ORGEN u i yer iti na ér Ernst, u a hembe anyom 70 yô, kaa ér, “Kwaghnyoon wam ngu yangen mo akaa seer a seer.” * We kpa kape kwagh wou a lu laa? Aluer u ngu beenyol seer a seer shi u nenge wer kera ka taver we iyol ga, shi agee nga yinan we iyol yô, alaghga mlu wou la una zua sha mkaanem ma i nger ken takerada u Orpasenkwagh ityough 12 la. Ken ivur i sha i môm la i yila ayange a iyolbeen ér “ayange a bo.” Nahan kpa, kwagh ne tese ér aluer u ngu beenyol yô, kwagh hemba u a hemba je ga. U fatyô u zan hemen u civir Yehova saan saan.

Ne anmgbianev mba beenyol mba nomso man mba kasev mba doon se ishima, ka ne tseegh akaa ne a tser ne ga. Mbacivir Yehova mbabeenyol mba sha ayange a tsuaa la kpa tagher a ambaakaa ne. Ikyav i tesen yô, Isaka man Yakob kua Ahiya cii yange ve pir ashe. (Gen. 27:1; 48:10; 1 Utor 14:4) Sara di nenge ér, un “bee iyol.” (Gen. 18:11, 12) Tor Davidi di yange “i tsee un iyol ga.” (1 Utor 1:1) Barshilai u lu shagbaor la kwaghyan va kera nyohon un ga, shi kera faantyô u ungwan ityogholough ga. (2 Sam. 19:32-35) Yange gba u Aberaham una wa ishima a ku u kwase na, Naomi di gba u una wa ishima a ku u nom na.—Gen. 23:1, 2; Rutu 1:3, 12.

Ka nyi yange i wase ior mban cii ve za hemen u civir Yehova shi zuan a msaanyoloo? Aberaham yange beeyol kpa er na uityendezwa mba Yehova jighjigh yô, “a taver sha jighjigh u nan.” (Rom. 4:19, 20) Se kpa gba u se lu a jighjigh u nan taveraa. Kpa ka anyom a ase shin tahav asev shin mlu wase una na ve se lu a jighjigh u nan taveraa ga. U tesen ikyav yô, shighe u tertamen Yakob beeyol shi pir ashe shi kera moughon sha gambe ga la kpa, yange na uityendezwa mba Aôndo mbara jighjigh taveraa. (Gen. 48:1-4, 10; Heb. 11:21) Sha ayange ne kpa, anmgbian u kwase ugen u lun anyom 93 u i yer iti na ér Ines, u ka i vôr un iyol kpishi yô, kaa ér: “Hanma iyange yô, ka mnenge mer Yehova verem kpishi. Shi ka m henen sha kwagh u Paradiso hanma sev. Kwagh ne ngu a nam ishimaverenkeghen.” Mnenge na ne ka u doon kpen kpen!

Ka se taver jighjigh wase u nan sha u eren msen shi timen ken Mkaanem ma Aôndo shi zan mbamkombo mba Mbakristu. Profeti Daniel u beeyol la eren msen kwa tar hanma iyange shi timen ken Mkaanem ma Aôndo nduuruu. (Dan. 6:10; 9:2) Kwasecôghol Ana u un kpa yange beeyol la “undun tempel ga.” (Luka 2:36, 37) Ka wea nôngo sha afatyô wou cii a za mbamkombo shi wea nôngo wea wa zwa ken mbamkombo mban yô, u taver jighjigh wou u nan kua u mbagenev mba ve ve la cii. Heela tseegh ga, ka wea eren msen hen Yehova nahan i doo un kpen kpen, aluer u ngu fantyô u eren akaa er u soo la ga je kpaa.—Anz. 15:8.

