1, 2. (a) Nkaambo nzi ncomusinizyide kuti Jehova ulabayanda bantu bakwe? (b) Ino bantu boonse bakalengwa munzila yakuti kabayandika nzi?

NKAAMBO nzi ncomusinizyide kuti Jehova ulabayanda bantu bakwe? Kamutanaingula mubuzyo ooyu, amulange-lange zikozyanyo eezyi: Kwamyaka minji, basyominyina bakali kumukulwaizya mucizyi uutegwa Taylene kuti kazilanga bweelede zintu alimwi akutalibikkila mbaakani nzyatakonzyi kuzuzikizya. Mucizyi ooyu wakaamba kuti: “Ikuti Jehova naatakali kundiyanda, naatakazumanana kundipa lulayo lwakwe.” Ba Brigitte, ibakakomezya bana bobilo kabali balikke ciindi balumi babo nobakafwa, bakaamba kuti: “Kukomezya bana mubweeende oobu bwa Saatani ncintu cimwi cikatazya kapati, kwaambisya kumuzyali uuli alikke. Pele ndilisinizyide kuti Jehova ulandiyanda nkaambo wandisololela muziindi zyamause amuziindi zikatazya, alimwi taakwe nandilekela kunjila mumasunko ngonditakonzyi kuliyumya.” (1Kor. 10:13) Ba Sandra baciswa bulwazi butasilikiki. Kumuswaangano wacooko umwi, bakabikkilwa maano amukaintu wamukwesu umwi uuzyibidwe kapati. Balumi baba Sandra bakati: “Nokuba kuti mucizyi ooyu tiitwakalimuzyi, ikubikkila maano kwakwe kwakatukkomanisya kapati. Notuba tuntu tusyoonto-syoonto ntobacita bakwesu abacizyi kutondezya luyando, tulanditondezya mboluli lupati luyando Jehova ndwajisi kulindiswe.”

 ² Bantu bakalengwa munzila yakuti kabatondezya luyando alimwi akuti kabatondezyegwa luyando. Ncuuba-uba kumuntu kutyompwa ikuti naa eeci tiicazuzikizyigwa akaambo kazintu zicitika cakutayeeyelwa naa zintu zityompya, kuciswa, kubula mali, naa kutazwidilila mumulimo wamumuunda. Ikuti naa twatalika kulimvwa kuti Jehova tacituyandi, inga twacita kabotu kuyeeya kuti tulayandika kapati kulinguwe alimwi akuti nkwali lyoonse, ‘katujatide kujanza lyakwe lyalulyo’ alimwi akutugwasya. Takatulubi ikuti naa katusyomeka kulinguwe.—Is. 41:13; 49:15.

3. Ncinzi cikonzya kutugwasya kuzyiba kuti luyando lwa Jehova kulindiswe talumani?

³ Bantu ibaambwa musyule oomu bakalisinizyide kuti Leza wakali ambabo muziindi zikatazya. Andiswe tulakonzya kuba alusyomo lwakuti uli kulubazu lwesu. (Int. 118:6, 7) Mucibalo eeci tulabandika zipego zyone izisinizya kuti Leza ulatuyanda. Zipego eezyi zibikkilizya (1) zintu nzyaakalenga, (2) Ijwi lyakwe lyakasololelwa amuuya, (3) mupailo, alimwi (4) acinunuzyo. Kuzinzibala kuyeeya zintu zibotu Jehova nzyaacita cakutadooneka kuyooyungizya kulumba kwesu kuluyando lwakwe lutamani.—Amubale Intembauzyo 77:11, 12.

4. Ino kuzinzibala kuyeeya zintu nzyaakalenga Jehova kuyubununa nzi? (Amubone cifwanikiso icili kumatalikilo aacibalo.)

⁴ Sena inga twalubona luyando lwa Jehova lutamani ndwajisi kulindiswe muzintu nzyaakalenga? Inzya, nkaambo mulimo wakulenga kuugama cakali citondezyo caluyando lwa Leza. (Rom. 1:20) Wakalenga nyika azintu izili mumo munzila yakuti katukonzya kupona kabotu-kabotu mulinjiyo alimwi akukkomana mubuumi. Pele, tayandi kuti katupona buyo anyika pe. Tuyandika kulya kutegwa tuzumanane kupona. Jehova wakabona ncobeni kuti nyika ilakonzya kuzyala zisyango ziindene-indene izikonzya kubambwa kacili cakulya cijisi busani. Kuyungizya waawo, wakatulenga munzila yakuti kulya kakukondelezya! (Muk. 9:7) Mucizyi uutegwa Catherine ulakkomana kapati kweebelela zilenge, kwaambisya ciindi camwaka eelyo zisyango nozitalika kufwulula mucisi ca Canada. Mucizyi ooyu ulaamba: “Masimpe cilagambya kubona zintu zyoonse mbozitalika alimwi kucita kabotu—maluba-luba aatalika kumena alimwi abayuni ibapiluka kuzwa kumasena aakulamfwu nkobakabede, kubikkilizya akayuni kasyoonto kategwa syaamaluba naa kansyoma ikaboola mucisekwe icili anze awindo lyamu nkicini yangu. Jehova weelede kuti ulatuyanda naakatupa zintu zinji boobu zikkomanisya.” Taateesu wakujulu siluyando ulazikkomanina zintu nzyaakalenga, alimwi uyanda kuti andiswe kazitukkomanisya.—Mil. 14:16, 17.

