1, 2. (a) Ahabw’enki ni kikuru Abakristaayo kuhamira ahari Ruhanga n’okutagira rubaju omu nshonga z’ensi? (Reeba ekishushani aha kutandika.) (b) Abantu nibakira kuhamira ahari ki, kwonka ekyo nikibaasa kurugamu ki?

ABAKRISTAAYO ab’amazima bashemereire kuhamira ahari Yehova kandi batarikwejwanzya omu rwanju rw’ensi obwire bwona, beitu butari bwire bw’orutaro bwonka. Ahabw’enki? Ahakuba boona abehaireyo ahari Yehova bakamuraganisa kumukunda, kumuhamiraho, n’okumworobera. (1 Yoh. 5:3) Hoona ahu turikutuura, obukomooko bwaitu, eihanga ryaitu, nari oruganda rwaitu nituba twine kugyendera aha mitindo ya Ruhanga ey’okuhikiirira. Okuhamira ahari Yehova n’Obukama bwe nikukirira kimwe ekintu kyona. (Mat. 6:33) Obwesigwa nk’obwo nibwetengyesa Abakristaayo kuguma beetaniise aha rwanju rw’ensi egi rwona.—Isa. 2:4; shoma Yohaana 17:11, 15, 16.

² Abantu abatari Bakristaayo nibahamira aha mahanga gaabo, enganda, nari tiimu zaabo z’omupiira. Kwonka ebyo nibirugamu okuhayahayana n’eitima, nari okusheesha eshagama n’okwitana. Oku abantu barikushoboorora oburemeezi obu nikubaasa kutukwataho,  nari kukwate aha maka gaitu ahakuba naitwe turi abantu. Ahabw’okugira ngu Ruhanga akahanga abantu baine omutwarize gw’oburingaaniza, ebi gavumenti z’abantu zirikucwamu obumwe nibitugwisa kubi. (Kut. 1:27; Bir. 32:4) Mbwenu shi nitwija kutwaza tuta omu mbeera nk’ezo? Nikibaasa kworoba kugira orubaju oru twazaho omu nshonga z’ensi egi.

3, 4. (a) Ahabw’enki Abakristaayo batarikwejwanzya omu rwanju rw’ensi egi? (b) Ekicweka eki nikiza kugamba ahari ki?

³ Gavumenti nizibaasa kugyemesereza abantu kugira orubaju oru baazaho omu nshonga z’eby’obutegyeki. Abakristaayo ab’amazima tibarikubaasa kukora ekyo. Titurikwejumba omu rwanju rw’eby’obutegyeki eby’ensi egi, kandi titurikukwata eby’okurwanisa. (Mat. 26:52) Titurikubeihwabeiha kwejumba omu kuhimbisa ekicweka ky’ensi ya Sitaane ekimwe ngu nikikira ekindi. (2 Kor. 2:11) Okutaba ab’ensi, nikituhwera kwetantara orwanju rwayo.—Shoma Yohaana 15:18, 19.

⁴ Kwonka ahabw’okugira ngu turi abatahikiriire, bamwe omuriitwe noobaasa kushanga tukiinemu emitwarize y’okwebaganisamu ei twabaire twine ira. (Yer. 17:9; Efe. 4:22-24) N’ahabw’ekyo, ekicweka eki nikiija kworeka emisingye emwe erikubaasa kutuhwera kusingura emiteekateekyere nk’egyo. Kandi nituza kureeba oku turikubaasa kutendeka ebiteekateeko byaitu n’omuntu waitu w’omunda kuhamira aha Bukama bwa Ruhanga.

5, 6. Yesu akaba naatwara ata abantu b’enganda nyingi omu ihanga eri yaabaire naatuuramu, kandi n’ahabwaki?

⁵ Waaba noobanganisa oku oshemereire kutwaza omu mbeera emwe, nikiba kiri eky’obwengye kwebuuza oti: ‘Ku ogire ngu ni Yesu, akaatwarize ata?’ Eihanga eri Yesu yaabaire naatuuramu rikaba ririmu abantu barikuruga omu bicweka bitarikushushana, nka Buyudaaya, Galilaaya, Samaria, n’ahandi. Ebyahandiikirwe nibyoreka ngu abantu b’ebicweka bitarikushushana bakaba batarikukwatanisa. (Yoh. 4:9) Kandi hakaba hariho okwebaganisamu ahagati y’Abafarisaayo n’Abasadukaayo (Byak. 23:6-9), ahagati y’abantu baabutoosha n’abahooza (Mat. 9:11), hamwe n’ahagati y’abeegire Ebiragiro n’abo abaabaire batabyegire. (Yoh. 7:49) Omu kyasha ky’okubanza, Israeli ekaba neetegyekwa Abarooma, kandi abantu bakaba batarikubakunda. N’obu Yesu araabe niwe yaatandikireho amazima, kandi yaahamize ngu okujunwa kukakoomoka aha Bayudaaya, kwonka tarahigire beegi be kugira emparana. (Yoh. 4:22) Omu mwanya gw’ekyo, akabahiga kukunda abantu boona nka bataahi baabo.—Luk. 10:27.

