1, 2. (a) Ame ekö, ekaa la hnë hmi ne la itre hlue i Iehova? (b) Nemene la aqane waipengöne i Iesu la ēnē e Ierusalema? (c) Nemene la hne së hna troa ce ithanatane ngöne la tane mekune celë?

QAANE ekö uti hë enehila, hetrenyi pala hi la itre hnë hmi ne la itre hlue i Akötresie. Ka tune ekö lo Abela a huuje koi Iehova, hnei angeic hna trai ita ne huj. (Genese 4:3, 4) Hnei Noa, me Aberahama, me Isaaka, me Iakobo, me Mose hna isa trai ita ne huuje koi Iehova. (Genese 8:20; 12:7; 26:25; 35:1; Esodo 17:15) Thenge la hna amekötine hnei Iehova, hnene la itretre Isaraela hna cane la ketre uma mano. (Esodo 25:8) Ame hë e thupen, hnei Nyidrëti hna upi angatre troa xupe la ēnē. (1 Ite Joxu 8:27, 29) Ame hë la kola bëeke hnene la nöje i Akötresie qaa Babulona, hnei angatre hna pune icasikeu ngöne la itre sunago. (Mareko 6:2; Ioane 18:20; Ite Huliwa 15:21) Nge ame la itre pane Keresiano, tre angatre a icasikeu ngöne la itre hnalapa. (Ite Huliwa 12:12; 1 Korinito 16:19) Ame enehila, itre hlue i Iehova e cailo fen a icasikeu ngöne la itre thauzane lao Uma Ne Baselaia, nge e cili angatr a thele troa atrepengöi Iehova hnyawa me atrunyi Nyidrë.

² Atraqatre la metrötre i Iesu kowe la ēnē i Iehova e Ierusalema. Matre hnene la trenge aja i Iesu kowe la ēnē hna amekunëne la itretre dreng la itre trenge ewekë ne la atre cinyihane la salamo, kola hape: “Ase hë ulumi ni hnene la aja atraqate kowe la ēnē i cilie.” (Salamo 69:9; Ioane 2:17) Ame la Uma Ne Baselaia, tre tha “ēnē i  Iehova” kö lai tune lo ēnē ekö e Ierusalema. (2 Aqane lapa ite Joxu 5:13; 33:4) Ngo, loi e tro sa metrötrëne catrëne la itre hnë hmi së. Ame ngöne la tane mekune celë, tro sa ce ithanatane la itre trepene meköti ne la Tusi Hmitrötr ka amamane koi së la aqane tro sa ujë ngöne la Uma Ne Baselaia. Tro fe a amamane koi së la aqane tro sa nyihnyawan itre ej, me aqane tro sa ixatua nyithupene la itre jian. *—Wange ju la ithuemacany.

3-5. Nemene la pengöne la Uma Ne Baselaia, nge nemene la aqane waipengöne së la itre icasikeu?

³ Ame la Uma Ne Baselaia, tre celë hi götrane ka tru hnë icasikeu ne la itre atr göi troa atrunyi Iehova. Ketre ahnahna qaathei Akötresie la itre icasikeu, nge itre ej a xatua së troa acatrene la aqane imelekeu së me Nyidrë. Ame ngöne la itre icasikeu, organizasio i Iehova a thuecatre së me hamëne la ixatua ka ijije koi së. (Mataio 24:45) Ketre manathith ka tru koi së troa könë së hnei Iehova me Iesu troa xeni ngöne la ‘laulau i Iehova’ e nöjei wiik. (1 Korinito 10:21) Tha tro pi kö sa thëthëhmine la enyipiewekëne la ihë cili.

⁴ Iehova a amamane hnyawane koi së la aja i Nyidrë tro sa sine la itre icasikeu göi troa atrunyi Nyidrë me troa ithuecatrekeu. (E jë la Heberu 10:24, 25.) Pine laka, easa metrötrë Iehova, tha pi tro kö sa triane la ketre icasikeu, loi e hetre nyipi kepin. Easa amamane la ole së kowe la itre icasikeu la easa hnëkëne hnyawa itre ej, me ajane troa canga sin göi troa ce thawa la itre mekun e cili.—Salamo 22:22.

⁵ Troa mama ngöne la aqane ujë së ngöne la itre icasikeu me aqane nyihnyawane së la Uma Ne Baselaia la etrune la metrötre së koi Iehova. Easa ajane tro la aqane ujë së a atrune la ëje i Iehova, ëje hna sija ngöne lai pancarte ne la Uma Ne Baselaia.—Wange ju fe la 1 Ite Joxu 8:17.

