1, 2. (a) Akin ya importante ed saray Kristiano so katooran ed Dios, tan panon itan a makatulong pian makapansiansia kan neutral? (Nengnengen so litratod gapo na artikulo.) (b) Anto ray panmamatooran na totoo, balet antoy resulta na satan?

IMPORTANTE ed saray tuan Kristiano so katooran tan neutralidad, aliwa labat a diad panaon na guerra. Akin? Lapud insipan na amin ya dedikado ed si Jehova ya sikatoy aroen, panmatooran, tan unoren da. (1 Juan 5:3) Labay tayon unoren iray matunong ya prinsipyo na Dios, inerman so panaayaman tayo tan antokaman so apalabas, bansa, odino kultura tayo. Ipapanengneng tayo ya say talagan panmamatooran tayo et si Jehova tan say Panarian to. (Mat. 6:33) Pian nagawaan tayo itan, kaukolan ya agtayo mibabali ed amin ya isyu tan panlalaban ed sayan mundo.—Isa. 2:4; basaen so Juan 17:11, 15, 16.

² Wala ray totoo ya talagan matoor ed bansa, rehyon, kultura odino anggan ed saray sports team na bansa ra. Kanian say resulta na satan et kompetisyon tan panlalaban, tan no maminsan et pateyan ni ingen. Anggano agtayo mibabali ed saratan, posiblin naimpluensyaan tayo nin siansia tan say pamilya tayo ta wadia  tayod mundo. Pinalsa itayo na Dios ya amta tayo no antoy patas, kanian nayarin agtayo pabor ed saray gagawaen na gobierno. (Gen. 1:27; Deu. 32:4) Antoy reaksion tayod saraya? Ompan agtayo naliklikas ya wala la manayay pipilaan tayo ed sarayan isyu.

3, 4. (a) Akin ya mansiasiansian neutral iray Kristiano ed saray isyu ed sayan mundo? (b) Antoy aralen tayo ed sayan artikulo?

³ No wala ray onlesan isyu, nayarin kombinsien na gobierno iray totoo ya manpili no siopay suportaan da. Balet ag-itan gawaen na saray tuan Kristiano. Ag-itayo mibabali ed saray isyu ed politika na sayan mundo; odino mangusar na armas. (Mat. 26:52) Anggano piliten da tayo, agtayo susuportaan so antokaman ya kabiangan na mundo nen Satanas. (2 Cor. 2:11) Ag-itayo kabiangan na mundo, kanian ag-itayo mibabali ed saray isyu ed mundo.—Basaen so Juan 15:18, 19.

⁴ Balet lapud agtayo perpekto, nayarin naiirapan so arum ed sikatayo ya ekalen iray apasalan da lan ugali, singa say panangidumaduma. (Jer. 17:9; Efe. 4:22-24) Kanian, aralen tayo ed sayan artikulo iray pigaran prinsipyo ya makatulong ed sikatayo pian nalabanan itan. Aralen tayo met no panon tayon ipasal so nonot tan konsiensia tayo pian makapanmatoor tayod Panarian na Dios.

5, 6. Antoy reaksion nen Jesus ed saray nanduruman isyu ed bansan nanayaman to, tan akin?

⁵ No agka segurado no antoy nepeg a gawaen mod sakey ya situasyon, maabig no tepetan moy sarilim, ‘Antoy gawaen nen Jesus no sikatoy walad onian situasyon?’ Diad bansan nanayaman nen Jesus, saray totoo et nanlapud nanduruman rehyon—diad Judea, Galilea, Samaria, tan arum ni. Ibabaga na Biblia ya agmantotongtong iray Judio tan Samaritano. (Juan 4:9) Dakel so agpanpapaknaan na saray Fariseo tan Saduceo. (Gawa 23:6-9) Kabusol na saray Israelita iray managsingil na buis tan saray Romano. (Mat. 9:11) Iisipen na saray Judion nanaral na Ganggan ya mas maong ira nen say arum. (Juan 7:49) Anggapon balot so pinilaan nen Jesus ed saratan ya isyu. Tua, indepensa nen Jesus so katuaan tan imbaga ton say kilalaban et manlapud saray Judio, balet agton balot imbangat ed saray disipulo to ya isipen dan mas superyor ira nen say arum. (Juan 4:22) Imbes, imbaga tod sikara ya aroen day kapara dan too.—Luc. 10:27.

