1, 2. (a) Ñanyi bintu byawama bikekala mu Paladisa byo mubena kutengela? (Monai kipikichala kitanshi.) (b) Ñanyi kintu kikatampe kiketuletelanga lusekelo mu ntanda ipya?

TUBENA kutengela kwikala na “bumi bwa myaka ne myaka.” Mutumwa Paulo wibulumbulwile’mba bo “bumi bwa kine kine.” (Tangai 1 Timoti 6:12, 19.) Bavula bakekala myaka ne myaka mu Paladisa pano pa ntanda. Kechi twakonsha ne kufwanyikizha lusekelo lo tukekala nalo pa kwikala na bumi bwalumbuluka pa juba pa juba ne. (Isa. 35:5, 6) Fwanyikizhai byo kikawamapo kwisamba na balongo benu ne balunda nenu, kubikapotu ne boba bakasangulwa! (Yoa. 5:28, 29; Byu. 24:15) Kabiji tukafunda ne mingilo nabiji ya bya sayansi, nyimbo, bya kushimika mazubo, ne mingilotu ikwabo.

² Nangwa kya kuba tubena kutengela bino bintu byawama, kintu kikatampe kiketuletelanga lusekelo mu ntanda ipya ke kupopwela Lesa. Tukatemwa bingi kuyuka’mba jizhina ja Yehoba jazhijikwa ne bumfumu bwanji bwabinga. (Mat. 6:9, 10) Kiketuletela bingi lusekelo pa kumona kyaswa muchima wa Yehoba byo kikobiwa kwesakana na byo akebelenga bantu ne ntanda kwikala. Kabiji akilangulukai byo kikapeela kukosesha bulunda bwetu  ne Yehoba byo tukayanga na kulumbuluka!—Sala. 73:28; Yako. 4:8.

3. Twafwainwa kwinengezhanga kuba ka pa kino kimye?

³ Twaketekela kuba’mba Yehoba uketubila bintu byawama, mambo Yesu waambile’mba “kwi Lesa bintu byonse kechi byakatazha ne.” (Mat. 19:25, 26) Bino pa kuba’mba tukekale mu ntanda ipya, ne kutwajijila kwikala myaka ne myaka, kino kyo kimye kyo twafwainwa ‘kukwachisha’ ku bumi bwa myaka ne myaka. Twafwainwa kutengelanga mpelo ya ino ntanda yatama ne kwinengezhezha jimo byo tukekalanga mu ntanda ipya. Pano twakonsha kuba byepi bino saka tubena kwikala mu ino ntanda yatama?

4. Twakonsha kwinengezha byepi bya kwikala mu ntanda ipya? Ambai kya kumwenako.

⁴ Twakonsha kwinengezha byepi byo tukekalanga mu ntanda ipya ya Lesa? Fwanyikizhai kuba’mba mubena kukeba kuvilukila ku kyalo kingi. Mwakonsha kwinengezha byepi? Mwakonsha kutendeka kufunda mulaka wamba bantu ba ku kyokyo kyalo. Kabiji kyakonsha kwimukwasha inge mwafunda pa bisho byabo. Mwakonsha ne kutompapo kajo kamo ko baja. Inge mwauba bino, mwakonsha kutendeka kwikala nobe mwi bangikazhi ba mu kyokyo kyalo. Kyakonsha kwimukwasha mambo byo byo mukekalanga kimye kyo mukavilukilako. Po pamotu, twakonsha kwinengezhezha jimo byo tukekalanga mu ntanda ipya inge pa kino kimye ketwibikeko kwikala nobe tuji mu ntanda ipya. Twayai twisambe pa byo twakonsha kuba bino.

5, 6. Kufunda kukookela lutangijilo lufuma ku jibumba ja Yehoba kwitukwasha byepi kwinengezha kwikala mu ntanda ipya?

⁵ Mu ino ntanda, Satana utundaika bantu kulanguluka’mba bakonsha kuba byonse byo bakeba. Bantu bavula balanguluka’mba kyanema kwiubila byo bakeba, kabiji kechi bakeba kukookela Lesa ne. Ki ka kyafumamo mu kuba bino? Mwafuma buyanji bukatampe ne bulanda. (Yele. 10:23) Pakuba Yehoba ye Kalama wa butemwe. Fwanyikizhai bwikalo byo bukawama mu ntanda ipya, kimye bantu bonse kyo bakakookelanga bumfumu bwanji!

