Mu Par ni Gab Yul’yul’ nga Gil’ilungun Got

“Gathi yad e girdi’ nu roy u fayleng.”​—JOHN 17:16.

TANG: 18, 54

RAYOG NIM FULWEG?

Mang fan nnap’an ni immoy Jesus u fayleng ma da i tay ni bay boch e girdi’ ni ka yad ba tolang ara ka yad ba fel’ ngak boch?

Susun ni mini’ e thingari mang e pi Kristiano ngak?

Uw rogon ni ngam fil rogon ni ngam par ni gab yul’yul’ ngak Jehovah nge Gil’ilungun?

1, 2. (a) Mang nib ga’ fan ni nga i par e piin Kristiano ni yad ba yul’yul’ ngak Got? Mang rogon e re n’ey ko ngan par u mathilin ngongolen e am? (Mu guy e sasing ni bay u tabolngin e re article ney.) (b) Mang e ma yul’yul’ boor e girdi’ ngay? Mang e rayog ni nge buch ni bochan e re n’ey?

 PI TAPIGPIG rok Jehovah e yad ma par u mathilin ngongolen e am ma yad ma par ni yad ba yul’yul’ ngak Got. Pi n’ey ni yad ma rin’ e gathi fin yad ma rin’ u nap’an ni bay e mahl. Mang fan? Bochan ni urngin e piin ni kar ognaged e yafas rorad ngak Jehovah e kar micheged ngak ni yad ra t’ufeg mi yad par ni yad ba yul’yul’ ngak. (1 John 5:3) Yugu aram rogon nib thilthil e gin ni gad ma par riy, nge rarogon e gin ni kad bad riy, nge thin rodad, nge yalen rodad, machane gad ma fol ko pi motochiyel rok Got. Yul’yul’ rodad ngak Jehovah nge Gil’ilungun e aram e n’en nth’abi ga’ fan u wan’dad. (Matt. 6:33) Bochan nib yul’yul’ e piin Kristiano ngak Got ma aram fan ndarur uned nga ngongolen e re fayleng ney.​—Isa. 2:4; mu beeg e John 17:11, 15, 16.

² Piin nde taareb e michan’ rodad e yad ba yul’yul’ ko nam rorad, ara girdi’ ni yad nga taab binaw ara thin, ara yalen rorad, ara piin ni yad ma un nga ba mit e gosgos u taabang. Bochan e re n’ey ma aram fan nib ga’ nib gel e tagenging ni yima tay, ma kub gel e fanenikay u thiliy, maku bay yu ngiyal’ ni yima cham ngaun li’ boch e girdi’ ngaur m’ad. Yugu aram rogon  ndarud uned ko pi n’ey machane bay rogon ngodad ara chon e tabinaw rodad, ya bay yu ngiyal’ ni yima rin’ boch ban’en ngodad nde mat’aw. Bochan ni ke sunmiydad Got ni gad baadag ni ngaun rin’ ban’en nrogon nib mat’aw, ma aram fan nib mom ni ngad folgad ngak boch e girdi’ u nap’an nra dugliy e am boch ban’en ni ngan rin’ nde mat’aw. (Gen. 1:27; Deut. 32:4) Machane, mang e gad ma rin’ u nap’an nra buch boch ban’en ni aray rogon? Ya ba mom nrayog ni ngad folgad ngak boch e girdi’ ara boch e ulung ma gad un ko maluagthin.

3, 4. (a) Mang fan nder ma un e piin Kristiano ko maluagthin u thilin boch e nam ara boch e ulung u roy u fayleng? (b) Mang e gad ra weliy ko re article ney?

³ Bay yu ngiyal’ ni ma towasariy e pi am e girdi’ ko nam rorad ni ngar dugliyed e en ni ngar manged ngak u nap’an nra sum boch e magawon. Machane, tin riyul’ e Kristiano e darur uned ko biney e ngongol. Darud uned ko maluagthin ni ma tay e pi am ko re fayleng ney; maku darud uned ko mahl. (Matt. 26:52) Ku darud lemnaged ni bay boch ban’en ko re fayleng rok Satan ney ni kab fel’ nga boch. (2 Kor. 2:11) Bochan ni gathi gad bang ko re fayleng ney, ma aram fan ndarud uned ko pi n’en ni yibe rin’ riy.​—Mu beeg e John 15:18, 19.

