UKPE 1955 a ro yẹ omẹ evaọ Queensland, obọ Australia. Nọ omoke jọ o ruọ emu no, Isẹri Jihova a te mu uwuhrẹ Ebaibol họ kugbe Estelle, oni mẹ. Ọ họ-ame ukpe nọ u lele i rie. Kẹsena ikpe 13 nọ i lele i rie Ron ọsẹ mẹ o te kurẹriẹ ziọ ukoko na. Ukpe 1968 mẹ tẹ họ-ame evaọ ofẹ jọ Queensland.

No emaha ze, obe-use o rẹ were omẹ gaga yọ ere ọvona me wo isiuru kpahe ẹvẹrẹ re. Evaọ okenọ uviuwou mai o jẹ hai kpohọ erẹ ugheriwo, mẹ riẹ nọ o jẹ hae kẹ ọsẹgboni mẹ uye gaga nọ a te rri omẹ evaọ obọ emu omoto jẹ ruẹ nọ me bi se obe, viukpenọ me re rri ughe eware iwoma sa-sa nọ ma be dhẹ vrẹ. Rekọ obe-use nọ o rẹ were omẹ gaga na u fiobọhọ kẹ omẹ evaọ isukulu. Nọ mẹ jọ ekọleji evaọ ẹwho Glenorchy nọ ọ rrọ ukoliko Tasmania, me wo ekẹ obokparọ sa-sa evaọ isukulu na.

Rekọ oke u te ti te nọ mẹ rẹ rọ jẹ iroro jọ nọ i wuzou gaga evaọ uzuazọ mẹ. Kọ mẹ rẹ jẹ okẹ-uwuhrẹ-ọvọvẹ rehọ re me kpohọ isukulu ikpehru? Ghelọ epanọ me wo isiuru kẹ obe-use gbe ewuhrẹ te, oni mẹ o fiobọhọ kẹ omẹ wo uyoyou nọ o mae ga rọkẹ Jihova, yọ onana o be kẹ omẹ evawere gaga. (1 Kọr. 3:18, 19) Fikiere nọ me nwrotọ no ekọleji avọ obe-erae no, me te mu iruo ọkobaro oke-kpobi  họ evaọ amara Ọvo 1971 nọ mẹ jọ ikpe 15. Ọsẹgboni mẹ a rọwo fihọ iroro-ejẹ mẹ nana.

Ikpe eree nọ i lele i rie me ru iruo ọkobaro na evaọ Tasmania. Oke yena mẹ rọ nyaku ọmọtẹ owoma Tasmania jọ nọ a re se Jenny Alcock, mẹ avọ iẹe ma tẹ ruọ orọo. Ikpe ene mẹ avọ iẹe ma ru iruo ọkobaro obọdẹ evaọ ekwotọ Smithton gbe Queenstown nọ ukoko o jọ họ.

Evaọ ukpe 1978, ma te kpohọ orẹwho ofa evaọ orọ ọsosuọ rọkẹ okokohọ akpọ soso nọ a ru evaọ Port Moresby, obọ Papua New Guinea. Mẹ gbẹ kareghẹhọ nọ imishọnare jọ ọ rehọ ẹvẹrẹ Hiri Motu kẹ ovuẹ. Dede nọ me wo otoriẹ ẹvẹrẹ na ha, ovuẹ riẹ na u ru nọ mẹ rọ ruọ iruo imishọnare, wuhrẹ evẹrẹ efa, jẹ be sae kẹ evuẹ wọhọ imishọnare na. Ukuhọ riẹ mẹ tẹ te ruẹ edhere nọ mẹ rẹ rọ rehọ uyoyou nọ me wo kẹ Jihova gbe isiuru nọ me wo kẹ evẹrẹ ru iruo kugbe.

Nọ ma zihe kpohọ Australia, a te vi omai kpohọ iruo imishọnare evaọ ukoliko Funafuti, obọ Tuvalu, ẹkwotọ nọ a jẹ hai se Ellice Islands. Ma rẹro onana vievie he. Ma te ẹkwotọ ọkpokpọ mai na evaọ amara Ọvo 1979. Iwhowho-uvie esa nọ e họ-ame no ọvo e jọ ẹkwotọ Tuvalu soso.