⁶ Mu ntanda ipya, kiketuletelanga bingi lusekelo kulondela lutangijilo kufuma ku jibumba ja Yehoba pa kwalula ino ntanda kwikala ke Paladisa, ne kufunjisha boba bakasangulwa. Yehoba uketupa mingilo yavula. Pano ibyepi inge kya kuba aba bakatangijilanga betupa mwingilo ye twabula kutemwa? Abya tukakookela nyi? Nanchi tukengila uno mwingilo na muchima umo nyi? Pa kuba’mba twinengezhe kukekala na bumi bwa myaka mu ntanda ipya, twafwainwa kukookelanga lutangijilo lufuma ku jibumba ja Yehoba ano moba.

7, 8. (a) Mambo ka o twafwainwa kwikela na muchima wa kutondwa? (b) Ñanyi lupimpu lwapitamo bena Kilishitu bamo? (c) Twaketekela’mba tukekala byepi mu ntanda ipya?

⁷ Kununga pa kukookela lutangijilo lwa jibumba ja Yehoba, kikwabo kyakonsha kwitukwasha kwinengezha kwikala mu ntanda ipya ke kufunda kutondwa na byo tuji nabyo ne kwingijila pamo na bakwetu. Inge ketukookele babena kutangijila ne kusekela mu mingilo yo betupa, ne mu ntanda ipya byo byo tukobanga. (Tangai Bahebelu 13:17.) Kimye bena Isalela kyo batwelele mu Ntanda ya Mulaye, bebabenye kyalo kupichila mu kuta bubale. (Bala. 26:52-56; Yosh. 14:1, 2) Pa kino kimye, kechi twayuka mpunzha yo baketupa pa muntu pa muntu ya kuya na kwikalako mu ntanda ipya ne. Pano bino, kwingijila pamo na bakwetu mu kuba kyaswa muchima wa Yehoba kuketuletela bingi lusekelo konse ko tukekalanga.

 ⁸ Kwikala mu ntanda ikalamwanga na Bufumu bwa Lesa ke kintu kyanema bingi kya kuba twafwainwa kwibikako kukookela jibumba ja Yehoba ne kwingila mingilo yo betupa. Kimye kimo, bakonsha kwitutambula mwingilo ye twingila ne kwitupa mwingilo mukwabo. Kya kumwenako, balongo ne banyenga bamo bengijila pa Betele mu United States bebafumya pa musampi ne kwibapa mwingilo wa kusapwila, kabiji babena kwiyowa bingi mwingilo wa kimye kyonse. Kabiji na mambo a kukoma nangwa bintutu bikwabo, bavula bajinga mu mwingilo wa kwenda bebapa mwingilo wa bupainiya bwiikajila. Inge twaikala na muchima wa kusekela mu mwingilo ye betupa, kulomba kwi Lesa kuba’mba etukwashe, ne kwingila mwingilo wanji papelela bulume bwetu, tukekala na lusekelo kabiji tukamwenamo byawama bingi mu mwingilo wetu nangwa kya kuba tubena kwikala mu moba akatazha. (Tangai Byambo bya Maana 10:22.) Pano nga mu ntanda ipya kikekala byepi? Kampe tulangulukapo mpunzha imo ko twakonsha kutemwa kwikala mu ntanda ipya, pano kikekala byepi inge betwambila kuya na kwikala ku mpunzha ingi? Konse ko tukekalanga ne kwingijila, twaketekela’mba tukatondwa kabiji tukasanta bingi ne kwikala na lusekelo.—Ne. 8:10.

9, 10. (a) Mu ñanyi bintu mo tukakebewanga kwikala batekanya mu ntanda ipya? (b) Twakonsha kumwesha byepi amba twatekanya?

⁹ Mu ntanda ipya, kukekalanga bimye po tukakebewanga kutekanya ne kupembelela. Kya kumwenako, apo kampe tukomvwa’mba bakwetu batambwila balongo babo ne balunda nabo basangulwa. Bino atweba tukakebewanga kupembelela kimye kikasangulwa balongo betu nangwa balunda netu. Inge kyaikala bino, nanchi tukasekela na bakwetu bakatambwila balongo babo saka twatekanya nyi? (Loma 12:15) Inge pa kino kimye twafunda kupembelela milaye ya Yehoba saka twatekanya, kiketukwasha kupembelela saka twatekanya pa kyokya kimye.—Sapwi. 7:8.

