1, 2. (a) Ni kyahi ekyabiri leka iwakakasya ngoku Yehova anzire abandu biwe? (b) Abandu bahangikirwe ibali mwa kiyithawaki?

NI KYAHI ekikaleka iwakakasya wuthi Yehova anzire abandu biwe? Wuthe wasubirya, thatsuka erilengekania okwa by’erileberyako bino: Ahabw’emyaka mingyi, balikyethu babya ibanemuhabulha mwali wethu Taylene omwa lhwanzo bathi ambi isyayihira omwa maghaniryo w’eby’athe angathoka. Akabugha athi: “Yehova kw’athabya anyanzire, sy’angalekire balikyethu bakahathikana erinyihabulha.” Brigitte, oyuwasighalha n’abaana babiri mwira wiwe abiriholha, akabugha athi: “Omwa kihugho kya Sitani kino, erikulya abaana, si mwatsi mwolho, kwilhabirirya wamabya iwuli iwuwene. Aliwe nabiriminya ngoku Yehova anyanzire kundi abirinyiwathikya omwa mughulhu hali ebikanyiliraya n’omwa malighe, kandi mwathaligha ngabana ebitsibu ebya ngathe nanga thoka erighumira.” (1 Kor. 10:13) Sandra awithe obulhwere obuthe lhama. Okwa lhuhindano, mwali wethu mughuma mwamukangania kw’amutsomene. Mwira wa Sandra akabugha athi, “Nomwakine indi sithwabya thumwasi ndeke, eritsomana linene ery’athukanganaya mulyathulethera obutseme omwa muthima. Nibya n’ehindu hike-hike ehya balikyethu bakathukolera omo lhwanzo hikanyikanganaya ngoku Yehova athwanzire kutsibu.”

 ² Abandu mubahangikwa ibane mw’ekiyithawa ky’eryanza kutse eryanzwa. Ekiyithawa eki kyamathendi berereribwa omwa mughulhu thukawa kw’ebitsibu, erilhwalha, obunakwa, kutse erithendi lhangira ebikalhua omw’ithulira lyethu, ikyangana leka ithwahwa amani. Kandi thwamayowa Yehova nga syakithwanzire, kyuwene eryibuka ngoku Yehova akathulhangira mwa b’omughaso kandi ngoku anathuwathirire okwa byalha byethu by’amali erithuwathikya. Syendisyathw’ibirirwa n’ahake thwamathendi leghulha.—Isa. 41:13; 49:15.

3. Ni kyahi ekyanga thuwathikya eryongera erighumya ngoku Yehova athuwithire olhwanzo lhunene?

³ Abandu abathwamakaniako aba babya ibanakyasi ndeke-ndeke ngoku Nyamuhanga abya iniane nabu omwa bitsibu byabu. Nethu kuthya thutholere ithwaminya ngoku ane okwa lhuhandi lhwethu. (Esy. 118:6, 7) Kutsibu-tsibu omwatsi ono akendi kania okwa bindu bbini ebikakanganaya ngoku Nyamuhanga athuwithire olhwanzo; (1) eby’abirihangika, (2) Ekinywe kiwe, (3) olhusunzo lhw’omusabe, ne (4) embanulho. Erighanirya okwa bindu bibuya ebya Yehova abirikolha ikyangana thuwathikya erisima olhwanzo lhwiwe lhunene.—Soma Esyonyimbo 77:11, 12.

4. Erighanirya okwa bya Yehova abirihangika kikaleka ithwalhangiraki? (Lebaya ekisasani ekiri okw’itsuka)

⁴ Mbwino ithwangana lhangira olhwanzo lhunene olhwa Yehova athuwithire omwa by’abirihangika? Ee, kundi olhwanzo lhw’olhwanaleka Nyamuhanga iniahangika. (Abar. 1:20) Mwahangika ekihugho omwa mibere eyanga leka ikyathokekana er’ikalhwamu. Aliwe mwathasubulira aho, mwathuhangikira n’eby’erirya ebyanga leka ithwabyaho. Yehova mwalhangira athi ekihugho kikahethaya obuli musindo wosi w’ebyalya. Kandi mwalhangira athi erirya kikabya kindu ekikatsemesaya! (Omu. 9:7) Mwali wethu Catherine akatsema akasamalira ebya Yehova abirihangika, kwilhabirirya omwa mughulhu ekihuhiriro kikahwa omwa Kanada ewabu. Akabugha athi: “Kikatsemesaya wukalhangira obuli kindu kikathasyasuba-subana—ebimole ebikakununuka omwa kithaka n’ebinyonyi bikasubulha erilhwa eya byahumira, imwamuli n’enzwebe eyikabera erisyalira eyihya w’ekitsumbyo kyaghe okw’idirisa. Yehova erithuha ebyosi ebi, athwanzire.” Thatha wethu w’olhwanzo w’elhubulha akatsemera eby’ahangika, kandi anzire nethu ithwatsemerabyo.—Emibiri 14:16, 17.

