Ireray Tagil’ e Liyor Rodad

“Rogon ni gu be tiyan’ug ko naun rom, . . . e be yik’ u fithik’ag ni bod ba nifiy.”​—JOHN 2:17.

TANG: 13, 21

UW ROGON NI GA RA FULWEG?

Uw rogon ni nge m’ug ni gad be tayfan e pi muulung ni gad ma un ngay?

Uw rogon ni be pi’ e pi tapigpig rok Jehovah e ayuw ni fan ko dimow Kingdom Hall ni yibe tay?

Mang nib ga’ fan ni ngaud klinnaged e Kingdom Hall rodad ni gubin ngiyal’, ma gad be guy rogon ni nga i par gubin yang riy nib fel’ rogon?

1, 2. (a) Uw e yungi n’en ni i liyor e pi tapigpig rok Jehovah riy kakrom? (b) Uw rogon fare tempel rok Got ni immoy u Jerusalem u wan’ Jesus? (c) Mang fan ni kan ngongliy e re article ney?

 KAB kakrom i yib ni bay e yungi n’en ni ma liyor e pi tapigpig rok Got riy. Bod ni sana i ngongliy Abel e altar ni nga i ognag e maligach riy ngak Got. (Gen. 4:3, 4) Ma Noah, nge Abraham, nge Isak, nge Jakob, nge Moses e kur ngongliyed boch e altar. (Gen. 8:20; 12:7; 26:25; 35:1; Ex. 17:15) Ki yog Jehovah ngak piyu Israel ni ngar ngongliyed fare tabernacle. (Ex. 25:8) Boch nga tomuren, mi yad toy ba tempel ni ngaur liyorgad riy ngak Jehovah. (1 Ki. 8:27, 29) Tomuren ni chuw e pi Jew ko kalbus u Babylon, mab ga’ ni yad ma muulung ko yungi n’en ni tafen e muulung rok piyu Israel. (Mark 6:2; John 18:20; Acts 15:21) Ma tin som’on e Kristiano e ur ted e muulung u tafen boch e walag u lan e ulung. (Acts 12:12; 1 Kor. 16:19) Ma ngiyal’ ney e ma yan e pi tapigpig rok Jehovah ko pi Kingdom Hall ni kan ngongliy u fayleng i yan ni fan e ngar filed murung’agen Jehovah mar liyorgad ngak.

² Fare tempel rok Jehovah ni immoy u Jerusalem e rib ga’ fan u wan’ Jesus. Ma re n’ey e i puguran ngan’ pi gachalpen fapi thin ko profet ni faani gaar: “Rogon feni pasigan’ug ni nggu tiyan’ug ko tempel rom e be gak’ u lan ngorongoreg ni bod ba nifiy.” (Ps. 69:9; John 2:17) Riyul’ ndariy reb e Kingdom Hall nrayog ni nga nog ni aram e “Tempel” ara naun rok Jehovah, ni bod rogon fare tempel u Jerusalem kakrom.  (2 Kron. 5:13; 33:4) Yugu aram rogon, ma bay boch i kenggin e motochiyel u Bible ni be tamilangnag nthingar ud ted fan e yungi n’en ni tagil’ e liyor rodad e ngiyal’ ney. Kan ngongliy e re article ney ni bochan e ngan sul u daken boch e pi kenggin e motochiyel ney, min weliy rogon nrayog ni ngad fanayed nga rogon ni gad ma ayuweg e Kingdom Hall rodad, nge rogon e salpiy ni ayuw ni gad ma pi’ ni fan ngay. *

NGAUD TED FAN E BIN RIYUL’ E LIYOR NI GAD MA TAY

3-5. Mang e yima rin’ u Kingdom Hall? Bochan e re n’ey, ma susun ni nge uw rogon u wan’dad e pi muulung ni gad ma tay riy?

