1, 2. 1) ¿Úuchjeakileʼ tuʼux ku adorartaʼal Jéeoba? 2) ¿Bix u yilik kaʼach Jesús u templo Jéeoba yaan Jerusalenoʼ? 3) ¿Baʼax ken k-il teʼ xookaʼ?

DESDE úuchjeakileʼ le máaxoʼob meyajtik Diosoʼ yaan junpʼéel lugar tuʼux ku adorartikoʼob. Jeʼex Abeleʼ le ka tu kʼubaj junpʼéel siibal tiʼ Jéeobaeʼ maʼ xaaneʼ tu beetaj junpʼéel altar (Gén. 4:3, 4). Tsʼoʼoleʼ Noé, Abrahán, Isaak, Jacob yéetel Moiseseʼ láayliʼ tu beetoʼob xan altaroʼobeʼ (Gén. 8:20; 12:7; 26:25; 35:1; Éxo. 17:15). Jéeobaeʼ tu yaʼalaj tiʼ le israelitaʼob ka u beetoʼob le tabernaculooʼ (Éxo. 25:8). Ka máan kʼiineʼ tu yaʼalajtiʼob ka u beetoʼob le templooʼ (1 Rey. 8:27, 29). Ka xuʼul u palitsiltaʼal u kaajal Dios tu kaajil Babiloniaeʼ, letiʼobeʼ joʼopʼ u muchʼkubaʼob tiʼ sinagogaʼob (Mar. 6:2; Juan 18:20; Bax. 15:21). Yéetel teʼ yáax siglooʼ le sukuʼunoʼoboʼ joʼopʼ u muchʼkubaʼob tiʼ najoʼob (Bax. 12:12; 1 Cor. 16:19). Teʼ kʼiinoʼob xanaʼ le máaxoʼob meyajtik Jéeoba tiʼ tuláakal yóokʼol kaaboʼ ku muchʼkubaʼob tiʼ u cientosil u Najiloʼob Reino utiaʼal u kaanbaloʼob yéetel u adorartikoʼob.

² Jesuseʼ jach ku respetartik kaʼach u templo Jéeoba yaan Jerusalenoʼ. Jesuseʼ jach u yaabiltmaj kaʼach le templooʼ, le oʼolal u disipuloʼobeʼ tu kʼaʼajsoʼob le baʼax ku yaʼalik le salmistaaʼ: «In yaabiltmaj a wotoch, maʼ tu páajtal in chéen ilik baʼax ku  beetaʼaliʼ» (Sal. 69:9, Traducción del Nuevo Mundo; Juan 2:17). Úuchjeakileʼ tiʼ le templo yaan Jerusalenoʼ ku yaʼalaʼaltiʼ u yotoch Jéeoba, pero bejlaʼeʼ le Najiloʼob Reinooʼ maʼ jach igual yéetel le templooʼ (2 Cró. 5:13; 33:4). Kex beyoʼ unaj k-respetartik le Najil Reinooʼ tumen teʼ k-adorartik Jéeobaiʼ. Teʼ xookaʼ yaan k-ilik baʼax ku yaʼalik le Biblia yoʼolal bix unaj k-portartikba teʼ Najil Reinooʼ, bix jeʼel k-kanáantikeʼ yéetel yaan k-ilik xan bix jeʼel k-áantaj utiaʼal ka beetaʼak u maasileʼ. *

3-5. 1) ¿Baʼax junpʼéel Najil Reino? 2) ¿Bix unaj k-ilik le muchʼtáambaloʼoboʼ?

