1, 2. (a) Ki’nn konvink twa ki Zeova kontan so pep? (b) Kouma Zeova finn kree nou?

KIFER to sir ki Zeova kontan so pep? Avan to reponn sa kestion-la, anou examinn de-trwa lexanp: Pandan plizir lane, avek boukou lamour bann frer ek ser ti ankouraz enn ser ki apel Taylene. Zot ti dir li ki li bizin gard so lekilib ek pa vinn tro exizan ar limem. Taylene dir: “Si Zeova pa ti kontan mwa, li pa ti pou kontign donn mwa konsey koumsa.” Brigitte ti elve so de zanfan tousel apre lamor so misie. Li dir: “Grandi bann zanfan dan sa lemond Satan la se enn parmi bann pli gran defi, sirtou kan to tousel. Me mo sir ki Zeova kontan mwa parski mem dan mo lapenn ek mem kan mo ti pe vers bann larm, Li’nn touletan gid mwa. Zame Li’nn les enn leprev dire a enn pwin ki mo nepli kapav siporte.” (1 Kor. 10:13) Sandra pe lit kont enn maladi ki pena okenn gerizon. Dan enn lasanble, madam enn frer ki boukou dimounn kone, ti pran letan pou koz avek li. Sandra so misie dir: “Mem si nou pa ti konn ser-la personelman, so lintere sinser inn fer nou boukou resof nou leker. Mem dan bann ti kitsoz ki bann frer ek ser fer pou exprim zot lamour, mo trouve ki kantite Zeova kontan nou.”

 ² Zeova finn kree nou avek dezir pou kontan lezot ek nou bizin santi ki lezot kontan nou. Me kan bann sitiasion ki nou pa atann arive, nou tom malad, nou gagn bann problem finans, ouswa nou pa gagn bann bon rezilta dan minister, nou kapav dekouraze, nou de lebra tonbe. Nou kapav ena santiman ki Zeova nepli kontan nou. Si sa panse-la koumans travers nou lespri, li bon nou rapel ki nou ena boukou valer devan so lizie. Li avek nou, Li pe “trap [nou] lame drwat” pou ed nou. Zeova zame pou bliye nou si nou res fidel ar Li.—Iza. 41:13; 49:15.

3. Ki pou ed nou ranforsi nou konviksion ki Zeova touletan kontan nou?

³ Bann frer ek ser ki nou’nn mansione avan ti san poursan sir ki Bondie avek zot dan bann moman difisil. Nou’si nou kapav ena mem konviksion. (Ps. 118:6, 7) Dan sa lartik-la nou pou examinn kat kado ki prouve ki kantite Zeova kontan nou: (1) so kreasion, (2) Labib, (3) lapriyer, ek (4) laranson. Kan nou medit lor bann bon kitsoz ki Zeova inn fer, sa pou ogmant nou rekonesans pou so lamour ki dire pou touletan.—Lir Psom 77:11, 12.

4. Kan nou medit lor kreasion Zeova ki sa aprann nou?

⁴ Eski nou trouv lamour Zeova atraver so kreasion? Wi, parski sa aksion pou kree la, samem enn prev so lamour extraordiner. (Rom. 1:20) Zeova inn kree later dan enn fason kot nou kapav viv dan bann bon kondision. Me, Li pa anvi nou zis viv, Li anvi nou apresie lavi. Pou kontign viv nou bizin manze. Alor Zeova inn fer later prodir enn gran varyete manze ki fer nou plezir. (Ekle. 9:7) Catherine, enn ser ki res Canada kontan obzerv lanatir, sirtou dan printan. Li dir: “Fason ki tou kitsoz repran lavi li vremem extraordiner. Bann fler kone exakteman kan zot pou tir zot latet deor ek bann zwazo migrater kone kan pou retourne. Parmi ena enn tipti zwazo ki apel Colibri. Li kone ki semin li bizin pran pou ariv ziska so bol manze andeor lafnet mo lakwizinn. Fode Zeova bien kontan noumem pou fer nou plezir koumsa.” Nou Papa ki dan lesiel kontan so kreasion ek Li anvi ki nou’si nou profit tou seki Li’nn kree.—Zist. 14:16, 17.

5. Kouma nou trouv lamour Zeova dan fason ki Li’nn kree bann dimounn?

⁵ Zeova inn kree nou avek kapasite pou fer bann travay ki donn nou satisfaksion ek rann nou lavi ere. (Ekle. 2:24) Li’nn donn bann imin responsabilite pou ranpli later, kiltiv li, ek pran swin bann pwason, bann zwazo, ek lezot kreatir vivan. (Zen. 1:26-28) Ek dan so lamour Li’nn kree nou avek bann zoli kalite ki permet nou imit Li!—Efe. 5:1.

