1, 2. (a) Anto ray pasen ya inusar na saray lingkor nen Jehova nensaman diad impandayew dad sikato? (b) Antoy alikna nen Jesus ed templo na Dios diad Jerusalem? (c) Antoy gagala na sayan artikulo?

NENSAMAN ni, saray lingkor na Dios et angipaalagey la na saray pasen parad dugan panagdayew. Singa bilang, si Abel et nayarin nanggaway altar nen angiyapay na bagat ed Dios. (Gen. 4:3, 4) Si Noe, Abraham, Isaac, Jacob, tan Moises et nampaalagey na altar. (Gen. 8:20; 12:7; 26:25; 35:1; Exo. 17:15) Ingganggan nen Jehova iray Israelita ya mangipaalagey na tabernakulo. (Exo. 25:8) Tan sinmabi panaon et angipaalagey iray templo ya pandayewan dad si Jehova. (1 Ara. 8:27, 29) Nen nibulos iray Judio manlapud Babilonia, regular iran nantitipon ed saray sinagoga. (Mar. 6:2; Juan 18:20; Gawa 15:21) Saray Kristiano nen inmunan siglo et nantitipon ed abung na saray membro na kongregasyon. (Gawa 12:12; 1 Cor. 16:19) Diad panaon tayo, saray totoo nen Jehova et mantitipon ed nilibon Kingdom Hall diad interon mundo pian manaral tan mandayew ed sikato.

² Ontan lay panangaro nen Jesus ed templo nen Jehova diad Jerusalem, ya lapud satan et amoria na saray disipulo to ya sikato imay tutukoyen na sayan propesiya: “Say seseg ko parad  abung mo et mandarlang ed loob ko.” (Sal. 69:9, NW; Juan 2:17) Anggapoy Kingdom Hall natan ya makapiparad samay templo diad Jerusalem ya tinawag ya “abung nen Jehova.” (2 Awa. 5:13; 33:4) Anggaman ontan, wala ray prinsipyod Biblia ya mangipapanengneng ya nepeg tayon respetoen iray pasen ya pandadayewan tayo natan. Say gagala na sayan artikulo et pian pantongtongan iratan ya prinsipyo tan naamtaan tayo no panon tayon moriaen, suportaan, tan mintinaen iray Kingdom Hall tayo. *

3-5. Antoy usar na Kingdom Hall, tan antoy epekto na satan ed panmoria tayod saray aral?

³ Say Kingdom Hall so sentro na dugan panagdayew diad lugar tayo. Kaibad saray probisyon nen Jehova pian napakan tayod espiritual et saray sinimban aral diad Kingdom Hall. Ditan tayo napapabiskeg tan makakaawat na saray instruksion manlapud organisasyon to. Onaatendi tayod saray aral lapud iimbitaan itayo nen Jehova tan na Anak to. Balet anggano lanang itayon naiimbitaan ya mangan ed “lamisaan nen Jehova,” nepeg ya agtayo ibabaliwala itan.—1 Cor. 10:21.

⁴ Mantitipon tayo pian dayewen si Jehova tan pian napaseseg tayoy sakey tan sakey. Ontan lay panamabli nen Jehova ed saratan ya pantitipon kanian pinuyanan toy apostol Pablo ya bilinen itayon agtayo papaulyanan iratan. (Basaen so Hebreos 10:24, 25.) Kasin rerespetoen tayoy Jehova no agtayo miaral lapu labat ed ataptapew iran rason? Nipanengneng tayo ya inar-aro tayon maong si Jehova tan aapresyaen tayo ray probisyon to no manparaan tayo parad saray aral tan mankomento tayo.—Sal. 22:22.

⁵ Nepeg tayon respetoen so Kingdom Hall—say mismon bilding tan saray espiritual ya aktibidad ditan. No rerespetoen tayo itan, ipapanengneng tayo met ya rerespetoen tayoy ngaran na Dios, ya maslak et nabasad karatula na Kingdom Hall.—Ikompara so 1 Arari 8:17.

⁶ No rerespetoen tayo ray pasen ya pandadayewan tayo, naimano itan na saray aliwan Tasi. Singa bilang, oniay imbaga na laki ya tagad Turkey: “Pandinayewan koy Kingdom Hall da ta talagan malinis tan maayos. Saray oonla ditan et desente so panangawes da, akaimis iran lanang, tan makaaro ira. Talagan mandinayew ak.” Ginmapon akiaral iman ya laki, tan ag-abayag et nampabautismo. Diad sakey ya syudad ed Indonesia, inimbitaan na sakey ya kongregasyon iray opisyal na gobierno ed lugar da tan saray manaayam ed asingger pian nanengneng da so balon Kingdom Hall antis na dedikasyon na satan. Linma so mayor, tan pandinayewan toy inkagawa na bilding, say inkadesinyo to, tan say balibalin hardin na satan. “Nanengneng ed sayan malinlinis ya Kingdom Hall ya mabiskeg so pananisia yo,” so imbaga to.

