1, 2. (a) Dahaka dainai Keristani taudia be Dirava idia badinaia be mai anina bada? Bona unai ese edena dala ai iseda gini siri karana ia durua? (Laulau ginigunana herevalaia.) (b) Taunimanima momo be dahaka idia laloa bada? Bona unai dainai dahaka ia vara diba?

KERISTANI korikoridia be Dirava badinaia karana bona gini siri karana dainai dagedage idia davaria, tuari negadia sibona lasi. Dahaka dainai? Badina Keristani taudia ibounai be idia gwauhamata Iehova do idia lalokau henia, bona badinaia. (1 Ioa. 5:3) Ena be iseda noho daladia, eiava bese o kastom be idauidau, to iseda mauri lalonai Dirava ena kara maoromaoro taravatudia ita badinaia be namo. Iehova bona iena Basileia ita badinaia be mai anina bada. (Mat. 6:33) Unai dainai Keristani taudia ibounai be tanobada ena hepapahuahu lalonai idia vareai lasi.—Isa. 2:4; Ioane 17:11, 15, 16 duahia.

² Taunimanima momo be edia tano, iduhu taudia, kastom karadia eiava edia spot gadara taudia idia laloa bada bona edia ladana idia abia isi. Unai dainai nega momo hepapahuahu bona heatu ia vara, bona momo be bero idia davaria o idia mase. Taunimanima be unai bamona idia karaia dainai, nega haida ita eiava  iseda ruma bese ia hahisia danu, badina ita be edia huanai ita noho. Dirava ese iseda lalona ai kara maoromaoro ena ura ia atoa dainai, tanobada ena gavamani taudia ese disisen kereredia idia karaia neganai, ita lalohisihisi, badina ita diba dahaka be maoro bona dahaka be kerere. (Gen. 1:27; Deu. 32:4) Unai negadiai, dahaka do ita karaia? Reana nega haida do ita ura tanobada taudia edia hepapahuahu herevadia ita durua bona eda lalohadai ita gwauraia.

3, 4. (a) Dahaka dainai Keristani taudia be tanobada taudia edia hepapahuahu lalonai idia vareai lasi? (b) Hari dahaka do ita herevalaia?

³ Gavamani ese nega haida ena taunimanima ia doria tuari lalonai idia vareai totona. To, ita be Keristani taudia dainai, inai tanobada ena gavamani edia hepapahuahu o tuari lalonai do ita vareai lasi. (Mat. 26:52) Keristani taudia be Satani ena tanobada ena orea ta ena ladana ia abia isi lasi. (2 Kor. 2:11) Ita be tanobada ena lasi dainai, tanobada taudia edia hepapahuahu do ita durua lasi.—Ioane 15:18, 19 duahia.

⁴ Ita be goevadae lasi taudia dainai, haida be idia hekwarahi noho guna idia karaia karadia idia rakatania totona. (Ier. 17:9; Efe. 4:22-24) Unai dainai, inai stadi lalonai ita be hakaua hereva haida do ita herevalaia, unai ese ita do ia durua unai bamona karadia ita hanaia totona. Danu, do ita itaia edena dala ai iseda lalomamina ita treinia diba, unai amo Dirava ena Basileia do ita badinaia.

5, 6. Iesu be ena negai idia noho bese idauidau taudia dekenai dahaka ia laloa, bona dahaka dainai?

