1, 2. 1) ¿Kunatsa Diosan servirinakapajj akapachan chʼajjwäwinakapar jan mitisktanjja? (Aka janankir foto uñjjattʼam.) 2) ¿Kunsa jaqenakajj markapatsa costumbrepatsa, pelot anatir equipopatsa amuyapjje, ukat ukham amuyasajj kunarus purtʼasipjje?

JICHHÜRUNAKANJJA, waljaniw markapatsa, yaqha kasta jañchinïtapatsa, jan ukajj costumbrepatsa jachʼañchasipjje, ukatwa jaqenakajj akapachan tʼaqa tʼaqa sarnaqapjje. Ukampis Jehová Diosan servirinakapajj janiw akapacharusa, ni chʼajjwäwinakaparus mitisktanti. ¿Kunatsa? Jiwasajj Jehová Diosaruw munastanjja, Juparuw istʼañ munaraktanjja (1 Juan 5:3). Ukhamajja, kawkïri markansay jakasiskstanjja, ukhamarak kawkinsay nasiwaystanjja, Diosan arunakaparjam sarnaqañatakiw chʼamachastanjja. Jiwasatakejj Jehová Diosan gobiernopar yanaptʼañaw taqe kunat sipansa jukʼamp wakiskirejja (Mat. 6:33). Ukatwa akham sistanjja: ‘Janiw akapachankirïktanti’ sasa (Juan 17:11, 15, 16 liytʼañataki; Isa. 2:4).

² Walja jaqenakajja, yaqha markanakat sipans markapakisa, jan ukajj costumbrepakis jukʼamp askïkaspa ukham amuyapjje. Yaqhepanakasti, pelot anatirinakat equipopakis jukʼamp askïkaspa ukham amuyapjjaraki. Ukatwa waljanejj atip atip anatapjje, uñisisipjje,  jupanakjam jan amuyirinakarus jiwayapjje. Jehová Diosan Testigonakapajj janis uka chʼajjwäwinakar mitiskstanjja, familiasasa jiwasasa jan walinakanwa uñjassna. Inas ina chʼusat tʼaqhesiyata uñjassna. Ukhamanakan uñjasisajj chuym wal ustʼayassna, kunattejj jan cheqapäki uk amuytʼirwa Jehová Diosajj lurawayistu (Gén. 1:27; Deu. 32:4). Ukhamajj mä gobiernojj jan walinak luri ukhajja, jan walinakwa uka gobierno contrajj parlañ munjjsna. Ukham jan walinak jan parlañatakisa, akapachar jan mitisiñatakisa, ¿kunsa lursna?

3, 4. 1) ¿Kunatsa cristianonakajj politicar jan mitisktan ni guerranakarus sarktanjja? 2) ¿Kuna toqetsa aka yatichäwin yatjjataskañäni?

³ Walja jaqenakaw gobiernonakapan wiytatajj akapachan chʼajjwäwinakapar mitisipjje. Ukampis cheqpach cristianonakajja, janiw politicar mitisktanti ni guerranakarus nuwasir sarktanti. ¿Kunatsa? Jesusat yateqasisaw ukham lurtanjja (Mat. 26:52). Supayan apnaqat akapachanjja mä markas yaqha markat sipan jukʼamp askïkaspa ukham janiw amuyktanti (2 Cor. 2:11). Ukatwa akapachan chʼajjwäwinakaparojj janipun mitisktanti (Juan 15:18, 19 liytʼañataki).

⁴ Pantjasirïtas laykojja, inas yaqha kasta jaqenakar uñisiñajj chuymasan utjchispa (Jer. 17:9; Efe. 4:22-24). Aka yatichäwinjja, taqenimp mayachtʼat sarnaqañatakejj kunjamsa Bibliajj yanaptʼistaspa uka toqetwa yatjjataskañäni. Ukatjja kunjamsa jiwasajj kunjamtï Jehová Diosasa Jesusasa jaqenakar uñjapki ukham uñjaraksna uka toqetsa yatjjataskarakiñäniwa. Ukaw Diosan gobiernop toqeta taqe chuyma saytʼasiñatakejj yanaptʼistani.