⁴ Machane, bochan ndawor da flontgad, ma rayog ni bay boch i gadad nib mo’maw’ ni nge tal ndab ki lemnag boch ban’en nib kireb u murung’agen boch e girdi’ ni yad ba thil ngorad. (Jer. 17:9; Efe. 4:22-24) Ere, yira weliy boch i kenggin e motochiyel ko re article ney nrayog ni nge ayuwegdad ni ngad siyeged e re lem ney. Ku gad ra weliy rogon nrayog ni ngad skulnaged lanin’dad nge nangan’ rodad ni nge par ni be fol ko pi n’en nib m’agan’ Got ngay u daken Gil’ilungun.

FAN NDARUD UNED KO PI N’EN NI YIMA RIN’ KO RE FAYLENG NEY

5, 6. Nap’an ni immoy Jesus u fayleng, ma uw rogon u wan’ e girdi’ nib thilthil e gin ni kar bad riy, ma mang fan?

⁵ Faanra be maruwar u wan’um ko uw rogon ni ngam par u mathilin ngongolen e re fayleng ney, mab fel’ ni ngam fithem ni nge lungum, ‘Faan gomanga Jesus e ir e ke mada’nag e re magawon ney, ma mang e ra rin’?’ Re nam ni baaram ni i par Jesus riy e ba thilthil e girdi’ ni ur pared riy, ya boch i yad e girdi’ nu Judea, ma boch e girdi’ nu Galile, ma boch e girdi’ nu Samaria, nge ku boch e binaw. Machane, be yog e Bible nder ma yag ni nge par e pi girdi’ nem nib taareb lungurad. (John 4:9) Ku i sum boch e magawon u thilin e pi Farise nge pi Sadduse (Acts 23:6-9), ngu thilin e girdi’ nge pi tamukun tax (Matt. 9:11), ngu thilin e piin ni kan skulnagrad ko fare Motochiyel nge piin ni danga’. (John 7:49) Nap’an e bin som’on e chibog, ma piyu Roma e yad e ur gagiyegniged fare nam nu Israel, ma dabun e girdi’ ko re nam nem dakenrad. Yugu aram rogon ni i fil Jesus e tin riyul’ ni bay ko thin rok Got miki yog ni fare kanawo’ ni ngan thap ngak Got e tabab rok piyu Jew, machane da i fil ngak pi gachalpen ni ngaur lemnaged ni ka yad ba fel’ ngak boch e girdi’. (John 4:22) Ya i fil ngorad rogon ni ngar t’ufeged urngin mit e girdi’.​—Luke 10:27.

⁶ Mang fan nder ma tay Jesus ni bay boch e girdi’ ni ka yad ba tolang nga boch? Bochan e darur unew e Chitamangin ko pi maluagthin ni ma yan u thilin yu ulung i girdi’ u roy u fayleng. Nap’an ni sunmiy Jehovah e girdi’ u daken Fak, me lemnag ni ngar yoorgad ngar suguyed e fayleng. (Gen. 1:27, 28) I sunmiy Got e girdi’ nrayog ni ngar fakayed boch e bitir nib thilthil ramaen dowrad. Der ma tay Jehovah nge Jesus ni kab tolang e girdi’ u boch e nam, ara thin nga yugu boch. (Acts 10:34, 35; Rev. 7:9, 13, 14) Ere, thingar da folwokgad rorow.​—Matt. 5:43-48.

7, 8. (a) Susun ni mini’ e thingari mang e pi Kristiano ngak, ma mang fan? (b) Mang e thingar dab da paged talin u murung’agen rogon ni ngan pithig e pi magawon ni be mada’nag e girdi’ e ngiyal’ ney?