⁵ Bema unai bamona negadiai ai oi diba lasi dahaka do oi karaia, namona be sibona oi nanadaia, ‘Unai negai Iesu be dahaka do ia karaia?’ Iesu be Iudea, Galilea, Samaria, bona ma hanua haida amo idia mai taudia huanai ia noho. Baibel sivaraidia ese idia hahedinaraia unai bese taudia huanai hepapahuahu ia vara danu. (Ioa. 4:9) Inai taudia huanai lalotamona ia noho lasi: Farisea bona Sadukea taudia (Kara 23:6-9), Israela taudia bona takisi gogoa taudia (Mat. 9:11), rabi taudia edia sikuli idia abia taudia bona unai sikuli dekenai idia lao lasi taudia. (Ioa. 7:49) Israela besena be Roma ese ia naria, unai dainai Roma taudia ese idia dagedage henia. Ena be Iesu be Dirava ena hereva momokani ia hadibaia bona ia gwau Iuda taudia amo hahemauri do idia mai, to ena hahediba taudia ia hagoadaia lasi dagedage karadia idia havaraia totona. (Ioa. 4:22) To idia ia hagoadaia edia dekena taudia ibounai idia lalokau henia totona.—Luka 10:27.

⁶ Iuda taudia be bese haida idia inai henia, to dahaka dainai Iesu be edia kara ia abia dae lasi? Badina ia bona ena Tamana be tanobada taudia edia hepapahuahu lalonai idia vareai lasi. Iehova be tau bona hahine ginigunadia ia karaia neganai, ia ura tanobada be taunimanima amo do idia hahonua. (Gen. 1:27, 28) Dirava ese taunimanima ia karaia dalana ese ia hahedinaraia, idia be bese idauidau idia havaraia diba. Unai dainai Iehova bona Iesu be bese ta, eiava gado ta idia abia isi lasi. (Kara 10:34, 35; Apok. 7:9, 13, 14) Namona be edia haheitalai ita tohotohoa.—Mat. 5:43-48.

7, 8. (a) Keristani taudia be daika ena lohia dalana idia durua be namo? (b) Taunimanima bona politikol edia hekwakwanai hamaoromaoroa karana dekenai, Keristani taudia be dahaka idia laloa be namo?

⁷ Iehova be mai ena maoro guba bona tanobada ia lohia totona, bona unai ita durua be namo. Eden umana ai Satani ese Iehova ena lohia siahuna ia henanadailaia. Hari,  namona be taunimanima ibounai ese idia abia dae Dirava ena lohia dalana be maoro. Bema sibona emu ura oi dadaraia, bona Iehova ena taravatu ibounai oi badinaia bona iena ura oi karaia, oi hahedinaraia oi be ia oi durua, a? Oi abia dae ena Basileia sibona ese taunimanima edia hekwakwanai ibounai do ia haorea, a? Eiava oi laloa taunimanima be sibona idia lohia be hegeregere, a?—Gen. 3:4, 5.

⁸ Bema ta be oi ia nanadaia, ‘Dahaka oi laloa inai politikol orea, eiava gavamani ia inai henia oreana dekenai?’ Edena bamona do oi haere? Inai orea taudia haida idia ura taunimanima idia durua. To, Keristani taudia idia diba Dirava ena Basileia sibona ese taunimanima edia hekwakwanai bona kara gageva ibounai do ia haorea. Namona be Iehova dekenai ita tabekau. Bema Keristani tauna ta ia laloa hekwakwanai ta hamaoromaoroa totona haida ese ena lalohadai sibona idia abia dae be namo, unai ese kongrigeisen ena lalotamona do ia hadikaia, ani?

9. Korinto kongrigeisen ai dahaka hekwakwanai ia noho? Unai hamaoromaoroa totona, Paulo be dahaka ia gwau?

⁹ Aposetolo taudia edia negai, Keristani taudia haida be kongrigeisen lalonai gau haida idia hepapahuahulaia. Korinto ai idia noho taudia idia gwau: “‘Lau be Paulo ena,’ bona ma haida umui gwau, ‘Lau be Apolo ena,’ ma haida umui gwau, ‘Lau be Kepa ena,’ bona ma haida umui gwau, ‘Lau be Keriso ena.’” Aposetolo Paulo ese unai kara ena dika ia gwauraia, ia gwau: “Keriso ena kongrigeisen be ia parara vadaeni.” Edena dala ai do idia hanamoa? Paulo ia gwau: “Tadikaka e, iseda Lohiabada Iesu Keriso ena ladanai umui lau hagoadaia, namona be umui ibounai be mai lalotamona ida umui hereva, bona namo lasi umui parara, to umui lalotamona momokani bona emui ura danu ia tamona be namo.” Hari namona be Keristani kongrigeisen be mai lalotamona ida idia noho.—1 Kor. 1:10-13; Roma 16:17, 18 duahia.