³ Le Najil Reinooʼ letiʼe lugar ku meyajtoʼon utiaʼal k-muchʼikba k-adorart Jéeobaoʼ. Le muchʼtáambaloʼoboʼ junpʼéel regalo ku tsʼáaiktoʼon Dios yéetel ku yáantkoʼon utiaʼal k-maas bisikba tu yéetel. Teʼ muchʼtáambaloʼoboʼ u kaajal Jéeobaeʼ ku líiʼsik k-óol yéetel ku tsʼáaiktoʼon le áantaj kʼaʼabéettoʼonoʼ. Jach kiʼimak k-óol tumen Jéeoba yéetel u Hijoeʼ ku invitartikoʼon janal tu «mesa» cada semana (1 Cor. 10:21). Toʼoneʼ junpuliʼ maʼ unaj k-tuʼubsik le invitación ku beetiktoʼon Jéeobaoʼ.

⁴ Jéeobaeʼ ku yaʼaliktoʼoneʼ jach kʼaʼabéet k-bin teʼ muchʼtáambaloʼob utiaʼal k-adorartik yéetel utiaʼal k-paklan líiʼsik k-óoloʼ (xok Hebreoʼob 10:24, 25). Tumen k-eʼesik tsiikil tiʼ Jéeobaeʼ maʼatech u pʼáatal maʼ k-bin teʼ muchʼtáambaloʼ, chéen jaʼaliʼ wa jach maʼ tu páajtaleʼ. Junpʼéel bix jeʼel k-eʼesik kʼaʼanaʼan k-ilik le muchʼtáambaloʼoboʼ letiʼe ken k-líiʼsba yéetel ken táakpajkoʼonoʼ (Sal. 22:22).

⁵ Le bix k-portartikba teʼ muchʼtáambaloʼob yéetel le bix k-kanáantik le Najil Reinooʼ ku yeʼesik wa k-respetartik Jéeoba. Tu letreroil u Najil Reinoeʼ ku chíikpajal u kʼaabaʼ Jéeobaiʼ, le oʼolaleʼ yéetel baʼaxoʼob k-beetkeʼ k-kʼáat ka alabartaʼak u kʼaabaʼ (ket yéetel 1 Reyes 8:17).

6. Jujuntúul máakoʼobeʼ, ¿baʼax tsʼoʼok u yaʼalikoʼob yoʼolal le Najil Reino bey xan yoʼolal le máaxoʼob ku binoʼoboʼ? (Ilawil le foto yaan tu káajbal le xookaʼ.)

⁶ Ken k-eʼes tsiikil tiʼ le Najil Reinooʼ ku tsʼaʼabal cuenta tumen u maasil máakoʼob. Por ejemploeʼ juntúul máak kajaʼan Turquíaeʼ, ku yaʼalik: «Ka binen tiʼ junpʼéel Najil Reinoeʼ jach jatsʼuts tin wilil bix limpioil yéetel bix tsoololil u beetaʼal tuláakal baʼaliʼ. Le máaxoʼob ku binoʼoboʼ maʼalob u vestirmilubaʼob, kiʼimak u yóoloʼob yéetel jach maʼalob úuchik u tratartikenoʼob. Lelaʼ jach jatsʼuts tin wilil». Le máakaʼ joʼopʼ u bin tiʼ tuláakal le muchʼtáambaloʼoboʼ yéetel maʼ xáanchaj ka okjaʼanajiʼ. Tiʼ junpʼéel kaaj yaan tu luʼumil Indonesiaeʼ, le sukuʼunoʼoboʼ tu invitartoʼob u vecinoʼob, le presidenteoʼ yéetel le policíaʼob utiaʼal ka u kʼaj óoltoʼob le túumben Najil Reinooʼ. Le presidenteoʼ jach maʼalob tu yilil bix beetaʼanil yéetel jach jatsʼuts tu yilil le Najil Reino bey xan le jardinoʼ. Letiʼeʼ tu yaʼalaj: «Le bix limpioil le Najil Reinooʼ ku yeʼesik bix le fe yaantiʼoboʼ».

7, 8. ¿Bix jeʼel k-eʼesik tsiikil tiʼ Jéeoba le tiaʼanoʼon teʼ Najil Reinooʼ?

