1, 2. (a) Met ka mwétéresiti lón ewe Paratis? (Ppii ewe sasing lepoputáán ei lesen.) (b) Lap seni meinisin, met epwe atoto ngenikich pwapwa lón Paratis?

 SIA fókkun ápilúkúlúkú ewe “manau esemüch.” Ewe aposel Paulus a pwal apasa pwe ina ewe “enletin manau.” (Álleani 1 Timoty 6:12, 19.) Ren lap ngenikich, sia eáni ápilúkúlúkún kúna ena manaw esemuch lón ewe Paratis wóón fénúfan. A weires ach sipwe anchangei ach sipwe neló iteiten lesossor nge sia meefi péchékkúl, pwapwa, me menemenéch. (Ais. 35:5, 6) Ekieki usun apwapwaan óm kopwe tongeni kukkunou ren óm famili me chienom kewe, kapachelong chókkewe repwe manawsefál. (Joh. 5:28, 29; Föf. 24:15) Epwe wor óm fansoun le káé mineféén angang me sipeéchúló le féri ekkewe mettóch ka pwapwaiti. Áwewe chék, ka tongeni alapaaló sileom lón pekin science. Are ka tongeni káé ettikin ekkóch pisekin nikáttik, are óm kopwe anapanapa pwisin imwom.

² Ikaamwo ka ápilúkúlúkú meinisin ekkena mettóch mi múrinné, nge óm fel ngeni Jiowa, ina met epwe atoto ngonuk pwapwa wachemwuk lap seni meinisin. Anchangei ika epwe ifa usun manawach lupwen aramas meinisin repwe epinaaló iten Jiowa we me etiwa i pwe ar Sou Nemenem. (Mat. 6:9, 10) Sipwe mwasangasang le kúna ei fénúfan an epwe uroló ren aramas mi  unuséch, usun met Kot a fen tipeni. Me anchangei ika epwe ifa me mecheresin ach sipwe apéchékkúlaló ach riri ngeni Jiowa lupwen ekis me ekis sia unuséchúló!​—Kölf. 73:28; Jas. 4:8.

3. Met a lamot ach sipwe ammólnatá iei fán itan?

³ Sipwe lúkúlúk pwe Jiowa epwe féri meinisin ekkeei mettóch mi amwarar pún “mettoch meinisin ra tufich ngeni.” (Mat. 19:25, 26) Ika sia mochen sipwe kúna manaw esemuch lón Paratis, iei ewe atun sipwe “amwochu o manaueni” ewe enletin manaw. (1 Tim. 6:19, Testament Mi Fö) Sia silei pwe ewe sópwólóón a arapoto, ina popun mi lamot sipwe manaweni ewe sókkun manaw mi pwáraatá pwe sia wesewesen lúkú pwe ena sópwólóón epwe tongeni war lón chék eú ekkeei rán. Mi lamot sipwe achocho úkúkún ach tufich iei le ammólnatá fán iten ewe manaw lón Paratis. Sipwe ppii ifa usun sipwe féri ena.

4. Ifa usun sia tongeni ammólnatá iei fán iten ewe manaw lón Paratis? Áweweei.

⁴ Ifa usun sia tongeni ammólnatá iei fán iten ewe manaw lón Paratis? Ika sia ekiekin ló ngeni pwal eú fénú me nónnóm lón, neman sipwe féri mettóch pwe sipwe ammólnatá ngeni ewe manaw lón ena fénú. Áwewe chék, sia tongeni poputá le káé fósun ena fénú me eérenian. Sia tongeni sótuni ekkóch ener kewe mwéngé. Pwal ina chék usun, sia tongeni ammólnatá iei fán iten ewe manaw lón Paratis ren ach achocho le manaweni manawach usun nge sia fen nónnóm lón. Sipwe ppii ekkóch mettóch sia tongeni féri.

5, 6. Ifa usun ach achocho le eérenaaló le álleasochisi emmwenien án Jiowa we mwicheich epwe álisikich le ammólnatá fán iten ewe manaw lón Paratis?

