1, 2. (a) Ndungata cia Jehova cia tene ciathathayagĩria Jehova kũ? (b) Jesu onaga atĩa hekarũ ya Ngai ĩrĩa yarĩ Jerusalemu? (c) Muoroto wa gĩcunjĩ gĩkĩ nĩ ũrĩkũ?

KUUMA o mahinda-inĩ ma tene ndungata cia Jehova nĩ ikoretwo na kũndũ gwa kũmũthathayĩria. No kũhoteke Habili nĩ aakire kĩgongona rĩrĩa aarutĩire Ngai mahaki. (Kĩam. 4:3, 4) Nuhu, Iburahimu, Isaaka, Jakubu, na Musa nĩ maakire magongona. (Kĩam. 8:20; 12:7; 26:25; 35:1; Tham. 17:15) Jehova nĩ eerire Aisiraeli maake hema ya gũtũnganwo. (Tham. 25:8) Thutha-inĩ, nĩ aamerire make hekarũ. (1 Ath. 8:27, 29) Ayahudi maacoka kuuma ithamĩrio Babuloni, maacemanagia thĩinĩ wa thunagogi nĩguo mathathaiye Jehova. (Mar. 6:2; Joh. 18:20; Atũm. 15:21) Nao Akristiano a tene maacemanagia mĩciĩ ya Akristiano arĩa angĩ. (Atũm. 12:12; 1 Kor. 16:19) Mahinda-inĩ maya, andũ a Jehova macemanagia thĩinĩ wa Nyũmba cia Ũthamaki ngiri nyingĩ iria ciakĩtwo kũndũ guothe thĩinĩ wa thĩ, nĩguo mathathaiye na merute ũhoro wa Jehova.

² Jesu nĩ aatĩĩte mũno hekarũ ya Jehova ĩrĩa yarĩ Jerusalemu. Wendo wake harĩ hekarũ ĩyo nĩ waririkanirie arutwo ake ciugo ici cia mwandĩki wa thaburi: “Nĩ kĩyo kĩrĩa ndĩ nakĩo kĩa nyũmba yaku kĩndĩĩte.” (Thab. 69:9; Joh. 2:17) Nyũmba ya Ũthamaki ndĩngĩĩtwo “nyũmba ya Jehova” na njĩra ta ĩrĩa hekarũ ĩrĩa yarĩ Jerusalemu yeetagwo. (2 Maũ. 5:13; 33:4) O na kũrĩ ũguo, Bibilia nĩ ĩkoragwo na mootaro mangĩtũteithia kuona ũrĩa nyũmba iria  tũthathayagĩria mahinda-inĩ maya ciagĩrĩirũo nĩ kũhũthĩrũo na kũheo gĩtĩo. Muoroto wa gĩcunjĩ gĩkĩ nĩ gũthuthuria mamwe ma mootaro macio nĩguo matũteithie kũmenya mĩthiĩre ĩrĩa twagĩrĩire gũkorũo nayo rĩrĩa twĩ thĩinĩ wa Nyũmba ciitũ cia Ũthamaki, ũrĩa twagĩrĩirũo nĩ gũciramata, na ũrĩa tũngĩteithĩrĩria na mĩhothi itũ nĩ ũndũ wa gwaka na gũciramata. *

3-5. Muoroto wa Nyũmba ya Ũthamaki nĩ ũrĩkũ, na ũndũ ũcio wagĩrĩirũo kũhutia atĩa ũrĩa tuonaga mĩcemanio itũ?

³ Kaingĩ andũ a Jehova macemanagia thĩinĩ wa Nyũmba ya Ũthamaki nĩguo mathathaiye Jehova. Mĩcemanio ya Gĩkristiano ya o kiumia thĩinĩ wa Nyũmba ya Ũthamaki nĩ ĩmwe ya iheo iria Jehova atũheaga cia gũtwĩkĩra hinya kĩĩroho. Thĩinĩ wa mĩcemanio itũ nĩ tũheagwo irio cia kĩĩroho na tũkaheo ũtongoria kũgerera ithondeka rĩake. Arĩa othe mokaga mĩcemanio, makoragwo manyitĩtwo ũgeni nĩ Jehova na Mũriũ wake. Tondũ nĩ gĩtĩo kĩnene kũnyitwo ũgeni o kiumia nĩ Jehova na Mũriũ wake nĩguo tũrĩĩre ‘metha-inĩ ya Jehova,’ tũtiagĩrĩirũo nĩ kũhũthia mĩcemanio ĩyo o na hanini.—1 Kor. 10:21.

