1, 2. (a) Muloñadi chimwakuhwelela nenu Yehova wakeña antu jindi? (b) Antu ayileñeli nachililwinyi?

 MULOÑADI chimwakuhwelela nenu Yehova wakeña antu jindi? Henohu kanda mwakuli ilu lwihu, shinshikenu iyi yakutalilahu: Hayaaka yayivulu, muhela Taylene adiña nakumukonkomwena kudi akwawu akwakwitiya kulonda yabuleña kutoñojoka nindi watela kwila yuma yayivulu. Wahosheli nindi: “Neyi Yehova hankeñeluku, hadi kutwalekahu kunfumbaku.” Brigitte, wakulishili anyana ayedi nkawindi hanyima yakufwisha nfumwindi, wahosheli nindi: “Kukulisha anyana mukanu kaayi kaSatana hichuma chakala nankashi, sweje-e kudi anvwali ajiki. Ilaña nakuhweleli chikupu nami Yehova wankeña muloña wankwashili mumpinji yinadiña nachineñi chikupu, nawa hañumba kulonda nimoni kukala kunukukañanya kuumikaku.” (1 Kor. 10:13) Sandra wayekelaña nachikatu chakubula kukewa. Hakupompa kwankambi amumwekesheleli chisambu kudi ñoda mana kwetu elukawu chikupu kudi antu. Nfumwa Sandra wahosheli nindi, “Hela chakwila hitwamwilukiluku, ilaña twazañaleli chikupu muloña watwakameneni. Hela mazu antesha akukeña  ahoshañawu amana kwetu niahela anleñelaña nimoni nami Yehova watukeña.”

² Antu ayileñeli nachililu chakufwila kukeña akwawu niwena afwilaña kuyikeña. Antu aneñaña neyi abula kuyimwekeshela kukeña hamuloña wayuma yamwekanaña yabula kukuhwelelawu hela ayineñesha, kukata kumujimba, kukala kwamali hela kubula kuzata chiwahi mumudimu wakushimwina. Neyi tutachika kutoñojoka netu Yehova hatukeñaku, chikuwaha neyi twanuka netu twalema kumesu indi nawa wekala kwoku, ‘watukwataña kuchikasa chetu chachidiilu’ nawa nakutukwasha. Neyi twikala ashinshika, hamba katuvulamenaku.—Isa. 41:13; 49:15.

3. Chumanyi chinateli kukolesha chikuhwelelu chetu neyi twiluka netu kukeña kwatukeñayi Yehova hikwamanañaku?

³ Antu itwashimuna hakusambila elukili chikupu nawu Nzambi wayikwashileña hampinji yamwenuwu makabi. Anetu nawa tunateli kukuhwelela netu Nzambi watukwashaña. (Mas. 118:6, 7) Muchinu chibaaba, tukudiza chamwekeshañayi Nzambi kukeña kuhitila (1) muyileñaleña yindi, (2) Izu dindi donenawu, (3) kulomba (4) niifutu danyiloña. Kutoñojoka chikupu hayuma yayiwahi yakoñayi Yehova kunateli kutukwasha kwikala namuchima wakusakilila hakukeña kwindi kwabulaña kumana.—Tañenu Masamu 77:11, 12.

4. Indi kutoñojoka chikupu hayileñaleña yaYehova kwamwekeshañadi? (Talenu mwevulu wakutachikilahu.)

⁴ Komana tunateli kumona kukeña kwaYehova kwabulaña kumana kwatukeñayi muyuma yaleñayi? Eñañi, muloña yileñaleña yamwekeshaña kukeña kwaNzambi. (Rom. 1:20) Waleñeli iseki niyuma yejima munjila yinateli kutukwasha kwikala nawumi. Hela chochu, wakeñaña nindi twileña yuma yayivulu kubadika kwikala hohu nawumi. Twatela kudya kulonda tutwalekuhu kuhanda. Yehova waleñeli iseki munjila yakwila disoñeña mafu amboka-mboka amavulu itunateli kuteleka neyi yakudya yayiwahi. Watuleñeli munjila yitwatela kudiluñisha hakudya. (Mukwa. 9:7) Muhela wejina daCatherine watiyaña kuwaha kutala yileñaleña, sweje-e mukakweji waApril muCanada. Wahosheli nindi: “Chanhayamishaña hakumona yuma yejima chiyahandaña, nkenu yamenaña hamaseki nitujila twafuntaña kufuma kutwabuukilili, kushilahu nitujila twanyanya twenzaña kumbeketi yakudiishila atujila yekala hanjanina yachisambu chami. Yehova watukeña hakwila yatwinki yuma yayiwahi nankashi.” Tata yetu wamwiwulu wukweti kukeña watiyaña kuwaha hayileñaleña yindi nawa wakeñaña nindi ninetu tudiluñisheña kuyitala.—Yil. 14:16, 17.