10. Edena dala ai Paulo ia hahedinaraia, Keristani taudia ese tanobada ena hepapahuahu karana lalonai do idia gini siri?

¹⁰ Paulo ese horoa Keristani taudia ia hagoadaia edia guba helarona idia laloa bada totona, to tanobada ena gaudia do idia laloa bada lasi. (Fili. 3:17-20) * Idia be gwaukau taudia bamona Keriso ena gabu idia abia. “Gwaukau taudia” be idia noholaia tano ena hekwakwanai lalonai idia vareai lasi. Badina idia be idau tano taudia. (2 Kor. 5:20) Tanobada helarona idia abia taudia danu be Dirava ena Basileia henunai idia noho, unai dainai idia be tanobada ena hepapahuahu lalonai idia vareai lasi.

11, 12. (a) Edena bamona negadia ai do ia auka Keristani taudia ese Dirava ena Basileia ia badinaia totona? (b) Keristani taihu ta be dahaka hekwakwanai ia davaria? Bona edena bamona ia hanaia?

¹¹ Tanobada ena kahana momo dekenai, hanua momo be edia histori, kastom, bona gado idia laloa bada, bona unai idia heagilaia. Unai dainai, Keristani taudia ese edia lalomamina idia hadibaia be namo, unai amo hepapahuahu ia vara neganai, idia diba dahaka do idia karaia. Unai be edena bamona do idia karaia?

¹² Taihu Mirjeta, * Yugoslavia amo, ena haheitalai mani ita laloa. Ia tubu daekau neganai, ia idia hadibaia Serbia taudia ia inai  henia totona. To, gabeai ia diba Iehova be ta ena toana ia laloa lasi, bona Satani ese bese idauidau inai henia karana ia havaraia, unai dainai ia ese bese abia isi karana ia dadaraia. To, ena gabu dekenai dagedage karana ta ia vara neganai, ia be Serbia taudia ia inai henia, bona ia auka idia dekenai ia haroro totona. To, ia laloparara namona be gau ta ia karaia unai lalohadai dikana ia koua totona. Unai hekwakwanai ia hanaia totona, bona ena haroro gaukara ia habadaia bona painia ai ia lao totona, Iehova ena heduru ia noia. Ia gwau: “Lau itaia haroro gaukara lau laloa bada neganai, unai ese lau do ia durua bada. Haroro gaukara ai, lau ura Iehova ena lalokau karana lau tohotohoa, bona lau itaia egu lalohadai dikadia ibounai idia ore.”

13. (a) Taihu ta be dahaka hekwakwanai ia davaria? Bona dahaka ia karaia? (b) Zoila amo dahaka ita dibaia?

¹³ Mani Zoila ena haheitalai oi laloa. Ia be Central America amo, to Europe ai kongrigeisen ta ia bamoa. Ia itaia kongrigeisen ai, Latin America amo idia mai tadikaka haida be ena hanua taudia, edia kastom karadia, bona edia miusiki idia herevalaia dika. Bema unai be oi, dahaka do oi karaia? Unai ese Zoila ena hemami ia hadikaia. To, Iehova ena heduru ia tahua bona ena lalona ai idia vara matamaia lalohadai dikadia ia kokia. Iseda huanai haida be unai bamona hekwakwanai idia davaria bona idia hekwarahi noho unai idia hanaia totona. To, ita ura lasi iseda hereva eiava kara amo iseda tadikaka taihu eiava ma haida huanai hekwakwanai ita havaraia.—Roma 14:19; 2 Kor. 6:3.

