1, 2. (a) Hundiri Yihowa soqqamaano iso magansiꞌrate horoonsidhino bayichuwa hiikkuriiti? (b) Yesuusi hunda Yerusaalamete noota Maganu beetemeqidese ma garinni laino? (c) Konni birxichira maa ronseemmo?

 HUNDINNI kayise Maganu soqqamaanora iso magansidhanno bayichi noonsa. Abeeli Maganoho kakkalo shiqishi yannara kakkalote bayicho qixxeessiꞌrinoha ikkara dandaanno. (Kal. 4:3, 4) Nohi, Abirahaami, Yisaaqi, Yaaqoobinna Museno kakkalote bayicho qixxeessitino. (Kal. 8:20; 12:7; 26:25; 35:1; Wol. 17:15) Isiraeelete daga Yihowa uyino biddishshi garinni xaadooshshu dunkaana mintino. (Wol. 25:8) Yannate gedensaanni, insa Yihowa magansiꞌrate beetemeqidese miꞌnitino. (1 Neg. 8:27, 29) Yihudootu Baabiloonete qafadonni higgu gedensaanni, mukuraabete ganyite gamba yitanno. (Marq. 6:2; Yoh. 18:20; Looso 15:21) Hundi Kiristaani songonsa giddo noo roduuwi minnara gamba yaanno. (Looso 12:12; 1 Qor. 16:19) Yannankera Yihowa soqqamaano alamete deerrinni lowo kume ikkitannote Mangistete Addaraashera rosohonna Magano magansiꞌrate gamba yitanno.

² Yesuusi Yerusaalamete noota Yihowa beetemeqidese lowo geeshsha baxannonna ayirrisanno daafira, rosaanosi masaalaanchu togo yiinota qaaggino: “Minikkira lowo geeshsha diinaggaaweemmo daafira giddoꞌya bubbu.” (Far. 69:9; Yoh. 2:17) Hunda Yerusaalamete noo  beetemeqidese yinanni garinni Mangistete Addaraashe “Yihowa mineeti” yaa didandiinanni. (2 Zee. 5:13; 33:4) Ikkirono, Qullaawu Maxaafi yannankera Magano magansiꞌneemmo bayicho ma garinni horoonsiꞌranna ayirrisa hasiissannonkero kulannoha xintu seera amadino. Konni birxichira Mangistete Addaraashera heeꞌnoommo wote hiittoo akata leellisha hasiissannonkero, Addaraashenke towaata dandiineemmo garanna woxunni kaaꞌla dandiineemmo gara afate kaaꞌlannonkeha xintu seera ronseemmo. a

3-5. Mangistete Addaraashe maaho kaaꞌlitanno? Tenne afanke songote gambooshshuwanke ma garinni laꞌneemmo gede assitannonke?

³ Mangistete Addaraashe qooxeessaho halaalu magansiꞌrara mereerima bayichooti. Yihowa ayyaanaamittete sagale sagaꞌlineemmo gede qixxeessinonke qixxaawo giddo mitte lamalate giddo Mangistete Addaraashera heedhannonke gambooshshuwaati. Dirijjitesi widoonni hasiissannonke jawaantenna biddishsha afiꞌneemmohu hakkooti. Gambooshshe daannohu baalunku hakka daannohu Yihowanna Beettisi koyisseennaati yaa dandiinanni. “Yihowa sagale” ganyine sagaꞌlineemmo gede koyisammoommo; konne koyishsha kayinni mulluri gede assine horonta laꞌꞌa dihasiissannonke.—1 Qor. 10:21.

⁴ Yihowa konni garinni gamba yine iso magansiꞌrankenna mimmito jawaachishanke lowo geeshsha kaffi asse laꞌꞌanno; konni daafira, isi hawaariya Phaawuloosi gamba yaanke deꞌneemmokki gede amaalankera ayyaanisinni kakkayisino. (Ibiraawuyaani 10:24, 25 nabbawi. b) Ikkina garire ikkinokki coyira songote gambooshshe honseemmoha ikkiro, hatti Yihowa ayirrisa ikkitanno? Gambooshsheho dancha gede qixxaawankenna beeqqanke Yihowanna qixxaawosi lowo geeshsha kaffi assine laꞌneemmota buuxissanno.—Far. 22:22.

