1, 2. (a) I kare macon, lutic pa Jehovah gubedo ka wore kwene? (b) Yecu otero ot pa Lubanga ma i Jerucalem nining? (c) Tyen lok ango mumiyo kicoyo pwony man?

 CAKKE wacon, lutic pa Lubanga gitye ki kabedo ma giworo iye Lubanga. Abel nen calo otiyo ki keno tyer i kare ma otyero gityer bot Lubanga. (Acak. 4:3, 4) Nua, Abram, Icaka, Yakobo, ki dong Moses gucano keno tyer. (Acak. 8:20; 12:7; 26:25; 35:1; Nia 17:15) Jehovah otito bot Luicrael ni guger kema me woro. (Nia 25:8) Lacen, gugero ot ma myero kiwor iye Jehovah. (1 Luker 8:27, 29) I nge dwogo ki i opii i Babilon, Lujudaya gubedo ka cokke kacel kare ki kare i kacokke. (Mar. 6:2; Jon 18:20; Tic 15:21) Lukricitayo macon onongo gicokke i gangi pa omege ki lumege. (Tic 12:12; 1 Kor. 16:19) I kareni, lutic pa Jehovah i wi lobo lung gicokke i Odi me Ker alip miya mapol ka ma gipwonyo lok i kom Jehovah dok giwore.

² Yecu onongo tye ki mar kacel ki woro madit adada pi ot pa Jehovah ma onongo tye i Jerucalem, ma man opoyo wi lupwonyene i kom gin ma laco Jabuli owaco ni: “Arima pi odi mito neka woko.” (Jab. 69:9; Jon 2:17) Pe tye Ot me Ker mo keken ma kitwero lwongone ni “ot pa Rwot [Jehovah]” pien pe rom ki ot pa Lubanga ma onongo tye i Jerucalem  (2 Tekwaro 5:13; 33:4) Kadi bed kumeno, Baibul miniwa cik ma ginyuto kit ma myero wati ki kabedo ma waworo iye Lubanga i kareni kun wanyuto woro madit. Pwony man kicoyo tutwalle me nyamo cik mogo ma igi lac ki gin ma myero watim ka watye i Ot me Ker, kit ma myero kimi kwede ki mot me gero, ki bene kit me gwokone. *

3-5. Pingo kigero Ot me Ker, dok man myero ogud kit ma watero kwede cokkewa nining?

³ Ot me Ker obedo ka ma pire tek ma dano ducu gitwero rwatte iye me woro Jehovah. I kin jami ma Jehovah miniwa tye iye cam me cwiny ma wanongogi cabit ki cabit i Ot me Ker. Kany aye ka ma wanongo iye kwe cwiny ki tira ma a ki i dulle. Jo ducu gibino pienni Jehovah gin Wode aye ma olwongogi. Kadi bed ni kilwongowa me bino ka “cam i meja pa Rwot [Jehovah],” omyero pe water lwongo man calo gin mo ma konye pe.​—1 Kor. 10:21.

⁴ Jehovah tito botwa ka maleng ni emito ni wacokke kacel me wore ki bene me cuko cwiny ngat acel acel. (Kwan Jo Ibru 10:24, 25.) Tika wanyuto woro i kom Jehovah ka wakeng bino i cokke pi tyen lok ma konye pe? Ki lok ada, wanyuto ni watye ki pwoc madit i kom Jehovah ki bene pi cam me cwiny ma en miniwa ka wayubbe ki dok wamiyo lagam ki cwinywa ducu ka watye i cokke.​—Jab. 22:22.

⁵ Jami ma watimogi ka wabino i cokke ki kit ma wagwoko kwede ki Ot me Ker nyuto ni watye ki woro madit i kom Jehovah. Wamito ni kit me kwowa oket deyo i kom nying Lubanga kit macalo nongo tye kwede i lanyut me Otwa me Ker-ri.​—Por ki 1 Luker 8:17.

6. Gin ango ma jo mukene guwaco madok i kom Ot me Ker ki dong i kom jo ma gibino i cokke? (Nen cal ma tye i pot karatac 27.)

⁶ Jo ma pe gubedo Lucaden pol kare gineno woro ma watye kwede pi Otwa me Ker. Me labolle, laco mo ki i lobo Turkey owaco ni: “Kit ma kitimo ki jami wek owot mapwot i Ot me Ker ogudo cwinya adada. Jo ma gibino iye girukke maleng, gibwunyo, dok gumota ki yomcwiny. Man ogudo cwinya adada.” Laco man ocako bino i cokke labongo keng, ci i nge kare manok onongo batija. I boma mo acel i lobo Indonesia, kacokke mo olwongo ludito mogo pa gamente wek gunen Ot me Ker manyen ma onongo peya kidyero bot Jehovah. Meya me boma meno bene obino. Kit ma ot man ber kwede, pulanne, ki dong kit ma dyekalle leng kwede ogudo cwinye ma pe larre. En owaco ni, “Lengo me ot man nyuto niyewu.”

