1, 2. (a) Kohale, opi ovanthu va Jeova ankho vemufendela? (b) Oñgeni Jesus ankho atala ondyuo ya Jeova mo Jelusalei? (c) Oityi matulilongesa monthele ei?

 OVAUMBILI va Huku kohale no hono, vena onomphangu apa vafendela Huku. Mongeleka, etyi Abele aava otyilikutila ku Jeova, tyafuile watungile omutala. (Gênesis 4:3, 4) Noe, na Abraiau, na Isake, na Jako, na Moisesi aveho valingile omitala. (Gênesis 8:20; 12:7; 26:25; 35:1; Êxodo 17:15) Jeova wapopilile ova Isilayeli opo vatunge ekaka liefendelo. (Êxodo 25:8) Konyima, Jeova evepopila vatunge ondyuo ya Huku. (1 Reis 8:27, 29) Etyi ovanthu va Huku vakondoka koukonde ko Mbambilonia, apeho ankho veliongiya mondyuo yokufendela. (Marcos 6:2; João 18:20; Atos 15:21) Iya Ovakristau votete ankho veliongiyila monondyuo. (Atos 12:12; 1 Coríntios 16:19) Hono, mouye auho muna Onondyuo ononyingi Mbomaliongiyo omu ovanthu va Jeova veliongiya opo velilongese konthele yae nokumufenda.

² Jesus ankho una onthilo onene nondyuo ya Jeova mo Jelusalei. Jesus ankho uhole ondyuo ya Huku ahinangelesa ovalongwa vae onondaka mbo Salmu mbati: “Ombili yondyuo yove maindi.” (Salmo 69:9; João 2:17) Ondyuo Yomaliongiyo hamoko “Jeova akala” ngetyi ankho ahakala mondyuo yae yoko Jelusalei. (2 Crônicas 5:13; 33:4) Mahi  onthue tuna okukala nonthilo onene no nomphangu mbetu mbefendelo. Monthele ei, matulilongesa onondonga mbo Mbimbiliya mambutulekesa oñgeni tuna okukala tyina tukahi Mondyuo Yomaliongiyo, noñgeni tuna yokuiyunga, noñgeni tupondola okuava onombongo mbokulanda ovipuka yesukisa. a​—Tala onondaka pokatoi.

3-5. Ondyuo Yomaliongiyo oityi, iya oñgeni tuna okutala omaliongiyo etu?

³ Ondyuo Yomaliongiyo omphangu ovanthu veliongiyila opo vafende Jeova. Omaliongiyo otyiawa Huku etuavela, etukuatesako okupameka oupanga wetu nae. Momaliongiyo etu, eongano liae litupameka nokutuavela ehongolelo tuesukisa. Elao limwe enene okukongwa na Jeova Nomona wae opo tulie “komesa ya Jeova” onosimanu ambuho. (1 Coríntios 10:21) Katupondola okulimbuako okuti okukongwa ngotyo tyakolela unene.

⁴ Jeova utupopila nokuayandyuluka okuti uhanda onthue tuliongiye opo tumufende nokulipameka pokati. (Tanga Hebreus 10:24, 25.) Mokonda tuna onthilo na Jeova, onthue katukambe komaliongiyo tyina tyehesukisile. Tulekesa okuti tupanda omaliongiyo tyina tulifuika nokuava omakumbululo.​—Salmo 22:22.

⁵ Onkhalelo tukala momaliongiyo nonkhalelo tuyunga Onondyuo mbetu Mbomaliongiyo ilekesa inkha tuna onthilo na Jeova. Ngetyi tuhanda ovituwa vietu vinkhimaneke enyina lia Jeova, tupu tuhanda Ondyuo Yomaliongiyo imunkhimaneke.​—Tyieleka na 1 Reis 8:17.

6. Oityi ovanthu vapopia konthele Yonondyuo mbetu Mbomaliongiyo, navana venda komaliongiyo? (Tala olutalatu pefo pahimbikila onthele.)

⁶ Tyina tuna onthilo Nonondyuo mbetu Mbomaliongiyo vakuetu vetyimona. Mongeleka, omulume umwe ko Turquia wati: “Onkhalelo Ondyuo Yomaliongiyo yasukulwa nawa nokuaonganekua yanthyuvisa unene. Ovanthu vavala nawa, vena ehambu iya avandiepesa nawa. Otyo tyanthyuvisa unene.” Omulume oo ehimbika okuya komaliongiyo aeho apakala vala katutu ambatisalwa. Mo Indonésia, omukuatate umwe wakonga munthele yae, omutumini umwe womafualali nomafualali omakuavo opo vakatale Ondyuo omphe Yomaliongiyo. Omutumini ahuvo nonkhalelo yatungwa, neholi liaviukiswa nawa no nonthemo onongwa mbatuikuapo. Omutumini ati: “Onkhalelo ondyuo ei yasukuka ilekesa nawa okuti wendela muetyi ulongesa.”

7, 8. Oñgeni tulekesa okuti tuna onthilo na Jeova tyina tukahi Mondyuo Yomaliongiyo?

