1, 2. (a) Unsang mga dapit sa pagsimba ang gigamit sa mga alagad ni Jehova kaniadto? (b) Unsay pagbati ni Jesus labot sa templo sa Diyos sa Jerusalem? (c) Unsay hisgotan niining artikuloha?

SUKAD niadto, ang mga alagad sa Diyos may mga dapit na alang sa putli nga pagsimba. Si Abel lagmit migamit ug halaran dihang naghalad siya sa Diyos. (Gen. 4:3, 4) Si Noe, Abraham, Isaac, Jacob, ug Moises naghimog mga halaran. (Gen. 8:20; 12:7; 26:25; 35:1; Ex. 17:15) Si Jehova nagsugo sa mga Israelinhon sa paghimog tabernakulo. (Ex. 25:8) Sa ulahi, sila nagtukod ug templo alang sa pagsimba kang Jehova. (1 Hari 8:27, 29) Human mamalik gikan sa pagkabihag sa Babilonya, ang mga Hudiyo regular nga nagtigom diha sa mga sinagoga. (Mar. 6:2; Juan 18:20; Buh. 15:21) Ang unang mga Kristohanon nagtigom diha sa balay sa mga membro sa kongregasyon. (Buh. 12:12; 1 Cor. 16:19) Karon, ang katawhan ni Jehova magtigom diha sa tinagpulo ka libong Kingdom Hall diin sila makakat-on bahin kang Jehova ug mosimba kaniya.

² Dako kaayo ang gugma ug apresasyon ni Jesus alang sa templo ni Jehova sa Jerusalem maong gipadapat ngadto kaniya sa usa ka magsusulat sa Ebanghelyo kining tagnaa: “Ang tumang kasibot  alang sa imong balay naglamoy kanako.” (Sal. 69:9; Juan 2:17) Ang Kingdom Hall dili matawag nga “balay ni Jehova” sa samang paagi nga gigamit kining mga pulonga sa paghubit sa templo sa Jerusalem. (2 Cron. 5:13; 33:4) Bisan pa niana, ang Bibliya dunay mga prinsipyo nga nagpakita kanato kon sa unsang paagi angayng gamiton ug tahoron ang atong mga dapit sa pagsimba karon. Niining artikuloha, atong hisgotan ang pipila sa maong mga prinsipyo ug ang kapadapatan niana sa paagi nga ang atong mga Kingdom Hall angayng isipon, suportahan sa pinansiyal, ug mentinahon. *

3-5. Unsay katuyoan sa Kingdom Hall, ug unsay angayng epekto niini sa atong panglantaw sa mga tigom?

³ Ang Kingdom Hall mao ang sentro sa putli nga pagsimba diha sa lokal nga komunidad. Lakip sa mga tagana ni Jehova sa pagpalig-on sa atong espirituwalidad mao ang senemanang panagkatigom diha sa Kingdom Hall. Diha niana, kita makadawat ug hinungdanong espirituwal nga pagpalig-on ug giya pinaagi sa iyang organisasyon. Ang tanang nanambong sa tigom sama rag gidapit ni Jehova ug sa iyang Anak. Bisan pag kanunay kitang gidapit nga mokaon diha sa “lamesa ni Jehova,” dili gayod nato pakamenoson ang maong imbitasyon.—1 Cor. 10:21.

⁴ Hinungdanon kaayo kang Jehova ang maong mga okasyon sa pagsimba ug pagdinasigay maong iyang giinspirar si apostol Pablo sa pag-awhag kanato nga dili talikdan ang atong panagkatigom. (Basaha ang Hebreohanon 10:24, 25.) Nagpakita ba kitag pagtahod kang Jehova kon mopalta kita sa tigom bisag walay bug-at nga rason? Ikapakita nato ang atong apresasyon kang Jehova ug sa iyang mga tagana pinaagi sa pagpangandam alang sa mga tigom ug kinasingkasing nga pagpakigbahin niini.—Sal. 22:22.

