1, 2. (a) Yika tunashimbwila kumona mu paraisu? (Tala chizulie chili hauputukilo.) (b) Hashi haha Yika muyikatwaha chiseke chinji?

KWAMBA umwenemwene, tunashimbwila “mwono wa mutolo” Postolo Paulu yamba ngwenyi uno uli “mwono wamwenemwene” (Tanga 1 Timoteu 6:12, 19.) Chino muchikalumbunuka kutwama ni mwono wa miaka yeswe mu paraisu. Chili chikalu kunyonga chize mwono muukapwa ha kuhinduka kanawa, ni chiseke, ni kuwahilila ha chimene cheswe. (Izaia 35:5, 6) Chino muchikawaha chinji hakupwa hamwe ni asoko ni masepa jetu, nawa ni waze makahindwisa. (Yoano 5:28, 29; Yilinga 24:15) Mutukapwa ni mashimbu akulilongesa yuma yaha ni kujama kulinga yuma yize twakuzanga chinji. Chakutalilaho, kota mutukalilongesa chinji hakutwala ku ciência. Hanji kota mutukalilongesa kwimba njimba hanji kulinga mazuwo chize mutuzanga yetwene.

² Chipwe ngwe tunashimbwila kumona yuma yino yipema, alioze kuwayila Yehova muchikatunehena chiseke chinji kuhiana. Tunyongenu chize mwono muukapwa muze atu eswe makahalisa jina  lisandu lia Yehova ni kumutayiza ngwe Mwata wo. (Mateu 6:9, 10) Mutukawahilila chinji hakumona hano hashi hanazale too ni atu angunu, ngwe chize Zambi azanga. Nawa tunyongenu chize muchikapwa chashi kukolesa usepa wetu ni Yehova muze hakehe-hakehe mutukapwa atu angunu!​—Samu 73:28; Tiangu 4:8.

3. Kuchi twatamba kulilulieka haliapwila?

³ Tuli ni ushindakenyo ngwetu Yehova kumakalinga yuma yino yipema yeswe, mumu “kuli Zambi yuma yeswe muyihasa kupwa.” (Mateu 19:25, 26) Nyi tunazange kutwama ni mwono wa mutolo hano hashi, wano e mashimbu aku “lalaminya ku” mwono wa mutolo. Tunanyingika ngwetu songo kwasala hakehe lize, kashika twatamba kupwa ni mwono uze muusolola ngwetu tunashimbwila songo lize ha shimbu lieswalio. Twatamba kulinga yuma yeswe yize mutuhasa haliapwila hanga tululieke mwono wetu hanga tukatwame mu chifuchi chaha. Tutalenu.

4. Kuchi mutuhasa kulilulieka haliapwile hanga tukatwame hashi haha? Hana chimwe chilweza.

⁴ Kuchi mutuhasa kulilulieka haliapwila hanga tukatwame hashi haha? Nyi mutufupa kuya ni kutwama mu chifuchi cheka, twatamba kulinga yimwe yuma hanga tulilulieke mba tukatwame mu chifuchi chacho. Chakutalilaho, mutuhasa kuputuka kulilongesa limi ni ndako ja atu waze atwamamo. Mutuputuka kweseka kulia cha mu chifuchi chacho. Chizechene, mutuhasa kulilulieka haliapwila hanga tukatwame hashi haha ha kulinga yize mutuhasa ni kusolola ngwe mwe tuli. Tutalenu chize twatamba kuchilinga.

5, 6. Kuchi mutulilongesa kwononokena usongwelo wa ululikiso wa Yehova muchitukwasa kulilulieka hanga tukatwame hashi haha?

⁵ Hano hashi, Satana kanazange hanga atu anyonge ngwo o mahasa kulinga chuma cheswacho ayo anazange. Atu anji kakunyonga ngwo chili chilemu kuliyula ene nawa ngwo katambile kwononokena Zambi. Yika yakulingiwa? Lamba linji ni kuhona uwahilila. (Jeremia 10:23) Alioze Yehova kali mwata wetu wa zango. Muchifuchi chaha mwono muukapwa upema chinji muze atu eswe makwononokena Zambi!