¹⁰ Kabiji twakonsha kwinengezhezha jimo byo tukekalanga mu ntanda ipya kupichila mu kutekanya inge kwaubiwa lupimpu mu ndumbulwilo yetu ya bukine bwa mu Baibolo. Twafwainwa kutanga bulongo bishinka bya katataka ne kutekanya inge twabula kumvwisha mo byayila. Inge ketube bino, ne mu ntanda ipya kiketupelela kutekanya inge Yehoba witubuula mikambizho yo tukakebewanga kulondela.—Maana 4:18; Yoa. 16:12.

11. Mambo ka o twafwainwa kufunjila kulekelako bakwetu mambo pa kino kimye, kabiji kino kiketukwasha byepi mu ntanda ipya?

¹¹ Jishinda jikwabo jo twafwainwa kwinengezhezhamo bya kwikala mu ntanda ipya ke kulekelako bakwetu mambo. Mu kimye kya Bukalama bwa Kilishitu bwa Myaka Kiumbi, kampepo pakapita kimye pa kuba’mba bantu bonse bakekale balumbuluka. (Byu. 24:15) Nanchi tukekala na butemwe ne kulekelako bakwetu mambo nyi? Inge twafunda kulekelako bakwetu mambo ne kwikala na bulunda bwawama na bakwetu pa kino kimye, kiketupelela kuba byonkabyo mu ntanda ipya.—Tangai Kolose 3:12-14.

12. Mambo ka o twafwainwa kwinengezhezha jimo byo tukekalanga mu ntanda ipya?

¹² Mu ntanda ipya kechi baketupangatu bintu byonse byo tukakebanga ponka po twibikebela ne. Kimo kimye tukakebewanga kupembelela. Kabiji tukakebewanga kwikala na muchima wa kusanta ne kutondwa na bintu byo tukekala nabyo, ne kumwena lusekelo mu kukookela bukalama bwa Yehoba. Tukakebewanga kwikala na byubilo bibena kwitufunjisha Yehoba luno. Inge twafunda kwikala byonka byo tukekalanga mu ntanda ipya, ko kuba’mba tubena kufunda byubilo  byo tukekala nabyo myaka ne myaka. Tubena kukosesha lwitabilo lwetu mu “ntanda ikeya.” (Hebe. 2:5; 11:1) Kabiji tumwesha ne kuba’mba tubena kukebesha bwikalo bwawama bukekala mu ntanda ipya. Kwa kubula nangwa kuzhinaukatu ne, tubena kwinengezha byo tukekala myaka ne myaka mu ntanda ipya ya Lesa.

13. Ñanyi kintu kyo tukatangizhangako mu bwikalo bwetu mu ntanda ipya?

¹³ Akilangulukai ne pa jishinda jikwabo jo twafwainwa kwinengezhezhamo byo tukekala mu ntanda ipya. Nangwa kya kuba betulaya’mba mu ntanda ipya mukekala kajo kavula ne bintu bikwabo byawama, bino kintu kikatampe kiketuletelanga lusekelo ke kwikala na bulunda bwawama na Lesa. (Mat. 5:3) Kwingijila Lesa kyo kintu kikatampe kyo tukobanga, kabiji tukamwesha’mba tubena kusangalela mwi Yehoba. (Sala. 37:4) Inge ketutangizheko kwingijila Lesa mu bwikalo bwetu, ko kuba’mba tubena kwinengezha byo tukekalanga mu ntanda ipya.—Tangai Mateo 6:19-21.

14. Ñanyi bikonkwanyi bya kwingijila Lesa byakonsha kwibikila banyike?

¹⁴ Twakonsha kwingijila byepi Yehoba na lusekelo? Jishinda jimo ke kwibikila bikonkwanyi bya kwingijila Lesa. Inge mukiji banyike, langulukainga pa kwingijila Yehoba mu bwikalo bwenu bonse. Mwakonsha kupesa pesa mu mabuku etu pa kuba’mba muyuke mbaji yapusana pusana ya mwingilo wa kimye kyonse, ne kusalapo mwingilo umo ne kwibikila kikonkwanyi kya kumwingila. * Mwakonsha kwisambako na bamo baingijila Yehoba pa myaka yavula mu mwingilo wa kimye kyonse. Inge kemwingijile Yehoba mu bwikalo bwenu bonse, mukafunda bintu byanema bingi. Kino kikemukwasha kwingijila Yehoba mu ntanda ipya.