⁵ Mangistete Addaraashera heeꞌne leellinsheemmo akatinna Addaraashe towaanteemmo gari Yihowa mageeshshi geeshsha ayirrinseemmoro leellishanno. Amanyootinke, duucha bayicho Mangistete Addaraashenkera taappeellaho borreessaminohu Maganu suꞌmi ayirranno gede assannoha ikkara hasiꞌneemmo.—1 Negesti 8:17 ledo heewisiisi.

6. Mitu manni Mangistete Addaraashenkenna hakko laino manni daafira mayino? (Umi misile lai.)

⁶ Magano magansiꞌneemmo bayicho ayirrinseemmo gara duucha wote Yihowa Farciꞌraasine ikkinokki manni huwatanno. Lawishshaho, Turkete gobbara mittu manchi togo yiino: “Mangistete Addaraashe fiine biifinsoonni garinna hakko laoommo amanyooti dhagge ikkinoe. Hakko noo manni amanyootunni uddiꞌrino, faasiiqaho, hattono dancha gede keere haarinoe. Tini lowo geeshsha dhagge ikkitinoe.” Kuni manchi ganye gambooshshe daa hanafi; hakkiinni mulenni cuuamino. Indooneezhiyaho mittu katamira, songo haaro Mangistete Addaraashensa daaꞌꞌattanno gede qooxeessu gashshaanonna olluu manna koyissino. Hakkiinni katamu kantiiba ikkino manchi laꞌꞌara dayi. Kuni manchi Addaraashete isilanchimma, uyitanno kaaꞌlo, hattono hoowete giddo nooha biifado awawa lae lowo geeshsha dhagge assiꞌrino. Qoleno, “Tini addaraashe togo coꞌitte ikkase jawaata ammana nooꞌneta leellishshanno” yiino.

7, 8. Songote gambooshshe daggannori hiitte coyibba dea dihasiissannonsa?

⁷ Uddiꞌrankenna seenseemmo gari, songote gambooshshira koyisinonke Maganira noonke ayirrinye leellishannoha ikka hasiissannosi. Hakko daafira quwa disaꞌneemmo. Mitootu songote gambooshshiwa konni garinni calla uddiꞌra woy  seesa hasiissanno yite danna saꞌannota, wolootu qolte horo lashshi yite kaꞌu gedeeta uddiꞌrate widira higginota buunxoonni. Yihowa soqqamaanosino ikko koyisame daanno wosini Addaraashe daanno wote hagiidhara hasiꞌranno. Ikkirono, gambooshshe daggannori kaꞌu gedee uddano uddidhe, silketenni sokka borreessite sokkanni, gambooshshu yannara hashaashantanni, ittanninna agganni, woy wole togoore assite wolootu hedo bebbeehantanno gede assa dihasiissannonsa. Annuwunna amuuwu oosonsara Mangistete Addaraashe dodammanninna godoꞌlinanni base ikkitinokkita rosiisa hasiissannonsa.—Mek. 3:1.

⁸ Yesuusi lowo geeshsha hanqe Maganu beetemeqidese giddo daddaltanni noore hakkiinni shorrino. (Yoh. 2:13-17) Mangistete Addaraashenkeno Magano magansiꞌneemmonna ayyaanaamittete roso ronseemmo bayichooti. Konni daafira Addaraashete heeꞌne daddalu looso loosa horonta gara diꞌꞌikkitino.—Nehimiya 13:7, 8 ledo heewisiisi.

9, 10. (a) Mangistete Addaraashe minnanni heeꞌnoonnihu hiittoonniiti? Tini mayi guma abbitino? (b) Mangistete Addaraashe miꞌnate anga assitannonsakki songuwara lowo geeshsha kaaꞌlitanni nooti hiittee kaajja qixxaawooti?

⁹ Yihowa dirijjite alamete deerrinni Mangistete Addaraashe minate lowore assitanni no. Addaraashete safo qixxeessitannori, mintannori, hattono gatamartannori woxe baantinsakki uminsa fajjonni loossannoreeti. Tini abbitino gumi maati? Bocaasa 1, 1999 hanafe, alamete deerrinni 28,000 saꞌannota haaro biifado Mangistete Addaraashuwa minnoonni. Hatto yaa, saihu 15 diri giddo barru barrunku mereerimunni onte Mangistete Addaraashe minnoonni yaate.

