1, 2. a) ¿Imamandata Jehová Dios quiquinda juyajta tucui shunguhuan cripangui? b) ¿Imatata tucui gentecunallata minishtinchi?

JEHOVÁ DIOS quiquinda juyajtaca ¿tucui shunguhuanllu cripangui? Huaquin panigucuna ima nijta ricupashun. Taylene shuti paniguca siempre tucuita ali rurangapaj munashpami yapata preocuparishpalla causan carca. Chaimandami huauquicunaca na yapata preocuparinachu cangui nishpa consejan carca. Paica ninmi: “Jehová Dios ñucata juyajpimi chai turicunaca shina consejashpa animajuhuashca” nishpa. Brigitte shuti panigupash ishcai huahuahuanmi viuda quedarca. Paica ninmi: “Diablo mandajuj mundopi huahuacunata viñachinaca shinllipachami can. Sololla taitamamacunapacarin ashtahuan shinllimi can. Yapata pinarishpa huacajuj punllacunapica Jehová Diosmi ñucataca tranquilo sintirichun ayudahuashca. Chaimandami Jehová Dios ñucata juyashcataca tucui shunguhuan crini” nishpa (1 Cor. 10:13). Sandrapash na jambirinalla ungüitami charin. Shuj jatun tandanajuipimi shuj paniguca paita saludangapaj quimirishpa, paihuan unaillata parlarca. Sandrapa cusaca ninmi: “Chai paniguhuanga nunca na parlashcarcanchichu. Shinapash, pai quimirishpa  ñucanchihuan parlajpica shungu ucucamanmi cushijurcanchi. Shuj huauquipanicuna imashinagupash juyashcata ricuchijpica Jehová Dios ñucanchita juyashcatami crinchi” nishpa.

² Jehová Diosca gentecunataca juyana munaihuanmi rurashca. Chaimandami juyanchi, shujcunapash ñucanchita juyachun minishtinchi. Shinapash huaquinbica ungüicuna na yashcapi japijpi, culqui faltajpi, villachinapi pipash na uyajpi o imapash llaquicuna shamujpimi Jehová Diosca ñana juyahuanllu, ñucataca cungashcami nishpa pensanchi. Shina pensashca cashpapash Jehová Dios quiquinda juyajtaca nunca na cunganachu cangui. Jehová Diosca paita sirvijcunataca nunca na cunganllu (Is. 41:13; 49:15).

3. Jehová Dios ñucanchita juyashcata tucui shunguhuan cringapaca ¿imatata yachajupashun?

³ Taylene, Brigitte, Sandra shuti panigucunaca llaqui punllacunapi Jehová Dios paicunapa ladopi cashcataca tucui shunguhuanmi crin. Ñucanchicunapash Jehová Dios ñucanchiman imatalla carashcata yarishpami Jehová Dios ñucanchita juyajta tucui shunguhuan crina canchi (Sal. 118:6, 7). Chaimandami cai temapica, Jehová Diospa chuscu carashcacunata yachajushun: 1) Jehovapa rurashcacuna, 2) Biblia, 3) oración, 4) Jesuspa causai (Salmo 77:11, 12, liingui).

4. Jehovapa rurashcacunapi pensarishpaca ¿imatata Jehová Diosmandaca yachajupanchi?

⁴ Jehová Diosca cai Alpata rurashpami ñucanchita juyashcata ricuchishca (Rom. 1:20). Pensaripai ¿imashinata Jehová Diosca cai Alpata rurarca? Cai Alpapi ñucanchicuna cushijushpa causachunmi tucuilla ñucanchi minishtishcata carashca. Cai Alpapica tucui laya granocuna, frutacunami tian. Chaimandami ñucanchicunaca micunayai cajpi cushijushpa micunchi (Ecl. 9:7). Canadá llactamanda Catherine shuti paniguca abril quillapi quirucuna, plantacuna sisajta ricunatami ninanda gushtan. Paica ninmi: “Sisana tiempo chayajpi tucuilla plantacuna juyaillaguta sisajta ricushpaca ninandami cushijuni. Chai tiempopimi tucui laya urpicunapash cutin tigramun. Cocina ventanapi micunata churajpi quindi urpigu micungapaj shamujpipash ninandami cushijuni. Jehová Diosca ñucanchita ninanda juyaimandami chai juyailla animalgucunata, plantacunataca rurashcanga” nishpa. Jehová Diosca cushijushpami paipa rurashcacunataca ricun. Ñucanchicunapash paipa rurashcacunata ricushpa cushijuchunmi munan (Hech. 14:16, 17).

