1, 2. (a) Ana ŵakulambila ŵa Yehofa ŵakala ŵakamulicisyaga masengo malo gatuli pakulambila? (b) Ana Yesu ŵajiwonaga catuli nyumba ja Mlungu ja ku Yelusalemu? (c) Ana munganiji citutagulilane cici?

KUTANDILA kalakala, ŵakutumicila ŵa Mlungu akusakola malo gakulambilila. Mwambone, komboleka kuti Abele ŵakwete malo gakwe gakupelecele mbopesi. (Gen. 4:3, 4) Nowa, Abulahamu, Isaki, Yakobo, soni Mose ŵataŵile malo gakupelecela mbopesi. (Gen. 8:20; 12:7; 26:25; 35:1; Eks. 17:15) Yehofa ŵalamwile Ayisalayeli kuti ataŵe nyumba jakulambilila. (Eks. 25:8) Mkupita kwandaŵi, Ayisalayeli ŵataŵile nyumba ja Mlungu kuti alambililejemo. (1 Maf. 8:27, 29) Ayuda paŵatyosile ku ukapolo ku Babulo, ŵatandite kusongana m’nyumba syakupopelela. (Maliko 6:2; Yoh. 18:20; Mase. 15:21) Aklistu ŵandanda ŵasonganaga m’nyumba sya abale. (Mase. 12:12; 1 Akoli. 16:19) Moŵa agano, ŵa Mboni sya Yehofa akusasongana m’Nyumba sya Ucimwene syasikusimanikwa pacilambo cosope kuti alijiganye soni kumlambila Yehofa.

² Yesu ŵajinonyelaga nyumba ja Mlungu jajaliji ku Yelusalemu soni ŵajicimbicisyaga mnope. Mwati yeleyi yamtendekasisye ndumetume jwine kumbucila maloŵe ga jwamalumbo gakuti, “Kulipeleka mnope panyumba jawo kundile.” (Sal. 69:9; Yoh. 2:17) Nyumba ja Ucimwene ngaŵa mkujikolanga kuti “Nyumba ja Yehofa”  mpela mujaŵelele ja ku Yelusalemu. (2 Mbiri 5:13; 33:4) Atamose yili m’yoyo, Baibulo jikusatukamucisya kumanyilila mwampaka tukamulicisyeje masengo malo getu gakulambilila ga moŵa agano, soni mwampaka tulosye kuti tukusagacimbicisya. Mungani ajino citulole songa sine sya m’Baibulo syampaka situkamucisye kulola yampaka tutende patuli mu Nyumba ja Ucimwene, mwampaka tujisamalilile, soni mwampaka tukamucisye pakulipila yindu yakusosekwa soni yejonasice. *

3-5. Ana masengo ga Nyumba ja Ucimwene gali cici, soni ana tukusosekwa kujiwona catuli misongano?

³ Nyumba ja Ucimwene gali malo gele ŵandu akusayika kukulambila Yehofa. Cimo mwa yindu yatupele Yehofa yakutukamucisya kuti tuŵe ŵakulimba mwausimu cili misongano jatukusatenda cijuma cilicose m’Nyumba ja Ucimwene. Kupitila m’misonganoji, likuga lya Mlungu likusatulimbikasya mwausimu, soni kutukamucisya kumanyilila yindu yine yakusosekwa. Mpaka tujile kuti Yehofa soni Mwanagwe ni ŵakusiŵaŵilanjila ŵandu kumisonganoji. Kuŵilanjidwa kukulya “patebulo ja Yehofa” uli upile wekulungwa, m’yoyo tukawung’andilaga.—1 Akoli. 10:21.

⁴ Yehofa akusajiwona misongano jatukusatenda kuti tumlambileje soni kuti tulimbikasyaneje kuŵa jakusosekwa mnope. Ni ligongo lyakwe ŵamsalile Paulo kuti alembe maloŵe gakulimbikasya gakuti tukaleka kusongana pampepe. (Aŵalanje Ahebeli 10:24, 25.) Ana mpaka tulosye kuti tukusamcimbicisya Yehofa naga tukusalepela kwawula kumisongano pamagongo gangapikanika? Mpaka tulosye kuti tukusayamicila Yehofa naga tukusakosecela cenene ni kujigala nawo mbali pamisonganoji.—Sal. 22:22.

