1, 2. а) Ехованың гадымы дөвүрдәки гуллукчылары ниреде сежде эдйәрдилер? б) Инҗилде Исаның ыбадатхана болан гарайшы нәхили беян эдилйәр? в) Шу макалада нәме барада гүррүң эдерис?

ГАДЫМЫ дөвүрде яшан Худайың гуллукчылары белли бир ерде сежде этмегиң аладасыны эдйәрди. Хабыл Худая гурбанлык бермек үчин, гурбанлык сыпасыны ясаяр (Гел. чык. 4:3, 4). Нух, Ыбрайым, Эсав, Якуп ве Муса гурбанлык бермек үчин, йөрите сыпа ясапдырлар (Гел. чык. 8:20; 12:7; 26:25; 35:1; Мүс. чык. 17:15). Ысрайыллылар Ехованың гөркезмеси боюнча мукаддес чадыры дикипдирлер (Мүс. чык. 25:8). Соңра олар Ехова сежде этмек үчин ыбадатхана гурдылар (1 Пат. 8:27, 29). Ысрайыллылар Бабыл гулчулыгындан азат болансоң, Аллатагала сежде этмек үчин синагогаларда йыгнанышярдылар (Мар. 6:2; Яхя 18:20; Рес. иш. 15:21). I асырда яшан месихчилер йыгнак душушыкларыны өйде гечирйәрдилер (Рес. иш. 12:12; 1 Кор. 16:19). Шу гүнлер бүтин дүнйәде 10 мүңлерче Патышалык заллары бар. Ехованың халкы ол ерде Худай барада билим алып, оңа сежде эдйәрлер.

² Инҗилде Исаның Иерусалимдәки Ехованың ыбадатханасына болан сөйгүси ве миннетдарлыгы шейле беян  эдилйәр: «Сениң өйүңе болан ыхласым Мени иер» (Зеб. 69:9; Яхя 2:17). Патышалык залларына Иерусалимдәки ыбадатхана ялы «Реббиң өйи» дийилмейәр (2 Йыл. 5:13; 33:4). Шу гүнлер Мукаддес Язгыларың када-канунларына эерип, Патышалык залларында Худая хормат билен сежде эдйәрис. Шу макалада Патышалык залларыны гыммат саймага, мадды тайдан голдамага ве абатлайыш ишлерини гечирмәге көмек эдйән Худайың када-канунлары барада гүррүң эдерис *.

3—5. Патышалык залында нәме эдилйәр ве биз өзүмизи нәхили алып бармалы?

³ Патышалык заллары хакыкы сеждәниң меркези хасапланяр. Патышалык залында гечирилйән йыгнак душушыклары бизи рухы тайдан иймитлендирйәр ве иманымызы беркидйәр. Шейле-де Ехова гурамасы аркалы гөркезме берйәр. Ехова билен Иса бизи «Реббиң сачагына» чагыряр. Йыгнак душушыкларына гелйәнлер ваҗып чакылыга миннетдарлыгыны гөркезйәрлер (1 Кор. 10:21).

⁴ Ехова бизиң йыгнак душушыкларында Өзүне сежде этмегимизи ве бири-биримизи рухландырмагымызы ислейәр (Еврейлер 10:24, 25-нҗи аятлары окаң). Биз ерсиз-ере йыгнак душушыкларындан галсак, Ехова хормат гоймаяндыгымыз гөрнер. Биз йыгнага тайярлансак ве көпрәк җогап берсек, Ехованың эдйән аладасыны гыммат сайяндыгымызы гөркезерис (Зеб. 22:22).

⁵ Биз Патышалык залыны аявлы уланмак ве ол ерде гечирилйән йыгнак душушыкларында өзүмизи эдепли алып бармак билен, Ехова хормат гойярыс. Патышалык залы Ехованың адыны гөтерйәр ве биз ягшы эдим-гылымымыз билен, оны шөхратландырмак ислейәрис (1 Патышалар 8:17-ни деңешдириң).

6. Кәбир адамлар Патышалык залы ве доган-уялар барада нәме диййәрлер? (Макаланың башындакы сурата середиң).

⁶ Бизиң Худая хормат билен эдйән сеждәмиз адамлара тәсир эдйәр. Меселем, Түркиеде яшаян бир адам шейле гүррүң берйәр: «Мен Патышалык залының арассачылыгына ве әхли задың ербе-ер дуршуна хайран галдым. Адамлар салыкатлы гейненди ве шәхдачыкды. Оларың мени мәхирли гаршы алшы гүйчли тәсир этди». Шондан соңра ол йыгнак душушыкларына ызыгидерли гатнашяр ве Ехова өзүни багыш эдйәр. Индонезияда гурлан Патышалык залыны Ехова багыш эдилен гүни мынасыбетли гечирилен дабара хөкүмет ишгәрлери ве даш-төверегиндәки яшайҗылар чагырыляр. Оңа шәхер хәкими хем гелйәр. Ол Патышалык залының ёкары хилли гурландыгына, аматлы шертлерине ве овадан гүллере хайран галып: «Бинаның арассачылыгы хак Худая иман эдйәндигиңизи гөркезйәр» диййәр.