7, 8. Panon tayon nipanengneng so respetod si Jehova no wala tayod Kingdom Hall?

⁷ Nepeg ya nanengneng ed ugali, panangawes, tan panag-ayos tayo ya rerespetoen tayo so Dios ya mangiimbitad sikatayo ed saray aral. Anggaman ontan, kaukolan tayoy magmaliw ya balanse. Naimano ya wala ray masyadon istrikto ed no antoy nepeg ya ikiwas ed aral, wala ra met balet so  arum ya gagawaen dan singa abung so Kingdom Hall. Siempre, labay nen Jehova ya komportable iray lingkor to tan saray bisita diad Kingdom Hall. Balet, agtayo labay ya onabebay dignidad na saray aral lapud aliwan desente so panangawes tayo, odino manti-text, mitotongtong o mamangan tayo legan na aral. Nepeg ya ibangat na atateng iray ananak da ya ag-ira manbatikbatik tan manggagalaw ed Kingdom Hall.—Ecl. 3:1.

⁸ Lapud pasnok nen Jesus, pinapaway tod templo na Dios iramay mannenegosyo ditan. (Juan 2:13-17) Tandaan, saray Kingdom Hall tayo et pasen parad panagdayew tan panagaral ed espiritual. Kanian antokaman ya transaksion ed negosyo et kaukolan ya gawaen ed arum ya lugar.—Ikompara so Nehemias 13:7, 8.

9, 10. (a) Panon ya nipapaalagey tan gagastosan iray balon Kingdom Hall, tan antoy resulta? (b) Anton maaron probisyon so akatulong ed saray kongregasyon ya anggapoy pakayari dan mangipaalagey na Kingdom Hall da?

⁹ Mansasagpot so organisasyon nen Jehova pian makapanpaalagey na saray Kingdom Hall. Boluntaryo so amin ya mandedesinyo, mangipapalaagey, tan manrerenovate ed saratan. Antoy resulta? Manlapu la nen Nobyembre 1, 1999, masulok ya 28,000 ya mararakep ya Kingdom Hall so nipaalagey diad interon mundo. Labay ton ibaga, diad apalabas ya 15 a taon et limaran balon Kingdom Hall so nipapaalagey kada agew!

¹⁰ Inyuksoy na organisasyon nen Jehova ya saray kontribusyon et usaren pian nipaalagey iray Kingdom Hall diad saray lugar ya mankaukolan. Sayan maaron probisyon et base ed prinsipyo ed Biblia ya say sulok na arum et mamano ed pankaukolan na arum pian “walay pampapara.” (Basaen so 2 Corinto 8:13-15.) Bilang resulta, mararakep ya pasen ya pandadayewan so nipaalagey parad saray kongregasyon ya anggapoy pakayari dan mangipaalagey na Kingdom Hall da.

11. Antoy nibaga na saray agagi ed balon Kingdom Hall da, tan antoy epekto na satan ed sika?

¹¹ Oniay insulat na sakey ya kongregasyon ed Costa Rica ya agunggonaan ed sayan probisyon: “Nen asumpal so Kingdom Hall mi, singa kami labat mankukugkugip! Agkami makapanisia. Asumpal iyan balibalin Kingdom Hall mi diad waloy agew labat! Nipaalagey iya lapud panamendisyon nen Jehova, saray uksoyan na organisasyon to, tan tulong na saray maaron agagi. Mabmablin regalo iya nen Jehova ed sikami. Talagan malikeliket kami.” Agta makapaseseg so ontan iran balikas na pisasalamat na saray agagi ya balo so Kingdom Hall da? Tan  agta malikeliket tayo ta amta tayon ontan met so nalilikna na saray agagi ed dakel nin lugar ed interon mundo? Amta tayon kimey iya nen Jehova ta kada nasumpal so balon Kingdom Hall, maslak et ondadakel so onaatendid saray aral pian nakabat day maaron Amalsa.—Sal. 127:1.

12. Panon kan makatulong ed panagpaalagey na saray Kingdom Hall?

¹² Dakel ya agagi so malikeliket lapud makakapanboluntaryo irad panagpaalagey na saray Kingdom Hall. Balanglan makapanboluntaryo itayo odino andi, amin tayo et walaan na pribilehyo ya onsuportad saratan ya proyekto panamegley na pandonasyon. Nensaman et akatulong so seseg ed dugan panagdayew pian nasuportaan ed pinansyal iray teokratikon proyekto, tan ontan met so nagagawa natan—parad kigloriaan nen Jehova.—Exo. 25:2; 2 Cor. 9:7.

13, 14. Anto ran prinsipyod Biblia so mangipanengneng ya kaukolan tayon pansiansiaen ya malinis tan maayos so Kingdom Hall tayo?

