1, 2. (a) Aiseā ua e mautinoa ai e alofa Ieova i ona tagata? (e) O le ā le manaʻoga o loo iai i tagata ina ua foafoaina?

AISEĀ e te mautinoa ai e alofa Ieova i ona tagata? A o e leʻi taliina lenā fesili, seʻi mafaufau i faaaʻoaʻoga nei: Sa faalaeiauina ma le agalelei e uso talitonu i le tele o tausaga se tuafafine e igoa iā Taylene ina ia faaalia le paleni, ma aua le soona faatalitalia ni mea se tele mai iā te ia. Na ia faapea mai: “E lē aumaia pea e Ieova fautuaga, pe ana ia lē alofa iā te aʻu.” Sa tausia toʻatasi e Brigitte lana fanau e toʻalua ina ua maliu lana tane, na ia faapea mai: “O le tausia o fanau i le faiga o mea a Satani o se tasi o luʻi e sili ona faigatā, aemaise lava mo mātua nofo toʻatasi. Peitaʻi, ua ou talitonu i le alofa o Ieova i lana taʻitaʻiga i mea na ou mafatia ma tigā ai, e na te leʻi tuua aʻu i tofotofoga e lē mafai ona ou lavātia.” (1 Kori. 10:13) O loo mafatia Sandra i se gasegase e lē mafai ona togafitia. I se tauaofiaga, na faaalia i ai le naunau moni o le avā a se uso e iloa e le toʻatele. Ua faapea mai le tane a Sandra: “E ui e ma te lē masani lelei iā te ia, ae o lona manatu mamafa mai na pāʻia ai o maʻua loto. E tusa pe e faaalia mai e uso ma tuafāfine lo latou alolofa i se auala faatauvaa, ae ua atagia mai ai le alofa o Ieova iā i maʻua.”

 ² Na foafoaina le tagata ma le manaʻoga ina ia faaalia le alofa i isi, ma ia alofagia e isi. E faigofie ona tatou lotovaivai pe a lē faamalieina lenā faalogona ona o mea e tutupu faafuaseʻi, o maʻi o le tino, o faigatā tau tamaoaiga ma le leai o ni iʻuga lelei i le faiva. Pe a amata ona tatou manatu ua lē o toe alofa mai Ieova, e tatau ona tatou manatua e tāua i tatou iā te ia, o loo ia ʻuuina o tatou lima taumatau’ ma fesoasoani mai. E na te lē faagaloina i tatou pe a tatou faamaoni iā te ia.—Isa. 41:13; 49:15.

3. O le ā e fesoasoani e faamalosia ai lo tatou mautinoa, e lē mavae le alofa o Ieova mai iā i tatou?

³ Na mautinoa e i latou na taʻua muamua le faatasi o Ieova ma i latou i le taimi na feagai ai ma tulaga faigatā. E mafai foʻi ona tatou mautinoa o loo faatasi Ieova ma i tatou. (Sala. 118:6, 7) O le a uaʻi atu lenei mataupu i auala ua faamaonia mai ai le alofa o Ieova e ala mai (1) i ana foafoaga, (2) lana Afioga faagaeeina, (3) tatalo, ma le (4) le togiola. O le manatunatu loloto i mea lelei ua faia e Ieova, e tatou te matuā talisapaia ai lona alofa e lē mavae.—Faitau le Salamo 77:11, 12.

4. O le ā e tatou te aʻoaʻoina mai i foafoaga a Ieova?

⁴ Pe e mafai ona mātauina le alofa e lē mavae o Ieova e ala i mea na ia foafoaina? O le tulaga moni lenā, auā o ana foafoaga ua atagia mai ai lona alofa. (Roma 1:20) Na foafoaina e Ieova le lalolagi i se auala e mafai ona tatou ola ma fiafia ai. Peitaʻi, e finagalo o ia e tatou te faia isi mea e maua ai le fiafia. E manaʻomia ona tatou aai ina ia ola ai. Ua faamautinoa e Ieova e mafai ona maua pea i le lalolagi le anoanoaʻi o laau eseese, ia e mafai ona saunia ai meaʻai matagofie. Ua faamalieina e Ieova la tatou tofo i meaʻai matagofie! (Fai. 9:7) Ua faaalia e le tuafafine o Catherine lona fiafia i le mātauina o le foafoaga, aemaise lava le tau e totogo ai mea i Kanata. Ua ia faapea mai: “E mataʻina le auala e ola ai le tele o mea, e pei o le fuga mai o laau ma le toe foʻi mai o manufelelei, lea e aofia ai le tūtū mai o se hummingbird i fafo atu o le faamalama o laʻu umukuka. E naunau Ieova e foaʻi mai mea e tatou te olioli ai.” E fiafia lo tatou Tamā alofa o Ieova i ana galuega o le foafoaga, ma e finagalo o ia ina ia tatou maua ai foʻi le fiafia.—Galu. 14:16, 17.

