Neʼe ita-nia fatin adorasaun
“Laran-manas ba Ita-nia uma sei han mohu haʼu.”—JOÃO 2:17.
KNANANUK: 13, 21
1, 2. (a) Uluk Jeová nia atan sira uza fatin saida deʼit hodi adora nia? (b) Jesus sente oinsá kona-ba Jeová nia templu iha Jeruzalein? (c) Objetivu husi lisaun neʼe mak saida?
HORIULUK kedas Jeová nia atan sira uza fatin oioin atu adora nia. Porezemplu, karik Abel harii altár ida hodi hasaʼe ninia sakrifísiu ba Jeová. (Gênesis [Kejadian] 4:3, 4) Hanesan neʼe mós ho Noé, Abraão, Isaac, Jacob, no Moisés. (Gênesis [Kejadian] 8:20; 12:7; 26:25; 35:1; Êxodo [Keluaran] 17:15) Ba ema Izraél, Jeová haruka sira harii tabernákulu. (Êxodo [Keluaran] 25:8) Ikusmai, sira harii fali templu ida hodi adora Jeová. (1 Reis [Raja-Raja] 8:27, 29) Bainhira ema judeu fila husi Babilónia, sira uza sinagoga hodi halibur malu. (Marcos 6:2; João 18:20; Apóstolu 15:21) Ema kristaun iha apóstolu sira-nia tempu halibur malu iha ema husi kongregasaun nia hela-fatin. (Apóstolu 12:12; 1 Korinto 16:19) Ohin loron, iha mundu tomak Jeová nia povu uza Reuniaun-Fatin hodi estuda no adora Jeová.
2 Jesus respeitu tebes Jeová nia templu iha Jeruzalein. Tanba ninia domin ba templu neʼe mak halo ninia dixípulu hanoin fali liafuan sira neʼebé hakerek iha Salmo dehan: “Laran-manas ba Ita-nia uma mak han mohu haʼu.” (Salmo [Mazmur] 69:9; João 2:17) Ita la bele bolu Reuniaun-Fatin nuʼudar “Jeová nia uma” hanesan templu iha Jeruzalein. (2 Crônicas [Tawarikh] 5:13; 33:4) Maibé Bíblia iha prinsípiu balu neʼebé bele ajuda ita ohin loron atu uza didiʼak no hatudu respeitu ba fatin adorasaun neʼe. Objetivu husi lisaun neʼe mak atu ajuda ita uza didiʼak prinsípiu sira husi Bíblia atu haree toʼok oinsá mak ita haree kona-ba ita-nia Reuniaun-Fatin, sé mak selu, no oinsá atu tau matan didiʼak. *—Haree nota iha kraik.
HATUDU RESPEITU BA ADORASAUN NEʼEBÉ MOOS
3-5. Saida mak Reuniaun-Fatin, no ita tenke iha hanoin saida kona-ba reuniaun sira?
3 Reuniaun-Fatin mak sentru ba adorasaun neʼebé moos iha komunidade nia leet. Husi bensaun espirituál hotu neʼebé Jeová fó mai ita, bensaun ida mak ita-nia reuniaun sira neʼebé ita halaʼo semana-semana iha Reuniaun-Fatin. Husi reuniaun sira-neʼe mak ita simu matadalan no laran-manas husi Jeová nia organizasaun. Ita tuir reuniaun sira-neʼe tanba Jeová no Jesus mak konvida ita atu tuir. Maibé tanba ita hetan ona konvite atu han iha “Jeová nia meza”, ita tenkesér hafolin liután oportunidade espesiál neʼe.—1 Korinto 10:21.