Ne anmgbianev mbajighjigh mban kpishi alaghga a sar ne u ma ne lu nengen sha er ne fatyô u ôron takerada shi ma i taver ne iyol er ne zaan mbamkombo yô, kpa ka taver ne kpishi gayô alaghga ka hemban ne kuaa je. Nahan ne er nena? Er tom a hanma kwagh u u zough a mi cii. Ior kpishi mba ve fetyô u zan mbamkombo ga yô, ka ve ungwan sha telefon. Anmgbian u kwase ugen u a lu anyom 79, shi a nengen dedoo ga yô, iti na ér, Inge. Er a nengen tsembelee ga yô, anmgbian u nomso ugen ken tiônnongo ka a gber ngeren mba i gbe u a hen ken mbamkombo la sha asangaabaacaa a kehen a va na un sha er una wa agoyol sha mbamkombo yô.

Alaghga u ngu a kwagh u mbagenev ve soo ér ma ve lu a mi yô, kwagh shon yô, ka shighe. Er nan u tee shighe la sha u ungwan Bibilo i i kôr ken tser shin ityakerada man akaaôron a a har sha Bibilo gayô anumbe a ungwan a ungwa la ga? Shi u fatyô u yilan mba u civir Yehova a ve imôngo la sha telefon lamen vea ve sha akaa a ken jijingi shi ‘taver ayol a en asema.’—Rom. 1:11, 12.

Anmgbian u kwase u lu a anyom 85, u i yer iti na ér Christa yô, vaa iyol ér, “Ka wea va kera eren akaa ken mcivir u Yehova er ngise u eren la ga nahan i vihi u kpen  kpen.” Kpa mbabeenyol vea er nan ve a saan ve iyol here? Orgen u a lu anyom 75, i yer iti na ér Peter yô, kaa ér: “Gba u vea lu a mnenge u vough; doo u vea zer henen sha akaa a a hembe ve u eren hegen la ga, kpa ve eren aa ve fetyô la saan saan.”

U fatyô u henen sha aan a u lu a mi her a pasen ior kwagh la kpa? Anmgbian u kwase ugen u a hembe anyom 80 yô, i iti na ér Heidi, hegen ne kera fetyô u za pasen ior kwagh sha uya uya er ngise eren nahan ga. Kpa a hen kômputa sha er una ngeren ior uwashika yô. Mbapasenkwagh mbabeenyol mbagenev ka ve hii iliam a or shighe u ve tem ape nyôron mato gayô hen ijiir i umato ve til yô. Aluer hegen u ngu hen ijiir i i nengen sha mbabeenyol yô, u fatyô u geman i hingir “haregh” wou sha er u pasen mbatwerev mba ve nengen sha we la man ior mbagenev mba ve lu hen iyagh ki shon la kwagh kpa?

Shighe u Tor Davidi beeyol la, kegh iyol u suen mcivir u mimi. Yange na inyaregh shi kohol akaa ver sha u suen tom u maan tempel. (1 Kron. 28:11–29:5) We kpa u fatyô u nôngon fan kwagh u a lu zan hemen ken tom u Tartor sha tar cii yô. Shi u fatyô u suen upania gayô mbapasenkwagh mbagenev mba ve eren tom sha gbashima ken tiônnongo wou la, sha u taver ve ishima, gayô nan ve aniyua shin ankwaghyan nahan. Heela tseegh ga, shighe u u lu eren msen yô, u fatyô u sônon sha ci u agumaior kua icombor man mba eren tom u pasen kwagh hanma shighe man mbauangev kua mba ve lu a ityom kpishi ken nongo u Yehova la.

Kwagh wou man tom wou gba Yehova kwagh tsung je. Mayange Ter wase u sha la una ta ne mbabeenyol mba doon se ishima ne kera ga. (Ps. 71:9) Ne doo Yehova ishima shi kwagh wen gba un ishima tsung. Ica a gba ga tsô, se za hemen u tsan zan zan, kpa been iyol shin yan ican ga. Se lu gbong gbong shi kwagh a kera nyoon se ga, se za hemen u civir Yehova, Aôndo wase u se doo un ishima la gbem sha won!