⁷ Jéeoba invitartikoʼon teʼ muchʼtáambaloʼoboʼ, le oʼolaleʼ kʼaʼabéet k-kanáantik bix k-vestirtikba yéetel k-portartikba. Kex minaʼan junpʼéel lista tiʼ bix unaj k-portartikba teʼ muchʼtáambaloʼoboʼ, unaj k-kanáantik baʼaxoʼob k-beetkiʼ. Jéeobaeʼ u kʼáat ka u yuʼububa máak maʼalob teʼ Najil Reinooʼ, chéen baʼaleʼ lelaʼ maʼ u kʼáat u yaʼal wa yaan k-vestirtikba chéen jeʼel bixakeʼ. Tsʼoʼoleʼ le tiaʼanoʼon teʼ muchʼtáambaloʼoboʼ maʼ  unaj k-túuxtik mensajeiʼ, k-tsikbal, k-janal wa k-beetik uláakʼ baʼaloʼob maʼatech u yeʼeskoʼob tsiikil. Le taatatsiloʼob xanoʼ unaj u kaʼanskoʼob tiʼ u paalaloʼobeʼ le Najil Reinooʼ maʼ u lugaril u máan u yáalkaboʼobiʼ mix utiaʼal u báaxaloʼobiʼ (Ecl. 3:1).

⁸ Ka tu yilaj Jesús táan u koonol le máakoʼob tu templo Diosoʼ, jach pʼuʼujeʼ ka tu tojolchʼintoʼob (Juan 2:13-17). Teʼ Najil Reinooʼ toʼoneʼ k-bin kaanbal yéetel k-adorart Jéeoba. Le oʼolaleʼ maʼ maʼalob ka u beet máak negocioʼob wa uláakʼ baʼaloʼob le tiaʼan teʼ Najil Reinooʼ (ket yéetel Nehemías 13:7, 8).

9, 10. 1) ¿Bix u beetik u kaajal Jéeoba u Najiloʼob Reino, yéetel baʼax utsiloʼob tsʼoʼok u taasik? 2) ¿Baʼax tsʼoʼok u beetik u kaajal Jéeoba utiaʼal u yáantik le sukuʼunoʼob minaʼan u Najil Reino teʼ tuʼux kajaʼanoʼoboʼ?

⁹ U kaajal Jéeobaeʼ jach táan u meyaj utiaʼal u beetaʼal u Najiloʼob Reino. Yaʼab sukuʼunoʼobeʼ kex maʼatech u boʼotaʼaloʼobeʼ, ku beetkoʼob u planosil, ku beetkoʼob u najiloʼob yéetel yaan horaeʼ chéen ku yutskíintikoʼob. Yoʼolal le meyajoʼob ku beetaʼalaʼ, teʼ tu tsʼook 15 años máanoʼ, beetaʼab 28 mil Najiloʼob Reino jach jatsʼutstakoʼob tiʼ tuláakal yóokʼol kaab, sáamsamaleʼ ku beetaʼal kex cinco u pʼéeleliʼ.

¹⁰ U kaajal Jéeobaeʼ ku invitartik sukuʼunoʼob utiaʼal u beetaʼal Najiloʼob Reino le tuʼuxoʼob maas kʼaʼabéetoʼ, utiaʼal u beetaʼaloʼobeʼ ku meyaj le donacionoʼoboʼ. Toʼoneʼ jeʼex u yaʼalik le Bibliaoʼ k-paklan áantikba utiaʼal ka yanak tiʼ u maasil le baʼax ku bineltik tiʼoboʼ (xok 2 Corintoiloʼob 8:13-15). ¿Baʼax utsil tsʼoʼok u taasik ikil k-beetik beyaʼ? Le sukuʼunoʼob yanoʼob teʼ tuʼux beetaʼab le Najiloʼob Reinooʼ maʼ xaaneʼ chéen tu juunaloʼobeʼ maʼ tu páajtal u boʼotkoʼob.

