1, 2. a) Punda tiempopi Jehovata sirvijcunaca ¿maicunapita Jehovataca adoran carca? b) Jerusalenbi Jehovapa templomandaca ¿imatata Jesusca yan carca? c) ¿Imatata cai temapica yachajupashun?

JEHOVÁ DIOSTA sirvijcunaca siempremi paita adorana pushtucunata charishcanchi. Huaquin ejemplocunata ricupashun. Abelca Jehová Diosman carangapami shuj altarguta rurashpa chaipi shuj animalguta rupachishcanga (Gén. 4:3, 4). Noé, Abrahán, Isaac, Jacob, Moisespash Jehovata adorangapami altarta rurarca (Gén. 8:20; 12:7; 26:25; 35:1; Éx. 17:15). Israelitacunapash Jehová mandashca shinami shuj tabernáculo carpa huasita rurarca (Éx. 25:8). Jipamangarin shuj jatun templo huasitami rurarca (1 Rey. 8:27, 29). Babilonia llactamanda tigrashpapash tandanajuna huasicuna nishcapimi Jehovata adoran carca (Mar. 6:2; Juan 18:20; Hech. 15:21). Jesusta punda catijcunapash shuj shuj huauquicunapa huasicunapimi tandanajun carca (Hech. 12:12; 1 Cor. 16:19). Cunan punllacunapi Jesusta catijcunapash Tandanajui Huasicunapimi Jehovata adoranchi, paimanda yachajunchipash.

² Jesusca Jerusalenbi Jehová Diospa templotaca ninandami respetan carca. Ninanda respetajta ricushpami Jesusta catijcunaca salmistapa cai shimicunata yarirca: ‘Canba huasita ninandapacha  juyaimandami huañujurcani’ nishpa (Sal. 69:9; Juan 2:17). Cunan punllacunapi Tandanajui Huasicuna Jehovata adorangapaj cashpapash Jerusalenbi temploshna Jehovapa huasica na canllu (2 Crón. 5:13; 33:4). Shinapash Tandanajui Huasicunataca respetanami canchi. Chaimandami cai temapica huaquin textocunata ricushpa yachajushun, Tandanajui Huasicunapi imashina portarinata, ama huaglichun imashina cuidanata, shuj Tandanajui Huasicunatapash rurashpa catichun imashina ayudanatapash. *

3-5. a) Tandanajui Huasicunaca ¿imapata can? b) Ñucanchi tandanajuicunamandaca ¿imatata pensana capanchi?

³ Tandanajui Huasicunapi tandanajushpami Jehovata adoranchi. Tandanajui Huasicunapimi ñucanchitaca Jehovaman ashtahuan quimirichun ayudan, Jehovapa organizacionbash ñucanchita animan. Chaipimi Jesuspash Jehová Diospash cada semana micunaguta caranshna ñucanchimanga yachachinajun. Paicunamanda yachajunaca shuj jatun bendicionmi can (1 Cor. 10:21, NM).

⁴ Jehová Diosca tandanajuicunaman rishpa paita adorachun, shuj huauquicunahuan animarichunmi munan. Tandanajuicuna minishtirishca cashcata tucuicuna intindichunmi apóstol Pablotaca escribichirca, tandanajuicunamanga na faltanachu canguichi nishpa (Hebreos 10:24, 25, liingui). Shinaca imamandapash yangata tandanajuicunaman faltashpaca ¿Jehovata respetashcata ricuchinajunchimanllu? Tucuilla tandanajuicunaman rishpapash aliguta prepararishpami rina canchi, cushijushpami comentana canchi. Shinami tandanajuicunata respetashcata ricuchishun (Sal. 22:22).

⁵ Imashinami Jehovapa shutita respetanchi shinallatami Tandanajui Huasicunatapash, tandanajuicunatapash respetana canchi. Na cunganachu capanchi, ashtaca Tandanajui Huasi letrerocunapica Jehovapa shutimi tiajun (1 Rey. 8:17).

