1, 2. (a) Kasi kale ŵanthu ŵa Yehova ŵakasoperanga nkhu? (b) Kasi Yesu wakaliwonanga wuli tempile ilo likaŵa ku Yerusalemu? (c) Kasi tisambirenge vichi mu nkhani iyi?

ŴATEŴETI ŵa Chiuta ŵamba sono yayi kuŵa na malo ghakusoperapo. Abelu wakwenera kuti wakazenga jotchero apo wakapeleka sembe kwa Chiuta. (Gen. 4:3, 4) Nowa, Abrahamu, Yisake, Yakobe, na Mozesi nawo ŵakazenga majotchero. (Gen. 8:20; 12:7; 26:25; 35:1; Ex. 17:15) Yehova wakaphalira Ŵaisrayeli kuti ŵazenge chihema chakukumanamo. (Ex. 25:8) Pamanyuma, Ŵaisrayeli ŵakazenga tempile kuti ŵasoperengepo Yehova. (1 Mathe. 8:27, 29) Ŵayuda ŵakati ŵawerako ku wuzga ku Babuloni, ŵakawungananga mu masunagoge. (Mrk. 6:2; Yoh. 18:20; Mil. 15:21) Ŵakhristu ŵakwambilira ŵakawungananga mu nyumba za ŵabali. (Mil. 12:12; 1 Kor. 16:19) Mazuŵa ghano pali Nyumba za Ufumu zinandi chomene umo ŵanthu ŵa Yehova ŵakuwungana kuti ŵasope na kusambizgika na Yehova.

² Yesu wakatemwanga chomene tempile la Yehova ilo likaŵa mu Yerusalemu. Pakulongosora vya Yesu, Yohane wakalemba mazgu gha uchimi ghakuti: “Mwamphu wa nyumba  yinu wanirya.” (Sal. 69:9; Yoh. 2:17) Palije Nyumba ya Ufumu iyo yikuyana na “nyumba ya Yehova” panji kuti tempile ilo likaŵa mu Yerusalemu. (2 Mid. 5:13; 33:4) Ndipouli, Baibolo lili na fundo izo zingatovwira kuti tizirwiskenge na kugwiliskira ntchito makora malo ghithu ghakusoperapo mazuŵa ghano. Mu nkhani iyi tisambirenge fundo zinyake izo zingatovwira kupwelelera Nyumba za Ufumu. Tiwonengeso umo tingawovwilirapo pakuzenga Nyumba za Ufumu ziphya. *

3-5. Kasi ntchito ya Nyumba ya Ufumu ni vichi, ndipo maungano tikwenera kughawona wuli?

³ Pa Nyumba ya Ufumu ndipo tikuwungana kuti tisope Yehova. Maungano ntchawanangwa chakufuma kwa Yehova ndipo ghakutovwira kukhozga ubwezi withu na iyo. Pa Nyumba ya Ufumu ndipo tikupokelera chakurya chauzimu na ulongozgi wakufuma ku gulu la Yehova. Wose awo ŵakwiza pa maungano agha, ŵakupulikira ntchemo ya Yehova na Mwana wake Yesu. Ntheura tikwenera kuzomera ntchemo iyi yakuti tiryenge pa “thebulu la Yehova” sabata yiliyose.—1 Kor. 10:21.

⁴ Yehova wakuwona maungano kuŵa ghakuzirwa chomene lekani wakaphalira Paulosi kulemba mazgu gha pa Ŵahebere 10:24, 25. (Ŵazgani.) Kasi tikuchindika Yehova para tikukhala ku maungano pa vifukwa vyambura kwenelera? Yayi, chifukwa munthu uyo wakuchindika Yehova wakunozgekera maungano, wakusangikapo, kweniso wakuzgorapo.—Sal. 22:22.

⁵ Nkharo yithu yikwenera kulongora kuti tikuzirwiska maungano na Nyumba ya Ufumu. Nkharo yithu yikulongoraso umo tikuwonera zina la Yehova ilo likuŵa pa chikhwangwani cha Nyumba ya Ufumu.—Yaniskani na 1 Mathemba 8:17.

