1, 2. (a) Anong mga lugar nin pagsamba an ginamit kan mga lingkod ni Jehova kaidto? (b) Paano minansay ni Jesus an templo nin Diyos sa Jerusalem? (c) Ano an katuyuhan kan artikulong ini?

KAN inot pang mga panahon, igwa nang ginagamit na lugar para sa dalisay na pagsamba an mga lingkod nin Diyos. Posibleng naggibo si Abel nin altar kan mag-atang siya sa Diyos. (Gen. 4:3, 4) Si Noe, Abraham, Isaac, Jacob, asin Moises nagtugdok man nin altar. (Gen. 8:20; 12:7; 26:25; 35:1; Ex. 17:15) Ipinagbuot man ni Jehova sa mga Israelita na itugdok an tabernakulo. (Ex. 25:8) Pag-abot nin panahon, nagtugdok sinda nin sarong templo para sa pagsamba ki Jehova. (1 Ha. 8:27, 29) Pagkabalik kan mga Judio hali sa pagkabihag sa Babilonya, regular sindang nagtiripon sa mga sinagoga. (Mar. 6:2; Juan 18:20; Gui. 15:21) Nagtiripon man an mga Kristiyano kan inot na siglo sa harong kan mga miyembro kan kongregasyon. (Gui. 12:12; 1 Cor. 16:19) Ngunyan, an mga lingkod ni Jehova nagtitiripon sa manampulong ribong Kingdom Hall sa bilog na kinaban para makanuod dapit ki Jehova asin sumamba sa saiya.

² Namumutan asin pinapahalagahan na marhay ni Jesus an templo ni Jehova sa Jerusalem kaya sa saiya ipinanungod nin sarong kagsurat nin Ebanghelyo an makahulang tataramon na ini: “An kaigutan para sa saimong harong maglalaad sa laog ko.” (Sal. 69:9, NW; Juan 2:17, NW) An  Kingdom Hall dai masasabing “harong ni Jehova,” sa paagi na kapareho kan templo sa Jerusalem kaidto. (2 Cron. 5:13; 33:4) Pero dawa arog kaiyan, may mga prinsipyo sa Bibliya na nagpapahiling kun paano ta dapat gamiton asin igalang an mga lugar nin pagsamba sa ngunyan. Katuyuhan kan artikulong ini na repasuhon an nagkapira sa mga prinsipyong iyan asin tukaron kun paano ini maiaaplikar sa satong pagmansay, pagsuportar sa pinansiyal, asin pagmentenar sa satong mga Kingdom Hall. *

3-5. Para sa ano ginagamit an mga Kingdom Hall, asin ano an dapat na magin epekto kaini sa satong pagmansay sa mga pagtiripon na ginigibo diyan?

³ An Kingdom Hall iyo an sentro nin dalisay na pagsamba sa sarong komunidad. An satong surusemanang mga pagtiripon sa Kingdom Hall kaiba sa mga paagi ni Jehova sa pagtao sa sato nin espirituwal na kakanon. Digdi niyato nakukua an kaipuhan tang espirituwal na mga pampakusog asin instruksiyon paagi sa saiyang organisasyon. Pag nag-aatender kita sa mga pagtiripon, garo ta man sana inako an imbitasyon ni Jehova asin kan saiyang Aki. Dawa ngani surusemana an imbitasyon na magkakan sa “lamesa ni Jehova,” dai niyato dapat baliwalaon an imbitasyon na iyan.—1 Cor. 10:21.

⁴ Para ki Jehova, mahalagang marhay an mga okasyon na iyan nin pagsamba asin pagpakinurusog-kusugan kaya pinasabngan niya si apostol Pablo na sadulon kita na nungkang pagpabayaan an satong mga pagtiripon. (Basahon an Hebreo 10:24, 25.) Ipinapahiling ta daw na iginagalang niyato si Jehova kun mapalta kita sa satong mga pagtiripon na mayo man nin balidong dahilan? Iyo, maipapahiling ta kun gurano kaimportante sa sato si Jehova asin an saiyang itinataong mga probisyon kun nag-aandam kita asin bilog na pusong nakikikabtang sa satong mga pagtiripon.—Sal. 22:22.