5. Mbuti luyando lwa Jehova mbolulibonya munzila bantu mbobakalengwa?

⁵ Jehova wakatulenga katujisi nguzu zyakubeleka milimo iigwasya alimwi iikkomanisya eeyo iiyungizya lukkomano mubuumi bwesu. (Muk. 2:24) Makanze aakwe akali aakuti bantu bazuzye nyika, akuyeendelezya, akweendelezya nswi, bayuni, alimwi azilenge zimbi zipona. (Matl. 1:26-28) Eelo kaka Jehova wakatondezya luyando kulindiswe kwiinda mukutulenga abube ibutupa kuti cikonzyeke kumwiiya!—Ef. 5:1.

6. Nkaambo nzi ncotweelede kulibikkila maano kapati Jwi lya Leza?

⁶ Jehova wakatondezya luyando kapati kwiinda mukutupa Jwi lyakwe ilyakasololelwa amuuya. Lilaamba nzyotweelede kuzyiba kujatikizya nguwe alimwi ambwabeendelezya bantu. Mucikozyanyo, Magwalo alatwaambila mbwaakabeendelezya bana Israyeli, aabo kanji-kanji ibakali kumuzangila. Lugwalo lwa Intembauzyo 78:38 lwaamba kuti:  “Wakali kubafwida luse; wakali kubalekelela milandu yabo akutabanyonyoona. Ziindi zinji wakali kulilesya kunyema muciindi cakubusya bukali bwakwe boonse.” Kuluyeeyesya lugwalo oolu kulakonzya kumugwasya lwanu kulumba munzila iigaminide kuti Jehova ulamuyanda akumubikkila maano. Amube alusyomo lwakuti mulayandika kuli Jehova.—Amubale 1 Petro 5:6, 7.

7. Nkaambo nzi ncotweelede kulikkomanina kapati Ibbaibbele?

⁷ Tweelede kulikkomanina kapati Bbaibbele akaambo kakuti Leza ndyabelesya kapati kubandika andiswe. Ikubandika cakulikwaya alimwi calubomba akati kabazyali abana babo kulayandika kapati kutegwa kabasyomana alimwi akuyandana. Ino ncinzi ncotukonzya kulangila kuli Jehova? Nokuba kuti tatunamubwene naa kumvwa jwi lyakwe, Leza “ulaambaula” andiswe kwiinda mu Jwi lyakwe ilyakasololelwa amuuya, alimwi tweelede kuswiilila. (Is. 30:20, 21) Jehova uyanda kutusololela, swebo tobantu bakwe ibalyaabide, alimwi akutukwabilila kuntenda. Alimwi uyanda kuti tumuzyibe akusyoma mulinguwe.—Amubale Intembauzyo 19:7-11; Tusimpi 1:33.

8, 9. Ncinzi Jehova ncayanda kuti tuzyibe? Amupandulule kwiinda mukubelesya cikozyanyo camu Bbaibbele.

⁸ Ncayanda Jehova kuti tuzyibe kujatikizya nguwe ncakuti ulatuyanda alimwi akuti talangi buyo aatumpenda twesu. Ulalangaula bubotu mulindiswe. (2Mak. 16:9) Mucikozyanyo, wakacita oobu mumakani aakali kujatikizya Mwami Jehosafati waku Juda. Aciindi cimwi, Jehosafati wakacita cintu citali kabotu kwiinda mukuzumina kusangana a Mwami Ahabu wa Israyeli kuunka kunkondo kutegwa bapilusye Ramoti-gileadi kuzwa kubana Siriya. Nokuba kuti basinsimi bakubeja bali 400 bakasyomezya Ahabu  mubyaabi kuti wakali kuyoozwidilila, musinsimi wa Jehova wakasimpe Mikaya wakasinsima cakusinizya kuti Ahabu wakali kuyoozundwa. Ahabu wakajaigwa munkondo, eelyo Jehosafati kwakasyeede aniini kuti ajaigwe. Naakajoka ku Jerusalemu, wakasinswa akaambo kakugwasya Ahabu munkondo. Nokuba kuti cakali boobo, Jehu mwana wa Hanani sizilengaano, wakaambila Jehosafati kuti: “Kuli bubotu bwajanwa mulinduwe.”—2Mak. 18:4, 5, 18-22, 33, 34; 19:1-3.

