1, 2. (a) Nkiswinyi yakumujimba yimwatalilaña kudiluñisha chikupu muParadisa hamaseki? (Talenu mwevulu wakutachikilahu.) (b) Nkiswinyi yakuspiritu yakekala mwituña dadiha?

 “WUMI WALALA CHIKUPU.” Etu amavulu, iyi nhoshelu yatwanukishaña kuchiñeja kwawumi wahaya nyaka muParadisa hamaseki. Kafwampi, kapostolu Pawulu wesekejeli “wumi wahaya nyaka” ‘nawumi walala chikupu.’ (Tañenu 1 Timotewu 6:12, 19.) Tunakuchiñilila wumi wukatwalekahu haya nyaka wukatuletela muzañalu chikupu. Tukutwesha wanyi kufwikija yuma chiyakekala chakwila ifuku dejima tunakuhinduka twakola kumujimba, muyitoñojoka nawa tunakutiya chiwahi. (Isa. 35:5, 6) Toñojokenu chitwakazañalalaña hakuhanjeka nawantaña niamabwambu, kushilahu niantu akasañulawu. (Yow. 5:28, 29; Yil. 24:15) Tukekala nakukooleka kwakudiza cheñi yuma yayiha yidi neyi sayansi, tumina, kufunjijeka chakutuña hela nyidimu yikwawu.

² Hela chakwila tunakutalila iyi yuma yayiwahi, ilaña nkisu yayeni yitukatambwila mwituña dadiha hiyuma yakuspiritu. Wenowu muzañalu wutwakatiya hakwiluka netu ijina daYehova anadijiliki nawa wanta windi anawuyiñisha! (Mat. 6:9, 10) Twakazañalala chikupu hakumona nkeñelu yaYehova yakusambila yafuukwililiyi  antu niiseki chiyakashikijewaña. Nawa toñojokenu chichakatupelela kukundama kwakwihi naYehova chitukekalaña awanina chovu-chovu.—Mas. 73:28; Yak. 4:8.

3. Twatela kudiloñesha kwiladi chayinu mpinji?

³ Tunateli kwikala naniji nkisu muloña Yesu watukana nindi “yuma yejima yinatwesheki kudi Nzambi.” (Mat. 19:25, 26) Dichi neyi tunakufwila kushakama mwituña dadiha nikutwalekahu kuhada hanyima yaYaaka Ikombakaji daChiyuulu chaKristu, yinu diyi mpinji yitwatela ‘kukwata chikupu’ kuwumi wahaya nyaka. Twatela kushakama nakuchiñilila kukuma kwakanu kaayi katama nawa twatela kwikala nayililu yayiwahi chayinu mpinji kulonda tumwekeshi netu tunadiloñeshi makonu chakushakama mwituña dadiha. Tunateli kwila ñahi mwenimu chineli tunakushakama mukaayi munenzali yililu yatama?

4. Lumbululenu chitunateli kuloñesha chayinu mpinji chitwakashakamaña mwituña dadiha.

⁴ Twatela kuloñesha ñahi chihandilu chamwituña daNzambi dadiha chayinu mpinji? Twili netu tunakufuukulahu kubuukila kwituña dacheñi. Tunateli kudiloñesha ñahi? Tunateli kutachika kudiza idimi dahoshañawu antu akunodu ituña. Kudiza chisemwa chawu kunateli kutukwasha. Tunateli kutompa yakudya yadyañawu. Munjila yikwawu, tunateli kutachika kuhanda neyi enimbu amunodu ituña. Kafwampi, dichi chitwakahandaña neyi tunashiki dehi munodu ituña. Munjila yoyimu, tunateli kuloñesha chihandilu chamwituña dadiha chayinu mpinji, kwesekeja nahakumina ñovu jetu neyi chitukahandaña. Ichi dinu, tushinshikenu yakutalilahu yinalondeluhu.

5, 6. Indi kulondela ntanjikilu yaNzambi yatukwashaña ñahi kudiza chitukahandaña mwituña dadiha?

⁵ Mwituña dadiha, wanta waNzambi akawuhakwilañaku chikupu. Hakekala chaambu cheneni chikupu nanfulumendi yawantu yayuulañawu kudi Satana. Yumanyi yinafumumu chineli antu amavulu atoñojokaña nawu chalema kudimena awenawu? Kubula kwiteja wunlomboli waNzambi chinaleñeli antu kumona makabi niyihuñu yamaneni. (Yere. 10:23) Tunakutalila chikupu mpinji yakela antu ejima akwovwahilaña chiyuulu chachiwahi chaYehova.