⁶ Hashi haha, mutukawahilila chinji kukaula usongwelo wa ululikiso wa Yehova hanga tukakwase kululieka paraisu ni kulongesa atu waze makahindwisa. Yehova makatwaha mulimo unji. Alioze kuchi mutwamba nyi waze ali ni yiteli matwita hanga tulinge yuma yize tushi kuzanga? Shina mutwononoka? Kutala mutulinga yize twatamba kulinga hanga tuzange mulimo  wetu? Mba tulilulieke hanga tukapwe ni mwono wa mutolo hashi haha, twatamba kwononokena usongwelo wa ululikiso wa Yehova haliapwila.

7, 8. (a) Mumu liaka twatamba kwononokena kuli waze akutusongwela? (b) Kwalumuka chika amwe akwa-Kristu akupalika? (c) Ushindakenyo uka mutuhasa kupwa nawo hakutwala ku chifuchi chaha?

⁷ Mba tulilulieke hanga tutwame hashi haha, twatamba kukalakala kulinga chinji hi kwononokene wika ko shimbi yize anatwehe mu ululikiso wa Yehova. Twatamba nawa kuwahilila ni yize tulinayo ni kulivwashana umwe ni mukwo. Chakutalilaho, nyi matwaha chiteli cheka, twatamba kuchitayiza ni zango lieswe ni kulinga yize mutuhasa hanga tupwe ni chiseke ni kuwahilila ni yize tulinayo. Nyi mutulivwashana ni waze ali tusongo haliapwila, chochene che mutukalinga muze mutukapwa hashi haha. (Tanga A-Hepreu 13:17.) Muze A-Izalele anjilile mu Chifuchi cha Chilakenyo, mutu ni mutu kamwehele ngiza yenyi yize matwama. (Kwalula 26:52-56; Yoshua 14:1, 2) Yetu kutwanyingikine kuze mutu ni mutu makamusa hanga atwame hashi haha. Alioze nyi mutulilongesa kulivwashana, mutukawahilila ha kulinga upale wa Yehova kweswako mutukapwa.

⁸ Tuchinyongenu upeme uze mukapwa hashi haha ha Zambi muze mutukatwama mushi lia chiyulo cha Wanangana wa Zambi! Ha chino, mutuwahilila ha kulivwashana ni ululikiso wa Yehova haliapwila ni kulinga mulimo weswawo matwaha. Ha mashimbu amwe, mulimo uze twakulinga muhasa kwalumuka. Chakutalilaho, amwe Betelita mu Estados Unidos kanakatuma mu minda hanga ambujole sango lipema. Nawa ha mukunda wa kupwa tushinakaji hanji kwalumuka cha yuma ku mwono, amwe tulayi akwa-kumeneka kakwatuma mu minda ngwe pionelu alipwila. O kakuwahilila chinji ni mulimo uno waha, nawa Yehova kanawahisa chinji. Nyi mutulemba ni kwita ukwaso wa Yehova, ni kulinga yeswe yize mutuhasa, nawa twalilongesa kuzanga mulimo weswawo matwaha, mutuwahilila chinji nawa Yehova matuwahisa (Tanga Yishima 10:22.) Kuchi mba mutwamba hakutwala hashi haha, shina mutukazanga kutwama ha chimwe chihela, alioze matuchizaho ni kututwala kuchihela cheka? Ha shimbu liacho, kunyonga ku chihela kuze mututwama hanji yize mutukalinga kuyichi kapwa ni ulemu. Alioze mutukasakwilila ha kutwama hashi haha.​—Nehemia 8:10.

9, 10. (a) Mumu liaka muchikafupiwa kupwa akwa-uhomboloji mu chifuchi chaha? (b) Kuchi mutuhasa kusolola ngwetu tuli akwa-uhomboloji haliapwila?