⁵ Lón ei fénúfan, Satan a mochen án aramas repwe ekieki pwe ra tongeni féri met chék ra mochen. Chómmóng ra meefi pwe ese pwal lamot ar repwe álleasochisi Kot, me a éch ar repwe chék pwisin nemeni manawer. Met mwirilóón ena ekiek? A fis watteen riáfféú me letipechou. (Jer. 10:23) Nge Jiowa, i ewe Sou Nemenem mi tong. Epwele ifa me échún manawach lón Paratis lupwen aramas meinisin repwe álleasochisi i!

⁶ Lón ewe ótót sefé, sipwe pwapwaiti le álleasochisi emmwenien án Jiowa we mwicheich me álisi ewe angangen ewilaaló ei fénúfan ngeni eú paratis mi ling me ewe angangen asukula chókkewe ra fen manawsefál. Epwe wor chómmóng ach angang seni Jiowa. Nge met ika ekkewe chón emmwenikich ra tingorekich ach sipwe féri och angang sise kon lien sani? Sipwe álleasochisi? Sipwe achocho úkúkún ach tufich le apwénúetá me pwapwaiti ach angang? Ren ach sipwe ammólnatá fán iten ewe manaw esemuch lón Paratis, mi lamot iei sipwe álleasochisi emmwenien án Jiowa we mwicheich.

7, 8. (a) Pwata sipwe onómukich fán emmwenien chókkewe ra wisen emmwenikich iei me angangfengen me iir? (b) Met sókkun siwil ekkóch Chón Kraist ra kúna? (c) Met sia tongeni fókkun lúkúlúk wóón lón ewe Paratis?

⁷ Ika sia mochen mmólnetá fán iten ewe manaw lón Paratis, mi lamot sipwe káé ifa usun sipwe menemenéch me angangfengen me án Jiowa we mwicheich me pwal lefinach. Áwewe chék, lupwen sia angei eú mineféén angang, sipwe tipemecheres le etiwa, achocho úkúkún ach tufich le apwénúetá me pwal mwo nge pwapwaiti. Ika sia káé le onómukich fán emmwenien chókkewe ra wisen emmwenikich iei me angangfengen me iir, iwe ese mwáál sipwe pwal ina usun lón Paratis. (Álleani Ipru 13:17.) Lupwen ekkewe chón Israel ra tolong lón ewe  Fénúen Pwon, ra angei en me inetin fénú. (Num. 26:52-56; Jos. 14:1, 2) Sise silei ika menni kinikinin fénú lón Paratis epwe einet ngenikich pwe sipwe nóm ie. Nge ika sipwe káé iei ach sipwe tipemecheres le álleasochis, sipwe chék pwapwa le féri letipen Jiowa ese lifilifil ia sia nónnóm ie.

⁸ Anchangei watteen feiéchúch ach sipwe angang ngeni Kot lón Paratis fán nemenien an we Mwú! Ren ei popun, sia pwapwa le álleasochisi án Jiowa we mwicheich iei me féri met chék a ewisa ngenikich ach sipwe féri. Nge, fán ekkóch, a tongeni siwil ach angang. Áwewe chék, ewe mwicheich a ewisa ngeni ekkóch chón Bethel lón Merika ar repwe fitisefáli ewe angangen pioneer. Me ekkóch chónemmwen mi wisen sáifetál, pokiten ra chichchinnapeló are ren pwal ekkóch popun, iwe iei ra fiti angangen special pioneer. Ra pwapwaiti ar kana mineféén wis, me Jiowa a ekkefeiéchúúr. Ika sia tingor án Jiowa álillis, achocho úkúkún ach tufich le angang ngeni, me káé ach sipwe menemenéch ren ese lifilifil angang sia eáni, iwe sipwe pwapwa, me Jiowa epwe efeiéchúkich. (Álleani Än Salomon Fos 10:22.) Met ika lón Paratis, mi wor eú leeni sia mochen nóm lón nge án Jiowa we mwicheich a erenikich ach sipwe mwékút ngeni pwal eú? Lón ena atun, esap pwal lifilifil ia sipwe nónnóm ie are met sókkun angang sipwe eáni, nge sipwe chék kilisou ren ach sia nónnóm lón Paratis.​—Ne. 8:10.

9, 10. (a) Pwata eli epwe lamot ach sipwe mosonottam lón Paratis? (b) Ifa usun sipwe pwáraatá mosonottam iei?