7, 8. Gin ango ma pire tek ma jo ducu ma gibino i cokke myero gunge?

⁷ Woro ma watye kwede pi Lubanga ma olwongowa i cokke-ni myero onen i kitwa, rukwa ki kit ma wanen kwede. Nyuto woro bene te lokke ni myero wabed ki neno mupore. Kiniang ni jo mogo giketo gingi tutwal ma lubbe ki kodi bongo mene ma myero waruk ka wabino i cokke ento bene tye jo mukene ma girukke calo gitye paco ka gubino i Ot me Ker. Ki lok ada, Jehovah mito ni luticce kacel ki wele ma gibino gubed agonya ka gitye i Ot me Ker. Ento ki tungcel bene, jo ma gibino i cokke pe  myero gudwo tam pa dano ki rukke i yo me luriyo, cwalo lok macego cego ki i cim, boko lok, bedo ka cam ki mat medo ki jami mukene. Lunyodo myero gunenni gipwonyo lutinogi me niang ni Ot me Ker pe obedo ka ma gingweco nyo gituko iye kit ma cwinygi mito.​—Latit. 3:1.

⁸ Kiniga omako Yecu ci oryemo dano ma onongo gitye ka cato jami i ot pa Lubanga. (Jon 2:13-17) Ot me Ker bene tye kabedo me woro me ada dok ka ma wanongo iye pwony i yo me cwiny. Pi meno, pe pore me timo kit biacara mo keken ka watye i Ot me Ker.​—Por ki Nekemia 13:7, 8.

9, 10. (a) Cente me gedo Odi me Ker kinongo ki kwene, dok man okelo adwogi ango? (b) Gin ango ma kitimo me konyo kacokke ma gipe ki lim muromo me gedo Odi me Ker?

⁹ Jo pa Jehovah i twok lobo lung gitute matek me bolo mot wek kiyub ki Ot me Ker ma gedone pe cwalo lim mapol. Jo ma gudyere aye gitimo tic me goyo pulan, gedo, ki dong roco odi magi. Adwogine obedo ningo? Nicakke i Novemba 1, 1999, kigedo kabedo me woro makato 28,000 i twok loboni lung. Man te lokke ni i mwaki 15 mukato angec, kibedo ka gedo Odi me Ker abic nino ducu i kabedo mapat pat.

¹⁰ Dul pa Jehovah cwalo jo ma gudyere dok bene tiyo ki lim ma kibolo macalo mot wek kiged ki Odi me Ker ka mo keken. Walubo cik ma iye lac ma tye i Baibul ma wacci jo ma gitye ki jami mabup myero gukony jo ma megi orem wek ‘wabed maromrom.’ (Kwan 2 Jo Korint 8:13-15.) Macalo adwogine, kityeko gedo Odi me Ker mamwonya pi kacokke ma gipe ki lim muromo me gedo gedo macalo magi.

11. Gin ango ma utmege mukene guwaco ma lubbe ki Ot me Ker ma kigedo pigi, dok man weko iwinyo nining?

¹¹ Omege ki lumege ma i kacokke mo acel i lobo Costa Rica, ma kigedo botgi Ot me Ker manyen gucoyo ni: “Ka wacung i nyim Ot me Ker, watamo ni nen calo watye ka lek aleka! Man gin ma onongo watamo ni pe romo timme. Ot man mamwonya ma kigedo botwa-ni kiyubo kit ma mitte kwede kikome i nino aboro keken! Gedo man otum pi kony mua ki bot Jehovah, dulle, ki dong omegiwa ki lumegiwa me amara. Kabedo man me woro-ni obedo mic madit adada ma Jehovah omiyo botwa. Cwinywa yom mada pi ot man.” Cwinywa yom ka wawinyo omegiwa ki  lumegiwa gipwoyo Jehovah pi gin ma en otimo pigi. Dok bene cwinywa yomo ni utmege ma i twok lobo lung gitye ki Odi me Ker ma kigedo pi woro. Man obedo tic pa Jehovah pien ka kityeko gedo Ot me Ker manyen litap, ci jo ma cwinygi atir ma gimito ngeyo lok i kom Lacwecwa ma lamar-ri gibino iye cut.​—Jab. 127:1.

12. Itwero miyo kony me gudo Ot me Ker nining?

¹² Omege ki lumege mapol gunongo yomcwiny pien gunywako i gedo Odi me Ker. Kadi bed ni watye ki kare me nywako i tic man nyo pe, ento wan ducu pud watwero miyo kony kun wabolo mot ma a ki i cwinywa. Walubo lanen pa lutic pa Lubanga ma gukwo i kare me Baibul ma onongo komgi mit i miyo mot me konyo gedo kabedo me woro.​—Nia 25:2; 2 Kor. 9:7.