⁹ Mu chifuchi chaha, muchikafupiwa kupwa  akwa-uhomboloji. Chakutalilaho, hanji mutukevwa ngwo amwe atu kali ni chiseke mumu asoko ni masepa jo kapwa kuhindwisa. Kota mutukashimbwila amwe mashimbu hanga akahindwise atu waze twazanga. Nyi chino muchikalingiwa, shina mutukawahilila ni akwetu ni kupwa akwa-uhomboloji? (A-Roma 12:15) Nyi twalilongesa kupwa akwa-kushimbwila ni uhomboloji weswe muli Yehova hanga amanunune yilakenyo yenyi haliapwila, chino muchikatukwasa kupwa-akwa uhomboloji mu chifuchi chaha.​—Chilumbununyi 7:8.

¹⁰ Yetu mutuhasa kulilulieka nawa hanga tukapwe mu chifuchi chaha ha kupwa akwa-uhomboloji muze mututambula malongeso haha a unyingikiso wa umwenemwene wa mu Mbimbiliya. Shina twakulilongesa wano malongeso aha nyi? Nawa shina twakupwa akwa-uhomboloji nyi malongeso jacho keshi kutulumbunukina? Ni chenacho, mu chifuchi chaha muchikapwa chashi kupwa akwa-uhomboloji, shimbu lieswe Yehova matulweza chimwe chuma chaha chize mazanga hanga tulinge.​—Yishima  4:18; Yoano 16:12.

11. Mumu liaka twatamba kulilongesa kulikonekena haliapwila, nawa kuchi chino muchikatukwasa mu chifuchi chaha?

¹¹ Jila yikwo yize mutuhasa kulilulieka hanga tukatwame hashi haha yili kulilongesa chize twatamba kukonekena akwetu. Ha Kanunu Umuwika wa Miaka wa Kuyula cha Kristu, kota mulikambata amwe mashimbu mba atu eswe akapwe angunu. (Yilinga 24:15) Shina mutukasolola zango ni kulikonekena umwe ni mukwo? Nyi twalilongesa kukonekena akwetu ni kupwa ni usepa upema ni ayo haliapwila, muchikapwa chashi kuli yetu kuchilinga mu chifuchi chaha.​—Tanga A-Kolosu 3:12-14.

12. Mumu liaka twatamba kulilulieka haliapwila hanga tukatwame mu chifuchi chaha?

¹² Mu chifuchi chaha, kota kutuchikapwa mashimbu eswe ni yuma yeswe yize tunazange, hanji kushimbwila yuma yacho. Ndo tukasakwilile ni kuwahilila ni yuma yeswe yize mutukapwa nayo. Kwamba umwenemwene, mutukafupa kupwa ni yitanga yize Yehova akutulongesa hanga tusolole haliapwila. Ha kulilongesa kusolola yitanga yacho haliapwila, mutusolola ngwetu chifuchi chaha chili chamwenemwene kuli yetu, nawa ngwetu tunalilulieka hanga tukapwe ni mwono wa mutolo. (A-Hepreu 2:5; 11:1) Nawa mutukasolola ngwetu tunazange kutwama mu chifuchi muze atu eswe makwononokena Yehova.

13. Muze mutukapwa mu chifuchi chaha yika mutukasa kulutwe ku mwono wetu?

¹³ Mu chifuchi chaha, mutukapwa ni yuma yize muyikafupiwa hanga tukawahilile ku mwono. Alioze uwayilo wetu unene muukeza hakupwa ni usendo upema ni Yehova. (Mateu 5:3) Mutukahondangana chinji mu mulimo wa Yehova, nawa mutukawahilila chinji ha kumuwayila. (Samu 37:4) Kashika, muze mutusa Yehova kulutwe ku mwono wetu haliapwila yetu tunalilulieka hanga tukatwame mu chifuchi chaha.​—Tanga Mateu 6:19-21.

14. Yuma yika ya ku spiritu yize yenu akweze munuhasa kulinga mu mulimo wa Yehova?

¹⁴ Kuchi mutuhasa kulingila chinji Yehova? Yimwe jila yakuchilingila yili kufupa kulinga yuma ya ku spiritu. Nyi uli mukweze, nyonga chinji ha chize muzachisa mwono we ha kuwayila Yehova. Nyi mufupa-fupa milimo yeka ni yeka ya mashimbu eswe mu mikanda yetu. Yena muhasa kusakulaho umwe mulimo uze mulinga ku mwono we. * Hanjika ni yoze hanakalakala chinji mu mulimo wa Yehova. Nyi wazachisa mwono we hanga ulingile Yehova, ena muutambula fumbo lipema. Chino muchikakukwasa kulingila Yehova mu chifuchi chaha.

