1, 2. (a) ?Nin yɛ laa Zoova i sufuɛ’m be yia be su i ɔ? (b) ?Wafa sɛ yɛ Zezi buli Ɲanmiɛn i sua m’ɔ o Zerizalɛmu lɔ’n niɔn? (c) ?Ngue su yɛ like suanlɛ nga wá fá e ɲin síe ɔ?

 KƐ Ɔ fɛ i lalafuɛ nun lele m’ɔ́ fá jú andɛ’n, Ɲanmiɛn i sufuɛ’m be su i lika trele wie’m be nun. I wie yɛle Abɛli liɛ’n. Kɛ ɔ́ yí tɛ mán Ɲanmiɛn’n, atrɛkpa’n, ɔ kplannin tɛ yiwlɛ kun. (Bob. 4:3, 4) Nowe, nin Abraamu nin Izaaki nin Zakɔbu, nin Moizi be kplannin tɛ yiwlɛ kun be mannin Ɲanmiɛn be tinuntinun. (Bob. 8:20; 12:7; 26:25; 35:1; Tul. 17:15) Zoova seli Izraɛlifuɛ mun kɛ be yo sua kun be mɛn i. (Tul. 25:8) Kɛ ɔ́ kɔ́ i ɲrun’n, be kplannin Ɲanmiɛn i sulɛ sua kun. (1 Fam. 8:27, 29) Kɛ be ɔli lomuɛn Babilɔni mɔ be sali be sin’n, be yoli aɲia titi Ɲanmiɛn ndɛ suanlɛ nin i srɛlɛ sua’m be nun. (Mar. 6:2; Zan 18:20; Yol. 15:21) Klistfuɛ klikli’m be kusu, be yiali titi be nun kun i awlo’n nun be suli Ɲanmiɛn. (Yol. 12:12; 1 Kor. 16:19) Andɛ’n, Zoova i sufuɛ’m be lɛ Ɲanmiɛn Sielɛ Sua nin aɲia yowlɛ akpiakpi kpanngban asiɛ wunmuan’n su. Kpɛkun, be yia lika sɔ’m be nun be su Ɲanmiɛn.

² Zezi kloli Ɲanmiɛn i sua m’ɔ o Zerizalɛmu lɔ’n. Wafa ng’ɔ yili i sɔ liɛ’n i nglo’n ti’n, i sɔnnzɔnfuɛ’m be wla kpɛnnin ndɛ kun mɔ famiɛn Davidi kannin’n su. Ɔ seli kɛ: ‘Ɔ sua’n i  klolɛ’n w’a kun n kpo.’ (Jue. 69:10; Zan 2:17) Andɛ’n, e kwlá faman Ɲanmiɛn Sielɛ Sua fi e sunnzunman Zerizalɛmu lɔ “Anannganman i sua’n.” (2 Nyo. 5:13; 33:4) Sanngɛ, ɔ fata kɛ e klo Ɲanmiɛn Sielɛ sua mun wie. Afin be nun yɛ e yia e su Ɲanmiɛn ɔn. Like suanlɛ nga wá fá e ɲin síe i Ɲanmiɛn i mmla wie’m be su naan e wun wafa ng’ɔ fata kɛ e bu e Ɲanmiɛn Sielɛ Sua’n. Asa ekun, é wún wafa nga e kwla suan Ɲanmiɛn Sielɛ sua’m be kplanlɛ’n i bo’n, ɔ nin wafa nga e kwla yo naan Sua sɔ’m b’a yo klanman titi’n. a

3-5. (a) ?Ngue yɛ e yo i Ɲanmiɛn Sielɛ Sua’m be nun ɔn? (b) ?Wafa sɛ yɛ ɔ fata kɛ e bu e aɲia mun ɔn?

³ Ɲanmiɛn Sielɛ Sua’m be nun yɛ e yia e su Ɲanmiɛn ɔn. Ɲanmiɛn kunndɛ kɛ i sufuɛ’m be yo aɲia mun naan be nin i be afiɛn’n mantan kpa. Kɛ e yia’n, Ɲanmiɛn maan sran kpa nanwlɛfuɛ b’ɔ si ngwlɛlɛ’n kle e ngwlɛlɛ, yɛ ɔ kle e atin ng’ɔ fata kɛ e fa naan y’a su Ɲanmiɛn kpa’n. Zoova nin Zezi yɛ be yia e aɲia nga e yo be le mɔcuɛ kwlakwla’n be bo ɔ. Be yia e naan sɛ é kwlá sé’n, e nin be e “wla asa.” I sɔ’n ti’n, ɔ fata kɛ e aɲia’m be yo e cinnjin kpa.​—1 Kor. 10:21.