⁷ Jeova oe utukonga opo tuende komaliongiyo, iya wesuka nonkhalelo tutala, nokukala momaliongiyo. Ngotyo onthue tulityilika okulinga ovipuka vihalekesa onthilo. Tupu katukuluminya ovanthu oñgeni vena okukala momaliongiyo. Mahi tupu kamatukala vala ngatyina tueya okupululukwapo. Tutyii okuti Jeova uhanda onthue novanthu tuakonga tupumphame nawa Mondyuo Yomaliongiyo. Mahi onthue katuhande okulekesa monkhalelo naike okuti tutupu onthilo nomaliongiyo. Tulityilika okuvala ovikutu vihekahi nawa,  nokulihonekela kotelefone, nokutomphola, nokulia, nokunwa, mokueenda kueliongiyo. Ovohe vena okulongesa ovana vavo opo vahahataike nokunyanena Mondyuo Yomaliongiyo.​—Eclesiastes 3:1.

⁸ Etyi Jesus amona okuti ovanthu valandesa ovipuka mondyuo ya Huku, anumana unene iya eviyumbu pondye. (João 2:13-17) Monondyuo mbetu Mbomaliongiyo, onthue tufendelamo Jeova nokulilongesa konthele yae. Ngotyo, katyaviukile okulandesilamo ovipuka.​—Tyieleka na Neemias 13:7, 8.

9, 10. (a) Oñgeni ovanthu va Jeova vatunga Onondyuo Mbomaliongiyo, iya Ouwa patyi utundililako? (b) Oñgeni eongano lia Jeova likuatesako omawaneno ehena onombongo mbokutungisa Ondyuo yavo Yomaliongiyo?

⁹ Ovanthu va Jeova mouyue auho vaundapa unene opo vatunge Onondyuo Mbomaliongiyo. Vatunga nokupindulapo Onondyuo Mbomaliongiyo mahi kavafetua. Mokonda yovakuatate ovo, momanima 15 okualamba mouye auho tuatunga Onondyuo onongwa Mbomaliongiyo mbulamba po 28.000 tyilekesa okuti kese nthiki kuatungwa onondyuo 5 Mbomaliongiyo.

¹⁰ Eongano lia Jeova lituma ovanthu nokuundapesa onombongo mbuawa opo vatunge oku kuesukisa vali Onondyuo Mbomaliongiyo. Tulandula onondonga mbo Mbimbiliya mbupopia okuti vana vena vali vapondola okukuatesako vana vehena. (Tanga 2 Coríntios 8:13-15.) Ouwa patyi utundililako? Onondyuo ononyingi Mbomaliongiyo mbatungilwa omawaneno ehena onombongo mbutuuka pala okutungisa.

11. Oityi ovakuatate vamwe vapopia konthele Yondyuo omphe Yomaliongiyo iya oñgeni otyo ove tyikukalesa?

¹¹ Ovakuatate vewaneno limwe ko Costa Rica vahoneka okuti: “Tyina tukahi komutwe Wondyuo Yomaliongiyo, kuonthue ñgoti ondyoi! Tuhuva unene. Ondyuo yetu omgwa yomaliongiyo yamanuhulwa okutungwa vala mononthiki etyinana. Otyilinga otyo tyivilwa vala kononkhono mba Jeova, nepongiyo lilingwa neongano liae, novakuatate vetu veliava. Omphangu ei yefendelo otyiawa tyakolela Jeova etuavela. Tuahambukua unene notyiawa otyo.” Tyituhambukiswa okutehelela ovakuatate no nomphange vapandula Jeova mokonda yetyi evelingila. Tupu tyituhambukiswa mokonda ovakuatate vetu mouye auho vapondola okukala no Nondyuo Mbomaliongiyo. Tyimoneka nawa okuti Jeova ukahi nokuyamba ovilinga viokutunga Onondyuo Mbomaliongiyo, mokonda mbutungwa momuvo wehehi, iya ovanthu ovanyingi avahimbika okuya komaliongiyo okulilongesa konthele ya Jeova.​—Salmo 127:1.

12. Oñgeni ove upondola okukuatesako okutunga Onondyuo Mbomaliongiyo?

 ¹² Oñgeni ove upondola okukuatesako okutunga Onondyuo Mbomaliongiyo? Hamwe tyitavela uliave opo ukuateseko ovilinga viokutunga. Iya onthue atuho tupondola okuava onombongo pala okutunga Onondyuo Mbomaliongiyo. Tyina tulinga atyiho tuvila opo tukuateseko ovilinga viokutunga, tukala nehambu liokuava, tyakolela vali, tunkhimaneka Jeova. Onthue tulandula ongeleka yovanthu va Huku kohale ankho vahanda okuava onombongo opo vatunge onomphangu mbavo mbefendelo.​—Êxodo 25:2; 2 Coríntios 9:7.

13, 14. Oityi tyilekesa Mombimbiliya okuti tuna okusukukisa apeho Ondyuo Yomaliongiyo nokuonganeka ovipuka vikahimo?