Re a wuhrẹ ẹvẹrẹ Tuvalu o jọ oware olọlọhọ họ. Obe ovo nọ ahwo ẹvẹrẹ Tuvalu a wo họ, “Ọvọ Ọkpokpọ” na. A wo obe-ofeme evaọ ẹvẹrẹ na ha gbe ebe nọ a re ro wuhrẹ ẹvẹrẹ na, fikiere ma te je wuhrẹ eme ekpokpọ 10 rite 20 kẹdẹ kẹdẹ. Rekọ u kri hi ma tẹ te ruẹ nọ ma wo otoriẹ ogbagba eme buobu nọ ma je wuhrẹ na ha. Ukpenọ ma rẹ vuẹ ahwo nọ ẹva-ọgba ọ thọ, ma jẹ vuẹ ae nọ a gbẹ rehọ owawọ wawo eware he yọ a gbẹ hai kru ọkpọ gbe he. O gwọlọ nọ ma rẹ riẹ ẹvẹrẹ na ziezi re ma sai wuhrẹ emọ-uwuhrẹ Ebaibol mai nọ e jọ buobu. Fikiere ma tẹ ruabọhọ ewuhrẹ ẹvẹrẹ na. Nọ ikpe jọ e vrẹ no, aye jọ nọ ma je wuhrẹ Ebaibol kugbe oke yena ọ vuẹ omai nọ: “Eva e be were omai gaga nọ wha be sae ta ẹvẹrẹ mai enẹna. Oke ọsosuọ, ma jẹ sae riẹ ẹme nọ wha jẹ ta ha.”

Evaọ abọdekọ riẹ, ma wo uvẹ jọ nọ ahwo a rẹ ta nọ o mai fo kẹ ohwo kpobi nọ ọ gwọlọ wuhrẹ ẹvẹrẹ ọkpokpọ. Fikinọ iwou nọ a rẹ haya e jọ ẹwho na ha, ma tẹ jẹ rria kugbe uviuwou Isẹri Jihova jọ. Onana u ru nọ ma ro duomahọ ẹvẹrẹ na gbe uzuazọ uyere ahwo na. Ikpe buobu ma jẹ ta ẹvẹrẹ Oyibo ho, fikiere ma tẹ te riẹ epanọ a rẹ ta ẹvẹrẹ Tuvalu ziezi.

U kri hi, ahwo buobu a te mu isiuru họ ewo kẹ ovuẹ Uvie na. Kọ ebe vẹ ma ti ro ru uwuhrẹ Ebaibol  kugbe ai? Ma wo uvumọ ebe ukoko na evaọ ẹvẹrẹ rai hi. Kọ ẹvẹ a te sai ro ru uwuhrẹ omobọ ohwo? Kinọ a te mu ewuhrẹ họ ẹnyaze no, ile vẹ a te sae so? Ebe ẹvẹrẹ vẹ a ti ro ru ewuhrẹ? Kọ ẹvẹ a te tubẹ sae rọ ruẹrẹ oma kpahe kẹ iwuhrẹ na? Kọ ẹvẹ a te sai ro wo ẹnyaharo te ame-ọhọ? O gwọlọ nọ ahwo nana nọ a wo emamọ eva na a re wo emu iwuhrẹ Ọghẹnẹ evaọ ẹvẹrẹ obọrai. (1 Kọr. 14:9) O tẹ jẹ hai gbe omai unu nọ, ‘Kọ ukoko o te rọ ẹvẹrẹ Tuvalu fa ebe ẹdẹjọ, ẹvẹrẹ nọ ahwo nọ a bu te idu ikpegbisoi (15,000) hu a be ta?’ Jihova ọ kẹ uyo enọ nana kpobi, onọ o kẹ omai imuẹro eware ivẹ jọ: (1) Ọ gwọlọ nọ a vuẹ ẹme riẹ evaọ “ewho akotọ ethẹ nọ e rọ ugbo,” gbe (2) ọ gwọlọ nọ ahwo nọ a “rehọ oma kpotọ avọ iruori” evaọ akpọ na a rẹroso odẹ riẹ.—Jeri. 31:10; Zef. 3:12.