15. Yuma yikwo yika ya ku spiritu yize mutuhasa kutesa kulinga mu mulimo wa Yehova?

¹⁵ Kuli milimo yinji yize mutuhasa kutesa hanga tulinge mu mulimo wa Yehova. Chakutalilaho, muhasa kupwa ni nyonga lia kulilongesa utotombo waha mu mulimo wa sango lipema. Hanji mutuhasa kutesa kunyingika kanawa shimbi ja mu Mbimbiliya ni chize twatamba kujikaula ku mwono wetu. Hanji mutuhasa nawa kululieka kutanga chetu ha mbunga hanji kuhanjika pande chipwe kuhana kumbululo ku kukunguluka. Alioze, chikuma chili chino: Muze mutufupa kulinga yimwe milimo mu ululikiso wa Yehova, chino muchitukwasa kupwa ni zango ni kululieka hanga tukapwe mu chifuchi chaha.

16. Mumu liaka kuwayila Yehova yili jila yipema chinji ku mwono?

¹⁶ Muze mutuzachisa mashimbu jetu hanga tulilulieke ni kutwama hashi haha ha Zambi, shina chino chinalumbunuka ngwo tunatokesa mwono wetu musono nyi? Ka. Kuwayila Yehova yili jila yipema chinji ku mwono. Kutushi kumuwayila ha mukunda wa umwe mutu unatushinjila hanji ngwo mumu makatulamwina ku luyinda munene, ka. Alioze, nyi tuli ni usepa upema ni Yehova mwono wetu muupwa upema chinji hamwe ni chiseke. Yino ye iye azangile hali atu. Kupwa ni zango lia Zambi ni kukaula usongwelo wenyi ku mwono wetu chili chipema chinji kuhiana chuma cheswacho. (Tanga Samu 63:1-3.) Yetu eswe mutuhasa kwivwa chiseke chize chakwiza ha kuwayila Yehova ni mbunge yetu yeswe. Amwe waze akumuwayila ha miaka yinji mahasa kwamba ni ujikijilo weswe ngwo, yino ye jila yipema ku mwono.​—Samu 1:1-3; Izaia 58:13, 14.

17. Ulemu uka mukapwa ha yuma yize twakuzanga kulinga ni kuheha mu paraisu?

¹⁷ Mu paraisu, mutukawahilila chinji ha kupalikisa mashimbu jetu ha kulinga yuma yize twakuzanga ni kuheha. Ha yino yeswe, Yehova mwe watutangile ni nyonga lia kuwahilila yetwene, nawa kanalakenya ngwenyi makayukisa “usona wa waze eswe atwama ni mwono” (Samu 145:16; Chilumbununyi 2:24) Twakufupa kuheha ni kuhwima, alioze twakuwahilila nayo chinji muze twakusa usepa wetu uze tulinawo ni Yehova kulutwe. Ni mu paraisu chochene che muchikapwa. Kashika twatamba kupwa ni mana hanga tuliange “kufupa Wanangana.”​—Mateu 6:33.

18. Kuchi mutuhasa kusolola ngwetu tunalilulieka hanga tukatwame ni mwono wa mutolo mu Paraisu?

¹⁸ Hashi haha, mwono mukapwa upema chinji kuhiana mwono wa musono. Mutusolola chinji ngwetu tunazange hanga tukatwame hashi haha ha kululieka “mwono wamwenemwene” haliapwila. Tupwenu ni yitanga yize Yehova anatulongesa hanga tusolele ni kwambujola sango lipema ni zango lieswe. Mutuhasa kupwa ni chiseke hakusa uwayilo wa Yehova kulutwe ku mwono wetu. Twatamba kupwa ni ujikijilo ngwetu mu chifuchi chaha, Yehova makalinga yuma yeswe yize hanalakenya. Kashika tupwenu ni mwono uze unasolola ngwe hitwapwa kulu hashi haha.