1, 2. a) Pĩnd wẽndẽ, zĩ-bʋs la wẽn-sakdbã ra kẽnd n waoogd a Zeova? b) Bõe n wilgd t’a Zeezi ra nonga Wẽnnaam doogã sẽn da be Zeruzalɛmã? d) Bõe yell la d na n gom sõs-kãngã pʋgẽ?

HAL pĩnd wẽndẽ n tãag rũndã, wẽn-tũudbã tara zĩis b sẽn kẽnd n waoogd Wẽnnaam. Wala makre, a Abɛll sẽn wa n na n maan maoong n kõ a Zeova wã, wõnda a mee tẽn-kugri. (Sɩng. 4:3, 4) A Nowe, a Abrahaam, a Izaake, a Zakoob la a Moyiis me mee tẽn-kuga. (Sɩng. 8:20; 12:7; 26:25; 35:1; Yik. 17:15) A Zeova yeela Israyɛll nebã tɩ b ti sɛk-roogã, n wilg b sẽn segd n maan dẽ to-to. (Yik. 25:8) Kaoosg zugẽ, b mee wẽnd-doog a Zeova waoogr yĩnga. (1 Rĩm. 8:27, 29) Israyɛll nebã sẽn wa n yi yembd Babilond n lebg n wa b tẽngẽ wã, b ra wae n tigimda taab karen-dotẽ. (Mark 6:2; Zã 18:20; Tʋʋ. 15:21) Pipi kiris-nebã ra mi n yãka b tẽed-n-taag zaka, n tigimd taab be. (Tʋʋ. 12:12; 1 Kor. 16:19) A Zeova Kaset rãmbã tara Rĩung rot tusa dũniyã gill zug rũndã-rũndã, n kẽnd be n zãmsd Biiblã, la b waoogd a Zeova.

² A Zeezi ra nonga Wẽnnaam doogã sẽn da be Zeruzalɛmã hal wʋsgo. A karen-biisã sẽn yã a manesmã, tẽeg-b-la gomd yɩɩn-gʋlsdã sẽn da togse. A ra yeela woto: “Yamb roogã nonglem na n sooga maam zãnga.” (Yɩɩn. 69:10; Zã 2:17) Rĩung roog  ka be d sẽn tõe n boondẽ t’a Zeova roog wa sẽn da yaa to-to ne Zeruzalɛm wẽnd-doogã ye. (2 Kib. 5:13; 33:4) La d segd n wilgame tɩ d nanda zĩis nins d sẽn segd taab n waoogd Wẽnnaamã. Sõs-kãngã pʋgẽ, d na n yãa Biiblã sagls sẽn wilgd d sẽn segd n zã d mens to-to Rĩungã roogẽ. D na n bãnga d sẽn segd n ges Rĩungã rot yell to-to me. Sõsgã wilgdame me tɩ d tõe n kõo ligd tɩ b me Rĩung roto, la b manes kẽere. *

3-5. Rĩungã roog yõod yaa bõe, la rẽ segd n kɩtame tɩ d manesem yɩ wãn ne d tigissã?

³ Rĩungã roog yaa zĩig d sẽn tigimd taab n waoogd a Zeova. Tigissã d sẽn maand semen fãa Rĩungã roogẽ wã naaga bũmb nins a Zeova sẽn maane, sẽn na yɩl tɩ tõnd ne yẽ zoodã pãng paasdẽ wã. Yaa d Rĩungã roogẽ la a tũnugd ne a siglgã n kengd d raoodo, la a wilgd-d sore. Yaa a Zeova ne a Bi-riblã n boond tõnd tɩ d wat tigissã. D sẽn paamd n kelgd a Zeova goamã be tɩ nafd tõnd wa rɩɩbã yaa zu-zẽkre. D pa segd n yĩm rẽ abada.—1 Kor. 10:21.