⁴ Jehova onaga mahinda macio ma kũmũthathaiya na gwĩkĩrana ngoro marĩ ma bata mũno ũũ atĩ eerire mũtũmwo Paulo aandĩkĩre Akristiano matikanatige kũũnganaga hamwe. (Thoma Ahibirania 10:24, 25.) Hihi no tũkorũo tũkĩonania gĩtĩo harĩ Jehova angĩkorũo nĩ tũrĩtĩraga mĩcemanio nĩ ũndũ wa itũmi itarĩ na kũrĩa irĩ? Twehaarĩria wega na tũgakorũo na itemi mĩcemanio-inĩ ĩyo nĩ tũrĩonanagia ũrĩa tũtĩĩte Jehova na maũndũ marĩa atũheaga.—Thab. 22:22.

⁵ Twagĩrĩirũo kuonania gĩtĩo harĩ Nyũmba ya Ũthamaki na maũndũ ma kĩĩroho marĩa mekagĩrũo thĩinĩ wayo. Ma nĩ atĩ, mwerekera ũrĩa tũkoragwo naguo harĩ Nyũmba ya Ũthamaki na maũndũ marĩa mekagĩrũo thĩinĩ wayo nĩ wonanagia ũrĩa tuonaga rĩĩtwa rĩa Ngai rĩrĩa kaingĩ rĩonekaga ibaũ-inĩ cia kuonanĩrĩria Nyũmba cia Ũthamaki.—Ringithania 1 Athamaki 8:17.

6. Andũ amwe moigĩte atĩa igũrũ rĩgiĩ Nyũmba ciitũ cia Ũthamaki na igũrũ rĩgiĩ arĩa macemanagia thĩinĩ wa cio? (Rora mbica kĩambĩrĩria-inĩ gĩa gĩcunjĩ gĩkĩ.)

⁶ Andũ arĩa matarĩ Aira a Jehova kaingĩ nĩ monaga ũrĩa tũkoragwo tũtĩĩte Nyũmba citũ cia Ũthamaki. Kwa ngerekano mũthuri ũmwe bũrũri-inĩ wa Turkey oigire ũũ: “Ũtheru na mũbango ũrĩa ndonire thĩinĩ wa Nyũmba ya Ũthamaki nĩ wangenirie mũno. Andũ meehumbĩte wega mũno, maarĩ acanjamũku, na nĩ maangeithagia marĩ na gĩkeno mũno. Ũndũ ũcio nĩ wangucĩrĩirie mũno.” Mũthuri ũcio nĩ aambĩrĩirie gũthiaga mĩcemanio ategũtĩrĩria na thutha wa kahinda kanini akĩbatithio. Thĩinĩ wa taũni ĩmwe bũrũri-inĩ wa Indonesia, ariũ a Ithe witũ nĩ maanyitire ũgeni andũ a itũũra, mayor wa taũni ĩyo, na anene angĩ a thirikari moke mone Nyũmba yao njerũ ya Ũthamaki. Mayor nĩ aakenirio mũno nĩ ũrĩa nyũmba ĩyo yakĩtwo wega na ningĩ nĩ ũndũ wa ũrĩa kũu nja gwathondeketwo wega. Oigire ũũ: “Ũtheru wa nyũmba ĩno nĩ ũronania kũna ũrĩa wĩtĩkio wanyu ũtariĩ.”

7, 8. Nĩ maũndũ marĩkũ ma bata arĩa mokaga mĩcemanio-inĩ ya Gĩkristiano magĩrĩirũo nĩ kũririkana?

⁷ Mwĩhumbĩre na mĩtugo itũ nĩ yagĩrĩirũo nĩ kuonania gĩtĩo harĩ Ngai ũrĩa ũkoragwo atũnyitĩte ũgeni mĩcemanio-inĩ ya Gĩkristiano. Nĩ ũndũ ũcio nĩ tũkũbatara gwĩthema gũkĩria njano. O na gũtuĩka ti wega kũiga mawatho maingĩ megiĩ ũrĩa twagĩrĩirũo nĩ gũikara na kwĩhumba rĩrĩa tũrĩ mĩcemanio-inĩ itũ, tũtiagĩrĩirũo nĩ gũikara kana kwĩhumba  ta ũrĩa tũngĩka rĩrĩa tũrĩ gwitũ mũciĩ. Jehova endaga ndungata ciake na andũ angĩ arĩa mokaga mĩcemanio-inĩ itũ maigue maiganĩire. O na kũrĩ ũguo, tũtingĩenda kwagĩra mĩcemanio itũ gĩtĩo na njĩra ya kwĩhumbania o ũguo, gũtũmanĩra ndũmĩrĩri, kwaria hĩndĩ ĩrĩa mĩcemanio ĩrathiĩ na mbere, kũrĩa na kũnyua, na maũndũ mangĩ ta macio. Aciari nĩ magĩrĩirũo nĩ gũteithia ciana ciao itaũkĩrũo atĩ itiagĩrĩirũo nĩ gũteng’era kana gũthakĩra Nyũmba-inĩ ya Ũthamaki.—Koh. 3:1.