6. Nemene la hna qaja hnene la itre atr göne la itre Uma Ne Baselaia, me itre ka sine la itre icasikeu? (Wange ju la pane iatr.)

⁶ E tro sa metrötrëne la itre Uma Ne Baselaia, tro lai a mama kowe la itre xa atr. Ka tune la ketre trahmany e Turquie, öni angeic: “Hna ketri ni hnyawa hnene la aqane lolo la hna nyidrawane me huliwane hnyawane la nöjei ewekë ngöne la Uma Ne Baselaia. Ka heetre hnyawa, me hnyimahnyima la itre atr e cili, nge loi la aqane kepe ni hnei angatr. Celë hi ka ketri ni catr.” Hnei angeic hna nyiqaane sine asë la itre icasikeu, nge tha qea ju kö, nge kolo fe hë a xomi bapataiso. Ame ngöne la ketre traon e Indonésie, hnene la itre trejin hna hëne la nöjei atr ka lapa easenyi angatr matre troa hane ihamë ngöne la Uma Ne Baselaia i angatr ka hnyipixe. Hna hëne fe la Maire memine la itre xa ka cilëne la itre hnë huliwa ka tru. Hna ketri Maire hnene la emingömingöne la aqane kuca memine la aqane xupe ej, memine la emingömingöne la gaatran. Öni nyidrë: “Kola anyipicine hnene la aqane lolo la hna nyidrawane la uma ka hape, itretre nyihlue nyipici epuni koi Akötresie.”

7, 8. Nemene la aqane tro sa amamane la metrötre së koi Iehova ngöne la Uma Ne Baselaia?

⁷ Iehova hi la Atre hë së kowe la itre icasikeu, matre Nyidrëti a wangatrune la thiina së, me aqane heetre së me isej, memine fe la aqane ujë së e cili. The sasaithi tulu kö! Ame göi aqane tro sa ujë ngöne la itre icasikeu, tha loi kö troa nyi ka meköti ju pë hë, maine tro pena a ujë kösë easë e sipu hnalapa së. Nyipici laka, ame la aja i Iehova, tre tha tro kö a hetre ewekë ka troa iathixötrë ngöne la Uma Ne Baselaia la  easa icasikeu memine itre atr hne së hna hën. Ketre, aja së tro pala hi a metrötrëne la itre icasikeu. Celë hi kepine matre loi e tro sa heetre hnyawa, ngo tha tro kö sa heetre tune la easa lapa hnalapa, maine ngenu pena. Ketre, tro sa thupën matre tha tro kö sa iupifë maca ngöne mobilis, maine ithanata, maine xen me ij ngöne la itre icasikeu. Loi e tro fe la itre keme me thin a inine la itre nekö i angatr matre tha tro kö a nyenyape menu, maine elo pena hnine la Uma Ne Baselaia.—Ate Cainöj 3:1.

⁸ Ame la Iesu a öhne la itre atr e saleme ngöne la ēnē i Akötresie, hnei nyidrëti hna wesitrë angatr me helë angatr. (Ioane 2:13-17) Ame ngöne la itre Uma Ne Baselaia, easa traqa troa atrunyi Iehova me thele troa atre Nyidrëti hnyawa. Haawe, tha hnë thele manie kö e cili.—Wange ju fe la Nehemia 13:7, 8.

9, 10. (a) Nemene la itre hna kuca hnene la itre hlue i Iehova göi troa xupe la itre Uma Ne Baselaia, nge nemene hë la thangane lai? (b) Organizasio i Iehova a xatuane tune kaa la itre ekalesia ka thatreine nyithupene la sipu Uma Ne Baselaia i angatr?

⁹ Tru catre la hna huliwa hnene la itre hlue i Iehova e cailo fen troa xupe la itre Uma Ne Baselaia. Itre ka saen pë thupen a siji tulu ne uma, me xup, me ahnyipixen itre ej. Matre, ame ngöne lo 15 lao macatre ka ase hë, hna xupe la 28 000 nge hetre munën lao Uma Ne Baselaia e cailo fen, kösë e ca drai, faifi lao Uma Ne Baselaia hna xup.