5. Ua faapefea ona iloa le alofa o Ieova i le auala na ia foafoaina ai le tagata?

⁵ Na foafoaina e Ieova i tatou ma le tomai e faia ai galuega aogā ma maua ai le fiafia. (Fai. 2:24) O lona finagalo ia faatumulia le lalolagi i tagata ma ia galueaʻiina, ia pule i iʻa o le sami, o manufelelei, ma isi meafaiola. (Kene. 1:26-28) Ua foafoaina foʻi e Ieova i tatou ma uiga matagofie e mafai ona tatou faaaʻoaʻo ai iā te ia.—Efe. 5:1.

6. Aiseā e tatau ai ona tatou matuā talisapaia le Afioga a le Atua?

⁶ O le alofa tele o le Atua iā i tatou ua ia foaʻiina mai ai le Tusi Paia. Ua faailoa mai ai mea e faatatau iā te ia, faapea ana feutagaʻiga ma tagata. O se faaaʻoaʻoga, ua faailoa mai i le Tusi Paia le auala sa feutagaʻi ai Ieova ma Isaraelu, lea sa masani ona lē usiusitaʻi iā te ia. Ua faapea mai le Salamo 78:38: “Sa alofa mutimutivale o ia; na ia faamagalo i mea sesē ma e na te leʻi faaumatia foʻi i latou. Na ia liliueseina lona toʻasā i le tele o taimi, ma e na te leʻi faatupu  foʻi lona toʻatamaʻi tele.” O le manatunatu i lenā fuaiupu e ono fesoasoani iā te oe e talisapaia ai le auala ua alofa ma tausia ai oe e Ieova. Ia e mautinoa e manatu mamafa mai Ieova iā te oe.—Faitau le 1 Peteru 5:6, 7.

7. Aiseā e tatau ai ona tatou matuā faatāuaina le Tusi Paia?

⁷ E tatau ona tatou matuā faatāuaina le Tusi Paia, auā o le auala autū lea ua fesootaʻi mai ai le Atua iā i tatou. Pe a lelei fesootaʻiga i le va o mātua ma fanau, e mafai ona faamalosia ai le alofa ma le faatuatuaina e le tasi o le isi. O le ā e tatou te faatalitalia mai iā Ieova? E ui lava e tatou te leʻi vāai iā te ia pe faalogo i lona siʻufofoga, ae o loo ia talanoa mai e ala i lana Afioga faagaeeina, ma e manaʻomia ona tatou faalogo i ai. (Isa. 30:20, 21) E finagalo Ieova e taʻitaʻia i tatou o ona tagata, ma puipuia i tatou mai i mea e lamatia ai. E finagalo foʻi Ieova e tatou te iloa ma faatuatuaina o ia.—Faitau le Salamo 19:7-11; Faataoto 1:33.

8, 9. O le ā e finagalo Ieova e tatou te iloa? Aumai se faaaʻoaʻoga faale-Tusi Paia.

⁸ E finagalo Ieova e tatou te iloa e alofa mai iā i tatou ma e lē taulaʻi mai i o tatou tulaga lē lelei atoatoa. E saʻilia e Ieova ni mea lelei o loo iā i tatou. (2 No. 16:9) O se faaaʻoaʻoga, o le mea lenā sa faia e Ieova iā Iosefatu le tupu o Iuta. Na faia e Iosefatu se filifiliga lē atamai e aufaatasi atu iā Aapo le tupu o Isaraelu e siitaua atu i tagata Suria ina ia toe faoa mai Ramota-kiliata. E ui e 400 perofeta pepelo na latou  faamautinoa atu o le a taulau manuia le tupu leaga o Aapo, ae na valoia mai e Mekaio le perofeta a Ieova o le a toʻilalo Aapo. Na fasiotia Aapo i le taua, ae na toeitiiti lava a lē sao mai ai Iosefatu. I le taimi na ia toe foʻi ai i Ierusalema, na aʻoaʻia Iosefatu ona o lona aufaatasi atu iā Aapo. E ui i lea, na faapea atu Ieu le atalii o Hanani o lē e faamatalaina faaaliga iā Iosefatu: “Ua maua mea lelei iā te oe.”—2 No. 18:4, 5, 18-22, 33, 34; 19:1-3.