⁶ Ahabw’enki Yesu atarashagikire okushoroora omu rangi okw’Abayudaaya? N’ahabw’okuba we na ishe tibarikugwera rubaju. Obu Yehova yaahanga omushaija n’omukazi kurabira omu Mwana we, ekigyendererwa kye kikaba kiri okwijuza ensi yoona. (Kut. 1:27, 28) Ruhanga akahanga abantu omu muringo ogwabaire nigubabaasisa kuzaara abantu b’erangi zitarikushushana. Yehova na Yesu tibarikutwara abantu b’erangi emwe ngu nibakira abandi. (Byak. 10:34, 35; Kush. 7:9, 13, 14) Twine kukuratira eky’okureeberaho kyabo ekihikiriire.—Mat. 5:43-48.

7, 8. (a) Ni rubaju ki oru Abakristaayo barikushagika? (b) Twine kumanya ki aha bikwatiraine n’okushoboorora oburemeezi bw’abantu?

⁷ Kwonka tushemereire kugira orubaju aha bikwatiraine n’enshonga emwe yonka, nikwo okushagika Yehova nk’ohikire kutegyeka byona. Enshonga egi ekabanza kuteganisibwa omuri Edeni obu Sitaane yaahakanisa obutegyeki bwa Yehova. Hati oku abantu  barikucwamu nikworeka yaaba nibaikiriza ngu omuringo ogu Ruhanga arikukoramu ebintu nigukira ogwa Sitaane, nari ngu ogwa Sitaane nigukira ogwa Ruhanga. Buzima omu bwijwire, nooshagika Yehova orikucwamu kworobera ebiragiro bye n’emitindo ye, omu mwanya gw’okukora nk’oku orikwenda? Nooreeba Obukama bwe ngu nibwo bwonka oburaahezeho oburemeezi bw’abantu? Nari noikiriza ngu abantu nibabaasa kwetegyeka?—Kut. 3:4, 5.

⁸ Eby’okugarukamu by’ebibuuzo ebyo, nibyoreka oku oraagarukyemu abantu baakubuuza eki orikuteekateeka aha nshonga z’ensi egi. Ab’eby’obutegyeki n’ab’ebibiina abarikwenda kureetaho empindahinduka, batwire nibateeraho kugira eki baakora. Okuteeraho kwabo nikubaasa kuba kwine ebigyendererwa birungi. Kwonka, Abakristaayo nibamanya ngu Obukama bwa Ruhanga nibwo bwonka oburaahezeho oburemeezi bw’abantu bukareeta oburingaaniza. Enshonga egi tushemereire kugireka omu mikono ya Yehova. Mbwenu shi twaba tutakozire tutyo, buri Mukristaayo akareeta ekiteekateeko eki arikureeba ngu ni kirungi, ebibiina tibirikwebaganisamu?

9. Ni buremeezi ki obwabaireho omu kyasha ky’okubanza omu kibiina kya Korinso, kwonka entumwa Paulo akaha buhabuzi ki?

⁹ Yetegyereze oku Abakristaayo omu kyasha ky’okubanza baatwarize aha nshonga eyaabaireho omu kibiina. Bamwe omuri Korinso bakaba nibagira bati: “Nyowe ndi owa Paulo; kandi ondi ati: Ndi owa Apolo; ondi ati: Ndi owa Keefa; n’ondiijo ati: Ndi owa Kristo.” Kyona eki baihiriireho kugamba batyo, ekyo kikagwisa kubi Paulo. Akabuuza ati: “Nimugira ngu Kristo abaganisiibwemu?” Mbwenu shi emiteekateekyere nk’egyo ekaba eine kukorerwa ki? Paulo akahiga Abakristaayo ati: “Kwonka nimbeeshengyereza, b’eishe-mwe, omu iziina rya Mukama waitu Yesu Kristo, mukaikirizaine, mureka kwebaganisamu, mukwatanisa hamwe buzima omu biteekateeko byanyu n’omu bi murikuhamya.” Kandi tihashemereire kubaho okwebaganisamu kw’omuringo gwona omu kibiina Ekikristaayo obunaku obu.—1 Kor. 1:10-13; shoma Abarooma 16:17, 18.