⁵ Mwatukusatendela yindu patuli m’misongano, soni mwatukusajisamalilila Nyumba ja Ucimwene yikusalosya naga tukusamcimbicisya Yehofa kapena iyayi. Tukusosekwa kutenda yindu yakucimbicisya lina lya Yehofa lyalikusawonecela pa cikwangani ca pa Nyumba ja Ucimwene.—Awanicisye ni 1 Mafumu 8:17.

6. Ana ŵandu ŵane aŵecete yatuli pakwamba ya Nyumba sya Ucimwene soni ya ŵandu ŵakusasongana mwelemo? (Alole ciwulili cacili kundanda kwa nganiji.)

⁶ Ŵandu ŵanganaŵa Mboni akusalola yatukusatenda pakucimbicisya malo getu gakulambilila. Mwambone, mundu jwine ku Turkey ŵatite, “Nasimonjile mnope ni mwajawonecelaga Nyumba ja Ucimwene. Jaliji jacasa soni jakusalala. Ŵandu ŵakwesoni ŵawete cenene, ŵamwemwetelaga, soni ŵangomasisye mwakusangalala. Yeleyi yasangalesye mnope.” Munduju jwatandite kwika pamisongano mwakutamilicika kaneko jwabatiswe. Abale ŵa mumsinda wine ku Indonesia, ŵaŵilasile acakulungwakulungwa ŵa boma soni ŵandu ŵane kuti casimanikwe pandaŵi jakuwugulila Nyumba ja Ucimwene. Jwamkulungwa ja msindawo ŵayicesoni. Jwalakwe ŵasimonjile ni kusalala kwa Nyumbajo soni maluŵa gagaliji pelepo. Jwalakwe ŵatite, “Kusalala kwa nyumbaji kukulosya kuti yakusakulupilila jemanja yili yisyesyene.”

7, 8. Ana ŵakusayika pa misongano ja Ciklistu akusosekwa kumbucila yindu yapi?

⁷ Kawale soni kalisalalisye ketu mpaka kalosyesoni naga tukusamcimbicisya Mlungu jwakusatuŵilanjila ku misongano ja Ciklistu. M’yoyo, tukusosekwa kuŵambala kuwala mwangaŵajilwa kapena kulisalalisya mwakupundanganya. Tukusosekwa kuŵambala kalalisya yindu patuli ku misongano nambosoni kutenda  yindu mpela kuti tuli msimangwetu. Yehofa akusasaka kuti ŵakutumicila ŵakwe soni acalendo ŵakusayika pamisongano aŵeje ŵagopoka. Nambo ngatukusosekwa kutenda yindu yampaka yasokonasye ŵane kuti akapikanilaga misongano mpela kuwala mwangaŵajilwa, kutumicisyana mautenga, kuŵecetana, kulya ni kumwa, soni yine yejinji. Acinangolo akusosekwa kwakamucisya ŵanace ŵawo kupikanicisya kuti ku Nyumba ja Ucimwene ngaŵa ku malo kwakuti awutucejewutuceje kapena kung’anda.—Mlal. 3:1.

⁸ Yesu ŵatumbile mnope paŵaweni ŵandu ali mkusumisya yindu m’nyumba ja Mlungu mwati ŵajasile yaŵasumisyagayo. (Yoh. 2:13-17) Nyumba ja Ucimwene jili malo gakulambilila soni gakulijiganyila yindu yausimu. M’yoyo, ngakutusosekwa kutendelako yiliyose yakwayana ni malonda.—Awanicisye ni Nehemiya 13:7, 8.

9, 10. (a) Ana ŵakutumicila ŵa Yehofa akutenda yatuli kuti papagwe Nyumba sya Ucimwene, soni ana yakuyicisya yakwe yili yatuli? (b) Ana cici cacikamucisye kuti mipingo janganijikombolaga kutaŵa jika Nyumba sya Ucimwene jikole nyumbasi?

⁹ Likuga lya Yehofa likutenda yejinji pamasengo gakutaŵa Nyumba sya Ucimwene pacilambo cosope. Ŵandu ŵakusakamula masengo gakulemba kawonece ka Nyumba sya Ucimwene, kutaŵa soni kulinganya yayijonasice akusagamba kulipeleka. Ana yeleyi yikwete yakuyicisya yatuli? Kutandila pa November 1, 1999, Nyumba sya Ucimwene syakwana 28,000 asitaŵile kuti mipingo jikamulicisyeje masengo pacilambo cosope. Yeleyi yikulosya kuti yaka 15 yipiteyo, Nyumba sya Ucimwene ciŵandika msano syamalaga kutaŵa lisiku lililyose.