¹⁰ Mangistete Addaraashe hasiissannowa baalankawa minate looso irkisate lowore assinanni heeꞌnoonni. Tenne assate, miinju noonsari angate anje noonsare kaaꞌlite ‘duha taalo beeqqitanno gede’ kulannoha Qullaawa Borroha xintu seera harunsineemmo. (2 Qorontoosi 8:13, 14 nabbawi; c 2 Qor. 8:15) Konni garinni, Mangistete Addaraashe miꞌnate anga assitannonsakki songuwara biifado Addaraashuwa mina dandiinoonni.

11. Mitu roduuwi haaro Mangistete Addaraashe minanteennansa mayitino? Tini ninkera mayi macciishshamannonke gede assitanno?

¹¹ Tenne qixxaawonni horo afidhinoti Kostaarikaho nooti mitte songo aante noo sokka borreessitino: “Mangistete Addaraashenkera albaanni uurrine laꞌneemmo wote, haaqe lawannonke! ‘Tini ise ninkente?’ yine dhagge assiꞌneemmo. Tini kaajja addaraashenke settu barrinni calla minante gooffino! Kuni ikka dandiinohu Yihowa atooti, dirijjitesi assitino qixxaawonna roduuwinke kaaꞌlo noo daafiraati. Magano magansiꞌneemmoti tini base Yihowa uyinonkete muxxe eltootinna jirooti. Tennera hagiirrinke baete.”  Haaro Mangistete Addaraashe minanteenna roduuwu togo giddonsanni hagiidhite coyidhanna macciishshanna alamete deerrinni lowo kume ikkitannote wole baserano roduuwinke hattonni hagiidhitanni noota afa tashshi diassitannonke? Kuni Yihowa looso ikkino daafira, duucha wote haaro Mangistete Addaraashuwa minante gooffanni heedheenna baxillaanchu Kalaqaanchinkere lede afa hasiꞌrannohu suwashshu wodani noonsa manni daye woꞌmanno.—Far. 127:1.

12. Mangistete Addaraashe minate looso kaaꞌla dandaattohu hiittoonniiti?

¹² Batinyu roduuwi Mangistete Addaraashe minate looso kaaꞌlite lowo hagiirre afidhino. Mangistete Addaraashe mina kaaꞌla dandiineemmoha ikkirono ikka hoogirono, ninke baalunku konne looso woxe fushshine kaaꞌla dandiineemmo. Hundi yannara Magano magansiꞌnanni mine minate hagiirrunni woxe fushshinohu Maganu manni faale haꞌneemmo.—Wol. 25:2; 2 Qor. 9:7.

13, 14. Mangistete Addaraashe fiine coꞌitte assa hasiissannota leellishshannoti Qullaawu Maxaafiti xintu seerubba hiikkuriiti?

¹³ Mitte haaro Addaraashe minantu gedensaanni, magansiꞌneemmohu dancha amanyoote baxanno Magani akatta ledo sumuu yaanno garinni fiine mishiishannore hoola hasiissanno. (1 Qorontoosi 14:33, 40 nabbawi. d) Qullaawu Maxaafi qullaambenna ayyaanaamittete keeraanchimma bisu coꞌimma ledo xaado afidhinota kulanno. (Aju. 19:8) Konni daafira, Yihowa hagiirsiisa hasiꞌranno manni bisonsa hayishshiꞌra roso assiꞌra hasiissannonsa.

¹⁴ Tini xintu seerubba leellishshannonte gede, addaraashenke noo gari hasatto noonsa manna gambooshshenke daara koyisate fokkisiisannokkiha  ikkanno gede assa hasiissannonke; hatto ikkiro wolootu dudumbeemmohu danchu duduwi ledo sumuu yine heeꞌneemmota huwattanno. Qoleno, magansiꞌneemmo Magani qullaawa ikkinotanna isi muli yanna giddo uulla coꞌitte gannate assannota affanno.—Isa. 6:1-3; Aju. 11:18.

