1, 2. (a) Gin kuonde mage mag lamo ma jotich Jehova ne tiyogo chon? (b) Yesu nokawo nade hekalu mar Nyasaye ma ne ni Jerusalem? (c) Gima duong’ momiyo oik sulani en ang’o?

CHAKRE chon, jotich Nyasaye osegabedo gi kuonde moyiedhi ma gilamoe Nyasaye. Nyaka bed ni Habil noloso kendo mar misango ka nogolo chiwo mare ne Nyasaye. (Chak. 4:3, 4) Noa, Ibrahim, Isaka, Jakobo, kod Musa noloso kuonde michiwoe misango. (Chak. 8:20; 12:7; 26:25; 35:1; Wuok 17:15) Jehova nochiko Jo-Israel mondo oger tabernakel. (Wuok 25:8) Bang’e, ne gigero hekalu kama ne ginyalo lamoe Jehova. (1 Ruo. 8:27, 29) Kane Jo-Yahudi osea e tuech Babilon ne gichokorega e sunagogi ma ok gibare. (Mar. 6:2; Joh. 18:20; Tich 15:21) Jokristo mokwongo to ne chokorega e ute Jokristo wetegi. (Tich 12:12; 1 Kor. 16:19) Kindegi oganda Jehova chokorega e Ute Romo alufe mathoth mondo opuonjgi kendo mondo gilam Jehova.

² Yesu nohero ahinya hekalu mar Jehova ma ne ni Jerusalem, ma omiyo jandik Injili moro owuoyo kuome kotiyo gi weche ma ne okor niya: “Hero tich me odi osechama.” (Zab. 69:9; Joh. 2:17) Onge Od Romo moro amora minyalo luong e yo makare chuth ni “od Jehova” kaka ne iluongo hekalu ma  ne ni Jerusalem. (2 Weche 5:13; 33:4) Kata kamano, Muma oting’o puonj ma konyowa ng’eyo kaka onego wati gi utewa mag lamo kendo kaka onego wachiwnegi luor. Gima duong’ momiyo oik sulani en ni mondo okonywa nono moko kuom puonjgo kod kaka ginyalo konyowa ng’eyo yo monego watimgo gik moko e Od Romo, kaka wanyalo konyo tij gerogi kuom golo chiwo, kod kaka wanyalo ritogi maber. *

3-5. Od Romo en kama itimogae ang’o, to wachno onego omi wabed gi paro mane e wi chokruoge mitimo kanyo?

³ Od Romo manie alworawa e kama wachokoregae ne lamo madier. Achiel kuom yore ma Jehova pidhowago gi chiemb chuny en kokalo kuom chokruogewa ma itimo juma ka juma e Od Romo. E chokruogego, ojiwowa kendo otayowa kotiyo gi riwruokne. Jogo duto ma biro e chokruoge, inyalo wachi ni Jehova gi Wuode e ma ogwelo. Kata obedo ni orwakwa mondo wachiem e “mesa mar Jehova,” wiwa ok onego owil gi wachno ma wachak nene ka gima tin.—1 Kor. 10:21.

⁴ Sama wachokore kendo wajiwore, Jehova neno chokruogwano kaka gima duong’. Mano e ma nomiyo notelo ne jaote Paulo mondo ojiwwa kik wabarenegi. (Som Jo-Hibrania 10:24, 25.) Sama wabare ne chokruogewa ma onge gimomiyo, be wabiro bedo joma nyiso Jehova luor? Wanyalo nyiso ni wahero Jehova kendo ni waduokone erokamano ne gik momiyowa kuom ikore kendo chiwo paro e chokruogewa.—Zab. 22:22.

⁵ Paro ma wan-go e wi Od Romo kod gik ma watimo e iye motudore gi lamo, onego onyis ni wachiwo luor makare ne Jehova. Donge en adier ni yo ma watimogo gik moko otudore ahinya gi kaka wakawo nying Nyasaye ma thothne wandikoga e sain-bod mar Od Romo?—Pim gi 1 Ruodhi 8:17.

6. Jomoko osewacho ang’o e wi Utewa mag Romo kod joma chokore kuno? (Ne picha manie chak sulani.)

⁶ Joma ok gin Joneno nenoga luor ma wachiwo ne kuonde ma wachokoree. Kuom ranyisi, ng’at moro manie e piny Turkey nowacho niya: “Ler kod yo mitimogo gik moko achana nomora ahinya kane adhi e Od Romo moro. Ji norwakore maber, ne gimor ahinya, kendo ne gimosa gi ilo. Mano ne omora ahinya.” Ng’atno nochako dhi e chokruoge ma ok obare kendo bang’e matin ne obatise. E taon moro man Indonesia, kanyakla moro nogero Od Romo manyien, kendo ka pok ne giwale ne gigwelo jotend sirkal manie gweng’gi kaachiel gi jirendegi mondo obi one Od Romono. Meya bende nobiro. Ne omor gi kaka nogere e rang’iny mamalo, kaka gik moko duto ne tiyo maber e iye, kod puoth maua ma ne ber nyowuoyo. Meyano nowacho kama: “Ler ma odni lergo nyiso yie maru gadier.”