6. Tandanajui Huasicunatapash, chaiman rij huauquipanicunatapash ricushpaca ¿imatata huaquin gentecunaca nishca? (Callari dibujota ricupangui.)

⁶ Tandanajui Huasicunata respetohuan tratajtaca shuj gentecunapash ricunajunmi. Huaquin gentecuna imata nishcata ricupashun. Turquía llactapi shuj jarica nircami: “Tandanajui Huasiman rinataca alicachircanimi. Tucuillami limpio, ali arreglashca carca. Gentecunapash aliguta mudarishca, cushillami carca. Tucuillami cushilla chasquihuarca. Ninandami alicachircani” nin. Chaita ricushpami paica tandanajuicunaman rishpa catirca, jipamangarin bautizarirca. Indonecia llactapipash shuj congregacionmanda huauquipanicunami vecinocunataca Tandanajui Huasi tucurishcata ricuchun invitarca. Chai llacta municipiopi trabajaj gentecunatapashmi invitarca. Chai Tandanajui Huasi ali rurashca cashcata, jardinbash juyaillagu cashcata ricushpami alcaldepash manllarishpa nirca: “Cangunaca Tandanajui Huasitapash limpio charishpami imata villachinajushcata pactachinajunguichi” nishpa.

7, 8. ¿Imashinata huaquinbica tandanajuicunata na respetashcata ricuchinchiman?

⁷ Jehová Dios tandanajuicunaman invitajushcamandaca aliguta mudarishpami rina canchi, aligutami portarina canchi. Huaquingunaca tandanajuicunapi imata rurana cashcamanda imata na rurana cashcamandaca ushashcatami preocuparin. Cutin shujcunaca nimata na preocuparinllu. Jehová Diosca tucuillacuna Tandanajui Huasipi cushilla, ali sintirichunmi munan. Shinapash ¿imashinata huaquinbica tandanajuicunata na respetashcata ricuchinchiman? Huaquinbica maipash cachun mudarishpa, celularcunapi  mensajeta cachashpa, shujcunahuan parlanajushpa o micunata micushpami tandanajuicunata na respetashcata ricuchinchiman. Ashtahuangarin taitamamacunapash huahuacunataca yachachinami can, Tandanajui Huasipica na calpajunachu can, na pugllajunachu can nishpa (Ecl. 3:1).

⁸ Jesusta yaripashun. Jehovapa templopi gentecuna jatunajujta ricushpaca Jesusca ninanda culirashpami chai jatujcunataca tucuillata llujchishpa cacharca (Juan 2:13-17). Ñucanchicunapash Jehovamanda yachajungapaj, Jehovata adorangapami tandanajuicunamanga rinchi. Chaimandami Tandanajui Huasipica Jehovapa cosascunamanda parlana canchi, negocio cosascunamandaca na parlanachu canchi (Nehemías 13:7, 8​ta ricupangui).

9, 10. a) Testigo de Jehovacunaca ¿imashinata Tandanajui Huasicunataca ruran? b) Shina ayudashcamandaca ¿ima bendiciongunatata charishcanchi? c) Tandanajui Huasicunata na rurai ushaj congregaciongunataca ¿imashinata Jehovapa organizacionga ayudashca?

⁹ Jehovapa organizacionga tucuicuna paicunapa Tandanajui Huasipi Jehovata adorachun munashpami tauca arreglocunata ruran. Mundo enteropica ashtaca huauquipanicunami Tandanajui Huasicunapa planocunata rurashpa, huasichishpa, maucalla Tandanajui Huasicunata mushujyachishpa ayudan. Shina ayudashcamandami 1 de noviembre de 1999 huatamandaca 28 mil yali Tandanajui Huasicunata mundo enteropica rurashca, arreglashcapash. Shinami cai último 15 huatacunapica cada punlla picha Tandanajui Huasicunata ruranajushcanchi.

