1, 2. (a) Mwomwo ika mwafwelela ngwenu Yehova azanga vatu jenyi? (b) Vatu vosena vavatenga namuchima wakufwila vyuma muka?

MWOMWO ika munetavila ngwenu Yehova azanga vatu jenyi? Shimbu kanda mukumbulule chihula kana, achishinganyekenu havyakutalilaho evi: Hamyaka yayivulu, vandumbwetu vanakafwenga ndumbwetu walijina lyaTaylene apezalise kanawa vyuma nakuzeneka kufwelela ngwenyi mwalinganga vyuma mukulonga lwola lwosena. Ngocho ambile ngwenyi: “Kachi nge Yehova kanguzangako, kachi katwalileho lika kungukafwako.” Ndumbwetu Brigitte, tuliwe uze alelele vana venyi vavali kufuma hakufwa chalunga lyenyi, ambile ngwenyi: “Kulela vana mukaye kano ali nakuyula Satana kachapwa chachashiko, chikumanyi nge chisemi ali uka wenyi. Chipwe ngocho, ngwafwelela ngwami Yehova anguzanga mwomwo eji kungukafwanga halwola nguli nakumona ukalu, kaha keshi kungwechelela nguyande kuhambakana hakumina ngolo jamiko.” (Koli. 1, 10:13) Sandra uze ali nakuyanda namusongo uze kavokako, vamukafwile kuli pwevo lyandumbwetu umwe uze vatachikiza chikuma muliuka omu vapwile hakukunguluka changalila. Lunga lyaSandra ambile ngwenyi: “Numba tuhu ou ndumbwetu wapwevo katwamutachikiza kanawako, oloze muchima wenyi namazu enyi atukolezezele chikuma. Mazu amwaza veji kuhanjikanga vandumbwetu eji kungulingisanga ngutachikize nge Yehova atuzanga chikuma.”

 ² Vatu vavatengele namuchima wakufwila kuvazanga nakuzanga vakwavo. Ngocho veji kuhombanga nge vyuma wafwila ou muchima kavyateselemoko mwomwo yavyuma vyakwiza mukukasumuna, chipwe mwomwo yavyuma vyeka vyakufwana nge kuhona kulikangula kumujimba, nakuhona jimbongo, nakuhona kufukila mumulimo wamuwande. Kachi nge tunaputuka kushinganyeka ngwetu Yehova katuzangako, kaha twatela kwanuka ngwetu atumona kupwa tuvavalemu chikuma, ngocho ‘mwatukwachilila kulivoko lyetu lyachilyo’ nakutukafwa. Nge natupwa lika vakushishika kuli ikiye, kaha keshi kukatuvulyamako.—Isa. 41:13; 49:15.

3. Vyuma muka navitukafwa tufwelele ngwetu Yehova atuzanga chikuma?

³ Ava vatu tunashimutwila lyehi vatachikijile ngwavo Kalunga apwile navakiko mulwola vamwene ukalu. Nayetu nawa tunahase kufwelela ngwetu Kalunga ali nayetu. (Samu 118:6, 7) Muchihande chino natushimutwila hazangi yaKalunga kutalisa (1) kuvyuma atenga, (2) kuMazu enyi vahwima, (3) kukulomba, (4) nakundando yakusokola. Nge natushinganyekanga havyuma vyamwaza nalingi Yehova, kaha natumusakwilila chikuma hazangi yenyi.—Tangenu Samu 77:11, 12.

4. Kushinganyeka havyuma atenga Yehova cheji kusololanga vyuma muka? (Talenu muvwimbimbi wakulivanga.)

⁴ Nge natutala havyuma atenga Yehova, kaha natumona omu atuzanga. Chikupu vene, vyuma atenga vyasolola zangi yenyi. (Loma 1:20) Atengele mavu mujila yize nayilingisa vatu natunyama navyuma vyeka vihase kuyoya kanawa. Kaha nawa asaka tulinge vyuma vyavivulu keshi kuyoya kahako. Twatela kulya numba tutwaleho lika kuyoya. Yehova atengele mavu mujila yamwaza mangana hasoke vyakulya vyakulisezaseza. Kaha nawa atutengele mujila yamwaza mangana tulivwise kuyema vyakulya kanevi. (Kwambu. 9:7) Ndumbwetu walijina lyaCatherine eji kulivwisanga kuwaha kutala havyuma atenga Kalunga, chikumanyi mukakweji wakufwana nge April mulifuchi lyaCanada. Ambile ngwenyi: “Chamuchano vene, tweji kulikomokelanga chikuma hakumona omu jitemo jeji kutemwinanga, nomu tujila veji kukinduluka kufuma kuze valukilile, kuhakilako vene nakakajila kakandende kaze keji kwizanga hakamwihi nanjanena yakuchisambwe chami. Yehova atuzanga hakutuhana vyuma vize vyeji kutwivwisanga kuwaha.” Setu wamwilu eji kwivwilanga kuwaha vyuma atenga, kaha asaka nayetu tulivwise kuwaha vyuma kana.—Vili. 14:16, 17.