13, 14. Cik mene ma iye lac ma twero konyowa wek wagwok Ot me Ker wek obed leng dok mamwonya?

¹³ Ka kigero Ot me Ker litap, myero kigwok obedo maleng dok ma nenone mwonya wek onyut kit mabeco pa Lubanga ma waworo-ni​—en pe Lubanga me anyobanyoba. (Kwan 1 Jo Korint 14:33, 40.) Baibul waco ni bedo leng kwako lengo me worowa, tamwa, ki dong ticwa. (Yabo 19:8) Pi meno, ka wamito ni wabed leng i wang Jehovah, omyero bene wabed leng i yo me kom.

¹⁴ Ma kubbe ki cik magi ma igi lac-ci, omyero kare ducu wabed agonya me lwongo jo ma gitye ki miti me bino i  cokkewa pien nongo wangeyo ni meno lengo me Odiwa me Ker biweko dano gijolo kwena maber ma watito botgi-ni. Gibineno ni meno waworo Lubanga maleng ma biloko loboni doko paradic ma nenone mwonya adada.​—Ic. 6:1-3; Yabo 11:18.

15, 16. (a) Pingo pe yot me gwoko lengo me Ot me Ker, ento pingo man pire tek? (b) Yub ango ma kacokke tye kwede me gwoko lengo me ot me ker, dok mot ango ma wan ducu watye kwede?

¹⁵ Jo mogo gitero gwoko lengo me Ot me Ker calo gin ma pire tek makato jo mukene. Kit ma jo mukene gigwoko kwede ki lengo lubbe ki kit ma gudongo kwede. Jo mukene gikwo i kabedo ma tye ki coto, apwa, pii manok kacel ki jami mogo ma konyo me gwoko lengo. Ka mo keken ma wakwo iye, Otwa me Ker myero obed maleng pien kilwongo ki nying Jehovah dok obedo ka ma wawore.​—Nwo. 23:14.

¹⁶ Ka wamito ni Otwa me Ker obed maleng, omyero waket yub me gwoko lengone. Laelda acel acel myero onen ni meno kiketo yub me gwoko lengo dok jami ma gimitte me tic tye muromo kare ducu. Kubbe myero obed tye wek jami ducu owot mapwot pien tye kabedo mogo ma myero kigwokgi gubed maleng kare ki kare i nge cokke ki mogo ma kitiyo kwedgi kicel kicel. Jo ducu me kacokke gitye ki mot me nywako i tic me gwoko lengo me Ot me Ker.

17, 18. (a) Pwony ango ma wanongo ma lubbe ki kit ma lutic pa Jehovah gwoko kwede ot pa Lubanga i kare macon? (b) Pingo omyero kibed ka roco Odi me Ker?

¹⁷ Lutic pa Jehovah bene giketo cwinygi me roco ot ma giworo iye Jehovah ka ce ka mo oballe. Kabaka Yekoac me Juda ociko lulamdog ni guti ki mot ma kijogo i ot pa Jehovah “wek guyub ki ot ka ma ginongo ni mito ayuba.” (2 Luker 12:4, 5) Lacen, i nge mwaki 200, Kabaka Yocia bene otiyo ki mot ma gijogo i ot pa Lubanga wek kiroc ki ka muballe.​—Kwan 2 Tekwaro 34:9-11.

¹⁸ Komitti me jang gang kal mogo gumiyo ripot ni i lobbe ma gitye iye, dano pe gitero gwoko odi nyo jami tic calo gin ma pire tek. Twero bedo ni i lobbe magi, jo manok keken aye gitye ki ngec nyo bene gipe ki cente me acula wek kiroc odi magi. Ki lok ada, ka ni kiwek Odi me Ker-ri liyak ma pe kirocogi, ci gibiballe oyotoyot adada dok bene bikelo lewic madit tutwal. Kitungcel, ka jo ducu me kacokke gitute matek me gwoko lengo me Ot me Ker, man kelo deyo kacel ki pak i kom Jehovah dok bene pe weko wabalo mot ma utmege gibolo pi gwoko odi magi.

19. Tam ango ma imoko ma lubbe ki kabedo me woro Jehovah?

¹⁹ Ot me Ker obedo ot ma nongo dong kidyero bot Jehovah. Pi meno, pe watwero wacone ni meno obedo ot pa ngat mo nyo kacokke moni. Cik ma igi lac me Baibul bikonyowa me note kacel wek wabed ki neno mupore i kom kabedo ma waworo iye Jehovah. Jo ducu ma i kacokke gitwero timo meno ka ginyuto woro pi kabedo me woro Jehovah, bolo mot wek kiged gedo manyen, ki dong jalo cawa kacel ki kerowa i gwoko lengo kacel ki roco Odi me Ker. Ka watimo man, ci nongo watye ka nyuto cwakwa kacel ki worowa i kom kabedo me woro Jehovah kit ma Yecu otimo kwede-ni.​—Jon 2:17.