1, 2. (a) Pou bann Kretien, kifer fidelite anver Bondie bien inportan, ek ki rapor sa ena avek nou netralite? (Get zimaz koumansman lartik.) (b) Ar ki kitsoz boukou dimounn montre zot fidel, ek ki konsekans sa kapav ena?

SE PA zis kan ena lager ki bann vre Kretien gard zot fidelite ek zot netralite. Kifer? Parski bann ki’nn vwe zot lavi ar Zeova inn promet pou kontan Li, res fidel ar Li, ek obeir Li. (1 Zan 5:3) Ninport ki nou nasionalite, ras, ouswa kiltir, nou anvi res atase ar bann prinsip drwat ki Bondie inn etabli. Pena nanye ki pli inportan ki nou fidelite anver Zeova ek so Rwayom! (Mat. 6:33) Me ki sa fidelite-la inplike pou bann Kretien? Sa inplik ki nou pa mel nou dan bann konfli ek bann dezakor ki ena dan sa lemond-la.—Iza. 2:4; lir Zan 17:11, 15, 16.

² Boukou dimounn montre zot bien fidel anver zot pei, tribi, kiltir, ouswa mem anver zot lekip nasional. Malerezman sa kalite fidelite-la finn kree enn lespri konpetision ek laenn. Parfwa, dan bann ka extrem ena krim ek mem exterminasion enn ras. Fason ki bann dimounn regle sa bann problem-la kapav  afekte nou personelman ouswa nou fami, mem si nou pa pran okenn par ladan. Parfwa desizion ki bann gouvernman pran kapav fer nou ena santiman ki nou’nn sibir enn gran linzistis. Sa kapav mem fer nou ankoler parski nou’nn kree avek enn sans lazistis. (Zen. 1:27; Det. 32:4) Ki nou fer dan bann sitiasion koumsa? Eski nou gard nou netralite ouswa nou donn koudme revolte?

3, 4. (a) Kifer bann Kretien pa pran par dan bann konfli sa lemond-la? (b) Ki nou pou examine dan sa lartik-la?

³ Parfwa, kan ena bann konfli, bann gouvernman met presion lor bann sitwayen pou zot pran par enn sertin group. Me, bann vre Kretien pa partisip dan bann konfli politik sa lemond-la, ni zot pran zarm. (Mat. 26:52) Satan anvi fer bann dimounn krwar ki enn parti so lemond pli meyer ki enn lot. Me nou, nou pa rant dan so lak. (2 Kor. 2:11) Nou pa fer parti sa lemond-la, alor nou pa mel nou dan okenn so bann konfli.—Lir Zan 15:18, 19.

⁴ Me parski nou inparfe, sertin parmi nou kitfwa pe bizin kontign lite pou rezet zot ansien fason panse ek eliminn bann latitid ki kapav kree divizion. (Zer. 17:9; Efe. 4:22-24) Alor, dan sa lartik-la, nou pou examinn bann prinsip ki kapav ed nou rezet sa bann tandans-la. Nou pou gete osi kouma nou kapav form nou lespri ek nou konsians pou ki nou res fidel ar Rwayom Bondie.

5, 6. Kouma Zezi ti konsider bann dimounn, ek kifer?

⁵ Si to ena bann dout lor fason ki to bizin konport twa dan sertin sitiasion, li bon to demann tomem: ‘Ki Zezi ti pou fer dan mo plas?’ Zezi ti viv parmi bann dimounn ki ti sorti Zide, Galile, Samari, ek lezot rezion ankor. Labib montre ki ti ena bann tansion ant sa bann dimounn diferan landrwa la. (Zan 4:9) Ti ena osi divizion ant bann Farizien ek bann Sadiseen (Zist. 23:6-9), ant lepep ek bann ki ramas tax (Mat. 18:17), ant bann ki ti gagn ledikasion avek bann Rabin ek bann ki pa ti gagn sa ledikasion-la. (Zan 7:49) Dan premie siek, se lanpir Romin ki ti dirize an Izrael, me bann Zwif pa ti kontan zot ditou. Pourtan, zame Zezi ti mel li dan sa bann konfli-la. Touletan li’nn defann laverite. Mem si li ti kone ki nasion Izrael se enn nasion spesial pou Bondie, zame li’nn ankouraz so bann disip pou konsider zot siperyer ar lezot. (Zan 4:22) Okontrer li ti ankouraz zot pou kontan tou dimounn parey.—Lik 10:27.

⁶ Kifer Zezi pa ti konsider enn group dimounn pli siperyer ki enn lot? Parski ni li, ni so Papa pa pran par personn dan bann konfli sa lemond-la. Kan Zeova, atraver so Garson, ti kree bann imin, Li ti anvi ki zot ranpli later. (Zen. 1:27, 28) Bondie inn kree zot dan enn fason ki zot kapav donn nesans diferan ras. Ni Zeova, ni Zezi pa konsider enn ras, enn nasion, ouswa enn lang siperyer ar enn lot. (Zist. 10:34, 35; Rev. 7:9, 13, 14) Nou bizin swiv zot lexanp parfe.—Mat. 5:43-48.

