1, 2. (a) E aera ngkai ko kakoauaa bwa e tangiriia Iehova ana aomata? (b) A karikaki aomata ma kainnanoan tera?

E AERA ngkai ko kakoauaa bwa e tangiriia Iehova ana aomata? Imwain ae ko kaekaa te titiraki anne, iangoi katoto aikai: Inanon ririki aika bati, e kaungaaki te tari te aine ae Taylene irouia raona n te onimaki bwa e na aki tabeitera ao n aki kantaningaa ae rangi ni bati ibukina. E taku: “Ngke arona bwa e aki tangirai Iehova, e na aki teimatoa ana reirei ni kairiri.” E taku Brigitte, are kaikawaiia natina uoman n tii ngaia imwini maten buuna: “Bon te bwai ae rangi ni kangaanga kaikawaaia naati n ana waaki Tatan, riki iroun te karo ae tii temanna. Ma I kakoauaa ana tangira Iehova, ibukina bwa e a tia ni buokai ribuakon te rawawata ao te uruakinnano, ao e bon aki kariaia bwa N na rinanon ae riaon ae I kona n nanomwaaka iai.” (1Kor. 10:13) E kabokorakora Sandra ma aorakina ae akea katokana. N tain te bwabwaro, e nora tabeakinana irouni buun te tari temanna ae rangi ni kinaaki. E taku buun Sandra: “E ngae ngke ti aki kinaa neiei, ma a kimwareirei nanora n noran ana mwamwannano ae korakora nakoira. E oti korakoran tangirara iroun Iehova, ngkana a kaota naba tangirara ae uarereke tarira ao mwaanera n te onimaki.”

 ² A karikaki aomata ma kainnanoan te tangira ao te kan tangiraki. Ti kai mamaara ngkana a aki reke iroura baikai ibukin rikin rawawata ke baika aki kantaningaaki, te aoraki, kangaanga ibukin te mwane, ke aki nakoraoin ara mwakuri ni minita. Ngkana ti a moanna n namakinna bwa e a aki tangirira Iehova, ti riai n uringnga ae ti kakawaki irouna ao e tauraoi n taai nako n ‘taua ataira’ ao ni buokira. E aki kona ni mwanuokinira ngkana ti kakaonimaki nakoina.—Ita. 41:11; 49:15, BG.

3. Tera ae na buokira ni kakorakoraa onimakinan ana tangira Iehova ae teimatoa ibukira?

³ A kakoauaa naake a taekinaki mai moa, ae e mena irouia Iehova n taai ni kangaanga. Ti kona naba n onimakinna bwa e na buokira Iehova. (TaiAre. 118:6, 7) E boto te kaongora aei, i aoni kakoauaan ana tangira te Atua ae irekereke ma 1) ana karikibwai, (2) Ana Taeka ae kaira koreana, (3) te tataro, ao (4) te karea ni kaboomwi. E na bae n rikirake ara kakaitau ibukin ana tangira Iehova ae teimatoa, mani kananoan ara iango ni baika raraoi ake e karaoi.—Wareka Taian Areru 77:11, 12.

4. Tera ae kaotaki ni kananoan te iango n ana karikibwai Iehova?

⁴ Ti kona n nora ana tangira ae teimatoa Iehova ibukira, man ana karikibwai? Eng, ibukina bwa e oti raoi ana tangira te Atua n te moani karikibwai. (IRom 1:20) E karaoa te aonnaba ma bwaina nako bwa ti aonga ni kona ni maiu ao ni marurung. Ma, e tangirira bwa ti na karaoa ae bati riki nakon ae ti na tii maiu. Ti riai n amwarake bwa ti aonga n teimatoa ni maiu. E taraia raoi Iehova bwa e na kona te aonnaba aei ni karikii aroka aika bati mani kakaokoro, ake a na karikii amwarake aika kamarurung. Ni koauana, e karikira naba bwa ti na namakina kakukurein te amwarake ao n rauaki iai! (TeMin. 9:7) E rangi ni kani mamatakuakina te karikibwai te tari te aine ae Catherine, moarara riki n tain maiureirein aroka i nanon Eberi i Kanata. E taku: “E rangi ni kamimi aroni rikini bwaai ni kabane, n aron uee aika a karikaki bwa a na bwebwerake man te tano ao mannikiba aika a okira te tabo are a nako mai iai, n ikotaki naba ma te mannikiba ae bingingi ae te hummingbird, are e kakaaea kawaina nakon nneni kanaia maan ae mena i tinanikun winton au umwa ni kuuka. E bae n tangirira Iehova n arona n anganira baika bati bwa ti na kukurei iai.” E kimwareirei Tamara ae tatangira are i karawa n ana karikibwai, ao e tangirira bwa ti na kukurei naba iai.—Mwa. 14:16, 17.