⁹ I le amataga o le pulega a Iosefatu, na ia faatonuina ai aloalii, o sā Levī ma ositaulaga ina ia ō atu i aai uma o Iuta e aʻoaʻo ona tagatānuu i le Tulafono a Ieova. Na taulau manuia a latou taumafaiga, auā na amata foʻi ona matataʻu tagata o isi nuu iā Ieova. (2 No. 17:3-10) Sa faia e Iosefatu se gaoioiga sesē, peitaʻi e leʻi faagaloina e Ieova ana galuega lelei. O lenei tala faale-Tusi Paia ua faamanatu mai ai e ui i o tatou tulaga lē lelei atoatoa, ae e lē mavae le alofa o Ieova mai iā i tatou pe a tatou saʻili ma le lotoatoa e faafiafia o ia.

10, 11. (a) Aiseā ua avea ai le tatalo o se sauniuniga faapitoa mai iā Ieova? (e) E ono faapefea ona tali mai le Atua i a tatou tatalo? (Tagaʻi i le ata i luga aʻe o le matua.)

¹⁰ E faaalu e se tamā alofa le taimi e faalogologo ai i lana fanau pe a talanoa atu iā te ia. E manaʻo o ia e iloa mea o loo popole ma atugalu ai lana fanau, ona e tāua iā te ia o latou manatu. E faafofoga mai foʻi Ieova lo tatou Tamā i le lagi, pe a tatou talanoa atu iā te ia i le faaeaga tautele o le tatalo.

¹¹ E mafai ona tatou talanoa iā Ieova i le tatalo i so o se taimi. O ia o la tatou Uō, ma e faafofoga mai o ia i a tatou tatalo. Ua faapea mai Taylene lea na taʻua muamua: “E mafai ona tatou talanoa atu iā te ia i so o se mea.” Pe a tatou faailoa atu i le Atua o tatou faalogona loloto e ala i le tatalo, e mafai ona ia tali mai e ala i se mau o le Tusi Paia, mataupu i se mekasini, po o ni faalaeiauga mai i se uso talitonu. E faafofoga mai Ieova i a tatou talosaga, ma malamalama i o tatou faalogona, e tusa pe e leai se tasi e malamalama iā i tatou. O lana tali mai i a tatou tatalo, o se faailoaga matagofie lenā o lona alofa e lē mavae mo i tatou.

12. Aiseā e tatau ai ona tatou iloiloina tatalo o loo i le Tusi Paia? Aumai se faataʻitaʻiga.

¹² E tele lesona tāua e tatou te aʻoaʻoina mai i tatalo o loo i le Tusi Paia. O lea, e tāua tele ona tatou iloiloina na tatalo i taimi o tapuaʻiga a le aiga. O le manatunatu loloto i le auala na faailoa atu ai iā Ieova faalogona loloto o ana auauna, e mafai ona faaleleia ai a tatou tatalo. O se faaaʻoaʻoga, ia manatunatu i le tatalo na faaalia ai le salamō o Iona mai i le manava o se iʻa telē. (Iona 1:17–2:10) Ia manatunatu i le tatalo mai i le loto a Solomona ina ua tuuina atu le malumalu. (1 Tu. 8:22-53) Ia manatunatu loloto foʻi i le tatalo faaaʻoaʻo lea na faia e Iesu mo lo tatou lelei. (Mata. 6:9-13) Ae sili atu i lenā, ia lē aunoa ona “faailoa atu o outou manaʻoga i mea uma lava i le Atua.” O le iʻuga, ona “leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai.” O le faia faapea, o le a faalolotoina ai lo tatou talisapaia o le alofa e lē mavae o Ieova.—Fili. 4:6, 7.

13. O le ā le avanoa ua maua e tagata ona o le sauniuniga alofa o le togiola?

¹³ O le meaalofa foaʻifua a Iesu o le togiola ua mafai ona “tatou maua ai le ola.” (1 Ioa. 4:9) O lenei faailoaga sili o le alofa o le Atua na tusi ai Paulo: ʻNa maliu Keriso  i le taimi atofaina mo tagata lē amioatua. E toetoe ina a lē mafai ona oti o se tagata e sui aʻi se tasi e amiotonu; ae atonu e lototele se tasi e oti mo se tagata lelei. A ua faaali mai e le Atua lona lava alofa iā i tatou, auā na maliu Keriso mo i tatou a o tatou agasala pea.’ (Roma 5:6-8) O lenei faailoaga silisili o le alofa o le Atua ua tatala atu ai i tagata le avanoa e maua ai se tulaga lelei i luma o Ieova.

