1, 2. (a) Na unda e sirbidónan di Yehova di pasado tabata rindi adorashon na dje? (b) Kiko Hesus tabata pensa di e tèmpel di Yehova na Herúsalèm? (c) Kiko nos lo trata den e artíkulo akí?

YEHOVA su sirbidónan semper tabatin un lugá kaminda nan tabata ador’é. Por ehèmpel, Abel kisas a usa un altar pa ofresé sakrifisio na Dios. (Gén. 4:3, 4) Noe, Abraham, Isak, Yakòb i Moises tambe a traha altar. (Gén. 8:20; 12:7; 26:25; 35:1; Éks. 17:15) E israelitanan a traha un tabernakel riba instrukshon di Yehova. (Éks. 25:8) Siglonan despues, nan a traha un tèmpel pa rindi adorashon na Yehova. (1 Rei. 8:27, 29) Despues ku e hudiunan a regresá for di eksilio na Babilonia, nan tabata reuní regularmente den snoa. (Mar. 6:2; Huan 18:20; Echo. 15:21) Anto den e promé siglo, e kristiannan tabata tene reunion na kas di diferente miembro di e kongregashon. (Echo. 12:12; 1 Kor. 16:19) Awe, e pueblo di Yehova ta reuní den míles di Salòn di Reino, i ei nan ta siña tokante Yehova i rindi adorashon na dje.

² Hesus tabatin asina un gran amor i rèspèt pa e tèmpel di Yehova na Herúsalèm ku el a laga e disipelnan kòrda riba e palabranan profétiko akí: “E zelo ku mi tin pa bo kas lo kima  manera kandela.” (Huan 2:17; Sal. 69:9) Naturalmente, nos no por bisa ku un Salòn di Reino ta e ‘kas di Yehova’ manera e tèmpel di Herúsalèm tabata. (2 Kró. 5:13; 33:4) Pero tòg nan ta lugánan ku meresé tur nos rèspèt. Den e artíkulo akí nos lo trata algun prinsipio bíbliko ku ta siña nos kon nos mester komportá nos na nos Salònnan di Reino, kon pa kuida nan i kon nos por yuda finansiá nan. *

3-5. (a) Kiko ta e funshon di un Salòn di Reino? (b) Kon nos mester mira nos reunionnan?

³ Un Salòn di Reino ta e sentro di adorashon puru den e komunidat kaminda e ta situá. Einan nos ta tene reunionnan semanal kaminda nos ta risibí kuminda spiritual for di Yehova i tambe animashon i instrukshon for di su organisashon. Na moda di papia, Yehova ku Hesus ta invitá nos tur siman pa bin kome na “e mesa di Yehova.” (1 Kor. 10:21) Esei ta un invitashon masha spesial, i nos mester dun’é e importansia ku e meresé.

⁴ Yehova ta haña ku ta masha importante pa nos ta na reunion pa ador’é i pa animá otro. Ta p’esei el a inspirá apòstel Pablo pa urgi nos pa no keda sin bai nos reunionnan. (Lesa Hebreonan 10:24, 25.) Akaso nos ta mustra rèspèt pa Dios si nos ta falta reunion sin ku tin un bon motibu pa esei? Nos no solamente mester ta regularmente na reunion, pero tambe nos mester bini reunion bon prepará i partisipá den nan ku entusiasmo. Asina nos ta mustra Yehova kuantu apresio nos tin p’e i pa tur loke e ta perkurá.—Sal. 22:22.

⁵ E manera ku nos ta komportá nos na reunion i ta kuida nos Salòn di Reino ta demostrá kuantu rèspèt nos tin pa Yehova. Nos ke pa nos kondukta trese alabansa pa e nòmber di Yehova, ku normalmente ta skirbí riba e bòrchi ku tin pafó di Salòn di Reino.—Kompará ku 1 Reinan 8:17.

6. Kiko algun hende a bisa di nos Salònnan di Reino i di e personanan ku ta asistí na e reunionnan einan? (Wak e promé plachi.)

⁶ Ora nos ta trata nos Salònnan di Reino ku rèspèt, hende ku no ta Testigu di Yehova ta ripará esaki. Por ehèmpel, un hòmber na Turkia a bisa: “M’a gusta kon limpi i na òrdu tur kos tabata na e Salòn di Reino ku m’a bishitá. E hendenan tabata nèchi bistí, ku un sonrisa amabel i nan a kumindá mi ku smak. Esei a impreshoná mi mashá.” E hòmber a sigui bai reunion ku regularidat i poko tempu despues el a batisá. Den un stat na Indonesia, un kongregashon a tene un dia habrí promé ku nan a dediká un Salòn di Reino nobo i a invitá e bisiñanan i funshonarionan di gobièrnu. Asta e alkalde a bini, i el a keda masha impreshoná ora el a mira kon bon trahá e edifisio tabata, e diseño práktiko i e bunita hardin. El a komentá: “E echo ku e salòn akí ta asina limpi ta demostrá ku boso ta hende ku di bèrdat tin fe.”