5. Ñucanchicunata rurashpaca ¿imashinata Jehová Diosca ñucanchita juyashcata ricuchirca?

⁵ Jehová Diosca ñucanchita rurashpaca trabajachun, ñucanchi trabajashcahuan cushijuchunmi rurarca (Ecl. 2:24). Chaimandami callaripillata gentecunata mandarca, huahuacunata charishpa cai Alpata jundachinguichi, cai Alpata trabajanguichi, tucuilla animalgucunata cuidanguichi nishpa (Gén. 1:26-28). Ashtahuangarin, paiman rijcha cai ushachunmi gentecunataca rurarca (Efes. 5:1).

6. ¿Imamandata Bibliataca alicachina capanchi?

⁶ Jehová Diosca paipa Shimi Bibliatapash carashpami ñucanchita juyashcata ricuchishca. Bibliapimi Jehovata rijsishpa gentecunata imashina pai tratajta yachajunchi. Shinaca, israelitacuna na cazujpi paicunata Jehová Dios imashina tratashcata ricupashun. Salmo 78:38pica ninmi, Taita Diosca “llaquij cashpami, paicuna nalita rurashcatapash cungashpa, paicunataca na tucuchishpa saquirca. Pai ninanda fiñarishca cashpapash, na llaquichishpami cutin cutin saquirca. Yapata fiñarishpa llaquichinatapash  jarcarircami” nishpa. Cai shimicunapi aliguta pensarishpaca, juchayu cajpipash Jehová Dios quiquindapash juyashpa llaquijtami cuenta japingui (1 Pedro 5:6, 7, liingui).

7. ¿Imamandapashta Bibliataca alicachina capanchi?

⁷ Jehová Diosca ñucanchihuan parlangapaj munashpami Bibliata cushca. Pensaripashun. Taitacuna cutin cutin huahuacunahuan parlajpica randimanda ashtahuan juyarishpa, llaquirishpami ashtahuan confianzata charin. Shinapash tal vez nipanguichari, Jehová Diostaca nunca na ricushcanichu, pai parlajtaca nunca na uyashcanichu nishpa. Shinapash, Jehová Diosca paipa Shimi Bibliahuanmi ñucanchihuanga parlan. Chaimandami Jehová Dios Bibliapi imata nijta uyana canchi (Is. 30:20, 21). Paica ñucanchicuna ama pandarichunmi Bibliapi maijan ñanda catinata ricuchin. Ashtahuangarin, paita ashtahuan rijsishpa paipi ashtahuan confiachunmi munan (Salmo 19:7-11; Proverbios 1:33, liingui).

8, 9. a) Jehová Diosca gentecuna ¿imata yachachunda munan? b) ¿Imatata rey Jehosafatmandaca yachajupanchi?

⁸ Jehová Diosca gentecuna pandarijpipash paicunata llaquishpa catijta yachachunmi munan. Paica ñucanchi imata alita rurashcatami ricun (2 Crón. 16:9). Judá llactamanda rey Jehosafat ima tucushcata ricupashun. Israel llactamanda rey Acabca, Siria llactamanda gentecuna Ramot-galaad llactata quichushca cajpimi, chai llactata cutin tigrashpa japingapaj rijurca. Chaimandami rey Jehosafatca rey Acabta cumbashpa rirca. Rey Acabpa 400 yanga profetacunaca llullashpami nirca, cangunami mishanguichi nishpa. Shinapash, Jehová Diospa profeta Micaya shuti runaguca, ama  richichu contracunami mishanga nircami. Profeta Micaya nishcatapash na uyashpami rey Jehosafatpash rey Acabpash rirca. Na uyashpa rimandami rey Acabca huañurca. Cutin rey Jehosafatca ashagumanda quishpirishpami Jerusalenman tigrarca. Tigrajpica rey Acabhuan tandanajushpa rishcamandami, Jehová Diospa profetaca Jehosafattaca shinllita consejarca. Jehosafat pandarijpipash Jehovapa profetaca nircami, Jehová Diosca ‘can alita rurashcataca tarishcami,’ yarishcami nishpa (2 Crón. 18:4, 5, 18-22, 33, 34; 19:1-3).