⁸ Jesu nĩ aarakarire mũno na akĩingata arĩa maahũragĩra biacara hekarũ-inĩ ya Ngai. (Joh. 2:13-17) Nyũmba citũ cia Ũthamaki o na cio nĩ kũndũ gwa gwĩkĩra ũthathaiya mũtheru na kwĩrutĩra maũndũ ma kĩĩroho. Nĩ ũndũ ũcio maũndũ o mothe ma biacara marĩa matakonainie na maũndũ ma kĩĩroho matiagĩrĩire gwĩkĩrũo Nyũmba-inĩ ya Ũthamaki.—Ringithania Nehemia 13:7, 8.

9, 10. (a) Ithondeka rĩa Jehova rĩĩkaga atĩa nĩguo ciũngano igĩe na Nyũmba cia Ũthamaki, na moimĩrĩro makoretwo marĩ marĩkũ? (b) Nĩ mũbango ũrĩkũ ũteithĩtie mũno ciũngano iria itakoragwo na ũhoti wa kĩĩmbeca wa kwĩyakĩra Nyũmba ya Ũthamaki?

⁹ Ithondeka rĩa Jehova nĩ rĩĩrutanagĩria mũno gũteithĩrĩria ciũngano igĩe na Nyũmba njega cia Ũthamaki. Wĩra wa gũcora nyũmba icio, gwaka, na gũcicokereria ũrutagwo nĩ erutĩri matararĩhwo. Moimĩrĩro makoretwo marĩ marĩkũ? Kuuma Novemba 1, 1999, gwakĩtwo Nyũmba cia Ũthamaki makĩria ma 28,000 thĩinĩ wa thĩ yothe. Ũguo nĩ kuuga atĩ kwa ihinda rĩa mĩaka 15 mĩhĩtũku, gũkoretwo gũgĩakwo kĩndũ Nyũmba ithano cia Ũthamaki o mũthenya.

¹⁰ Ithondeka rĩa Jehova nĩ rĩrekĩra kĩyo mũno kũnyita mbaru wĩra wa gwaka Nyũmba cia Ũthamaki harĩa hothe irabatarania. Mũbango ũcio wa wendo ũkoragwo wĩhocetie harĩ ũtaaro wa Kĩĩmaandĩko wa atĩ arĩa maingĩhĩirũo nĩ indo mateithĩrĩrie arĩa manyihĩirũo nĩ getha “maũndũ maigananio.” (Thoma 2  Akorintho 8:13-15.) Nĩ ũndũ ũcio, ciũngano iria itarĩ na ũhoti wa kĩĩmbeca wa kwĩyakĩra Nyũmba cia Ũthamaki nĩ iteithirĩirio gwaka.

11. Ariũ a Ithe witũ amwe moigĩte atĩa ũhoro wĩgiĩ Nyũmba yao njerũ ya Ũthamaki, na ũndũ ũcio ũratũma ũigue atĩa?

¹¹ Kĩũngano kĩmwe bũrũri-inĩ wa Costa Rica kĩrĩa kĩagunĩkire nĩ mũbango ũcio kĩandĩkire ũũ: “Rĩrĩa twerorera Nyũmba itũ ya Ũthamaki tuonaga ta arĩ kũrota tũrarota! Tũtiĩtĩkagia. Twarĩkirie gwaka Nyũmba itũ ya Ũthamaki na thikũ inyanya tu! Ũndũ ũcio wahotekire nĩ ũndũ wa irathimo cia Jehova, mĩbango ĩrĩa yekirũo nĩ ithondeka rĩake, na kĩyo kĩa aarĩ na ariũ a Ithe witũ. Hatarĩ nganja, nyũmba ĩno nĩ kĩheo kĩa goro mũno tũhetwo nĩ Jehova. Gĩkeno kĩrĩa tũrĩ nakĩo nĩ ũndũ wayo gĩtingĩgereka.” Na githĩ ti gĩkeno kĩnene kũigua ciugo ta icio cia gũcokia ngatho kuuma kũrĩ arĩa makĩirũo Nyũmba cia  Ũthamaki na kũmenya atĩ aarĩ na ariũ a Ithe witũ kuuma kũndũ kũngĩ kũingĩ thĩinĩ wa thĩ yothe marĩ na gĩkeno o ta kĩu? Hatarĩ nganja Jehova nĩ arathimaga wĩra ũcio tondũ kahinda kanini thutha wa nyũmba icio gwakwo andũ aingĩ nĩ maambagĩrĩria gũka mĩcemanio nĩguo merute ũhoro wa Mũũmbi witũ ũrĩ wendo.—Thab. 127:1.