¹⁰ Hnene la organizasio i Iehova hna upe la itre ka saen, me huliwane la itre ahnahna göi troa ixatua xupe la itre Uma Ne Baselaia ngöne la nöjei götrane gaa ajan. Kola xötrethenge la trepene meköti ka qaja ka hape, ame la itre ka tru hnei mo, tre troa xatuane la itre ka tha tru ewekën. (E jë la 2 Korinito 8:13-15.) Nemene hë la thangane lai? Nyimutre la itre Uma Ne Baselaia ka mingöming hna xup thatraqane la itre ekalesia ka thatreine troa nyithupene Uma Ne Baselaia.

11. Nemene la hna qaja hnene la itre trejin göne la Uma Ne Baselaia i angatr ka hnyipixe, nge nemene la hna aciane the së?

¹¹ Önine la itre trejine ne la ketre ekalesia e Costa Rica ka hape: “Ame la eahun a cile qëmekene la Uma Ne Baselaia, kösë eahuni a pu! Thatreine kö huni troa jelenyipicin. Eitre hi lao drai ne xupe ej, nge hna afenesine hnyawa! Hna eatrëne lai hnene la ixatua i Iehova, me itre hna amekötine hnene la organizasio i Nyidrë, memine la ixatua qaathene la itre trejin. Ketre ahnahna ka tru la hnë hmi celë, ketre etë mo, ewekë ka tru alamekene qaathei Iehova. Tru la madrine hun.” Tru la madrine së troa drenge la itre trejine a olene koi Iehova pine la aqane nyipiewekë angatre hnei Nyidrë. Ketre, tru la madrine së laka, ijije kowe la itre trejin asë e cailo fen troa hetrenyi la sipu Uma Ne Baselaia i angatr. Mama hnyawa hi ka hape, Iehova a amanathithine la huliwa ne xupi Uma Ne Baselaia, ke, ame ju fe kö la kola ase xup, kola elë nyimenyime la etrune la itre atr ka sine la itre icasikeu göi troa atre Iehova hnyawa.—Salamo 127:1.

12. Nemene la nyine tro sa kuca matre ixatua xupi Uma Ne Baselaia?

 ¹² Nemene la nyine tro sa kuca matre ixatua xupi Uma Ne Baselaia? Ijije tro sa hane saen matre troa hane ixatua ngöne la huliwa cili. Ketre, ijiji së asë hi troa hamë ahnahna matre troa ixatua nyithupene la itre Uma Ne Baselaia. E tro asë hi sa ce iwanakoimëne la huliwa cili, tro hë së lai a madrine qa ngöne la hna ham, nge ame la ka sisitria, easa atrunyi Iehova. Ketre, easa xötrethenge la tulu ne la itre hlue i Akötresie ekö, itre ka hetre hni ne ajane troa ixatua xupe la itre hnë hmi angatr.—Esodo 25:2; 2 Korinito 9:7.

13, 14. Nemene la itre trepene meköti Tusi Hmitrötr nyine trongëne göi nyidrawa Uma Ne Baselaia?

¹³ Iehova la Akötresie ka pë ethan, nge ka hmitrötr. Nge Nyidrëti la Akötresie ka kuca amekötine me alolone la itre ewekë. Celë hi kepine matre nyipi ewekë tro sa nyidrawane la Uma Ne Baselaia, nge tha tro kö a hetre ka azikozikon. (E jë la 1 Korinito 14:33, 40.) Ketre, maine easa ajane tro sa pë ethan me hmitrötr tui Iehova, tha tro hmekuje kö a pë ethane la aqane nyihlue i Iehova së, me mekuna së me aqane ujë së, ngo loi e tro mina fe sa nyidrawane la ngönetrei së.—Hna Amamane 19:8.

¹⁴ E tro sa nyidrawane la Uma Ne Baselaia, me kuca alolone ej, tro lai a hetre aja së troa hëne la itre atr kowe la itre hna icasikeu. Tro fe la itre atr a öhne laka, easa trongëne la hne së hna cainöjën göne la fene ka hnyipixe ka pë ethan. Nge tro fe angatre a öhne ka hape, easa nyihluene la Akötresie ka hmitrötr, nge ka pë ethan, nge ka troa kuca matre paradraiso ka mingöming la ihnadro celë.—Isaia 6:1-3; Hna Amamane 11:18.

15, 16. (a) Pine nemene matre tha ka hmaloi kö troa nyidrawane la Uma Ne Baselaia? Pine nemene matre loi e tro sa nyidrawane ej? (b) Nemene la aqane troa eköthe hnyawa la aqane troa nyidrawane ej, nge nemene la manathith ka eje the së isa ala cas?