⁶ Twakatiya kuwaha hakwikala muchiyuulu chaYehova mwituña dadiha hampinji yitukawahishaña iseki, kutañisha antu akasañulawu nikwila nkeñelu yaYehova yafuukwilayi antu. Twakeladi neyi atuleja kuzata mudimu wutwabula kukeña? Komana twakalondela iwu wunlomboli nakuzata hakumina ñovu jetu kulonda tukadiluñishi mudimu wetu? Etu amavulu tukwiteja. Komana twovwahilaña wunlomboli waNzambi makonu? Neyi tunakwila mwenimu tunakuloñesha kwikala nawumi wahaya nyaka muchiyuulu chaYehova.

7, 8. (a) Muloñadi chitwatelela kwikala namuchima wakwovwahila? (b) Kuhimpikanyi kunamonuwu akwaKristu amakwawu? (c) Yumanyi yitwatela kukuhwelela kutalisha hachihandilu mwituña dadiha?

⁷ Bayi neyi twatela kuloñesha chitwakashakamaña mwituña dadiha kuhitila mukulondela ntanjikilu yaYehova yakatataka hohuku, ilaña twatela cheñi kuzata kulonda tubuleña kufwila yuma yayivulu nikwikala naspiritu yakwovwahila. Neyi twovwahila anakutulombola makonu, hadaha nikutiya kuwaha mudimu wetu wawuha, dikwila nawu twakekala nayililu yoyimu mwituña dadiha. (Tañenu Aheberu 13:17.) Chashikiluwu aIsarela Mwituña daChikaninu, ayinkeli maluña kwakushakama. (Kuch. 26:52-56; Yosh. 14:1, 2) Hela chochu, makonu wejima wetu hituneluki iluña kutwakashakamaña mwituña dadihaku. Kafwampi, kwovwahila kukatuleñela kwikala muzañalu weneni hampinji yitukelaña nkeñelu yaYehova kwejima kutwakashakamaña hamaseki hanoyu mpinji.

 ⁸ Hakwila twakekali nakukooleka kwakushakama muchiyuulu chaWanta waNzambi, twatela kuzata nañovu kulonda tuzatileña hamu nakuloñesha kwaYehova nikuzata nyidimu yaNzambi. Hela chochu, chihandilu chetu chinateli kuhimpika mukuhita kwampinji. Chakutalilahu, amana kwetu niahela amakwawu adiña muchisaka chaBeteli chamuUnited States ayinka cheñi kuzata mudimu wakushimwina nawa anakudiluñisha nkisu jajivulu munyidimu yampinji yejima. Hamuloña wakukula kumujimba hela yuma yikwawu, amana kwetu amakwawu adiña mumudimu wawunkoñi wañinza anayihimpi nakwikala apayiniya adimena. Neyi tukuzañalalaña nayuma yitukweti, kulomba wukwashu kudi Nzambi nikuzata hakumina ñovu jetu mumudimu windi, tukwikala namuzañalu nawa tukutambwila nkisu jajivulu hela chakwila tudi mumufuku akukuminina akala. (Tañenu Yishimu 10:22.) Indi yuma yitwachiñililaña yakekala ñahi kumbidi? Tunateli kufwikija iluña ditwakakeña kushakama mwituña dadiha, ilaña anateli kutuleja kuya kwiluña dacheñi. Hichidi namuloña nakwiluña kutwakazatilaña nimudimu wutwakazatañaku, ilaña twatela kwiluka netu twakatiyaña kuwaha nayuma yitukekala nayu nawa tukazañalalaña chikupu.—Nehe. 8:10.

9, 10. (a) Munjilanyi mutunateli kumwekeshela muchima wakudiwunjika mwituña dadiha? (b) Tunateli kumwekesha ñahi netu twadiwunjika?

⁹ Mwituña dadiha, kwakekala mpinji yikwawu yitwakakeñekaña kudiwunjika. Chakutalilahu, tunateli kutiya antu amakwawu anakuzañalala muloña antaña niamabwambu jawu anayisañuli. Ilaña etu twatela kuhembela chakasañulawu antu itwakeña. Neyi yuma yikala muniyi njila, komana twakazañalala nawakwetu nikwikala adiwunjika? (Rom. 12:15) Makonu neyi tudiza chililu chakudiwunjika nakutalila Yehova chakashikijayi yikaninu yindi, chakatukwasha kwikala adiwunjika hayina mpinji.—Mukwa. 7:8.