⁵ Mahihiling sa paagi nin pagmansay ta sa mga pagtiripon sa Kingdom Hall asin sa pagmentenar kan mismong estruktura kaiyan kun gurano kadakula kan satong paggalang ki Jehova. Bako daw na gusto niyato na an satong mga paggawi makatao nin kaumawan sa pangaran ni Jehova, na sa parati nakasurat sa karatula nin Kingdom Hall?—Ikumparar an 1 Hade 8:17.

6. Ano an sinabi nin mga bakong Saksi manungod sa satong mga Kingdom Hall asin sa mga nag-aatender diyan? (Hilingon an ritrato sa kapinunan kan artikulo.)

⁶ Parating naririsa kan mga bakong Saksi kun paano ta iginagalang an satong mga lugar nin pagsamba. Halimbawa, sarong lalaki sa Turkey an nagsabi: “Napahanga ako sa kalinigan saka pagigin areglado kan Kingdom Hall. Marahay magbado an mga tawo diyan, nakangirit, asin maugma akong kinumusta. Ini an talagang nakapahanga sako.” Regular nang nag-atender an lalaking ini, asin dai nahaloy, nabawtismuhan siya. Sa sarong siyudad sa Indonesia, inimbitaran nin sarong kongregasyon an lokal na mga opisyal asin mga pagtaraid tanganing mahiling an bagong Kingdom Hall bago idedikar iyan. Nag-atender an alkalde. Napahanga siya sa kalidad kan edipisyo, disenyo, asin sa magayon na hardin kaiyan. “Mahihiling sa kalinigan kan edipisyong ini na talagang makusog an saindong pagtubod,” an sabi niya.

7, 8. Anong mahalagang mga bagay an dapat na tandaan kan mga nag-aatender sa Kristiyanong mga pagtiripon?

⁷ Dapat na mahiling sa satong ugali, pagbado, asin pagpakarhay sa sadiri an paggalang niyato sa Diyos na nag-imbitar sa sato sa Kristiyanong mga pagtiripon. Huli sa paggalang na iyan, lilikayan niyato na magin sobra kaistrikto o sobra kakaswal. Nariparo na may mga kongregasyon na nagtatao nin istriktong mga susundon sa dapat na magin paggawi mantang nasa mga pagtiripon sa Kingdom Hall. Pero may iba man na sobra kaimpormal  na garo baga nasa harong sana ninda. Siyempre, gusto ni Jehova na magin komportable an saiyang mga lingkod asin mga bisita na nag-aatender. Pero, habo niyato na magpahiling nin kawaran nin paggalang sa satong mga pagtiripon paagi sa pagbado nin sobra kakaswal, pagti-text, pag-ulay-ulay, pagkakan sa panahon nin programa, asin iba pa. Dapat na itukdo kan mga magurang sa saindang mga aki na an Kingdom Hall bakong lugar para magdurudalagan o magkawat.—Par. 3:1.

⁸ Naanggot na marhay si Jesus sa mga nagnenegosyo sa templo nin Diyos kaya pinalayas niya sinda. (Juan 2:13-17) Lugar man para sa dalisay na pagsamba asin espirituwal na pagtutukdo an satong mga Kingdom Hall. Kaya an ano man na negosyo dapat na gibuhon sa ibang lugar.—Ikumparar an Nehemias 13:7, 8.

9, 10. (a) Paano nakakapagpatugdok nin bagong mga Kingdom Hall an organisasyon ni Jehova, asin ano an nagin resulta kaiyan? (b) Anong mamumuton na probisyon an nakatabang na marhay sa mga kongregasyon na mayo nin kakayahan na makapagpatugdok nin Kingdom Hall?

⁹ Dakul nanggad an ginigibong mga paghihinguwa kan organisasyon ni Jehova tanganing makapagpatugdok nin simpleng mga Kingdom Hall asin makatabang na maponduhan iyan. An mga nagdidisenyo, nagtutugdok, asin nagre-renovate kaiyan daing suweldong mga boluntaryo. Ano an nagin resulta kaiyan? Puon kan Nobyembre 1, 1999, labing 28,000 na bagong Kingdom Hall an naitugdok para sa mga kongregasyon sa bilog na kinaban. Kaya buot sabihon, kaining nakaaging 15 taon, may average na limang bagong Kingdom Hall an naitutugdok sa kada aldaw.