5. E kangaa ni kaotaki ana tangira Iehova ni karikaia aomata?

⁵ E karikira Iehova ma te konabwai ni karaoi mwakuri aika uaana ao ni manena, ake ti na kukurei riki iai. (TeMin. 2:24) E tangiria bwa e na kaonaki te aonnaba irouia aomata, a na taua arona, ao a na taui aroia ika, mannikiba ao baika a maiu riki tabeua. (KBwaai 1:26-28) Ai akoira Iehova ngke e karikira ma aroaro aika ti na kakairi iai irouna!—IEbe. 5:1.

6. E aera ngkai ti riai n rangi ni kakaitau ibukin Ana Taeka te Atua?

⁶ E kaota te tangira ae bati te Atua, n anganakira ana Taeka ae kaira koreana. E oti bwa tera ae ti riai n ataia ibukina ao arona ma aomata. N te katoto, e taekinaki arona n te Baibara nakoia tibun Iteraera, ake a okioki n aki ongeaba nakoina. E koreaki n Taian Areru 78:38, (BG) ae kangai: “E bati n nanoanga, ao e kabara aia bure, ao e aki kamaunaia: Eng, e kabatia katannakoan unna, ao e aki kauta unna ni kabanea.”  E na buokiko iangoan te kibu anne bwa ko na kakaitau n aron Iehova n tangiriko ao n tabeakiniko. Kakoauaa ae ko rangi ni kakawaki iroun Iehova.—Wareka 1 Betero 5:6, 7.

7. E aera ngkai e riai n rangi ni kakawaki iroura te Baibara?

⁷ E riai n rangi ni kakawaki iroura te Baibara, kioina ngkai e kabongana te Atua n taetae iai nakoira. E kakawaki te maroro ae uaana ao ae kaotaki iai te tangira irouia kaaro ma natiia, bwa e na karekea te onimakinaki ao namakinan ae ko tangiraki. Tera ae ti kantaningaia mairoun Iehova? E ngae ngke ti tuai n noria ke n ongo bwanaana, ma e “taetae” nakoira rinanon ana Taeka ae kaira koreana, ao ti riai ni kakauongo iai. (Ita. 30:20, 21) E tangiria Iehova ni kairira, ngaira aika ti katabui maiura nakoina, ao e na kamanoira man te kangaanga. E tangirira naba bwa ti na kinaa ao n onimakinna.—Wareka Taian Areru 19:7-11; Taeka N Rabakau 1:33.

8, 9. Tera ae tangiria Iehova bwa ti na ataia? Kabwarabwaraa aei ma te katoto teuana n te Baibara.

⁸ E tangiria Iehova bwa ti na ataia ae e tangirira ao e tarariaoa aki kororaoira. E tarai baika raraoi iroura. (2Rong. 16:9) N te katoto, e karaoa anne nakon Uean Iuta are Ieotiabata. N te tai teuana, e kaota te aki wanawana Ieotiabata n ira Uean Iteraera ae Aaba n te buaka ni kaoka te kaawa are Ramotakireata mairouia I-Turia. E ngae ngke a taekinna burabeti ni kewe aika 400 bwa e na tokanikai Aaba ae te aomata ae buakaka, ma e a kaman taekina konaakin teuaei Mikaia ae ana burabeti ni koaua  Iehova. E mate Aaba n te buaka, ao e birinako Ieotiabata n rawea maiuna. N okina nako Ierutarem ao e a boaaki ngke e ira Aaba. E ngae n anne, e tuangaki Ieotiabata iroun Ieu are natin Anani ae te tia matairiki, ni kangai: “A bon reke bwaai aika raraoi iroum.”—2Rong. 18:4, 5, 18-22, 33, 34; 19:1-3, BG.

