1, 2. (a) Guna, Dirava ena hesiai taudia be edena bamona tomadiho gabudia idia gaukaralaia? (b) Ierusalema ai ia noho dubu helagana be Iesu ese edena bamona ia laloa? (c) Inai stadi ai dahaka do ita herevalaia?

GUNA, Dirava ena hesiai taudia be mai edia tomadiho gabudia. Hegeregere, Abela be Dirava dekenai boubou ia henia totona, pata ta ia karaia. (Gen. 4:3, 4) Noa, Aberahamo, Isako, Iakobo, bona Mose be pata idia haginia danu. (Gen. 8:20; 12:7; 26:25; 35:1; Eso. 17:15) Iehova ena hereva hegeregerena, Israela taudia ese palai dubu helagana idia haginia. (Eso. 25:8) Gabeai, dubu helaga idia haginia, Iehova idia tomadiho henia totona. (1 Kin. 8:27, 29) Iuda taudia be Babulonia amo idia giroa lou murinai, nega ibounai sinagoga dekenai idia hebou. (Mar. 6:2; Ioa. 18:20; Kara 15:21) Keristani ginigunadia be kongrigeisen taudia ta ta edia ruma ai idia hebou. (Kara 12:12; 1 Kor. 16:19) Hari, tanobada ibounai ai Iehova ena taunimanima be Baibel amo diba idia abia bona Ia idia tomadiho henia totona, Kingdom Hall tausen momo ai idia hebou.

² Iesu be Ierusalema dekenai Iehova ena dubu helaga ia matauraia bada. Unai dainai iena hahediba taudia ese salamo  torea tauna ena hereva idia laloatao: “Emu ruma lau ura henia bada, egu lalona dekenai ia be lahi bamona.” (Sal. 69:9; Ioa. 2:17) Guna Ierusalema ai ia noho dubu helagana idia gwauraia “[Iehova] ena Dubu Helaga,” to hari ita gwau Kingdom Hall. (2 Siv. 5:13; 33:4) Danu, Baibel ai hakaua herevadia ese ita ia durua iseda tomadiho gabudia ita matauraia bona dala maorona ita badinaia totona. Inai stadi ai Baibel ena hakaua herevadia do ita herevalaia. Unai ese ita do ia durua Kingdom Hall ai ita noho neganai edena bamona karadia do ita hahedinaraia, bona moni amo ita durua bona ita hanamoa totona. *

3-5. Kingdom Hall ai dahaka ita karaia? Bona unuseniai ita karaia hebou be edena bamona ita laloa?

³ Kingdom Hall be Iehova tomadiho henia gabuna. Unuseniai wiki ta ta ai Iehova be iena hereva amo ita ia hadibaia. Danu mai anina bada hagoadaia herevadia bona hakaua herevadia be iena orea amo ita abia. (Mat. 24:45) Iehova bona iena Natuna ese ita ibounai idia boiria dainai, Keristani hebou dekenai ita lao. Hanaihanai “Iehova ena pata” ai ita aniani ese ia hahedinaraia, edia boiboi herevana ita laloa bada.—1 Kor. 10:21.

⁴ Iehova dekenai ia tomadiho henia karana bona ta ta hagoadaia karana be mai anina bada. Unai dainai aposetolo Paulo ia gwau iseda hebou lao henia karana do ita rakatania lasi. (Heberu 10:24, 25 duahia.) Anina lasi gaudia dainai hebou ita reaia neganai, ita hahedinaraia ita be Iehova ita matauraia lasi. Bema hebou totona ita hegaegae bona hebou ai ita haere, bona tok ita henia, ita hahedinaraia Iehova bona ia henia gaudia ita laloa bada.—Sal. 22:22.

⁵ Namona be iseda kara amo ita hahedinaraia Kingdom Hall bona tomadiho karadia ibounai ita matauraia. Ita ura iseda kara amo Iehova ena ladana ita hanamoa, badina ena ladana be Kingdom Hall ena saini ai ia hedinarai.—1 King Taudia 8:17 sekea.

6. Haida ese iseda Kingdom Hall totona dahaka idia gwau? (Laulau ginigunana herevalaia.)

⁶ Iseda tomadiho gabudia ita matauraia karana be murimuri taudia ese idia itaia danu. Hegeregere, Turkey ai tau ta ia gwau: “Lau itaia Kingdom Hall ia goeva bona gau ibounai umui karaia namonamo karana lau itaia neganai, lau hoa. Unuseniai taunimanima be dabua namodia idia atoa, idia moale, bona lau idia hanamoa. Unai kara dekenai lau moale bada.” Unai nega amo unai tauna be hebou ia reaia lasi, bena gabeai ia bapatiso. Indonesia ena siti ta ai, kongrigeisen ta ese gavamani taudia haida bona neiba taudia idia boiria edia Kingdom Hall idia itaia totona, unai dina murinai Kingdom Hall idia hahelagaia. Taoni naria tauna ia mai danu. Kingdom Hall idia haginia dalana, idia gaukaralaia dalana, bona uma gabu hairaina ia moalelaia. Ia gwau: “Unai hall goevana ese emui abidadama korikorina ia hahedinaraia.”