¹⁰ May ginigibo man na mga paghihinguwa tanganing matabangan na magkaigwa nin Kingdom Hall an mga lugar na nangangaipo kaiyan. An mamumuton na probisyon na ini nakabasar sa prinsipyo sa Kasuratan na an sobra kan iba makahipno sa kakulangan kan iba, tanganing magkaigwa nin pagpantay-pantay. (Basahon an 2 Corinto 8:13-15.) Kaya may magagayon na bagong Kingdom Hall an naitugdok para sa mga kongregasyon na mayo nin kakayahan na makapagpatugdok kaiyan.

11. Ano an sinabi nin sarong kongregasyon manungod sa bago nindang Kingdom Hall, asin ano an masasabi mo dapit diyan?

¹¹ Sarong kongregasyon sa Costa Rica na nakinabang sa probisyon na ini an nagsurat: “Pag hinihiling mi sa luwas an Kingdom Hall mi, pagmati mi nangangaturugan sana kami! Dai talaga kami makapaniwala. Naitugdok an magayon ming Kingdom Hall sa laog sana nin walong aldaw! Huli iyan sa bendisyon ni Jehova, sa mga areglong ginibo kan saiyang organisasyon, saka sa suporta kan satong namumutan na mga tugang. Talagang marahayon na regalo, sarong kayamanan, an lugar na ini nin pagsamba na itinao sa samo ni Jehova. Maugmang-maugma talaga kami.” Dai ka daw nauugma na madangog an siring na mga kapahayagan nin pasasalamat huli sa bagong mga Kingdom Hall asin maaraman na arog man kaiyan an namamatian kan iba pa niyatong mga tugang sa rinibong lugar sa  bilog na kinaban? Binebendisyunan nanggad ni Jehova an pagtutugdok na ini huling pagkatapos tulos na maitugdok an bagong Kingdom Hall, sa parati napapano ini nin mga tawong sadiyosan an puso na gustong makanuod pa dapit sa satong mamumuton na Kaglalang.—Sal. 127:1.

12. Paano ka makakatabang sa pagtugdok nin Kingdom Hall?

¹² Dakul na brother asin sister an nakakamati nin dakulang kaugmahan huling nakakapagboluntaryo sinda sa pagtugdok nin Kingdom Hall. Pero, makapagboluntaryo man kita sa mismong pagtugdok o dai, gabos kita igwa nin pribilehiyo na tumabang sa mga proyektong iyan paagi sa satong mga donasyon. An kaigutan para sa dalisay na pagsamba an nakatabang tanganing maponduhan an teokratikong mga proyekto kaidtong mga panahon kan Bibliya, asin totoo man iyan ngunyan—gabos para sa kamurawayan ni Jehova.—Ex. 25:2; 2 Cor. 9:7.

13, 14. Anong mga prinsipyo sa Kasuratan an aplikado sa pagpapadanay na malinig asin areglado kan satong Kingdom Hall?

¹³ Pag naitugdok na an sarong Kingdom Hall, kaipuhan na papagdanayon iyan na malinig asin areglado tanganing maipahiling an mga kuwalidad asin personalidad kan Diyos na satong sinasamba—sarong Diyos nin areglo. (Basahon an 1 Corinto 14:33, 40.) Ikinokonektar kan Bibliya an kabanalan asin espirituwal na kalinigan sa pisikal na kalinigan. (Kap. 19:8) Kaya, kun gusto nin mga tawo na magin kaako-ako sinda ki Jehova, dapat man nindang ugalion na magin malinig sa hawak.

¹⁴ Kun nasusunod ta an mga prinsipyong ini, dai kita masasakitan na mag-imbitar nin mga interesado sa satong mga pagtiripon huling aram niyato na an kondisyon kan satong Kingdom Hall kauyon kan maugmang bareta na ihinuhulit ta sa sainda. Mahihiling ninda na an satong sinasamba sarong  banal na Diyos asin madali na niyang gibuhon na sarong malinig na paraiso an daga.—Isa. 6:1-3; Kap. 11:18.

15, 16. (a) Taano ta puwedeng magin dipisil na papagdanayon na malinig an Kingdom Hall, pero taano ta mahalagang gibuhon ini? (b) Ano an areglo nindo sa paglinig sa saindong Kingdom Hall, asin ano an pribilehiyo niyato gabos?