10. Entumwa Paulo akooreka ata ngu Abakristaayo bashemereire kuguma bataine rubaju omu nshonga z’ensi egi?

¹⁰ Paulo akahiga Abakristaayo abashukirweho amajuta kuta omutima aha buhunguzi bwabo obw’omu iguru hatari aha bintu by’ensi. (Fil. 3:17-20) * Bakaba baine kukora nk’abajwekyerwa abarikujwekyera Kristo. Abajwekyerwa tibarikwejwanzya omu nshonga z’amahanga agu barikuba nibaheerezamu. Obwesigwa bwabo nibuba buri ahandi. (2 Kor. 5:20) Abakristaayo abaine amatsiko g’okutuura omu nsi nabo nibategyekwa Obukama bwa Ruhanga, n’ahabw’ekyo nikiba kitahikire kwetaasya omu ntongane z’ensi egi.

11, 12. (a) Ni mbeera ki ezirikubaasa kureetera ow’eishe-emwe kugumirwa kuhamira aha Bukama bwa Ruhanga? (b) Munyaanyazi-itwe omwe akaba naatwara ata abantu abamwe, kandi niki ekyamuhweraire kuhindura aha miteekateekyere ye?

¹¹ Omu bicweka bingi eby’ensi, abantu bahikaine munonga kandi nibakundana. Nibakwatanisibwa ebyafaayo, emigyenzo, n’orurimi, kandi ebintu ebi abantu nibyo barikukira kwehimbisizamu. Omu mbeera nk’ezo, Abakristaayo baine kutendeka ebiteekateeko byabo n’omuntu waabo w’omunda kubaasa kutwaza gye omu nshonga z’okutagira rubaju. Ekyo nibabaasa kukikora bata?

¹² Nk’eky’okureeberaho, Mirjeta * kuruga  omu ihanga eryabaire nirwetwa Yugoslavia, akakuzibwa aine kwanga Abasabia. Bwanyima y’okumanya ngu Yehova tarikushoroora kandi ngu Sitaane niwe arikureetaho okushoroora omu nganda, akateeraho kweihamu enyehurira egyo. Kwonka, ku haabaireho orutaro rw’enganda omu kicweka ekyo, rwango ekagaruka yaatandika kumwijamu, kyamureetera kugumirwa kubuurira Abasabia. Beitu akaijuka ngu tashemereire kushutama aho reero akateekateeka ngu emiteekateekyere nk’egyo neija kugyenda yonka. Akeeshengyereza Yehova kumuhwera kusingura oburemeezi obu, n’okwongyera aha buheereza bwe kandi akaba payoniya. Mirjeta naagira ati: “Nshangire ngu okuta omutima aha kubuurira nibwo buhwezi oburikukirirayo kimwe. Omu kubuurira, niinteeraho kugira emitwarize nk’eya Yehova, kandi ndeebire emiteekateekyere yangye egwire erikuhwaho.”

13. (a) Ni mbeera ki eyaareeteire munyaanyazi-itwe omwe kwehurira kubi, kwonka akatwaza ata? (b) Nitubaasa kwega ki aha byabaire ahari Zoila?

¹³ Teekateeka aha ndiijo orikwetwa Zoila. Naakomooka omuri Mexico, kwonka hati ari omu kibiina kimwe omuri Buraaya. Akeetegyereza ngu omu kibiina ab’eishe-emwe abamwe abaabaire nibaruga omu bicweka ebimwe ebya Latin America nibagamba kubi aha ihanga rye, emigyenzo, n’ebyeshongoro. Ku waabaire ori iwe okaaba noija kutwaza ota? Ebi baagambire bikareetera Zoila kwehurira kubi. Kwonka ekirungi, akashaba Yehova kumuhwera kutaguma n’emiteekateekyere mibi omu mutima gwe. Bamwe omuriitwe nibateeraho munonga kweihamu emiteekateekyere nk’egyo. Titurikwenda kugamba nari kukora ekintu kyona ekirikubaasa kureetaho okwebaganisamu, nari kutwara abamwe nk’abarikukira abandi.—Rom. 14:19; 2 Kor. 6:3.