7, 8. Keristani heboudia idia lao taudia be dahaka idia laloatao be namo?

⁷ Iseda dabua bona toana ia namo neganai, ita hahedinaraia hebou dekenai ita ia boiria Diravana ita matauraia. Hebou ai iseda hereva o kara ita biagua be namo. Hegeregere helai gabudia ai ita helai bona hereva ita kamonai namonamo. Iehova ia ura ita bona ita boiria taudia ese Kingdom  Hall ai ita karaia hebou ita moalelaia. To, namo lasi hebou matauraia lasi karadia ita hahedinaraia. Hebou negadiai iseda dabua ena toana ia namo, bona namo lasi teks mesij ita siaia kava, ita herevahereva, bona ita aniani o inuinu. Namona be tama sina ese edia natudia idia hadibaia Kingdom Hall be gadara gabuna lasi.—Had. 3:1.

⁸ Hoihoi taudia ese Dirava ena dubu be hoihoi gabuna ai idia halaoa dainai, Iesu ia badu bona edia kohu ia negedia raka-lasi. (Ioa. 2:13-17) Iseda Kingdom Hall danu be tomadiho goeva bona Baibel amo diba ita abia gabuna. Unai dainai Kingdom Hall ai bisinesi do ita karaia lasi o herevalaia lasi.—Nehemia 13:7, 8 sekea.

9, 10. (a) Kingdom Hall haginia gaukarana be edena dala ai idia durua? Bona dahaka ia vara? (b) Moni dalanai idia hegeregere lasi kongrigeisen momo be dahaka heduru idia abia?

⁹ Iehova ena orea durua totona ita henia kontribusen amo Kingdom Hall namodia momo idia haginia. Idia ese Kingdom Hall ena palani idia karaia, ruma idia haginia bona hanamoa gaukara idia karaia. Unai volantia taudia be pei idia abia lasi. Unai ese dahaka namo ia havaraia? November 1, 1999 amo, tanobada hegegemadai ai Kingdom Hall ibounai 28,000 mai kahana idia haginia. Anina be lagani 15 lalonai, dina ta ta ai Kingdom Hall matamatadia faiv idia haginia.

¹⁰ Iehova ena orea ese dala idia karaia Kingdom Hall idia haginia gabudia dekenai heduru idia henia totona. Unai be Baibel ena hakaua herevana hegeregerena, tadikaka ese ogogami tanodia ai idia noho tadikaka idia durua, unai amo ita ibounai ‘do ita hegeregere.’ (2 Korinto 8:13-15 duahia.) Unai bamona idia karaia dainai, kongrigeisen ibounai totona Kingdom Hall namodia idia haginia, unai amo moni dalanai idia hegeregere lasi kongrigeisen momo idia durua.

11. Tadikaka haida be edia Kingdom Hall matamata totona dahaka idia gwau? Bona emu hemami be edena bamona?

¹¹ Costa Rica ai kongrigeisen ta ese heduru idia abia dalana be revareva ai idia torea, idia gwau: “Kingdom Hall vairanai ai gini neganai, toana be nihi ta bamona! Unai be hoa gauna. Badina dina eit lalonai emai Kingdom Hall idia haginia. Iehova ese unai haginia gaukarana ia hanamoa, bona iseda tadikaka edia heduru dainai, inai Kingdom Hall ia gini. Inai tomadiho gabuna be harihari gauna, Iehova ese ai dekenai ia henia. Ai moale bada herea.” Oibe, Kingdom Hall totona unai bamona hanamoa herevadia oi kamonai neganai, oi moale, a? Bona ita diba tanobada ibounai ai iseda tadikaka be unai bamona sivaraidia dainai idia moale  neganai, unai ese ita ia hamoalea, ani? Kingdom Hall matamata idia haginia murinai, kudou-maoro taudia momo idia mai bona idia ura iseda lalokau Havaraia Tauna idia dibaia, unai ese ia hahedinaraia Iehova ese unai gaukara ia hanamoa.—Sal. 127:1.

12. Edena dala ai Kingdom Hall haginia gaukarana oi durua diba?

¹² Tadikaka taihu momo be Kingdom Hall haginia gaukarana idia durua dainai idia moale. Ena be Kingdom Hall haginia gaukarana ita karaia o lasi, to iseda kontribusen amo unai gaukara ita durua be hahenamo badana. Baibel negadiai, taunimanima be edia kudouna ai idia laloa hegeregerena tomadiho goevana idia durua, hari danu unai bamona ita karaia, unai amo Iehova ena ladana ita hanamoa.—Eso. 25:2; 2 Kor. 9:7.

13, 14. Iseda Kingdom Hall ia goeva totona, dahaka Baibel hakaua herevana ita badinaia be namo?