⁹ Kumatalikilo aabulelo bwakwe, Jehosafati wakalailila basilutwe, ba Levi, alimwi abapaizi kuti baunke muminzi yoonse ya Juda kutegwa bakayiisye bantu bakwe Mulawo wa Jehova. Mulimo ooyu wakazwidilila kapati cakuti bantu ibakali mumasi aakazingulukide bakatalika kuyoowa Jehova. (2Mak. 17:3-10) Nokuba kuti Jehosafati wakacita cintu cabufwubafwuba, Jehova taakwe naakaziluba zintu zibotu nzyaakacitide musyule. Cibalo eeci camu Bbaibbele cituyeezya kuti nokuba kuti tatulondokede, Jehova uyootondezya luyando lutamani kulindiswe ikuti naa twasolekesya kumukkomanisya camoyo woonse.

10, 11. (a) Nkaambo nzi mupailo ncoweelede kubonwa kuti mbubambe bulibedelede kuzwa kuli Jehova? (b) Mbuti Leza mbwakonzya kwiingula mipailo yesu?

¹⁰ Usyi siluyando ulabikkila maano kuswiilila ciindi bana bakwe nobayanda kubandika anguwe. Uyanda kuzyiba zintu nzyobalibilika akaambo kakuti ulabikkila maano kuzintu zili mumyoyo yabo. Taateesu uuli kujulu, Jehova, ulatuswiilila ciindi notumusikila kwiinda mukubelesya coolwe cilibedelede camupailo.

¹¹ Tulakonzya kupaila kuli Jehova kufwumbwa ciindi. Leza kunyina naakatubikkila ziindi buya notweelede kupaila kulinguwe. Mulongwe wesu uulibambilide lyoonse kutuswiilila. Mucizyi Taylene, iwazubululwa kumatalikilo wakati: “Mulakonzya kumwaambila cintu cili coonse alimwi akumwaambila zintu zyoonse.” Ciindi notwaambila Leza zili mumoyo kwiinda mumupailo, ulakonzya kutwiingula kwiinda mucibalo camu Bbaibbele, cibalo cimwi mumagazini, naa kwiinda mumajwi aakulwaizya kuzwa kumusyomima. Jehova ulakumvwa kulomba kwesu alimwi ulatumvwisya noliba leelyo nokunyina muntu uucita boobo. Bwiinguzi bwakwe kumipailo yesu mbumboni bubotu kapati ibutondezya luyando lwakwe lutamani kulindiswe.

12. Nkaambo nzi ncotweelede kwiibikkila maano mipailo iilembedwe mu Bbaibbele? Amupe cikozyanyo.

¹² Tulakonzya kwiiya zinji kumipailo iilembedwe mu Jwi lya Leza. Aboobo, zimwi ziindi cilakonzya kugwasya kulanga-langa mipailo iili boobo ciindi cakukomba mumukwasyi. Kuzinzibala kuyeeya babelesi ba Jehova bakaindi mbobakaamba zyakali kumoyo kuli Leza kulakonzya kutugwasya kuti katupaila kabotu. Mucikozyanyo, amulange-lange mupailo wa Jona uutondezya kuusa ciindi naakali mwida lyamuswi mupati. (Jon. 1:17–2:10) Amulange-lange mupailo wa Solomoni ngwaakapaila kuli Jehova kuzwa ansi amoyo ciindi tempele nolyakali kwaabwa. (1Bam. 8:22-53) Amuzinzibale kuyeeya mupailo wacikozyanyo ooyo ngwaakapaila Jesu kutegwa tugwasyigwe. (Mt. 6:9-13) Kwiinda zyoonse, lyoonse “amumuzyibye Leza nzyomulomba.” Kuti mwacita oobu, “luumuno lwa Leza oolo lwiinda maano oonse luyookwabilila myoyo yanu amizeezo yanu.” Kulumba kwesu kuluyando lwa Jehova lutamani kuyooyungizyika.—Flp. 4:6, 7.

13. Ncoolwe nzi ncobajisi bantu akaambo kabubambe bwaluyando bwacinunuzyo?

¹³ Cipego caluzyalo lwa Leza cacituuzyo cacinunuzyo ca Jesu cakapegwa kutegwa “tukonzye kuba abuumi.” (1Joh. 4:9) Kaamba kujatikizya citondezyo eeci ciinda  kubota caluyando lwa Leza, mwaapostolo Paulo wakalemba kuti: “Kristo wakafwida basizibi aciindi cibikkidwe. Nkaambo nciyumu kuti muntu umwi alisungule kufwida mululami; pele kujatikizya muntu mubotu ambweni umwi inga walisungula buya kumufwida. Pele Leza watutondezya luyando lwakwe mwini mukuti notwakacili basizibi, Kristo wakatufwida.” (Rom. 5:6-8) Citondezyo eeci ciinda kubota caluyando lwa Leza cakajalula nzila kubantu kuti babe abulangizi bwakuba acilongwe cibotu a Jehova.