⁵ Ang atong panglantaw sa Kingdom Hall—sa mismong tinukod ug sa espirituwal nga kalihokan diha niana—angayng magpadayag ug pagtahod. Dili ba ang atong panglantaw niini dakog kalabotan sa atong pagbati sa ngalan sa Diyos, nga sagad makita diha sa karatula sa Kingdom Hall?—Itandi ang 1 Hari 8:17.

6. Unsay giingon sa mga tawo bahin sa atong mga Kingdom Hall ug sa nagatambong sa tigom? (Tan-awa ang hulagway sa sinugdan sa artikulo.)

⁶ Ang atong pagtahod alang sa atong mga dapit sa pagsimba sagad mamatikdan sa mga dili-Saksi. Pananglitan, usa ka tawo sa Turkey ang miingon: “Nakadayeg ko sa kahinlo ug kahapsay sa Kingdom Hall. Ang mga tawo desenteg pamesti, mapahiyomon, ug maabiabihon kaayo. Natandog kaayo ko.” Siya misugod pagtambong sa mga tigom, ug wala madugay siya nabawtismohan. Sa usa ka siyudad sa Indonesia, gidapit sa usa ka kongregasyon ang lokal nga opisyales sa gobyerno ug mga silingan aron makita ang bag-ong Kingdom Hall una kini ipahinungod. Miadto ang mayor. Nakadayeg kaayo siya sa kalidad sa tinukod, sa disenyo ug sa nindot nga garden niini. Siya miingon: “Ang kahinlo niining dapita nagpakita nga duna gyod moy lig-ong pagtuo.”

7, 8. Unsay angayng hinumdoman niadtong nagatambong ug tigom?

⁷ Ang atong pagtahod sa Diyos kinsa nagdapit kanato sa mga tigom angayng madayag sa atong panggawi, pamesti, ug pamostura. Apan likayan nato ang paghinobra. Namatikdan nga samtang ang uban sobra ka estrikto labot sa kon unsay hustong panggawi dihang motambong sa mga tigom, ang uban tingali  sobra ka kaswal nga morag naa ra sa balay. Siyempre, gusto ni Jehova nga ang iyang mga alagad ug ang ubang bisita mobating komportable sa Kingdom Hall. Apan dili maayo nga ang nanambong magpakitag kawalay-pagtahod sa mga tigom pinaagi sa pagsul-ob ug kaswal ra kaayo nga sinina, pag-text, pag-estoryahanay, o pagkaon panahon sa tigom. Angayng tudloan sa mga ginikanan ang ilang mga anak nga ang Kingdom Hall dili dapit diin sila magdagandagan o magdula.—Eccl. 3:1.

⁸ Dihang nakita ni Jesus nga may pipila nga nagnegosyo diha sa templo, siya nasuko ug giabog sila. (Juan 2:13-17) Ang atong mga Kingdom Hall usab maoy dapit alang sa putli nga pagsimba ug espirituwal nga edukasyon. Busa dili maayong magnegosyo samtang atua kita didto.—Itandi ang Nehemias 13:7, 8.

9, 10. (a) Unsay gihimo sa organisasyon ni Jehova aron matukod ang bag-ong mga Kingdom Hall, ug unsay resulta? (b) Unsang mahigugmaong kahikayan ang nakatabang sa mga kongregasyon nga dili makaarang sa pagtukod ug Kingdom Hall?

⁹ Ang organisasyon ni Jehova naningkamot sa pagtaganag simpleng mga Kingdom Hall ug paghatag ug pinansiyal nga tabang sa pagtukod niini. Ang pagdisenyo, pagtukod, ug pagremodel niana gihimo sa walay suweldong mga boluntaryo. Unsay resulta? Sukad sa Nobyembre 1, 1999, kapig 28,000 ka nindot ug bag-ong mga sentro sa putli nga pagsimba ang gitagana sa mga kongregasyon sa tibuok kalibotan. Nagpasabot kana nga sa milabayng 15 ka tuig, sa aberids, lima ka bag-ong Kingdom Hall ang matukod matag adlaw.