6. Kasi ŵanthu ŵanyake ŵakuyowoya vichi para ŵiza pa Nyumba ya Ufumu? (Wonani chithuzithuzi chakwamba.)

⁶ Ŵanthu ŵakuwaro ŵakuwona usange tikuchindika malo ghithu ghakusoperapo. Mwachiyelezgero, munthu munyake wa ku Turkey wakati: “Nkhakondwa chomene kuwona kuti Nyumba ya Ufumu njakutowa chomene kweniso kuti mukuchita vinthu mwandondomeko. Ŵanthu ŵakavwara makora, ŵakaŵa ŵakukondwa, ndiposo ŵakanitawuzga mwachimwemwe. Nkhakondwa chomene.” Munthu uyu wakamba kuwungana mwakukhazikika ndipo pamanyuma wakabatizika. Mu msumba unyake ku Indonesia, ŵabali ŵakachema ŵalara ŵa boma na ŵazengezgani kuti ŵazakawone Nyumba ya Ufumu yiphya pambere ŵandayipatulire kwa Yehova. Meya wa msumba uwu nayo wakiza. Wakakondwa chomene kuwona umo yikazengekera, maluŵa ghakutowa, na kumanya ivyo vikuchitika pa malo agha. Iyo wakati: “Kutowa kwa Nyumba yinu ya Ufumu kukulongora kuti muli na chipulikano chanadi.”

7, 8. Kasi tikwenera kukumbuka vichi para tili pa maungano?

⁷ Nkharo, kavwaliro, na kujitozga kwithu vikwenera kulongora kuti tikuchindika Chiuta uyo wakutichemera ku maungano. Kweni tileke kuchita vinthu mwakutalulira. Malipoti ghakulongora kuti ŵanthu ŵanyake ŵakukhwimiska chomene vinthu para ŵali pa maungano. Ŵanyake ŵakuchita vinthu ivyo vikulongora ntchindi yayi pa Nyumba ya Ufumu. Yehova wakukhumba kuti ŵateŵeti ŵake na ŵalendo awo ŵakwiza ku maungano ŵaŵenge ŵakukondwa.  Ntheura, tose para tili pa maungano tikwenera yayi kuvwara mwambura kwenelera, kutumizgirana mauthenga pa foni, kurya, kumwa, panji kuchita vinthu vinyake vyambura kwenelera pa maungano. Ŵapapi ŵakwenera kusambizga ŵana ŵawo kuti ŵaleke kuchimbira panji kuseŵera mu Nyumba ya Ufumu.—Muph. 3:1.

⁸ Yesu wakakwiyira chomene awo ŵakachitanga malonda pa tempile la Chiuta, ndipo wakaŵachimbizgira kuwaro. (Yoh. 2:13-17) Mazuŵa ghano tikusopa na kusambira vya Yehova pa Nyumba ya Ufumu. Ntheura, para tili pa Nyumba ya Ufumu tikwenera yayi kudumbiskana nkhani za malonda.—Yaniskani na Nehemiya 13:7, 8.

9, 10. (a) Kasi gulu likovwira wuli pakuzenga Nyumba za Ufumu, ndipo pazengeka zilinga? (b) Kasi gulu likulondezga fundo wuli kuti liwovwire mipingo iyo yingakwaniska yayi kuzenga yekha Nyumba ya Ufumu?

⁹ Gulu la Yehova likovwira chomene pakuzenga Nyumba za Ufumu. Ŵanthu awo ŵakulemba mapulani, kuzenga, na kunozga Nyumba za Ufumu ŵakulipirika yayi. Ntheura kwamba pa Novembala 1, 1999, pazengeka Nyumba za Ufumu zakujumpha 28,000 pa charu chose chapasi. Ichi chikulongora kuti mu vyaka 15 ivyo vyajumpha, Nyumba za Ufumu 5 zikuzengeka zuŵa lililose.