5, 6. ¿Kunjamsa Jesusajj jaqenakar uñjirïna, ukat kunatsa?

⁵ Akapachar mitisiñatak yantʼata uñjasïta ukhajja, akham jisktʼasiñamawa: “¿Kunsa Jesusajj lurasapäna?” sasa. Jesusajj aka Oraqen jakkäna ukhajja, Judeankirinakasa, Galileankirinakasa, Samariankirinakas janiw sum apasipkänti. Amuytʼañataki, judionakampi samaritanonakampejj janiw parlasipjjerïkänti (Juan 4:9). Maysa toqetjja, fariseonakampi saduceonakampejj sapa kutiw religionapat chʼajjwapjjerïna (Hech. 23:6-9). Moisesan Leyinakapat wali yatjjatat judionakajja, jan yatjjatatanakat sipan jukʼampïpkaspas ukhamwa amuyasipjjerïna (Juan 7:49). Judionakajja, impuesto cobrerinakarusa romanonakarusa uñisipjjerïnwa (Mat. 9:11). Ukampis Jesusajj janiw uka chʼajjwäwinakapar mitiskänti. Jupajja, Jehová Diosat cheqa yatichäwinakwa yatichirïna, ukatsti Diosajj judionakaru markapäñapatak ajllitapsa yatirakïnwa. Ukampis janipuniw arkirinakaparojj mayninakat sipan jupanakas jukʼampïpkaspa ukham yatichirïkänti (Juan 4:22). Jan ukasti taqe jaqenakar munasiñwa yatichirïna (Luc. 10:27).

⁶ Jesusajj taqenirus mä kikpak uñjäna, jupatakejj janipuniw khitis mayninakat sipan jukʼampïkänti. ¿Kunatsa? Jehová Diosajja, kunayman kasta jañchini jaqenakampi aka Oraqe phoqantañatakiw jaqer luräna (Gén. 1:27, 28). Ukhamajja, Jehová Diosatakisa Jesusatakisa, janiw mä kasta jañchisa, markasa, arusa mayninakat sipans jukʼampïkiti (Hech. 10:34, 35; Apo. 7:9, 13, 14). Jiwasajj jupanakjamarakiw amuyañasa (Mat. 5:43-48).

7, 8. 1) ¿Khitin gobiernop toqetsa cristianonakajj saytʼastanjja, ukat kunatsa? 2) ¿Khitikis taqe jan waltʼäwinak chhaqtayaspa?

⁷ Cristianonakajj janiw jaqenakan apnaqat gobiernonakar yanapktanti, Jehová Diosan gobiernop toqetakwa saytʼastanjja. ¿Kunatsa? Diosakiw suma apnaqerejja, janipuniw Jupjam yaqha apnaqerejj utjkaspati. Ukampis Supayajja, Jehová Diosajj janis suma apnaqerïkaspa ukhamwa Edén jardinan säna. Diosat sipan  jupas suma apnaqerïkaspa ukhamwa Supayajj amuyasi, jaqenakajj jupjam amuyapjjarakispa ukwa muni. Ukampis Diosajja, khitirus apnaqerisarjam istʼañäni uk sapa mayni amtañaswa muni. Ukatwa akham jisktʼasiñasa: “¿Kunatsa Diosar istʼtjja, nayatakejj cheqpachapunit Jupajj suma apnaqerejja? ¿Diosan gobiernopakiw taqe jan waltʼäwinak chhaqtayani sasat confiytjja? Jan ukajj ¿sapa mayniw kunatï walïki jan walïkaraki uk amtjjañapa sasiñcha amuytjja?” sasa (Gén. 3:4, 5).