12. Ũngĩnyita itemi atĩa harĩ wĩra wa gwaka Nyũmba cia Ũthamaki?

¹² Aarĩ na ariũ a Ithe witũ aingĩ nĩ magĩte na gĩkeno kĩnene nĩ ũndũ wa gũkorũo na itemi harĩ gwaka Nyũmba cia Ũthamaki. O na angĩkorũo no tũhote kana tũtingĩhota gũthiĩ gũteithĩrĩria rĩrĩa Nyũmba cia Ũthamaki iraakwo, ithuothe no tũhote kũnyita mbaru mũbango ũcio na njĩra ya kũruta mĩhothi itũ ya kwĩyendera. Nĩ ũndũ wa kĩyo kĩao harĩ ũthathaiya mũtheru, andũ a Jehova a tene nĩ maarutaga mĩhothi yao ya kwĩyendera nĩguo manyite mbaru wĩra wa gwaka kũndũ gwa gũthathayĩria. O na ithuĩ ũmũthĩ noguo twĩkaga nĩguo tũgoocithie Jehova.—Tham. 25:2; 2 Kor. 9:7.

13, 14. Nĩ motaaro marĩkũ ma Kĩĩmaandĩko monanagia atĩ nĩ twagĩrĩirũo kũiga Nyũmba citũ cia Ũthamaki ĩrĩ theru na irĩ na kĩhaarĩro?

¹³ Thutha wa Nyũmba ya Ũthamaki gwakwo, nĩ ĩkũbatara kũigwo ĩrĩ theru na ĩrĩ na kĩhaarĩro nĩguo yonanagie ngumo cia Ngai ũrĩa tũthathayagia tondũ nĩ Ngai wa mũbango. (Thoma 1 Akorintho 14:33, 40.) Bibilia yonanagia atĩ ũtheru wa kĩĩroho nĩ ũkonainie na ũtheru wa kĩĩmwĩrĩ. (Kũg. 19:8) Nĩ ũndũ ũcio, angĩkorũo andũ nĩ mekwenda gwĩtĩkĩrĩka nĩ Jehova, no mũhaka makoragwo marĩ atheru kĩĩmwĩrĩ.

¹⁴ Twaiga Nyũmba citũ cia Ũthamaki irĩ theru na irĩ na kĩhaarĩro, nĩ tũrĩiguaga wega tũkĩnyita andũ ũgeni moke mĩcemanio itũ  tũrĩ na ma biũ atĩ ũrĩa nyũmba citũ ĩtariĩ nĩ ũkũmateithia makĩria mone atĩ ũhoro mwega ũrĩa tũmahunjagĩria nĩ wa ma. Nĩ marĩonaga atĩ tũthathayagia Ngai mũtheru na ica ikuhĩ nĩ egũtheria thĩ ĩtuĩke paradiso.—Isa. 6:1-3; Kũg. 11:18.

15, 16. (a) Nĩkĩ no ũkorũo ũtarĩ ũndũ mũhũthũ kũiga Nyũmba ya Ũthamaki ĩrĩ theru, ĩndĩ gwĩka ũguo nĩ kwa bata nĩkĩ? (b) Kwanyu mũkoragwo na mũbango ũrĩkũ wa gũtheria Nyũmba ya Ũthamaki, na nĩ gĩtĩo kĩrĩkũ o mũndũ arĩ nakĩo?

¹⁵ No kũhoteke andũ amwe moe na ũritũ wĩra wa gũtheria gũkĩra arĩa angĩ, hihi nĩ ũndũ wa ũrĩa mareretwo. Andũ amwe maikaraga kũndũ kũrĩ rũkũngũ rũingĩ kana kũndũ kũrĩ barabara ikoragwo na gĩko na ndoro nyingĩ. Nao angĩ matikoragwo na maĩ ma kũigana kana thabuni wa kũigana. O ũrĩa wothe kũngĩkorũo kũrĩ, Nyũmba itũ ya Ũthamaki yagĩrĩirũo gũkorũo ĩrĩ kĩonereria kĩega ũhoro-inĩ wĩgiĩ ũtheru na kĩhaarĩro, tondũ ĩrũgamĩrĩire rĩĩtwa rĩa Jehova na nĩ nyũmba ya ũthathaiya mũtheru.—Gũcok. 23:14.