5. Olhwanzo lhwa Yehova lhukalhangirika lhuthi omwa mibere eyo bandu bahangikiremu?

⁵ Yehova mwathuhira mw’amaaka w’eribya ithwangana kolha emibiiri eyanga leka ithwatsemera engebe. (Omu. 2:24) Mwaha omundu y’olhusunzo lhw’eryusulya ekihugho, erighondyakyo, n’erithabalha okwa mahere, ebinyonyi, n’oko buli kindu kyosi ekiriho. (Enz. 1:26-28) Yehova k’athwanzire, erihika okw’ithuhiramu n’emibere eyanga leka ithwathoka erimugherererya!—Efe. 5:1.

6. Busana naki thutholere ithwatsemera kutsibu ekinywa kya Nyamuhanga?

⁶ Nyamuhanga abirikangania kw’athwanzire kutsibu omw’ithuha Ekinywe kiwe. Kiri mw’ebyosi ebya thutholere ithwamuminyako n’emibere akakolanganiramu n’abandu. Ng’eky’erileberyako, Amasako akathubwira ngoku akolangana n’Abaisraeli, nibya ababya isibali mwowa. Esyonyimbo 78:38 hakabugha hathi: “Mwaghanyira abandu biwe. Neryo mwabuyira ebibi byabu, mwathaheryabo.  Ngendo nyingyi mwakakirya erihithana liwe, kandi mwakakirya erikarama liwe.” Erighanirya okw’isako eryo lyangana kuwathikya iwe ahabwawu erilhangira ngoku Yehova akwanzire kandi kw’akutsomene. Wutholere iwaminya ngoku Yehova akakulhangira mwa w’omughaso.—Soma 1 Petero 5:6, 7.

7. Busana naki thutholere ithwatsemera kutsibu e Biblia?

⁷ Thutholere ithwatsemera kutsibu e Biblia kundi ya nzira ngulhu eya Nyamuhanga akakolesaya erikania nethu. Ng’eky’erileberyako, ababuthi n’abaana erithoka eryanzana n’eriyiketherana, batholere ibabya ibanemukanirania. Kandi ibbwa Yehova? Nomwakine indi sithuli thwathamulhangira kutse eriowa omulenge wiwe, “akakanaya” nethu erilhabira omwa Kinywe kiwe, neryo thutholere ithwahulikirira. (Isa. 30:20, 21) Ithwe ababiriyihayo, Yehova anzire iniathusondolha n’erithutheya okwa bubi. Anzire ithwamuminya n’erimuyikethera.—Soma Esyonyimbo 19:7-11; Emisyo 1:33.

8, 9. Ni kyahi ekya Yehova anzire ithwaminya? Iha eky’erileberyako.

⁸ Yehova anzire ithwaminya ngoku athwanzire kandi ngoku akathusondaya mw’ebibuya. (2 Emy. 16:9) Ng’eky’erileberyako mwanakolha ekyo okwa Mwami Yosafati owe Yuda. Kiro kighuma, Yosafati mwathwamu nabi amaligha erithwalha Omwami Ahabu owe Israeli eriyalhwira ekitsweka kye Ramoti-gileadi erikilhusya okwa Banya Suria. Nomwakine indi abaminyereri b’amabehi 400 mubakakasya Omwami mubi Ahabu bathi akendisingura, omuminyereri wa  Yehova ye Mikaya, iyo mwalhaghulha ngoku Ahabu akendi singwa. Ahabu mwaholera omwa lhuhi olho, na Yosofati mwabalira okwa kasali. Abere asuba e Yerusalemu mwatsumangwa busana n’eriyiyunga oku Ahabu. Nomubyanabya bithya, Yehu, mughalha wa Hanani omuhani, mwabwira Yosofati athi: “Omwiwe hanabanikire ebibuya.”—2 Emy. 18:4, 5, 18-22, 33, 34; 19:1-3.