7, 8. Ng’ato ang’ata ma biro e chokruoge mag Jokristo onego opar weche mage?

⁷ Luor ma wachiwo ne Nyasaye ma ogwelowa e chokruogewa mag Jokristo onego onere e timbewa, lewni ma warwako, kod yo ma wabidhorego. Mano oriwo timo gik moko e yo ma ok okalo tong’. Osefwenyore ni kata obedo ni jomoko kuomwa nyalo rido chik ahinya e  yo ma watimogo gik moko e chokruogewa, jomamoko to odwa kawo gik moko mayot ahinya. En adier ni Jehova dwaro ni jotichne kaachiel gi joma ogwel owinj ka gin thuolo e Od Romo. E wi mano, ok ber ka joma obiro e chokruogewa chocho jomoko nikech rwakruokgi, oro ote ka gitiyo gi simu, wuoyo sama chokruok dhi nyime, chiemo, madho gimoro, gi gik ma chalo kamago. Jonyuol onego opuonj nyithindgi ong’e ni Od Romo ok en kama ituge kata iringe.—Ekl. 3:1.

⁸ Kinde moro kane Yesu oneno joma ne timo ohala e hekalu mar Nyasaye, iye nowang’ ma oriembogi oko. (Joh. 2:13-17) Utewa mag Romo bende gin kuonde lamo madier kendo kuonde mipuonjoe ji wach Nyasaye. Kuom mano, ohala moro amora ma ok otudore gi wach Nyasaye ok onego otim e Od Romo.—Pim gi Nehemia 13:7, 8.

9, 10. (a) Ere kaka igerogoga Ute Romo manyien, to mano osekelo ber mane? (b) En chenro mane ma jaber ma osekonyo kanyakla ma onge gi pesa mar gero Ute Romo?

⁹ Riwruok mar oganda Jehova timo kinda ahinya mondo gibed gi Ute Romo mowinjore kendo mondo pesa oyudre migerogigo. Tij gorogi, gerogi, kendo urogi en tich mitimo gi owete gi nyimine mochiwore ma ok chul osara. Timo kamano osekonyo nade? Chakre Novemba tarik 1, higa mar 1999, oseger kuonde lamo manyien kendo mabeyo mokalo 28,000 ne kanyakla modhuro e piny mangima. Mano nyiso ni kuom higni 15 mosekalo, osebed kigero Ute Romo ma dirom abich pile ka pile.

¹⁰ Joneno timoga kinda ahinya mondo giriw lwedo tij gero Ute Romo kamoro amora ma gidwaroree. Chenro ma jaberni itimo kaluwore gi puonj ma yudore e Ndiko ma wacho ni joma nigi mogundho opong’ ne joma nigi manok “mondo eka romruok obedie.” (Som 2 Jo-Korintho 8:13-15.) Timo mano osemiyo oger kuonde lamo manyien kendo mabeyo ne kanyakla mathoth ma ne onge gi nyalo mar gero Ute Romo kendgi giwegi.

11. Kanyakla moro nowacho ang’o e wi Od Romogi manyien, to mano miyo iwinjo nade e chunyi?

¹¹ Kanyakla moro man e piny Costa Rica ma nogero Od Romo nikech chenroni nondiko weche ma luwogi: “Sama wachung’ e nyim Od Romo, chalnwa mana ka lek! Chalonwa mana hono moro. Od Romo ma jaberni ne oger motiek gi ndalo aboro kende! Mano ne nyalore mana nikech gueth mag Jehova, chenro ma jaber ma riwruokne notimo, kaachiel kony ma owete mamoko ne okonyowago. Kuom adier, karwa mar lamo en mich maber miwuoro ma  Jehova omiyowa. Wamor gi mor ma ok wanyal pimo.” Donge winjo kaka owete nyiso mor ma gin-go kuom yudo Od Romo manyien kendo ng’eyo ni owete alufe mathoth bende mor kamano e alwora mang’eny e piny mangima en gima mori bende? Mano en tij Jehova, nimar bang’ tieko gero Ute Romo, ji mathoth ma chunygi ni kare pong’ogiga ka gin gi gombo mar ng’eyo mathoth e wi Jachuechwa ma jahera.—Zab. 127:1.

12. Ere kaka ng’ato ka ng’ato nyalo riwo lwedo tij gero Ute Romo?

¹² Owete gi nyimine mathoth oseyudo mor mang’eny nikech ne gikonyo tij gero Od Romo. Bed ni wan gi nyalo mar konyo e tij gedo kata ooyo, waduto wan gi thuolo ma jaber mar riwo lwedo tijno kokalo kuom chiwo magwa. Kinda ma jotich Nyasaye ne nigo ne lamo madier e kinde Muma, nomiyo gigolo chiwo maggi mondo okony e gero kuonde lamo, mana kaka watimo e kindewagi, to mago duto kelo ne Jehova duong’.—Wuok 25:2; 2 Kor. 9:7.