Evaọ ukpe 1980 uwou ogha o tẹ kẹ omai iruo efafa, iruo nọ ma roro nọ ma te kẹ vievie he. (1 Kọr. 1:28, 29) Evaọ oke ọsosuọ, ma dẹ emashini ọsese nọ a re ro printi ebe mi egọmeti ubrotọ na, yọ oye ma jẹ hai ro printi ebe nọ ma je ro ru iwuhrẹ. Ma fa obe na Uzẹme nọ U re Suohwo kpo Uzuazọ Ebẹdẹbẹdẹ fihọ ẹvẹrẹ Tuvalu jẹ rehọ emashini nana printi riẹ. Enẹna, mẹ gbẹ be kareghẹhọ epanọ ame-ugbẹ nọ ma je ro printi na ọ jẹ hai gbo te gbe epanọ ẹroro ẹkwotọ yena o jẹ hae kẹ omai uye te evaọ okenọ ma je printi ebe nana kpobi na. Evaọ oke yena, ikpẹ ẹlẹtriki e jariẹ hẹ.

Re ma fa ebe mai fihọ ẹvẹrẹ Tuvalu o jọ bẹbẹ gaga, keme ebe nọ ma wo nọ ma sai ro ru ekiakiẹ nọ i re fiobọhọ i tulo ho. Rekọ ẹsejọ, obufihọ o jẹ hai no eria nọ ma rẹro riẹ hẹ ze. Ohiohiẹ ẹdẹjọ nọ ma jọ usiuwoma, mẹ tẹ rọ ethobọ kporo ẹthẹ ohwo jọ nọ o mukpahe iwuhrẹ mai. Ọzae jọ nọ ọ kpako no nọ ọ rrọ iticha o te no uwou na ze, jẹ vẹvẹ omẹ unu nọ ma gbe te uwou riẹ ofa ha. Kẹsena ọ tẹ ta nọ: “Jọ mẹ vuẹ owhẹ oware jọ. Evaọ efafa rai, eme nọ e rẹ wọ ohwo ru oware he wha be mai ro kere. Rekọ ẹsibuobu ahwo Tuvalu a rẹ ta ẹme ere he.” Nọ mẹ ginẹ nọ mi amọfa, mẹ tẹ ruẹ nọ ẹme ọzae na ọ gba. Fikiere ma te ru inwene evaọ efafa mai. Oware nọ o via na o kẹ omẹ evawere gaga inọ, ohwo nọ ọ  wọso iruẹru mai nọ ọ be hai se ebe mai, Jihova o ro fiobọhọ kẹ omai na!

Obe uzizie kẹ Emu Owọwọ o jọ obe ọsosuọ nọ ma fa fihọ ẹvẹrẹ Tuvalu nọ ma ghale kẹ ahwo. Kẹsena u te ti te omobe-ovẹvẹ Usi Uvie orọ avọ 30, onọ a siobọno kugbe ọrọ Oyibo oke ovona. Eva e were omai gaga inọ ma kẹ ahwo na oware jọ evaọ ẹvẹrẹ rai. Ẹmẹmera na ma te mu ibroshọ gbe ebe ikokoli họ ẹfa fihọ ẹvẹrẹ Tuvalu. Evaọ ukpe 1983, uwou ogha Australia o tẹ jẹ hai printi emagazini Uwou-Eroro Na isiane ẹgbukpe evaọ ẹvẹrẹ na, onọ o jẹ hai wo ewẹ-obe 24. Yọ a tẹ ghale iẹe, koka koka ma jẹ hae jariẹ wuhrẹ idhe-eme ihrẹ. Ẹvẹ ebe ẹvẹrẹ na e jọ ahwo Tuvalu oma? Fikinọ obe-use o rẹ were ahwo Tuvalu gaga, u ru nọ ahwo kpobi a rọ riẹ kpahe ebe mai. Nọ obe okpokpọ mai jọ u te kpozi, a jẹ hai whowho iei nọ a tẹ be niyẹrẹ evaọ oria irediyo egọmeti ubrotọ na. Ẹsejọ dede a jẹ hae rehọ onana karo evaọ iyẹrẹ na. *

Ugbẹ gbe obe ma ro mu efafa na họ. Nọ oke o be nyaharo na ma tẹ jẹ hae rehọ etapraeta kere eme na fihọ ebe jẹ wariẹ ai kere unuẹse buobu, kẹsena ma ve vi ai kpohọ uwou ogha obọ Australia nọ a rẹ jọ printi rai se omai. U wo okejọ nọ uwou ogha na o rọ kẹ inievo-emetẹ ivẹ jọ iruo nọ a rẹ rọ rehọ ọvuọ oke riẹ kere eme nọ ma vi nya na unọjọ u tọjọ fihọ ekọmputa, dede nọ a riẹ ẹvẹrẹ Tuvalu hu. Edhere nana nọ a je ro kere eme na fihọ ekọmputa evaọ ọvuọ oke riẹ na, gbe ivẹ na nọ a jẹ hae rọ wawo ohwohwo evaọ ekọmputa na, u ru nọ a jẹ hai ro duku enwenọ oware kpobi nọ a kere thọ. Kẹsena a ve koko eme na fihọ obe jẹ rehọ iẹe kpohọ ipostọfisi, a vẹ rehọ arupre vi ei zihe se omai re ma kiẹe riwi, nọ ma jẹ kiẹe riwi no jẹ ruẹ nọ o gba ziezi no, ma ve vi ei zihe se ai re a ruẹsi printi riẹ.