14. Niki ekirikubaasa kukuhwera kutwara abantu nk’oku Yehova arikubatwara?

¹⁴ Ekicweka eki waakuriiremu nari embeera nibikureetera kuteekateeka ngu eihanga ryawe nirikira agandi? Mbwenu shi enyehurira nk’egyo ekiri omu mutima gwawe? Abakristaayo tibashemereire kuteekateeka ngu eihanga ryabo nirikira ery’abandi. Kwonka shi ku waakumanya ngu oine emiteekateekyere mibi aha bantu b’eihanga erindi, oruganda orundi, orurimi orundi, nari erangi endiijo? Obwo nikiba kiri kirungi kuteekateeka aha ku Yehova arikureeba abantu abarikuhimbisa amahanga gaabo nari abarikuteekateeka ngu nibakira abandi. Teeraho kucondooza aha nshonga egi n’ezindi nk’ezi omu kweshomesa nari omu kuramya kw’eka. Bwanyima yeshengyereze Yehova kukuhwera kugira emiteekateekyere nk’eye aha nshonga ezi.—Shoma Abarooma 12:2.

15, 16. (a) Abamwe nibabaasa kututwariza bata ahabw’okugira ngu turi ab’omutaano? (b) Abazaire nibabaasa kuhwera bata abaana baabo kuhamira ahari Yehova?

¹⁵ Nituba nitwenda kuheereza Yehova twine omuntu w’omunda omurungi, n’ahabw’ekyo obumwe nituba twine kuba ab’omutaano aha bu turikukora nabo, abu turikushoma nabo, abataahi, nari abanyabuzaare. (1 Pet. 2:19) Tikishemereire kututangaaza abantu b’ensi baatwanga, ahabw’okuba ab’omutaano ahakuba Yesu akagira ngu ekyo nikiija kubaho. Baingi abarikutuhakanisa tibarikumanya ahabw’enki ni kikuru Abakristaayo kutagira rubaju. Kwonka ahariitwe, enshonga ezi ni nkuru munonga.

¹⁶ Twine kumariirira kuhamira ahari Yehova n’obu twakuba nitutiinatiinisibwa. (Dan. 3:16-18) Abantu b’emyaka yoona nibabaasa kutiina, kwonka abato nikibaasa kubagumira munonga kuba ab’omutaano aha bandi. Abaana baawe baaba nibagyemeserezibwa kuteerera ebendera entamaamu nari kukuza ebiro bikuru by’eihanga, oteeziringa kubahwera. Koresa obwire bw’Okuramya kw’Eka kuhwera abaana baawe kwetegyereza oku  baine kusingura oburemeezi obwo baine obumanzi. Bahwere kumanya oku barikubaasa kushoboorora gye ebi barikwikiriza omu muringo gw’obucureezi. (Rom. 1:16) Kubaasa kuhwera abaana baawe, gamba n’abashomesa baabo aha nshonga ezi kyaba nikyetengyesa.

17. Ni miteekateekyere ki ei twine kwetantara, kandi n’ahabw’enki?

¹⁷ Buzima nitubaasa kukunda ebintu ebiri omu ihanga ryaitu nk’ebihangirwe, oruganda, orurimi, n’eby’okurya. Kwonka, twine kwetantara emiteekateekyere ey’okugira ngu “ekyangye nikyo kirikukirayo oburungi.” Yehova akahanga ebintu by’emiringo mingi ahabw’okwenda ngu tushemererwe. (Zab. 104:24; Kush. 4:11) Mbwenu shi ahabw’enki oshemereire kuremeraho ngu omuringo gumwe ogw’okukora ekintu nigukira ogundi?

18. Okutwara abantu nk’oku Yehova arikubatwara nikirugamu kita ebirungi?

¹⁸ Ruhanga naayenda ngu abantu b’emiringo yoona bamanye amazima kandi batungye amagara agatahwaho. (Yoh. 3:16; 1 Tim. 2:3, 4) Nituhurikiza ebiteekateeko by’abandi kandi tubiikiriza n’obu birikuba bitarikushushana n’ebyaitu, kandi eki nikirinda obumwe bwaitu. Ahabw’okugira ngu nituhamira ahari Yehova, twine kwetantara kwejwanzya omu rwanju rw’ensi. Titushemereire kugira embaju ezi twashagika. Ka twine okushemererwa ahabw’okugira ngu Yehova akatucungura kuruga omu nsi ya Sitaane erimu okwebaganisamu, okwetunguura, n’okuhayahayana! Ka tumariirire kuteeraho kugira emiteekateekyere y’obusingye nk’ey’omuhandiiki wa zaaburi owaagizire ati: “Reeba, ku kiri kirungi kandi ekirikushemeza, ab’eishe-emwe kutuura hamwe nibakwatanisa!”—Zab. 133:1.