11. 1) ¿Bix u yuʼubikuba jujuntúul sukuʼunoʼob ken beetaʼak junpʼéel Najil Reino utiaʼal u muchʼkubaʼob? 2) Techeʼ, ¿bix a wuʼuyikaba yoʼolal le Najiloʼob Reino ku beetaʼaloʼ?

¹¹ Le sukuʼunoʼob yanoʼob tiʼ junpʼéel múuchʼulil yaan Costa Ricaoʼ, tu yaʼaloʼob: «¡Le ken k-il le Najil Reinooʼ hasta k-tuklik bey chéen táan k-wayakʼeʼ! Maʼ tu páajtal k-creertik. ¡Le Najil Reino jach jatsʼutsoʼ chéen ocho días ka beetaʼabi! Lelaʼ chéen béeychaj yéetel u yáantaj Jéeoba, yéetel u yáantaj u kaajal bey xan le sukuʼunoʼob meyajnajoʼoboʼ. Le Najil Reinoaʼ junpʼéel jatsʼuts regalo tsʼoʼok u tsʼáaiktoʼon Jéeoba. Toʼoneʼ jach kiʼimak k-óol tu yoʼolal». Toʼoneʼ jach ku kiʼimaktal k-óol ken k-ojéelt bix u tsʼaʼabal u graciasil tiʼ Jéeoba tumen le sukuʼunoʼob yoʼolal bix u yáantaʼaloʼoboʼ. Tsʼoʼoleʼ ku kiʼimakkúuntik xan k-óol k-ojéeltik táan u beetaʼal uláakʼ Najiloʼob Reino utiaʼal u maasil sukuʼunoʼoboʼ. Lelaʼ ku yeʼesikeʼ Jéeobaeʼ táan u bendecirtik le meyajoʼob ku  beetaʼal utiaʼal u líiʼsaʼal le Najiloʼob Reinooʼ, tumen chéen pʼel u tsʼoʼoksaʼaleʼ yaʼab máakoʼob ku káajal u binoʼob muchʼtáambal utiaʼal u kaanbaloʼob tiʼ Jéeoba yéetel u adorartikoʼob (Sal. 127:1).

12. ¿Bix jeʼel a wáantaj utiaʼal u beetaʼal u Najiloʼob Reinoeʼ?

¹² ¿Bix jeʼel a wáantaj utiaʼal u beetaʼal u Najiloʼob Reinoeʼ? Maʼ xaaneʼ jeʼel u páajtal a bin meyaj teʼ tuʼux ku beetaʼal le Najiloʼob Reinooʼ. Tsʼoʼoleʼ tuláakloʼon jeʼel u páajtal k-tsʼáaik k-donacionoʼob utiaʼal u beetaʼaloʼobeʼ. Le ken k-beet tuláakal le ku páajtal utiaʼal k-áantaj teʼ meyajaʼ, ku kiʼimaktal k-óol tumen táan k-tsʼáaik le baʼax yaantoʼonoʼ yéetel tumen táan k-alabartik Jéeoba. Le máaxoʼob meyajt Dios úuchjeakiloʼ tu tsʼáajoʼob baʼax yaantiʼob utiaʼal u beetaʼal tuʼux ken u adorartoʼob Dios, toʼon xaneʼ láayliʼ bey k-beetkoʼ (Éxo. 25:2; 2 Cor. 9:7).

13, 14. ¿Baʼaxten maʼ unaj u pʼáatal sucio yéetel xaʼaxaʼakʼ le baʼaxoʼob yaan teʼ Najil Reinooʼ?