13, 14. Gin puonj mage ma yudore e Ndiko ma konyowa rito Utewa mag Romo osik ka ler kendo kondisore?

¹³ Koseger Od Romo, dwarore ni orite osik koler kendo kobidhore mondo onyis kido mar Nyasaye ma walamo, ma en Nyasaye ma timo gik moko e yo mochanore. (Som 1 Jo-Korintho 14:33, 40.) Muma nyiso ni nitie tudruok e kind ler ma nenore gi wang’ kod bedo joma ler e wang’ Nyasaye. (Fwe. 19:8) Kuom mano, kapo ni wadwaro mondo Jehova oyie kodwa, nyaka wabed joma ohero ler.

¹⁴ Kaluwore gi puonj ma wayudogi, wiwa ok onego okwodi rwako ji e chokruogewa,  nimar yo ma waritogo utewa mag lamo biro medo ywayogi kopogore gi wach maber ma walandonegi. Gibiro fwenyo ni walamo Nyasaye maler kendo ma machiegnini, biro loko piny obed paradiso ma onge gimoro amora ma biro duwo.—Isa. 6:1-3; Fwe. 11:18.

15, 16. (a) Ang’o momiyo rito ler mar Od Romo nyalo bedo matek, to ang’o momiyo en gima dwarore? (b) En chenro mane ma kanyaklau nigago mar timo ler, to ng’ato ka ng’ato kuomwa nigi thuolo mane?

¹⁵ En adier ni nitie jomoko mohero ler moloyo jowetegi. Yo ma gitimogo ler luwore gi kaka ne gipon, kod weche mamoko kaka chuodho mantie, buru, chal mar ndara man machiegni gi kama gidakie, kod ka be pi gi gige timo ler yudore. Kata bed ni weche chal nade, kata ni ji neno nade wach ler e alworau, Utewa mag Romo onego oket ranyisi maber nikech iluongogi gi nying Jehova kendo gin kuonde mitimoe lamo madier.—Rapar 23:14.

¹⁶ Tij timo ler e Od Romo ok en gima onego okaw mayot. Dwarore ni buche mag jodongo e kanyakla magwa oket chenro malong’o mar timo ler, kendo neno ni gige timo ler yudore mondo kuonde ma wachokoree obed maler kinde duto. Nikech nitie tije ler ma dwarore ni otim bang’ chokruok ka chokruok, to moko nitie mitimo ka dichiel, jodongo onego one ni tijego itimo maber kaka dwarore ma onge kama ojwang’. Ng’ato ka ng’ato e kanyakla onego oriw lwedo gi kinda chenro mar timo ler.

17, 18. (a) Gin ranyisi mage manie Muma ma nyiso ni onego warit kuondewa mag lamo? (b) Ang’o momiyo Ute Romo nyaka rit e yo makare?

¹⁷ Jotich Jehova bende timoga kinda ahinya mondo gilos kuonde mokethore e utegi mag lamo. Ruoth Jehoash ma nolocho Juda nochiko jodolo mondo oti gi chiwo ma ne igolo e od Jehova mondo gilosgo “kwonde mokethore.” (2 Ruo. 12:4, 5) Higni 200 bang’e, Ruoth Josia bende notiyo gi chiwo ma ne igolo mondo ourgo kuonde ma nokethore.—Som 2 Weche mag Ndalo 34:9-11.

¹⁸ Ofise Joneno e pinje moko, osewacho ni owete gi nyimine ok okawo mapek wach rito kuonde ma gichokoree kod gik mamoko ma gitiyogo. Samoro thoth owete gi nyimine e pinjego ok ong’eyo kaka ginyalo loso kuonde mokethore kata gionge gi pesa ma ginyalo tiyogo. Kata kamano, ka ojwang’ Od Romo to obiro kethore mapiyo to mano ok bi chiwo neno maber e alworano. To komachielo, ka joma nie kanyakla timo duto ma ginyalo mondo girit Od Romo, mano biro kelo ne Jehova pak, kendo biro miyo okung pesa ma owete gi nyimine golo.

19. Ing’ado mar timo ang’o ne kuonde ma wachokoree ne lamo madier?

¹⁹ Od Romo en ot mowal ne Jehova. Omiyo ok nyal wach ni en mar ng’ato kata ni en mar kanyakla moro kata bed ni barua man ka sirkal wacho ang’o. Puonj manie Muma konyowa ng’eyo gimomiyo onego watim kinda mondo Od Romo ochop gima duong’ ma nomiyo ogere. Ji duto e kanyakla nyalo konyo chopo wachno kuom nyiso luor mowinjore ne kuondewa mag lamo, golo chiwo mondo omed gero ute mamoko, kendo kuom tiyo gi thuolowa kod tekowa e rito kuonde ma wachokoree mondo obed maler. Ka watimo mago duto, wanyiso ni wan gi kinda ne kama walamoe Jehova, mana kaka Yesu notimo.—Joh. 2:17.