6. Kifer nou bizin bien rekonesan ki nou ena Parol Bondie?

⁶ Bondie inn montre ki Li bien kontan nou kan Li’nn donn nou so Parol, Labib. Dan sa liv-la, ena bann detay lor Li ek lor fason ki Li’nn azir avek bann dimounn. Par exanp, gete kouma Li ti tret bann Izraelit ki ti dezobeir Li souvan. Psom 78:38 dir: “Bondie ti ena konpasion pou so pep; Li ti pardonn zot pese ek Li pa ti avoy lamor lor zot. Plizir fwa Li ti tini so lakoler ek Li ti kontrol so laraz.” Si to medit lor sa verse-la, to pou trouve ki kantite Zeova kontan twa ek  pran twa swin. Alor, to kapav sir ki to kont boukou pou Li.—Lir 1 Pier 5:6, 7.

7. Kifer Labib bizin ena enn gran valer pou nou?

⁷ Labib bizin ena gran valer pou nou parski se mwayin prinsipal ki Bondie servi pou kominik avek nou. Enn bon kominikasion ant paran ek zanfan li bien inportan. Kifer? Parski sa ogmant lamour ek konfians ki sakenn ena pou zot kamarad. Li parey pou Zeova. Li nou Papa ek Li ena boukou lamour pou nou. Me kouma Li kominik avek nou? Mem si zame nou’nn trouv Li ouswa tann so lavwa, Li “koz” avek nou atraver so Parol, ek nou bizin ekout Li. (Iza. 30:20, 21) Zeova anvi gid nou ek protez nou. Li anvi osi nou konn Li ek fer Li konfians.—Lir Psom 19:7-11; Proverb 1:33. *

8, 9. Ki Zeova anvi nou kone? Donn enn lexanp Biblik.

⁸ Zeova anvi nou kone ki Li kontan nou ek ki Li pa trouv zis nou bann defo. Okontrer, Li rod seki bon dan nou. (2 Kro. 16:9) Se seki Li ti fer dan ka Yeoshafat, Lerwa Zida. Enn fwa, Yeoshafat ti aksepte pou akonpagn Ahab, Lerwa Izrael pou al konbat bann Sirien. Zot ti anvi repran lavil Ramot-Gilead. Kat-san profet ti donn Ahab fos lespwar ki li pou gagn viktwar. Me vre profet Zeova, Mikaya,  ti predir so defet. Ahab ti perdi lavi, me Yeoshafat ti reisi sape. Kan li ti retourn Zerizalem, Zeova ti servi Yeou, garson profet Anani, pou koriz li. Pourtan, Yeou ti dir li osi: “Finn trouv bann bon kitsoz dan twa.”—2 Kro. 18:4, 5, 18-22, 33, 34; 19:1-3.

⁹ Koumansman so regn, Yeoshafat ti donn lord bann prins, Levit, ek pret pou al dan tou bann lavil Zida pou ansegn Lalwa Zeova. Sa kanpagn-la ti telman efikas ki bann nasion alantour ti koumans ena lakrint pou Zeova. (2 Kro. 17:3-10) Li vre ki Yeoshafat ti pran enn move desizion, me Zeova pa’nn ferm lizie lor bann bon kitsoz ki li ti’nn fer. Ki leson nou aprann ar sa lexanp-la? Seki malgre nou bann defo, si nou fer tou seki nou kapav pou fer Zeova plezir, Li pou kontign kontan nou.

10, 11. (a) Kifer lapriyer li enn kado ki Zeova inn donn nou? (b) Kouma Bondie kapav reponn nou lapriyer? (Get zimaz koumansman lartik.)

¹⁰ Enn papa ki kontan so bann zanfan pran letan pou ekoute kan so bann zanfan anvi koz ar li. Li anvi kone ki ena dan zot leker, ki kitsoz ki trakas zot, parski li interese ar zot. Li parey pou Zeova, nou Papa dan lesiel. Li ekout nou kan nou koz ar Li. Lapriyer se vremem enn gran privilez!

¹¹ Nou kapav priye Zeova ninport kan nou anvi. Li pa’nn met okenn restriksion dan sa domenn-la. Li nou Kamarad ek Li touletan pre pou ekout nou. Taylene, sa ser ki nou ti mansione avan la, dir: “To kapav dir Li tou seki to anvi.” Kan nou dir Bondie nou bann santiman pli profon, kouma Li reponn nou? Li kapav reponn nou atraver enn pasaz Labib, enn lartik dan enn magazinn, ouswa par enn ti parol ankourazan ki enn frer ouswa enn ser dir nou. Zeova ekout nou bann siplikasion ek konpran nou, mem si personn pa konpran. Li reponn nou bann lapriyer ek sa repons-lamem se enn prev extraordiner ki Li kontan nou.