¹³ Jéeobaeʼ juntúul Dios limpio yéetel santo, le oʼolal uts tu tʼaan ka beetaʼak tuláakal baʼal tu tsoolol. Yoʼolal lelaʼ maʼatech u pʼáatal sucio yéetel xaʼaxaʼakʼ le baʼaxoʼob yaan teʼ Najil Reinooʼ (xok 1 Corintoiloʼob 14:33, 40). Utiaʼal ka pʼáatkoʼon limpioil yéetel santoil jeʼex Jéeobaeʼ, unaj k-kanáantik bix k-adorartik, baʼaxoʼob k-tuklik, baʼaxoʼob k-beetik, tsʼoʼoleʼ tak k-wíinklil unaj u pʼáatal limpioil (Apo. 19:8).

¹⁴ Wa limpio yéetel maʼ xaʼaxaʼakʼ le Najil Reinooʼ, maʼ ken k-suʼlaktal k-invitart uláakʼ máakoʼob teʼ muchʼtáambaloʼoboʼ. Tsʼoʼoleʼ le máakoʼoboʼ yaan u yilkoʼobeʼ maʼ chéen táan k-kaʼansik yaan u yantal junpʼéel yóokʼol kaab limpioiʼ, baʼaxeʼ táan u káajal k-beetik.  Yaan xan u yilkoʼobeʼ le Dios k-adorartikoʼ santo yéetel limpio, tsʼoʼoleʼ maʼ kun xáantal ken u sut paraísoil tuláakal le Luʼumaʼ (Isa. 6:1-3; Apo. 11:18).

15, 16. 1) ¿Baʼaxten maʼ chéen chʼaʼabil u beetaʼal u limpiezail le Najil Reinooʼ? 2) ¿Baʼaxten unaj k-ilik u pʼáatal limpioil? 3) Ta múuchʼulileʼ, ¿bix u beetaʼal le limpiezaoʼ? 4) ¿Baʼax privilegioil yaantoʼon?

¹⁵ Le máakoʼoboʼ jejeláas baʼaxoʼob ku tuklikoʼob yoʼolal le limpiezaoʼ. ¿Baʼaxten? Maʼ xaaneʼ yoʼolal bix úuchik u líiʼsaʼaloʼob. Yanoʼobeʼ kajaʼanoʼob tuʼux jach yaan polvo wa luukʼ, tsʼoʼoleʼ minaʼan carreteraiʼ. Uláakʼoʼobeʼ minaʼantiʼob yaʼab jaʼ wa le baʼaxoʼob kʼaʼabéet utiaʼal u beetaʼal limpiezaoʼ. Chéen baʼaleʼ kex jeʼel tuʼuxak kajaʼanoʼon bey xan kex jeʼel baʼaxak ka u tukult le máakoʼob yoʼolal le limpiezaoʼ, toʼoneʼ unaj k-ilik u pʼáatal limpioil yéetel tu tsoolol le baʼaxoʼob yaan teʼ Najil Reinooʼ. ¿Baʼaxten? Tumen letiʼe lugar tuʼux k-adorartik Jéeobaoʼ (Deu. 23:14).

¹⁶ Wa k-kʼáat ka pʼáatak limpioil le Najil Reinooʼ, kʼaʼabéet u chʼaʼtuklaʼal tubeel bix kun beetbil u limpiezail. Le ancianoʼoboʼ kʼaʼabéet u beetkoʼob u programail le limpiezaoʼ yéetel kʼaʼabéet u yilkoʼob u yantal tuláakal baʼax kʼaʼabéet utiaʼal u beetaʼal. Le ancianoʼoboʼ ku yilkoʼob xan ka beetaʼak maʼalob le limpiezaoʼ. Yaan jujunpʼéel baʼaloʼobeʼ kʼaʼabéet u limpiartaʼal cada ken tsʼoʼokok le muchʼtáambaloʼoboʼ, pero yanoʼobeʼ maʼatech. Tuláakloʼon yaantoʼon u privilegioil k-táakpajal utiaʼal u beetaʼal le limpieza teʼ Najil Reinooʼ.

17, 18. 1) ¿Baʼax jeʼel k-kanik tiʼ bix úuchik u kanáantik le templo le máaxoʼob meyajt Jéeoba úuchjeakiloʼ? 2) ¿Baʼaxten unaj k-kanáantik le Najil Reinooʼ?