³ Kingdom Hall e aram tagil’ e bin riyul’ e liyor ni yima tay ko pi binaw i yan. Reb e kanawo’ ni ma pi’ Jehovah e tin nib t’uf rodad riy ni fan ko tirok ban’en e u daken e pi muulung ni yima tay ko pi Kingdom Hall ney u gubin e wik. Aram e gin ni ma pi’ e ulung rok e athamgil riy nga lanin’dad, mu kur pied boch e fonow nib fel’ ngodad. Gubin e piin ni yad ma yib ko muulung e kar bad ni bochan e ke piningrad Jehovah nge Fak. Ere, ri gad ba tow’ath ni ke piningdad Jehovah nge Fak ni ngad uned ko ‘abich u tebel’ rok Jehovah. Ere, susun e dab da darifannaged e re tow’ath ney ni kan ognag ngodad. ​—1 Kor. 10:21.

⁴ Rib ga’ fan e pi muulung ney ni gad ma tay u wan’ Jehovah ni bochan e aram e ngiyal’ ni gad ma liyor ngak miki bagadad me pi’ e athamgil nga laniyan’ bagadad. Ere, aram fan ni thagthagnag nga laniyan’ apostal Paul ni nge pi’ e athamgil nga lanin’dad ndab ud paged e pi muulung rodad. (Mu beeg e Hebrews 10:24, 25.) Ere gur, ra m’ug ni gad be tayfan Jehovah ni faanra ud paged e muulung ni bochan boch ban’en nde ga’ fan? Ra m’ug ni gad be tayfan Jehovah nge pi n’en ni ke ngongliy rogon ni fan ngodad ni faanra ud fal’eged rogodad ko pi muulung ni gad ma tay mu kud uned ngay ni gubin ngiyal’.​—Ps. 22:22.

⁵ Maku reb e, ngongol rodad u nap’an e muulung nge rogon ni gad ma ayuweg e Kingdom Hall rodad e ku ra m’ug riy ko gad be tayfan Jehovah fa danga’. Gad baadag ni ngan pining e sorok nga fithingan Jehovah u daken e ngongol rodad, ya re ngachal nem e ba ga’ ni gad ma guy ni kan tay ko pi sign ko pi Kingdom Hall u gubin yang.​—Mu taarebrogonnag ko 1 Kings 8:17.

6. Mang e ke yog boch e girdi’ u murung’agen e Kingdom Hall rodad nge piin ni yad ma un riy ko muulung? (Mu guy e sasing u tabolngin e re article ney.)

⁶ Ba ga’ ni ma guy e girdi’ rogon ni gad ma ayuweg e yungi n’en ni tagil’ e liyor rodad. Bay reb e pumoon u Turkey ni yog ni gaar: “Ka rug gin nga rogon feni beech nge feni yaram lan e Kingdom Hall ni kug un ngay. Girdi’ ni kar bad e ngaram e kar munmadgad nib fel’ rogon, ma yad be siminmin, ma nap’an nra guyed gag ma ra bad ra nonad ngog. Ka rug gin ko re n’ey.” Bochan e re n’ey, ma aram ma daki pag fare pumoon e muulung, ma de n’uw nap’an nga tomuren me un ko taufe. Ku bay reb e ulung u reb e mach u Indonesia nra pininged boch e tayugang’ ko am ni ngar bad ra guyed e Kingdom Hall rorad ni ka fini m’ay. Ma aram me yib e mayor ko re mach nem. Nap’an ni yib fare mayor mi ri gin nga rogon feni manigil nge feni fel’ yaan fare Kingdom Hall nge rogon feni fel’ yaan lan e yoror riy ni kan ngongliy rogon. I yog ni gaar: “Rogon feni beech e re naun ney e be dag rarogon e bin riyul’ e michan’.”

7, 8. Mang boch ban’en thingar dabi pagtalin e piin ni yad ma un ko muulung u Kingdom Hall?

⁷ Bochan ni Jehovah e ir e en ni ma piningdad ni ngad uned ko pi muulung ney, ma thingari m’ug ni gad ma tayfan u daken e ngongol rodad, nge rogon e munmad ni gad ma tay, nge rogon ni gad ma fal’eg yaadad u nap’an ni gad ra un ko pi muulung ney. Kan guy ni bay boch e girdi’ ni kaygi pag rogon ni yad ma lemnag rogon ni ngaun rin’ e pi n’ey, ma bay boch e girdi’ ni yug dariy fan u wan’rad. Ere, bayi n’en mu ur ngongolgad u lan e Kingdom  Hall ni gowa yad bay u taferad. Maku reb e, susun ndab ud darifannaged e muulung ni gad ma tay. Aram fan nnap’an ni gad ra yib ko muulung ma bay yaramen e munmad ni gad ma tay, maku darud textgad, ara da nonad, ara da ked ban’en, ara da unumed ban’en u nap’an ni yibe muulung. Ere, piin gallabthir e thingar ra ayuweged pi fakrad ni ngar nanged ni Kingdom Hall rodad e gathi tagil’ e milmil ara tagil’ e fafel.​—Ekl. 5:1.