⁹ Yosofati abere akanatsuka erithabalha, mwalhaghira abanya-mwami, Abalawi, n’abahereri athi balhabe omwa miyi yosi ye Yuda erikangirirya abandu b’Emighambo ya Yehova. Erikangirirya eri mulyabya linene kutsibu, kyamaleka n’ebihanda ebibathimbireko ibyatsuka eryubaha Yehova. (2 Emy. 17:3-10) Yosofati mwakolha ekindu ky’obukiru, aliriryo Yehova mwath’ibirirwa ebibuya eby’abya iniabirikolha. Omwatsi oyu akathukanganaya ngoku nomuthuthe bandu abathahikene, Yehova akendi thukangania olhwanzo lhwiwe lhunene thwamalholha embere erimutsemesya n’omuthima wethu wosi.

10, 11. (a) Busana naki ithwalhangira omusabe ng’olhusunzo lhw’embaghane erilhua oku Yehova? (b) Nyamuhanga angana subirya athi emisabe yethu?

¹⁰ Thatha oyuwanzire abaana biwe akabahulikirira bakanza erikania nayu. Akanza iniaminya ebikabalyambaya kundi ebiri omwa mithima yabu bikamuhambako. Yehova Thatha wethu w’elhubulha akathuhulikirira thukamusaba.

¹¹ Thwangana saba Yehova okwa ndambi yosi-yosi. Syali athahiraho lhukaku lhwosi-lhwosi. Ni munywani wethu oyukabya inianayitheghekire erithuhulikirira. Taylene, oyukanibweko omwa nungu y’erimbere, akabugha athi: “Wukamubwira ekyosi-kyosi.” Thwamabwira Nyamuhanga y’eriyowa lyethu, angana thusubirya erilhabira omwa Biblia, ng’omwa mwatsi owali omwa gazeti, kutse ekinywe ekikahimba erilhua okwa Mukristayo mulikyethu. Yehova akahulikirira eririra lyethu kandi n’omughulhu sihali oyuwasi eriyowa lyethu, iyo akabya inianasi. Akabya akasubirya emisabe yethu, kikathukanganaya ngoku athuwithire lhwanzo lhunene.

12. Busana naki thutholere ithwaghanirya okwa misabe ey’abandi eyiri omwa Biblia? Iha eky’erileberyako.

¹² Thwangan’ighira bingyi okwa misabe y’abandi eyiri omwa Biblia. Busana n’ekyo, kyanganabya kya mughaso erighanirya okwa misabe ng’eyi omw’iramya lyethu ly’eka. Erighanirya okwa mibere abaghombe ba Yehova aba kera babya baka bwiriramu Nyamuhanga eriyowa lyabu, nethu kyangana thuwathikya erithasyuwania emisabe yethu. Ng’eky’erileberyako, thalengekania okwa musabe wa Yona, ow’eriyikubya bwomo, iniane omonda y’esamaki nene. (Yona 1:17–2:10) Soma okwa musabe wa Solomona akasaba Yehova okwa mughulhu ehekalu yahebawayo. (1 Bam. 8:22-53) Ghanirya okwa musabe w’erileberyako owa Yesu akangiriraya. (Mt. 6:9-13) Aliwe ekikulhu, mughulhu wosi ‘bwira Nyamuhanga obwagha bwawu.’ Neryo ‘obuholho bwa Nyamuhanga obulhabire amenge wosi bwasyatheya omuthima wawu.’ Eki ikikendi leka ithw’ongera erisima olhwanzo lhunene lhwa Yehova.—Fil. 4:6, 7.

13. Embanulho erihebwa kikaleka abandu ibabya ibawithe kaghisaki?

¹³ Embanulho y’ekihongwa kya Yesu yahebawa nuku thwanga thoka “eribana engebe.” (1 Yn. 4:9) Akakania oko lhwanzo lhunene lhwa Nyamuhanga olhwa kanganibawa olhu, omukwenda Paulo mwahandika athi: “Kristo mwaholera abakolha-nabi oko mughulhu Nyamuhanga ayisogha. Likalire busana  n’omundu eriholera omundu oyuthunganene, nikwa, kwamuhwa omundu angana handa omuthima eriholera omundu mubuya. Nikwa Nyamuhanga akakangaya olhwanzo lhwiwe busana nethu, kusangwa omughulhu thwabya thukine bakolha-nabi, Kristo mwathuholera.” (Abar. 5:6-8) Olhwanzo lhunene olhwa Nyamuhanga akanganaya olhu mulhwaleka abandu ibabya ibangana thoka eribya bughuma na Yehova.