¹⁰ Pakukhumbikwa vinandi kuti Nyumba za Ufumu zizengeke kulikose uko zikukhumbikwa. Gulu likulondezga fundo ya mu Malemba yakuti awo ŵali na vinandi ŵagaŵireko awo ŵali na tuchoko kuti “kuyana kuŵepo.” (Ŵazgani 2 Ŵakorinte 8:13-15.) Fundo iyi yawovwira kuti mipingo yinandi iyo yingakwaniska yayi kuzenga yekha yiŵe na Nyumba za Ufumu.

11. Kasi ŵabali ŵanyake ŵakuyowoya vichi para gulu laŵazengera Nyumba ya Ufumu, ndipo imwe mukujipulika wuli?

¹¹ Mpingo unyake ku Costa Rica uwo gulu lili kuwuzengera Nyumba ya Ufumu, ukalemba kuti: “Para tayimilira panthazi pa Nyumba ya Ufumu tikuwona nga tikulota. Nyumba yithu ya Ufumu yikamara kuzengeka mu mazuŵa 8 pera. Ivi vikachitika chifukwa cha wovwiri wa Yehova, gulu lake, kweniso ŵabali na ŵadumbu. Tikuwona malo agha kuŵa chawanangwa na usambazi kufuma kwa Yehova. Tikukondwa chomene chifukwa tili na Nyumba ya Ufumu.” Asi mukukondwa kupulika umo ŵabali ŵakuwongera para gulu laŵazengera Nyumba ya Ufumu? Ntchakukondweska kumanya kuti ŵabali ŵakukondwa para gulu laŵazengera Nyumba ya Ufumu. Para Nyumba za Ufumu zamara  waka kuzengeka, zikuzura na ŵanthu awo ŵakukhumba kumanya Mlengi withu wachitemwa. Uwu mbukaboni wakuti ntchito iyi yikulongozgeka na Yehova.—Sal. 127:1.

12. Kasi tingawovwirapo wuli pa ntchito ya kuzenga Nyumba za Ufumu?

¹² Ŵabali na ŵadumbu ŵanandi mbakukondwa chomene chifukwa cha kuchitako ntchito ya kuzenga Nyumba za Ufumu. Kwali tikuchitako ntchito ya kuzenga panji yayi, tose tingawovwirapo para tikupeleka ndalama zithu kuti zovwire pa ntchito ya kuzenga Nyumba za Ufumu. Mu nyengo yakale, ŵateŵeti ŵa Chiuta ŵakatemwanga chomene kusopa Yehova, lekani ŵakawovwirangapo na chuma chawo. Ndivyo ŵakuchitaso ŵateŵeti ŵa Chiuta mazuŵa ghano. Ivi vikovwira kuti Yehova wapike uchindami.—Ex. 25:2; 2 Kor. 9:7.

13, 14. Kasi ni fundo wuli za mu Malemba izo zikutovwira kuti titozgenge Nyumba ya Ufumu?

¹³ Para Nyumba ya Ufumu yazengeka, tikwenera kuyitozga kuti yilongore mikhaliro ya Chiuta uyo tikumusopa. Chiuta withu ni Chiuta wandondomeko. (Ŵazgani 1 Ŵakorinte 14:33, 40.) Baibolo likulongora kuti awo ŵakusopa Yehova ŵakukhumbikwiraso kuŵa ŵakutowa mwakuthupi.—Uvu. 19:8.

¹⁴ Tikwenera kuwoneseska kuti Nyumba yithu ya Ufumu nayo njakutowa. Para Nyumba ya Ufumu njakutowa, yikukolerana na makani ghawemi agho tikupharazga, ntheura tizamufwatuka kuchemera ŵanthu ku maungano. Ŵanthu para ŵiza ku Nyumba ya Ufumu ŵazamumanya kuti tikusopa Chiuta uyo ni mutuŵa ndipo  sonosono apa wasinthenge charu chose kuŵa paradiso uyo muzamuŵavya ukazuzi.—Yes. 6:1-3; Uvu. 11:18.

15, 16. (a) Chifukwa wuli ŵanyake ŵakutondeka kutozga Nyumba ya Ufumu, kweni chifukwa wuli nyengo zose yikwenera kuŵa yakutowa? (b) Kasi tili na ndondomeko wuli yakutozgera Nyumba yithu ya Ufumu, ndipo tose tili na udindo wuli?