¹⁵ Lain-lain an opinyon nin mga tawo dapit sa kun sagkod sain an kaipuhan na paglinig. Nakadepende ini sa kun paano sinda pinadakula; asin kun baga malaboy, maalpog, mayong marhay na tinampo o supisyenteng tubig saka mga produktong panglinig sa lugar na dinakulaan ninda. Ano man an kinatudan o sitwasyon sa lugar ta, dapat na magin marahay na halimbawa an satong mga Kingdom Hall kun dapit sa kalinigan huling dinadara kaini an pangaran ni Jehova asin lugar ini para sa dalisay na pagsamba.—Deut. 23:14.

¹⁶ Sa paglinig kan satong Kingdom Hall, kaipuhan niyatong magin organisado. Kaipuhan na siguraduhon kan lambang grupo nin kamagurangan na may iskedyul asin igong suplay para sa paglinig an kongregasyon tanganing mapagdanay na malinig sagkod posible an lugar nin pagsamba. May mga kaipuhan linigon pagkatapos kan kada pagtiripon, pero may iba man na dai pirming kaipuhan na linigon. Kaya kaipuhan digdi an marahay na koordinasyon asin pangangataman para masiguradong mayo nin malilipasan. Gabos na miyembro kan kongregasyon may pribilehiyong makikooperar sa paglinig sa Kingdom Hall.

17, 18. (a) Anong mga halimbawa dapit sa pagmentenar kan mga lugar nin dalisay na pagsamba an yaon sa Bibliya? (b) Taano ta dapat papagdanayon na nasa marahay na kondisyon an mga Kingdom Hall?

¹⁷ Naghihinguwa man an mga lingkod ni Jehova na papagdanayon na nasa marahay na kondisyon an saindang mga lugar nin pagsamba. Ipinagbuot ni Hading Joas nin Juda sa mga saserdote na gamiton an mga itinaong kontribusyon para sa harong ni Jehova “sa paghirahay kan Templo sa oras na may mahiling digdi na dapat hirahayon.” (2 Ha. 12:4, 5, An Marahay na Bareta Biblia) Pagkalihis nin labing 200 na taon, ginamit man ni Hading Josias an mga kontribusyon para sa templo bilang panggastos sa mga kinakaipuhan na mga pagpahirahay.—Basahon an 2 Cronica 34:9-11.

¹⁸ Irineport nin ibang mga sangang opisina na may mga nasyon na daing gayo tinatawan nin atensiyon an pagmentenar nin mga edipisyo o mga gamit. Tibaad dikit sana sa mga nasyon na iyan an tatao kun paano magmentenar o an may pundo para diyan. Pero, kun dai niyato imementenar an satong Kingdom Hall, puwedeng maraot tulos iyan asin bakong marahay na patotoo iyan sa komunidad. Sa ibong na lado, kun ginigibo kan gabos na miyembro kan kongregasyon an saindang makakaya para mapagdanay na nasa marahay na kondisyon an Kingdom Hall, magtatao ini nin kaumawan ki Jehova asin dai masasayang an kuwarta na idinodonar kan satong mga kapagtubod.

19. Ano an determinado mong gibuhon kun manungod sa mga edipisyo na ginagamit ta para sa dalisay na pagsamba?

¹⁹ An Kingdom Hall sarong edipisyo na idinedikar ki Jehova. Kaya bako tamang sabihon na pagsadiri iyan nin sarong tawo o kongregasyon, ano man an nakasurat sa mga papeles kaiyan. Sinasadol kita kan mga prinsipyo sa Bibliya na lubos kitang makipagtabangan na masiguradong nagagamit sa tama an edipisyong ini. Magigibo iyan kan gabos na nasa kongregasyon paagi sa pagpahiling nin tamang paggalang sa satong mga lugar nin pagsamba, sa pagtao nin donasyon para sa pagpatugdok nin bagong mga Kingdom Hall, asin pagtao kan satong panahon saka kusog tanganing mapagdanay na malinig asin namementenar an satong mga Kingdom Hall. Kun sinusuportaran ta an mga paghihinguwang ini, ipinapahiling ta an satong kaigutan para sa lugar nin dalisay na pagsamba ki Jehova, arog kan ginibo ni Jesus.—Juan 2:17.