⁴ Zoova kan kle e weiin kpa kɛ e yia e su i naan e wla e wun fanngan. (An kanngan Ebre Mun 10:24, 25 nun.) I sɔ’n ti, maan e kle kɛ e ɲin yi Zoova. Yɛle kɛ, sɛ e sa w’a mianman cinnjinnjin’n, maan e tran aɲia’n kwlaa be bo. Asa ekun’n, maan e siesie e wun kpa. Sɛ be usa kosan’n, maan e tɛ su wie. I liɛ’n, é klé kɛ aɲia mɔ Zoova maan e yo be’n, be bo tranlɛ’n yo e fɛ.​—Jue. 22:23.

⁵ Like nga e yo i aɲia’m be bo lɔ’n, ɔ nin wafa nga e nian Ɲanmiɛn Sielɛ Sua’n i lika’n, be ti cinnjin kpa. Afin i lɛ’n nun yɛ é klé kɛ e ɲin yi Zoova, annzɛ e ɲin yimɛn i ɔ. Zoova dunman o e Ɲanmiɛn Sielɛ Sua’m be su. Ɔ maan, e kunndɛman kɛ e ayeliɛ’n ti’n, i dunman saci.​—An nian 1 Famiɛn Mun 8:17.

6. ?Kɛ sran’m be bali e aɲia’m be bo’n, ndɛ benin yɛ be nun wie’m be kannin ɔn? (An nian foto ng’ɔ o kan like suanlɛ’n bo i bo lɛ’n.)

⁶ Kɛ e klo lika nga e yia e su Ɲanmiɛn lɛ’n, sran’m be sie i nzɔliɛ. Be flɛ abloki lɔ nvle kun kɛ Turki. Lɔ bian kun seli kɛ: ‘N wunnin kɛ Ɲanmiɛn Sielɛ Sua’n ti yɛiin yɛ be siesieli i nun ninnge’n kwlaa sɛsɛsɛ. I sɔ’n yoli min ɲɛnmɛn. Be nga be yia lɔ’n, be wlawla be wun kpa. Srilɛ o be nuan, yɛ be yoli min like be sɔli min nun kpa. I sɔ’n yoli min ɲɛnmɛn dan wie.’ Kɛ ɔ fin i lɛ’n, bian’n ɔli aɲia kwlaa be bo. Kpɛkun kɛ ɔ́ kɔ́ i ɲrun’n, be yoli i batɛmu. Be flɛ Azi mɛn’n nun lɔ nvle kun kɛ Ɛndonezi. Cɛn kun mɔ aniaan’m bé yí Ɲanmiɛn Sielɛ Sua’n mɔ b’a kplɛn i uflɛuflɛ’n i nglo’n, be yiali lɔ klɔ kun i su kpɛnngbɛn mun. Wafa nga be kplannin sua’n, ɔ nin ijre nin waka nga be tatali be mun’n, ɔ yoli kpɛnngbɛn sɔ’m be nun kun i ɲɛnmɛn dan. Ɔ maan, ɔ seli aniaan mun kɛ: “Wafa nga sua’n nin lika’n be ti yɛiin, ɔ kle kɛ amun lafi Ɲanmiɛn su sakpa.”

7, 8. ?Kɛ e yia’n, wafa sɛ yɛ e kwla kle kɛ e ɲin yi Ɲanmiɛn ɔn?

⁷ Ɲanmiɛn yɛ ɔ se kɛ e yo aɲia mun ɔn. I sɔ’n ti’n, ɔ fata kɛ wafa nga e wlawla e wun e kɔ aɲia’m be bo’n, ɔ nin like nga e yo i lɔ’n, be kle kɛ e ɲin yi Ɲanmiɛn. E kunndɛman kɛ é wláwlá e wun kɛ e o awlo lɔ sa. Kusu’n, ɔ leman be wun wlawlalɛ  trele kun m’ɔ fata kɛ saan fii e nian su e wlawla e wun ɔn. Zoova kunndɛ kɛ sran kwlaa ng’ɔ ba aɲia’m be bo’n, ɔ wun i wun fɛ. Sanngɛ, nɛ́n i sɔ’n ti yɛ é wláwlá e wun sukusuku kɛ e o awlo lɔ sa ɔ. Asa ekun’n, kɛ bé yó aɲia’n, ɔ fataman kɛ e koko yalɛ, annzɛ e di like, annzɛ e nɔn nzan. Siɛ nin niɛn’m be kusu’n, ɔ fata kɛ be se be mma mun kɛ nán be wanndiwanndi, annzɛ be kan ngowa Ɲanmiɛn Sielɛ Sua’n nun.​—Aku. 3:1.