⁷ Kemus ni taabe’ e rayog ni ngad manged ngak, ni aram e Jehovah, ni bochan e ngad ted tanggin mat’awun ni nge gagiyegnag e palpalth’ib. I sum e magawon ko re n’ey u lan fare milay’ nu Eden u nap’an ni togopuluw Satan nga mat’awun e gagiyeg rok Jehovah. Ere, chiney e thingari be’ me dugliy u wan’ ko kab fel’ kanawoen e gagiyeg ni be tay Got fa kab fel’ e birok Satan e gagiyeg. Ere, gab muun ko ba’ rok Jehovah ma kam dugliy ni ngam fol ko pi motochiyel rok ko bin ni ngam rin’ e tin ni ga baadag, fa? Gur, ga ma tay ni kemus ni yigoo Gil’ilungun Got e ir e rayog ni nge pithig urngin e magawon ko girdi’?  Fa ga ma lemnag nrayog ko girdi’ ni ngar gagiyegniged yad?​—Gen. 3:4, 5.

⁸ Fulweg rom ko pi deer ney e ra dag rarogon e lem rom u nap’an nra fith e girdi’ boch e deer ngom u murung’agen e maluagthin ni ma sum u thilin boch e nam nge yu ulung i girdi’. Ke n’uw nap’an ni ma gay rogon e pi tayugang’ ko am, nge boch e girdi’ ni yad ma guy rogon ni ngar thilyeged boch ban’en ko am, nge ku boch e ulung ni ngar pithiged e pi magawon ney. Sana riyul’ ni yad baadag ni ngar ayuweged e girdi’. Machane, piin Kristiano e yad manang ni kemus ni yigoo Gil’ilungun Got e rayog ni nge pithig urngin e magawon ni be mada’nag e girdi’ me chuweg urngin ban’en nde mat’aw ni be buch e ngiyal’ ney. Tiney e magawon e thingar da paged fan ngak Jehovah. Ya bin riyul’ riy, e faanra nge reb e Kristiano me lemnag e bin nib fel’ e kanawo’ ni ngan pithig e pi magawon ney riy, ma dabisiy nra munmun me ruw raba’ e ulung rodad.

9. Mang reb e magawon ni sum u lan e ulung nu Korinth ko bin som’on e chibog? Uw rogon ni yog apostal Paul ni ngan pithig e re magawon nem?

⁹ Nap’an e bin som’on e chibog, ma immoy boch e Kristiano ni sum e maluagthin u thilrad. Immoy boch e Kristiano ko ulung nu Korinth ni lungurad: “‘I gag e gub muun ngak Paul’; ma be’ e ke gaar, ‘I gag e gub muun ngak Apollos’; ma be’ e ke gaar, ‘I gag e gub muun ngak Peter’; ma be’ e ke gaar, ‘I gag e gub muun ngak Kristus.’” Nap’an ni nang apostal Paul murung’agen e re n’ey, mi ri damumuw. Ere, yog ni gaar: “Kan wereg Kristus kan yoornag ulung!” Uw rogon nni pithig e re magawon nem? I fonownag Paul e pi Kristiano ni gaar: “Gu be wenig ngomed, pi walageg, ni Jesus Kristus ni ir e Somol rodad e ke pi’ mat’awug ni be lungug: nge taareban’med ni gimed gubin ko tin ni gimed be weliy, ma aram e dabiyog ni ngam yoor raba’gad; mi gimed par ni gimed ba taareb ma taab pa’ lanin’med ma taa ban’en e gimed be nameg.” Ere, susun ndariy ba ngiyal’ ni nge ruw raba’ e girdi’ u lan e ulung ni Kristiano e ngiyal’ ney.​—1 Kor. 1:10-13; mu beeg e Roma 16:17, 18.

10. Uw rogon ni tamilangnag apostal Paul feni ga’ fan ni nge par e piin Kristiano u mathilin e pi ngongol ni yima rin’ ko re fayleng ney?