⁴ A Zeova wilga vẽeneg t’a ratame tɩ d tigimd taab n waoogd-a, la d kengd taab raoodo. A vẽnega tʋm-tʋmd a Poll t’a sagl tõnd tɩ d ra bas taab tigung ye. (Karm-y Ebre-rãmb 10:24, 25.) D sã n sɩd waoogda a Zeova, d pa na n vaand tigissã bʋʋm-faad yĩng ye. Sẽn paase, d sã n segend tigissã sõma, tɩ d sã n kẽng me bɩ d zẽkd d nug n kõt leoore, d wilgda a Zeova tɩ d sũur nooma a sẽn kɩt tɩ d tigimd taabã.—Yɩɩn. 22:23.

⁵ Tõnd manesem sẽn yaa a soab tigissã sasa, la d sẽn get d Rĩungã roog yell to-to wã segd n wilgame tɩ d sɩd waoogda a Zeova. D ratame tɩ d sẽn zãad d mens to-to wã waoog a Zeova yʋʋrã. Sɩd me, gʋlsem ning sẽn mi n be Rĩungã rot zugã pʋgẽ, a Zeova yʋʋrã bee be.—Ges-y 1 Rĩm-dãmb 8:17.

6. Bõe la neb kẽer yeel tõnd Rĩungã rot la d tigissã wɛɛngẽ? (Ges-y sõsgã sɩngrẽ fotã.)

⁶ Nebã wae n gũusd n geta tõnd sẽn zãad d Rĩungã roog to-to wã. Wala makre, rao a ye sẽn yit Tirki yeela woto: “Mam sẽn yã Rĩungã roog sẽn yaa yɩlemd tɩ bũmbã fãa be a zĩigẽ wã yɩ-m-la noogo. Nebã fãa ra manega b mense, tɩ b nensã be laado. Sẽn paase, b reega maam sõma. Woto fãa yɩɩ maam noog hal wʋsgo.” Raoã sɩnga tigissã kẽnd n pa vaandẽ, tɩ pa yã n kaoos la a reeg lisg ye. Ẽndonezi galʋ-tẽng a ye pʋgẽ me, tõnd tẽed-n-taasã mee Rĩung ro-paalle, n bool b yagsã, tẽngã meere, n paas goosneema wã tʋm-tʋmdb a taab tɩ b wa gese. Meerã sẽn yã roogã sẽn me to-to wã, n paas b sẽn sel fɩlɛɛr-dãmb tɩ yaa neerã, a sũur yɩɩ noog hal t’a yeel woto: “Yãmb sẽn maneg zĩigã tɩ yaa yɩlemd to-to wã wilgdame tɩ y sɩd tẽeda Wẽnnaam.”

7, 8. D sã n wa be Rĩungã roogẽ, wãn to la d tõe n wilg tɩ d waoogda a Zeova?

⁷ Yaa a Zeova n boond tõnd tigissẽ wã. A geta d sẽn manegd d mens to-to tigissã yĩnga, la d manesem sẽn yaa a soab tigissã sasa wã. Rẽ n so tɩ d segd n yɩ gũusdb zĩ-kãens wɛɛngẽ. La bũmb nins sẽn sakd wall sẽn pa sakd tigissã sasa wã wɛɛngẽ, d pa segd n yɩ maan-tɩ-loog rãmb ye. D pa segd n yɩ dem-deme, la d pa segd n maand wa d be d zagsẽ me ye. Yaa sɩd t’a Zeova ratame tɩ tõnd ne neb nins d sẽn boond Rĩungã roogẽ wã sũy yɩ noogo, la d pa tol n dat n maan bũmb sẽn wilgd tɩ d pa nand tigissã ye. Rẽ n so tɩ d pa na n ning fut sẽn  pa zems n kẽng tigsg ye. Sẽn paase, tigsg sasa, d pa na n toond mesaaz-rãmba, wall d sõsd ne taaba, pa rẽ bɩ n dɩtẽ ye. Roagdbã segd n sõnga b kambã tɩ b bãng tɩ Rĩungã roog pa reem zĩig ye.—Koɛ. 3:1.