⁸ Kɛ Zezi wunnin kɛ sran’m be su yo like atɛ Ɲanmiɛn sua’n nun’n, ɔ fali ya dan. Ɔ kannin aata difuɛ’m be bo. (Zan 2:13-17) Ɲanmiɛn i silɛ nin i sulɛ ti yɛ e yia e Ɲanmiɛn Sielɛ Sua’m be nun ɔn. Ɔ maan kɛ e yia’n, ɔ fataman kɛ e yo ninnge atɛ lɔ.​—An nian Neemi 13:7, 8.

9, 10. (a) ?Wafa sɛ yɛ Zoova i sufuɛ’m be yo mɔ be kplan be Ɲanmiɛn Sielɛ Sua mun ɔn? (b) ?Sua nɲɛ yɛ b’a kplan ɔn? (c) ?Ngue yɛ aniaan’m be yo naan be niaan nga be sa nun yoman fɛ’n b’a ɲan be Ɲanmiɛn Sielɛ Sua liɛ ɔ?

⁹ Asiɛ wunmuan’n su’n, Zoova i sufuɛ’m be bɔbɔ be tu be klun be kplan be Ɲanmiɛn Sielɛ Sua mun. Aniaan wie’m be jaja wafa nga bé kplán sua sɔ mun’n fluwa su. Kpɛkun, wie’m be ko kplan. Sɛ sua’m be lika wie saci’n, be ko yo be uflɛ. Be di junman kwlaa sɔ’m be klunklo su. Be tuaman be kalɛ. Ɔ maan, kɛ ɔ fɛ i afuɛ 1999, Novamblu 1 lele m’ɔ́ fá jú afuɛ 2014 nun’n, be kplannin Ɲanmiɛn Sielɛ Sua uflɛuflɛ 28.000 be mannin aniaan mun asiɛ wunmuan’n su. I sɔ’n kle kɛ cɛn ba kun nun’n, be kplannin Ɲanmiɛn Sielɛ Sua nnun asiɛ wunmuan’n su.

¹⁰ Lika wie’m be nun’n, aniaan’m be sa nun yoman fɛ. Ɔ maan, sika nga aniaan’m be man’n, yɛ anuannzɛ’n fa kplan Ɲanmiɛn Sielɛ Sua mun lika sɔ’m be nun ɔn. I sɔ yɛ Ɲanmiɛn mmla’n kle kɛ e yo ɔ. Yɛle kɛ, maan be nga be sa nun yo fɛ’n, be ti be wiengu nga be sa nun yoman fɛ’n, be wun ɲanman nun. Kɛ ɔ ko yo sɔ’n, nn be “sa nun ninnge’m b’a sɛ.” (An kanngan 2 Korɛntfuɛ Mun 8:13-15 nun.) I sɔ mɔ aniaan’m be yo’n ti’n, be kwla kplannin Ɲanmiɛn Sielɛ Sua uflɛuflɛ’m be mannin aniaan nga be sa nun yoman fɛ’n.

11. (a) ?Kɛ aniaan’m be ɲan be Ɲanmiɛn Sielɛ Sua’n liɛ’n, ndɛ benin yɛ be nun wie’m be kannin ɔn? (b) ?Wafa sɛ yɛ i sɔ’n yo wɔ ɔ?

¹¹ Be flɛ nvle kun kɛ Kɔsta Rika. Aniaan nga be o lɔ’n be nun wie’m be seli kɛ: “Kɛ e jran e nian e Ɲanmiɛn Sielɛ Sua’n, ɔ yo e kɛ laliɛ yɛ e su cɛn sa. Ɔ bo e nuan. E sua klanman sɔ’n i kplanlɛ’n dili le mɔcuɛ kun cɛ. Ajalɛ nga anuannzɛ’n nin e niaan’m be fali mɔ Zoova yrali su’n, i ti yɛ e kwla kplannin sua’n niɔn. Ɲanmiɛn i sulɛ lika sɔ’n, ɔ ti like kpa mɔ Ɲanmiɛn fa mannin e ɔ. Ɔ yo e fɛ  kpa lele.” Kɛ e wun kɛ aniaan’m be la Ɲanmiɛn i ase kɛ ngalɛ’n sa’n, ɔ yo e kwlaa e fɛ dan. Asa ekun’n, kɛ e wun kɛ asiɛ wunmuan’n su’n, aniaan’m be kwla ɲan be Ɲanmiɛn Sielɛ Sua liɛ’n, ɔ yo e fɛ wie dan. Kɛ e wie sua kun i kplan cɛ’n, e wun kɛ sran kpanngban be ba aɲia’m be bo. Yɛ be kunndɛ kɛ bé sí Zoova. I sɔ’n kle weiin kɛ Zoova kunndɛ kɛ e kplɛn i sulɛ sua mun.​—Jue. 127:1.