¹³ Jeova o Huku omusukuki, nokuaongana nawa. Otyo tusukulila apeho Ondyuo yetu Yomaliongiyo nokufuika nawa ovipuka vikahimo. (Tanga 1 Coríntios 14:33, 40.) Opo tukale tyasukuka nga Jeova, onthue katusukukisa vala efendelo lietu, nomalusoke etu, novituwa vietu, mahi tupu tusukula olutu luetu.​—Revelação 19:8.

¹⁴ Tyina tutualako okusukula Ondyuo yetu Yomaliongiyo nokuonganeka ovipuka vikahimo, tuhambukwa tyina tukonga ovanthu opo veye komaliongiyo etu. Iya ovanthu mavatale okuti tulinga umwe ngetyi tuivisa tyina tupopia okuti mouye omupe mamukasukuka. Tupu mavetyimono okuti tufenda Huku omusukuki malingi ohi ikale omphangu ongwa yombembwa.​—Isaías 6:1-3; Revelação 11:18.

15, 16. (a) Omokonda yatyi katyapepukile okukalesa Ondyuo Yomaliongiyo tyasukuka? Omokonda yatyi tuna okutualako okuisukula? (b) Oñgeni oprograma yokukomba Ondyuo yenyi Yomaliongiyo yaonganekwa? Otyilinga patyi onthue atuho tuna?

¹⁵ Ovanthu vena omalusoke elikalela konthele yokusukuka. Omokonda yatyi? Hamwe omokonda yonkhalelo vatekulwa. Tupu, vamwe vakala ponomphangu mbuna unene ombuma ine pena omatapalo asila ine ena onthata. Vakuavo vetupu omaande ine ondyapau. Mahi katyesukisile olusoke patyi ovanthu vena potyilongo tukala, onthue tuna okutualako okusukula Ondyuo yetu Yomaliongiyo nokuonganeka nawa  ovipuka vikahimo. Oyo omphangu omu tufendela Jeova.​—Deuteronômio 23:14.

¹⁶ Inkha tuhanda Ondyuo yetu Yomaliongiyo itualeko tyasukuka, tuesukisa okukala ovanthu velifuika. Ovakulu vewaneno valinga oprograma nokulinga atyiho opo muhakambe ovipuka viesukisa pala okusukula ondyuo yomaliongiyo. Ovakulu vewaneno tupu vaonganeka ovilinga opo vilingwe. Ovipuka vimwe viesukisa okusukulwa tyina eliongiyo liamapu, mahi ovikuavo kaviesukisile okusukulwa apeho. Atuho tuapewa otyilinga tyokusukula Ondyuo yetu Yomaliongiyo.

17, 18. (a) Oityi tupondola okulilongesila kovanthu va Jeova vokohale, ankho valinga nawa ondyuo ya Huku? (b) Omokonda yatyi tuna yokuyunga nawa Ondyuo yetu Yomaliongiyo?

¹⁷ Tupu tulinga nawa Ondyuo yetu Yomaliongiyo tyina tuviukisa ovipuka vihekahi nawa. Ovanthu va Jeova kohale ankho otyo valinga. Mongeleka, moutumini Wohamba Joasi woko Judaa, ovanthu vaavele onombongo pala ondyuo ya Huku. Ohamba aitumu ovanakwa opo vapindulepo ondyuo ya Huku nokuviukisa apa pateka no nombongo ombo. (2 Reis 12:4, 5) Etyi palamba omanima 200, Ohamba Josia tupu waundapesile onombongo mbondyuo ya Huku pala okuipindulapo.​—Tanga 2 Crônicas 34:9-11.

¹⁸ Ono Komisau mbo no Filiyale movilongo vimwe mbaimbuka okuti motyilongo tyavo ovanthu vamwe kavekahi nokulinga nawa Onondyuo Mbomaliongiyo ine ovipuka vikahimo. Hamwe omokonda movilongo ovio ovanthu vetupu ounongo wokulinga ovilinga ovio. Ine hamwe vetupu onombongo ononyingi opo vembupindulepo. Mahi inkha katupindulapo Ondyuo yetu Yomaliongiyo tyina tyesukisa, maivipala iya ovanthu mavetyimono. Iya tyipondola okuheveavela oumbangi omuwa. Mahi, tyina atuho tulinga etyi tuvila opo tulinge nawa Ondyuo yetu Yomaliongiyo, tunkhimaneka Jeova nokuhapesela onombongo ovakuatate vetu vaava.

19. Oñgeni molingi opo ulekese onthilo nomphangu apa ufendela Jeova?

¹⁹ Ondyuo Yomaliongiyo yapakulwa ku Jeova. Ngotyo ha yomunthu ine yewaneno. Ngetyi tuelilongesa monthele ei, onondonga mbo Mbimbiliya mambutukuatesako okukala notyituwa tyaviuka nomphangu apa tufendela Huku. Mokonda tuna onthilo na Jeova, tupu tulekesa onthilo nomaliongiyo etu Nondyuo Yomaliongiyo. Onthue tuna ehambu liokuava onombongo opo kutungwe vali Onondyuo Mbomaliongiyo, tupu tulinga atyiho tuvila opo tumbulinge nawa notukualako okumbusukukisa. Nga Jesus, onthue tuna ombili nonthilo nomphangu apa tufendela Jeova.​—João 2:17.