1, 2. (a) Kaia e talitonu ei koe me i a Ieova e alofa ki ana tino? (e) Se a te pogai ne faite ei a tino?

KAIA e talitonu ei koe me i a Ieova e alofa ki ana tino? A koi tuai o tali ne koe te fesili tenā, mafaufau ki fakaakoakoga konei: I se fia o tausaga, ne fakamalosi atu a taina tali‵tonu mo te atafai ki te tuagane ko Taylene ke maua ne ia se kilokiloga paleni kae ke mo a e fakamoemoe ki mea kolā e se mafai ne ia o fai. Ne fai mai tou fafine: “Moi ne se alofa mai a Ieova, penei e se tuku mai faeloa ne ia a pati fakatonutonu.” Ne fai mai a Brigitte, telā ne puti tokotasi aka ne ia ana tama‵liki tokolua i te taimi ne mate atu ei tena avaga: “A te putiakaga o tama‵liki i te lalolagi a Satani ko te ‵toe mea faigata eiloa maise loa mō se mātua. Kae e loto talitonu au ki te alofa o Ieova me ne takitaki ne ia au i taimi o puapuaga mo te loto māfatia, kae sē talia ne ia ke fakafesagai au ki se mea telā e sili atu i te mea e mafai o kufaki ne au.” (1 Koli. 10:13) Ne pokotia a Sandra i se masaki telā e seai se faka‵leiga ki ei. I se fono o te atufenua, ne fakaasi atu ne te avaga a se taina telā e iloa ‵lei ne tino, a te fiafia tonu ki tou fafine. “E tiga eiloa e se iloa ‵lei ne au a ia,” ko muna a te avaga a Sandra, “kae ne fai ne tena saga tonu mai ke maua ne māua te fiafia lasi. A te fakaasiga foliki o te alofa mai taina mo tuagane e fakaasi mai ei ki au a te lasi o te alofa o Ieova ki a māua.”

 ² Ne faite eiloa a tino mo te manakoga ke fakaasi atu te alofa kae ke alofagina foki latou. Se mea faigofie ke loto vāi‵vai māfai e se taunu te manakoga tenei ona ko mea kolā ne ‵tupu kae seki fakamoemoegina, loto māfatia, fakamasakisaki, fakalavelave i mea tau tupe, mo te seai ne ikuga ‵lei mai i te galuega talai. Kafai e kamata o mafau‵fau tatou me i a Ieova ko se alofa mai ki a tatou, e ‵tau o masaua ne tatou me e fakatāua ne ia tatou kae e toka a ia o “fakamalosi” kae fesoasoani mai ki a tatou. Ka se mafai o fakapuli ne ia tatou māfai e tumau i te fakamaoni ki a ia.—Isa. 41:13; 49:15.

3. Se a te mea e mafai o fesoasoani mai ke fakamalosi aka ‵tou loto tali‵tonu ki te alofa tumau o Ieova mō tatou?

³ Ne mautinoa eiloa i a latou kolā ne taku atu muamua me i te Atua ne fakatasi atu ki a latou i taimi faiga‵ta. E mafai foki o maua ne tatou a te loto talitonu me e ‵kau fakatasi mai a ia. (Sala. 118:6, 7) E fakasino atu eiloa te mataupu tenei ki te auala e lavea ei te alofa o te Atua i ana (1) galuega fakaofoofogia, (2) tena Muna fakaosofia, (3) ‵talo, mo te (4) te togiola. A te mafaufau ‵loto ki mea ‵gali ne fai ne Ieova ka fai ei ke momea aka ‵tou loto fakafetai mō tena alofa tumau.—Faitau te Salamo 77:11, 12.

4. Se a te mea e tauloto ne tatou mai te mafaufau ‵loto ki galuega fakaofoofogia a Ieova? (Ke onoono ki te ata i te kamataga.)