¹⁵ Ŵabali ŵanyake ŵakuŵikapo mtima pa ntchito ya kutozga Nyumba ya Ufumu kuluska ŵanyake. Vili nthena chifukwa cha kupambana umo waliyose wali kulelekera. Ŵanthu ŵanyake ŵakukhala ku malo uko kuli chuvu chomene panji misewu yinandi njamathipa. Ŵanyake uko ŵakukhala kulije maji ghakukwana ndiposo vinthu vyakugwiliskira ntchito pa kutozga Nyumba ya Ufumu. Muli mose umo vinthu vingaŵira, Nyumba ya Ufumu yikwenera kuŵa yakutowa chifukwa ni malo gha kusoperapo Yehova ndipo yikupharazga zina lake.—Dute. 23:14.

¹⁶ Nyengo zose tikwenera kutozga Nyumba ya Ufumu. Wupu wa ŵalara ukwenera kupanga ndondomeko ya kutozga Nyumba ya Ufumu na kuwoneseska kuti vyakugwilira ntchito vilipo vyakukwana kuti malo ghakusoperapo ghalutilire kuŵa ghakutowa. Ntchito zinyake za kutozga Nyumba ya Ufumu zikuchitika paumaliro wa maungano ghalighose. Kuti vyose vichitike makora pakwenera kuŵa ŵabali ŵakuti ŵawonelerenge mulimo uwu kweniso mpingo wose ukwenera kukolerana. Waliyose mu mpingo wali na udindo wa kutozga Nyumba ya Ufumu.

17, 18. (a) Kasi ni viyelezgero wuli vya mu malemba ivyo vikutichiska kuti tinozgenge malo ghakusoperapo? (b) Chifukwa wuli Nyumba ya Ufumu yikwenera kulutilira kuŵa yakutowa?

¹⁷ Ŵateŵeti ŵa Yehova ŵakunozga malo ghawo ghakusoperapo para ghanangika kuti ghalutilire kuwoneka makora. Yehowashi, Themba la Yuda, likatuma ŵasembe kuti ŵatore ndalama izo ŵanthu ŵakapeleka na ‘kunozgera nyumba ya Yehova, palipose apo pakanangika.’ (2 Mathe. 12:4, 5) Pakati pajumpha vyaka 200, Themba Yosiya nalo likatora ndalama izo ŵanthu ŵakapelekanga pa tempile na kunozgera nyumba ya Yehova.—Ŵazgani 2 Midauko 34:9-11.

¹⁸ Malipoti ghakulongora kuti mu vyaru vinyake ŵabali na ŵadumbu ŵanyake ŵakunozga yayi Nyumba za Ufumu. Panyake mu vyaru ivi awo ŵakumanya ntchito ya kunozga mbachoko panji ŵalije vyakugwilira ntchito. Kweni usange Nyumba za Ufumu zikunozgeka yayi, zinganangika luŵiro ndipo zingapeleka chithuzi chiheni ku ŵanthu ŵakuwaro. Kweni usange nyengo zose mipingo yikunozga Nyumba za Ufumu, zikupeleka malumbo kwa Yehova kweniso ndalama zinandi izo ŵabali ŵithu ŵakupeleka zikusakazika yayi.

19. Kasi mungalongora wuli kuti mukuzirwiska malo gha kusoperapo Yehova?

¹⁹ Mweneko wa Nyumba ya Ufumu ni Yehova. Ntheura, yikuŵa ya munthu panji mpingo uliwose yayi nangauli yingaŵa mu zina la mpingo umoza. Fundo za mu Malemba zikutovwira kuti tikoleranenge kupwelelera Nyumba ya Ufumu kuti yilutilire kupeleka uchindami kwa Yehova. Waliyose mu mpingo wangawovwirapo para wakupeleka ndalama zakovwira pakuzenga Nyumba zinyake za Ufumu, kutozga, na kunozga nyumba izi. Usange tikuchita nthena ndikuti tikuzirwiska Nyumba ya Ufumu. Kweniso tikulongora kuti tikutemwa chomene malo ghakusoperapo Yehova nga umo Yesu wakachitira.—Yoh. 2:17.