⁸ Maynitï ‘¿kunsa mä partido politicotsa, jan ukajj yaqha ukham organizacionatsa amuyta?’ sasin siristam ukhajja, ¿kamsasmasa? Cheqas yaqhep partidonakajja suma amtanïpjjewa jaqenakarus wal yanaptʼañ munapjje. Ukampis Jehová Diosan gobiernopakiw taqe jan waltʼäwinak askichaspa, ina chʼusat tʼaqhesiñanaksa chhaqtayarakispa. Ukatwa Jehová Diosan gobiernop toqetak saytʼastanjja. Janitï ukham lurksnajja, taman tʼaqa tʼaqa sarnaqañaw utjaspa.

9. ¿Kuna jan waltʼäwis Corintonkir taman utjäna, ukat kuna arunakampis Pablojj ewjjtʼäna?

⁹ Nayrïr patak maranakanjja, mä jan waltʼäwiw Corinto markankir taman utjäna. Jupanakajj akham sasaw chʼajjwapjjerïna: “‘Nayajj Pablonktwa’ sasa; mayninakasti sapjjara[kirïnwa]: ‘Nayajj Apolosanktwa’; mayninakasti ‘Nayajj Pedronktwa’; mayninakasti: ‘Nayajj Cristonktwa’” sasa. Apóstol Pablojj uk yatisajj wal llaktʼasïna. Ukham chʼajjwapjjatapajj janipuniw tamatak walïkänti tʼaqjjtayänwa. Ukatwa Pablojj jupanakar akham ewjjtʼäna: “Jilatanaka, Jesucristo Tatitusan sutipjjaruw achiktʼapjjsma, maya amtañanikïpjjam, jan jumanak taypin yaqhachasiñajj utjkpanti. Jan ukasti, mä wawak sarnaqasipjjam; mä sapa amtañani, mä chuymanikiraki” sasa. Jichhürunakanjja uka ewjjtʼarjamaw sarnaqañasaraki, janipuniw taman tʼaqa tʼaqa sarnaqañajj utjañapäkiti (1 Cor. 1:10-13; Romanos 16:17, 18 liytʼañataki).

10. Ajllit cristianonakajj ‘Diosan khitanakapätanwa’ sasajja, ¿kunsa Pablojj amuytʼayañ munäna?

¹⁰ Pablojj akham sasaw ajllit cristianonakar amtayäna: “Jiwasanakajj alajjpachankir jaqenakäpjjtanwa” ukhamajj jan ‘akapach yänakatak lupʼipjjamti’ sasa (Fili. 3:17-20). * Ukatjja, ajllit cristianonakajj ‘Diosan khitanakapätanwa’ sasaw sarakïna. Kunapachatï mä marka apnaqerin khitapajj yaqha markanki ukhajja, janiw uka markan chʼajjwäwinakaparusa ni politicaparus mitiskiti. Ajllit cristianonakajj niya ukhamarakiwa, janiw akapachan jan waltʼäwinakaparusa ni politicaparus mitisipkiti (2 Cor. 5:20). Aka Oraqen wiñay jakañatak suytʼäwinïpki uka cristianonakajj janirakiw akapachan jan waltʼäwinakapar mitisipkiti, Diosan gobiernop toqetakwa saytʼasipjje.

11, 12. 1) Diosan gobiernop toqet saytʼasiñ munstan ukhajja, ¿kunsa janipun amuyañasäki? 2) ¿Kunjamsa mä kullakajj yaqha markankirinakar uñjäna, ukat kunas uka jan wali amuyu apanukuñatak yanaptʼäna?

¹¹ Walja jaqenakajja, jupanakjam sarnaqäwinïpki, costumbrenïpki, jupanakjam pachpa aru parlasipki ukanakampikiw chikachasipjje. Ukatjja markapakis mayni markanakat sipan jukʼamp sumäkaspa ukham amuyapjjaraki. Ukampis jiwasajj janiw ukham amuyañasäkiti, ukham amuyunakjja jankʼakiw apanukuñasa. Ukaw akapachar jan mitisiñatak yanaptʼistani. Ukhamajj ¿kunjamsa uka jan wali amuyunak apanuksna?