⁶ Akin et anggapoy pinilaan nen Jesus ed saratan ya isyu? Lapud sikato tan say Ama to et anggapoy papaboran da ed antokaman ya isyu ed sayan mundo. Nen pinalsa nen Jehova si Adan tan Eva panamegley na Anak to, say gagala to et panoen day interon mundo. (Gen. 1:27, 28) Pinalsa na Dios so too ya sarag toy mamawala na nanduruman rasa. Anggapoy mas papaboran nen Jehova tan nen Jesus ya rasa, bansa, odino lenguahe. (Gawa 10:34, 35; Apo. 7:9, 13, 14) Nepeg tayo sirin ya aligen so alimbawa ra.—Mat. 5:43-48.

7, 8. (a) Diad anton isyu ya nepeg a malinew no siopa so susuportaan na saray Kristiano? (b) Antoy nepeg ya nonoten na saray Kristiano no wala ray problema tan isyu ed politika?

⁷ Balet walay sakey ya isyu ya kaukolan a malinew no siopay susuportaan tayo. Satan ya isyu et nipaakar ed soberanya nen Jehova. Ginmapo itan ya isyu diad Eden nen kinuestion nen Satanas so pananguley nen Jehova. Kanian amin ya totoo et kaukolan ya manpili no siopay panisiaan dan makanepegan ya manuley, say Dios odino si  Satanas. Usisam pay sarilim. Talaga kasin susuportaan moy soberanya nen Jehova diad itutulok mod saray ganggan tan prinsipyo to imbes ya say panlabayan mo? Kasin kombinsido kan say Panarian to labat so solusyon ed amin a problema na totoo? Odino kasin manisia kan sarag na toon uleyan so sarili to?—Gen. 3:4, 5.

⁸ Say ebat mo ed saratan ya tepet so pakanengnengan no antoy magmaliw ya reaksion mo no walay mantepet ed sika na opinyon mo ed sakey ya kontrobersial ya isyu. Abayag lan mansasagpot iray politiko, aktibista, tan repormista pian nasolusyonan iray isyu ya sengegan na agpankakasakey. Nayari pa lagin maong met so motibo da. Balet parad saray Kristiano, say Panarian na Dios labat so makaresolbe ed saray problema na totoo tan makapangiter na tuan hustisya. Ipalima tayo la itan ed si Jehova. No ipilit na kada Kristiano so iisipen ton sankaabigan ya solusyon, agta manresulta laingen itan ed agpankakasakey na kongregasyon?

⁹ Imanoen pa no antoy reaksion na arum ya Kristiano nen inmunan siglo ed sakey ya isyu ya linmesa ed kongregasyon. Wala ray taga Corinto ya mangibabagan: “‘Wala ak ed si Pablo,’ ‘Balet siak, diad si Apolos,’ ‘Balet siak, diad si Cefas,’ ‘Balet siak, diad si Kristo.’” Antokaman so sengegan na sayan isyu, asanokan si apostol Pablo lapud makapuy ya resulta na satan. Singa ompapaway ya ‘naapag so kongregasyon nen Kristo.’ Antoy solusyon ed satan? Oniay imbaga nen Pablo ed saray Kristiano: “Bilinen ta kayo natan, agagi, diad panamegley na ngaran na Katawan tayon Jesu-Kristo a nepeg a manpapakna kayon amin ed sasalitaen yo, tan nepeg ya anggapoy inkaapag-apag ed limog yo, noagta sigpot kayon mankakasakey ed nonot tan ed paraan na panag-isip.” Ontan met sirin diad panaon tayo natan, agtayo aabuloyan ya walay inkaapag-apag ed kongregasyon tayo.—1 Cor. 1:10-13; basaen so Roma 16:17, 18.