14, 15. O le ā le uiga o le togiola mo (a) Kerisiano faauuina? (e) i latou e faamoemoe e ola i le lalolagi?

¹⁴ E iai se vaega toʻaitiiti o Kerisiano ua latou tofo i le alofa e lē mavae o Ieova i se auala faapitoa. (Ioa. 1:12, 13; 3:5-7) O le faauuina o i latou i le agaga paia, ua avea ai i latou ma “fanau a le Atua.” (Roma 8:15, 16) Na faamatalaina e Paulo Kerisiano faauuina o ē ua ʻfaaeaina ma faanonofo faatasi i mea o i le lagi e autasi ma Keriso Iesu.’ (Efe. 2:6) Ua latou maua lenei tulaga faaleagaga ona ua ʻfaamaufaailogaina e ala i le agaga paia lea na folafolaina mai, o le faamaoniga lea na tuuina mai muamua o lo tatou tofi,’ o le ʻfaamoemoe ua teuina mo i latou i le lagi.’—Efe. 1:13, 14; Kolo. 1:5.

¹⁵ O le toʻatele o tagata ua faaalia le faatuatua i le togiola ua mafai ona avea i latou ma uō a Ieova. O le a latou maua le faamoemoe e avea ai ma fanau a le Atua, ma ola e faavavau i le lalolagi Parataiso. O lea, ua faaalia mai le alofa o le Atua i tagata e ala mai i le togiola. (Ioa. 3:16) Pe afai o lo tatou faamoemoe o le ola e faavavau i le lalolagi ma faaauau ona tatou auauna ma le faamaoni iā Ieova, e mautinoa o le a ia foaʻi mai se olaga faamalieina mo i tatou i le lalolagi fou. Maʻeu le talafeagai ona tatou faapea atu o le togiola o le faailoaga silisili lea o le alofa o le Atua mo i tatou!

16. O le ā se aafiaga iā i tatou o le manatunatu i le alofa o Ieova?

¹⁶ E lē mafaitaulia le tele o auala ua faaalia mai ai le alofa o Ieova mo i tatou. Na pese le faisalamo o Tavita: “Maʻeu lava le tāua o ou manatu iā te aʻu! Le Atua e, ua matuā sili lava ona tele o lo latou faitau aofaʻi! Afai ou te taumafai e faitauina, ua sili atu ona tele nai lo o le oneone.” (Sala. 139:17, 18) Ia avea na manatu e faamalosia ai lo tatou alofa loloto mo Ieova, ona o lana tausiga iā i tatou. O lea, seʻi o tatou avatu pea mea silisili mo Ieova.

17, 18. O ā nisi auala e faailoa atu ai lo tatou alolofa mo le Atua?

¹⁷ E anoanoaʻi auala e faailoa atu ai lo tatou alolofa mo Ieova. O se faaaʻoaʻoga, e faailoa atu lo tatou alolofa mo Ieova ma tuaoi e ala i le maelega i le galuega talaʻi o le Malo. (Mata. 24:14; 28:19, 20) E faaalia foʻi lo tatou alolofa moni iā Ieova e ala i le tutumau faamaoni pe a feagai ma tofotofoga o le faatuatua. (Faitau le Salamo 84:11; Iakopo 1:2-5.) Pe a faateteleina luʻi e tatou te fesagaʻia, ia tatou mautinoa e silafia e le Atua o tatou mafatiaga ma o le a ia fesoasoani mai, auā e tāua i tatou iā te ia.—Sala. 56:8.

¹⁸ O lo tatou alolofa mo Ieova o le a uunaʻia ai i tatou e manatunatu i ana foafoaga ma isi galuega ofoofogia. E faaalia lo tatou alolofa i le Atua ma faatāua lana Afioga tusia, e ala i le suʻesuʻe loloto i ai. O le alofa mo Ieova o le a tatou tosina atu ai iā te ia i le tatalo. E faalolotoina foʻi lo tatou alolofa mo Ieova e ala i le manatunatu i le taulaga togiola na ia saunia mo a tatou agasala. (1 Ioa. 2:1, 2) O nisi na o māfuaaga e tatau ai ona tatou tali atu i le alofa e lē mavae o le Atua mo i tatou.