) Ang tigulang nga balo nga si Ana ‘wala gid nagapalya sa templo.’ (Luc. 2:36, 37) Kon magtambong ka sa mga miting tubtob posible kag magpakigbahin suno sa imo masarangan, mapabakod mo indi lang ang imo kaugalingon kundi ang tanan man nga nagatambong. Kag nalipay pirme si Jehova sa imo mga pangamuyo, bisan pa limitado lang ang imo mahimo.—Hulu. 15:8.

Madamo sa inyo nga mga matutom ang luyag makakita para makabasa kag mangin mabaskog agod makatambong sa mga miting, pero nabudlayan na kamo, ukon indi na gid makasarang. Gani ano ang inyo himuon? Panginpusli ang sarang ninyo mahimo. Madamo sang indi makatambong sa mga miting ang nalipay sa pagpamati paagi sa telepono. Bisan pa indi na gawa makakita ang 79 anyos nga si ­Inge, nagahanda sia sa mga miting paagi sa dalagku sing letra nga balasahon nga ginhimo sang utod sa kongregasyon paagi sa kompyuter.

Mahimo nga may butang kamo nga luyag sang iban tigayunon—ang tion. Ngaa indi mamati sa mga rekording sang Biblia kag sang mga literatura sa Biblia, mga pamulongpulong, kag mga audio drama? Subong man, basi luyag mo tawgan ang mga masigkatumuluo para magpaambit sing espirituwal nga dulot kag “makapalig-unay.”—Roma 1:11, 12.

“Makapasubo gid nga indi mo na mahimo ang mahimo mo sang una,” siling ni Christa, nga mga 85 anyos na. Gani paano mangin malipayon gihapon ang mga tigulang? “Paagi sa pagtigayon sing positibo nga pagtamod,” siling sang 75 anyos nga si Peter, “nga  wala pirme nagapanumdom sang indi mo na mahimo kundi nagakalipay sa imo mahimo.”

May mahunahuna ka bala nga paagi sa pagpanaksi nga masarangan mo pa? Indi na makapamalaybalay si Heidi. Bisan pa otsentahon na sia, natun-an niya nga maghimo sing mga sulat paagi sa kompyuter. Ang pila ka tigulang nga manugbantala nakasugod sa paghambalanay parte sa Biblia samtang nagapungko sa parke ukon sa dululugan sang bus. Ukon kon nagapuyo ka sa puluy-an sang mga tigulang, posible bala nga mangin “teritoryo” mo ang mga nagaatipan sa imo kag ang iban pa nga kaupod mo?

Bisan tigulang na si Hari David, ginsakdag niya gihapon ang putli nga pagsimba. Nag-amot sia sing pundo kag nag-organisar sang masakdag sa pagtukod sang templo. (1 Cron. 28:11–29:5) Sing kaanggid, mahimo ka mangin interesado sa nagakatabo sa hilikuton sang Ginharian sa bug-os nga duta. Puede mo masuportahan ang mga payunir ukon ang iban nga makugi nga mga manugbantala sa inyo kongregasyon paagi sa makapalig-on nga mga pulong, gamay nga regalo, ukon simple nga pamahaw. Sa imo mga pangamuyo, mahimo mo malakip ang mga lamharon kag ang mga pamilya, ang bug-os tion nga mga alagad, ang mga nagabalatian, kag ang may mabug-at nga mga responsibilidad.

Ginapabaloran gid kamo kag ang inyo pag-alagad. Indi gid kamo pag-isikway sang aton Amay sa langit, kamo nga mga pinalangga nga tigulang. (Sal. 71:9) Ginapalangga kamo kag ginapakabahandi ni Jehova. Sa indi madugay, tanan kita magatigulang pero wala na sing kasakit ukon kalamidad. Sa baylo, magapadayon kita sa pag-alagad sa aton mahigugmaon nga Dios nga si Jehova sing walay katapusan nga puno na sing kusog kag himpit ang panglawas!