1, 2. (a) Abaheereza ba Ruhanga ira bakaba bakoresa myanya ki ey’okuramizamu? (b) Yesu akaba naatwara ata hekalu ya Ruhanga omuri Yerusaalemu? (c) Ekicweka eki kiine kigyendererwa ki?

OKURUGA ira, abaheereza ba Ruhanga batwire baine emyanya yaabo y’okuramizamu. Abeeli naabaasa kuba yaabaire akoresa eitambiro obu yaabaire areetera Ruhanga ekiheebwayo. (Kut. 4:3, 4) Noa, Abrahamu, Isaaka, Yakobo, na Musa boona bakakora amatambiro. (Kut. 8:20; 12:7; 26:25; 35:1; Kur. 17:15) Yehova akaragiira Abaisraeli kwombeka eihema. (Kur. 25:8) Bwanyima, bakaija baayombeka hekalu y’okuramizamu Yehova. (1 Bag. 8:27, 29) Abayudaaya ku baarugire omu bukwatwa omuri Babulooni, bakaba bateeranira omu sinagogi. (Mak. 6:2; Yoh. 18:20; Byak. 15:21) Abakristaayo aba ira bakaba nibateeranira omu maka ga bamwe omu kibiina. (Byak. 12:12; 1 Kor. 16:19) Obunaku obu, abaheereza ba Yehova omu nsi yoona nibateeranira omu nkumi n’enkumi z’Ebyombeko by’Obukama kwegyesibwa.

² Yesu akaba naakundira kimwe hekalu ya Yehova omuri Yerusaalemu, n’omuhandiiki w’engiri yaahika n’aha kumuhandiikaho arikwihirira aha bunabi ati: ‘Okugirira enju yaawe omujinya kuryandya.’ (Zab. 69:9; Yoh. 2:17) Ekyombeko ky’Obukama tikirikubaasa kwetwa “enju ya” Yehova nk’oku hekalu omuri  Yerusaalemu yaabaire neeyetwa. (2 Bus. 5:13; 33:4) Kwonka n’obu kiraabe kiri kityo, Baibuli erimu emisingye erikworeka oku emyanya y’okuramizamu ey’obunaku obu eshemereire kukoresibwa kandi ekaheebwa ekitiinisa. Ekigyendererwa ky’ekicweka eki, n’okutwijutsya emisingye egi emwe kandi tukareeba n’oku twine kutwara Ebyombeko byaitu eby’Obukama, oku turikutunga esente z’okubyombeka, n’oku twine kubireeberera. *

3-5. Omugasho gw’Ekyombeko ky’Obukama niki, kandi eki kishemereire kukwata kita aha ku turikutwara enteerane ezirikubamu?

³ Ekyombeko ky’Obukama n’omwanya mukuru ogu turikuteeraniramu kuramya Yehova. Kimwe aha bintu ebi Yehova arikutuha kutureeberera omu by’omwoyo n’enteerane ezirikuba aha Kyombeko ky’Obukama buri saabiiti. Omu mwanya ogu niho turikutungira okuhuumurizibwa okw’eby’omwoyo kurabira omu kibiina kye. Abo boona abarikwija omu nteerane, nibaba bari nk’abeetsirwe Yehova n’Omwana we. N’obu turaabe twayetsirwe kare kuriira aha “meeza ya” Yehova, twine kuguma nitworeka ngu nitusiima okwetwa okwo.—1 Kor. 10:21.

⁴ Yehova okuhwera entumwa Paulo kutuhiga kutareka kuteeranira hamwe, nikyoreka ngu naatwara obwire obwo obw’okuramya n’okugaruranamu amaani nka bukuru munonga. (Shoma Abaheburaayo 10:24, 25.) Mbwenu shi nituba nituha Yehova ekitiinisa twayosha enteerane z’Ekikristaayo ahabw’enshonga zitari nkuru? Buzima, nitworeka ngu nitusiima Yehova n’ebi arikutuha twayetebeekanisiza gye enteerane kandi tukazejumbamu.—Zab. 22:22.

⁵ Oku turikutwaza omu nteerane n’oku turikureeberera Ekyombeko ky’Obukama kushemereire kworeka ngu nituha Yehova ekitiinisa. Nituba nitwenda ngu emitwarize yaitu ehimbisise eiziina rya Ruhanga, eririkuba riri aha kyapa ky’Ekyombeko ky’Obukama.—Gyeragyeranisa na 1 Abagabe 8:17.