¹⁰ I yog Paul ko pi Kristiano ni kan dugliyrad ni ngar tedan’rad ko athap rorad ni bay u tharmiy ko bin ni ngar tedan’rad ko pi n’en ni bay u roy u fayleng. (Fil. 3:17-20) * Thingar ra maruwelgad ni pa’ Kristus. Piin ni yad ma maruwel u reb e nam ni owchen reb e nam e darur uned ko pi n’en ni yima rin’ ko fare nam ni yad be maruwel riy. Ya yugu aram rogon ni yad be maruwel ko fare nam, machane yad be par ni yad ba yul’yul’ ko nam rorad. (2 Kor. 5:20) Pi Kristiano ni yad be athapeg e par u fayleng e ku yad ba muun nga Gil’ilungun Got, ere de fel’ ni ngar uned ko pi n’en ni yima rin’ ko re fayleng ney ara pi maluagthin u thilin boch e nam ara boch e ulung u roy u fayleng.

MU FIL ROGON NI NGAM PAR NI GAB YUL’YUL’ NGAK JEHOVAH

11, 12. (a) Faanra gad baadag ni ngad pared ni gad ba yul’yul’ nga Gil’ilungun Got, ma mang boch e lem nthingar da siyeged? (b) Mang reb e magawon ni mada’nag reb e Kristiano, ma uw rogon ni gel ko re magawon ney?

¹¹ Bay yu yang u fayleng ni bay boch e tha’ ni kan ngongliy u thilin e girdi’ riy ni bochan boch ban’en ni i buch ko nam rorad kakrom, ara rogon e yalen nge thin rorad. Ma pi n’ey e bogi ban’en nib ga’ ni ma uf e girdi’ ngay. Pi Kristiano ni yad ma par ko pi nam ney e thingar ra guyed rogon ndab ra paged e pi n’ey ni nge gagiyegnag rogon ni yad ma lem. Ya thingar ra thilyeged e lem rorad mar skulnaged e nangan’ rorad ni nge ayuwegrad ni ngar dugliyed ndab ra uned ko pi ngongol ney. Uw rogon nrayog ni ngar rin’ed e re n’ey?

¹² Am lemnag e n’en ni buch rok Mirjeta * ni ir be’ ni ma par u reb e nam ni u nog yu Yugoslavia ngay kafram. Kab achichig min fil ngak ni nga i fanenikay e girdi’ nu Serbia. Machane, nap’an ni fil ni Jehovah e ir reb e Got ni taareb rogon e girdi’ u wan’ ma Satan e ir e ma k’aring e girdi’ ni ngaur dabuyed daken e girdi’ nib thilthil ramaen dowrad nge nam rorad, ma aram me athamgil ni nge thilyeg e lem rok u murung’agen  e girdi’ u boch e nam. Machane, me tabab boch e girdi’ u rom nib thilthil e nam ni kar bad riy ni ngar chamgad, ma aram miki tabab Mirjeta bayay ni ngki fanenikay e girdi’ nu Serbia, ma aram miki dabuy ni nge machibnagrad. Machane, munmun me tamilang u wan’ ndabiyog ni nga yiggi chuw e re lem ney rok, ya ba t’uf be’ ni nge ayuweg. Ere, gathi kemus ni wenig ngak Jehovah ni nge ayuweg ni nge siyeg e re lem nem ya ki wenig ngak ni nge ayuweg ni nge yoornag e tayim rok ni fan ko machib me yag ni nge un ko pioneer. I yog ni gaar: “Kug guy ni faan gu ra tiyan’ug ko machib ma aram e n’en nth’abi fel’ nrayog ni nge ayuwegeg. Nap’an ni gu ra yan ko machib, ma gu ma gay rogon ni nggu folwok rok Jehovah u rogon ni ma t’ufegey. Mab ga’ ni kug guy ni ma ayuwegeg e re n’ey ni nge dab kug lem ni aram rogon.”

13. (a) Mang e buch ni kireban’ reb e Pi Mich Rok Jehovah ngay, machane mang e rin’ ko re n’ey? (b) Mang e rayog ni ngad filed ko n’en ni buch rok Zoila?