7, 8. Kon nos ta mustra rèspèt pa Yehova ora nos ta na Salòn di Reino?

⁷ Yehova ta esun ku ta invitá nos na reunion, i nos ta demostrá nos rèspèt p’e na nos forma di bisti, na e manera ku nos ta kuida nos aparensia i na nos komportashon. Pero nos tin ku evitá ekstremo den esaki. Tin ruman ta masha strèn relashoná ku loke por i loke no por hasi na Salòn di Reino, miéntras ku otro rumannan no ta wòri nan kabes mashá ku esei. Aunke Yehova ke pa nos i nos invitadonan sinti  nos kómodo na Salòn di Reino, nos no mester hasi nada ku ta mustra falta di rèspèt pa e reunionnan. Por ehèmpel, nos no ta bisti paña slòrdig òf muchu kasual, ni sinta manda mensahe di telefòn, papia òf kome durante reunion. Ademas, mayornan mester siña nan yunan ku e Salòn di Reino no ta kaminda di kore ni hunga.—Ekl. 3:1.

⁸ Ora Hesus a mira hende ta hasi negoshi den e tèmpel, el a rabia mashá i a saka nan pafó. (Huan 2:13-17) Nos ta bai Salòn di Reino pa adorá Yehova i pa siña tokante dje. P’esei nos no mester usa e reunionnan pa hasi negoshi ni pa trata asuntunan ku no tin nada di haber ku kosnan spiritual.—Kompará ku Nehemías 13:7, 8.

9, 10. (a) Kon e organisashon di Yehova a sòru pa traha Salònnan di Reino nobo? (b) Kiko a logra durante e último añanan? (c) Kiko e organisashon di Yehova a hasi pa yuda kongregashonnan ku no tin fondo pa traha nan mes Salòn di Reino?

⁹ E organisashon di Yehova ta hasi gran esfuerso pa traha mas Salòn di Reino. Tin míles di boluntario ku ta yuda diseñá, traha i renobá nan. Ku ki resultado? Desde 1 di novèmber 1999 te ku awor a traha mas ku 28.000 bunita Salòn di Reino rònt mundu. Esei ta nifiká ku durante e último 15 añanan e rumannan a traha rònt di 5 Salòn di Reino pa dia.

¹⁰ Beibel ta bisa ku kristiannan ku tin di mas mester yuda esnan ku tin di ménos pa asina tur por ta igual. Na armonia ku e prinsipio ei, e organisashon a bini ku un programa pa usa rumannan boluntario i kontribushon pa traha Salòn di Reino na lugánan ku tin mester di nan. (Lesa 2 Korintionan 8:13-15.) Sin e programa akí, hopi kongregashon ku no tabatin sufisiente fondo nunka lo por a traha nan mes Salòn di Reino.

11. (a) Kiko algun ruman a bisa tokante nan Salòn di Reino nobo? (b) Kon bo ta sinti bo ora bo pensa riba loke e programa mundial di konstrukshon di Salòn di Reino ta logrando?

¹¹ Un kongregashon na Costa Rica ku a benefisiá di e programa akí a skirbi lo siguiente: “Ora nos wak nos Salòn di Reino, ta manera un soño! Nos no por kere ku den ocho dia so nos bunita salòn a keda kla te den e último detaye! Esaki tabata posibel danki na e bendishon di Yehova, e areglonan di e organisashon i e apoyo di nos rumannan stimá. E lugá di adorashon akí ta un bunita hoya ku Yehova a regalá nos. Nos ta masha masha kontentu mes!” E komentarionan ei no ta konmové bo? Rònt mundu tin míles di ruman ku tambe ta sinti nan masha kontentu i gradisidu ku nan propio Salòn di Reino. Ta bisto ku e programa mundial akí di konstrukshon tin  e bendishon di Yehova, pasobra asina ku nan kaba ku un salòn nobo, hopi mas tantu hende ta kuminsá bini reunion pa siña tokante nos Kreador amoroso.—Sal. 127:1.

12. Kon kada un di nos por yuda ku konstrukshon di mas Salòn di Reino?

¹² Hopi ruman tabatin e oportunidat di yuda ku trahamentu di un Salòn di Reino, i nan a disfrutá sinfin di esei. Pero kiko si nos sirkunstansianan no ta permití nos bai yuda na e lugá di konstrukshon? Wèl, kisas nos por kontribuí ku donashon pa traha mas Salòn di Reino. Ora nos ta hasi tur loke nos por pa apoyá e trabou akí, nos ta sinti e goso di duna i, mas importante ainda, nos ta alabá Yehova. Di e manera ei nos ta sigui e ehèmpel di sirbidónan di Dios di tempu bíbliko ku tabata ansioso pa kontribuí pa yuda traha nan lugánan di adorashon.—Éks. 25:2; 2 Kor. 9:7.

13, 14. Menshoná algun prinsipio bíbliko ku ta mustra ku nos mester tene nos Salòn di Reino limpi i na òrdu.