6. Abamwe bagambire ki aha Byombeko by’Obukama n’abo abarikuba bari omu nteerane? (Reeba ekishushani aha kutandika.)

⁶ Twaha ekitiinisa emyanya yaitu y’okuramizamu, n’abatari Bajurizi ba Yehova nibakireeba. Nk’eky’okureeberaho, omushaija omuri Turkey akagira ati: “Obwecumi n’obuteeka ebi naareebire omu Kyombeko ky’Obukama bikaantangaaza. Abantu bakaba bajwaire gye, barikumwenya, kandi bakandamusya gye. Eki kikanshemeza munonga.” Omushaija akatandika kwija omu nteerane atarikwosha, kandi bwanyima yaabatizibwa. Omu rurembo rumwe omuri Indonesia, ekibiina kikeeta abakozi ba gavumenti n’abataahi kwija aha kuheebwayo kw’Ekyombeko ky’Obukama ekisya. Orikwebembera orurembo orwo akaija. Akasiima munonga omutindo gw’ekyombeko ekyo, omugasho gwakyo, n’obusiri bwakyo obw’ebimuri. Akagira ati: “Obwecumi bw’ekyombeko eki nibuhikaana n’okuramya kwanyu okw’amazima.”

7, 8. Abo abarikwija omu nteerane baine kuguma nibaijuka nshonga ki enkuru?

⁷ Oku turikuha Ruhanga ekitiinisa nikureebekyera aha ku turikutwaza, oku turikujwara, n’oku turikweboneza. Omu kuha Ruhanga ekitiinisa twine n’okwetantara kurengyesereza. Kyetegyereiziibwe ngu abamwe nibarengyesereza aha bikwatiraine n’emitwarize mirungi omu nteerane aha Kyombeko ky’Obukama, kandi abamwe tibarikufayo aha mitwarize mirungi. Hatariho  kubanganisa, Yehova naayenda ngu abaheereza be n’abandi abarikwija omu nteerane bahurire baikaikaine. Kandi, abo abarikwija omu nteerane tibashemereire kujwara kubi nari kuhuga barikutsindika obutumwa aha simu, barikurya nari kunywa, n’ebindi nk’ebyo. Abazaire baine kutendeka abaana baabo kumanya ngu Ekyombeko ky’Obukama ti mwanya gw’okwirukiramu nari kuzaaniramu.—Mub. 3:1.

⁸ Yesu akagira ekiniga kingi yaabinga abaabaire nibakorera eby’obushuubuzi omu hekalu ya Ruhanga. (Yoh. 2:13-17) Ebyombeko byaitu by’Obukama n’emyanya y’okuramya okurikwera n’okwegyesibwa eby’omwoyo. N’ahabw’ekyo, ekintu kyona ekitari ky’eby’omwoyo, kishemereire kukorerwa ahandi.—Gyeragyeranisa na Nehemia 13:7, 8.

9, 10. (a) Nitutunga tuta Ebyombeko by’Obukama, kandi eki kirugiremu ki? (b) Ni ntebeekanisa ki erikuhwera ebibiina ebitaine sente kwombeka Ebyombeko by’Obukama?

⁹ Ekibiina kya Yehova nikiteeraho kuhayo n’okuhwera omu kwombeka Ebyombeko by’Obukama ebiringaniire. Omurimo gw’okwombeka, n’okuhunduuza ebyombeko ebi nigukorwa abeekundiire abatarikushashurwa. Eki kirugiremu ki? Kuruga Novemba 1, 1999, ebibiina bibaasize kutunga emyanya mirungi y’okuramizamu erikurenga 28,000 omu nsi yoona. Eki nikimanyisa ngu omu myaka 15 ehingwire, buri izooba nihombekwa Ebyombeko by’Obukama nka bitano.