5. Jila vatengelamo vatu yasolola ngachilihi zangi yaYehova?

⁵ Yehova atutenga nauhashi wakulinga vyuma vyamwaza nakuzata milimo yize nayitusuulwisa mangana tulivwise kuwaha kuyoya. (Kwambu. 2:24) Kalunga ajinyine ngwenyi vatu vakavule nakuzalisa hano hamavu nakupwa nawata havyuma atenga vyakufwana nge vaishi, natujila, navyuma vyeka vikwavo. (Kupu. 1:26-28) Chikupu vene Yehova atuzanga, kaha atuhana vilinga vize vyeji kutulingisanga tumulondezeze.—Efwe. 5:1.

6. Mwomwo ika twatela kumwena Mazu aKalunga kupwa amalemu chikuma?

⁶ Kalunga atuzanga chikuma hakutuhana Mazu enyi vahwima. Mazu kana asolola vyuma twatela kutachikiza hali ikiye nomu eji kuzatanga navatu. Chakutalilaho, Visoneka vyatulweza omu Kalunga azachilile navaIsalele vaze valikangilenga mapapa kakavulu kuli ikiye. Mukanda waSamu 78:38 wamba ngwawo: “Avevwililenga keke, avakonekelelenga kuhenga chavo, kaha kavanongeseleko. Apewilenga matoto enyi mukutela kukwata utenu chikuma.” Nge namushinganyeka hamazu ali muvesi kaneyi, kaha  namumona omu Yehova amizanga nakumizakama. Ngocho mwatela kwijiva ngwenu Yehova amimona kupwa muvavalemu.—Tangenu WaPetulu 1, 5:6, 7.

7. Mwomwo ika twatela kumwena Mbimbiliya kupwa yayilemu?

⁷ Twatela kumona Mbimbiliya kupwa yayilemu mwomwo Kalunga eji kuhanjikanga nayetu chikumanyi kuhichila muli ikiko. Nge visemi navapwa vaka-kutetela nakushimutwilanga kanawa navana vavo, kaha vosena mutanga navalizakama nakulizanga. Omu mukiko eji kulinganga naYehova. Numba tuhu kanda tuchimumonengaho lyehi chipwe kwivwa lizu lyenyi, oloze eji kuhanjikanga nayetu kuhichila muMazu enyi vahwima, ngocho twatela kumwivwilila. (Isa. 30:20, 21) Yehova asaka kututwaminyina hakupwa tuvangamba jenyi nakutukinga kuvyuma vyavipi. Kaha nawa asaka tumutachikize nakumufwelela.—Tangenu Samu 19:7-11; Vishimo 1:33.

8, 9. Vyuma muka ali nakusaka Yehova tutachikize? Lumbununenu kuzachisa chakutalilaho chamuMbimbiliya.

⁸ Yehova asaka tumutachikize nakwijiva nge atuzanga, kaha nawa keshi kutala kaha hatutenga twetuko. Eji kufwilanga kumona vyuma vyamwaza muli etu. (Miji. 2, 16:9) Chakutalilaho, alingile ngocho kuli Mwangana wamuYuta Yehoshafwate. Lwola lumwe, Yehoshafwate apihishile hakwitavila kuya hamwe kujita naMwangana wavaIsalele Ahave mangana vakatambule nganda yaLamote-ngileyate kuli vaSulya. Numba tuhu vapolofweto vamakuli 400 vafwelelesele Ahave ngwavo mwaya nakufukila mujita kana, oloze kapolofweto wamuchano waYehova  Mikaya, amulwezele ngwenyi navakamufungulula. Ahave afwile mujita, oloze Yehoshafwate ayowele mwono wenyi. Omu Yehoshafwate akindulukile kuYelusalema, vamuhanjikilile hakukundwiza Ahave mujita. Chipwe ngocho, Yehu mwanaHananyi muka-kumona vyakumwenesa, alwezele Yehoshafwate ngwenyi: “Kuli vyuma vimwe vyamwaza vize unalingi.”—Miji. 2, 18:4, 5, 18-22, 33, 34; 19:1-3.