14. Iseda badinaia karana dekenai, edena dala ai Keristani taudia be edia lalomamina idia hadibaia diba?

¹⁴ Emu noho gabuna ai taunimanima be bese abia isi karana idia karaia dainai, oi danu be unai lalohadai oi abia, a? Unai bamona hemami oi abia, a? Namo lasi Keristani taudia be bese abia isi karana dainai, haida idia inai henia. To, bema bese, kastom, gado eiava tano ma ta taudia dekenai lalohadai kerere oi abia be edena bamona? Namona be bese abia isi karana dekenai Iehova ena kara ita lalohadailaia. Danu, sibona eda stadi ai Iehova ena kara bona unai bamona hereva haida ita tahua. Bena Iehova oi guriguri henia, unai amo oi do ia durua ena lalohadai oi lalopararalaia totona.—Roma 12:2 duahia.

15, 16. (a) Dirava ita badinaia dainai, haida be dahaka do idia karaia? (b) Edena dala ai tama sina ese edia natudia idia durua diba Dirava idia badinaia totona?

¹⁵ Iehova ena taunimanima idia ura mai lalomamina namona ida ia idia hesiai henia, unai amo edia gaukara turadia, sikuli turadia, dekena taudia, eiava varavara dekenai do idia hahedinaraia idia be idau. (1 Pet. 2:19) Bema tanobada taudia ese ita idia inai henia, ita hoa lasi, badina Iesu ese ita ia hadibaia vadaeni. Ita idia inai henia taudia momo be iseda Keristani gini siri karana idia laloa bada lasi. To, ita dekenai unai be mai anina bada.

¹⁶ Iehova ita badinaia anina be iseda abidadama do ita dogoatao noho herevana dagedage ita davaria. (Dan. 3:16-18) Matamata taudia momo be taunimanima dainai idia gari. Unai dainai emu natudia oi durua fleg saluti karana bona bese hanamoa anedia abia karana idia dadaraia totona. Natudia be unai ena badina idia lalopararalaia totona, ruma bese tomadiho lalonai umui herevalaia diba, unai amo mai gari lasi ida fleg saluti karana bona bese hanamoa anedia do idia dadaraia. Idia oi durua sibona edia abidadama be mai hemataurai ida idia herevalaia totona. (Roma 1:16) Bena edia tisa ida unai gaudia oi herevalaia diba.

17. Edena bamona kara ita dadaraia be namo, bona dahaka dainai?

¹⁷ Nega momo iseda hanua ena aniani, gado, gabu ena toana, bona kastom karadia ita moalelaia. To, namo lasi ita laloa ita ura henia gaudia be ma haida edia ia hereaia. Iehova be gau namodia momo ia havaraia ita moalelaia totona. (Sal. 104:24; Apok. 4:11) Unai dainai, ita gwau ita ura henia gauna ese ma haida edia ia hereaia be maoro lasi, ani?

18. Edena dala ai Iehova ena lalohadai ita abia neganai, hahenamo do ita abia?

¹⁸ Dirava ia ura taunimanima ibounai be hereva momokani idia diba bona mauri hanaihanai idia abia. (Ioa. 3:16; 1 Tim. 2:3, 4) Herevana iseda lalohadai be haida amo ia idau, to namona be edia lalohadai namodia ita kamonai bona ita abia dae. Unai bamona ita karaia neganai, do ita moale bona tadikaka taihu ida do ita lalotamona. Iehova ita badinaia totona, namona be tanobada taudia edia hepapahuahu lalonai ita vareai lasi. Namo lasi ma haida ita lalonamo henia bona ma haida ita badu henia. Iehova ese Satani ena tanobada ena inai heheni karana, hekokoroku karana, sibona abia isi karana amo ita ia ruhaia dainai, Iehova ita tanikiu henia! Namona be iseda lalona ita hadaia maino karadia ita hahedinaraia totona, salamo torea tauna ia gwau bamona: “Bema Dirava ena taudia do idia noho hebou, mai edia laloa tamona neganai, unai kara be namo, bona mai ena moale danu.”—Sal. 133:1.