5. Indi kukeña kwaYehova kwamwekanaña ñahi munjila mwayileñeleliyi antu?

⁵ Yehova watuleñeli nawuswa wakuzata nyidimu yayiwahi yitunateli kudiluñisha muchihandilu chetu. (Mukwa. 2:24) Wakeñeli nindi antu awanini heseki, adovwahishi, ekali anyanta awanshi, awatujila niyuma yejima yayumi. (Kutach. 1:26-28) Yehova watuleñeli nayililu yayiwahi kulonda tumwimbujoleña.—Efwes. 5:1.

6. Muloñadi chitwatela kulemesha chikupu Izu daNzambi?

⁶ Nzambi watumwekeshela kukeña kwabadika hakutwinka Izu dindi donenawu. Damwekeshaña yuma yitwatela kwiluka hadi yena nichazatañayi nawantu. Chakutalilahu, Bayibolu yatulejaña Nzambi chazatileñayi nawaIsarela adikañili nindi kakavulu. Mukanda waMasamu 78:38 wahosha nawu: “Yena dinu nachina chaswejayi wushona wayanakeneni kuluwa kwawu, hayijilumwini kwinduku; kuzuwa kwindi wakulekesheli kakavulu, hasañumwini  ndombu yindi yejimaku.” Kutoñojoka chikupu haniyi vasi kunateli kukukwasha kwiluka neyi Yehova wakukeña nawa wakwakamenaña halweyi. Ilukaku chikupu neyi walema kumesu aYehova.—Tañenu 1 Petulu 5:6, 7.

7. Muloñadi chitwatela kulemeshela Bayibolu?

⁷ Twatela kulemesha Bayibolu chikupu muloña Nzambi wahoshaña nanetu kuhitila muBayibolu. Neyi anvwali atiyañanaña chiwahi nawanyanawu, chumichi chikuyikwasha kukolesha kukeña kwawu nawa akudikuhwelela. Indi Yehova nateli kwikala ñahi? Hela chakwila kanda tumumoneñahu dehi nawa kanda tutiyeñahu dehi izu dindi, ‘wahoshaña’ nanetu kuhitila Mwizu dindi donenawu nawa twatela kutiyilila. (Isa. 30:20, 21) Yehova wafwilaña kutulombola etu antu jindi adihana nikutukiña kuyuma yatama. Wakeña cheñi nindi tumwiluki nikumukuhwelela.—Tañenu Masamu 19:7-11; Yishimu 1:33.

8, 9. Yumanyi yakeñañayi Yehova nindi twiluki? Lumbululenu iyi nsañu nachakutalilahu chamuBayibolu.

⁸ Yehova wakeñaña nindi tumwiluki netu watukeña nawa weluka nindi hitwawaninaku. Watalaña hayuma yayiwahi yekala mudi etu. (2 Kushi. 16:9) Chakutalilahu, wamweni yuma yayiwahi mudi Mwanta wawaYuda Yehoshafwati. Hampinji yimu, Yehoshafwati wetejeli kuya naMwanta wawaIsarela Ahabi kuRamoti Gileyadi nakwasa njita nawaSiriya. Hela chakwila atuprofwetu akutwamba 400 amulejeli Ahabi watama nawu wukashinda, kaprofwetu walala waYehova  Mikaya washimwini nindi akuyishinda. Ahabi wafwilili kunjita nawa Yehoshafwati wapulukilili kunsuki. Chafuntiliyi kuYerusalema, amuzuwilili hamuloña wakwiteja kutiyañana naAhabi. Hela chochu, Yehu mwana kaHanani mukwakumona yimwenu wamulejeli Yehoshafwati nindi: “Mudeyi anamonumu yuma yayiwahi.”—2 Kushi. 18:4, 5, 18-22, 33, 34; 19:1-3.