⁸ Daar a yembre, a Zeezi yãa neb sẽn koosd teed Wẽnnaam doogẽ wã, t’a sũur yik t’a rig-b n yiisi. (Zã 2:13-17) Rĩungã rot me yaa zĩis d sẽn tigimd taab n waoogd a Zeova, la d baood n bãngd-a n paasdẽ. Woto yĩnga, d segd n bãngame tɩ Rĩungã roog pa leebg zĩig ye.—Ges-y Neemi 13:7, 8.

9, 10. a) Wãn to la a Zeova nin-buiidã maand n tõogd n met Rĩung roto, la rẽ woma bi-bʋse? b) Bõe la b maan sẽn na yɩl tɩ tigims nins neb nus sẽn pa zãadã tõog n paam Rĩung roto?

⁹ Dũniyã gill zugu, a Zeova nin-buiidã modgdame n met Rĩungã roto. Tõnd tẽed-n-taas n maand rotã pãlã-rãmbã, tɩ sãnda metẽ wall b manegdẽ. Nin-kãensã pa tʋmd ligd yĩng ye. B tʋmda ne yamleoogo. Rẽ woma bi-bʋse? Yʋʋmd 1999 sɩpaolg kiuugã pipi daarã tɛk n tãag rũndã, rat n yeel tɩ yʋʋm 15 pʋgẽ, Rĩung rot tus-pisi la a nii la zak la b me-yã. Yaa wa b sẽn met Rĩung rot a nu daar fãa.

¹⁰ A Zeova siglgã reesda ligd kiris-nebã sẽn kõt ne yamleoogo, n yãkd neb tɩ b met Rĩung rot n kõt tigims nins sẽn datã. D sẽn maand woto wã, d tũuda Biiblã sẽn sagl tɩ neb nins sẽn tar wʋsgã sõng sẽn pa tar-b tɩ sekã. (Karm-y 2 Korẽnt-rãmb 8:13-15.) Rẽ kɩtame tɩ tigims kẽer paam Rĩung roto, tɩ sã n da pa tũ ne sõngr bɩ b pa tõe n paam ye.

11. Saam-biis kẽer sẽn paam Rĩung ro-paall poore, bõe la b yeel-yã? Yãmb tagsg yaa bõe ne saam-biis wʋsg sẽn paamd b toorẽ Rĩung rotã?

¹¹ Kostarika tiging a yembr la b sõng tɩ b paam Rĩung roogo. Rẽ poore, b gʋlsa filiyallã n yeel woto: “Tõnd sã n yas n get d Rĩungã roogo, yaa wa zãmsdo. Yɩɩ lingr tɛkẽ! Yaa rasem a nii pʋgẽ bal la b me Rĩungã roogo, tɩ yaa neer me. Yaa a Zeova sẽn ning barkã, n paas a siglgã sẽn sigl yɛlã to-to wã, la saam-biisã sõngrã n kɩt tɩ rẽ tõog n yɩ. Vẽenega, ro-kãngã sẽn yaa zĩig d sẽn na n segd taab n waoogd a Zeova wã yaa kũun sẽn yaa sõma wʋsg a sẽn kõ-do. D sũur yaa noog wʋsg ne roogã.” Y sã n kelgd y tẽed-n-taas sẽn pʋʋsd a Zeova bark bũmb a sẽn maan n kõ-b yĩnga, pa noom-y sɩda? Sẽn paase, d sẽn mi tɩ dũniyã gill zugu, saam-biis wʋsg n paamd b toorẽ Rĩung rot tɩ b sũur noomẽ wã noom-d-la wʋsgo. D miime tɩ Rĩungã rot meeb nooma a Zeova. Bala, b sã n me Rĩung ro-paalle, pa yãt n kaoos la a pid ne neb sẽn dat n bãng a Zeova ye.—Yɩɩn. 127:1.