4 Tanba Jeová haree reuniaun sira nuʼudar oportunidade importante tebes ba ita-nia adorasaun no oportunidade atu anima malu mak nia leno apóstolu Paulo fó anima ita hodi labele falta reuniaun sira-neʼe. (Lee Ebreu 10:24, 25.) Hanoin toʼok se ita mak la iha razaun diʼak atu falta reuniaun sira, neʼe hatudu respeitu ba Jeová ka lae? Bainhira ita prepara didiʼak no partisipa ho laran ba reuniaun sira, neʼe hatudu duni ita-nia agradese ba Jeová no ninia bensaun sira.—Salmo (Mazmur) 22:22.
5 Ita tenke hatudu respeitu ba Reuniaun-Fatin liuhusi ita-nia hahalok no ita-nia hanoin kona-ba atividade sira neʼebé ita halaʼo iha fatin neʼe. Tuir loloos ita-nia hanoin no hahalok sira-neʼe iha ligasaun ho Maromak nia naran, tanba iha Reuniaun-Fatin nia oin ita tara hela Jeová nia naran, loos ka lae?—Kompara 1 Reis (Raja-Raja) 8:17.
6. Ema neʼebé tuir ita-nia reuniaun no ema husi liʼur hatete saida kona-ba ita-nia Reuniaun-Fatin sira? (Haree foto iha pájina 27.)
6 Tanba ita hatudu respeitu ba ita-nia Reuniaun-Fatin, neʼe mós dada ema liʼur nia atensaun. Porezemplu, iha mane ida husi rai-Turkia hatete: “Haʼu admira tebes haree Reuniaun-Fatin moos no la runguranga. Ema hotu nia hatais mós kabeer, oin-midar, no fó kumprimenta haʼu ho diʼak. Ida-neʼe book tebes haʼu.” Tan neʼe nia mós tuir beibeik reuniaun sira no ikusmai nia hetan batizmu. Iha sidade ida iha rai-Indonézia, kongregasaun ida konvida governu nia ema balu no viziñu sira atu ba haree ita-nia Reuniaun-Fatin foun ida antes ita inaugura fatin neʼe. Administradór husi sidade neʼe mós ba asiste ita-nia Reuniaun-Fatin neʼe. Nia admira tebes tanba haree ita-nia Reuniaun-Fatin neʼe harii ho kualidade neʼebé diʼak, modelu kapás, no jardín mós haree furak tebes. Nia dehan: “Imi-nia fatin moos neʼe haleno duni imi-nia fiar neʼebé loos.”
Buat neʼebé ita halo bele hatudu ita la respeitu Maromak (Haree parágrafu 7, 8)
7, 8. Pontu importante saida deʼit mak ita tenke hanoin-hetan bainhira bá tuir reuniaun sira iha Reuniaun-Fatin?
7 Ita tenke hatudu respeitu ba Maromak neʼebé konvida ita tuir reuniaun sira liuhusi ita-nia hahalok, hatais, no dalan neʼebé ita hafutar an. Maibé kuidadu atu la halo lei ka la estika an demais liu. Iha kongregasaun balu, irmaun-irmán sira halo lei kona-ba hatais ka hahalok neʼebé mak diʼak ka la diʼak. Maibé balu fali, sira la fó atensaun ba sira-nia hatais ka hahalok. Jeová hakarak ninia atan no bainaka sira mai tuir reuniaun atu sente kmaan. Tan neʼe mak ita hatais diʼak bainhira atu ba tuir reuniaun sira no ita mós tenke kuidadu atu la haruka mensajen, koʼalia ba malu, han-hemu, no halo buat seluk bainhira reuniaun laʼo hela. Inan-aman mós tenkesér hanorin oan sira atu komprende katak Reuniaun-Fatin laʼós fatin atu halimar ka halai-bá halai-mai.—Eclesiastes (Pengkhotbah) 3:1.
8 Bainhira Jesus haree ema halo kontratu iha Maromak nia templu laran, nia sai raan nakali tebes toʼo nia soe hotu sira-nia sasán ba liʼur. (João 2:13-17) Ita-nia Reuniaun-Fatin sira mak fatin neʼebé ita uza ba halaʼo adorasaun neʼebé moos no atu hanorin ema kona-ba Jeová. Tan neʼe mak atividade negósiu ka kontratu saida deʼit mós labele lori tama mai atu halaʼo iha ita-nia Reuniaun-Fatin sira.—Kompara Neemias 13:7, 8.