7, 8. (a) Pou kisannla nou pran par ek kifer? (b) Ki bann Kretien bizin rekonet konsernan bann problem sosial ek politik?

⁷ Selman, mem si nou pa pran par personn dan bann konfli sa lemond-la, nou pran par Zeova. Nou soutenir so souverennte. Premie konfli ti koumanse an  Edenn kan Satan ti met an dout drwa ki Bondie ena pou dirize. Akoz sa, sakenn parmi nou bizin deside si se fason azir Zeova ki pli bon ouswa fason azir Satan. Reponn fran-fran: Eski to fer kitsoz par to prop latet, ouswa to obeir bann lalwa ek prinsip Labib pou montre ki to pran pozision pou Zeova? Eski pou twa, Rwayom Bondie se sel solision pou bann problem limanite? Ouswa to panse ki bann dimounn kapav gouverne par zotmem?—Zen. 3:4, 5.

⁸ An realite, to bann repons pou revele seki to pou dir enn kikenn ki demann twa to lopinion lor bann dezakor ki ena zordi. Bann politisien, bann aktivis, ek bann ki lite pou sanzman, fer latet-lipie pou trouv enn solision. Kitfwa zot sinser ek zot ena bann bon mobil. Me pou bann Kretien, se zis Rwayom Bondie ki pou kapav tir tou problem limanite ek amenn vre lazistis. Nou bizin les tou dan lame Zeova. Apre tou, si sak Kretien lager pou enn solision ki dapre li meyer, eski sa pa pou kree divizion dan kongregasion?

9. Ki problem ti ena dan kongregasion Korint, me ki konsey lapot Pol ti done?

⁹ Anou gete kouma sertin Kretien premie siek ti reazir devan enn problem ki ti diviz kongregasion. Sertin dan kongregasion Korint ti pe dir: “‘Mo swiv Pol’; enn lot dir, ‘Mo swiv Apolos’; enn lot ki dir, ‘Mo swiv Sefas’; ankor lezot pe dir, ‘Mo swiv Lekris.’” Kan Pol tann sa, li gagn sok ek li ankoler. Se enn problem bien grav ki ti met an danze lape kongregasion. Alor, Pol demann so bann frer: “Eski Lekris divize?” Ek li donn zot sa konsey-la: “Dan nom nou Segner Zezi Kris, mo fer enn lapel pou ki zot tou res dakor ant zot, pou ki pena okenn divizion parmi zot ek ki zot bien ini dan enn sel panse ek enn sel konviksion.” Zordi osi parey, fode pena okenn divizion dan kongregasion.—1 Kor. 1:10-13; lir Romin 16:17, 18.

10. Ki lexanp lapot Pol ti servi pou montre kifer li inportan ki enn Kretien pa mel li dan bann konfli sa lemond-la?

¹⁰ Pol ti ankouraz sa bann Kretien-la pou konsantre lor privilez ki zot ena pou vinn bann sitwayen dan lesiel, olie zot konsantre lor bann kitsoz lor later. (Fil. 3:17-20) * Zot ti bizin azir kouma bann anbasader ki reprezant Kris. Kan enn anbasader al travay dan enn lot pei, li pa mel li dan bann zafer politik ouswa problem sa pei-la. (2 Kor. 5:20) Bann Kretien ki pou res lor later, zot osi zot soutenir Rwayom Bondie. Alor zot pa pran par dan bann konfli sa lemond-la.

11, 12. (a) Dan ki kalite lanvironnman li kapav difisil pou enn Kretien res fidel ar Rwayom Bondie? (b) Ki difikilte enn ser inn gagne, ek kouma li’nn fer fas ar sa?

¹¹ Dan laplipar pei, bann dimounn bien solider ek ini parski zot ena mem listwar, mem kiltir ek mem langaz. Se samem ki fer zot fierte. Me antan ki Kretien, fode pa nou les sa kalite latitid-la detin lor nou. Nou bizin form nou lespri ek nou konsians pou nou gard nou netralite dan ninport ki sitiasion. Kouma nou kapav fer sa?

¹² Anou pran lexanp Mirjeta, * enn ser ki’nn ne dan ex-Yougoslavie. Depi tipti,  li’nn aprann pou ena laenn pou bann Serb. Kan li’nn konn laverite, li’nn konpran ki Bondie pa get de lizie ek ki se Satan ki responsab rasism. Alor, li’nn lite pou tir tou ti tras nasionalism dan so leker. Pourtan, kan enn lager rasial ti eklate dan so landrwa, tou bann santiman laenn ki ti ena dan fon so leker, ti remonte ek li ti gagn difikilte pou pres ar bann Serb. Me li’nn realize ki li pa pou kapav res lebra krwaze ek atann ki sa bann santiman negatif la ale par zotmem. Alor, li pa’nn zis sipliy Zeova ed li vink sa bann santiman-la, me li’nn demann Li osi ed li fer pionie. Mirjeta dir: “Res konsantre dan mo servis, se sa ki’nn ed mwa plis. Dan predikasion, amezir ki mo imit bann kalite Zeova, tigit par tigit, mo’nn remarke ki mo bann santiman negatif inn koumans disparet.”