¹⁰ Apano tukulinjilila kuti tutaŵe Nyumba sya Ucimwene kulikose kwasikusosecela. Patukutenda yeleyi tukusakuya yagakusasala Malemba yakuti ŵandu ŵakwete yejinji ŵakamucisye ŵakwete yamnono kuti “paŵe kulandana.” (Aŵalanje 2 Akolinto 8:13-15) Yakuyicisya yakwe yili yakuti Nyumba sya Ucimwene syejinji sitaŵigwe kuti mipingo janganijikombolaga kutaŵa jika ligongo lyakusoŵa mbiya jikamulicisyeje masengo.

11. Ana abale ŵane aŵecete yatuli pakwamba ya Nyumba ja Ucimwene jawo jasambano, soni ana yeleyi yikusatutendekasya kupikana wuli mumtima?

¹¹ Mpingo wine ku Costa Rica waŵawutaŵile Nyumba ja Ucimwene walembile kuti, “Patujimi kusogolo kwa Nyumba ja Ucimwene jetu, tukusayiwona mpela tukusagamila. Ngatukusakulupilila kuti jili jetu. Nyumbaji ŵajitaŵile ni kumalisya yosope kwa masiku 8 basi. Yeleyi yakombolece ni cikamucisyo ca Yehofa, likuga lyakwe soni cikamucisyo ca abale. Malo gakulambilila gelega gali mtuka wapenani wakutyocela kwa Yehofa. Tukusangalala mnope ni Nyumba ja Ucimweneji.” Tukusasangalala  kupikana abale ni alongo ali mkum’yamicila Yehofa ligongo lya yindu yambone yaŵatendele. Tukusasangalalasoni kumanyilila kuti kusyungulila pacilambo cosope abale mpaka akole Nyumba ja Ucimwene jawo. Yehofa ni jwakulongolela masengo gakutaŵaga. Pasimasile Nyumba sya Ucimwene ŵandu ŵambone mtima akusayika kukusongana nawo m’nyumbasyo kuti alijiganye yejinji yakwamba Mkupanganya jwetu.—Sal. 127:1.

12. Ana mpaka akamucisye catuli pamasengo gakutaŵa Nyumba sya Ucimwene?

¹² Abale ni alongo ŵajinji akusangalala kamula nawo masengo gakutaŵa Nyumba sya Ucimwene. Wosopewe tukwete upile wakamucisya pamasengo gakutaŵaga kupitila mu yakupeleka. Ŵandu ŵakala ŵaliji ŵakusacilila kupeleka yindu yakamucisya kutaŵila malo gawo gakulambilila. M’wejisoni tukusosekwa kutenda m’yoyo.—Eks. 25:2; 2 Akoli. 9:7.

13, 14. Ana Malemba gapi gampaka gatulimbikasye kusamalila nyumba jetu ja Ucimwene?

¹³ Nyumba ja Ucimwene pajimasile, tukusasosekwa kujisamalila kuti jilosyeje ndamo syambone sya Mlungu jwakolosya yindu jwatukusamlambila. (Aŵalanje 1 Akolinto 14:33, 40.) Baibulo jikusalosya kuti pana mkamulano pasikati pa kuŵa jwamswela mwausimu ni mwakucilu. (Ciu. 19:8) M’yoyo, naga ŵandu akusaka kuti Yehofa ŵanonyeleje akusosekwa kuŵa ŵacasa.

¹⁴ Naga tukusajisamalila Nyumba ja Ucimwene jetu tukusaŵa ŵagopoka kwaŵilanjila ŵandu ku misongano jetu tuli mkumanyilila kuti kawonece ka nyumbajo kali kakamulana ni utenga ŵatukusitwasalila. Jemanjajo caciyiwona kuti Mlungu jwatukusamlambila ali jwamswela soni kuti pacangakaŵapa catyosye yindu yayikusakasya  cilamboci ni kucitendekasya kuŵa paladaiso.—Yes. 6:1-3; Ciu. 11:18.

15, 16. (a) Ligongo cici mpaka yiŵe yakusawusya kuswejesya Nyumba ja Ucimwene, nambo kuswejesyaku kuli kwakusosekwa ligongo cici? (b) Ana mumpingo mwawo ŵalinganyisye yatuli pangani jakuswejesya Nyumba ja Ucimwene, soni ana jwalijose akwete ukumu watuli?