DALAN ITA HARII REUNIAUN-FATIN SIRA
9, 10. (a) Oinsá mak ita harii Reuniaun-Fatin foun, no osan mai husi neʼebé? Neʼe lori rezultadu saida? (b) Arranju saida mak ajuda kongregasaun sira neʼebé uluk laiha kbiit atu harii sira-nia Reuniaun-Fatin?
9 Jeová nia povu iha mundu tomak serbisu makaʼas atu harii Reuniaun-Fatin sira. Irmaun-irmán sira fó sira-nia tempu rasik mak atu halo dezeñu, harii, no hadiʼa Reuniaun-Fatin sira-neʼe. Ita haree ona saida husi arranju neʼe? Husi 1 Novembru 1999, ita harii ona Reuniaun-Fatin foun maizumenus hamutuk 28.000. Neʼe hatudu katak iha mundu tomak, loroloron ita harii maizumenus Reuniaun-Fatin lima iha tinan 15 nia laran.
10 Bainhira ita presiza Reuniaun-Fatin ida, Jeová nia organizasaun uza osan kontribuisaun hodi halo projetu neʼe no haruka irmaun-irmán neʼebé serbisu nuʼudar voluntáriu mai atu harii. Arranju neʼe halaʼo tuir prinsípiu husi Bíblia neʼebé dehan katak sira neʼebé iha resin sei ajuda sira neʼebé menus. (Lee 2 Korinto 8:13-15.) Rezultadu husi arranju neʼe mak, kongregasaun sira neʼebé uluk laiha kbiit atu harii sira-nia Reuniaun-Fatin, agora bele iha sira rasik nia fatin furak atu halaʼo adorasaun neʼebé moos.
11. Irmaun-irmán balu hatoʼo sentimentu saida kona-ba sira-nia Reuniaun-Fatin foun, no neʼe halo Ita sente oinsá?
11 Kongregasaun ida husi rai-Kostarrika hatete: “Ami la fiar bainhira ami hamriik hateke ba ami-nia Reuniaun-Fatin, ami sente neʼe hanesan mehi ida! Fatin furak neʼe harii deʼit iha loron ualu nia laran! Neʼe tanba Jeová nia bensaun, ninia organizasaun nia arranju, no ajuda husi irmaun-irmán doben sira. Fatin adorasaun ida-neʼe mak prezente folin boot ida mai ami, buat murak neʼebé Jeová fó mai ami. Ami sente haksolok tebetebes ho fatin ida-neʼe.” Rona irmaun-irmán sira hatoʼo agradese hanesan neʼe ba Jeová ba buat neʼebé nia halo fó sira, neʼe halo ita mós sente kontente tebes. Ita haksolok ho irmaun-irmán sira iha mundu tomak tanba agora sira iha ona sira-nia Reuniaun-Fatin rasik atu adora Jeová. Bainhira Reuniaun-Fatin sira harii tiha, ita haree ema laran-loos barak mós tuir reuniaun sira atu aprende kona-ba Jeová. Husi neʼe ita haree duni katak Jeová fó daudaun bensaun ba arranju atu harii Reuniaun-Fatin neʼe.—Salmo (Mazmur) 127:1.