13. (a) Ki sitiasion ti met enn ser malalez, me kouma li’nn reazir? (b) Ki nou aprann ar seki’nn ariv Zoila?

¹³ Anou pran lexanp Zoila. Li sorti Mexique, ek asterla li res l’Europe. Dan so kongregasion, ena sertin frer-ser ki sorti lezot parti l’Amérique du Sud. Plizir fwa sa bann frer-ser la inn fer bann badinaz pou denigre pei kot li sorti, so bann koutim ek mem so lamizik. Si to ti dan plas Zoila, kouma to ti pou reazir? Li normal ki bann komanter koumsa ti met Zoila malalez. Me li ti demann Zeova ed li pou eliminn tou santiman negatif ki kapav koumans grandi dan so leker. Nou bizin rekonet ki sertin parmi nou ankor pe lite kont bann santiman koumsa. Zame nou pou anvi dir ouswa fer enn kitsoz ki kapav kree divizion ant nou bann frer ouswa mem ant lezot dimounn.—Rom. 14:19; 2 Kor. 6:3.

14. Ki kapav ed twa pou form to lespri ek to konsians pou ki to ena mem fason panse ki Zeova lor bann dimounn?

¹⁴ Eski to’nn grandi dan enn lanvironnman ki’nn fer twa devlop enn fierte pou to pei ouswa to landrwa? Eski to ankor ena sa bann santiman-la dan to leker? Fode zame bann Kretien les bann santiman nasionalis afekte fason ki zot konsider lezot. Me ki to pou fer si to rann twa kont ki to ena bann panse negatif lor bann dimounn enn lot nasion, kiltir, lang, ouswa ras? Alor, li bon to reflesi kouma Zeova konsider bann dimounn ki fier zot pei ouswa ki pran zot pou pli siperyer ki lezot. Li vo lapenn to etidie lor sa size-la dan to letid personel ouswa dan to ladorasion an fami. Apre sa, sipliy Zeova pou ed twa konsider lezot parey kouma Li.—Lir Romin 12:2.

15, 16. (a) Kouma sertin kitfwa pou reazir kan zot trouv nou diferan? (b) Kouma bann paran kapav ed zot zanfan pou res fidel ar Zeova?

¹⁵ Pa zordi pa demin, akoz so konsians, enn serviter Zeova pou bizin montre ki li diferan ar lezot dimounn, kouma par exanp so bann koleg travay, kamarad lekol, vwazin ouswa so fami. (1 Pier 2:19) Fode pa nou etone ki lemond ena laenn pou nou parski nou diferan; Zezi ti fini averti nou ki li pou koumsa. Nou bizin rapel ki laplipar nou bann opozan pa kone ki ete Rwayom Bondie. Alor zot pa konpran kifer li inportan nou gard nou netralite ek res fidel ar sa Rwayom-la.

¹⁶ Res fidel ar Zeova inplik ki nou tini ferm devan bann menas. (Dan. 3:16-18) Lakrint bann zom kapav afekte nou tou, ki nou zenn ouswa vie. Me pou bann zenn, li pli difisil ankor pou montre zot  diferan parski se koumadir zot pe naz kont kouran. Si dan lekol, bann profeser pe met presion lor to zanfan pou salie drapo ouswa pou partisip dan bann selebrasion patriotik, alor pa ezite pou ed li. Pandan Ladorasion an Fami, ed li konpran ki Zeova panse lor sa bann kitsoz-la. Montre li kouma, avek respe, li kapav explik so krwayans dan enn fason kler. (Rom. 1:16) Si bizin, koz ar so bann profeser ek explik zot nou bann krwayans.

17. Ki latitid nou bizin rezete, ek kifer?

¹⁷ Li normal ki nou kontan kiltir, langaz, manze ek pei kot nou’nn grandi. Selman fode zame nou dir: “Pou mwa pli bon.” Nou bizin rezet sa move latitid-la. Dan tou kitsoz ki Zeova inn kree, Li’nn fer enn varyete. (Ps. 104:24; Rev. 4:11) Alor kifer nou bizin insiste ki nou fason fer pli bon?

18. Ki bienfe nou gagne kan nou ena mem fason panse ki Zeova?

¹⁸ Bondie anvi ki tou kalite dimounn gagn enn konesans exakt lor laverite ek gagn lavi pou touletan. (Zan 3:16; 1 Tim. 2:3, 4) Si nou ena enn lespri ouver ek nou dispoze pou aksepte lide lezot dimounn, sa pou rann nou lavi interesan ek pou protez nou linite. Pou res fidel ar Zeova fode pa nou mel nou dan bann konfli sa lemond-la. Bann dimounn ki ena lorgey ek lespri konpetision, pena zot plas parmi nou. Nou bien kontan ki Zeova inn liber nou ar lespri divizion, konpetision ek lorgey ki ena dan lemond Satan! Alor nou bizin bien deside pou favoriz lape parey kouma enn ekrivin Psom ti ekrir: “Gete! Li vremem bon ek li enn plezir pou bann frer res ansam dan linite!”—Ps. 133:1.