¹⁰ Gihimo ang mga paningkamot aron masuportahan ang pagpanukod ug mga Kingdom Hall sa mga dapit diin kini gikinahanglan. Kining mahigugmaong tagana gibase sa prinsipyo sa Kasulatan nga ang sobra sa pipila makahulip sa kakulangan sa uban, aron “adunay pag-angay-angay.” (Basaha ang 2 Corinto 8:13-15.) Ingong resulta, ang nindot ug bag-ong mga sentro sa putli nga pagsimba gitagana sa mga kongregasyon nga dili makaarang sa pagtukod ug kaugalingong Kingdom Hall.

11. Unsay giingon sa pipila ka igsoon bahin sa ilang bag-ong Kingdom Hall, ug unsay imong pagbati niini?

¹¹ Usa ka kongregasyon sa Costa Rica nga nakabenepisyo niini nga tagana misulat: “Dihang nagtindog mi atubangan sa Kingdom Hall, mora mig nagdamgo! Dili mi makatuo. Ang among nindot nga Kingdom Hall nahuman sulod lang sa walo ka adlaw! Naposible kini tungod sa panalangin ni Jehova, kahikayan sa iyang organisasyon, ug tabang sa atong minahal nga mga igsoon. Kini nga dapit sa pagsimba usa gayod ka bililhong gasa,  usa ka mutya nga gihatag kanamo ni Jehova. Nalipay kaayo mi.” Malipay kita nga makadungog ug mga pasalamat nga sama niana ug sa pagkahibalo nga daghan sa atong mga igsoon sa tibuok kalibotan ang nagmalipayon kay nakabaton ug kaugalingong Kingdom Hall. Kini maoy buluhaton ni Jehova, kay sa dihang mahuman ang bag-ong mga Kingdom Hall, sagad mapuno kini sa matinud-anog kasingkasing nga mga tawo kinsa gustong mahibalog dugang bahin sa atong mahigugmaong Maglalalang.—Sal. 127:1.

12. Sa unsang paagi makatabang ka sa pagpanukod ug Kingdom Hall?

¹² Daghang igsoon ang malipayon kaayo kay nakatabang sila sa pagpanukod ug Kingdom Hall. Makaboluntaryo man kita sa pagtukod o dili, kitang tanan may pribilehiyo sa pagsuportar sa maong mga proyekto pinaagi sa atong mga donasyon. Ang kasibot alang sa putli nga pagsimba nakatabang sa pagsuportar sa teokratikanhong mga pagpanukod sa kapanahonan sa Bibliya, ug tinuod usab kana karon—sa kahimayaan ni Jehova.—Ex. 25:2; 2 Cor. 9:7.

13, 14. Unsang Kasulatanhong mga prinsipyo ang mapadapat aron mahuptang hinlo ug hapsay ang atong Kingdom Hall?

¹³ Dihang mahuman ang usa ka bag-ong Kingdom Hall, kinahanglan kining mahuptang hinlo ug hapsay aron mabanaag niini ang mga hiyas ug personalidad sa Diyos nga atong gisimba—ang Diyos sa kahusay. (Basaha ang 1 Corinto 14:33, 40.) Sa Bibliya, ang pagkabalaan ug espirituwal nga kahinlo gilangkit sa pisikal nga kahinlo. (Pin. 19:8) Busa, aron dawaton kita ni Jehova, kinahanglan usab kitang magmahinlo sa pisikal.

¹⁴ Kon gisunod nato ang maong mga prinsipyo, dili ta maulawng mangimbitar sa mga  interesado sa pagtambong sa atong mga tigom, kay makasalig ta nga ang kahimtang sa atong tigomanan kaharmonya sa maayong balita nga atong gipaambit kanila. Ilang makita nga kita nagsimba sa usa ka Diyos nga balaan kinsa sa dili madugay maghimo sa yuta nga usa ka matahom nga paraiso.—Isa. 6:1-3; Pin. 11:18.