12. Oinsá mak ita bele fó apoia atu harii Reuniaun-Fatin?
12 Irmaun-irmán barak neʼebé ajuda ona harii Reuniaun-Fatin, sira sente haksolok tebes hodi bele envolve iha projetu neʼe. Ita hotu bele fó ita-nia ajuda ba projetu neʼe. Karik balu la bele bá rasik atu ajuda, maibé liuhusi tau osan iha kaixa kontribuisaun ba projetu neʼe mós ajuda ida, loos ka lae? Ita halo tuir duni ezemplu husi Maromak nia povu husi tempu uluk atu hatudu katak ita mós ho laran atu apoia adorasaun neʼebé moos liuhusi fó ajuda atu halaʼo projetu sira husi Jeová, tanba glória hotu sei fila fali ba nia.—Êxodo (Keluaran) 25:2; 2 Korinto 9:7.
HAMOOS REUNIAUN-FATIN
13, 14. Bíblia nia prinsípiu saida deʼit mak bele ajuda ita atu tau matan didiʼak ba ita-nia Reuniaun-Fatin atu haree moos no la runguranga?
13 Bainhira harii tiha Reuniaun-Fatin ida, ita hakarak fatin neʼe atu haleno Maromak nia hahalok furak sira. Tan neʼe presiza atu hamoos beibeik no sempre arruma sasán hotu didiʼak, tanba neʼe atu hatudu katak Maromak neʼebé ita adora laʼós Maromak runguranga nian. (Lee 1 Korinto 14:33, 40.) Atu bele moos no santu hanesan Jeová, laʼós deʼit ita-nia adorasaun, hanoin, no hahalok mak tenkesér moos, maibé neʼe mós inklui ita-nia isin.—Apokalipse 19:8.
14 Se ita-nia Reuniaun-Fatin mak moos, ita la sente moe atu konvida ema mai tuir ita-nia reuniaun sira. No ema mós bele hatene katak ita laʼós haklaken ho ibun deʼit katak mundu foun sei sai moos, maibé agora daudaun ita halo tuir duni buat neʼebé ita haklaken. Sira mós bele haree katak Maromak neʼebé ita adora mak Maromak neʼebé moos no santu. Ninia promesa ba mundu foun neʼebé moos sei sai loos duni.—Isaías (Yesaya) 6:1-3; Apokalipse 11:18.
15, 16. (a) Tanbasá mak la fasil atu mantein Reuniaun-Fatin hodi moos nafatin, maibé tanbasá mak ida-neʼe importante? (b) Arranju saida mak Ita rasik nia kongregasaun halo atu hamoos Reuniaun-Fatin, no ita ida-idak iha knaar espesiál saida?
15 Ema balu interese kona-ba haree moos no balu lae. Karik neʼe tanba iha sira-nia moris, sira ladún hanoin kona-ba ida-neʼe. Balu tanba fatin neʼebé sira hela, iha rai-rahun barak, tahu, foʼer, ka bee laiha. Maski iha situasaun neʼebé la hanesan, maibé kona-ba Reuniaun-Fatin, ita tenkesér tau matan didiʼak hodi bele fó ezemplu neʼebé diʼak. Tanba fatin neʼe reprezenta Jeová nia naran no fatin neʼe mak fatin ba adorasaun neʼebé moos.—Deuteronômio (Ulangan) 23:14.
16 Ita presiza organiza didiʼak atu bele tau matan ba Reuniaun-Fatin hodi haree moos nafatin. Grupu katuas nian presiza halo oráriu no arranja ekipamentu hotu. Iha buat balu mak bainhira reuniaun ida-idak hotu tiha presiza halo kedas, balu toʼo kleur mak foin halo dala ida, tan neʼe katuas sira presiza organiza didiʼak atu fahe knaar sira-neʼe. Ita hotu mós iha responsabilidade atu tau matan hamoos didiʼak ita-nia Reuniaun-Fatin.
TAU MATAN DIDIʼAK BA ITA-NIA FATIN ADORASAUN
17, 18. (a) Oinsá mak ezemplu husi Jeová nia atan iha tempu uluk kona-ba tau matan ba fatin adorasaun nian ajuda ita ohin loron? (b) Tanbasá mak ita tenke tau matan ba ita-nia Reuniaun-Fatin?