Rekọ onana u nwene no. Enẹna efefafa a bi kere eme na fihọ ekọmputa ovavo. Ẹsibuobu, ẹkwotọ nọ a be jọ ta ẹvẹrẹ na a rẹ jọ koko eme nọ a kiẹriwi jẹ ruẹ nọ e gba na fihọ obe, kẹsena a vẹ rehọ Itanẹte vi ei se uwou ogha nọ u re printi riẹ. Enẹna o gbẹ gwọlọ nọ ma dhẹ ọwhọwhọ kpobọ ipostọfisi nyai vi ebe nọ ma kiẹriwi no na ha.

Nọ ikpe e be nyaharo na, u wo iruo efa nọ mẹ avọ Jenny ma ru evaọ eria efa sa-sa ekwotọ Pacific. Ukoko u vi omai no Tuvalu kpohọ uwou ogha Samoa evaọ 1985. Ma jẹ jọ obei fiobọhọ evaọ efafa ẹvẹrẹ Samoa, Tonga, gbe Tokelau kugbe iruo ẹvẹrẹ Tuvalu nọ ma jẹ fa na. * Kẹsena evaọ ukpe 1996, a te vi omai kpohọ uwou ogha Fiji jẹ jọ obei kẹ omai ọkpọ iruo evona, ma jọ obei je fiobọhọ kẹ utu efafa ẹvẹrẹ Fiji, Kiribati, Nauru, Rotuma, gbe Tuvalu.

U re gbe omẹ unu ẹsikpobi nọ me te roro kpahe ọwhọ nọ efefafa a re ro ru iruo rai nọ a tẹ be fa ebe mai. Iruo na e rrọ gaga yọ e rẹ rrọ oma. Dede na, inievo nana nọ e roma kẹ iruo na a bi dhesẹ ọkpọ isiuru Jihova, ọnọ ọ gwọlọ nọ a rẹ ta usiuwoma na “kẹ orẹwho, orua, ẹrọunu gbe oghoghẹrẹ ahwo kpobi.” (Evia. 14:6) Wọhọ oriruo, okenọ ukoko o ma omaa inọ a re mu emagazini Uwou-Eroro Na họ  ẹfa fihọ ẹvẹrẹ Tonga, me te se ekpako ukoko ẹvẹrẹ na kpobi ẹgwae jẹ nọ ae sọ ohwo jọ ọ sae fialoma ze re ma wuhrẹ iẹe kẹ efafa. Omọvo ekpako na jọ nọ ọ jọ iruo emakaniki, o te siobọno iruo riẹ je mu iruo efafa họ okiokiọ riẹ. Onana o kẹ omẹ uduotahawọ gaga, keme o wo uviuwou nọ ọ be rẹrote yọ oria ofa o riẹ nọ ugho u ti noze he. Rekọ Jihova ọ rẹrotei avọ uviuwou riẹ, yọ ọ jọ iruo efafa na ikpe buobu.

Efefafa itieye nọ e roma kẹ iruo na a wo ọkpọ eriwo Utu Ẹruorote Na, enọ e gwọlọ nọ ahwo ẹvẹrẹ nọ a maki tulo ho a rẹ rehọ ẹvẹrẹ obọrai wuhrẹ kpahe Ọghẹnẹ. Wọhọ oriruo, a nọ okejọ inọ, kọ u fo re a rehọ fiki ahwo ẹvẹrẹ Tuvalu nọ a tulo ho na ruẹ uye fa ebe mai fihọ ẹvẹrẹ na? Nọ me se uyo nọ Utu Ẹruorote Na o kẹ kpahe onọ nana o kẹ omẹ uduotahawọ gaga, a kere nọ: “Ma ruẹ ẹjiroro ọvuọvo nọ wha rẹ rọ da obọ ji hi evaọ efafa ẹvẹrẹ Tuvalu. O tẹ make rọnọ ahwo nọ a be ta ẹvẹrẹ Tuvalu a tulo ho nọ a tẹ rehọ ae wawọ ahwo evẹrẹ efa, o gwọlọ nọ ahwo Tuvalu a re yo usiuwoma na evaọ ẹvẹrẹ obọrai.”