14, 15. Embanulho yikaghasira yithi (a) abahakabibwa? (b) abawithe amaha w’eribya okwa kihugho?

¹⁴ Hane abake abakabana olhwanzo lhunene lhwa Yehova omwa nzira y’embaghane. (Yoane 1:12, 13; 3:5-7) Busana n’erihakabibwa omwa mulimu abuyirire, babiribya “baghalha ba Nyamuhanga.” (Abar. 8:15, 16) Paulo mwakania okwa bahakabibwa ng’abandu “ababirisumbwa n’erikalibwa haghuma na Kristo Yesu omo myanya y’elhubulha.” (Efe. 2:6) Bawithe olhusunzo olhu kundi “Nyamuhanga mwabahira kw’ekiminyikalho kiwe, iniakabaha omulimu abuyirire ogho alhagha. Omulimu abuyirire ni mutsimbo w’ebyo Nyamuhanga abiribalhagha,” nibugha ambu, “amaha awabikire busana nabu elhubulha.”—Efe. 1:13, 14; Kol. 1:5.

¹⁵ N’okwa banene abak’ikiriraya omwa mbanulho, hane akaghisa k’eribya banywani ba Yehova ibane n’amaha w’erisyabya baana ba biwe n’erisyikalha kera na kera okwa kihugho paradiso, ekyabirilhaghanisibwa. Neryo erilhabira omwa mbanulho, Yehova mwakangania kw’anzire abandu. (Yn. 3:16) Thwamabya ithuli omwa bakendi syabya okwa kihugho kwa kera na kera kandi thukalholha embere erikolera Yehova buthaleghulha, isithwathika-thika ngoku akendi syathuha engebe eyuwene omwa kihugho kihya-kihya. Kwesi kihikire erilhangira embanulho ng’enzira ngulhu eya Nyamuhanga abirithukanganirya mw’olhwanzo lhwiwe lhunene!

16. Thukaghasirawa thuthi thwamaghanirya okwa syonzira nyingyi esya Yehova abirithukanganirya mw’olhwanzo lhwiwe?

¹⁶ Sithwanga thoka eribara ebyosi ebya Yehova akathukanganiraya mw’olhwanzo lhwiwe lhunene. Dawudi mwimba athi: “Iwe Nyamuhanga, linyikalireko eriminya amalengekania wawu; ka ni mangyi! Namaghanzagho, ni manene kwilhaba omuseghe.” (Esy. 139:17, 18) Thutholere ithwalighira amenge wa Nyamuhanga aya erithuhira mw’engumbu y’erimwanza kutsibu busana n’olhwanzo olhw’abirithukangania. Neryo kwesi thutholere ithwamukolera n’omuthima wethu wosi.

17, 18. Ni nzira nga syahi esya thwanga kanganiryamu ngoku thwanzire Nyamuhanga?

¹⁷ Hali nzira nyingyi esyathwanga kanganiryamu ngoku thwanzira Yehova. Ng’eky’erileberyako, thukakanganaya ngoku thwanzire Yehova omw’isangira n’omuhwa omwa mubiiri w’erithulhughania Obwami. (Mt. 24:14; 28:19, 20) Thukakanganaya kwenene ngoku thwanzire Yehova omw’iyiyinia thukalengwako ng’abathaleghulha. (Soma Esyonyimbo 84:11; Yakobo 1:2-5.) Ebitsibu byethu byamahingurana, thutholere ithwaminya ngoku Nyamuhanga akabya inianasi eriaghalhwa erya thulimu, kundi akathulhangira mwa b’obughuli.—Esy. 56:8.

¹⁸ Eryanza Yehova kikaleka ithwaghanirya okwa by’abirihangika n’ebindi eby’abirikolha. Thukakanganaya ngoku thwanzire Nyamuhanga kandi ngoku thukatsemera Ekinywe kiwe omw’igha e Biblia ya ndeke. Eryanza Nyamuhanga likaleka ithwongera eriyithunda hakuhi nayu omw’isaba. Erighanirya okwa kihongwa ky’embanulho ekyahebawa busana n’ebibi byethu likaleka ithw’ongera eryanza Nyamuhanga. (1 Yn. 2:1, 2) Ebi ni bike buyira okwa byanga leka ithwanza Yehova busana n’olhwanzo lhwiwe lhunene olhw’athuwithire.