¹⁰ Tunateli cheñi kuloñesha chitwakashakamaña mwituña dadiha kuhitila mukudiwunjika kutalisha hansañu yalala yitweluka yamuBayibolu yahimpañawu. Komana twadizaña nikwikala adiwunjika kutalisha hansañu yamuBayibolu yinakulumbululawu chovu-chovu makonu? Neyi twila mwenimu, hitwakekala nakukala hakwikala adiwunjika mwituña dadiha neyi Yehova nashimuni dehi yuma yikakeñekaña kudi antuku.—Yish. 4:18; Yow. 16:12.

11. Yumanyi yinakutudizishayi Yehova makonu kutalisha hawubwambu wetu nawakwetu, nawa chumichi chakatukwasha ñahi mwituña dadiha?

¹¹ Chililu chikwawu chakatukwasha mwituña dadiha, hikwikala namuchima wakwanakena. Hakahita mpinji hakwila antu aloña niabula kuloña akekali awanina muChiyuulu chaKristu chaYaaka Ikombakaji. (Yil. 24:15) Komana haniyi mpinji, twakadikeña nikudanakena wumu namukwawu? Neyi twikala nachililu chakwanakena nikwikala nawubwambu wawuwahi nawakwetu makonu, chumichi chikatukwasha kwila mwenimu hayina mpinji.—Tañenu Akolosi 3:12-14.

12. Lumbululenu kunuñañana kudi hakachi kayuma yitwachiñililaña kumbidi nachihandilu chetu chamakonu.

¹² Mwituña dadiha bayi neyi yuma yejima yitukakeñaña akatwinkaña hayoyenoyu mpinji yitunakuyikeñaku. Kafwampi, ichi chihandilu chikabombelamu kusakilila hayuma yitukweti kwesekeja nachihandilu chetu kushilahu nikwovwahila chiyuulu chaYehova chakukeña. Dikwila nawu twakazatishaña iyi yililu yitunashimuni yinakutudizishayi Yehova nindi twikali nayu makonu. Neyi tudiza chakushakama chiwahi makonu neyi chitunakukeña netu twakashakameña, dikwila nawu tunakwikala nayililu yitwakamwekeshaña haya nyaka. Tunakukolesha chikuhwelelu chetu kulonda tudiloñeshi chakushakama ‘heseki dawantu  dakenza.’ (Heb. 2:5; 11:1) Kubombelahu, twamwekeshaña netu twasha muchima kuyuma yaloña yakekala heseki. Mwamweni, tunakudiloñesha kulonda twakekali nawumi wahaya nyaka mwituña daNzambi dadiha.

13. Nyidimwinyi yitwakatwamijañaku mwituña dadiha?

¹³ Shinshikenu cheñi njila yimu mutunateli kudiloñeshela hawumi walala chikupu wudi kumbidi. Hela chakwila atukana nawu twakekala nayakudya yayivulu niyuma yikwawu yitwakeñaña hamaseki mwituña dadiha, twakazañalala muloña akatwinka cheñi yuma yakuspiritu yitwakeñaña. (Mat. 5:3) Twakatwamijañaku nyidimu yakuspiritu nawa twakamwekeshaña netu twatiyaña kuwaha nankashi kumukalakela Yehova. (Mas. 37:4) Neyi tutwamijañaku yuma yakuspiritu makonu, tunakudiloñesha hawumi walala chikupu wudi kumbidi.—Tañenu Matewu 6:19-21.

14. Yikonkwanyinyi yakuspiritu yinateli kukwasha atwansi kutoñojoka hawumi wahaya nyaka?

¹⁴ Tunateli kusweja ñahi kuzañalala hakumukalakela Nzambi? Njila yimu, hikwikala nayikonkwanyi yakuspiritu. Neyi mudi atwansi nawa munakutoñojoka chikupu kumuzatila Yehova, komana kwila mutoñojoka hansañu yashiyashana yasonekawu munyikanda yetu yakundama kumudimu wampinji yejima kulonda mutonduhu njila yimu nakwimika chikonkwanyi, nehi? * Munateli kuhanjeka nawantu anazati yaaka yayivulu mumudimu wampinji yejima. Neyi muzataña nañovu mumudimu wakushimwina, dikwila nawu munakudiloñesha kutwalekahu kuzata nyidimu mwituña dadiha daNzambi mwakayidizishawu kuzata nyidimu yalema yaNzambi.