15, 16. (a) Nganong lisod usahay nga mahuptang hinlo ang Kingdom Hall, apan nganong gikinahanglan kini? (b) Unsay mga kahikayan sa pagpanghinlo sa inyong Kingdom Hall, ug unsay pribilehiyo sa matag usa kanato?

¹⁵ Ang mga tawo lainlaig opinyon bahin sa pagpanghinlo. Mahimong tungod kini sa pagmatuto kanila o kaha sa ilang gipuy-an. Basin ang ilang lugar lapokon, abogon, dili maayog mga dalan, ug walay igong suplay sa tubig ug mga gamit sa pagpanghinlo. Bisan unsa may tinamdan sa mga tawo o kahimtang sa inyong lugar, ang atong Kingdom Hall kinahanglang panig-ingnan sa kahinlo ug kahapsay, kay kana nagdala sa ngalan ni Jehova ug maoy dapit sa putli nga pagsimba.—Deut. 23:14.

¹⁶ Aron magmahinlo ang Kingdom Hall, kinahanglang magmaorganisado. Angayng tinoon sa matag lawas sa mga ansiyano nga may eskedyul ug igong suplay sa mga gamit sa pagpanghinlo. Dunay kinahanglang hinloan kada human sa tigom, ang uban dili ingon niana ka subsob. Busa, hinungdanon ang maayong koordinasyon ug pagdumala aron maseguro nga walay makalimtan. Ang tanang membro sa kongregasyon may pribilehiyo nga makigkooperar niining buluhatona.

17, 18. (a) Unsay mga pananglitan diha sa Kasulatan maylabot sa pagmentinar sa mga dapit sa putli nga pagsimba? (b) Nganong kinahanglang mentinahon ang mga Kingdom Hall?

¹⁷ Ang mga alagad ni Jehova naningkamot usab nga mamentinar ang ilang mga dapit sa pagsimba. Si Haring Jehoas sa Juda nagsugo sa mga saserdote nga gamiton ang mga amot alang sa balay ni Jehova aron ‘ayohon ang mga liki sa balay bisan diin nga makaplagan ang liki.’ (2 Hari 12:4, 5) Kapig 200 ka tuig sa ulahi, gigamit usab ni Haring Josias ang mga amot sa templo aron ipaayo kini.—Basaha ang 2 Cronicas 34:9-11.

¹⁸ Ang mga branch office nagreport nga sa pipila ka nasod, dili prayoridad ang pagmentinar sa mga tinukod o mga gamit. Tingali diyutay lang sa maong nasod ang makamaong mohimo niana. O kaha wala silay ikagasto. Apan kon dili mentinahon ang Kingdom Hall, kini dali rang madaot ug makahatag ug dili maayong impresyon sa komunidad. Sa laing bahin, kon maningkamot ang kongregasyon sa pagmentinar sa Kingdom Hall, madayeg si Jehova ug dili mausik ang kuwarta nga giamot sa mga igsoon.

19. Unsay imong determinasyon maylabot sa mga tinukod nga atong gigamit alang sa putli nga pagsimba?

¹⁹ Ang Kingdom Hall maoy tinukod nga gipahinungod kang Jehova. Busa, dili kini iya ni bisan kinsang indibiduwal o sa kongregasyon, bisag unsa pay anaa sa titulo. Ang mga prinsipyo sa Bibliya nag-awhag kanato nga bug-os makigkooperar aron maseguro nga matuman ang katuyoan sa pagtukod niini. Ang tanan sa kongregasyon makatabang pinaagi sa pagpakitag nahiangayng pagtahod sa atong mga dapit sa pagsimba, pag-amot alang sa pagtukod ug bag-ong mga Kingdom Hall, ug paghatag sa ilang panahon ug kusog aron mahuptang hinlo ug mamentinar ang mga Kingdom Hall. Pinaagi sa pagpaluyo niini nga mga paningkamot, atong gipakita ang atong kasibot alang sa dapit sa putli nga pagsimba kang Jehova, sama sa gibuhat ni Jesus.—Juan 2:17.