¹⁰ Bibliapica yachachinmi, imagupash illajcunamanga yapalla charijcuna carashpami tucuicuna chashnatallata o igualta charinga nishpa. Bibliapi shina yachachijujpimi Jehovapa organizacionga pobrella llactacunapipash Tandanajui Huasicunata rurangapaj arreglocunata rurashca (2 Corintios 8:13-15, liingui). Chai arreglocunata na rurajpica ashtaca congregaciongunaca Tandanajui Huasicunataca na charinmanllu carca.

11. a) Huaquin huauquipanicunaca ¿imatata paicunapa Tandanajui Huasicunamandaca nishca? b) Chai huauquipanicunapi pensarishpaca ¿imashinata sintiripangui?

¹¹ Costa Rica llactamanda shuj pobrella congregacionga nircami: “Ñucanchi Tandanajui Huasita ricushpaca na cri usharcanchichu. 8 punllacunapillami tucuchircanchi. Jehová Dios, paipa organización, ñucanchi huauquipanicuna ayudajpillami cai Tandanajui Huasitaca ricui ushashcanchi. Jehová Diosmi carashca. Cushijushcapachami canchi” nishpa. Jehová Dios ayudashcamanda mundo enteropi ashtaca huauquipanicuna tucui shunguhuan agradicijta ricushpaca ñucanchipashmi cushijunchi. Tandanajui Huasicunata rurashpa tucuchijpi ashtaca gentecuna tandanajuicunaman rishpa Bibliata ashtahuan yachajushpa catijpimi, Jehová Diosca pobrella llactacunapi Tandanajui  Huasicunata rurachun munashcata yachanchi (Sal. 127:1).

12. Ashtahuan Tandanajui Huasicunata rurachunga ¿imashinata cada uno ayudai ushapanchi?

¹² Ashtaca huauquipanicunaca Tandanajui Huasicunata ruranapi ayudana cushijuitami charishca. Na chaiman rishpa ayudaita ushashpaca ¿imatata rurai ushapanchi? Tandanajui Huasicunata ruranapi na participai ushashpaca shuj Tandanajui Huasicunatapash rurachunmi contribuciongunata churai ushanchi. Shinami punda tiempocunapi Jehovata sirvijcunapa ejemplota catishpa Jehovata adorana huasicunata rurachun ayudanajushun (Éx. 25:2; 2 Cor. 9:7).

13, 14. Bibliapi nishca shinaca ¿imamandata Tandanajui Huasitaca limpio, aliguta arreglashcata charina capanchi?

¹³ Jehová Diosca jucha illaj, limpio, santo Diosmi can. Paica ñucanchi Tandanajui Huasi limpio, aliguta arreglashca cachunmi munan (1 Corintios 14:33, liingui). * Jehová Dios shina limpio cangapaca pai munashcashnami adorana canchi, pai imata alicachishcatami pensana, rurana canchi. Ñucanchi cuerpopipash limpiomi cana canchi (Apoc. 19:8).

¹⁴ Ñucanchi Tandanajui Huasica siempremi limpio, ali arreglashca cana can. Shinami gentecunata invitanataca na pinganayachishun. Pensaripai. Shamuj punllacunapica shuj juyailla, limpio paraíso Alpagupimi causashun nishpa villachinajushpapash ñucanchi Tandanajui Huasi mapa cashpaca ¿alicha canman? Tandanajui Huasita siempre limpio charishpami imata villachinajushcata pactachishpa, juyailla, limpio paraíso Alpaguta carana Diosta adoranajushcata ricuchinajushun (Is. 6:1-3; Apoc. 11:18).

15, 16. a) Tandanajui Huasita siempre limpio charinaca ¿imamandata huaquinbica na fácil can? b) ¿Imamandata ñucanchi Tandanajui Huasitaca siempre limpio charina capanchi? c) Quiquinba Tandanajui Huasita limpio charingapaca ¿ima arreglocunata tian? d) ¿Imatata tucuicunallata rurana capanchi?