¹³ Kingdom Hall matamata idia haginia murinai, hanaihanai ita hagoevaia be namo, unai amo ita hahedinaraia, gau ibounai ia karaia namonamo bona ita tomadiho henia Diravana ena kara ita tohotohoa. (1 Korinto 14:33, 40 duahia.) Baibel ese helaga bona goeva karana ia herevalaia. (Apok. 19:8) Unai dainai bema ita ura Iehova ese ita ia abia dae, namona be goeva karadia ita badinaia.

¹⁴ Bema goeva karadia ita badinaia, do ita ura kamonai taudia be iseda hebou dekenai ita boiria. Danu iseda Kingdom Hall ena toana ia namo dainai, ita harorolaia sivarai namona dekenai hereva namodia idia gwauraia diba. Do idia diba ita be helaga Diravana ita tomadiho henia bona ia  ese kahirakahira tanobada be paradaiso ai do ia halaoa.—Isa. 6:1-3; Apok. 11:18.

15, 16. (a) Dahaka dainai haida be Kingdom Hall hagoevaia gaukara idia laloa bada lasi? To dahaka dainai Kingdom Hall ia goeva noho be mai anina bada? (b) Kingdom Hall hagoevaia totona dahaka umui karaia be namo? Bona ita ta ta eda hahenamo be dahaka?

¹⁵ Taunimanima haida be goeva karana idia laloa bada, to ma haida be unai idia laloa lasi. Dahaka dainai? Reana edia noho mauri dalana dainai unai bamona idia laloa. Reana haida be kahu momo gabudia ai idia noho, o edia noho gabu ena dala be ia miro bona kopukopu be bada. Eiava edia noho gabu ai reana ranu bona sopu bamona gaudia be lasi. To, herevana iseda kara o noho gabuna be edena bamona, namona be iseda Kingdom Hall ita hagoevaia noho be gau badana, badina unai be Iehova tomadiho henia gabuna.—Deu. 23:14.

¹⁶ Bema ita ura eda Kingdom Hall ia goeva noho, hegaegae be gau badana. Elda taudia ese kongrigeisen totona sediual do idia karaia bona idia sekea bema sopu o unai bamona gaudia idia noho. Danu elda taudia ese gaukara do idia hegaegaelaia namonamo. Hebou idia ore negadiai, Kingdom Hall ena kaha haida ita hagoevaia be namo. Bona Kingdom Hall hagoevaia gaukarana be ita ibounai eda maduna.

17, 18. (a) Edena Baibel sivarai haida ese idia hahedinaraia Kingdom Hall ita hanamoa be namo? (b) Dahaka dainai Kingdom Hall ita hanamoa be namo?

¹⁷ Iehova ena hesiai taudia idia gaukara goada edia tomadiho gabudia idia hanamoa totona. Iuda ena King Iehoasa be hahelaga taudia ia hagania Iehova ena ruma totona idia henia moni be “dubu ia dika gabudia hanamoa totona do idia gaukaralaia.” (2 Kin. 12:4, 5) Lagani 200 mai kahana murinai, King Iosaia danu be dubu ena moni ia gaukaralaia dubu ia hanamoa totona.—2 Sivarai 34:9-11 duahia.

¹⁸ Brens haida edia ripoti ese ia hahedinaraia, tano haida dekenai taunimanima be ruma o unai bamona gaudia hanamoa gaukarana idia laloa bada lasi. Reana ena badina be unai tano dekenai haida sibona be mai edia diba, eiava kohu be lasi unai hanamoa gaukara karaia totona. To, bema Kingdom Hall hanamoa gaukara ita karaia lasi, do ia dika haraga diba, bona taunimanima ese ita harorolaia sivarai namona do idia dadaraia. To, bema kongrigeisen taudia idia gaukara hebou bona Kingdom Hall idia hanamoa, unai ese Iehova ia hanamoa bona tadikaka taihu ese idia henia kontribusen do idia gaukaralaia kava lasi.

19. Iseda Kingdom Hall totona oi ura dahaka oi karaia?

¹⁹ Kingdom Hall be Iehova dekenai idia hahelagaia rumana. Unai dainai herevana tau ta o kongrigeisen ta be gavamani amo taitol ia abia, to ita gwau diba Kingdom Hall be Iehova ena ruma. Baibel ena hakaua herevadia ese idia hahedinaraia, Kingdom Hall be Iehova tomadiho henia totona ita gaukaralaia neganai, namona be ita gaukara hebou. Unai dainai Kongrigeisen taudia ta ta ese tomadiho gabuna idia matauraia be namo, Kingdom Hall matamata idia haginia totona kontribusen idia henia, bona edia nega bona goada idia henia edia Kingdom Hall idia hagoevaia bona hanamoa totona. Unai dainai heduru ita henia neganai, ita hahedinaraia Iehova ena tomadiho goeva gabuna ita laloa bada, Iesu ia karaia bamona.—Ioa. 2:17.