⁸ Nap’an ni guy Jesus boch e girdi’ ni yad be fol chuway’ u lan e tempel kakrom, mi ri damumuw ngorad ma aram me tulufrad ni ngar chuwgad u rom. (John 2:13-17) Ku arrogon e Kingdom Hall rodad ni aram tagil’ e liyor rodad, maku aram e gin ni gad ma fil murung’agen Got riy. Ere, susun ndab ud rin’ed boch ban’en u rom ni bay rogon ko siyobay ara boch ban’en ndariy rogon ko tirok Got ban’en.​—Mu taarebrogonnag ko Nehemiah 13:7, 8.

NGAUD PIED E AYUW KO PI MARUWEL NI YIMA RIN’ NI FAN KO PI KINGDOM HALL RODAD

9, 10. (a) Uw rogon ni yibe pi’ e ayuw ko pi maruwel nib t’uf ni ngan rin’ ni fan ko pi Kingdom Hall, ma mang angin e re n’ey? (b) Mang e kan rin’ ni fan ko pi ulung ndariy e salpiy rorad ni ngar ngongliyed reb e Kingdom Hall ngorad?

⁹ Be athamgil e ulung rok Jehovah ni ngar pied e ayuw ko maruwel ni yima rin’ ni fan ko pi Kingdom Hall rodad. Bay boch e walag ni kar ognaged yad ni ngar yoloyed yaan e pi naun ney ni nge yan i aw, ngemu’ mar toyed, maku boch i yad e ma un i ngongliy e yungi n’en ni ke kireb riy. Gubin e pi walag ney ni yad ma maruwel ndariy puluwrad. Mang angin e re n’ey? Ka nap’an e November 1, 1999, mab pag 28,000 e tagil’ e liyor ni kan ngongliy ni fan ko pi ulung rodad u ga’ngin yang e fayleng. Re n’ey e be dag nu lan fa 15 i duw ni ke yan, ma ra reb e rran ma lal e Kingdom Hall ni kab beech ni kan toy.

¹⁰ Be athamgil e ulung rok Jehovah ni nge toy e Kingdom Hall ko pi binaw nib t’uf boch e Kingdom Hall riy. Yad ma rin’ e re n’ey ni bochan e yad be fol ko fare kenggin e motochiyel ni bay u Bible ni faan be yog ni piin ni boor ban’en rorad e ngar ayuweged e piin ni yad ba gafgow, ya nge yag ni ‘mat’aw ngak e girdi’ ni gubin.’ (Mu beeg e 2 Korinth 8:13-15.) Ere, angin ni ke yib riy e boor tagil’ e muulung ni yibe toy ni fan nga boch e ulung ndariy e salpiy rorad ni ngar ngongliyed reb e Kingdom Hall ngorad.

11. Mang e yog boch e walag u murung’agen e Kingdom Hall rorad? Uw rogon e re n’ey u wan’um?

¹¹ Reb e ulung u Costa Rica e lungurad: “Gamad ra par nggu yaliyed e re Kingdom Hall romad ney ma gowa gamad be lik’ay! Da gu lemnaged nrayog ni ngan mu’nag e re naun ney u lan meruk e rran! Machane, bochan e ayuw rok Jehovah, nge yaram ni ke fal’eg e ulung rok, nge ayuw ni ke pi’ e pi walag, ma aram fan ni ke yag ni ngan rin’ e re n’ey. Ireray reb e tow’ath nrib tolang puluwon ni ke pi’ Jehovah ngomad. Ri gamad ba felfelan’ ni bochan.” Rib gel e felfelan’ ni gad ma tay u nap’an ni gad ra guy pi walagdad ni yad be pining e magar ngak Jehovah ko n’en ni ke rin’ ni fan ngorad nge ku nap’an ni gad ra nang ni yibe ngongliy  rogon e Kingdom Hall ni fan ngak e pi walagdad u ga’ngin yang e fayleng. Pi maruwel ney ni yibe rin’ e maruwel rok Jehovah, ya nap’an ni yira mu’ i toy reb e pi Kingdom Hall ney ma boor e girdi’ ni yad ma yib ngay ni ngkur filed boch ban’en u murung’agen e En ni Ke Sunmiydad.​—Ps. 127:1.