⁹ Omu aputukile kuyula, Yehoshafwate alwezele vilolo, navaLevi, navapilishitu vahite mujinganda jamuYuta josena vanangule vatu jenyi Jishimbi jaYehova. Mulimo kanou wapwile waulemu mwomwo walingishile vatu vamumafuchi aze ajingilikile Yuta vaputuke kwivwa Yehova woma. (Miji. 2, 17:3-10) Chikupu vene, Yehoshafwate apihishile chikuma hakukundwiza Ahave, oloze Yehova amwene vyuma vyamwaza alingile hakavanga. Mujimbu kanou wamuMbimbiliya unatunangula nge chamokomoko tuhu nakuhona kukupuka mwosena, Yehova mwatuzanganga lika nge natufwila namichima yetu yosena kumwivwisa kuwaha.

10, 11. (a) Mwomwo ika twatela kumwena kulomba kupwa hichuma chachilemu atuhana Yehova? (b) Kalunga nahase ngachilihi kukumbulula kulomba chetu?

¹⁰ Chisemi wazangi eji kwivwililanga kuli vana venyi nge vali nakuhanjika naikiye. Eji kusakanga kutachikiza vyuma vali nakushinganyeka navize vanalizakamina mwomwo avazakama. Shikaho, naSetu wamwilu Yehova eji kutwivwililanga nge natuhanjika kuli ikiye kuhichila mukulomba.

¹¹ Tunahase kulomba kuli Yehova hakala lwola. Katuhana jishimbi jalwola luze twatela kulomba kuli ikiyeko, mwomwo apwa Sepa lyetu uze asaka lwola lwosena kwivwilila kukulomba chetu. Taylene uze twavulukanga hakavanga ambile ngwenyi: “Unahase kuhanjika kala vyuma vyosenovyo unasake kuli Kalunga.” Nge natulweza Kalunga vyuma tuli nakushinganyeka mumichima yetu, kaha nahase kutukumbulula kuhichila muMbimbiliya, chipwe muvihande tweji kutanganga mumangazini, chipwe kuhichila mumazu navatukolezeza vandumbwetu. Yehova eji kwivwanga vyuma tweji kumulombanga nakutwivwishisa kanawa kuhambakana kala mutu. Omu Kalunga eji kukumbululanga kulomba chetu cheji kumusololanga nge atuzanga chikuma.

12. Mwomwo ika twatela kushinganyekelanga hakulomba vasoneka muMbimbiliya? Hanenu chakutalilaho.

¹² Tunahase kulinangula vyuma vyavivulu kukulomba chize vasoneka muMazu aKalunga. Lwola lumwe munahase kukekesa kulomba kanechi nge muli nakulemesa Kalunga mwatanga, kaha namunganyala. Kushinganyekanga havyuma valombelenga vangamba jaYehova vakushikulu, nachitukafwa kukupwisa kulomba chetu. Chakutalilaho, achishinganyekenu hakulomba chaushona alombele Yona omu apwile mujimo lyaishi wamunene. (Yona 1:17–2:10) Achishinganyekenu havyuma alombele Solomone kuli Yehova hakukunjika tembele. (Vamya. 1, 8:22-53) Achishinganyekenu nawa hakulomba chakutalilaho chize alombele Yesu. (Mateu 6:9-13) Shimbu yosena “mulwezenunga Kalunga vyuma munakusaka.” Ngocho “kuunda chaKalunga chize chahambakana kunangakana chosena nachikinga michima yenu navishinganyeka vyenu.” Kaha natusakwilila chikuma Yehova hazangi yenyi.—Fwili. 4:6, 7.

13. Uno wana wandando yakusokola wakafwa ngachilihi vatu vosena?

¹³ Wana waYesu wandando yakusokola vatuhanyinewo mangana “tukahase kupwa nakuyoya.” (Yowa. 1, 4:9) Kaposetolo Paulu ahanjikile kutalisa kuzangi asolwele Kalunga  hakutuhana wana kana ngwenyi: “Kulishitu afwilile vaka-kuzamukila Kalunga halwola luze vatongola. Mwomwo chapwa chachikalu kufwila mutu wakwoloka, oloze mutu nahase pamo kuhamuka nakufwila mutu wamwaza. Oloze Kalunga asolola lyehi zangi yenyi kuli etu, mwomwo shimbu twapwilenga tuvaka-shili, Kulishitu atufwilile.” (Loma 5:6-8) Wana kanou ahana Kalunga hazangi yenyi wakafwa vatu vosena vahase kupwa nauselewa kumeso aYehova.