12. ?Ngue yɛ e kwla yo naan b’a kplan Ɲanmiɛn Sielɛ Sua mun ɔn?

¹² ?Ngue yɛ e kwla yo naan b’a kplan Ɲanmiɛn Sielɛ Sua mun ɔn? Kɛ bé kplán sua mun’n, e kwla di junman’n wie. Sanngɛ i kwlaa m’ɔ yoli o, e tinuntinun e kwla man sika naan be fa di junman’n. Kɛ e suan junman’n i bo kɛ ngalɛ sa’n, e klun jɔ dan. Kpɛkun, i sɔ’n manman Zoova wie. Lalafuɛ nun’n, Ɲanmiɛn i sufuɛ’m be man like be fa kplan Ɲanmiɛn i sulɛ sua mun. I sɔ wie yɛ e yo i andɛ ɔ.​—Tul. 25:2; 2 Kor. 9:7.

13, 14. ?Ndɛ benin yɛ Biblu’n kan m’ɔ kle kɛ ɔ fata kɛ e mian e ɲin e yo e Ɲanmiɛn Sielɛ Sua’n i yɛinyɛin ɔn?

¹³ Zoova klo yɛinyɛin. Ɔ kloman sukusuku’n. I sɔ’n ti, kɛ e kplan Ɲanmiɛn Sielɛ Sua kun’n, ɔ fata kɛ e mian e ɲin e yo i yɛinyɛin. (An kanngan 1 Korɛntfuɛ Mun 14:33, 40 nun.) Zoova ti sanwun. Sɛ e waan é sú i’n, ɔ fata kɛ e yo sanwun wie. Yɛle kɛ, maan e su i kɛ ng’ɔ kunndɛ’n sa. Maan e akunndan’n yo kpa, yɛ e yo sa nga be ti kpa’n. Sanngɛ, ɔ fata kɛ e yo yɛin e kplo’n su wie.

¹⁴ Sɛ e Ɲanmiɛn Sielɛ Sua’n ti yɛin, kɛ é yía sran mun aɲia’m be bo’n, ɲannzuɛn  kunman e. Kpɛkun, sran’m bé wún kɛ mɛn klanman’n i su ndɛ mɔ e kan’n, e bɔbɔ e nanti su. Asa ekun’n, bé wún i wlɛ kɛ Ɲanmiɛn kloman fiɛn’n. Naan ɔ́ yó maan asiɛ wunmuan’n wá káci lika klanman sakpa.​—Eza. 6:1-3; Ngl. 11:18.

15, 16. (a) ?Ngue ti yɛ kɛ ɔ yo naan e yo Ɲanmiɛn Sielɛ Sua’n i yɛin titi’n, i sɔ’n timan pɔpɔ ɔ? (b) ?Ngue ti yɛ ɔ fata kɛ e mian e ɲin e yo sua’n i yɛinyɛin ɔn? (c) ?Ajalɛ benin yɛ amun fali naan Ɲanmiɛn Sielɛ Sua’n w’a yo yɛin titi ɔ? (d) ?Ngue yɛ ɔ fata kɛ e kwlakwla e yo ɔ?

¹⁵ Lika yɛinyɛin yolɛ’n, ɔ ti sran wie’m be cinnjin kpa tra sran wie mun. I sɔ’n fin lika nga i nun yɛ be ɲinnin’n. Afin lika wie’m be nun’n, ɔ ti ndutre ngunmin. Wlawla’m be gua akpɔ’m be nuan, yɛ lika’n bɔn kaiin. Lika wie nun kusu’n, be ɲanman nzue, annzɛ ninnge tɛkɛtɛkɛ nga be fa yo lika nun yɛinyɛin’n. Sanngɛ Ɲanmiɛn Sielɛ Sua fuɛ’n, ɔ fata kɛ e yo i yɛinyɛin. Afin, Zoova dunman wo su. Kpɛkun, lɛ yɛ e yia e su i ɔ.​—Mml. 23:14.