10. Anton ilustrasyon so inusar nen apostol Pablo pian idanet ya kaukolan a mansiansian neutral iray Kristiano ed saray isyu o gulo ed sayan mundo?

¹⁰ Pinaseseg nen Pablo iray alanaan a Kristiano ya aliwan saray bengatla diad dalin so pampokusan da, noag say ‘kanepegan da bilang mibabaley ed tawen.’ (Fil. 3:17-20) * Nepeg dan ipanengneng ya embahador ira ya kasandi nen Kristo. Saray embahador et agmibabali ed saray isyu ed bansan kawalaan da. Say panmamatooran da et say gobierno ya angibaki ed sikara. (2 Cor. 5:20) Saray Kristiano ya diad dalin so ilalo ra et sakop met na gobierno o Panarian na Dios, kanian ag-ira nepeg ya mibabali ed saray isyu o gulo ed sayan mundo.

11, 12. (a) Anton situasyon so nayarin manubok ed katooran tayo ed Panarian na Dios? (b) Anton isyu so naeksperiensya na sakey a Kristiano, tan panon ton nilabanan so negatibon liknaan to?

¹¹ Diad dakel a lugar, saray totoo et maapit so liknaan da ed sakey tan sakey lapud pareho so apalabas, kultura, tan lenguahe da, tan proud irad satan. Diad ontan iran situasyon, kaukolan ya ipasal na saray Kristiano so nonot tan konsiensia ra pian duga so gawaen da no bilang walay onlesan isyu ya nalalanor so neutralidad. Panon dan nagawaan itan?

 ¹² Nengnengen tayoy alimbawa nen Mirjeta * ya tagad lugar a datin sakop na Yugoslavia. Sikatoy binmaleg ya kakkabusol to ray taga Serbia. Nen naaralan to ya si Jehova et anggapoy lalabien to tan si Satanas so sengegan na diskriminasyon, ginawa toy anggaay nayarian to pian naekal so pamubusol tod arum. Balet nen walay agawan gulo diad lugar da, pinmawil lamet iman ya liknaan to, kanian ngalngali agto labay ya pulongan iray Serbian. Amta nen Mirjeta ya makapuy itan ya nalilikna to kanian nampikasi ed si Jehova ya nalabanan to itan, tan napaaligwas toy panaglingkor to tan onkualipika bilang payunir. “Akatulong a maong so impanpokus kod ministeryo,” so kuan to. “Lapud satan, naaralan kon aligen so panangaro nen Jehova, tan kalkalnan naandi iray negatibon naliliknak.”

13. (a) Akin ya asakitan so sakey a sister, tan antoy ginawa to? (b) Antoy naaralan tayod eksperiensya nen Zoila?

¹³ Nengnengen met so alimbawa nen Zoila. Sikatoy nanlapud Mexico, balet natan et wala lad kongregasyon ed Europe. Naimano to ya wala ray agagin taga Latin America ya makaopendi iray ibabaga ra nipaakar ed nanlapuan ton bansa, pati kustombre tan musika da. Antoy gawaen mo no sika si Zoila? Siempre, asakitan si Zoila ed imbaga na sarayan agagi. Balet maong labat ta kinerew toy tulong nen Jehova pian nalabanan toy negatibon liknaan to. Aminen tayo ya no maminsan et wala ra met so ontan ya isyu ed kongregasyon tayo. Agtayo labay ya makapansalita odino makagawa tayoy bengatlan pansengegan na agpankakasakey odino pakagapolan na agagi tayo, tan anggan saray pupulongan tayo.—Roma 14:19; 2 Cor. 6:3.