⁴ E mata, e mafai o lavea ne tatou te alofa tumau o Ieova i ana mea ne faite? Ao e mafai, me i mea katoa kolā ne faite se fakaasiga o te alofa o te Atua. (Loma 1:20) Ne faite ne ia te lalolagi mo mea ola katoa i ana tafa ke mafai ei o ola fia‵fia tatou. Kae e se gata fua i te ola o tatou i ei, e manako a ia ke uke atu a mea e fai ne tatou. E ‵tau mo tatou o ‵kai ke tumau i te ola. Ne faite ne Ieova te lalolagi ke ‵fonu i vaegā lakau kaina kese‵kese ke fakaaoga ne tatou mo ‵tou ‵kai. Ne fai foki ne ia a te kai e pelā me se mea fakafiafia kae fakamalie loto! (Fai. 9:7) Ne maua eiloa ne te tuagane ko Catherine a te fiafia lasi mai te kilo atu ki mea a te Atua ne faite, maise loa i tau o aso kolā e ‵somo aka ei a lau o lakau i Canada. E fai mai a ia: “E fakaofoofogia eiloa te auala ne faite ei a mea ola katoa—ko te taimi e ‵pula mai ei a pulalakau mo manu eva kolā ko ‵foki mai i te fanauga i fenua ‵mao, e aofia ei a tamā manu eva kolā e au‵mai ki te koga e ‵kai ei latou mai tua o te famalama o toku umu kuka. E mautinoa eiloa me e alofa mai a Ieova ona ko mea kolā e tuku mai ne ia ke fia‵fia ei tatou.” E fiafia eiloa te ‵tou Tamana alofa i te lagi i ana galuega fakaofoofogia, kae e manako a ia ke fia‵fia foki tatou ki mea konā.—Galu. 14:16, 17.

5. E lavea pefea te alofa o Ieova i te auala ne faite ei a tino?

⁵ Ne faite ne Ieova tatou mo te atamai ke fai a galuega e uke kae aoga kolā e mafai o fakaopoopo mai ki te ‵tou fia‵fia i te olaga. (Fai. 2:24) Ko tena fuafuaga ke faka‵fonu ne tino a te lalolagi, ke ‵nofo i ei, kae ke pule atu ki luga i ika, manu eva, mo nisi mea ola katoa. (Kene. 1:26-28) Kae ko oko loa i te alofa o Ieova ke tuku mai ne ia ki a tatou a uiga ‵gali ke mafai o fakaakoako atu ki a ia!—Efe. 5:1.

6. Kaia e ‵tau ei o loto fakafetai tatou ki te Muna a te Atua?

⁶ Ne fakaasi mai ne te Atua te alofa sili i te tukumaiga o tena Muna fakaosofia. E aofia i ei a mea kolā e ‵tau o iloa ne tatou e uiga ki a ia mo ana faifaiga ki tino. E pelā me se fakaakoakoga, e fakaasi mai i te Tusi Tapu ana faifaiga ki te kau Isalaelu, kolā ne seki faka‵logo faeloa ki a ia. E fai mai te Salamo 78:38, penei: “Ne fakamagalo ne ia olotou agasala, kae ne seki fakamalaia foki ne ia latou. E uke taimi ne kufaki ne ia tena  kaitaua, kae kolomaki foki ne ia tena ita.” A te mafaufau ‵loto ki te fuaiupu tenā e mafai o fesoasoani atu ki a koe ke loto fakafetai ki te auala e alofa kae tausi ne Ieova a koe. Ke loto talitonu me e tāua eiloa koe ki a Ieova.—Faitau te 1 Petelu 5:6, 7.

7. Kaia e ‵tau ei o fakatāua malosi ne tatou a te Tusi Tapu?

⁷ E ‵tau o fakatāua malosi ne tatou te Tusi Tapu me tenā eiloa te auala e fesokotaki mai ei te Atua ki a tatou. A sau‵talaga aoga kae atafai i va o mātua mo tama‵liki se mea tāua ke ati aka i ei te loto talitonu mo lagonaga a‵lofa i a latou. Se a te mea e fakamoe‵moe tatou e uiga ki a Ieova? E tiga eiloa e seki lavea ne tatou a ia io me lagona tena leo, e “faipati” mai a ia ki a tatou e auala i tena Muna fakaosofia, kae e ‵tau mo tatou o faka‵logo ki ei. (Isa. 30:20, 21) E manako a Ieova o takitaki tatou, ana tino tukugina atu, kae puipui tatou mai mea fakama‵taku. E manako foki ke iloa ne tatou a ia kae tali‵tonu foki ki ei.—Faitau te Salamo 19:7-11; Faataoto 1:33.