⁹ Kumatachikilu achiyuulu chindi, Yehoshafwati walejeli atulamba, Alevi niatupristu kuya nakunyeñumuka munyisumba yejima yawaYuda kulonda atañishi antu jindi nshimbi jaYehova. Mudimu weniwu wazatikili chiwahi chakwila antu amunyunza yadikuminuwu nayu atachikili kumutiya Yehova woma. (2 Kushi. 17:3-10) Eñañi, Yehoshafwati welili yuma yawusupi, ilaña Yehova havulameneni yuma yayiwahi yakoñeleñayuku. Iyi nsañu yamuBayibolu yatwanukishaña nawu hela chakwila twawanina wanyi, Yehova wukatumwekeshela kukeña kwabulaña kumana neyi tufuukulahu kumuzañalesha namuchima wetu wejima.

10, 11. (a) Muloñadi kulomba chikwekalila chawana chalema chatwinkayi Yehova? (b) Indi Nzambi nateli kwakula ñahi kulomba kwetu?

¹⁰ Tata yawantu wukweti kukeña wekalaña nampinji yakutiyilila kudi anyanindi neyi anakukeña kuhosha nindi. Wakeñaña kwiluka kukala kukwetuwu niyuma yinakwakamawu muloña washa muchima hayuma yatoñojokañawu. Tukweti kukooleka kwakweni kwakuhanjeka naTata yetu wamwiwulu, Yehova, nawa watiyililaña neyi tunakulomba kudi yena.

¹¹ Tunateli kulomba kudi Yehova kala mpinji. Hashaku nshimbi yakutukañesha kulombaku. Hibwambu detu watutiyililaña mpinji yejima. Taylene, ashimunawu hakusambila wahosheli nindi: “Wunateli kumuleja yuma yejima.” Neyi tumuleja Nzambi yuma yitunakutoñojoka mukulomba, nateli kutwakula kuhitila mumazu ekala muBayibolu, chibaaba chamumagazini hela mazu akukundeja afumaña kudi akwetu akwakwitiya. Yehova watiyaña chitwamulembelelaña nawa weluka kukala kwetu kubadika antu ejima. Chakulañayi kukulomba kwetu, chamwekeshaña kukeña kwatukeñayi kwabulaña kumana.

12. Muloñadi chitwatela kudiza kulomba kwasonekawu muBayibolu? Shimunenu chakutalilahu

¹² Tunateli kudiza yuma yayivulu kukulomba kwasonekawu Mwizu daNzambi. Mpinji yikwawu, tunateli kuhetelamu chikupu neyi tudiza hakulomba kweniku hampinji yakudifukula kwachisaka. Neyi tutoñojokaña chikupu hadi ambuña Yehova akushankulu chamulejeleñawu Nzambi yuma yatoñojokeleñawu, chinatela kutukwasha kuwahisha kulomba kwetu. Chakutalilahu, shinshikenu Yona chalombeliyi nachineñi hampinji yadiñayi mwivumu danshi muneni. (Yona 1:17–2:10) Hitulukenu chalombeliyi Solomoni kudi Yehova chakufuma hamuchima hakwenzununa tembeli. (1 Anya. 8:22-53) Toñojokenu chikupu hakulomba kwachitalilu kwahosheliyi Yesu hakwila tuhetelumu. (Mat. 6:9-13) Sweje-e dinu, “mulejenu Nzambi yuma yejima yimunakeñi” mpinji yejima. Chikufumamu, “kuwunda kwaNzambi kwabadika maana ejima kwakahemba nyichima yenu niyitoñojoka yenu.” Chitwela mwenimu tukusweja kumusakilila Yehova hakukeña kwindi kwabulaña kumana.—Fwi. 4:6, 7.

13. Kukoolekanyi kukwetuwu antu muloña ayinka chawana chachiwahi chefutu danyiloña?

¹³ Atwinkeli chawana chalema chamulambu wefutu danyiloña dahaniniyi Yesu kulonda ‘tuhandi.’ (1 Yow. 4:9) Hakuhosha hakukeña kwaNzambi kwabadika, kapostolu Pawulu wasonekeli nindi: ‘Hashikili mwaka watelela, Kristu wafwilili adiwula Nzambi.  Kufwila muntu waloña chakala, ilaña muntu wamuwahi, kwiji kukumwekana wumu wukubula woma wakumufwila. Ilaña Nzambi wamwekeshaña kukeña kwindi yomweni kudetu, hohitwachidiñi akwanshidi Kristu watufwilili.’ (Rom. 5:6-8) Iku kukeña kwaNzambi kwasweja kwaleñeleli antu kwikala nawuselewa waYehova.