¹³ No nipaalagey lay balon Kingdom Hall, kaukolan ya pansiansiaen tayo itan ya malinis tan maayos pian nipanengneng tayon aaligen tayo ray kualidad tan personalidad na Dios ya dadayewen tayo. (Basaen so 1 Corinto 14:33, 40.) Nabasad Biblia ya pian magmaliw tayon malinis tan masanto ya singa si Jehova, nepeg ya aliwa labat ya say panagdayew, iisipen, tan gagawaen tayo so malinis, noagta pati say laman tayo. (Apo. 19:8) Kanian no labay tayon abobonan itayo nen Jehova, kaukolan ya mapalinis tayo.

¹⁴ No tumboken tayo irayan prinsipyo, maliket tayon mangimbita ed saray totoo ed saray aral tayo ta amta tayon nanengneng  da ditan ya iyaaplika tayo so ipupulong tayon maong a balita. Nanengneng dan say dadayewen tayon Dios et masanto, tan asingger to lan gawaen ya paraiso iyan mundo.—Isa. 6:1-3; Apo. 11:18.

15, 16. (a) Akin et aliwan mainomay ya pansiansiaen ya malinis so Kingdom Hall, balet akin ya kaukolan tayon gawaen itan? (b) Anto ray uksoyan na kongregasyon yo parad panaglinis ed Kingdom Hall, tan antoy pribilehyo tayon amin ya gawaen?

¹⁵ Wala ray totoon mas mapalinis nen say arum. Akin? Nayarin lapud ontan so impamabaleg ed sikara. Say arum balet et manaayam ed lugar ya marabok odino mapitek so dalan. Odino nayarin kulang so suplay na danum ed lugar da tan agmagenap so uusaren dan panlinis. Antokaman so situasyon ed lugar tayo, kaukolan ya pansiansiaen tayon malinis tan maayos so Kingdom Hall tayo, ta wadtan so ngaran nen Jehova tan pasen itan na dugan panagdayew.—Deu. 23:14.

¹⁶ Nepeg ya organisado so panaglinis ed Kingdom Hall. Kaukolan ya seguroen na saray ulop na mamatatken ya walay akasulat ya eskedyul tan magenap iray uusaren ed panaglinis pian naseguro ya talagan malinis tan presentable so pasen ya pandadayewan tayo. Wala ray parte na Kingdom Hall ya kaukolan ya linisan kada kayari aral, say arum balet et agmet kaukolan ya mabetbet ya linisan, kanian kaukolan ya iyuksoy na saray elder so panaglinis pian naseguro ya amin et nalilinisan. Amin tayo et makapitulongan ed panlinis na Kingdom Hall tayo.

17, 18. (a) Antoy naaralan tayod impanmintina na saray lingkor nen Jehova nensaman ed saray pasen a pandadayewan da? (b) Akin ya kaukolan tayon pansiansiaen ya maabig so kondisyon na saray Kingdom Hall tayo?

¹⁷ Saray lingkor nen Jehova et mansasagpot pian naynay ya maabig so kondisyon na saray pasen ya pandadayewan da. Ingganggan nen Arin Jehoas na Juda iray saserdote ya usaren so kontribusyon parad abung nen Jehova “pian apigeren so antokaman a deral” ditan. (2 Ara. 12:4, 5, NW) Kayari 200 ya taon, inusar met nen Arin Josias so kontribusyon parad templo pian apigeren itan.—Basaen so 2 Awaran 34:9-11.

¹⁸ Unong ed report na saray branch office, diad arum a bansa et agmasyadon naiikdan na imano so panmintina ed saray bilding odino kagawaan. Nayarin diad saratan ya lugar et dagdaiset labat so makaamta no panon so panmintina odino anggapoy pundo ra. No ibaliwala tayoy panmintina ed saray Kingdom Hall, magangganon naderal so bilding tan nayarin ag-itan mangiter na maabig ya pantasi ed saray totoo diad lugar tayo. Balet no gawaen tayoy anggaay nayarian tayo pian naynay ya maabig so kondisyon na Kingdom Hall tayo, mangiter itan na dayew ed si Jehova tan agnasayang so pundo ya indonasyon na saray agagi.

19. Panon tayon nipanengneng so seseg parad pasen ya pandadayewan tayod si Jehova?

¹⁹ Say Kingdom Hall et bilding ya indedika ed si Jehova. Kanian ag-itan kayarian na sakey ya indibidual odino na kongregasyon. Diad saray prinsipyo ya naaralan tayod sayan artikulo, anengneng tayo ya nepeg tayon mitulongan pian naseguron nauusar so pasen ya pandadayewan tayo ed talagan gagala na satan. Nagawaan tayo itan no ipanengneng tayoy respeto ed pasen ya pandadayewan tayo, no mandodonasyon tayo parad pampaalagey na balo iran Kingdom Hall, tan no manboluntaryo tayo pian mansiansian malinis tan maabig so kondisyon na Kingdom Hall tayo. No suportaan tayo irayan uksoyan, ipapanengneng tayo so seseg parad pasen ya pandadayewan tayod si Jehova, ya singa ginawa nen Jesus.—Juan 2:17.