15, 16. (a) Mangistete Addaraashe fiine coꞌitte assa shota ikka hooggara dandiitannohu mayiraati? Ikkirono Addaraashe danchu garinni amada hasiissannohu mayiraati? (b) Songote giddo Addaraashe feyatenna towaatate mayi qixxaawo no? Ninke baalunkura mayi qoosso noonke?

¹⁵ Keeraanchimma agadhate daafira mannaho addi addi lao heedhansara dandiitanno. Mayira? Korkaatuno, mannu lophanno gari addi addiha ikkino daafiraati. Qoleno, mitu manni heeꞌrannohu buko batidhannowa, woy doogga sabbitannowaati. Wolootu qolte gari wayi woy keeraanchimma agadhate hasiisannohu gari uduunni nookkiwa heedhanno. Ikkollana, heeꞌneemmo qooxeessi ikkihano ikkiro, Mangistete Addaraashe Yihowa suꞌmi noo bayichonna halaalu magansiꞌra base ikkitinohura, danchu garinni amada hasiissannonke.—Marro 23:14.

¹⁶ Mangistete Addaraashe feya xaandi wote calla assinannire diꞌꞌikkino. Mittu mittunku cimeeyyete bisi Addaraashe noo base danchu garinni amadate pirogiraame fushshanna hasiisannohu baqete uduunni heeꞌranno gede assa hasiissannonsa. Mituwi gambooshshe assiꞌni kiiro fiinanniha wolu kayinni saꞌne saꞌne towaantanniha ikkino daafira, deamannori heeꞌrannokki gede dancha gede qineessanna illaallisa hasiissanno. Songote miilla baalantera tennera kaaꞌlamate qoosso noonsa.

17, 18. (a) Magano magansiꞌnanni base towaatatenna gatamarate dancha lawishsha ikkitannori Qullaawu Maxaafi giddo kulloonniri ayeooti? (b) Mangistete Addaraashe danchu garinni amada hasiissannonkehu mayiraati?

¹⁷ Yihowa soqqamaasine iso magansidhanno bayicho dancha gede gatamarate diinaggaabbanno. Yihudu Nugusi Iyyoaasi, kakkalaano Yihowa minira fushshinoonni woxe haadhe “minu hiinxiꞌrino widiido baalanka gatamarate” horoonsidhanno gede hajajino. (2 Neg. 12:4, 5) Nugusu Iyyoosiyaasino 200 diri gedensaanni, beetemeqidesete fushshinoonni woxe Maganu mine gatamarranni gede assate horoonsiꞌrino.—2 Zee. 34:9; 2 Zeena 34:10, 11 nabbawi. e

¹⁸ Mite Sinu Biiro Komite gobbansara mannu mine woy uduunne dancha gede amaxxate rosichi noonsakkita huwattino. Kuni ikkinohu tennera egenno woy hasiisanno uduunni noonsakki daafira ikkara dandaanno. Ikkollana, Mangistete Addaraashe towaata lashshi assine agurranniha ikkiro, Addaraashe mulenni doofaartara dandiitanno; tini qolte qooxeessu mannira dancha lawishsha diꞌꞌikkitanno. Songote miilla baalanti Mangistete Addaraashe dancha gede amadate dandaamannonsare baala assitannoha ikkiro kayinni, tini Yihowa ayirranno gede assitanno, hattono roduuwinke fushshitino woxe gatissanno.

19. Magano magansiꞌneemmo bayicho lainohunni maa assate murciꞌrootto?

¹⁹ Mangistete Addaraashe Yihowara aamamino jajjaati. Konni daafira, mittu manchita woy songonnita ikkitino gede assine coyiꞌra gara diꞌꞌikkitino. Qullaawu Maxaafiti xintu seerubba, kuni bayichi minni wote hendoonni alaami ledo sumuu yaanno garinni heeꞌranno gede buusama hasiissannonketa leellishshanno. Ninke baalunku Magano magansiꞌneemmo basera ayirrinyu noonketa leellisha, haaru gimbaatira woxe fushsha, hattono minantino Addaraashe feyatenna gatamarate yannankenna wolqanke uyine kaaꞌlama dandiineemmo. Tenne assineemmoha ikkiro, Yesuusinte gede Yihowate halaalu magansiꞌrara diinaggaambeemmota leellinsheemmo.—Yoh. 2:17.