¹² Mirjeta * sat mä kullakat parltʼañäni. Jupajj Yugoslavia markanwa nasïna, ukatsti Serbia markankir jaqenakaru uñisipki uka cheqanwa  jilsüna. Qhepat Bibliat yateqasajj akham siwa: “Jehová Diosajj taqe kasta jañchini jaqenakarojj mayak uñji. Ukampis Supayajj maynit maynikam jaqenakajj uñisisipjjaspa ukatakiw chʼamañchi” sasa. Ukatwa uka kullakajj nayra amuyup apanukuñatak chʼamachasïna. Ukampis kunapachatï markapan mä guerrajj qalltäna ukhajja, Mirjeta kullakajj wasitatwa Serbia markankirinakar uñisiñ qalltäna. Janiw jupanakarojj Diosatsa yatiyañ munjjänti. Ukham uñisisiñajj jan walïtap jupajj sum yatïna, ukatwa uka amuyunak apanukuñatakejj Jehová Diosar yanaptʼa mayisïna. Ukatsti precursorjam serviñatakis Diosat yanaptʼa mayisirakïnwa. Jupajj akham siwa: “Diosat munasiñ yateqasiñaw yatiykasin taqenir sum uñjañatak yanaptʼawayitu” sasa.

13. 1) ¿Kunas Susana kullakarojj pasäna, ukat kunjamas jikjjatasïna? 2) Kunatï Susana kullakar paskäna ukatjj ¿kunsa yateqsna?

¹³ México markan jakasiri Susana kullakajja, Europa uksa toqeruw jakasir saräna. Tamapanjja, yaqhep jilat kullakanakajj Latinoamérica uksa toqetäpjjewa. Jupanakat yaqhepajja kullakan markapatsa, costumbrenakapatsa, musicanakapatsa jan walinakwa parlapjjerïna. Ukaw kullakar chuym ustʼayäna. Ukampis Susana kullakajj Jehová Diosaruw jan ukham jikjjatasiñatak yanaptʼa mayisïna. Kunatï uka kullakar paskäna ukatjj ¿kunsa yateqsna? Maya, markasat jan walinak parlir istʼasajj chuyma ustʼatas jikjjataschiñänejja, janiw jankʼak colerasiñasäkiti. Paya, arunakasampisa luratanakasampisa, mä qawqhanikis mayninakat sipans jukʼamp sumäkaspa ukham janipuniw amuyayañasäkiti. Jilat kullakanakasarusa, yaqha jaqenakarusa janipuniw tʼaqa tʼaqa sarnaqayañ munktanti (Rom. 14:19; 2 Cor. 6:3).

14. Kunjamtï Jehová Diosajj taqenir uñjki ukham uñjañatakejja, ¿kunas yanaptʼistaspa?

¹⁴ Jehová Diosan servirinakapajj mayachtʼataw aka Oraqpachan jakastanjja. Ukatwa mayninakat sipans mä markakis jukʼamp sumäkaspa ukham jan amuyañasäkiti. Inas familiaranakasasa, yaqha jaqenakasa, markasar munasiñ yatichawaychistu. Maysa toqetjja, inas yaqha markankirinakarusa, costumbrenakaparusa, aruparusa jan ukajj yaqha kasta jañchininakarus uñisiskakstan. ¿Kunas uka amuyunak apanukuñatak yanaptʼistaspa? Akwa amtañasa: markapat jachʼa jachʼa tukurinakarusa, jupanakakis mayninakat sipans jukʼamp sumäpkaspa ukham amuyirinakarus Diosajj uñisiwa. Ukatjja, uka toqet parlir Bibliat apstʼat qellqatanakwa sapakisa jan ukajj familiamampis yatjjatasma. Ukatsti, Jehová Diosaruw kunjamtï Jupajj jaqenakar uñjki ukham uñjañatak yanaptʼa mayisiñama (Romanos 12:2 liytʼañataki).

15, 16. 1) Jan mayninakjamätas uñjasajja, ¿kunsa waljanejj lurapjje? 2) Awk taykanakajja, ¿kunjamsa wawanakapar Jehová Diosatakjam sarnaqañatak yanaptʼapjjaspa?