14. Panon ya nipasal na saray Kristiano so nonot tan konsiensia ra pian makapanmatoor ira?

¹⁴ Kasin lapud impamabaleg ed sika odino lapud situasyon ed bansa yo et nagmaliw kan nasyonalistiko? Kasin wala ni ontan ya liknaan ed pusom anggad natan? Agtayon balot aabuloyan ya lapud satan et naapektoay pakanengneng tayod arum. Balet panon to no naimanom ya talagan negatibo so pakanengneng mod saray totoo ya duma so bansa, kultura, lenguahe, odino poli ra? Maabig no dalepdepen mo no antoy panmoria nen Jehova ed nasyonalismo tan panaglabi. Sarag mon i-research irayan topic legan na personal ya panagaral mo odino diad panagdayew na pamilya yo. Insan ipikasim ed si Jehova ya tulongan to ka pian naalig moy panmoria to.—Basaen so Roma 12:2.

15, 16. (a) Antoy nailaloan tayon reaksion na arum lapud panmamatoor tayod Dios? (b) Panon ya natulongan na atateng iray anak da ya mansiansian matoor?

¹⁵ Wala ray situasyon ya pakiwasen itayo na konsiensia tayo ya magmaliw a duma ed arum—ed saray katrabaho, kaklase, kakaabay, kakanayon, tan arum ni. (1 Ped. 2:19) Tan manepeg met labat ya duma tayo! Agtayo la pankelawan no kabusol itayo na mundo lapud impasakbay la itan nen Jesus. Agnatatalosan na saray onsusumpa ed sikatayo so rason no akin ya mansiasiansia tayon neutral. Balet parad sikatayo, importantin maong itan.

¹⁶ Nepeg ya matoor tayod si Jehova anggano pagyawen da tayo. (Dan. 3:16-18) Balet walay posibilidad ya natalo itayo na takot ed too anggan antoy edad tayo, lalo lad saray kalangweran. No nasusubok iray anak yo diad eskuelaan lapud isyu nipaakar ed panagsaludo ed bandira odino nasyonalistiko iran selebrasyon, tampol yo ran  tulongan. Diad Panagdayew na Pamilya yo, tulongan yo ray anak yon talosan so basiyan na saray sisiaen tayo pian makpel dan nidepensa itan. Tulongan yo met ira pian malinew tan marespeto dan ibaga itan ed arum. (Roma 1:16) Pian mas ombiskeg so liknaan na ananak yo, no kaukolan et nayarin sikayon atateng so manggaway paraan pian nakatongtong yo ray maestra da nipaakar ed saratan.

17. Anton ugali so nepeg tayon paliisan, tan akin?

¹⁷ Natural labat ya inar-aro tayoy lugar, kultura, lenguahe, tan panangan na bansan binalegan tayo. Balet nepeg tayon paliisan so ugalin makompetensia. Labay nen Jehova ya na-enjoy tayoy bilay kanian nanduruma so pinalsa to. (Sal. 104:24; Apo. 4:11) Kanian akin et ipilit tayon mas magmaong so paraan tayo nen say arum?

18. Akin ya manresulta ed bendisyon no aligen tayoy panmoria nen Jehova?

¹⁸ Labay na Dios ya amin a klase na totoo et nawalaay suston pikakabat ed katuaan tan bilay ya andi-anggaan. (Juan 3:16; 1 Tim. 2:3, 4) No lukas so nonot tayo ed saray nanduruman ideya ya agmet kontra ed ibabaga na Biblia, dakel so balon naaralan tayo tan naprotektaan so pankakasakey ed kongregasyon. Lapud manmamatoor tayod si Jehova, agtayo mibabalid saray isyu tan gulo ed sayan mundo. Agtayo susuportaan so anggan anton partido. Misalsalamat tayod si Jehova ta imbulos to itayo ed sayan mundo nen Satanas ya anggapoy pankakasakey, mapasirayew, tan makompetensia iray totoo! Komon ta determinado itayon ipanengneng so mareen ya ugali ya singa samay imbalikas na salmista: “Nengneng yo, alay kaabigan tan alay kaligliwaan na panayam na sanaagi ed inkasaksakey!”—Sal. 133:1.