¹⁵ Nyimu aqane waiewekë ne la itre atr göi pë ethan. Pine nemen? Pine la isa aqane hetru angatr me ini angatr. Ame itre xan, hnei angatre hna mele ngöne la itre götran gaa dro, me mele ngöne la itre götrane gaa trëtr me gaa so, nge tha hna kuca hnyawane kö la itre gojeny. Ame pena itre xan, tha tru kö la tim, me sop  ngöne la nöje i angatr. Mele ju hë së ngöne la ketre götran, nge isapengöne ju hë la aqane waiewekë ne la itre atr göi troa pë ethan, ngo loi e tro sa nyidrawane la Uma Ne Baselaia me kuca alolone ej. Götrane lai hnë tro sa atrunyi Iehova.—Deuteronomi 23:14.

¹⁶ Maine easa ajane troa pë ethan la Uma Ne Baselaia, loi e troa eköthe hnyawa la itre nyine kuca. Loi e tro la itre qatre thup a kuca la ketre porogaram thatraqane la ekalesia, matre xecie koi angatre ka hape, hetrenyi pala hi la itre ewekë ka ijije (tune la itre produits nyine köle uma, me burum me itre xane ju kö). Tro fe la itre qatre thup a eköthe la itre huliwa nyine kuca. Ame itre xa nyine nyidrawan, tre, troa kuca e thupene icasikeu, ngo ame itre xan, itre xa ijine hi. Manathithi ka tru koi së asë troa ce nyidrawane la Uma Ne Baselaia!

17, 18. (a) Nemene la ini hne së hna xome qa ngöne la aqane nyihnyawane ekö la ēnē hnene la itre hlue i Iehova? (b) Pine nemene matre loi e tro sa nyihnyawane la Uma Ne Baselaia së?

¹⁷ Loi e tro sa wange hnyawa matre tro pala hi a kuca alolone la itre hnepe engazone ka mama ngöne la Uma Ne Baselaia. Celë hi hna kuca hnene la itre hlue i Iehova ekö. Ame ngöne la ijine musi Ioasa Joxu ne Iudra, hnene la nöje hna hamë ahnahna kowe la ēnē. Hnene la joxu hna upe la itretre huje troa xome la manie cili troa nyihnyawane la ēnē, ene lo itre hnepe engazone ej ka mama. (2 Ite Joxu 12:4, 5) Traqa koi 200 lao macatre thupene lai, hnei Iosea Joxu hna xome la itre ahnahna qa hnine la ēnē göi troa nyithupene la itre nyine nyihnyawan.—E jë la 2 Aqane lapa ite Joxu 34:9-11.

¹⁸ Hnene la itre xa Komite Ne Filial hna öhne ka hape, tha majemine kö la itre atrene la nöje i angatr nyihnyawane la itre uma i angatr me itre ewekë i angatr. Maine jë hnene laka, thatreine kö. Maine pena tha ijije kö la manie i angatre troa nyithupene la itre nyine nyihnyawan. Ngo maine tha canga nyihnyawane kö së la Uma Ne Baselaia, tro hë lai a mama kowe la itre atr la itre engazon ej, nge kösë tha lolo hë e troa goeën. Ame e cili, tro ha sihngödri koi angatre la pengöi Iehova. Ngo e tro sa kuca asë la hne së hna atreine matre troa nyihnyawane la Uma Ne Baselaia së, easë lai a atrunyi Iehova, nge tha luzi kö la itre ahnahna qaathene la itre trejin.

19. Nemene la nyine tro epuni a kuca matre troa amamane la metrötre i epun kowe la hnë atrunyi Iehova?

¹⁹ Ame la Uma Ne Baselaia, tre ketre iuma nyine mo i Iehova. Tha ewekë i ketre atr kö maine ketre ekalesia pena. Ame ngöne la kola ce wange la tane mekune celë, tro la itre trepene meköti ne la Tusi Hmitrötr a xatua së troa hetrenyi la nyipi aqane waiewekë göne la itre hnë hmi së. Pine la metrötre së koi Iehova, easa metrötrëne la itre icasikeu së me itre Uma Ne Baselaia. Tru la madrine së troa hamë ahnahna göi troa ixatua xupe la itre xa Uma Ne Baselaia, me catre nyihnyawa, me nyidrawane itre ej. Tui Iesu, catre pi së amamane la trenge aja së me metrötre së kowe la itre hnë tro sa atrunyi Iehova.—Ioane 2:17.