1, 2. (a) Aha do ulahononmuna dung dipatupa Paradeiso? (Ida gombar di mula ni parsiajaran.) (b) Boasa hita marlas ni roha di tano na imbaru?

MAIMAIMA do hita tu ”hangoluan salelengna.” Didok si Paulus do on ”ngolu na tutu.” (Jaha 1 Timoteus 6:12, 19.) Boi ma hita mangolu salelengna di Paradeiso di tano on. Tahilala ma molo ganup manogot, dungo hita, las rohanta jala sehat pangkilalaanta. (Jesaya 35:5, 6) Rap ma hita dohot keluarga, alealenta, dohot angka naung dipahehe. (Johannes 5:28, 29; Ulaon 24:15) Marsiajar ma hita muse mangulahon ulaon na baru gabe las ma rohanta. Umpamana, taparsiajari ma sains, angka alat musik manang pajongjongkon jabunta sandiri.

² Alai na rumingkot, manomba Jahowa do na mambahen hita marlas ni roha situtu. Sude jolma pabadiahon goar ni Jahowa, jala Debata mamarenta nasida. (Mateus 6:9, 10) Las ma rohanta mangida tano on digohi halak na tipak, songon na dihalomohon ni Debata. Jala  lam solhot ma paralealeonta tu Jahowa ala lam tipak hita ganup ari!—Psalmen 73:28; Jakobus 4:8.

3. Boasa ingkon taparade dirinta saonari?

³ Pos do rohanta bahenon ni Jahowa do angka ulaon na palongang roha, ala ”saluhut do tarpatupasa.” (Mateus 19:25, 26) Molo lomo rohanta mangolu salelenglelengna di tano na imbaru, saonari ma tingkina laho maniop hangoluan salelengna. Ala nunga jonok ari ni Jahowa, tapatudu ma na maimaima do hita di ari i. Taulahon ma saonari sude na mambahen hita rade mangolu di tano na imbaru. Taida ma isara mangulahon i.

4. Songon dia do hita asa rade mangolu di tano na imbaru? Bahen ma sada tudosan.

⁴ Songon dia do hita asa rade mangolu di tano na imbaru? Molo naeng maringanan hita di sada negara, taparade ma dirinta asa boi tading disi. Umpamana, taparsiajari ma hata, hasomalan dohot sipanganon ni nasida. Suang songon i ma, taparade ma dirinta saonari asa boi mangolu di tano na imbaru. Taida ma isara mangulahon on.

5, 6. Molo taoloi tudutudu sian organisasi ni Jahowa saonari, songon dia do on mangurupi hita rade mangolu di tano na imbaru?

⁵ Lomo do roha ni Sibolis nasa jolma mangulahon lomo ni rohana sandiri. Godang do na manuntun lomo jala ndang mangoloi Debata. Aha do pangkorhon ni i? Parungkilon dohot arsak ni roha. (Jeremia 10:23) Alai, Panggomgomi na parholong do Jahowa. Denggan situtu ma ngolunta di tano na imbaru tingki ganup halak mangoloi Ibana!

⁶ Di tano na imbaru, las rohanta mangihuthon tudutudu sian organisasi ni Jahowa. Songon, mambahen tano on gabe paradeiso, mangurupi dohot mangajari jolma na dipahehe. Lehonon ni Jahowa ma godang ulaon tu hita. Alai saonari, songon dia do molo angka sintua mangalehon ulaon na so lomo rohanta? Taoloi do? Tabahen do na dumenggan laho mangulahon i? Asa rade hita mangolu di tano na imbaru, ingkon taoloi do tudutudu sian organisasi ni Jahowa saonari.

7, 8. (a) Boasa ingkon masiurupan hita dohot angka sintua? (b) Songon dia do pangkilalaan ni halak Kristen molo muba ulaonna? (c) Parange sisongon dia do na ingkon tapatudu di tano na imbaru?