⁹ Lón ewe Paratis, eli fán ekkóch epwe lamot ach sipwe mosonottam. Áwewe chék, eli sipwe rongorong án ekkóch aramas fókkun meseik pún aramaser me chiener kewe ra fen manawsefál. Iwe nge, eli a lamot ach sipwe witiwiti án attongeach kewe repwe manawsefál. Ika a fis ena, sipwe eti án ekkewe ekkóch pwapwa me sipwe mosonottam? (Rom 12:15) Ika sia káé iei ach sipwe witiwit fán mosonottam ngeni pwénútáán án Jiowa kewe pwon, epwe álisikich ach sipwe pwáraatá mosonottam lón ena Paratis.​—SalAf. 7:8.

¹⁰ Sia pwal tongeni ammólnatá ngeni ewe Paratis ren ach mosonottam lupwen sia angei ekkóch ekkesiwil lón ach weweiti ewe pwóróus mi enlet lón Paipel. Sia kan káé ena mineféén pwóróus me pwáraatá mosonottam ika sise kon lien weweiti? Ika sia ina usun, iwe epwe mecheres ngenikich lón Paratis ach sipwe mosonottam iteitan lupwen Jiowa epwe ngenikich mineféén emmwen sipwe fiti.​—SalF. 4:18; Joh. 16:12.

11. Pwata sipwe achocho iei le omusaaló tipisin ekkewe ekkóch, me ifa usun ei mettóch epwe álisikich lón Paratis?

¹¹ Sia pwal tongeni ammólnatá fán iten ewe manaw lón Paratis ren ach achocho le tipemecheres le omusaaló tipisin ekkewe ekkóch. Atun án Kraist epwe Nemenem Úkúkún Engeréú Ier, aramas resap chék mwittir unuséchúló. (Föf. 24:15) Iwe, sipwe tongfengen lefilach me omusomusfengen? Ika sia achocho iei le omusaaló tipis me ririéchfengen me ekkewe ekkóch, iwe epwe mecheres ngenikich le féri ena lón Paratis.​—Álleani Kolose 3:12-14.

12. Pwata a lamot sipwe ammólnatá iei fán iten ewe manaw lón Paratis?

¹² Lón Paratis, eli sisap tongeni angei iteiten mettóch sia mochen, are eli mi lamot sipwe witiwit mwen sipwe angei. Mi lamot sipwe kilisou me menemenéch ren met chék nónnómuch. Pwúngún pwe a lamot ngenikich ekkewe pwal esin napanap Jiowa a kan áiti ngenikich ach sipwe pwáraatá iei. Iwe, ren ach achocho le pwáraatá  ekkeei napanap iei, sia pwáraatá ach enletin lúkú pwe epwe fis ewe Paratis, me sia akkammolnatá fán iten ewe manaw esemuch. (Ipru 2:5; 11:1) Pwal och, sipwe pwáraatá pwe sia enletin mochen manaw lón ewe sókkun fénúfan meinisin aramasen lón ra álleasochisi Jiowa.

13. Met sipwe akkomwa lón manawach lón Paratis?

¹³ Lón Paratis, epwe wor rech mettóch meinisin mi lamot pwe sipwe pwapwaiti manawach. Nge ewe pwapwa mi watte seni meinisin epwe feito seni ach chiechiéch me Jiowa. (Mat. 5:3) Epwe wor chómmóng angang sipwe féri fán iten Jiowa me sipwe pwapwaiti ach angang ngeni. (Kölf. 37:4) Ina minne, lupwen sia akkomwa Jiowa lón manawach iei, iwe sia akkammolnatá fán iten ewe manaw lón Paratis.​—Álleani Mateus 6:19-21.

14. Ikkefa ekkewe mettóch sáráfé ra tongeni achocho ngeni?

¹⁴ Ifa usun sipwe alapaaló ach pwapwa lón ach angang ngeni Jiowa? Sia tongeni isetiw ekkewe mettóch sipwe achocho ngeni. Ika en sáráfé, ekiekiéchú le áeá manawom le angang ngeni Jiowa. Pwata kese kútta ekkewe pwóróus lón néúch kewe puk usun ekkewe sókkópaten angangen full time? Ka tongeni achocho ngeni eú me lein ekkena mettóch. * (Ppii ewe pwóróus fan.) Fós ngeni ekkewe ekkóch mi angang ngeni Jiowa full time ren fite fite ier. Ika ka áeá manawom le angang ngeni Jiowa, kopwe angei eú sókkun káit mi aúchea. Ei káit epwe álisuk le angang ngeni Jiowa lón Paratis.