14, 15. Ino cinunuzyo caamba nzi (a) ku Banakristo bananike? (b) kuli baabo bajisi bulangizi bwakuyoopona aanyika?

¹⁴ Kuli bantu basyoonto ibajatikizyidwe aluyando lwa Jehova lutamani munzila iilibedelede. (Joh. 1:12, 13; 3:5-7) Mbwaanga bakananikwa amuuya uusalala, bakaba “bana ba Leza.” (Rom. 8:15, 16) Paulo wakapandulula Banakristo bananike kuti ‘bakabusyigwa antoomwe anguwe akukkazikwa antoomwe anguwe mumasena aakujulu kabakamantene a Kristo Jesu.’ (Ef. 2:6) Bali mubukkale oobu bwakumuuya akaambo kakuti ‘bakabikkwa ciganto amuuya uusalala, walo uuli ncisinizyo cakuti bayoopegwa lukono lwabo kumbele,’ nkokuti, ‘bulangizi mbobabambilidwe kumbele.’—Ef. 1:13, 14; Kol. 1:5.

¹⁵ Kubantu banji ibatondezya lusyomo mucinunuzyo, coolwe nkocili cakuba balongwe ba Jehova alimwi abulangizi bwakuba bana ba Leza akupona kukabe kutamani mu Paradaiso anyika. Aboobo kwiinda mucinunuzyo, Jehova ulatondezya luyando lwakwe kubantu boonse bamunyika. (Joh. 3:16) Ikuti naa katujisi bulangizi bwakupona kukabe kutamani anyika alimwi ikuti twazumanana kumubelekela Jehova cakusyomeka, tulakonzya kuba alusyomo lwakuti uyootupa buumi bukkomanisya munyika mpya. Eelo kaka cileelela kuti katubona cinunuzyo kuba bumboni butalikomeneni bwaluyando lwa Leza lutamani kulindiswe!

16. Ino citugwasya buti kuzinzibala kuyeeya nzila zinji Jehova nzyatondezya luyando lwakwe?

¹⁶ Tacikonzyeki kuzibala nzila ziindene-indene Jehova mbwatondezya luyando lwakwe lutamani kulindiswe. Sintembauzyo Davida wakaimba kuti: “Mizeezo yako mibotu kapati kulindime! O Leza, mweelwe wanjiyo mupati kapati! Ikuti ndasola kwiibala, minji kapati kwiinda musenga.” (Int. 139:17, 18) Tweelede kulekela mizeezo eeyi kutupa kuba aluyandisisyo lwakumuyanda kapati Jehova akaambo kakutulanganya cakubikkila maano. Aboobo, ziyume zitete, atumupe zintu ziinda kubota.

17, 18. Ino ninzila nzi zimwi mbotukonzya kutondezya luyando lwesu kuli Leza?

¹⁷ Kuli nzila zinji mbotukonzya kutondezya luyando lwesu kuli Jehova. Mucikozyanyo, tulatondezya luyando lwesu kuli Leza alimwi akuli basimukoboma kwiinda mukutola lubazu cabusungu mumulimo wakukambauka Bwami. (Mt. 24:14; 28:19, 20) Tulatondezya kuti tulamuyanda ncobeni Jehova kwiinda mukuliyumya cakusyomeka kuzintu zisunka lusyomo lwesu. (Amubale Intembauzyo 84:11; Jakobo 1:2-5.) Ikuti naa masunko ngotulwana akomena, tulakonzya kuba masimpe kuti Leza ulaazyi mapenzi eesu alimwi uyootugwasya, nkaambo tulayandika kapati kulinguwe.—Int. 56:8.

¹⁸ Luyando ndotujisi kuli Jehova lutukulwaizya kuzinzibala kuyeeya zintu nzyaakalenga alimwi amilimo iimbi mibotu kapati. Tulatondezya kuti tulamuyanda Leza alimwi akulikkomanina kapati Jwi lyakwe kwiinda mukuliiya Bbaibbele cakulomya. Kuyanda Jehova kutupa kuzumanana kuswena kulinguwe mumupailo. Alimwi luyando ndotujisi kuli Leza lulakomena ciindi notuzumanana kuzinzibala kuyeeya cituuzyo cacinunuzyo ncaakatupa akaambo kazibi zyesu. (1Joh. 2:1, 2) Ootu ntwaambo buyo tumwi akati katwaambo tunji itutupa kumuyanda Jehova akaambo kaluyando lwakwe lutamani kulindiswe.