12. Bõe la y tõe n maan n sõng tɩ b me Rĩungã roto?

 ¹² Bõe la y tõe n maan n sõng tɩ b me Rĩungã roto? Y tõe n tɩ sõng n meeme. Tõnd ned kam fãa me tõe n kõo ligd Rĩungã rot meeb yĩnga. D sã n maand d sẽn tõe fãa sẽn na yɩl n teel tʋʋm-kãngã, d na n paama sũ-noog d sẽn yaa kõtbã yĩnga. La sẽn yɩɩd fãa, d waoogda a Zeova. D rɩkda pĩnd wẽndẽ wẽn-sakdbã togs-n-taare. Bala, bãmb me kõo kũun ne yamleoogo, tɩ b tõog n me rot a Zeova tũudmã yĩnga.—Yik. 25:2; 2 Kor. 9:7.

13, 14. Bõe la Biiblã yet tɩ wilgdẽ tɩ d segd n manega d Rĩungã roog tɩ yaa yɩlemde, tɩ zũnd-zãnd me kae?

¹³ Rĩung roog meeb poore, d segd n modgame t’a kell n yɩ yɩlemde, tɩ zũnd-zãnd me ra zĩnd a pʋgẽ ye. Bala, Wẽnnaam ning tõnd sẽn tũudã yaa yɩlemde, n pa nong zũnd-zãnd ye. (Karm-y 1 Korẽnt-rãmb 14:33, 40.) Biiblã wilgame tɩ d sã n dat n dɩk a Zeova togs-n-taare, d segd n yɩɩ yɩlem bũmbã fãa pʋgẽ. Wala makre, tũudmã wɛɛngẽ, tagsa wã, la zã-m-mengã wɛɛngẽ, la d modg tɩ d yĩngã yɩ yɩlemde. (Vẽn. 19:8) Rẽnd neb nins sẽn dat n ta a Zeova yamã segd n modgame tɩ b yĩngã, b futã la b teed a taabã yaa yɩlma.

¹⁴ D sã n maneg d Rĩungã roog tɩ yaa yɩlemd tɩ zũnd-zãnd me ka be, d pa na n zoe yãnd ne bool ned t’a wa d tigissã ye. Sẽn wat-b tigissã me na n yãame tɩ d manega d Rĩungã roogo, tɩ kell n zems d sẽn moond n yetẽ tɩ dũni-paalg n wate, tɩ rẽgd pa na n zĩnd be  wã. B na n bãngame tɩ Wẽnnaam ning d sẽn tũudã nonga yɩlemde, la t’a sɩd na n kɩtame tɩ tẽngã tõr lebg arzãna.—Eza. 6:1-3; Vẽn. 11:18.

15, 16. a) Bõe yĩng tɩ tõe n yɩ toog tɩ d tõog tɩ d Rĩungã roog kell n yɩ yɩlemde? Bõe yĩng tɩ yɩlemdã yaa tɩlɛ? b) Wãn to la b sigind tʋʋmã Rĩungã roog yɩlemd yĩnga, la bõe la tõnd ned kam fãa tõe n maane?

¹⁵ Yɩlemdã wɛɛngẽ, nebã tagsg pa yembr ye. Bõe yĩnga? Tõe tɩ bee ne b sẽn wilg-b bũmb ning b yãadmẽ wã, wall b sẽn vɩ zĩig ningã. Kẽer sẽn vɩẽ wã yaa wubsg wʋsgo, pa rẽ bɩ soayã yaa rẽgd la bɛgdo. Sãnda pa tar koom tɩ seke, wall teed sẽn na n maneg zĩig tɩ yɩ yɩlemd ye. La baa nebã tagsg sẽn yaa to-to yɩlemdã wɛɛngẽ, d segd n maoodame tɩ d Rĩungã roog yaa yɩlemde, tɩ zũnd-zãnd kae ye. Bala yaa be la d tigimd taab n waoogd a Zeova.—Tõo. 23:15.