15. Byo tuji basapwishi ba Bufumu, ñanyi bikonkwanyi bya kwingijila Lesa byo twakonsha kwibikila?

¹⁵ Byo tuji basapwishi ba Bufumu, ñanyi bikonkwanyi bya kwingijila Lesa byo twakonsha kwibikila? Twakonsha kwibikila kikonkwanyi kya kuwamishako busendwe bwetu mu mwingilo wa kusapwila. Nangwa twakonsha kwibikako kuba’mba tumvwishenga mafunde a mu Baibolo ne kwialondela. Kabiji twakonsha kufunda kwamba bulongo majashi ne kuwamishako ntangilo yetu pa mvula bantu, nangwa kuwamishako mikumbu yetu pa kupwila. Mwakonsha ne kufundatu bintu bikwabo. Kishinka ke kino: Inge  mwibikila bikonkwanyi bya kwingijila Lesa, mukekala bingi na kizaku kya kwingila mingilo ya Lesa, kabiji kino kikemukwasha kwinengezha byo mukekalanga mu ntanda ipya.

16. Mambo ka o twakonsha kwambila’mba kwingijila Yehoba kyo kintu kyanema?

¹⁶ Inge ketwingijishe kimye kyetu pa kwinengezha byo tukekala mu ntanda ipya ya Lesa, nanchi kibena kulumbulula’mba tubena kushalapo bintu byawama bya mu bwikalo nyi? Ine. Kwingijila Yehoba po paimena bwikalo bwawama. Kechi tumwingijila na mambo a kwitukanjikizha nangwa na mambo a kukeba kupuluka malwa akatampe ne. Inge twaikala na bulunda bwawama na Yehoba, bwikalo bwetu buwama kabiji twikala bingi na lusekelo. Mambo Lesa byo byo akebelenga amba tukekale. Kutangijilwa na Yehoba ne kwikala mu butemwe bwanji kyo kintu kyanema bingi. (Tangai Salamo 63:1-3.) Bonse twakonsha kwikala na lusekelo lufuma mu kupopwela Yehoba na muchima wetu yense. Bamo bamwingijila pa myaka yavula bakonsha kwamba’mba kyo kintu kyakilapo kunema.—Sala. 1:1-3; Isa. 58:13, 14.

17. Nanchi kukaya ne kuba bintu byo tukeba byo bikanema mu Paladisa nyi?

¹⁷ Mu Paladisa tukekalangapo na kimye kya kuba bintu byo tukeba ne kukaya. Mambo Yehoba witulengele na kilaka kya kukeba kuba bintu bya kyetu kyetu, kabiji witulaya’mba ‘ukapa bilengwa byumi bintu byonse byo bikeba.’ (Sapwi. 2:24; Sala. 145:16) Tukeba kukaya ne kukokoloka, pano bino, twakonsha kwiyowatu bino bintu inge patanshi twanemeka bulunda bwetu ne Yehoba mu bwikalo bwetu. Byo byo kikekala ne mu ntanda ipya. Onkao mambo, kyanema bingi ‘kutwajijila na kukeba Bufumu patanshi’ ne kutesha muchima pa bintu byawama bifuma mu kwingijila Yehoba.—Mat. 6:33.

18. Twakonsha kwinengezha byepi kwikala na bumi bwa myaka ne myaka mu Paladisa?

¹⁸ Mu ntanda ipya tukekala bingi bulongo. Onkao mambo, twafwainwa kumwesha amba tukebesha kwikala mu ntanda ipya kupichila mu kwinengezhezha jimo lonka luno. Twayai twikale na byubilo bibena kwitufunjisha Yehoba ne kusapwila mambo awama na mukoyo. Twayai tusangalelenga mu kutangizhako mwingilo wa Yehoba mu bwikalo bwetu. Twaketekela kuba’mba mu ntanda ipya, Yehoba ukoba bintu byonse byo alaya. Onkao mambo, twayai atweba bonse twikalenga nobe twatwela kala mu ntanda ipya.