7, 8. Биз нәмәни унутмалы дәл?

⁷ Биз йыгнак душушыкларына баранымызда, салыкатлы эгин-эшигимиз, өзүмизе тимар бершимиз ве эдим-гылымымыз билен Ехованы хорматлаяндыгымызы гөркезйәрис. Кәбир адамлар Патышалык залларында өзлерини ченденаша эркин я-да өрән аграс алып барярлар. Эмма Ехова гуллукчыларының ве йыгнага гелйән адамларың өзлерини оңайсыз дуймагыны  ислемейәр. Шол себәпли доган-уялар сөлпи я-да гөзе илгинч гейнип, телефон аркалы хат язып, өзара геплешип, я-да ийип-ичип башгаларың үнсүни совмак ислемейәрлер. Ата-энелер чагаларына Патышалык залында ойнамалы ве ылгамалы дәлдигини дүшүндирмели (Ваг. 3:1).

⁸ Иса Худайың ыбадатханасында сөвда эдйән адамлара гахары гелип, олары ковяр (Яхя 2:13—17). Биз Патышалык залларында Аллатагала барада билим алып, оңа сежде эдйәрис. Шол себәпли йыгнак душушыкларында шахсы ишлеримиз барада гүррүң этмеклик нәдогры болар (Нехемя 13:7, 8-нҗи аятлары деңешдириң).

9, 10. а) Патышалык залларының гурлушык ишлерине ким көмек эдйәр? б) Ыкдысады ягдайы песе дүшен юртларда доган-уялар үчин нәме эдилди?

⁹ Ехованың гурамасы Патышалык залларының гурлушык ишини улы депгинде алып барярлар. Доган-уялар оларың чызгысыны чызмак, гурмак ве оларда абатлайыш ишлерини гечирмек үчин мейлетин көмек эдйәрлер. Бу ишде нәхили үстүнлик газандык? 1999-нҗы йылың 1-нҗи ноябрындан бәри, бүтин дүнйәде 28 мүңден говрак Худая сежде эдилйән Патышалык заллары гурулды. Ортача аланыңда, соңкы 15 йылың ичинде хер гүн 5 саны Патышалык заллары гуруляр.

¹⁰ Гурамамыз Патышалык залларыны дүнйәниң әхли күнҗегинде гуряр. Биз Мукаддес Язгыларың када-канунларына эерип, имандашларымызың «етмезини долдурып», сөйги билен голдаярыс (2 Коринтослылар 8:13—15-нҗи аятлары окаң). Нәдип? Ыкдысады ягдайы песе дүшен юртларда-да, доган-уяларың Худая сежде этмеклери үчин Патышалык заллары гурулды.

11. Доган-уялар тәзе Патышалык заллары барада нәме диййәрлер ве бу сизе нәхили тәсир эдйәр?

¹¹ Коста-Рикадакы доган-уялар шейле гүррүң берйәрлер: «Овадан Патышалык залы секиз гүнүң довамында гурулды. Биз өз гөзүмизе ынанман, муңа дүйшмикә өйтдүк! Патышалык залы Ехованың ак патасы, гураманың голдавы ве доган-уяларың көмеги билен шейле тиз гурулды. Биз оңа Ехованың гымматлы совгады хөкмүнде гарап, өзүмизи багтлы дуйярыс». Бүтин дүнйәдәки доган-уялар Патышалык залларына бегенип, Ехова миннетдарлык билдирйәрлер. Бу бизиң шатлыгымыза шатлык гошяр. Акйүрекли адамлар Худай барадакы хакыкаты билмек үчин Патышалык залларына гелйәр. Элбетде, бу Ехованың берекеди (Зеб. 127:1).

12. Биз гурлушык ишини нәдип голдап билерис?

 ¹² Ехованың гуллукчыларының көпүси Патышалык залларының гурлушык ишлерине гатнашяндыгына гуванярлар. Биз гурлушык ишлерине гатнашмасак-да, оны голдамак үчин пул көмегини берип билерис. Шейдип, биз Худайың гадымы дөвүрде яшан гуллукчыларының гөрелдесине эерип, Ехованы шөхратландырарыс (Мүс. чык. 25:2; 2 Кор. 9:7).