⁹ Shinapash rey Jehosafatpa ¿ima ali rurashcatata Jehová Diosca yarirca? Ricupashun. Rey Jehosafat chairalla rey tucushpaca tauca cati mandajcunata, levitacunata, sacerdotecunatami Judá llactapi Jehovapa Leyta yachachichun cacharca. Chaimandami Judá llactapa ladolla llactacunamanda gentecunapash Jehová Diosta rijsirca (2 Crón. 17:3-10). Rey Jehosafat pandarijpipash pai imata ali rurashcataca Jehová Diosca na cungarcachu. Shinaca, ñucanchicuna pandarishpapash paipa munaita rurangapaj empeñarijpica, Jehová Diosca ñucanchita juyashpa catingami.

10, 11. a) ¿Imamandata oracionda ruranaca shuj jatun bendición can? b) ¿Imashinata Jehová Diosca ñucanchi oraciongunataca contestan? (Callari dibujota ricupangui.)

¹⁰ Ali taitacunaca huahuacunata juyashpami paicuna imata pensajujta, imashina sintirijta yachangapaj munashpa paicuna ima nijtaca ali uyan. Jehová Diospash ñucanchi taita cuenda caimandami ñucanchicuna paita mañajpica, ñucanchicuna imata nijtaca ali uyan. Jehová Dioshuan parlanaca shuj jatun bendicionmi can.

¹¹ Jehová Dioshuanga ima horapash parlanallami canchi. Taylene shuti paniguca ninmi: “Jehová Dioshuanga imacunamandapash parlajunillami” nishpa. Shinaca, ñucanchi shungu ucupi imashina sintirishcatapash Jehová Diosman parlanallami canchi. Ñucanchicuna imashina sintirijujtaca alimi Jehová Diosca yachan. Huaquinbica Bibliapi shuj textohuan, publicaciongunapi shuj temahuan o ñucanchi huauquipanicunapa ali shimicunahuanmi pai uyajushcataca ricuchin. Paica ñucanchita juyaimandami ñucanchi oraciongunataca contestan.

12. ¿Imamandata Bibliapi escribishca oraciongunapi pensarinaca ali can? Shuj ejemplota nipai.

¹² Bibliapica tauca jaricuna, huarmicuna imashina tucui shunguhuan Jehovata mañashcatami parlan. Chaicunata liishpaca ashtaca ali yuyaicunatami yachajui ushanchi. Chai oraciongunamanda Familiahuan Adorana Tutapi yachajushpaca alimi canman. Shinapash ¿picunapa oraciongunamandata yachajui ushanchi? Huaquin ejemplocunata ricupashun. Shuj jatun pescadopa vijsa ucupi cashpaca Jonasca ninanda llaquirishpami Jehová Diosta mañarca (Jonás 1:17–2:10). Jehovapa templo huasita rurashpaca rey Salomonga tucui shunguhuanmi mañarca (1 Rey. 8:22-53). Jesús yachachishca oracionmanda yachajunapash alimi can (Mat. 6:9-13). Na cungashpa cutin cutin mañajujpica Taita Diosmi ‘casilla ali causaita caramunga’, ñucanchi ‘shungutapash, yuyaicunatapashmi huacaichinga’. Shina tranquilo sintirichun ayudashcamandami Jehová Diostaca ashtahuan agradicishun (Filip. 4:6, 7).

13. Jesús paipa causaita cushcamandaca ¿ima oportunidad charipanchi?

¹³ Jehová Diosca ñucanchicuna causachunmi paipa Churipa causaita curca (1 Juan 4:9). Jehová Dios ñucanchita ninanda juyashcata crichunmi apóstol Pabloca nirca: ‘Cristoca  Diosta na manllajcunamandami huañurca. [Alita] ruraj runamandaca pipash na huañunmanllu. Ashtahuan alipacha runamandaca maijanbash huañunmanllari. Taita Diosca paipa juyaita ñucanchiman ricuchishpami ñucanchi juchayu cajpipash, Cristo ñucanchimanda huañurca’ nishpa (Rom. 5:6-8). Jehová Dios paipa Churita cachamushcamandami Jehová ñucanchita juyashcata crishpa paiman quimirita ushanchi.