¹⁶ Sɛ e waan Ɲanmiɛn Sielɛ Sua’n yo yɛin titi’n, ɔ fata kɛ e siesie e wun. Ɔ fata kɛ asɔnun kpɛnngbɛn’m be siesie junman’n. Kpɛkun, maan be kunndɛ ninnge nga be kwla fa yo sua’n i yɛinyɛin’n be sie i lɛ naan aniaan’m b’a kwla fa di junman’n. Ninnge wie’m be o lɛ’n, kɛ be wie aɲia’n i yo’n, ɔ fata kɛ be ka lɛ be nunnun be wun yɛiin. Wie o lɛ kusu’n, be kwla fa sie i cɛn uflɛ. Sua’n i yɛinyɛin yolɛ’n, ɔ ti junman nanndoliɛ. Kɛ bé dí junman sɔ’n, ɔ fata kɛ asɔnunfuɛ’m be kwlaa be sa tran nun.

17, 18. (a) ?Ngue yɛ wafa nga laa Ɲanmiɛn i sufuɛ’m be niannin i sulɛ sua’n i lika’n, ɔ kle e ɔ? (b) ?Ngue ti yɛ ɔ fata kɛ e nian e Ɲanmiɛn Sielɛ Sua’m be lika ɔ?

¹⁷ Zoova i sufuɛ’m be yo like kwlaa nga be kwla yo’n naan sua nga i nun yɛ be yia’n, ɔ yo klanman titi. I wie yɛle kɛ, be kaci sua’n i lika nga be saci’n. I sɔ yɛ laa Zoova i sufuɛ’m be yoli ɔ. Famiɛn Zɔasi blɛ su’n, Izraɛlifuɛ’m be mannin sika naan “be fa yo Nyanmiɛn i sua’n i lika nga b’a saci’n b’ɔ fata kɛ be yo’n.” (2 Fam. 12:4, 5) Kɛ afuɛ 200 sinnin’n, Famiɛn Zoziasi fali sika nga Izraɛlifuɛ’m be yili’n fa dili Ɲanmiɛn sua’n i su junman.​—An kanngan 2 Be Nyoliɛ 34:9-11 nun.

¹⁸ Lika wie’m be nun’n, Betɛli komite’n se kɛ aniaan’m be nianman Ɲanmiɛn sulɛ sua mun, annzɛ sua’m be nun ninnge’m be lika kpa. Atrɛkpa’n, aniaan sɔ’m be siman wafa ng’ɔ fata kɛ be yo’n, annzɛ be leman sua’m be ye siesielɛ’n i wun alaje ti ɔ. Sanngɛ i kwlaa m’ɔ yoli o, sɛ e nianman Ɲanmiɛn Sielɛ Sua’n i lika’n, ɔ́ sáci. Kpɛkun, sran’m bé kán e ndɛ tɛ. Sanngɛ sɛ e mian e ɲin e kaci ninnge nga be saci’n, sua’n yó klanman titi. Ɔ maan, Zoova ɲán ɲrun. Kpɛkun, é klé kɛ sika nga aniaan’m be yili mɔ be fa kplannin sua sɔ’n, b’a yimɛn i blo.

19. ?Ngue yɛ á yó naan w’a kle kɛ Ɲanmiɛn i sulɛ sua’n, ɔ ti ɔ cinnjin ɔn?

¹⁹ Ɲanmiɛn Sielɛ Sua’n, ɔ timan sran kun liɛ. Yɛ ɔ timan asɔnun kun liɛ. Ɔ ti Zoova i sulɛ sua. Like suanlɛ nga fali e ɲin sieli i Ɲanmiɛn mmla wie’m be su. Mmla sɔ’m be kleli e wafa ng’ɔ fata kɛ e bu sua nga be nun yɛ e yia e su Ɲanmiɛn’n. Yɛle kɛ maan e man sika naan be fa kplan sua mun. Kɛ bé kplán Ɲanmiɛn Sielɛ sua’n, maan e di junman’n wie. Kpɛkun, maan e nian sua’n i lika naan ɔ yo yɛin titi. Sɛ e mian e ɲin e yo i kwlaa sɔ’n, é klé kɛ Ɲanmiɛn sua’n i klolɛ’n kun e kpo kɛ Zezi liɛ’n sa.​—Zan 2:17.