13, 14. Мукаддес Язгыларда Патышалык залының арасса болмалыдыгы барада нәме айдыляр?

¹³ Биз Патышалык залларыны арасса сакламак билен мукаддес ве тертип-дүзгүнли Худайдан гөрелде алярыс (1 Коринтослылар 14:33, 40-нҗы аятлары окаң). Худайың Сөзүнде мукаддеслигиң ве рухы тайдан тәмизлигиң беден арассачылыгы билен баглыдыгы айдыляр. Шол себәпли биз беден тайдан арасса болмага җан этмели (Ылх. 19:8).

¹⁴ Биз Мукаддес Язгыларың бу када-канунларына эерсек, йыгнак душушыгына гелйән адамлар Патышалык залының хемише арассадыгыны гөрерлер. Шонда олар вагыз эдйән хош хабарымыза гөрә яшаяндыгымыза гөз етирип, Ехова Худайың мукаддесдигини ве тизден ер йүзүни багы-боссанлыга өвүрҗекдигини билерлер (Иш. 6:1—3; Ылх. 11:18)

15, 16. а) Патышалык залыны арасса сакламак нәме себәпден кын боляр, эмма биз нәме этмели? б) Патышалык залы нәдип арассаланяр ве биз нәмәни хормат сайярыс?

¹⁵ Адамлар арассачылыга дүрли- дүрли гараярлар. Бу оларың алан тербиесине баглы боляр. Кәбир адамлар тозанлы, батгалык я-да эрбет ёллы ерлерде яшаярлар. Хатда кәбир ерлерде арассаламак үчин сув ве серишде етмезчилик эдйәр. Эмма биз шейле ягдая гарамаздан, Патышалык залыны арасса сакламалы. Себәби биз ол ерде Ехова сежде эдйәрис (Кан. таг. 23:14).

¹⁶ Патышалык залының хемише арасса болмагы үчин йыгнак яшулулары арассачылык ишлерини гечирмегиң, серишделериң ве эсбапларың болмагының аладасыны эдйәрлер; белли бир гүн тертибини дүзйәрлер. Олар хер душушыкдан соң арассачылык ишлериниң гечирилмегине гөзегчилик эдйәрлер. Залдакы кәбир затлары хер гүн сүпүрмек герек болмаяр, йөне олары вагтлы-вагтында арассалап дурмалы. Биз Патышалык залларында эгинме-эгин ишлешмеги хормат сайярыс!

17, 18. а) Мукаддес Язгылардакы хайсы вакалар Худая сежде эдилйән ерде абатлайыш ишлериниң гечирилендигини гөркезйәр? б) Патышалык залында нәме үчин абатлайыш ишлери гечирилмели?

¹⁷ Гадымы дөвүрдәки ялы, шу гүнлерем Ехованың гуллукчылары сежде эдилйән ерлерде абатлайыш ишлерини гечирйәрлер. Меселем, Яхуданың патышасы Ёваш адамларың гурбанлык хөкмүнде гетирен пулларыны ыбадатхананың беҗериш ишлерине сарп этмелидигини руханылара табшырды (2 Пат. 12:4, 5). Мундан 200 йыл геченден соң, Ёшыя патыша хем ыбадатханада абатлайыш ишлериниң гечирилмегиниң аладасыны этди (2 Йыл язгылары 34:9—11-нҗи аятлары окаң) *.

¹⁸ Филиал комитетиниң агзаларының айтмагына гөрә, кәбир юртларда адамларың теҗрибесиниң аздыгы я-да пул етмезчилик эдйәндиги себәпли, иш ерлериниң я-да техники энҗамларың аладасыны этмейәрлер. Эгер Патышалык залында вагтлы-вагтында абатлайыш ишлери гечирилмесе, җай көнелер ве ол адамлар үчин говы гүвәлик болмаз. Эмма залың аладасы эдилсе, Ехованы шөхратландырарыс ве доган-уяларың берйән пул садакасының бидерек ере харчланмандыгыны гөркезерис.

19. Ехова сежде эдилйән ери нәдип гыммат сайып билерис?

¹⁹ Патышалык залы Ехова багыш эдилйәр. Шол себәпли ол белли бир адама я-да йыгнага дегишли дәлдир. Шу макаладан билшимиз ялы, Мукаддес Язгыларың када-канунлары сежде эдйән еримизе догры гарайышда болмага көмек эдйәр. Биз Патышалык залларыны ве йыгнак душушыкларыны гыммат сайып, Ехова хормат гойярыс. Патышалык залларыны гурмак үчин пул садакаларыны берйәрис, оны арасса ве абат сакламак үчин җан эдйәрис. Гелиң, Иса ялы Ехова сежде эдилйән ери гыммат саялың! (Яхя 2:17).