⁷ Asa rade mangolu di tano na imbaru, ingkon marsiajar do asa marsada jala masiurupan dohot na asing di organisasi ni Jahowa. Umpamana, molo dilehon ulaon na baru, las ma rohanta mangulahon i jala tabahen ma na dumenggan. Molo masiurupan hita dohot angka sintua saonari, di tano na imbaru pe songon i ma hita. (Jaha Heber 13:17.) Tingki halak Israel bongot tu Tano Kanaan, dibagi do tano laho inganan ni nasida. (4 Musa 26:52-56; Josua 14:1, 2) Ndang taboto didia hita maringanan di tano na imbaru. Alai, molo nunga somal hita marsada ni roha dohot sintua, rade ma hita  mangoloi dohot mangulahon lomo ni roha ni Jahowa didia pe hita maringanan.

⁸ Hak na sumurung do manomba Jahowa di tano na imbaru! Alani i, las ma rohanta mangulahon ulaon na dilehon ni organisasi ni Jahowa tu hita. Di sada tingki olo do muba ulaonta. Umpamana, pigapiga anggota Betel di Amerika Serikat ditugashon gabe perintis. Pigapiga sintua kaliling gabe perintis istimewa alani situasi. Las do roha ni nasida mangulahon i, gabe dipasupasu Jahowa ma nasida. Tapangido ma pangurupion sian Jahowa, asa marsitutu manomba Ibana jala mangulahon sude na dilehon tu hita. On mambahen las rohanta, jala dipasupasu Jahowa ma hita. (Jaha Poda 10:22.) Songon dia do molo di tano na imbaru, lomo rohanta tading di sada inganan, alai dipangido organisasi ni Jahowa hita asa tading di inganan na asing? Di tingki i, manang didia pe hita maringanan jala aha na taulahon, mandok mauliate ma hita ala boi mangolu di tano na imbaru.—Nehemia 8:10.

9, 10. (a) Boasa ingkon taputudu roha na sabar di tano na imbaru? (b) Songon dia do hita patuduhon roha na sabar saonari?

⁹ Hita porlu marroha na sabar di tano na imbaru. Umpamana, olo do ra mansai las roha ni halak ala naung hehe sisolhot dohot alealena. Hape hita paimahon dope laho dipahehe halak na tahaholongi. Molo i do na masa, sabar do hita paimahon laho dipahehe halak na tahaholongi? Manang rap marlas ni roha do hita dohot nasida manang marsak do rohanta? (Rom 12:15) Molo sabar do rohanta paimahon Jahowa pasauthon janjiNa saonari, boi ma sabar rohanta haduan.—Parjamita 7:8.

¹⁰ Hita boi paradehon diri tu tano na imbaru molo rade rohanta mangulahon pangantusion na imbaru sian Bibel. Nang pe ndang tangkas taantusi, taparsiajari jala taulahon do pangantusion na baru i? Molo taulahon do i saonari, gabe sabar ma hita tingki dipaboa Jahowa ulaon na baru di Paradeiso.—Poda 4:18; Johannes 16:12.

11. Boasa ingkon tasalpuhon hasalaan ni halak saonari?

¹¹ Isara na asing asa rade hita mangolu di tano na imbaru, i ma marsiajar manalpuhon hasalaan ni dongan. Ala, di Pamarentaon Saribu Taon do boi tipak jolma. (Ulaon 24:15) Olo do hita patuduhon holong ni roha jala manalpuhon hasalaan ni na asing? Molo olo hita manalpuhon hasalaan ni halak jala maraleale tu nasida saonari, mura ma taulahon i annon di tano na imbaru.—Jaha Kolosse 3:12-14.

12. Boasa ingkon taparade dirinta saonari laho mangolu di tano na imbaru?

¹² Ndang sai hatop dapotta na tahalomohon di tano na imbaru. Alani i, ingkon tongtong do hita mandok mauliate jala marsada manang aha pe na masa. Saonari pe, ingkon tapatudu do parange sisongon on. On  patuduhon na lomo do rohanta jala patar do di hita hangoluan salelenglelengna. (Heber 2:5; 11:1) Las situtu do rohanta mangolu rap dohot halak na mangoloi Jahowa.