14, 15. a) Jesús huañushcamandaca ¿ima esperanzatata ungidocunaca charin? b) ¿Ima esperanzatata ashtaca gentecunaca charin?

¹⁴ Jesús paipa causaita cushcamandami, Jehová Diosca paipa espíritu santohuan huaquingunata agllashca paipa huahuacuna tucuchun (Juan 1:12, 13; 3:5-7; Rom. 8:15, 16). Shina agllashpami paicunata tucui shunguhuan juyashcata ricuchishca. Apóstol Pabloca chai punllapi ungidocunamanda parlashpami nirca, ‘Cristohuanmi jahua pachapi tiarirca’ nishpa (Efes. 2:6). Shinapash ungidocuna cai Alpapi cajpillataca ¿imamandata apóstol Pabloca shina nirca? Ungidocuna jahua pachaman rishpa chaipi para siempre causana esperanzata charijpimi shina nirca (Efes. 1:13, 14; Col. 1:5).

¹⁵ Cutin, ashtaca gentecunaca Jesús paipa causaita cushcapi feta charimandami Jehovaman quimirishpa, shuj juyailla paraíso Alpagupi para siempre causana esperanzata charin. Ashtahuangarin, paicunapashmi shamuj punllacunapica Jehová Diospa huahuacuna tucuita ushanga. Imashinami ricunchi Jehová Diosca paipa Churipa causaita cushpami ñucanchicunata ninanda juyashcata ricuchin (Juan 3:16). Cai Alpapi causana esperanzata charishpa, Jehovata tucuipi cazushpaca, shuj juyailla paraíso Alpagupimi cushijushpa para siempre causai ushapangui. Shinaca ¿nachu Jehová Diosca ninanda ñucanchitaca juyashca?

16. Jehová Dios ñucanchita juyashcata yarinaca ¿imamandata ali can?

¹⁶ Jehová Diosca gentecunata juyashcataca cutin cutinmi ricuchishca. Chaimandami rey Davidca nirca: ‘Taita Dioslla, canba jatun yuyaica juyaillagupachami. Na yachai ushanalla jatun yuyaicunatamari charingui. Chaicunata ñuca cuentangapaj munashpaca arena alpatashnami na cuentai ushani’ nishpa (Sal. 139:17, 18). Jehová Dios ñucanchita juyashcata yarishpaca, ashtahuan Jehovata juyashpami paita ashtahuan sirvingapaj munashun.

17, 18. Jehová Diosta juyashcataca ¿imashinata ricuchi ushapanchi?

¹⁷ ¿Imashinata ñucanchicunapash Jehová Diosta juyashcata ricuchi ushapanchi? Cushijushpami ali villaicunata villachina canchi. Shinami Jehová Diostapash gentecunatapash juyashcata ricuchishun (Mat. 24:14; 28:19, 20). Llaquicunapi cashpapash Jehovata tucuipi cazushpaca Jehovata juyashcatami ricuchishun (Salmo 84:11; Santiago 1:2-5, liingui). Jatun llaquicunapi cashpa ñucanchicuna imashina sintirijujtaca Jehová Diosca alimi yachan. Ashtahuangarin, chashna llaqui punllacunapimi Jehová Diosca ñucanchita juyashcata ricuchishpa ayudan (Sal. 56:8).

¹⁸ Cai temapi yachajushca shinaca, Jehovata juyashcata ricuchingapaca paipa rurashcacunapi, ñucanchicuna cushilla causachun imatalla Jehová rurashcapimi pensarina canchi. Shinallata, Bibliata yachajushpa catingapami esforzarina canchi. Oracionda ruranatapash na cunganachu canchi. Jesús paipa causaita cushcamanda ñucanchi juchacunata Jehová Dios perdonajtapash agradicishpami yarina canchi (1 Juan 2:1, 2). Tucui chaicunapi pensarishpami, Jehová Dios ñucanchita juyashcata tucui shunguhuan crishpa paitapash tucui shunguhuan juyashun.