12. Kifer li bon nou examinn bann lapriyer ki ena dan Labib? Donn enn lexanp.

¹² Nou kapav aprann boukou ar bann lapriyer ki’nn ekrir dan Labib. Alor parfwa, li bon nou examinn sa bann lapriyer-la pandan nou ladorasion an fami. Kan nou reflesi lor fason ki bann serviter Zeova dan lepase inn exprim zot bann santiman profon, inn devid zot leker, sa kapav ed nou amelior nou bann lapriyer. Par exanp, to kapav examinn lapriyer ki Yona ti fer kan li ti dan vant enn gro pwason pou dir a ki pwin li regrete. (Yona 1:17–2:10) Ena osi lapriyer ki Salomon ti fer avek tou so leker pou linogirasion tanp. (1 Ler. 8:22-53) To kapav medit osi lor lapriyer model ki Zezi ti montre nou. (Mat. 6:9-13) Me seki pli inportan, ‘ofer Bondie to bann lapriyer’ regilierman. Lerla, “lape Bondie ki depas tou lintelizans, pou gard zot [leker, NW] ek zot lespri.” Nou rekonesans pou gran lamour ki Zeova ena pou nou, pou ogmante.—Fil. 4:6, 7.

13. Ki posibilite limanite ena gras-a laranson?

¹³ Laranson, se enn kado ki nou pa merite, ki Zeova inn ofer nou pou nou kapav ‘gagn lavi.’ (1 Zan 4:9) Se enn fason extraordiner ki Bondie montre so lamour. Lapot Pol koz lor la kan li dir: ‘Lekris ti mor pou bann peser dan letan ki ti’nn fixe. Li difisil pou kikenn donn  so lavi pou enn dimounn drwat. Kitfwa enn kikenn kapav oze mor pou enn bon dimounn. Me ala ki manier Bondie prouve ki kantite lamour Li ena pou nou: letan nou ti ankor peser, Lekris finn mor pou nou.’ (Rom. 5:6-8) Sa aksion ranpli ar lamour ki Bondie inn fer pou limanite la, donn nou posibilite pou ena bann bon relasion avek Zeova.

14, 15. Ki laranson reprezante pou (a) bann Kretien ki ena lesperans pou viv dan lesiel? (b) bann ki ena lesperans pou viv lor later?

¹⁴ Gras-a laranson, sertin Kretien resanti lamour Zeova dan enn fason pli spesial. (Zan 1:12, 13; 3:5-7) Bondie inn swazir zot par mwayin lespri sin ek se koumsa ki zot inn vinn so bann “zanfan.” (Rom. 8:15, 16) Pol koz lor sa bann Kretien-la kouma bann ki Bondie ‘finn resisite avek Lekris pou zot regn avek li lao dan lesiel.’ (Efe. 2:6) Mem si sertin ankor lor later, zot ena sa pozision spiritiel la parski Bondie ‘inn met enn sele lor zot avek lespri sin ki Li ti promet. Lespri sin, li enn garanti ki zot gagne alavans lor zot leritaz,’ setadir, “lesperans ki pe atann zot dan lesiel.”—Efe. 1:13, 14, NW; Kol. 1:5.

¹⁵ Bann ki pa pou al dan lesiel, zot osi zot kapav vinn bann kamarad Zeova akondision zot montre zot lafwa dan laranson. Zot ena posibilite pou vinn bann zanfan ki Bondie inn adopte ek pou viv pou touletan lor later. Alor, par mwayin laranson, Zeova montre ki kantite Li kontan bann dimounn. (Zan 3:16) Si nou kontign servi Zeova avek fidelite, nou kapav sir ki Li pou donn nou enn lavi meyer dan lemond nouvo. Alor, anou montre ki nou konsider laranson kouma pli gran prev ki Bondie kontan nou!

16. Kifer li bon nou medit lor tou seki Zeova inn fer pou nou?

¹⁶ Li inposib pou konte ki kantite fwa Zeova inn montre so lamour anver nou. Lerwa David ti sante: “O Bondie, to bann panse ena boukou valer pou mwa! Zot telman boukou! Si mo esey konte, zot pli boukou ki bann lagrin disab.” (Ps. 139:17, 18, NW.) Li bon nou pran letan pou medit lor tou seki Zeova inn fer pou nou. Sa pou pous nou pou kontan Li an-retour ek nou pou anvi donn Li nou best!

17, 18. Sit sertin fason nou kapav montre ki nou kontan Bondie.

¹⁷ Ena boukou fason pou montre Zeova ki nou kontan Li. Par exanp, nou montre ki nou kontan Bondie ek nou prosin kan nou partisip avek zel dan predikasion. (Mat. 24:14; 28:19, 20) Nou montre ki nou vremem kontan Zeova kan nou andir bann leprev ek nou gard nou fidelite. (Lir Psom 84:11; Zak 1:2-5.) Si nou bann leprev vinn pli difisil pou siporte, nou kapav sir ki Bondie trouv nou soufrans. Li pou ed nou, parski nou ena valer devan so lizie.—Ps. 56:8.

¹⁸ Nou lamour pou Zeova pous nou pou medit lor tou bann kitsoz extraordiner ki Li’nn kree. Nou montre ki nou kontan Bondie ek konsider so Parol kouma enn kado ki ena enn gran valer kan nou etidie Labib avek serye. Lamour pou Zeova pous nou pou vinn pli pros ar Li atraver lapriyer. Ek nou lamour pou Bondie ogmante kan nou medit lor laranson. (1 Zan 2:1, 2) Sa se zis de-trwa rezon ki nou ena pou kontan Zeova ek montre ki nou apresie so lamour ki dire pou touletan.