17 Ita mós tau matan didiʼak atu hadiʼa buat neʼebé aat iha ita-nia Reuniaun-Fatin. Jeová nia atan sira iha tempu uluk mós halo nuneʼe. Porezemplu, Liurai Jeoás husi rai-Judá, nia haruka amlulik sira uza osan kontribuisaun husi povu ba templu hodi “haree iha fatin ruma aat, hadiʼa fali uma neʼe”. (2 Reis [Raja-Raja] 12:4, 5) Tinan 200 liutiha, Liurai Josias mós uza kontribuisaun husi templu nian hodi hadiʼa sasán neʼebé aat.—Lee 2 Crônicas (Tawarikh) 34:9-11. *
18 Sukursál barak hatete katak iha rai barak, ema ladún tau matan didiʼak ba sira-nia uma no ekipamentu sira. Karik rai sira-neʼe la hatene oinsá atu tau matan ka tanba osan laiha. Se ita la fó atensaun bainhira ita-nia Reuniaun-Fatin presiza hadiʼa, neineik-neineik fatin neʼe sei sai aat no neʼe sei la fó sasin neʼebé diʼak ba komunidade. Bainhira ita hotu hakaʼas an atu tau matan didiʼak ba ita-nia Reuniaun-Fatin, neʼe sei lori hahiʼi ba Jeová no la estraga arbiru osan neʼebé irmaun-irmán sira fó liuhusi kaixa kontribuisaun.
Tenkesér hamoos no tau matan didiʼak ba Reuniaun-Fatin (Haree parágrafu 16, 18)
19. Ita bele halo saida atu hatudu ita-nia respeitu ba fatin neʼebé ita uza ba adorasaun neʼebé moos?
19 Reuniaun-Fatin mak uma ida neʼebé dedika tiha ona ba Jeová. Uma neʼe laʼós ema ida ka kongregasaun ida nian. Hanesan ita koʼalia ona hamutuk iha lisaun neʼe katak Bíblia nia prinsípiu sira ajuda ita atu haree katak fatin neʼe mak fatin neʼebé ita uza ba adorasaun neʼebé moos. No tanba ita respeitu Jeová, ita hakarak hatudu respeitu ba reuniaun sira neʼebé halaʼo iha Reuniaun-Fatin. Ita mós kontente atu fó kontribuisaun ba projetu harii Reuniaun-Fatin foun sira. Ita fó ita-nia tempu no forsa atu tau matan didiʼak ba ita-nia Reuniaun-Fatin hodi bele haree moos no mantein ho didiʼak. Se ita ho forsa tomak apoia arranju neʼe, ita hatudu duni katak ita iha laran-manas hanesan Jesus ba fatin adorasaun neʼebé moos.—João 2:17.
^ par. 2 Maski lisaun neʼe koʼalia liuliu kona-ba Reuniaun-Fatin sira, maibé prinsípiu sira-neʼe mós aplika ba fatin atu halaʼo reuniaun boot no fatin seluk tan neʼebé ita uza ba adora Jeová.
^ par. 17 2 Crônicas 34:9-11: “9 Sira bá amlulik boot Hilquias no fó ba nia osan neʼebé mai husi Maromak nia uma, osan neʼebé ema Levi neʼebé serbisu hein odamatan sira kobra husi Manase, Efraim, no husi ema Izraél restu sira, no mós husi Judá, Benjamin, no husi ema sira neʼebé hela iha Jeruzalein. 10 Tuirmai sira fó osan sira-neʼe ba ema neʼebé simu knaar atu tau matan ba Jeová nia uma. Depois, serbisu-naʼin sira uza fali osan neʼe atu hadiʼa uma neʼe. 11 Sira fó osan neʼe ba badain sira atu sosa fatuk neʼebé halo kabeer tiha ona, no ai-habit sira no atu uza ai-kuadradu atu harii fali uma sira neʼebé liurai Judá sira halo monu.”