¹⁰ Hariho entebeekanisa y’okushagika omurimo gw’okwombeka Ebyombeko by’Obukama byaba nibyetengyesa. Entebeekanisa egi neehikaana n’emisingye eri omu Byahandiikirwe ngu ebi abandi bashagize bihwere abo abataine ebirikumara kugira ngu habeho ‘okwingaingana.’ (Shoma 2 Abakorinso 8:13-15.) N’ekirugiremu, obundi ebibiina ebyabaire bitarikubaasa kweyombekyera Ebyombeko by’Obukama, bibaasize kutunga emyanya y’okuramizamu.

11. Ab’eishe-emwe abamwe nibagamba ki aha Byombeko byabo by’Obukama ebisya, kandi eki nikikureetera kwehurira ota?

¹¹ Ekibiina omuri Costa Rica ekyagasiirwe omu ntebeekanisa egi kikahandiika kiti: “Ku turikwemerera omu maisho g’Ekyombeko ky’Obukama, nooba nooshusha oti turiyo nituroota! Titurikubaasa kukiikiriza. Ekyombeko kyaitu kirungi kikahwa gye omu biro munaana byonka! Eki kikabaho ahabw’omugisha gwa Yehova, entebeekanisa ezirikukorwa ekibiina kye, n’obushagiki bw’ab’eishe-emwe abakundwa. Omwanya gw’okuramizamu ogu buzima n’ekiconco ky’omuhendo, ekyeitungo eki Yehova atuhaire. Nikitushemeza munonga.” Tikirikukushemeza kuhurira ebigambo nk’ebyo ebirikworeka okusiima ahabw’okutunga Ebyombeko by’Obukama  ebisya n’okumanya ngu ab’eishe-emwe omu myanya mingi omu nsi yoona nabo nibatunga okushemererwa nk’okwo? Hatariho kubanganisa Yehova naaha omugisha omurimo gw’okwombeka Ebyombeko by’Obukama, ahakuba ku birikuheza kuhwa kwombwekwa, nibiijura abantu ab’emitima mirungi abarikwenda kumanya bingi aha Muhangi waabo oine rukundo.—Zab. 127:1.

12. Noobaasa kuhwera ota omu kwombeka Ebyombeko by’Obukama?

¹² Ab’eishe-emwe na banyaanyazi-itwe baingi batungire okushemererwa kwingi ahabw’okwejumba omu kwombeka Ebyombeko by’Obukama. Yaaba nitubaasa kuhwera omu kwombeka nari tutarikubaasa, twena nitubaasa kutunga omugisha gw’okushagika okwombeka okwo turikuhayo. Omujinya gukahwera abaheereza ba Ruhanga kuhayo ahabw’okwombeka omu bwire bw’okuhandiikwa kwa Baibuli, kandi n’obunaku obu nitukora nikyo kimwe kuhimbisisa Yehova.—Kur. 25:2; 2 Kor. 9:7.

13, 14. Ni misingye ki kuruga omu Byahandiikirwe erikukwata aha kuboneza Ekyombeko ky’Obukama?

¹³ Ekyombeko ky’Obukama ku kirikuheza kwombekwa, kiine kuguma kicumirwe gye kandi kitebeekanisiibwe gye kirikuhimbisisa Ruhanga w’obuteeka ou turikuramya. (Shoma 1 Abakorinso 14:33, 40.) Baibuli neegira ngu okwera kwine akakwate n’obwecumi bw’eby’omwoyo n’obw’eby’omubiri. (Kush. 19:8) N’ahabw’ekyo, abantu baaba nibenda kusiimwa Yehova, baine kuba abeecumi.

¹⁴ Kuhikaana n’emisingye egi, tushemereire kuba nitwehurira gye twaba nitweta abantu kwija omu nteerane zaitu turikuhamya ngu embeera y’Ekyombeko kyaitu ky’Obukama neehikaana n’amakuru marungi agu turikubabuurira. Nibaija kureeba ngu nituramya  Ruhanga orikwera kandi ori haihi kuhindura ensi ekaba paradiso etarimu burofa.—Isa. 6:1-3; Kush. 11:18.

15, 16. (a) Ahabw’enki kirikubaasa kutooroba kurinda Ekyombeko ky’Obukama kuguma nikireebeka gye, kwonka ahabw’enki ni kikuru? (b) Ni ntebeekanisa ki ezirikubaasa kukorwa kuboneza Ekyombeko ky’Obukama, kandi buri omwe ahariitwe aine mugisha ki?