⁹ Ni moan ana tai n tautaeka Ieotiabata, e tua bwa a na rinanoni kaawan Iuta ni kabane naati n uea mwaane, tibun Rewi ao ibonga n reireinia ana aomata taekan ana Tua Iehova. E rangi n uaana te mwakuri aei, bwa a moanna ni maaka Iehova natannaomata ake i rarikia. (2Rong. 17:3-10) Eng, e karaoa te mwakuri ae aki wanawana Ieotiabata, ma e bon nori naba Iehova ana mwakuri aika raraoi. Ti kauringaki n rongorongon te Baibara aei, bwa e ngae ngke ti aki kororaoi ma e teimatoa n tangirira Iehova, ngkana ti kakukureia ma nanora ni koaua.

10, 11. (a) E aera bwa te tataro ana bwaintituaraoi ae kakawaki Iehova? (b) E na kangaa te Atua ni kaekai ara tataro? (Nora te taamnei ni moan te kaongora aei.)

¹⁰ E kakauongo raoi te tama ae tatangira irouia natina, ngkana a tangiria n taetae nakoina. E tangiria n atai tabeaiangaia ao raraomaia ibukina bwa e tabeakin nanoia. E kakauongo iroura Tamara are i karawa ae Iehova, ngkana ti kawaria rinanon te bwaintituaraoi ae kakawaki ae te tataro.

¹¹ Ti kona n tataro nakon Iehova, n te tai are ti tangiria. Akea tukara mairouna. Bon Raoraora ae tatauraoi ni kakauongo nakoira. E taku Taylene are taekinaki mai moa: “Ko kona n taekina te bwai teuana ke bwaai ni kabane nakoina.” Ngkana ti tataroakin nakon te Atua baike ti rangi n tabeaianga iai, e na kaekaira rinanon te kibu teuana man te Baibara, te kaongora n te maekatin ke ana taeka ni kaungaunga raora n te onimaki temanna. E ongo ara bubutii Iehova ao e ota iai, e ngae ngkana akea ae ota. Kaekaan ara tataro irouna, boni kaotan tamaroan ana tangira ae teimatoa ibukira.

12. E aera ngkai ti na iaiangoi tataro ake n te Baibara? Taekina te katoto.

¹² A bati reireiara man tataro aika n Ana Taeka te Atua. Ma n tabetai, ti kona ni kakabwaiaaki iai ngkana ti rinanoi aeka n tataro akanne n ara taromauri n utu. Ti na buokaki ni katamaroai riki ara tataro, man iaiangoan aia tataro nakon te Atua, ae nako mai nanoia ana toro Iehova rimoa. N te katoto, iangoa ana tataro Iona mai biroton te ika ae buburakaei. (Iona 1:17–2:10) Iaiangoa naba ana tataro Toromon nakon Iehova ae nako mai nanona, ngke e katabuaki te tembora. (1Uea 8:22-53) Kananoa am iango n te tataro ni katoto are e anga Iesu ibukini kakabwaiaakira. (Mat. 6:9-13) Ma moamoa riki, teimatoa ‘kaotii ami bubutii nakon te Atua.’ Ni karaoan anne, “te rau are mairoun te Atua ae riaon aia iango aomata, e na kawakin nanomi ma ami iango.” E na ririkirake ara kakaitau ibukin ana tangira Iehova ae teimatoa.—IBir. 4:6, 7.

13. Tera te kawai ae e uki nakoia aomata man te bwaintituaraoi ae tatangira ae te karea ni kaboomwi?

¹³ Ti anganaki te bwaintituaraoi ae rianako are ana karea ni kaboomwi Iesu, bwa “ti aonga ni karekea te maiu.” (1Ioa. 4:9) E korea Bauro taekan ana tangira te Atua ae akea n ai arona aei, ngke e kangai: “E mate Kristo n te tai ae namataki ibukia aomata aika aki karinea te Atua. E kangaanga reken ae e na anga maiuna temanna ibukin te aomata ae taua te eti, ma tao e kona riki temanna  ni kataua matena ibukin te aomata ae raoiroi. Ma e kaota oin ana tangira te Atua nakoira, bwa e ngae ngke taani bure ngaira ma e mate Kristo ibukira.” (IRom 5:6-8) Ni kaotan korakoran ana tangira te Atua aei, e a kauka te kawai ibukia aomata bwa a na karekea aia itoman ae kaan ma Iehova.