¹⁷ Utiaʼal maʼ u kʼastal xan le Najil Reinooʼ, toʼoneʼ k-kanáantik yéetel k-utskíintik le baʼaxoʼob ku kʼaʼabéettaloʼ. Le máaxoʼob meyajt Jéeoba úuchjeakiloʼ láayliʼ xan bey tu beetiloʼoboʼ. Le táan u reinar Jehoás, tu kaajil Judaeʼ, le kaajoʼ tu tsʼáaj taakʼin utiaʼal le templooʼ. Jehoaseʼ tu yaʼalaj tiʼ le sacerdoteʼob ka meyajnaktiʼob le taakʼin utiaʼal u yutskíintikoʼob le baʼaxoʼob tsʼoʼok u kʼastal kaʼach teʼ templooʼ (2 Rey. 12:4, 5). Doscientos años úuchuk lelaʼ, le rey Josíasoʼ meyajnaj xan tiʼ le taakʼin ku siʼibil teʼ templo utiaʼal u boʼotik u yutskíintaʼaloʼ (xok 2 Crónicas 34:9-11).

¹⁸ Jujunpʼéel Comiteʼob tiʼ Sucursaleʼ tsʼoʼok u yilkoʼobeʼ tiʼ jujunpʼéel luʼumiloʼobeʼ le máakoʼoboʼ maʼ suuk u kanáantkoʼob mix u tsʼáaikoʼob mantenimiento tiʼ le nukuch edificioʼoboʼ. Maʼ xaaneʼ maʼatech u beetkoʼob tumen maʼ yaʼab máax u yojel bix u beetaʼaliʼ wa minaʼan taakʼin tiʼob utiaʼal u beetkoʼob. Chéen baʼaleʼ wa maʼ t-utskíintik le Najil Reino ken kʼaʼabéetchajkoʼ maʼ jatsʼuts kun ilbil tumen le máakoʼoboʼ. Tsʼoʼoleʼ jeʼel u beetik u yaʼalaʼal baʼal tiʼ u kaajal Jéeobaeʼ. Pero wa tuláakloʼon k-kanáantik le Najil Reinooʼ, yaan k-alabartik Jéeoba yéetel yaan u meyajtoʼon tubeel le taakʼin ku síik le sukuʼunoʼoboʼ.

19. Techeʼ, ¿baʼax ken a beet utiaʼal a weʼesik tsiikil tiʼ le lugar tuʼux ka adorartik Jéeobaoʼ?

¹⁹ Le Najil Reinooʼ junpʼéel naj ku kʼuʼubul utiaʼal u adorartaʼal Jéeoba, maʼ utiaʼal juntúul máak wa junpʼéel múuchʼuliliʼ. Jeʼex tsʼoʼok k-ilik teʼ xookaʼ, le baʼaxoʼob ku yaʼalik le Bibliaoʼ jeʼel u yáantkoʼon utiaʼal k-ilik bix u kʼáat Jéeoba ka k-kanáant le tuʼux k-adorartikoʼ. Tumen k-eʼesik tsiikil tiʼ Jéeobaeʼ, k-eʼesik tsiikil teʼ muchʼtáambaloʼoboʼ bey xan tiʼ le Najil Reinooʼ. Toʼoneʼ kiʼimak k-óol ikil k-tsʼáaik k-donación utiaʼal u beetaʼal le Najiloʼob Reinooʼ, tsʼoʼoleʼ k-tsʼáaik k-óol utiaʼal k-kanáantik yéetel utiaʼal k-limpiokíintik. Jeʼex Jesuseʼ, toʼoneʼ k-eʼesik k-yaabiltmaj yéetel k-eʼesik tsiikil tiʼ le lugar tuʼux k-adorartik Jéeobaoʼ (Juan 2:17).