¹⁶ D sã n dat tɩ d Rĩungã roog yɩ yɩlemde, bũmb toor-toor la d segd n maane. Kãsem-dãmbã segd n maana na-kẽndr Rĩungã roog manegr yĩnga, la b ges tɩ tʋʋm-teed be rẽ yĩnga. B segd n sigla tʋʋmã sẽn na yɩl tɩ b ra wa yĩm bũmb ye. Bũmb kẽer la b segd n maan tigsg fãa poore, tɩ sãnda yaa wakat-wakate. Tõnd ned kam fãa tõe n sõngame n ges Rĩungã roog yɩlemd yelle.

17, 18. a) Pĩnd wẽndẽ wẽn-sakdbã sẽn da manegd wẽnd-doogã to-to wã wilgda tõnd bõe? b) Bõe yĩng tɩ d segd n maneg d Rĩungã roog sõma?

¹⁷ D sã n dat tɩ d Rĩungã roog kell n yɩ sõma, d segd n gũusd n getame tɩ bũmb sã n sãam bɩ d yɩ tao-tao n manege. Pĩnd wẽndẽ wẽn-sakdbã me ra maanda woto. Wala makre, Zida rĩm a Zoaas yeela maan-kʋʋdbã tɩ b rees ligd ning nin-buiidã sẽn kõt ne yamleoogã, tɩ bũmb sã n sãam wẽnd-doogẽ wã bɩ b manege. (2 Rĩm. 12:5, 6) Yʋʋm kobs-yi la zak poore, rĩm a Zozɩas kɩtame tɩ b rees ligd nebã sẽn kõ ne yamleoogo, n maneg wẽnd-doogã.—Karm-y 2 Kibay 34:9-11.

¹⁸ Filiyall-dãmb kẽer gũus n gesame tɩ saam-biisã pa modgd wʋsg ne b Rĩungã rot manegr ye. Tõe tɩ yaa neb sẽn mi tʋʋmdã n pa waooge, pa rẽ bɩ b pa tara ligd tɩ sek n na n maneg zĩis nins sẽn sãamã ye. La bũmb sã n sãam tɩ d pa manege, na n tara sãoong n debda, tɩ yɩng rãmbã sã n getẽ bɩ b na n paoog tõndo. La tiging neb sã n get b Rĩungã roog yell sõma, tɩ bũmb sã n sãam bɩ b yɩ tao-tao n manege, roogã na n kell n yɩɩ sõma n kõt a Zeova yʋʋrã waoogre. B sã n maand woto, b kẽgsda ligd ning saam-biisã sẽn kot ne yamleoogã.

19. Bõe la y tõe n maan n wilg tɩ y nanda zĩig ning d sẽn tigimd taab n waoogd Wẽnnaamã?

¹⁹ Rĩung roog yaa roog b sẽn me a Zeova yʋʋr yĩnga. Rẽnd pa neda, wall tiging neb n so-a ye. Biiblã wilgame tɩ d segd n naaga taab n ges d Rĩungã roog yell sõma, t’a Zeova yʋʋrã paam waoogre. Tigingã ned kam fãa tõe n sõnga zĩ-kãng wɛɛngẽ, n wilg t’a nanda Rĩungã roog sẽn yaa zĩig d sẽn segd taab n waoogd Wẽnnaamã. D leb n tõe n kõo ligd tɩ b me Rĩung ro-paala, wall d bao sẽk n tɩ sõng n me, pa rẽ bɩ n sõng n ges roogã yɩlemd la a manegr yelle. D sã n maand d sẽn tõe fãa zĩ-kãens wɛɛngẽ, d wilgdame tɩ d rɩka a Zeezi togs-n-taare, n nong zĩig ning d sẽn tigimd taab n waoogd Wẽnnaamã ne d sũur fãa.—Zã 2:17.