14, 15. Tera nanon te karea ni kaboomwi ibukia (a) Kristian aika kabiraki? (b) naake a kantaningaa te maiu i aon te aba?

¹⁴ Tii tabeman aika a namakina ana tangira Iehova ae teimatoa n te anga ae rangi n okoro. (Ioa. 1:12, 13; 3:5-7) Kioina ngkai a tia ni kabiraki n te taamnei ae raoiroi, a a riki bwa “natin te Atua.” (IRom 8:15, 16) E kabwarabwaraia Kristian aika kabiraki Bauro, bwa ‘a kautaki ao a katekatekaaki ma Kristo Iesu i karawa kioina ngkai taan rimwina ngaiia.’ (IEbe. 2:6) A karekea te maiu n taamnei aei i karawa, ibukina bwa a tia ni ‘kanikinaeaki n te taamnei ae raoiroi are beritanaki, ae te bwai ni kakoaua ibukin reken tibwangaia,’ ae ‘te kantaninga are kamenaaki imwaia i karawa.’—IEbe. 1:13, 14; IKoro. 1:5.

¹⁵ Ibukia te koraki aika uanao ake a kaotiota onimakinan te karea ni kaboomwi, a a kona n riki bwa raoraon Iehova ngkai a tia n natinaki iroun te Atua ao ni kantaningaa te maiu n aki toki n te Bwaretaiti are beritanaki i aon te aba. Ni koauana, e kaota ana tangira Iehova ibukia te botannaomata, rinanon te karea ni kaboomwi. (Ioa. 3:16) Ngkana ti kantaningaa te maiu n aki toki i aon te aba ao n teimatoa ni kakaonimaki ni beku iroun Iehova, ti aki nanououa bwa e na kakukureia maiura n te aonnaba ae boou. Ai tonura iangoan te karea ni kaboomwi iroura, bwa te bwai ni kakoaua ae moan te raoiroi ibukin ana tangira Iehova ae teimatoa ibukira!

16. Tera ae na noraki iroura, imwini kananoan ara iango n ana mwakuri nako n tangira Iehova?

¹⁶ Ti aki kona ni wareki mwaitin ana mwakuri Iehova aika kaota ana tangira ae teimatoa ibukira. E anenea aei te tia areru are Tawita: “Ai kakawaki ra i rou nanom nako, te Atua! Ai ewa ra maitiia! Ngkana tao I wareki, ao a maiti riki nakon tanon aonaba.” (TaiAre. 139:17, 18, BG) Ti riai ni kananoi iango aikai iroura bwa e aonga n rikirake riki iai tangiran Iehova, ibukini kabooani mwin tabeakinara irouna. Ibukin anne, ti riai n anganna ara kabanea n tamaroa.

17, 18. Baikara aanga tabeua ake ti kona ni kaota iai tangiran te Atua?

¹⁷ Ti kaota ara tangira nakon Iehova n aanga aika bati. N te katoto, ti kaota tangiran te Atua ao aomata nako, man ingaingara ni boutokaa te mwakuri n uarongorongo ibukin te Tautaeka n Uea. (Mat. 24:14; 28:19, 20) Ti kaotia bwa ti tangira raoi Iehova, n nanomwaakara ni kataakin ara onimaki ngkai taani kakaonimaki ma te nano ae eti ngaira. (Wareka Taian Areru 84:11; Iakobo 1:2-5.) Ngkana a korakora kataakira, ti aki nanououa bwa e atai rawawatara te Atua ao e na buokira, ngkai ti boni kakawaki irouna.—TaiAre. 56:8.

¹⁸ E kairira tangiran Iehova bwa ti na kananoa ara iango n ana karikibwai, ao ana mwakuri aika kamimi riki tabeua. Ti kaotia bwa ti tangira te Atua ao e rangi ni kakawaki ana Taeka iroura, n arora n reiakina raoi te Baibara. E kairira tangiran Iehova bwa ti na kaanira riki ma ngaia rinanon te tataro. E rikirake ni korakora tangiran Iehova iroura, ngkana ti iaiangoa te karea ni kaboomwi are e katauraoia ibukin ara bure. (1 Ioa. 2:1, 2) Aikai bukina tabeua ake ti kaota iai tangiran Iehova, ni kaineti ma ana tangira ae teimatoa ibukira.