¹⁶ Ũtheru wa Nyũmba ya Ũthamaki ndwagĩrĩirũo kuoywo na itherũ. Kĩama kĩa athuri kĩagĩrĩirũo nĩ gũtigĩrĩra atĩ kũrĩ na mũtaratara wa gũtheria na kũrĩ na indo cia kũigana cia kũruta wĩra ũcio, nĩguo Nyũmba ya Ũthamaki ĩigagwo ĩrĩ njega. Tondũ mawĩra mamwe magĩrĩirũo nĩ kũrutwo thutha wa o mũcemanio na mangĩ no marutwo thutha wa ihinda, nĩ gũkũbatarania mũbango na ũrũgamĩrĩri mwega nĩguo gũtikagĩe wĩra ũgũtiganĩrio. Andũ othe thĩinĩ wa kĩũngano magĩrĩirũo kuona kĩrĩ gĩtĩo gũkorũo na itemi wĩra-inĩ wa kũiga Nyũmba ya Ũthamaki ĩrĩ theru.

17, 18. (a) Kũrĩ na mũthingi ũrĩkũ wa Kĩĩmaandĩko wa gũcokereria nyũmba iria tũthathayagĩria? (b) Nyũmba cia Ũthamaki ciagĩrĩirũo kũigwo irĩ njega nĩkĩ?

¹⁷ Ningĩ andũ a Jehova nĩ merutanagĩria mũno gũtigĩrĩra atĩ nyũmba iria mathathayagĩria nĩ iracokererio kũrĩa ingĩkorũo ithũkĩte. Mũthamaki Jehoashu wa Juda, nĩ eerire athĩnjĩri-Ngai mahũthĩre mĩhothi ĩrĩa yahothetwo nĩ ũndũ wa nyũmba ya Jehova, nĩguo ‘mamĩthondeke harĩa hothe harĩ hatharũku.’ (2 Ath. 12:4, 5) Makĩria ma mĩaka 200 thutha ũcio, nake Mũthamaki Josia nĩ aacokereirie hekarũ kũrĩa yatharũkĩte akĩhũthĩra mĩhothi ĩrĩa yahothetwo.—Thoma 2 Maũndũ ma Matukũ ma Tene 34:9-11.

¹⁸ Kamĩtĩ imwe cia wa wabici cia honge nĩ cionete atĩ mabũrũri-inĩ mao andũ matitindanagĩrĩra mũno na kũiga nyũmba iria maikaraga kana indo iria mahũthagĩra irĩ njega. No kũhoteke andũ aingĩ mabũrũri-inĩ macio matikoragwo na ũũgĩ o na kana indo iria ibataranagia harĩ kũruta wĩra ũcio. O na kũrĩ ũguo, tũngĩikara tũtegũcokereria Nyũmba ya Ũthamaki, no ĩthũke mũno na ũndũ ũcio ndũngĩrehe ngumo njega. Ĩndĩ andũ thĩinĩ wa kĩũngano mangĩĩrũtanĩria kũiga Nyũmba ya Ũthamaki ĩrĩ njega, ũndũ ũcio nĩ ũrehagĩra Jehova rũgooco na ũkahonokia mĩhothi.

19. Wee watua itua rĩrĩkũ igũrũ rĩgiĩ nyũmba iria tũthathayagĩria?

¹⁹ Tondũ Nyũmba ya Ũthamaki ĩkoragwo yamũrĩirũo Jehova-rĩ, tũtingiuga atĩ nĩ ya mũndũ kana kĩũngano kĩna o na angĩkorũo nĩguo taitũ ya mũgũnda ĩronania. O ta ũrĩa twarĩrĩria gĩcunjĩ-inĩ gĩkĩ, motaaro ma Bibilia nĩ marĩtũteithagia gũkorũo na mwerekera ũrĩa wagĩrĩire kwerekera nyũmba iria tũthathayagĩria Ngai. Tondũ nĩ tũtĩĩte Jehova, tuonanagia gĩtĩo harĩ mĩcemanio itũ o hamwe na Nyũmba ya Ũthamaki. Nĩ tũkenaga tũkĩruta mĩhothi nĩguo Nyũmba ingĩ nyingĩ cia Ũthamaki ciakwo na ningĩ nĩ twĩrutanagĩria gũcimenyerera na gũciga irĩ theru. O ta Jesu, nĩ tuonanagia kĩyo na gĩtĩo harĩ nyũmba iria tũthathayagĩria Jehova.—Joh. 2:17.