13. Aha do na rumingkot di ngolunta di tano na imbaru?

¹³ Di tano na imbaru, dapotta ma sude na tahaporluhon asa boi martua ngolunta. Alai, las ni rohanta na umbalga, i ma maraleale tu Jahowa. (Mateus 5:3) Godang na boi taulahon laho manomba Jahowa huhut marlas ni roha. (Psalmen 37:4) Molo Jahowa na rumingkot di ngolunta saonari, on patuduhon na taparade do dirinta laho mangolu di tano na imbaru.—Jaha Mateus 6:19-21.

14. Ulaon partondion aha do na boi diulahon angka na poso?

¹⁴ Songon dia do asa tamba hiras ni rohanta marhobas tu Jahowa? Sada isara, i ma mangeahi ulaon di partondion. Molo hamu sahalak na poso, bagas ma pingkiri hamu laho mangalehon diri manomba Jahowa. Olo do hamu manulingkiti sian angka bukunta taringot ragam ni ulaon di partondion? Boi ma ulahononmu sada sian i. * Mangkatai ma hamu dohot sahalak naung leleng mangulahon ulaon di partondion. Molo dipangke hamu ngolumuna laho manomba Jahowa, dapotmuna ma pangajarion na arga. Ulaon on mangurupi hamu manomba Jahowa di tano na imbaru.

15. Aha do ulaon di partondion na boi taulahon?

¹⁵ Godang do ulaon di partondion na boi taulahon. Umpamana, boi do taparsiajari isara na baru laho marbarita. Manang marsiajar ma hita asa lam mangantusi angka prinsip ni Bibel jala mangulahon i di ngolunta. Tabahen ma lam denggan panjahaion Bibelta, jamita dohot alusta di parpunguan. Alai on do na rumingkot: Molo diulahon hamu ulaon di partondion, lam hiras ma rohamuna jala rade mangolu di tano na imbaru.

16. Boasa manomba Jahowa ulaon na dumenggan saonari?

¹⁶ Marisuang do tingki molo talehon dirinta laho manomba Jahowa saonari? Daong! Manomba Jahowa do ulaon na dumenggan di parngoluonta saonari. Ndang ala na disuru halak manang asa malua hita sian hasusaan bolon umbahen tasomba Debata. Molo maraleale hita tu Jahowa, lam denggan jala lam martua ma ngolunta. I do umbahen ditompa Debata hita. Ndang adong na dumenggan sian na dihaholongi Debata jala mangihuthon tudutuduNa. (Jaha Psalmen 63:2-4.) Tahilala ma las ni roha ala manomba Jahowa sian nasa rohanta. Pigapiga halak naung leleng manomba Jahowa, mandok on ma ulaon na dumenggan saonari.—Psalmen 1:1-3; Jesaya 58:13, 14.

17. Sadia ringkot do mangalehon tingki laho marsonangsonang di Paradeiso?

¹⁷ Di Paradeiso, boi ma tapangke tingki laho marsonangsonang. Dihalomohon Jahowa do asa martua hita, jala marjanji do Ibana laho ”pasombu lomo ni roha ni nasa na mangolu.” (Psalmen 145:16; Parjamita 2:24) Porlu do hita marsonangsonang, alai maraleale tu Jahowa do na rumingkot di ngolunta saonari on. Songon i ma di tano na imbaru haduan. Alani i, denggan do molo sai jumolo talului ”harajaon ni Debata” jala sai manatap pasupasu na laho jaloonta haduan ala manomba Jahowa.—Mateus 6:33.

18. Songon dia do hita patuduhon na rade hita mangolu di Paradeiso?

¹⁸ Di tano na imbaru, denggan situtu ma parngoluonta. Molo taparade dirinta saonari laho mangkilala ”ngolu na tutu”, on patuduhon na marsitutu do hita mangolu di tano na imbaru. Tapatudu ma parange na diajarhon ni Jahowa tu hita, jala hiras ma rohanta marbarita na uli. Manomba Jahowa ma na rumingkot di ngolunta saonari. Pos ma rohanta pasauton ni Jahowa do sude janjiNa taringot tano na imbaru. Alani i, tapatudu ma na rade do hita mangolu disi!