Evaọ ukpe 2003, ukoko u te vi omai no uwou ogha Fiji nọ ma jẹ jọ ru iruo efafa kpohọ Patterson, New York nyai kuomagbe Utu Ẹruorote Iruo Efafa. O tẹ wọhọ nọ ubiedi u kie fihọ ewhri kẹ omai. Ma te kuomagbe utu nọ u re fiobọhọ kẹ iwou ogha to efafa evẹrẹ ekpokpọ họ, re ma ruẹsi wo ebe mai evaọ evẹrẹ efa. Ikpe ivẹ gbọ nọ i lele i rie, ma kpohọ erẹwho sa-sa nyai wuhrẹ efefafa iruo na.

Jọ me zihe kpohọ ẹme nọ mẹ ta evaọ emuhọ na. Evaọ ukpe 2000, Utu Ẹruorote Na o tẹ ruẹ nọ o gwọlọ nọ a re fiobọhọ kẹ efefafa nọ e rrọ akpọ-soso re a wo onaa ziezi evaọ iruo rai. Re oke nana u te ti, efefafa buobu e jariẹ nọ ukoko u ri ti wuhrẹ onaa efafa ziezi hi. Nọ ma ta kẹ Ogbẹgwae Ebe-Ikere na kpahe oware nọ ma rri nọ o rẹ sai fiobọhọ kẹ efefafa no, Utu Ẹruorote Na o tẹ whobọhọ omaa ewuhrẹ rọkẹ efefafa mai nọ e rrọ akpọ-soso. Omaa uwuhrẹ na u kugbe epanọ a sai ro wo otoriẹ Oyibo ziezi, onaa efafa, gbe epanọ efefafa a re ro kuomagbe ru iruo kugbe.

Iruo nana kpobi nọ Utu Ẹruorote u ru kpahe efafa na, iyẹrẹ vẹ i no rie ze no? Ojọ họ, efafa mai i woma vi epanọ o jọ no. U te no ere no, evẹrẹ nọ a be fa ebe mai fihọ enẹna i bu vi epanọ e jọ no. Nọ ma mu iruo imishọnare họ evaọ ẹkwotọ ọsosuọ nọ a dhe omai kpohọ evaọ ukpe 1979, evẹrẹ 82 ọvo a jẹ fa Uwou-Eroro Na fihọ. Yọ okenọ a te siobọno ọrọ Oyibo no, emerae buobu e rẹ ruemu no taure erọ evẹrẹ buobu i te ti kpozi. Rekọ enẹna, ma bi wo Uwou-Eroro Na evaọ evẹrẹ nọ i bu vi egba ivẹ gbe udhuvẹ (240). Yọ ibuobu rai avọ erọ Oyibo e be hai kpozi oke ovona. Enẹna ma bi wo koghẹrẹ koghẹrẹ emu ọrọ iwuhrẹ ẹme Ọghẹnẹ evaọ evẹrẹ nọ i bu vi egba ihrẹ (700). Ikpe buobu nọ i kpemu, ma roro nọ oware utiona o sae via ha.

Evaọ ukpe 2004, Utu Ẹruorote Na o tẹ jiroro ilogbo efa, koyehọ epanọ efafa Ebaibol e sae rọ vẹrẹ  vi epaọ anwẹdẹ kpobi. Nọ emerae jọ e nwane ruemu no, a te ru Ebaibol nọ a rẹ fa fihọ abọjọ iruo utu efefafa. Onana u te ru ei lọhọ nọ a be rọ fa Ebaibol New World Translation na fihọ evẹrẹ efa buobu. Evaọ ukpe 2014, yọ a printi Ebaibol na soso hayo abọjọ riẹ evaọ evẹrẹ nọ i bu te ẹgba ọvo gbe udhe gbe eree (128) no. Evẹrẹ South Pacific jọ e rrọ usu enana.