¹³ Kum lemnag e n’en ni buch rok reb e walag ni ka nog Zoila ngak. Re ppin ney e ir be’ nu Mexico, machane ma un nga reb e ulung ni bay u Europe. I guy ni bay boch e walag ko re ulung ni baaram ni ma un ngay ni kur bad u boch e nam u Latin America ara pi nam ni bay nga Yimuch u Meriken ni u rogned boch ban’en u murung’agen e nam rok, nge yalen rok, nge musik ko nam rok ni kireban’ ngay. Faan gomanga gur e cha’ney ma mang e kam rin’? I kireban’ ko pi n’em ni i yog e pi walag nem u murung’agen. Machane, i meybil ngak Jehovah ni nge ayuweg ni nge chuweg boch e lem nib kireb ni ke sum u laniyan’. Riyul’ ni bay boch i gadad ni bay e magawon rok ni aray rogon. Machane, de fel’ ni nga dogned ara da rin’ed ban’en nrayog ni nge k’aring e girdi’ u lan e ulung ara yugu boch e girdi’ ni ngar ruw raba’gad ara da rin’ed ban’en ni nge m’ug riy ni gad be tay boch e girdi’ ni ka yad ba fel’ nga boch.​—Rom. 14:19; 2 Kor. 6:3.

14. Mang e rayog ni nge ayuwegem ni ngaum lemnag e girdi’ ni bod rogon ni ma lemnagrad Jehovah?

¹⁴ Nap’an ni ka gab achig, me fil chon e tabinaw rom ngom ara girdi’ ko gin nim ilal riy ni ngam t’ufeg e nam rom, fa? Ka bay e re lem ney rom, fa? Piin Kristiano e susun ndab ra paged e mit ney e lem ni nge magawonnag rogon ni yad ma lemnag boch e girdi’. Machane, uw rogon ni faanra kam guy ni ga ma lemnag nib sobut’ boch e girdi’ ara dariy farad ni bochan e nam rorad, ara yalen rorad, ara thin rorad, ara raen dowrad? Faanra ga ma lem ni aray rogon mab fel’ ni ngam fal’eg i lemnag rogon e re n’ey u wan’ Jehovah. Ba fel’ ni ngam fal’eg i gay murung’agen e re n’ey nge ku boch ban’en ni bay rogon ngay u nap’an e fol Bible ni tabinaw ara nap’an ni ga be fil e Bible ni goo gur. Ngemu’ mag wenig ngak Jehovah u daken e meybil ni nge ayuwegem ni nge taareb rogon urngin e girdi’ u wan’um ni bod ir.​—Mu beeg e Roma 12:2.

15, 16. (a) Mang e ra rin’ boch e girdi’ ni bochan e gad be par ni gad ba yul’yul’ ngak Got? (b) Uw rogon nrayog ni nge ayuweg e pi gallabthir pi fakrad ni ngar pared ni yad ba yul’yul’ ngak Jehovah?

¹⁵ Bay yu ngiyal’ nra taw ngay ma ma buch boch ban’en ni ma yan i gagiyel riy nib thil e pi tapigpig rok Jehovah ko girdi’ u tabon e maruwel rorad, ara piin ni yad nga skul, ara pi buguli yoror rorad, ara girdi’ u tabinaw rorad, ara ku boch e girdi’. Fan ni ma buch e re n’ey e bochan ni baadag e pi tapigpig rok Jehovah ni ngar pigpiggad ngak nib beech e nangan’ rorad. (1 Pet. 2:19) Arrogon, thingar da gagiyelgad ni gad ba thil! Maku reb e faanra fanenikaydad e girdi’ nu fayleng ni bochan e gad be par ni gad ba thil ngorad, ma dab da gingad ko re n’ey ni bochan e yog Jesus u m’on riy nra buch e re n’ey rodad. Yooren e piin ni yad ma togopuluw ngodad e dar nanged feni ga’ fan ni nge par e piin Kristiano u mathilin ngongolen e am nge ngongolen e re fayleng ney. Machane, gadad e rib ga’ fan e re n’ey u wan’dad.