12. Uw rogon nrayog ni ngam pi’ e ayuw ko pi dimow Kingdom Hall ni yibe tay?

¹² Boor e walag ni pumoon nge ppin ni kar felfelan’gad ni bochan e ke yag ni ngar uned i toy boch e Kingdom Hall rodad. Demtrug ko rayog ni ngad uned i rin’ e pi maruwel ney fa dabiyog, ma gad gubin nrayog ni ngad pied e salpiy ni ayuw ni fan ko pi maruwel ney. Ya faan gad ra athamgil u rogon nrayog rodad ni ngad pied e ayuw ko pi maruwel ney ni yima rin’, mab gel e felfelan’ ni gad ra tay, ma bin th’abi ga’ fan riy e gad be pining e sorok ngak Jehovah. Maku reb e, faan gad ra rin’ ni aray rogon ma aram e gad be folwok ko pi tapigpig rok Got kakrom ni ur pied e ayuw ko pi naun ni un toy ni nge mang tagil’ e liyor rorad kakrom.​—Ex. 25:2; 2 Kor. 9:7.

KLIN NI YIMA TAY U KINGDOM HALL

13, 14. Mang e kad filed u Bible ni be dag nthingar ud ted e Kingdom Hall rodad nib beech mab yaram langgin?

¹³ Nap’an ni yira mu’ i toy reb e Kingdom Hall, mab t’uf ni ngaun klinnag ma yibe tay nib yaram langgin, ya nge yag ni m’ug riy rarogon nge fel’ngin fare Got ni gad be pigpig ngak ni ir reb e Got nib yaram. (Mu beeg e 1 Korinth 14:33, 40.) Maku reb e, faanra ngad pared ni gad ba beech ni bod rogon Jehovah, ma gathi kemus ni liyor rodad, nge lem rodad, nge ngongol rodad e nga i par nib beech, ya kub t’uf ni nga i par dowdad nib beech.​—Rev. 19:8.

¹⁴ Faanra ud ted e Kingdom Hall rodad nib beech, ma aram e gad ra adag ni ngaud pininged e girdi’ ni ngar bad ngay ko muulung ni bochan e gad manang nib puluw e n’en ni gad be machibnag  nga rogon ni gad be tay tagil’ e liyor rodad nib beech. Ku ra guy e girdi’ ni gad be pigpig nga reb e Got nib thothup, ma dab ki n’uw nap’an ma ra fal’eg e re fayleng ney nge mang paradis ndakuriy e tin nib alit ban’en riy.​—Isa. 6:1-3; Rev. 11:18.

15, 16. (a) Mang fan ni bay yu ngiyal’ nib mo’maw’ ni ngan tay e Kingdom Hall nib beech? Mang nib ga’ fan ni ngaud klinnaged e Kingdom Hall rodad? (b) Uw rogon ni kan yarmiy rogon e klin ni yima tay ko birom e ulung, ma ra bagadad ma mang e ba milfan ngak ni nge rin’?

¹⁵ Ra be’ ma rogon ni ma lemnag murung’agen e klin. Ni mang fan? Rayog ni bochan e gin nra ilalgad riy. Bay boch e girdi’ ni yad ma par u boch e binaw ni boor e fiyath riy ara boch e binaw nib alit e kanawo’ riy, mab barbar. Ku bay boch e girdi’ ni yad ma par u boch e binaw ni buchuuw e ran riy nge pi n’en ni yima fanay ni fan ko klin. Demtrug rogon e lem rodad nge rogon e par rodad, ma thingar da guyed rogon ni nga i par e Kingdom Hall rodad nib beech mab yaram langgin ni bochan e aram tagil’ e liyor rodad ngak Jehovah.​—Deut. 23:14.