 ¹⁵ Tandanajui Huasita siempre limpio charinaca huaquinbica na facilchu can. ¿Imamandata na fácil can? Huaquingunaca polvolla, turulla pushtucunapimi causan. Cutin shujcunaca ashtaca yacu tiashca pushtucunapi, huasita limpiangapaj ashtaca cosascuna tiaj pushtucunapimi causan. Huaquinbicarin limpiolla huasipi o ashata mapalla huasipimi viñashcanchi. Chaimandami huaquinbica, huasita imashina limpiota charinamandaca shuj shuj yuyaicunata charinchi. Shinapash, maipi causashca cashpapash vecinocuna imata pensajpipash Jehovata adorana huasi cashcamandami ñucanchi Tandanajui Huasitaca siempre limpio, aliguta arreglashca charina canchi (Deut. 23:14).

¹⁶ Ñucanchi Tandanajui Huasi siempre limpio cachunga limpiangapaj shuj programatami charina canchi. Ancianocunaca siempremi limpiangapaj programataca listo charina can, limpiangapaj imapash faltajujtaca yaipimi charina can. Ashtahuangarin tucuilla Tandanajui Huasita ali limpiangapami huauquicunataca aliguta organizana can. Huaquin cosascunataca tandanajui tucurishcandimi limpiana can. Cutin shuj cosascunataca huaquinbi huaquinbi limpianami minishtirin. Ashtahuangarin tucuicunami ñucanchi Tandanajui Huasicunata limpio charina cushijuita, obligaciondapash charinchi.

17, 18. a) Jehovapa templo ama huaglichunga ¿imatata punda tiempopi Jehovata huaquin sirvijcunaca rurarca? b) ¿Imamandata ñucanchi Tandanajui Huasica ali cana can?

¹⁷ Jehovata sirvijcunaca Tandanajui Huasicuna ama huaglishpa catichunbash ricurianajunmi. Punda tiempocunapica, Judá llactamanda rey Jehoasmi sacerdotecunataca mandarca, contribuciongunata cushca culquihuan Jehovapa templopi asha huaglirishcacunataca arreglanguichi nishpa (2 Rey. 12:4, 5). Rey Josiaspashmi 200 huatacuna jipamanga contribucionguna cushca culquihuan Jehovapa templotaca arreglachirca (2 Crónicas 34:9-11, liingui).

¹⁸ Sucursalcunaca ninmi, huaquin llactacunapica Tandanajui Huasicuna ama huaglichun nishpa ricurianataca cunganmi nishpa. Huaquinbica culquita na yapalla charimanda o huaglishcacunata imashina arreglaita na ushaimandami shina canga. Shinapash tucuicunallatami yarina capanchi, ama huaglichun ricuriashpa arreglachijpica Tandanajui Huasicunaca unaitami paranga. Vecinocunapash Tandanajui Huasicunata ñucanchi cuidariajtaca ricungami. Congregacionbi tucuilla huauquipanicuna Tandanajui Huasita cuidajpica, contribucionguna cushca culquica na yapata gashtaringachu. Ashtahuangarin ali Tandanajui Huasicunahuanmi Jehovatapash ashtahuan alabanajushun.

19. Tandanajui Huasita respetashcata ricuchingapaca ¿imatata ruragripangui?

¹⁹ Tandanajui Huasicunaca Jehovata adorangapami can. Na pipapash canllu, ni maijan congregacionbapash na canllu. Imashinami cai temapi huaquin textocunata ricushpa yachajushcanchi, Jehovata respetashpaca tandanajuicunatapash, ñucanchi Tandanajui Huasicunatapash respetanami canchi. Ashtahuan Tandanajui Huasicunata rurachunbash contribuciongunata churanami canchi. Ama huaglichun, limpio ricurishpa catichunbash ayudanami canchi. Shinami shujcunaca ñucanchicuna Jesuspa ejemplota catishpa Jehovata adorana huasita ninanda alicachishcata ricunga (Juan 2:17).