14, 15. Uno ndando yakusokola yalumbununa ika (a) kuli vaka-Kulishitu vawavisa? (b) kuli vaka-Kulishitu vaze vakwechi lutalililo lwakukayoyela hano hamavu?

¹⁴ Kuli vatu vamwe vavandende kaha vaze veji kwivwanga nge Yehova avazanga mujila yakulipwila. (Yowa. 1:12, 13; 3:5-7) Hakuvawavisa nashipilitu yajila, veji kupwanga jino “vana vaKalunga.” (Loma 8:15, 16) Paulu ahanjikile hali vaka-Kulishitu vawavisa ngwenyi, ‘vavasangwile, nakuvatwamisa hamwe muvihela vyamwilu hakulikata naKulishitu Yesu.’ (Efwe. 2:6) Vatwama muvihela kanevi vyakushipilitu mwomwo ‘vavahaka tutachikijilo kuhichila muli shipilitu yajila yize vashikile, yize yinapu chijikilo chauswana wavo wakulutwe,’ kulumbununa ‘lutalililo luze vavalamina mwilu.’—Efwe. 1:13, 14; Kolo. 1:5.

¹⁵ Oloze vatu vavavulu vaze vafwelela mundando yakusokola, vaze vapwa masepa jaYehova, vatwama nalutalililo lwakukayoyela muPalachise yize vashika hano hamavu haya myaka yosena kupwa vana venyi. Kuhichila mundando kaneyi, Yehova asolola nge azanga chikuma vatu vosena muno mukaye. (Yowa. 3:16) Nge tuli nakusaka kupwa nalutalililo lwakukayoya hano hamavu haya myaka yosena nakuzachilanga lika Yehova nakashishi, kaha ikiye mwakalingisa chiyoyelo chetu chikapwe chamwaza mukaye kakahya. Chikupu vene, wana wandando yakusokola wapwa hijila yize Kalunga asolwelamo zangi yenyi hali etu.

16. Kushinganyeka havyuma vyavivulu natulingila Yehova hazangi yenyi nachitukafwa ngachilihi?

¹⁶ Katweshi kuhasa kulava vyuma vyosena vize atulingila Yehova hakusolola zangi yenyi hali etuko. Muka-kwimba jisamu Ndavichi ambile ngwenyi: “Vishinganyeka vyove vyapwa vyavilemu chikuma kuli ami. Ove Kalunga, vyapwa vyavivulu chikuma. Kachi nge nangweseka kuvilava, vinavulu chikuma kuhambakana usekeseke.” (Samu 139:17, 18) Kushinganyekanga havyuma natulingila Yehova nachitukafwa tumuzange chikuma mwomwo naikiye atuzanga. Shikaho, tumuzachilenunga nangolo jetu josena.

17, 18. Vyuma muka vize twatela kulinga mangana tusolole nge twazanga Kalunga?

¹⁷ Kuli vyuma vyavivulu twatela kulinga mangana tusolole nge twazanga Yehova. Chakutalilaho, tweji kusololanga nge twazanga Kalunga navakwetu vatu hakwazana natwima mumulimo wakwambulula Wangana. (Mateu 24:14; 28:19, 20) Kaha nawa tweji kusololanga nge twazanga Yehova hakumika muvyeseko nakulama kulonga chetu. (Tangenu Samu 84:11; WaYakova 1:2-5.) Nge tuli nakuhita muvyeseko vyavivulu, twatela kufwelela ngwetu Kalunga natachikiza kuyanda chetu, kaha mwatukafwa mwomwo atumona kupwa tuvavalemu.—Samu 56:8.

¹⁸ Kuzanga Yehova cheji kutulingisanga tushinganyeke chikuma havyuma atenga nahamilimo yenyi yeka yakukomwesa. Kulinangulanga Mbimbiliya lwola lwosena cheji kusololanga nge twazanga Kalunga nakumona Mazu enyi kupwa amalemu. Kulomba cheji kutulingisa tupandame chikuma kuli Yehova nakusolola nge twamuzanga. Kushinganyekanga handando yakusokola yize atuhana Kalunga mwomwo yashili yetu, cheji kusololanga nge twamuzanga chikuma. (Yowa. 1, 2:1, 2) Evi hivyuma vimwe vize twatela kulinga mangana tusolole nge twazanga chikuma Yehova mwomwo naikiye atuzanga.