¹⁶ Thingar ud klinnaged e Kingdom Hall rodad. Ere, thingari dugliy e piin piilal e rofen ni ngaun tay e klin u Kingdom Hall, ma ngkur guyed rogon ni nga i par nib gaman mam’en e klin nrayog ni ngaun fanay. Bay boch ban’en nib t’uf ni ngan klinnag u tomuren e muulung, ma bay boch ni danga’. Ere, ba t’uf ni nge yarmiy e piin piilal rogon ni ngaun rin’ e pi n’ey ya nge dab un digey yu yang ko Kingdom Hall ndab ni klinnag. Maku gad gubin u lan e ulung nthingar ud pied e ayuw ko pi maruwel ney.

NGAUD AYUWEGED TAGIL’ E LIYOR RODAD NI NGA I PAR NIB FEL’ ROGON GUBIN BAN’EN RIY

17, 18. (a) Mang e rayog ni ngad filed u rogon ni i ayuweg e pi tapigpig rok Jehovah tagil’ e liyor rorad kakrom? (b) Mang fan nthingar ud guyed rogon ni nga i par e Kingdom Hall rodad nib fel’ rogon gubin ban’en riy?

¹⁷ Ku ma athamgil e pi tapigpig rok Jehovah ni nga i par tagil’ e liyor rorad nib fel’ rogon gubin ban’en riy. I yog Jehoash ni Pilung nu Judah ko pi prist ni ngar fanayed e salpiy ni ke pi’ e girdi’ ni fan ko naun rok Jehovah ni ngar ‘ngongliyed e yungin ke kireb’ ko re naun nem. (2 Ki. 12:4, 5) Ba pag 200 e duw nga tomuren, miki fanay Josiah ni Pilung e salpiy ni be pi’ e girdi’ ni fan ko tempel ni ngkun ngongliy e yungin ke kireb ko re tempel nem.​—Mu beeg e 2 Kronicles 34:9-11.

¹⁸ Bay boch e branch ofis u boch e nam ni ka rogned ni girdi’ ko pi nam nem e darur guyed rogon ni nga i par e naun nib fel’ rogon ma yibe ngongliy e yungi n’en ni ke kireb riy. Sana rayog ni buchuuw e girdi’ ko pi nam nem ni yad manang rogon ni ngan rin’ e pi maruwel ney, ara de gaman e salpiy nrayog ni ngan fanay ko pi maruwel ney. Machane, faanra dab ud guyed rogon ni nga i par gubin yang ko Kingdom Hall rodad nib fel’ rogon, ma aram e rayog ni nge papey ni nge kireb fare naun miki kireb thidad u wan’ e girdi’ ko binaw rodad. Maku reb e, faanra guy e ulung rogon ni nga i par e Kingdom Hall rodad nib fel’ rogon gubin ban’en riy, ma rayog ni ngan pining e sorok riy ngak Jehovah, me yag ni ngkun ayuweg e salpiy ni be pi’ boch e walag ko ulung ni ayuw.

19. Uw rogon ni kam dugliy u wan’um ni ngaum tayfan e gin ni gad ma fanay ni ngaud liyorgad riy ngak Jehovah?

¹⁹ Kingdom Hall e ba naun ni kan ognag ngak Jehovah. Ere, dariy bagadad ara reb e ulung nib milfan reb e Kingdom Hall ngak. Kad filed faram ni pi kenggin e motochiyel u Bible e ir e ra ayuwegdad ni nge puluw rogon ni gad ma lemnag tagil’ e liyor rodad ngak Got. Ma bochan ni gad ma tayfan Jehovah, ma aram fan ni gad ma tayfan e pi muulung ni gad ma un ngay nge Kingdom Hall rodad. Ku gad ba felfelan’ ngay ni ngaud pied e salpiy ni ayuw ya nge yag ni ngkun toy boch e Kingdom Hall, maku gad ma athamgil u rogon nrayog rodad ni ngad ayuweged e pi naun ney ma gad be tay nib beech. Faanra ud rin’ed ni aray rogon ma aram e gad be folwok rok Jesus nrib pasigan’ ngay ni nga i ayuweg tagil’ e liyor rok Jehovah.​—John 2:17.

[Boch e thin nra tamilangnag murung’agen]

[Deer ni ngan pi’ e fulweg riy]