15. Ikkefa pwal ekkóch mettóch sia tongeni achocho ngeni lón án Jiowa we angang?

¹⁵ A wor chómmóng mettóch sia tongeni achocho ngeni lón ach angang ngeni Jiowa. Áwewe chék, sia tongeni achocho ngeni ach sipwe lipwákéchúló lón eú kinikin lón ach angangen afalafal. Are sia tongeni achocho le weweéchúti ekkewe kapasen emmwen lón Paipel me káé ifa usun sipwe apwénúretá lón manawach. Sia tongeni ámúrinnééló ach állea mwen aramas, are ach kewe afalafal me meefiach sia uwawu atun mwich. Iei ewe mettóch mi lamot: Óm isetiw ekkewe mettóch ka mochen achocho ngeni lón óm angang ngeni Jiowa epwe álisuk le tinikkeniló me ammólnatá fán iten ewe manaw lón Paratis.

16. Pwata ach áeá manawach le angang ngeni Jiowa ina ewe sókkun manaw mi múrinné seni meinisin?

¹⁶ Lupwen sia áeá ach fansoun le ammólnatá fán iten án Kot we ótót sefé, itá sia pennúkúóló ach fansoun fán iten ewe sókkun manaw mi fen kon éch iei wóón fénúfan? Aapw. Ewe manaw mi múrinné seni meinisin, ina ach sipwe akkangang ngeni Jiowa. Sise angang ngeni fán echchimw are pokiten chék sia mochen kúna manaw seni ewe riáfféú mi lapalap. Manawach a échúló me a lapóló ach pwapwa lupwen sia ririéch ngeni Jiowa. Pún i a anapanapakich ach sipwe ina usun. Ach nónnóm fán án Kot chen me an emmwen, ina ewe sókkun manaw mi múrinné seni meinisin. (Álleani Kölfel 63:1-3.) Kich meinisin sia tongeni meefi ewe sókkun pwapwa mi feito seni ach angang ngeni Jiowa seni unusen letipach. Ekkóch mi fen angang ngeni Jiowa ren fite fite ier ra tongeni enletin apasa pwe iei ewe manaw mi múrinné seni meinisin.​—Kölf. 1:1-3; Ais. 58:13, 14.

17. Lón Paratis, epwe ifa ach ekiek usun lamoten ekkewe minen kunou me minen apwapwa sia mochen féri?

¹⁷ Lón Paratis, sipwe pwapwa le áeá ekkóch ach fansoun le féri ekkewe angang me minen kunou sia pwapwaiti. Pún Jiowa a férikich pwe epwe nóm rech ewe mochen le pwapwaiti manawach, me a pwonei pwe epwe “ngeni ekewe mönümanau meinisin mine repwe menemenöch ren.” (Kölf. 145:16; SalAf. 2:24) Mi lamot ngenikich fansoun asésé me kunou, nge epwe fen lapóló ach pwapwaitiir ika sia akkomwa ach ririéch ngeni Jiowa. Epwe pwal ina usun lón ewe Paratis. Ina minne, epwe eú alen tipachem ach sipwe akkomwa án Kot we Mwú me nefotofot wóón ekkewe feiéch mi feito seni ach akkangang ngeni Jiowa.​—Mat. 6:33.

18. Ifa usun sipwe pwáraatá pwe sia akkammolnatá fán iten manaw esemuch lón Paratis?

¹⁸ Ewe manaw lón Paratis epwe fókkun múrinné lap seni met sia tongeni anchangei. Amwo sipwe pwáraatá úkúkún ach mochen nónnóm lón ena Paratis ren ach ammólnatá iei fán iten ena “enletin manau.” Sipwe achocho le napanapeni ekkewe napanap Jiowa a ákkáiti ngenikich ach sipwe eáni, me sipwe afalafala ewe kapas allim fán tinikken. Amwo sipwe kúna ewe pwapwa mi feito seni ach akakkomwa ach fel ngeni Jiowa lón manawach. Sia fókkun lúkúlúk pwe lón Paratis, Jiowa epwe unusen apwénúetá mettóch meinisin a fen pwonei. Ina minne, iei sipwe manaweni manawach usun itá sia fen nónnóm lón Paratis!