¹⁵ Abantu abamwe nibatwara okuboneza nka kikuru kandi abandi tibarikufayo. Oku barikutwara okuboneza nikubaasa kurugiirira aha ku baakuziibwe nari ahabw’okugira ngu enguuto zaabo zirimu ebyondo, n’omucuucu nari ahabw’okugira ngu tibaine maizi, n’eby’okukoresa omu kuboneza. Obu Ekyombeko kyaitu ky’Obukama kirikuba kiriho eiziina Yehova kandi guri omwanya gw’okuramya okurikwera, tushemereire kukiboneza kikareebeka gye, tutarikwihirira aha miteekateekyere nari embeera z’ekicweka kyaitu.—Bir. 23:14.

¹⁶ Okuboneza Ekyombeko ky’Obukama kushemereire kuteebwaho omutima. Buri kakiiko k’abareeberezi kaine kuhamya ngu kaakora entebeekanisa kandi ngu hariho eby’okukoresa ebirikumara kubaasa kurinda omwanya gw’ekibiina ogw’okuramizamu kuguma nigureebeka gye. Ahabw’okugira ngu ebintu ebimwe bishemereire kubonezibwa bwanyima ya buri ruteerane kandi ebindi birikubaasa kutwara obwire, hashemereire kubaho okukwatanisa n’entebeekanisa kuhamya ngu tihaine kyahugwaho. Abari omu kibiina boona baine obujunaanizibwa bw’okukwatanisa omu nshonga ezi.

17, 18. (a) Ni by’okureeberaho ki kuruga omu Byahandiikirwe ebirikukwata aha kuhunduuza emyanya y’okuramya okurikwera? (b) Ahabw’enki Ebyombeko by’Obukama bishemereire kurindwa bikaguma nibireebeka gye?

¹⁷ Abaheereza ba Yehova nibateeraho munonga kurinda emyanya yaabo y’okuramizamu kuguma neereebeka gye. Omugabe Yoasi owa Yuda akaragiira abanyamurwa kukoresa esente ezahairweyo omu nju ya Yehova ngu “bazihunduuze enju, ahi [yaabaire] esiisikaire hoona.” (2 Bag. 12:4, 5) Emyaka nka 200 bwanyima, Omugabe Yosia nawe akakoresa esente ezahairweyo omu hekalu kuhunduuza ebyabaire nibyetengyesa.—Shoma 2 Obusingye 34:9-11.

¹⁸ Ofiisi z’amataagi nizigira ngu omu mahanga agamwe abantu tibarikufayo kuhunduuza ebyombeko nari eby’okukoresa. Obundi omu mahanga ago nihaba hariyo bakye abarikumanya kuhunduuza nari nibaba bataine by’okukoresa. Buzima, Ebyombeko by’Obukama byaba bitahunduuziibwe, nibibaasa kusiisikara kandi tibirikubaasa kuhimbisisa Yehova. Kwonka, abari omu kibiina baateeraho kurinda Ekyombeko ky’Obukama kuguma nikireebeka gye, eki nikihimbisisa Yehova kandi kihwera kutashiisha sente ezirikuheebwayo ab’eishe-emwe bagyenzi baitu.

19. Omaririire kukora ki aha bikwatiraine n’ebyombeko ebi turikukoresa omu kuramya okurikwera?

¹⁹ Ekyombeko ky’Obukama n’ekyombeko ekihairweyo ahari Yehova. N’ahabw’ekyo, nikiba kitari ky’omuntu nari ekibiina. Emisingye y’Ekikristaayo neeyoreka ngu twine kukwatanisa gye kuhamya ngu ekyombeko eki kyahikaana n’ekigyendererwa ekyareeteire kyayombekwa. Boona omu kibiina nibabaasa kuhwera omuri ekyo barikuha ekitiinisa emyanya yaitu y’okuramizamu, barikuhayo kushagika omurimo gw’okwombeka ebyombeko ebisya, barikuhayo obwire bwabo n’amaani gaabo kurinda Ebyombeko by’Obukama ebiriho kuguma bicumire gye kandi bihunduuziibwe. Twashagika entebeekanisa ezi, nitworeka ngu twine omujinya gw’omwanya gwa Yehova ogw’okuramizamu, nka Yesu.—Yoh. 2:17.