8, 9. Se a te mea e manako a Ieova ke iloa ne tatou? Ke taku mai se fakaakoakoga i te Tusi Tapu.

⁸ E manako a Ieova ke iloa ne tatou a ia e pelā me se tino e alofa, kae e se onoono mai faeloa a ia ki mea ‵se e fai ne tatou. E salasala ne ia a mea ‵lei i a tatou. (2 Nofo. 16:9) E pelā me se fakaakoakoga, ne fai ne Ieova te mea tenā ki te tupu o Iuta ko Iosefatu. I se taimi e tasi, ne fai ne Iosefatu se filifiliga ‵se ke kau atu ki te tupu o Isalaelu ko Aapo ke taua atu ki te fa‵kai o Lamota i Kileata mai Sulia. E tiga eiloa ne fakatalitonu atu a pelofeta ‵se e toko 400 ki te tupu masei ko Aapo me ka manumalo a ia, ne ‵valo atu ne  te pelofeta a Ieova ko Mikaio me ka takavale a ia i te taua. Ne mate eiloa a Aapo i te taua, kae toeititi ko galo atu foki te ola o Iosefatu. I te ‵toe fokiatuga ki Ielusalema, ne polopoloki a Iosefatu ona ko tena ‵lago atu ki a Aapo. Kae e ui i ei, ne fai atu a Ieu, te tama tagata a Hanani ki a Iosefatu, penei: “E isi eiloa se ‵lei i a koe.”—2 Nofo. 18:4, 5, 18-22, 33, 34; 19:1-3.

⁹ I te kamataga o tena pulega, ne fakatonu atu a Iosefatau ki ofisa, tino Levi, mo faitaulaga ke faima‵laga atu ki fa‵kai katoa o Iuta o akoako atu ana tino ki Tulafono a Ieova. Ne magoi te galuega me i nisi tino mai fenua kolā i feitu o Iuta ne kamata o ma‵taku ki a Ieova. (2 Nofo. 17:3-10) E tonu, e tiga eiloa ne fai ne Iosefatu se mea valea, kae ko Ieova ne seki faka‵kivi ana mata ki mea ‵lei ne fai ne tou tagata. E tuku mai ne te tala tenei se fakamasauaga me faitalia ‵tou tulaga sē ‵lei katoatoa, ka fakaasi mai eiloa ne Ieova te alofa tumau māfai e taumafai malosi tatou mo te loto kātoa o fakafiafia a ia.

10, 11. (a) Kaia e ‵kilo atu ei tatou ki te ‵talo e pelā me se fakatokaga fakapito mai i a Ieova? (e) I auala fea e tali mai ei te Atua ki ‵tou ‵talo?

¹⁰ E fakaaoga ne se tamana alofa ana taimi ke fakalogologo ki ana tama‵liki māfai e fia fai‵pati atu ki a ia. E manako a ia ke iloa a manakoga mo mea e manava‵se ki ei latou ona ko tena atafai. E penā foki ‵tou Tamana faka-te-lagi ko Ieova, e fakalogologo mai eiloa māfai e olo atu tatou ki a ia e auala i ‵talo, se tauliaga tāua eiloa.