¹³ Yehova ta un Dios limpi i santu. E ta un Dios di òrdu. P’esei nos tin ku tene nos Salòn di Reino limpi i na òrdu pa e reflehá e kualidatnan di Yehova. (Lesa 1 Korintionan 14:33, 40.) Beibel ta indiká ku limpiesa físiko ta estrechamente ligá ku limpiesa spiritual i ku santidat. (Rev. 19:8) Pues, si nos ke pa Yehova aseptá nos sirbishi, nos mester sòru pa nos adorashon, nos manera di pensa, nos akshonnan i asta nos kurpa ta limpi.

¹⁴ Ora nos ta tene nos Salòn di Reino limpi i na òrdu, nos lo invitá hende libremente na nos reunionnan, sin sinti bèrgwensa debí na e estado di nos salòn. Si  nos ta bisa nan ku pronto nos ta bai biba den un mundu limpi, nan ta ferwagt ku nos lugá di reunion tambe ta limpi. Asina e hendenan ta mira ku nos mes ta praktiká loke nos ta prediká i ku nos ta adorá un Dios santu i limpi, kende pronto lo transformá e tera akí den un bunita paradeis.—Isa. 6:1-3; Rev. 11:18.

15, 16. (a) Dikon kisas ta difísil pa tene e Salòn di Reino limpi? (b) Dikon ta importante pa tene nos salòn limpi? (c) Ki programa di limpiesa di salòn bo kongregashon tin? (d) Ki privilegio nos tur tin?

¹⁵ No ta tur hende ta duna e mesun importansia na limpiesa. Algun hende a lanta den lugánan kaminda tin tur servisio básiko i ta fásil pa haña produktonan di limpiesa. Otro hende a lanta kaminda kayanan ta di tera i no tin sufisiente awa. Pero sin importá unda nos ta biba òf kiko e hendenan den nos área ta pensa di limpiesa, nos mester hasi tur loke ta na nos alkanse pa nos Salòn di Reino ta limpi i na òrdu, ya ku e ta karga e nòmber di Yehova i ta e lugá kaminda nos ta ador’é.—Deu. 23:14.

¹⁶ Limpiesa di Salòn di Reino mester ta un kos organisá. E kuerpo di ansiano mester traha un programa pa e kongregashon i sòru pa semper tin sufisiente produkto i artíkulo di limpiesa disponibel. Asina, semper nos Salònnan di Reino ta lusi. Tin algun trabou di limpiesa ku mester tuma lugá despues di kada reunion, miéntras ku tin otro kos ku mester hasi ku ménos frekuensia. Si tin bon organisashon i supervishon, lo no tin kosnan ku ta keda sin hasi. Tur miembro di kongregashon tin e privilegio di kooperá ku limpiesa di salòn.

17, 18. (a) Kiko algun sirbidó di Dios di pasado a hasi pa kuida lugánan di adorashon? (b) Dikon nos mester tene nos Salònnan di Reino den bon estado?

¹⁷ Sirbidónan di Yehova ta hasi tur nan esfuerso pa mantené nan lugánan di adorashon den bon estado. Rei Joas di Huda a duna òrdu na e saserdotenan pa usa e plaka ku e pueblo a kontribuí na e kas di Yehova pa “drecha e dañonan na e kas, na unda ku nan [a] haña kualke daño.” (2 Rei. 12:4, 5) Mas ku 200 aña despues, Rei Yosías tambe a usa e kontribushon di tèmpel pa laga drecha e kas di Yehova.—Lesa 2 Krónikanan 34:9-11.

¹⁸ Algun Komité di Sukursal ta raportá ku e hendenan den nan pais no tin kustumber di tene edifisio den bon estado. Podisé ta pasobra no tin sufisiente rekurso ni hende ku sa kon pa hasi e trabou. Sinembargo, nos tin ku kòrda ku si nos no mantené nos Salònnan di Reino, nan lo bai atras mas lihé i duna un mal impreshon na e komunidat lokal. Di otro banda, ora nos tur den kongregashon ta hasi nos bèst pa tene e Salòn di Reino den bon estado, Yehova ta risibí e gloria ku e meresé i nos no ta malgastá e fondonan ku nos rumannan ta kontribuí kuné pa traha salòn.

19. Kiko bo tin pensá di hasi pa apoyá e lugá kaminda bo ta adorá Yehova?

¹⁹ Un Salòn di Reino ta un lugá dediká na Yehova. Bon mirá, nos no por bisa ku e ta di un sierto persona òf kongregashon, apesar ku legalmente e akta di propiedat ta bisa esei. E prinsipionan ku nos a analisá den e artíkulo akí ta mustra ku nos tur tin ku sòru pa e salòn kumpli ku e propósito pa kua a trah’é. Nos ta hasi esei ora nos ta mustra e debido rèspèt durante reunion, ora nos ta duna kontribushon pa traha mas salòn i ora nos ta yuda tene nos Salònnan di Reino limpi i den bon estado. Asina tur hende lo ripará ku meskos ku Hesus, nos tin gran apresio pa e lugá kaminda nos ta adorá nos Dios, Yehova.—Huan 2:17.