¹⁶ Maku reb e faanra ngad pared ni gad ba yul’yul’ ngak Jehovah, ma be yip’ fan ndemtrug e n’en nra rin’ ara yog e girdi’ ngodad ma thingar da pared ni gad ba yul’yul’. (Dan. 3:16-18) Ba ga’ ni piin fel’ yangaren e yad ma guy nrib mo’maw’ ngorad ni ngar thilgad u fithik’ e tin ni ka bay e girdi’. Ere, faanra ga be guy ni be magawon e bitir rom ni bochan boch e magawon ni yad be mada’nag ni bod rogon ni ngan siro’ ko flak ara ngan un nga boch e madnom ko nam, mag guy rogon ni ngam ayuwegrad. Nap’an ni gimed ra tay e Fol Bible ni Tabinaw mag  guy rogon ni ngam ayuwegrad ni nge tamilang e re n’ey u wan’rad nge rogon ni ngar pithiged e pi magawon ney ndab ra rusgad. Mu ayuwegrad u rogon ni ngar weliyed murung’agen e pi n’en ni ke mich u wan’rad, nge rogon ni ngar rin’ed u fithik’ e tayfan. (Rom. 1:16) Reb e kanawo’ ni ku rayog ni ngam ayuweg pi fakam riy e aram e ngam weliy murung’agen e pi n’ey ko sensey rorad ni faanra ba t’uf ni ngam rin’.

MU FELFELAN’ NGA URNGIN BAN’EN NI KE SUNMIY JEHOVAH!

17. Mang reb e lem nsusun e ngad siyeged, ma mang fan?

¹⁷ Gad gubin nib ga’ ni gad baadag e yalen, nge thin, nge ggan ko re nam nda ilalgad riy. Machane, thingar da guyed rogon ni ngad siyeged fare lem ni ma tay boch e girdi’ ni aram e yad ma lemnag ni kab fel’ e tirorad ban’en ko tirok yugu boch e girdi’. Ya baadag Jehovah ni ngad felfelan’gad ko pi n’en ni ke sunmiy nib thilthil. (Ps. 104:24; Rev. 4:11) Ere, mang fan ni ngam lemnag ni kab fel’ rogon ni ga ma rin’ ban’en nga rogon ni ma rin’ boch e girdi’?

18. Faanra ud lemgad ni bod Jehovah, ma mang angin nra yib ngodad?

¹⁸ Baadag Got ni nge nang urngin mit e girdi’ e tin riyul’ me yag e yafas ndariy n’umngin nap’an ngorad. (John 3:16; 1 Tim. 2:3, 4) Ba m’agan’dad ngay ni ngad motoyilgad ngak boch e girdi’ u nap’an ni yad be weliy lanin’rad, ma kub ga’ ni ma m’agan’dad ko n’en ni yad ma yog ni yugu aram rogon nib thil nga rogon ni gad be lemnag. Re n’ey e rayog ni nge ayuwegdad ni ngaud pared ni gad ba felfelan’ miki ayuwegdad ni ngaud pared nib taareban’dad pi walagdad. Maku reb e, thingar dab ud uned ko maluagthin u thilin boch e nam ara boch e ulung u roy u fayleng ni bochan e gad baadag ni ngad pared ni gad ba yul’yul’ ngak Jehovah. Dubdad e ufanthin nge tagenging ni ma tay e girdi’ ko re fayleng rok Satan ney. Machane, ri gad be pining e magar ngak Jehovah ni bochan e ke ayuwegdad ni ngaud pared nib taareban’dad, ma darud ufanthingad ara ud tagenginggad ngodad! Ere, ngad athamgilgad ni ngaud ngongolgad u fithik’ e gapas ma gad lem ni bod rogon fare psalmist ni faani gaar: “Rib fel’ ma ba manigil, ni ngi i par e girdi’ rok Got u taabang nib taareb lungurad!”​—Ps. 133:1, BT.

[Boch e thin nra tamilangnag murung’agen]

[Deer ni ngan pi’ e fulweg riy]