¹¹ E mafai o ‵talo atu tatou ki a Ieova i so se taimi. A ia ko ‵tou Taugasoa telā e toka faeloa o fakalogologo mai ki ‵tou ‵talo, kae seai se tapula ki te mafai ne tatou o ‵talo atu ki a ia. Ne fai mai a Taylene telā ne taku atu muamua, penei: “E mafai ne koe o taku atu a mea katoa ki a ia.” Kafai e fakaasi atu ‵tou mafaufauga ‵loto ki te Atua e auala i se ‵talo, e mafai o tali mai a ia e auala i se tusi siki i te Tusi Tapu, se mataupu i ‵tou mekesini, io me ne pati fakamalosi mai se taina talitonu. E lagona ne Ieova ‵tou fakatagi kae malamalama a ia i a tatou faitalia me e seai se tino e fai pelā mo ia. A te tali mai o ia ki ‵tou ‵talo se fakaasiga gali o tena alofa tumau mō tatou.

12. Kaia e ‵tau ei o suke‵suke tatou ki ‵talo kolā ne fakamau i te Tusi Tapu? Taku mai se fakaakoakoga.

¹² E uke a mea e mafai o tauloto ne tatou mai i ‵talo kolā ne fakamau ki lalo i te Muna a te Atua. I nisi taimi, se mea aoga ke sau‵tala ki ‵talo konā i te tapuakiga a te kāiga. A te fakaataata ne tatou a te auala ne fakaasi mai ne tavini a Ieova i aso mua a olotou mafaufauga ‵loto ki te Atua e mafai o fesoasoani mai ke momea aka te ‵lei o ‵tou ‵talo. E pelā me se fakaakoakoga, mafaufau la ki te ‵talo a Iona mō se fakamagaloga mai te tinae o se ika lasi. (Iona 1:17–2:10) Ke sukesuke ki te ‵talo fakaotia loto a Solomona ki a Ieova i te fakaulufalega o te faletapu. (1 Tupu 8:22-53) Ke mafaufau ‵loto ki te ‵talo fakaakoako telā ne tuku mai ne Iesu. (Mata. 6:9-13) A ko te ‵toe mea tāua, “ke tuku atu a mea katoa kolā e ma‵nako koutou ki ei ki te Atua.” Me e mafai o iku atu ki te “filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo otou mafaufau.” A te ‵tou loto fakafetai ki te alofa tumau o Ieova ka gasolo aka loa o lasi.—Fili. 4:6, 7. 

13. Se a te avanoaga e ‵tala mai ki tino ona ko te fakatokaga alofa o te togiola?

¹³ Ne tuku mai eiloa te meaalofa faivasaga ko te taulaga togiola a Iesu ko te mea ke “mafai o maua ne tatou te ola.” (1 Ioa. 4:9) Mai te fakasino atu ki te fakaasiga sē fuafuagina tenei o te alofa o te Atua, ne tusi mai te apositolo ko Paulo: “Ne mate a Keliso mō tino sē amioatua i te taimi tonu, a  koi vāi‵vai ei tatou. Me e faigata o mate se tino mō se tino amiotonu; kae kāti e mafai fua o mafaufau se tino ke mate a ia mō se tagata ‵lei. Kae ne fakaasi mai ne te Atua tena alofa ki a tatou i te taimi koi agasala ei tatou, me ne mate a Keliso mō tatou.” (Loma 5:6-8) Ne ‵tala mai ne te fakaasiga sili tenei o te alofa o te Atua a te fakamoemoega ke maua ne tino te taliaga a Ieova.

14, 15. Se a te uiga o te togiola mō (a) te kau fakaekegina? (e) latou kolā e fakamoe‵moe ke ola i te lalolagi?

¹⁴ Ko oti ne lagona ne nisi tino a te alofa tumau o Ieova mō latou i se auala fakapito. (Ioa. 1:12, 13; 3:5-7) I te otiga ne fakaeke ki te agaga tapu, ne fai ei latou mo “fanau a te Atua.” (Loma 8:15, 16) Ne fakamatala ne Paulo a Kelisiano fakaekegina e pelā me ne ‘avaka ki luga kae fakasaga‵saga fakatasi i te lagi i te ‵kau fakatasi mo Keliso Iesu.’ (Efe. 2:6) Ne maua ne latou a te tulaga faka-te-agaga tenei, me ‘ne fakamailogagina foki latou ki te agaga tapu telā ne folafola mai e auala i a ia, ko te fakamautinoaga telā ko leva ne fai mai e uiga ki te lotou tofi,’ ko te ‘fakamoemoega telā e tausi mō latou i te lagi.’—Efe. 1:13, 14; Ko. 1:5.