¹⁵ Jehová Diosar istʼirïtas laykojja janiw akapachankir jaqenakjamäktanti, ukjja vecinonakasasa, familiaranakasasa, trabajosankir masinakasasa, yateqer masinakasasa, sumwa amuyapjje (1 Ped. 2:19). Jan akapachankirïpjjatam laykojja waljaniw uñisipjjätam sasaw Jesusajj säna. Uka jaqenakajj janiw Diosan gobiernopat kunsa yatipkiti. Ukatwa Diosan gobiernop toqet saytʼasiñajj kunatsa jiwasatak wali wakiskirejja uk jan amuyapkiti.

¹⁶ Ukhamajja, kunsay jaqenakajj parlasipkpan jan ukajj kunsay lurasipkpan Jehová Diosatakjam sarnaqañatakisa, Jupar istʼañatakisa chʼamachasiskakiñäniwa (Dan. 3:16-18). Qʼajjo wayn tawaqonakatakejja, mayninakat sipan mayjäñajj chʼamakïspawa. Yaqhepanakajja, inas ajjsarañat banderar aruntjjapjjakchispa, jan ukajj yaqha ukhamanak lurjjapjjakchispa. Ukatwa awk taykanakajj jan ajjsaras saykatapjjañapatak wawanakapar yanaptʼapjjañapa. ¿Kunjamsa yanaptʼapjjaspa? Kunjamsa Jehová Diosajj ukanak uñji ukjja, Familiana  Diosar Yupaychañataki Arumanwa parltʼapjjaspa. Ukatsti, Bibliat yateqapki uk qhana arunakampi respetompi parltʼañatakiw yatichapjjarakispa (Rom. 1:16). Wakischi ukhajja, awk taykanakajj kunarutï iyawsktan uka toqetwa yatichirinakar qhanañchtʼapjjarakispa.

17. ¿Kunsa jan amuyañasäki, ukat kunatsa?

¹⁷ Jilsuwayktan uka cheqan manqʼapasa, arupasa, costumbrenakapasa, lugaranakapasa jiwasatakejj wali sumäspawa. Ukampis kunatï jiwasatak wali sumäki ukakis mayninakat sipan jukʼamp sumäkaspa ukham janiw amuyañasäkiti. ¿Kunatsa? Jehová Diosajj jiwasan kusistʼañasatakiw taqe kuns lurtʼawayi (Sal. 104:24; Apo. 4:11). Ukhamajja, jiwasan luratanakasas mayninakat sipan jukʼamp sumäkaspa ukham janiw amuyañasäkiti.

18. Jehová Diosat yateqasisin taqenir mä kikpak uñjañajja, ¿kunjamsa yanaptʼistu?

¹⁸ Jehová Diosajja, taqe kasta jaqenak Jupar uñtʼapjjaspa, servipjjaspa ukatjja wiñay jakañ katoqapjjaspa ukwa muni (Juan 3:16; 1 Tim. 2:3, 4). Mayninakan amuyunakapajj janis kunjamtï jiwasajj amuyktan ukhamäkchinejja, istʼañasawa. Ukhamtï lurañänejja, jakäwisajj jukʼamp sumäniwa, jilat kullakanakasampis sumaw apasirakiñäni. Niyakejjay jiwasajj Jehová Diosan gobiernop toqet saytʼasstanjja, janiw akapachan chʼajjwäwinakaparojj mitisktanti, janirakiw mayninakan jachʼa jachʼa tukupjjañapatakisa ni atip atip kun lurapjjañapatakis chʼamañchktanti. Cheqas Jehová Diosaw altʼat chuymanïñsa, taqenimp sumankañsa yatichistu, ukatwa Jupar wal yuspärtanjja. Jiwasajj Salmo 133:1 qellqerjamarakiw jikjjatastanjja, jupajj sänwa: “¡Kunj munkayasa jilanak pur mä wawak suman jakasiñajja!” sasa.