14, 15. Indi ifutu danyiloña demenañaku chumanyi (a) kudi akwaKristu awayishewa? (b) kudi antu akweti kuchiñeja kwakushakama hamaseki?

¹⁴ Antu antesha hohu diwu amonaña kukeña kwaYehova kwabulaña kumana munjila yadimena chikupu. (Yow. 1:12, 13; 3:5-7) Ekala dehi “anyana kaNzambi” muloña ayiwayisha dehi naspiritu yajila. (Rom. 8:15, 16) Pawulu wayilumbulwili akwaKristu awayishewa nindi ‘ayisañwili nakuyishakamisha chimu mumawulu, mudi Kristu Yesu.’ (Efwes. 2:6) Akweti iyi ñimenu yakuspiritu muloña ‘ayifundili naspiritu yajila yakaninuwu, chijikilu chawuswana wawu,’ dikwila nawu, ‘kuchiñeja kwayiswekelawu mumawulu.’—Efwes. 1:13, 14; Kol. 1:5.

¹⁵ Ilaña antu amavulu akuhwelela mwifutu danyiloña, akweti kukooleka kwakwikala amabwambu jaYehova nakuchiñeja nakuyilisha anyana kaNzambi nikushakama haya nyaka heseki dakelishawu Paradisa. Dichi, kuhitila mwifutu danyiloña, Yehova wayimwekeshelaña antu kukeña. (Yow. 3:16) Neyi twakuhwelela kushakama hamaseki haya nyaka nawa tutwalekahu nakumuzatila Nzambi nakashinshi, twatela kwiluka chikupu netu Nzambi wakatwinka chihandilu chachiwahi mwituña dadiha. Chikusweja kuwaha neyi tukumonaña ifutu danyiloña netu hiwunsahu waweni wamwekeshaña kukeña kwaNzambi kwabulaña kumana.

16. Indi kutoñojoka chikupu hayuma yayivulu yinatumwekesheliyi Yehova kukeña kwatukwashaña ñahi?

¹⁶ Tunateli kutwesha wanyi kuchinda njila jashiyashana jatumwekeshelañayi Yehova kukeña kwabulaña kumana. Ñimbi yamasamu Davidi wahoshela nindi: “Yitoñojoka yeyi o chinayimona kulema, eyi Nzambi! Kuyichinda o chiyavula! Neyi nukuyichinda yikuvula nankashi, wusekulula wukukeha.” (Mas. 139:17, 18) Twatela kwiteja yitoñojoka yamuchidiwu yikoleshi mpwila yetu yakumukeña Yehova chikupu neyi chochatwakamenañayi. Dichi, tufwilenu kumuzatila Nzambi nañovu yetu yejima.

17, 18. Njilanyi jikwawu jitunateli kumwekeshelamu kukeña kutwamukeña Nzambi?

¹⁷ Kwekala njila jajivulu jitunateli kumwekesha netu twamukeña Yehova. Chakutalilahu, twamwekeshaña netu twamukeña Nzambi niantuñi netu neyi tuzataña neyena mumudimu wakushimwina Wanta. (Mat. 24:14; 28:19, 20) Twamwekeshaña cheñi netu twamukeña Yehova chikupu kuhitila mukwikala ashinshika neyi tudi mukweseka. (Tañenu Masamu 84:11; Yakoba 1:2-5.) Neyi tudi mukweseka kwasweja, twatela kukuhwelela netu Nzambi nakumona chitunakukabakana nawa wukutukwasha muloña twalema kumesu indi.—Mas. 56:8.

¹⁸ Kukeña kutwamukeña Yehova kwatuleñelaña kutoñojoka chikupu hayileñaleña yindi ninyidimu yikwawu yakuhayamisha. Twamwekeshaña netu twamukeña Nzambi nawa twalemesha nankashi Izu dindi kuhitila mukudiza Bayibolu nakanañachima. Kukeña kutwamukeña Yehova kwatuleñelaña kukundama kwakwihi nayena mukulomba. Nawa kukeña kutwamukeña Nzambi kwaswejelañaku neyi tutoñojokaña chikupu hamulambu wefutu danyiloña dahaniniyi hanshidi jetu. (1 Yow. 2:1, 2) Iji hinjila jekala hakachi kanyiloña yayivulu yatuleñelaña kumukeña Yehova muloña wakukeña kwatukeñayi kwabulaña kumana.