¹⁵ Mō te tokoukega o tino kolā e fakatuanaki ki te togiola, e ‵tala atu eiloa ki a latou te auala ke fai mo taugasoa o Ieova fakatasi mo te fakamoemoega ke fai mo tama puke a te Atua kae ola ki te se-gata-mai i te lalolagi Palataiso. Tela la, e auala i te togiola, e fakaasi mai ne Ieova tena alofa mō tino katoa i te lalolagi. (Ioa. 3:16) Kafai e fakamoe‵moe tatou ke ola ki te se-gata-mai i te lalolagi kae tumau i te tavini atu mo te fakamaoni ki a Ieova, e mafai o tali‵tonu tatou me ka fai ne ia ke fia‵fia tatou i te olaga i te lalolagi fou. Ko oko eiloa i te ‵lei ke ‵kilo atu tatou ki te togiola e pelā me se fakamaoniga sili o te alofa tumau o te Atua mō tatou!

16. Ne a mea ka fai ne tatou mai tua o te mafaufau ‵loto ki auala e uke ne fakaasi mai ei ne Ieova tena alofa mō tatou?

¹⁶ E se mafai ne tatou o lau a auala e uke ne fakaasi mai ei te alofa tumau o Ieova mō tatou. Ne usu mai te faisalamo ko Tavita, penei: “E faigata mo au o malamalama i ou mafaufauga; me e se mafai o lau! Kafai e lau ne au, e uke atu i one.” (Sala. 139:17, 18) E ‵tau o talia ne tatou a mafaufauga konei ke fakamalosi i loto i a tatou se manakoga ke fakaasi atu te ‵poko o ‵tou a‵lofa ki a Ieova ona ko tena alofa atafai mō tatou. Tela la, mai mea katoa, ke na tuku atu ‵tou toe mea ‵lei ki a ia.

17, 18. Ne a nisi auala e mafai o fakaasi atu ei te ‵tou a‵lofa ki te Atua?

¹⁷ E uke ‵ki a auala ke fakaasi atu ‵tou a‵lofa mō Ieova. E pelā me se fakaakoakoga, e fakaasi atu ne tatou te alofa ki te Atua mo tuakoi mai te aofia mo te loto finafinau i te talaiga o te Malo. (Mata. 24:14; 28:19, 20) E fakaasi atu ne tatou a te alofa tonu ki a Ieova mai te kufaki i tofotofoga o te fakatuanaki e pelā me ne tino fakamaoni. (Faitau te Salamo 84:11; Iakopo 1:2-5.) Kafai ko faigata ‵ki a fakalavelave e fe‵paki mo tatou, e mautinoa i a tatou me e iloa ne te Atua ‵tou logo‵maega kae ka fesoasoani mai ki a tatou, me e tāua tatou ki a ia.—Sala. 56:8.

¹⁸ A te alofa ki a Ieova e fakamalosi ne ia tatou ke mafaufau ‵loto ki ana galuega fakaofoofogia mo ana nisi uiga ‵gali. E fakaasi atu ne tatou te alofa ki te Atua kae fakatāua malosi tena Muna mai te sukesuke faka‵lei ki ei. A te alofa ki te Atua e fai ei ke fakapili‵pili atu tatou ki a ia i ‵talo. Kae ka gasolo aka eiloa o ‵poko te ‵tou a‵lofa ki te Atua i te taimi e mafaufau ‵loto ei tatou ki te taulaga togiola telā ne fakatoka ne ia mō ‵tou agasala. (1 Ioa. 2:1, 2) Konei a nisi pogai mai pogai e uke e a‵lofa ei tatou ki a Ieova telā ne fakaasi mai ne ia te alofa tumau mō tatou.