¹⁵ Ŵandu ŵane akusakola lung’wanu lwakusamalila Nyumba ja Ucimwene kupunda ŵane. Yili m’yoyo ligongo lyakulekangana mwatwakulile soni kwatukusatama. M’mikuli jine kukusaŵa luwundu, kapena misewu jakwe jikusaŵa jamatope. M’mikuli jine kukusasoŵa mesi ni yindu yakamulicisya masengo pakuswejesya. Cinga yindu yili wuli, nambope tukusosekwa kulolecesya kuti Nyumba ja Ucimwene jetu jili jakuwoneka cenene, ligongo tukusajikamulicisya masengo pakumlambila Yehofa.—Deut. 23:14.

¹⁶ Tukusosekwa kutenda mbali jetu kuti Nyumba ja Ucimwene jiwoneceje jacasa. Acakulungwa ŵa mumpingo akusalemba ndandanda ja ŵakuswejesya, soni akusalolecesya kuti yindu yakamulicisya masengo pakuswejesya yipali. Yeleyi yikusakamucisya kuti malo gakulambilila gaŵeje gacasa. Pana yindu yine yayikusasosekwa kuyiswejesya panyuma pa misongano, nambo yine yangasosekwa kuyiswejesya ndaŵi ni katema, m’yoyo pakusosekwa kulolecesya kuti yindu yosope yili yacasa. Aklistu wosope mumpingo akwete ukumu wakamucisya nawo masengo gakuswejesyaga.

17, 18. (a) Ana pana yisyasyo yapi ya m’Malemba yakulosya kuti ŵandu ŵalinganyaga yejonasice pa malo gakulambilila? (b) Ligongo cici tukusosekwa kulolecesya kuti Nyumba sya Ucimwene sikuwoneka cenene?

¹⁷ Ŵakutumicila ŵa Yehofa akusaŵa ŵamtawu pakulinganya yindu yejonasice pa Nyumba ja Ucimwene. Mwambone, Mwenye Yowasi jwa Yuda, ŵalamwile ŵambopesi kuti ajigale mbiya syaŵapelece ŵandu pa nyumba ja Yehofa kuti asikamulicisye masengo ‘pakulinganya mapupa ganyumbajo gagagangasice.’ (2 Maf. 12:4, 5) Pali papite yaka yakupunda 200, Mwenye Yosiya ŵakamulicisyesoni masengo mbiya syaŵapelece ŵandu pa nyumba ja Mlungu pakulinganya yindu yayajonasice.—Aŵalanje 2 Mbiri 34:9-11.

¹⁸ M’yilambo yine Makomiti ga Nyambi gayiweni kuti abale ngakusalinganya yindu yejonasice pa Nyumba ja Ucimwene. Komboleka kuti m’yilambo yeleyi ŵandu ŵakuŵalanjikape ni ŵakusamanyilila masengo gakulinganya yejonasice kapena nganakola mbiya syakulinganyicisya yinduyo. Nambo naga akwamba kujilecelela Nyumba ja Ucimwene ngajilinganya mpaka jijonasice mnope mwati mpaka kuŵe kwakusawusya kujilinganyasoni, soni nganijiŵa jitendele umboni wambone kumaloko. Aklistu wosope mumpingo pakutenda mbali jawo kuti Nyumba ja Ucimwene jiwoneceje cenene, yikusakamucisya kuti Yehofa acimbicikwe, soni kuti mbiya sya abale siŵataŵile nyumbajo, sikagamba konanjikwa.

19. Ana asimicisye mtima kutenda cici pakulosya kucimbicisya malo getu gakulambilila?

¹⁹ Nyumba ja Ucimwene jili nyumba jatwajipelece kwa Yehofa. M’yoyo, nganijiŵa nyumba ja mundu kapena ja mpingo wuliwose. Yajikusasala Baibulo mpaka yitukamucisye kugawona mwakuŵajilwa malo gatukusamlambilila Mlunguga. Aklistu wosope mumpingo mpaka alosye kuti akusacimbicisya malo gakulambililaga pakupeleka mbiya mwakusaka kwawo kuti sikamucisye pakutaŵa nyumba sine, nambosoni pakamulicisya masengo ndaŵi, soni macili gawo pakusamalila ni kulinganya Nyumba ja Ucimwene jawo. Naga tukutenda yeleyi tucilosya kuti tuli ŵakulipeleka pa nyumba ja Yehofa mpela mwaŵatendele Yesu.