Uvẹ-ọghọ nọ me ro kpohọ okokohọ ubrotọ ọrọ ẹvẹrẹ Tuvalu evaọ ukpe 2011 yọ oware jọ nọ o rẹ thọrọ omẹ ẹro ho. Emerae jọ nọ e ruemu taure ma te ti kpohọ okokohọ na, ubi-oso u kiotọ họ evaọ Tuvalu. Ma je roro nọ a te va okokohọ na keme ame ọ jariẹ hẹ, oria kpobi o ya fia. Rekọ owọwọ ẹdẹ nọ ma ro te obei, okposo ọ tẹ rrọ, yọ a va okokohọ na ha. A kẹ omẹ uvẹ-ọghọ ulogbo nọ me ro siobọno Ebaibol Efafa Akpọ Ọkpokpọ Ọrọ Ikereakere Griki Ileleikristi Na evaọ ẹvẹrẹ Tuvalu. Ahwo Tuvalu họ utu ẹvẹrẹ nọ o mae kawo nọ a fa abọ Ikereakere Griki na kẹ evaọ oke yena. Okposo ọ wariẹ rrọ nọ okokohọ na ọ fa no. Fikiere, ohwo kpobi nọ ọ ziọ okokohọ na o wo ame oso gbe ọrọ ẹme Ọghẹnẹ.

O da omẹ gaga inọ Jenny aye oyoyou mẹ nọ ma gbẹ jọ orọo vrẹ ikpe 35 na o whu evaọ ukpe 2009 nọ ẹyao-ọta ọ lahiẹe ikpe ikpe no. Ọ sae rọ ẹro ruẹ obusino Ebaibol na ha. Nọ a tẹ kpare iẹe ze evaọ akpọ ọkpokpọ na, eva e te were iẹe gaga nọ o te yo kpahe obusino Ebaibol ẹvẹrẹ Tuvalu na.

Nọ Jenny o whu no, Jihova ọ tẹ rehọ aye ezi ọfa ghale omẹ, odẹ riẹ họ Loraini Sikivou. Loraini avọ Jenny a je ru iruo kugbe evaọ uwou ogha Fiji yọ Loraini ọ jọ omọvo efefafa ẹvẹrẹ Fiji oke yena. Enẹ mẹ rọ wariẹ wo aye nọ o thihi gba omẹ evaọ iruo egagọ Jihova nọ ma gbe wo isiuru kẹ evẹrẹ.

Me te roro kpemu, o rẹ kẹ omẹ uduotahawọ gaga nọ mẹ tẹ ruẹ oghẹrẹ nọ Jihova, Ọsẹ obọ odhiwu oyoyou mai na ọ be rọ rẹrote itu evẹrẹ sa-sa, te ekakao te ilogbo. (Ol. 49:1-3) Mẹ be hae ruẹ uyoyou riẹ evaọ ovao inievo sa-sa nọ eva e rẹ were nọ a te siobọno obe ukoko na evaọ ẹvẹrẹ rai, hayo nọ a tẹ be so ile ujiro kẹ Jihova evaọ ẹvẹrẹ nọ o bi duobọte ai udu. (Iruẹru 2:8, 11) Mẹ gbẹ be kareghẹhọ ẹme oniọvo-ọmọzae mai jọ nọ ọ kpako no evaọ obọ Tuvalu nọ a re se Saulo Teasio. Nọ ọ rehọ ẹvẹrẹ Tuvalu so ole Uvie na jọ evaọ orọ ọsosuọ, ọ ta nọ: “Iviena wha ta kẹ Utu Ẹruorote Na nọ, ile nana e jọ ẹvẹrẹ Tuvalu were vi ọrọ Oyibo.”

Anwọ Azie 2005 ze, me wo uvẹ-ọghọ nọ me rẹro riẹ hẹ, onọ mẹ rọ rrọ omọvo Utu Ẹruorote Iruẹru Isẹri Jihova. Dede nọ mẹ gbẹ rrọ iruo efafa ha, me bi yere Jihova nọ ọ rọ kẹ omẹ uvẹ nọ mẹ be rọ tha iruo efafa akpọ-soso na uke. O be kẹ evawere gaga nọ ma rọ riẹ inọ Jihova ọ be rọ emu iwuhrẹ ẹme riẹ ko idibo riẹ kpobi, makọ enọ e rrọ ikoliko sa-sa evaọ udevie Abade Pacific. Ẹhẹ, wọhọ epanọ ọso-ilezi na ọ ta, “Jọ akpọ ọ ghọghọ; keme ỌNOWO na o re suo; ru re etọ akotọ ethẹ kpobi a were eva!”—Ol. 97:1.