15. Yikonkwanyinyi yakuspiritu yinateli kushikijawu akwakushimwina aWanta?

¹⁵ Chineli tudi akwakushimwina aWanta, yikonkwanyinyi yakuspiritu yitunateli kwimika? Tunateli kwimika chikonkwanyi kulonda twiluki chakushimwina mumudimu wetu. Hela tunateli kuzata nañovu kulonda twiluki chiwahi nshimbi jamuBayibolu nichakujizatisha. Komana tunateli kuzata nañovu kulonda tutañeña nikuhana mpanji chiwahi hadi antu amavulu hela kwakulañahu hakupompa? Chakadi nikujina munateli kutoñojokahu hayuma yikwawu yimunateli kuzatilahu. Tunatalishi mukwila netu: Kwimika yikonkwanyi yakuspiritu kukuyikwasha kwikala neyena dakuzata nyidimu yaNzambi nawa chumichi chikuyikwasha kudiloñesha chakushakama mwituña dadiha.

16. Muloñadi kumuzatila Yehova chikwekalila chuma chachiwahi muchihandilu?

¹⁶ Komana kwikala nampinji yakudiloñesha hachihandilu chamwituña daNzambi dadiha, chaya mukwila nawu tunakudibonda chihandilu chachiwahi makonu? Kwakulehi mwani! Kumuzatila Yehova dichi chuma chasweja kulema muchihandilu. Hitwamuzatilaña Nzambi hamuloña wakwila anakutukanjikija kudi muntu hela netu tukapuluki halukadi lwaswejaku. Wakeñaña nindi twikali namuzañalu weneni neyi tumuzatilaña yena. Neyi Yehova yatulombolaña nikutumwekeshela kukeña kwindi, diyi njila yayiwahi kubadika kuhanda chihandilu chakadi wubwambu nayena. (Tañenu Masamu 63:1-3.) Kafwampi, hitunateli kuchiñilila ituña dadiha kulonda twakadiluñishi nkisu jakuspiritu jafumaña mukumuzatila Yehova namuchima wumuku, nimakonu tunakudiluñisha nkisu yeniyi. Eñañi, etu amavulu twatachikili dehi kudiluñisha nkisu yeniyi nawa tweluka netu kwosi chihandilu chinateli kutuletela muzañalu wabadikaku.—Mas. 1:1-3; Isa. 58:13, 14.

17. Indi kunooka nikwila yuma yitwakeñaña yakekala ñahi yalema muParadisa?

¹⁷ Mwituña dadiha daNzambi twakadiluñisha kwikala nampinji yakwila yuma yitwakeñaña. Muloñadi Yehova chatuleñeliyi nampwila yakukeña kwila yuma yitwakeñaña nawa yatuzañaleshaña neyi chakwila hakeñeleña nindi twakadiluñisheña yumiyuku? (Mukwa. 2:24) Muniyi yuma niyuma yikwawu, Yehova ‘wakekutisha yuma yejima yikweti wumi nayuma yakeñawu.’ (Mas. 145:16) Twakeñaña kuzañalala nikwikala nampinji yakunoka, ilaña muzañalu wutwatiyaña hakwila yumiyi waswejelañaku neyi tutwamijaku wubwambu wetu naYehova. Dichi chitwakatiyaña nimuParadisa yahamaseki. Chikuwaha neyi twambula mpinji yakwila yuma yitwakeñaña, kulonda tusambileña kukeña Wanta nikusha muchima hankisu yakuspiritu yidi nawantu jaYehova makonu.—Mat. 6:33.

18. Tunateli kumwekesha ñahi netu tunakudiloñesha kwikala nawumi wahaya nyaka muParadisa?

¹⁸ MuParadisa yinakwinza, twakekala namuzañalu weneni wutwabulahu dehi kwikala nawu. Tumwekeshenu mpwila yetu yayeni yakukeña wumi walala chikupu kuhitila mukudiloñesha makonu. Dichi tufwilenu kwikala nayililu yaNzambi nikwikala namuzañalu waweni mumudimu wunatwinkuwu wakushimwina Wanta neyena. Twikalenu namuzañalu wafumaña mukumuzatila Yehova muchihandilu chetu chejima. Dichi tushakamenu nakuchiñilila chitwakashakamaña mwituña dadiha, nakukuhwelela muyikaninu yaYehova yatukanayi.